رواية خطايا واجتثات الفصل التاسع والثلاثون 39 بقلم نور علي البصري
#خطايا_واجتثاث 39
بقلمي #نور_علي_البصري ♡
ــــــــــــــــــــــــــ☆ــــــــــــــــــــــــــــــ
لا شيء يأتي كما نتمنى ولكن نحن على ثقة بأن الله يخبئ لنا الأجمل 🤍
ــــــــــــــــــــــــــ☆ـــــــــــــــــــــــــــــ
ســــــــــــ♡ــــــــــــوؤد
فتحت عيوني على صريخ أمي وهذا (فشلتي المجيرة) ساندني وهو يجس نبضي دفعته وزحفت على ظهري ورى بساع وآني أحجي عربي وهو مصفن بوجهي يحاول يفهم شنو أرطن..
: وخر وخر شوف أكولك بس تحجي لعمي على الموقف المجير والنبي..
أنتبهت أحجي عربي رجعت أحجي لغته..
: أي دير بالك تكول لعمي على اللي صار زين..
رجعت أتمعن بملامحه و أذكر الموقف بس هزيت راسي مو وقت أذكر مواقف محرجة ومخجلة..
ردت أكوم بس دوخة لزمتني أرتاحيت من شفت ماجدة.. طلعت هي وعمي وساندين أمي..
: يمة شبيج؟!
باوعتلي وبجت تريد تولول بس عمي سكتها..
: على كيفج حياتي مو زين عليج ومنا الجوارين لا يتصلون بالشرطة عبالهم أزعاج أو عركة..
: ولك هذا أبن أخوي ولكم الله أكبر بلد مشاف راحة ولا شبانه تتونس بشبابها يمة بنياتك يا محمد شحالهن اليوم بلياك..
أنهبطت وراد يغمى علية مرة ثانية بس قاومت ظليت أبجي وألطم على رجليه وأردد..
: راح الفقير شلون يمة نسافر للفاتحة؟
بس عمي ما قبل..
: لا وين أمج حامل بآخر العنقود أن شاء الله عليها شهر مو مال سفر وطيران وأخاف عليها أنتم معذورين تواصلوا وياهم النت موجود..
أمي فشلته..
: لا تخليني هسة والنبي أتخبل عليك ولك أريد أودع محميد ولك راح ولك راح يدفنوه..
: فوزية حبيبتي والله لو بيها مجال من عيوني بس على ما نوصل يكون أندفن خوما يأخرون الجنازة أنتِ روحتج شتفيده ترجعه للحياة؟ صلي إله و ذكري الله وأهدي إله ختمة (يس) وسورة (الملك) ينورن قبره..
ما جاوبته ظلت بس تنوح آني هنا رجعت الشريط لورى مو چن عمي كال حامل صخام؟ هديت عليهم..
: ما تشبعون جهال مو عيب عليكم النوب يحجي مناك خلفتك من الأجنبية ومنا من أمي كافي..
كام عمي يبرر و أمي بطرف حجابها غطت وجهها بس عيونها بقت تصب على أبن أخوها وتنود بجسمها و سكتت مستحية..
والله نسينا هذا والتر كاعد لحد ما كح ينبهنا لوجوده رجعلي شعور الفشلة أنتبهله عمي وفتح إيديه..
: والتر فرحان لشوفتك ورى هاي السنتين زين أندليت العنوان..
رد بلغته : رغم تواصلنا واتساب بس لبيت دعوتك إلي لزيارتك ببيتك..
باوعلي و تسرسحت بمكاني وآني أدور شي أظم روحي بي ختلت بظهر أمي بحجة أواسيها وآني أرجف بس لا يكول لعمي طلعوا عرف..
هو أعـتذر..
: آسف أجيت بوقت غير ملائم أعتذر..
ردت أكوله جا أنت دوم رجلك خضرة بالأوقات الحرجة بس هذا أجنبي شيفتهم بس حجى عربي شو وآني دخت طشرني حتى بجيتي على محمد راحت من وراه..
هو ترخص من عمي وراح وعمي ظل محرج الوضع مو مال يبقيه و أمي مسويتها مناحه بس طلع حضنت أمي أواسيها..
: يمة كافي فدوة..
راحت ماجدة للمطبخ جابت بطل مي شربت أمي..
: سـؤود.. خابريلي حسين.. هج..
بتردد نفذت من سنين أعرف حسين.. زعلان مني حتى من يتصل كاميرا بأمي وأمد راسي أسلم يدور وجهه ويرد السلام من ورى خشمه باوعت لأمي..
: ما يجاوب يمة نت ماكو عنده..
رد عمي وهو حاظن أمي يهدأها..
: ذكري الله العالم ملتهية مو بحال نت و أتصال الله يرحمه ربج أختارله الشهادة والموت الكريم أستشهد يدافع عن الوطن والشرف والكرامة..
شهكت و تذكرت شذكرت على أساس آني نسيت ليش حسن هم ينسي..
هدأت أمي بعد ربع ساعة عمي صارلها السند و أخذها لغرفتهم بس راحوا و سدوا بابهم أكيد هناك على صدره تبجي و تفضفض عمي أله فضل هواي على أمي خلال هاي السنين الطويلة..
و أولاد عمي من زوجته المتوفية متزوجين حالياً و كلمن عايش ببيته مستقر..
باوعت لماجدة وهي باوعتلي وعيونها مدمعة..
ماجدة : حيل أنقهرت على محمد ما أنسى الأشهر العشتهن بالريف من أطلع وياج لو وي عمة أم حسين جان يجي و أبد ما يوم رفع عينه بوجهي ولا ضايقني يحاجيني بصورة جمع ها شلونكم اليوم شلون صرتم وهاي الكم يخليها بيدج لو بيد عمتي رجوة ويروح هداياه البسيطة تدرين جبتهن وياي مدالية النمنم الحياكة اللي بيها أسمي تزين أي جنطة أطلع بيها..
أشرت لجنطتها..
: ما تمنيت هيج يموت على الأقل لخاطر بناته..
باوعتلها : مات وهو عاشكج وطلبج وبما أنو آني ولي أمرج رفضته بدالج..
وسعت عيونها..
: تحجين صدوك ولج ليش جرحتيه خطية يعني مات و كل تفكيره آني جارحته..
جنت رغم الحزن أبتسم مسحت دموعي بعكسي وجريت نفس..
: ما أعتقد حقد عليج كلما يخابر كاميرا جان يباوعلي و يكولي سلمينا على أم العيون التلالي ودوم يسأل عليج..
: صح بس مو مال تجرحيه لو كايلتلي أعرف شلون آني أتصرف وبلطف..
شهكت مكدر أستوعب محمد أبن خالي مات..
: بعد كتله هو هسة جوة الكاع شيفيد العتاب وأنتِ قابل ترضين تزوجينه؟ لو بذاك الوقت نفسيتج شلونها ترى أنتِ ميتة بس ربج أحياج بفضله..
: هم لويش يدخلون بالسياسة يعني خطية أهلهم يومية ميت شاب شهيد الهم..
لمعت عيوني : لأن غيرتهم ونخوتهم متقبل الوطن ينباع ولا رايات السود تدنس شرف بنات وطنهم الشهادة شرف ياريت أحصلها وتنكتبلي..
ظلينا نسولف بولد خوالي..
باوعتلي ماجدة وكالت..
: أريد أحجي وخاف تزعلين..
: شكو..
: هذا وتر..
: قصدج والتر..
أخذت المخدة وغطيت وجهي وهي ضحكت..
: ولو مو مال أضحك تطلعلي أمج تهد علية بس شلون موقف و حظ خلاه يجي للبيت ما يسوى الشردة..
وخرت المخدة عن نص وجهي طلعتلها
عين وحدة..
: كل هذا من وراج أستغفر الله يارب شلون خجلانة من روحي لو أدري ما أجيت وياج لمركز التأهيل النفسي و أحظر ندوة..
ضحكت ماجدة..
: هو أنتِ نمتي وتثاوبين بالمحاضرة و كعدتي تبوسين بالزلمة شبيج؟
خجلت يارب ليش طلع يعرف عمي ليش مرت الذكرى كدام عيوني تلفوني يرن يومها..
: ألو هلو حبيبي جيجي..
: هلو سؤود أكولج أكو ندوة عن طرق التعامل النفسي مع المدمن طبعاً بالتعاون مع الطب الاجتماعي أريدج تجين وياي..
: تعلمي عيشي أمورج..
: لا والله بس كلت تستفادين خوش ندوة..
: والله آخر بطل شربته يمكن من شهر.
ضحكت : ولج مو هيج ما أقصدج مدمنة خمور..
: ها لعد آخر كرستالة طفحتها من سنة
: أهووو ترى قدمتلج دعوة لكليتج توصل ولازم تجين الصراحة لا تزعلين مني ورطتج..
: مافهمت؟
عدلت كعدتي وآني أستمع ألها..
: ولج إدارتنا بالقسم ميتين على شي جديد وآني كلت ألهم عندي صديقة بروف بكلية الفنون تكدر تسوي إلنا ورشة عمل تخلي المدمنين يطلعون ضيم گلبهم بالرسم شتكولين؟ تجين للندوة الأسبوع الجاي..
: بنت الحزبي من نعلااا ولج أبوج منو شلون لوتية تدري ما أجي ما أحب هاي الأجواء مالتكم أنعس وأدوخ راحت دزت برقية رسمية..
: مو آني مدير قسمنا هو دزها أكيد بأسمه البرقية وبعدين لا تجيبين سيرة الماضي آني هسة مو بنت أحد آني جيجي ماجي ذني صيحيني أوك..
: عمي أوك النوب صايرة أم الراهي..
: أي عفية أعتمد عليج..
: بلة سالفة سالفتج النوب تشغلني وي المدمنين..
: لا المتعافين لا تسمينهم مدمنين ديري بالج هناك تهبطي من معنوياتهم كون تشجعيهم..
: صار أشدلي وصلة وأركصلهم حتى تنفتح نفسيتهم خاف ديتعافون من الحبوب لو الشرب هنا يرجعون..
: عزة لا خطية ولج..
سديته منها وبديت أتصفح بكوكل طرق التعامل مع المدمنين وطرق دمج العلاج النفسي مع الفن هذا البلد يموت على دمج التخصصات وفائدة للمرضى..
أدردم على ماجدة.. يعني المدمن شيرسم سكراب و أبر حقن لو شنو مثلاً يرسم البطل يتكسر وهاي هي خلص من أدمانة و صار متعافي والله يا الله..
لفت نظري لوحة سريالية ألوانها الزرق تهديء الأعصاب مممم ليش لا نعالجهم بلوحاتنا..
بيوم الندوة هواي ضيوف بأسم زائر أو ضيف لاكتني ماجدة.. لبستني باج..
: ورى ما المدير يلقي كلمته أنتِ تلقين محاضرتج أكو دكاترة راح يلقون محاضرتهم ونظرياتهم أيضاً..
ماجدة: كامت سـؤدد.. ألقت محاضرتها وهي تأشر على الصور السريالية اللي دتعرضها بواسطة جهاز (Data Show)
كملت ونزلت وراها بدأ دكاترة منهم ساهموا بالتمويل لهيج أبحاث تأهيلية وهواي ذكروا دينتظرون وصول الطبيب اللي مسوؤل الأول عن التمويل لهيج بحوث بس أعتذر عن الحضور لضروف متعب من السفر جان سنتين بالخارج يشتغل بمركز ألابحاث العلاجات النفسية..
سؤدد : مصدكت أرجع لمكاني الهاديء تعمدت أكعد بالمقاعد الورى حتى بعيدة عن الأضواء لأن كولتلكم هيج ندوات ما أحبها ثقيلة و جو كئيب وكله كلام عن أمراض نفسية أو أكتآب اللي من أسباب الإدمان ألخ..
شوي شوي حسيت مال راسي على كتف ماجدة.. الكاعدة يمي و نمت
بس حسيت بيها كامت وتدردم علي
: يا نامت هنا ولج؟ أهو عمي أكوم أحضر الفايلات عندي شغل مو مال نوم..
أشرت براسي أي و رجعت غفيت..
خضار بساتين ريف الخوال و بساط مفروش خوالي كلهم موجودين فرحانين النوب خالي سوادي صاير أبيض وجهه يلج لج رحتله سألته خالي شتستخدم خلطة ما جاوبني بس أبتسم وأشر لإخوانه يلة نروح عافوني وراحوا اللي بيده غصن أخضر بس أستغربت من صحتله..
: خالو أجي وياك..
هز راسه بـ لا.. ورجع صاح..
: بوية محمد وينك تعال يمي..
بجيت لأن ما أخذني وجر محمد يمه أخذه هنا حسيت حسن بصفي يكولي
شبيج وحسيت أيده باردة على خدي تمسح دموعي..
: حسن.. صدك أنت رجعت مشتاقتلك..
لزم أيدي شبك أصابيعه بين أصابيعي و حضنته فزيت معرف بس بعيون ناعسة مو حلم حقيقي هياته كاعد يمي بعدني متأثرة بالحلم وأحسه تحول واقع..
أشم بي بس حسيت بي يوخرني و كلامه صاير ممفهوم لزمته حيل أتنفسه أشمه أبوسه حاضنته بكل قوتي..
وآني صخام الصخمني ما صحيت إلا على راشدي وهو يرطن بلغته أنواع الكلام المستغرب والرزايل ظليت فاتحة حلكي و عيوني مدمعة وصلت لهيج وضع..
وكفت : آني مدمنة متعافية لذا الظاهر مركزكم مو خوش مركز للتأهيل الا أهلني الشسمة الينطفح..
من الصدمة ظليت أخبط عربي و أجنبي (لغة البلد) كلت أضيع جفصتي وأتظاهر وأسوي نفسي أحد المرضى المتعافين الحضروا الندوة..
مد إيده للباج قرأ أسمي بصوت عالي بي نبرة ضحك..
: دكتورة سِيُوداد..
(بكسرة خفيفة تحت السين) جان ينطقة حسب لغته معدهم همزة بنص الكلمة ميلفظوها..
صفنت بي سيوداد بت عم سوعدد اللي جان حسن يسميني بس هاي مال أجانب موش مال عرب و قرأ تخصصي بلغته.
وأني حاورته بنفس لغته
: أنتِ الضيف اليساهم بنقل محاضرة حول علاقة الفن بالعلاج النفسي للمدمن..
هزيت راسي أي بعد ما بيها مجال أكذب بأن آني مريضة متعافية ونتائج الإدمان السابق تحرشت بيك دون قصد..
يمكن هذا الممول اللي أتأخر أو أعتذر وقرر يجي بالوقت الضائع جفصت..
: أعتذر على التحرش العفوي دكتور..
هو ظل يباوعلي وعيونه تضحك دأطلع من المقاعد اليمه ردت أشرد بروحي المنحرجة و الفشلة اللي متجيرة لو تعرف أمي شسويت صخام لو عرف عمي لو عرفوا ولد خوالي..
بيومها حتى حلمي بمحمد أخذه خالي سوادي ما فكرت بي ولا أهتميت لأن التهيت أركع سالفتي..
ردت أعثر كام بسرعة لزمني وخرت عنه شاردة حتى ما أنتظرت بس كون محد أنتبه الكل مشغول وهاي أخر المقاعد يارب محد شافني ولو هنا عادي بس الوضع يعني مو حلو بحقي وهم ندوة رسمية آني أتحلم بحسن..
تلفتت مستحية لكيته بعدة صافن بجهتي لفت نظري ألوانه من هيج وآني فزيت هو بوجهي أكو شي مشترك وي حسن.. الشعر نشعة الوجه والصدمة الثانية يحجي عربي أبن الأجانب..
: إذا بتظلك عم تصفني وتشردي رح تظلك عم تمشي وتتعربشي بخيالك وتوقعي..
أستحيت النوب طلع يحجي عربي ولله ولا اسأله من أي بلد هو خلي أفلت بس أجت ماجدة..
: ما أعرف شلون أشكرج سـؤود.. محاضرتج عجبت المدير شبيج وجهج أحمر شوفي هذا الوراج يشبه منو فنج بي من حسين.. بس شقارة مميز هيج حسيته..
كرصتها : أش يفهم يحجي عربي
مدري يتخيلي ..
ردت اقرأ الباج بس من عيوني زغللن من الخجل حتى ما ركزت شنو أسمه كامل..
: شش الممول وراج..
سحبتني بعيد عنه..
: بس لا سويتيله شي؟
: يااا و شكالولج علي شسويتله يعني
شلون سمعة النوب..
: أعرفج متنعسنين خاف النوب أنطرد من وراج..
باوعتلها : راح أطلع مكمل الندوة ..
مقهورة متفشلة بس همزين ما أشوفه بعد والا عزة عزة صح يخلق من الشبه أربعين بس وين حسن وين هذا شنو قابل كل أشقر لازم حسن أصحي أصلاً هذا عيونه زرق حسن وين أكو منه..
باوعتلي ماجدة.. و كالت..
: شوفي راح نأخذ فيكا رست
(أستراحة عمل)
: شو طلعوا دكاترتج...
: وقت ال فيكا ريست يلة..
رحنا قاعة الأستراحة و نادت المضيف رفعت أيدها بهدوء لأن هنا التعامل مع عامل لازم بأحترام..
: أور سيكيتا! (لو سمحت) أريد كوبين من السفارت كوفي (قهوة سوداء)
مع رول كيك..
شوي وأجه الطلب رفعت عيني هذا أبن الأجانب كاعد بالطاولة اللي كبالي وياه دكاترة وداخلين بنقاشات أنتبه مصفنة بي أبتسم وغمزلي بطرف عينه..
دنكت مستحية الفشلة بيه ودي الكاع كون تنشك وتبلعني شكول عليج ماجدة.. بس أنتهت الأستراحة و الكل توجه يكملون ورشة العمل والنقاش و المحاضرات حولها..
أستغليت الهوسة وفلتت حتى ما كلت لماجدة.. آني رايحة ركبت سيارتي و للبيت..
من يومها والصدف كثرت مدري هذا فهم غلط الموقف العفوي الصار لو شنو شمدريه آني اليوم رايحة أتسوق من السوبر ماركت..
النوب شجاني صرت ثولة بس شفتة وكعت مني الغراض اللي أريد أخليها بالسلة وتزحلكت يم رجليه ومن حلاة روحي لزمت تراك رجليه ما أعرف شريد بس هو وخر لازم السروال من الخصر لا ينجر لجوة وباوعلي ورزل..
: متحارشة..
بساع نهضت وعفت المسواك وشردت بسيارتي وكبل للبيت وآني أسوق و أرجف زين مسويت حادث زين شنو هالصدفة أول تالي أتعرض لهيج موقف معقولة صدفة و أذا مو صدفة شمدريه اليوم أتسوق بهذا المكان وبالتحديد بهذا الوقت..
مرت أيام و أجانة وتعرفون بعد شصار
ملحك يكعد أبو رجل الخضرة وكب
عياط أمي بموت محمد..
خلال هاي السنين أمي مو ذيج فوزية أم الشيلة صارت تلبس جبب وحجاب وأوقات تلبس تيشيرت محتشم للركب وبنطلون كيلوت عريض..
يعني بالغرب صعب تفتر بعباية راس زائد عمي يحب المرة كشاخة غير جوارينا من العرب منطقتنة مخصصة للعرب..
فأمي تعلمت منهن و أجتماعية عاداتنا بالعزاء تروح تعزيهن وبالفرح تبارك و تنطي واجبات بقينا على هاي العادات أكيد طبعاً خوما نتحول أجانب وناخذ طباعهم حتى سيارة عمي علمها تسوق و عدها سيارة..
فاليوم خميسية سوت أمي عزيمة عزاء وقراءة قرآن لروح محمد عزمت جوارينا العرب هواي من وطنا خاصة اللي اجوا بالهجرة من سنتين و ثلاثة
أحنا من المهاجرين القدامى اللي بعد السقوط بس من سنتين تقريباً أوربا أستقبلت لجوء أغلبهم بعدهم بالكمبات و أكو أنتقلوا مناطق وسلموهم شقق أو بيوت..
فجهزنا كولشي و بدت النسوان تجي تعزي أمي طبعاً العزاء هنا يختلف لا صريخ ولا لطم لو سوالفنا بالوطن هنا حدنا بجي وكلينس نمسح دموعنا وصوت عبد الباسط يرتل القرآن..
وآني قدمت مي وراه جاي وغير السوالف تعالي يا فوزية سولفيلهن شلون أستشهد..
ماجدة.. أجت تساعدنا وهاي تغثني سوكها بعده و هم حاجتها مرة من الموجودات تريدها لأبنها حطت عينها على ماجدة..
: حبيبتي أبني عمره 30 سنة وأريد أزوجة من بنات بلدنا ما أريد أجنبية ولا عربية من غير بلد ولله أبني ما يتفوت..
ماجدة.. نزلت راسها شنو عود خجلانة المصيوبة بس لا تريد والسكوت علامة الرضا لا ولا أقبل كمزت وكفت..
: خالة ما تريد ولا تقبل رجاءا لا..
أمي كرصتني وجرتني يمها تشاورني..
: شعليج؟ أنتِ مسوية أضراب عن الزواج عوفي البنية تعرس وتخلف..
بس ماجدة.. بهدوء رفضت..
: أعتذر خالة أصلاً آني أكبر منه بهواي يستحق الأصغر..
سكتت المرة وماجدة أشرتلي بحاجبها أتبعها تبعتها للحديقة باوعتلي..
: آني مو طفلة تردين بمكاني أوك؟
يا يا يا أم خنيس طلعلها لسان..
: عاجبج النسوان تتغزل بيج تتخطبج ترى حجيت ردت أجنبج ملحتهن..
: شعليج آني أجاوب عندي لسان..
خزرتها : مال أدور مـاجد.. أذا عايش وأدزله فيزة لهنا يجيج..
صارت صفرة وترجف حلگها أنشد و عضلات وجهها تشنجت عزة شسويت
حضنتها أهدأها..
: يروحلج فدوة و تروحلج كل الزلم فدوة أهدئي والله أشاقيج ولج هذا أرتبط بجماعات وذول يومية طاك طيك والظروف والحروب والطائفية منو يكول عايش وهو أصلاً يذب روحه للنار..
ظلت تبجي كمبصت وضامة وجهها بين إيديها..
: لا أسم الله..
: بعد هاي السنين تحبيه؟ لعد ليش ما تدورينه هسة يجوز برد وهدأ يتفاهم ويسمعج..
: لا ميفيد بعد الثقة أنعدمت ما أثق يأمني و أرجع ينحرني لا آني مرتاحة بوحدتي بمقبرتي بمقبرة الاجتثاث اللي دخلني إياها لـؤي..
: أهدئي.. أهدئي..
ما كملت الكلمة لأن بقيت واكفة و آني أشوف أبو رجل الخضرة جاي علينا وكف وسلم..
: مرحبا..
: وعليكم السلام ورحمة الله وبركاته..
هو أبتسم و ماجدة.. وكفت كرصتني وهمست..
: أجنبي ولج..
رديت : هلو دكتور..
: هلو دكتور أجيت أشوف دكتور ماسِن (بلغته z يلفظ س ) سبق عندي موعد معاه لزيارته في بيته دعوة عشاء..
باوعتله: أي أوك هو أنت رجلك خضرة
: ڤا (ماذا؟)
: اينيتنغ (لا شيء)
وكف بصورة جانبية وتعلقت عيوني بوجهه معقولة يتخيلي لو بي شبه من حسن مدري لأن نفس طول الوجه والنشعة مدري آني تخبلت بس الولد عيونه أزرق سمائي فاتح و حسن مو زرق ورغم حسن طويل هذا أطول..
آني متأكدة حجه عربي بالندوة ميتخيلي وهسة هم حجه مبتسم..
: مزبوط إنو مش كل لهجة بلدك بفهمها لما تبلشي تخرطي علي فيها لأنك مفكرتيني أجنبي الأبوين وعم تذمي في أنا أمي عربية وبيي من هون مولود وهم أصله عربي فيني أخبرك مع إنو أنا لافف بلدان ومن بينها بلدك ومطلع على ثقافات العالم بس قوليلي قصدك تقولي إنو وجهي فقر ومنحوس كل ما تشوفي خلقتي بصير شي..
حسيت خدودي حركني و يتعمد يحرجني..
: ها..
كد ما صفنت بتفاصيله وصلت بي ينبهني المليق..
والتر : كتير عم تصفني فيني أعتبر هيدا أعجاب أنثوي برجل أجنبي من أصول عربية؟
يعني مو عيب عليه ينبهني شكد مليق جان كال عيب أحرجها تفشلت والله بس ولا أسكتلك أبو لسانين..
(أقصد لسان عربي وأجنبي)
: دكتور والتر.... والتر ... والتر..
لازم أحاجيه برسميات هنا الشخص اللي مو معرفة قوية ينادوه بلقب عائلته ردت أتذكر الباج جان لابسة بيوم الندوة بس أصلاً يومها ردت أشرد من فشلتي ما أتذكر قريت باجة بتركيز بس هو أبتسم وتكلم بلغة أصوله العربية..
: المعلوف..
: شنو؟
: عيلتي هيي آل المعلوف.. جدي بِيّو لَبِيّي أصلو عربي من نفس البلد اللي بتنتمي إلو إمي هاجر لَهُون وتجوز وحدة أجنبية يعني بِيّي نصّو عربي ونصّو أجنبي رجع بِيّي وتجوز وحدة عربية من بلد جدي لبنانية يعني أنا إجيت من بِيّ الي (نصّو عربي وأجنبي) ومن إم عربية إسمي الكامل أختارتو إمي جاد وبِيّي كان بدّو يرضي ستي اللي أختارتلو أسم والتر فقرروا يدمجوا الأسم العربي مع الأجنبي تَيصير إسم مركّب.
قاطعته: يكرم الله أذا فهمت شي حجيتلي تاريخك العائلي وهوية الأحوال الشخصية أي شعليه بس صدوك يعني أسمك جاد والتر المعلوف هههه ببلدي لو وكع لقبك يمهم أسبوع كامل موضوع تحشيش..
باوع بأستغراب : شو عم تحكي..
: لا هيج ما عم أحجي هههههه بس صدوك هو أنت شرحت هويتك بس كمل كمل والتر جاد أيش..
حجى بلغة هذا البلد..
: والتر جاد أسمي هذا وبييي أسمه بوب جدتي أصرت تسمي أبنها أسم أجنبي وقبل لا تسألين جدي أسمه ميشيال..
أجتني الضحكة مال أحطك كبالي وأتنمر عليك رددت أسمه..
: والتر جاد بوب مشيال المعلوف
بس لا عيب لأن لفظ الأسم غريب علية يجوز عدهم هاي أسماء الها وزنها كلمن و أسمائه..
بس صوت ماجدة قاطعنا..
: العم مازن وصل..
طبعا هو عمي متفق ويانا يرجع وي أنتهاء العزاء و فعلاً النسوان أدت الواجب وطلعوا..
جان والتر كبالي بس ألتفت على كلام ماجدة.. راح تجاه الكراج بس ظل هو واكف يباوع ويبتسم لعمي اللي يركن بسيارته بالمكان المخصص..
ركضت بأتجاه عمي وكفت يم سيارته
أبتسم نزل عمي وهو يرحب بضيفه
رجع باوعلي..
: سـؤدد.. والتر معزوم عدنا على العشا.
أبتسمت وهمست بالعربي..
: مبين يذب ميانة بساع مطبق المثل لو تصاحب خوش صاحب لو تظل بلا صاحب..
ضحك عمي مستغرب بساميري وحس بينا منابزة أو شي قبل لا يوصل نبهني عمي
: لغته أسهل عليه..
: عمي شكلت كلت صاحبك الشاب خوش صاحب يعني ميفهم عود هالكلمة شو لبلبان طلع بالعربي اللبنانية ضابطها ذكرني بفيروز من يرطن علينا ترى عادي نحاجيه عربي أجنبي ما شاءالله بالع لسان بلبل بيهن..
هو ساكت معرف أذا يفهم كل لهجتي لأن صعبة عليه ماجدة.. أعتذرت ترخصت و راحت ظل عمي يسولف وياه بلغة أجنبية..
: لا تضوج منها هاي لسانها متبري منها عبالها الحياة بس سوالف وضحك وشقى اللي بكدها هسة عدهم..
سكت ما كمل كلامه بس فهمته اللي بكدي أولادهم بطولهم بعمر الشباب
أباوع عمي يباوعلي بحذر لأن جفص وياي بس آني كولش مقهورة على ضياع عمري وسنيني عمي هم حقهم لو رزلوا حاولوا وياي أتزوج و أبنيلي حياة بس أرفض..
ظليت واكفة ما بينت زعلي وأنجراح أحساسي وكفت أباوع لوالتر جاد بيت ال المعلوف..
بسكته جريت نفس وهزيت راسي لا آني صعب أميل لرجل غير حسن.. سمعت القوقعة اللي عشتها سنين حسيتها بدت تتهشم وبديت أكسر قوقعتي أبتسمت وآني بداخلي أخطط..
ليش ما بهذا اللي هواي بي من حسن أصنع شخصية حسن بي بس هذا مو من ديني دين ثاني يعني يقتنع؟
هنا بديت أفكر أنو أقاتل أرجع حسن للحياة بشخص الواكف كدامي..
لوما رحمة ربي ما خلاه بطريقي و هو نسخة من حسن حتى أكثر من حسين يشبه حسن عدا لون العيون تختلف أقنع نفسي وآني أسلك طريق خطيئتي بخداع شخص حتى ألتمس بي خطيبي الشهيد..
يمكن صفنتي طولت أنعكست بعيوني تأملاتي لأني من أنتبهت لكيت عمي والشاب واكفين يباوعولي بتساؤل..
سألني عمي..
: بنتي شبيج عيونج تحجي قصص و كأنما دتبجين هيج حسيت بيهم لمعة بجي أحد وياج خاف أمج هاي فوزية شكد أحاجيها البنية كبرت مو مال تعامليها طفلة بطور التأديب..
بشقى كتله..
: قصدك النعال الطائر غلس هي فوزية مرتك ما تنحمل شلون متحملها..
كرص خدي..
: عيب منا والتر ترى أمه عربية وأبوه أيضاً أصوله عربية بس مولود هنا وهو يفهم لهجتنا ألا الكلمات الدارجة جداً والجنوبية قح أحيانا يربكنه..
لاحظت نظرات شقاوة بهاي العيون السمائية الفاتحة لونهم..
حاجيت عمي أبسمر..
: لعد اليفهم حجي عربي المن يتمندل علينا بلغته هذول الأجانب برستيجهم مختلف هسة آني وطريقة كلامي أكيد يعتبرني مليقة..
هو ظل يتأمل فاتنة أهلها اللي هي آني ما جاوبني بس همس بصوت منخفض ومؤدب بكلمة عربية..
: صديق شو يعني عم يتمندل؟
هذا أريد أفهم سالفته من عمي بس شلون من غير ما يشك بخططي الجهنمية شرحله عمي بلغة الشاب و ظلوا يضحكون ما أعرف منين يعرفه عمي هم أريد اسأل وأجمع معلومات بعد آني ناوية أطلعه من الدين أقصد أهديه لديني..
تبعتهم لداخل البيت رحبت أمي بي و كالعادة أمي كد السلام والضيافة و تنعزل بالمطبخ ما تجالس أصدقاء عمي بعدها على عادات الوطن المتحفظة..
الغربة تغير بشر بس مو كل بشر مهما كان التغيير أكو ناس ما تندرج كولش تخلي حدوداً معينة بأسلوب الحياة هنا..
تبعني عمي للمطبخ..
: والتر يحب القهوة العربية أخذي هاي الأكياس تسوقت من السنتر..
معلومة أكولكم بيها هنا توفرت أسواق للبضائع العربية و كولشي متوفر ولو مريد أذكر بلدان الا نادراً بس أكو أسواق عراقية أو سعودية حتى أزياء أكو
الدين بهذا البلد حرية يعني محد يسألك عن دينك و أغلب سكان دول البلقان الأوروبية يميلون للإلحاد رغم ديانتهم الأصلية بس قلة تطبق مباديء دينها يعني المسيحيين هنا مو مثل مسيح وطني هنا يسموهم مسيح شرقيون ما أنكر البلد بي جانب حلو هواي مدام تطبق قوانينهم و متتعداها وتتعايش بسلام دون مشاكل بس الجانب المظلم هو العنصرية عند البعض خاصة تجاه العرب يعني أي بشرة سمراء عدهم ملون هذا..
أبتسمت وآني صافنة وعمي يجهز وياي الضيافة ورجعت أفكر بمعكوس الملون بوطني الأشقر اللي عيونة ملونة أخضر أزرق الخ من الألوان اللي غير بني وأسود نسميه ملون هنا العكس مثلاً آني بالنسبة الهم ملونة هنا التميز عدهم..
بخت ماجدة.. ضايعة بينهم الله يستر عليها على كوله أمي من تبسمرني الحلو حلو لو كعد من نومه بس ها لا عبالكم آني مو حلوة كافي العين مني تسوى مرة..
حسيت هزة على جتفي..
: عمو شنو العين تسوى مرة؟
دنكت مبتسمة نسيت وحجيت أفكاري بس لا أحجي وما حاسة ..
: أعترف عمو شسمعت بعد..
: كولشي ما سمعت شفايفج تتحرك بصمت ولا تبطلين هذا الطبع بس طفرت منج هاي العبارة مسموعة..
أخذ الصينية و باوعلي..
: أبقي يم أمج..
رفعتله حاجب..
: ليش تخاف أنصب عليه أبو رجل الخضرة شوف أيدي أنلسعت بالقهوة جفيتها على أصابيعي..
: أنتِ ثولة هو شعلي..
: لا بلة..
ضحك وطلع..
رحت بالممر أبصبص الصياد قبل لا يصيد لازم يتمعن بالفريسة نوعية جيدة بيها لحيمة لو عظيمات بس آني هم أتمعن أتفحص قبل لا أنقض..
هذا عمي.. حس عندي سالفة من صفناتي كل شوي أروح بحجة..
: هذا الريموت ما أدري وين يختفي..
وأفتر يمهم أشيل وسائد القنفات وعمي يخزرني هاي سوالف أمي متقبل أطلع يمهم وزت عمي علي ولله فوزية آني بالخارج وتأقلمت بحياتهم بس بحدود آني أستاذة أدرس بكلية الفنون يعني هاي الأعتبارات المن بعد..
أبتسمت وكعدت هو أبتسم ودنك هسة هذا بس لا يكول متحارشة بس هو ذكي بلغة البلد هذا كال يسمرني ويحجي وي عمي..
: نسيت أسولفلك أكو فتاة متحارشة تلاحقني..
سرحت بالقنفة أختل بيها ورجع شعور الأحراج على كيف كمت وترخصت..
: من بعد أذنكم عندي شغل مهم لذا أترخص..
رحت للغرفة بدلت ملابسي وأخذت جنطتي وطلعت وأصوات ضحكاتهم بالصالة خلتني حتى أشك آني موضوع الغيبة بينهم بس لا مستحيل بعلم التوقعات أكو ممكن وأكو مؤكد وأكو مستحيل لذا مستحيل عمي يحجي بيه يمه بصفته شنو ويحجيله سوالف سـؤود..
الجو جنه بدأ يبرد بهاي الأيام رحت للنادي أطلع الطاقة السلبية بالرياضة وراها يم البحيرة أراقب البط والوز وأشمرله خبز..
: كون مثلك أعيش على خبزات اللي تنشمر الي بلا هم ولا قهر ولا ذكريات ماضي تهزك بالصميم..
حسيت بالذنب ليش تحركت مشاعر الأعجاب داخلي تجاه هذا الرجل بالذات سنين و آني العازبة المتمسكة ياما عروض زواج من جالياتنا العربية ورفضت..
ومشى بي قطار العمر لعمر الـ38 خبر أستشهاد حسن جان عمري 24 لأن خاسرة سنتين سنتين ما سجلتني بمواليدي الحقيقية بس قبل سن الـ 24 الي دخلت لحياتي خانة مؤكد شهيد وقبلها جانت سنوات الأنتظار من مراهقتي من جنت أعدادية آني فنيت عمري والعمر يمشي..
قررت أمارس هواية المشي بهاي الطبيعة شفت عائلة أم وأب وطفلين أبتسمت بحنين أحضن طفل وأشم عطره هنا بگلبي أخلي..
آني ليش أبقى دون طفل دون أمومة شنو اللي يخليني أنتظر معجزة حسن مات ما يرجع..
الصحوة بحياتي بعدما عمري كبر مسحت دموعي سـؤدد.. حتى من تقرري تزوجي لأجل الطفل أختيارج مستحيل لرجل متعرفينه شنو دينه شنو معتقده كل اللي تعرفينه أصله عربي من جنسية هذا البلد من دين ثاني وهنا تعدد أديان وأغلبهم مايطبق الدين يميل للألحاد..
من رجعت للبيت هو رايح بس عمي ينتظرني صاحلي..
: تلميحات والتر عليج؟! يلة سولفي لا عبالج أنتِ هنا بالخارج تلعبين كيفج كم مرة تقدمتلج عروض زواج وأنتِ ترفضين شتريدين ها تواكبين حياة الأجانب أقسم بالله أرجعج للوطن وأجبرج تاخذين واحد من ولد خوالج..
باوعتله وسكتت حيل فشلانة أكيد هذا رايح مفتن علي وحاجي كولشي من طلعت عمي و أعرفه حس آني المقصودة بالبسمار بس طلعت أستفرد بي و كعد يستدرجه بس آني الك يا والتر أبن أبو والتر أبو رجل الخضرة وجه البومة ما يوم شفتك الا يصير شي متلام ماجدة تسميك وتر water (ماء) دأطلع عمي بحدة صاح..
: مو أحجي وياج..
: يعني شجاوبك تشك بأخلاقي أكيد هذا ألف علية..
: هذا جان طالب متفوق عندي جنت أدرسهم مرحلة أولى وثانية مادة مرتبطة بتخصص الطب ما يوم كذب
بس ما أقبل تلوفين عليه والله جنت متردد أقدملة دعوة لبيتي بس بينا رابط شغل و تطورت علاقة أستاذ بتلميذه الى صداقة رغم للأن مخلي رسميات ميصيح بأسمي دون دكتور..
شوفي مو ما أعرفج خاف شعره أكو بي شبه من خطيبج بس هذا أجنبي لو عاجبج أشباه حسن جان أخذتي أخوه توسل بيج و شكد تذللج ورفضتي وبقسوة..
: لأن صعب أتزوج أخو خطيبي تصير طلايب وهم ما حبيت أخذ حماي مو حلوة ترى وأعتبره أخوي..
بجيت من الرزالة..
: أسف قسيت عليج بس لمصلحتج أنتِ من دين وهو من دين...
جفصت : على هاي سهلة نسحلة ألنا ونكسب بي ثواب..
: سـؤدد؟!
نتر حيل بيه وزمخ..
: عمو تعرف عمري شكد أذا أتزوج أريد أطفال..
حجيت ورحت غرفتي أبجي أتصلت بماجدة أذا عدها رقمة بصفته ممول مشروع العلاج النفسي بالفن..
: بصفتي أحد أعضاء العلاج آني وافقت أشتغل بمشروعكم بصورة دائمية..
: صدوك أي والله عبالي من الندوة وطفرتي راح أدزلج المواعيد والأطباء الي لازم يكون وياج..
: أي وصلت القائمة..
فتحت دردشة وآني أحاجيها..
: تكدرين تغيرين أريد ورشة عملي بمرافقة الطبيب والتر.. دبريها عفية على الأقل هذا جان طالب يم عمي وحالياً صديقة يعني عرف..
: والله ما أعرف هي صح قوائم ترتيب الورشة يمي كلفني بيها مديري كدرنا بمشروعنا نتفق وي نحات وحتى نجار
و دنشوف حرفين حسب ميول مرضانا وطبعاً لازم نوزعكم الحرفي أو الفنان من رسام الى نحات الى باقي الميول عند المرضى مع دكاترتهم أذا ترحين لمرضى الطبيب هذا جديد منظم النا يعني حالياً درجت أسماء مرضاه أغلبهم مدمنين المخدرات..
: أي شي يمعودة بس أريده أقصد أشتغل وياه..
: شوفي هو جدول شغلج مع عدة أطباء يكون تلتقي بمرضاهم اليميل للفن السريالي والتشكيلي بس بما هو ممول رئيسي للمشروع راح يتواجد كمشرف ويحضر دائماً للمركز..
: هو مو طبيب عام..
: أي نعم وعنده شهادة بطب النفسي..
: أوك لقطة هذا..
: شنو؟
: لا أكول الله يوفقه يله أروح..
: حتى لا يتضارب مع وضيفتج الأصلية هو المشروع تطوعي منا لذا خصصناله وقت خارج نطاق أعمالنا..
: أي زين يله أترخص..
ترخصت منها و آني الأفكار شاغلتني رحت للكنتور سترة حسن.. اللي معلكه و بعدها كلادة بركبتي و زينتها بحلقة أيده الجانت تحضن عظام إصبعه..
حسرة داخلي : يارب معقولة دزيت هذا حتى يعوضني عن خسارتي حسن..
بديت أمشي بأحلامي و أبني قصور والأمل داخلي غردت طيوره أبتسمت بكل الأحوال شعور الأمومة داخلي بدت أحلامه تكبر..
رجعت السترة الشميتها بحنين ضميت الكلادة جوة البدي و باوعت للحلقة بأيدي اليمنى الحلقة ما تهنت تتحول لليسرى حسب عادات وطني..
ردت أنزعها بس ما يهلي أنزع سنين الجفا والهجر يا حسن.. بس أنت رجعت لا أعرف مو أنت بس راح أمحي والتر وأعيش بي حسن..
أعرف مخبلة وخيط وخيط وتفكيري مو منطقي وعواقبة يجوز مو جيدة او يجوز الفريسة والتر ما ينصاد وأخسر وأرجع لوحدتي وأنتظر الوهم يسيطر علي..
بدت رحلتي وبديت أتحمس للمشروع
من أول يوم أخذت وياي لوحات ضخمة سريالية بألوان مريحة وسلمتها للمركز وطبعاً أعرف بي موجود سلمت عليه متظاهرة ممهتملته..
: هلو..
: هلو..
جان يشرف هو على العمل ويفتر بينا ضجت لاحظت عنده غرور حسن جان ملاك بس يله تتعالج..
أختصر عليكم بقينا نشتغل سوه و تطورت علاقتنا إلى صداقة ثم لحب علقته بيه وجان يضايق لأن بدينة هو مقبول التلامس دون زواج وطبعاً لا عاداتي تقبل ولا ديني ولا تربيتي..
جنت أحاول دائماً أستجلب أنتباهه لديني أسولفله و أنطيه الجانب الحلو ومن يعترض ويطرح أمور عن الإرهاب هنا أوضحله..
: حبيبي ديني أصلاً هو دين السلام دين راقي كل هذا اللي تشوفه تشويه ثق يحاولون يشوهون هوية ديني حتى لحد يميل إله..
والتر جان من جماعة منتمي لدينه فقط بالأسم وهذا سهل علي..
: ديني دين نصرة الفقير..
جان يهتم وبديت أزرع داخله حب الله أغلب كلامنا صار عربي بلهجة أمه وبديت أعلمه أيضاً لهجتي أهله متوفين يعني ماكو شخص يخرب مخططي..
و يومٍ راد يلزم أيدي وخرت..
: بس ردت أسأل شو وضع هالمحبس اللي فيدك..
من شاف ما جاوبته رجع سألني بلغة هذا البلد..
: هذا خاتم خطوبة؟!
رفعت جتفي و نزلته دون ما أجاوبه وكفت..
: أروح للبيت..
: بس بعدنا ماكملنا أشهر وأحنا فريق واحد وأصدقاء بس يا سِيوداد.. أنا أحبج..
جنت منطيته ضهري بقيت أمشي أتظاهر ما سمعته وهو عنيد وهاي صفة مشتركة بينه وبين حسن..
: ما تروحي متأكد إنك سمعتيني عم قلك أنا بحبك ومعلق قلبي فيكي كتير حبيت كل شي من خلالك حتى دينك حتى أنفاسك وحتى نظراتك لما تبلشي تشاكسيني أنا حبيتك أنتِ لألك
درت وجهي من بين كتفي أباوعله و أحس بذنب لأن خططي أثمرت ردت بي أصنع شخص حسن أستمر يعترفلي..
: أنتٍ اللي علمتيني كيف بحب الله وعلمتيني إنو موت أهلي هيدا قضاء وقدر ومش لازم إكره الله قبل كنت إكره كل شي وما أعترف بدين مات فيه أهلي ظلم كنت ضايع يا سيوداد لأنو ما لقيت الدين اللي يفهمني صح و أقدر أفهم عليه ما لقيت الشخص اللي يمسكني من أيدي ويقلي هيدا أختبار لصبرك..
مد أيده يحضن روحه وغمض وصوته حيل تحشرج يكتم دموعه..
: معك أنتِ تعلمت إنو الصبر هو مفتاح الفرج تعلمت الموت حق..
درت تجاهه وكفت كباله وآني أحس بكلماته مثل الرصاص اللي يفتح بوابات بگلبي جانت مقفولة بسلاسل جان صوته يرجف وبكل لهفة نطقها بلهجتي التعلم كلماتها مني ـ أحبج ـ
جان يزرع بيا روح جديدة وأمل أعيش بعد سنين موتي لا ترحين كالها وهو يباوعلي بذيج النظرة اللي تخليني أضيع بذيج اللحظة حسيت بمسؤولية الكلمات اللي نطقها من كلي آني علمته يحب الله و آني جنت الإيد اللي أخذته من وسط الظلمة وكرهه للقضاء والقدر بعد موت أهله حسيت الدنيا فجأة صغرت ووكفت بس يمنا
بگلبي كلت..
: يا والتر أنت متعرف أن الصبر اللي تعلمته مني جان هو نفسه اللي مخليني واكفة كبالك ما تعرف ماضي عشته شنو ما تعرف الكسرة الداخلي
من خسرت حسن ما تعرف آني مو ملاك آني أريد من خلالك يعيش حسن..
تقربت منه خطوة ردت أكله أن الفرج التحجي عنه مو بس كلمة الفرج هو آني لكيته ولكيت بي الروح اللي جنت أدور عليها روح حسن اللي صرت أدورها بكل رجل لمن شفتك باوعت بعيونه وكلت بصوت هادئ بس مليان ثقة..
: آني ما رايحة الصبر اللي تعلمناه سوى هو راح يخلينا نكمل الطريق مهما جان القضاء والقدر ضام لنا..
أبتسمت وشاقيته..
: بس كدامك خطوتين حتى ننجمع سوى ..
بلغة أمه كلمني..
: شو هي..
خجلت أسأله أنت مثل الغرب الختان للذكور عدكم أختياري لو تتبع أمك بثامن يوم ولادتك ختنوك حسب تقليد دينك..
: تدخل ديني لأن ماأكدر أتزوجك ألا تدخل ديني وعود باقي التفاصيل عمي يفهمك عليها بس لازم تدخل الدين بقناعة مو حتى تزوج سـؤدد..
أغلب حوارنا بلغة هذا البلد أسهل للتفاهم بس أحيانا يكلمني بلهجة أمه وآني بلهجتي هو بلغة أجنبية همس فرحان وافقت عليه..
: سِيوداد لو ما مقتنع أكيد ما أورطك أنا طوال تعارفنا ما أعتمدت على رواياتك التنقليها عن دينك أنا بحثت والله أعطاني مفتاح الطريق اليه أنتِ..
همست: لا غلط كول مفتاح طريقي لله الأيمان و التيقن والأعتقاد يعني العقيدة آني مجرد أرشدتك للعقيدة والدين..
رجع سأل عن الحلقة بيدي دنكت..
: هاي ذكرى عزيزة علي من شهيد ببلدي..
بس هذا حجيته وما أنطيت تفاصيل
كثرت جياته ألنا وهو بلغ عمي عن ميوله دخول دينا ويريد الطريقة
باوعلي عمي..
: لا تباوع ترى هو زميل شغل وجنت أسولف عن دينا ديلة بلة ما تريد أكسب الجنة براسه دخلت عتوي أبو عيون سماوي للدين..
هز راسه عمي: بعدين نحجي أنت متأكد مقتنع؟
: كل الأقتناع لكيت ذاتي وهذا قناعتي وأعترف سِيوداد.. ألها فضل الهداية..
: لازم تلقي الشهادة بالجامع..
هاي الأيام جانت حلوة أشتريتله دشداشة بيضه من الأزياء الخليجية
أريده يدخل دينا وهو بزي عربي بالأبيض مثل الولادة الجديدة وطبعاً هو من يومين تقدملي قبل أشهار الأسلام هو أسلم من يوم صارحني بس بقت لازم التشهد و الأشهار حاجاني عمي عنه..
: هو يبقى أجنبي الأب ولو من أصول عربية والأم عربيه قح مولود ببلد أمه و..
ضحك عمي وكال..
: مطهر هناك ببلد أمه أصحاب الديانات تتبع التطهير تقليد صحي لأن يهتمون بصحة الطفل..
: أي عمو هم دورت معلومات يطهرون الذكور ثامن يوم ولادته..
كلي: آهااا ودورتي ليش تدرين راح يخطبج..
دنكت بخجل: كبرت عمو وأشتاقيت لريحة طفل..
ما أطول عليكم دخل والتر للأسلام وسميته حسن وآخيرا تحقق حلمي أشوف من خلاله حسن..
من عرف عمي مخططي حيل رفض تصرفي ورطت الولد كال بس طلبت الماضي يندفن هو ما يعرف تفاصيل فقط يعرف جنت مخطوبة..
: تلعبين لعب باجر وعرف؟ لا تشوفيه طباع أجنبي ترى أصول أبوه عربي..
: سولفلي أبوه من أصل بلد أمه أيضاً بس جده هاجر وتزوج أجنبية وخلف منها أبوه وأخذوا الجنسية بس بقى الجد هو وعائلته بزيارة لبلده لمن بيوم أبوه شاف أمه عشقها خطبها هم نفس الدين لذا زواجهم سهل فتعلم والتر من جده و أمه العربية رغم مكسرة صح أنولد ببلد أمه وبقى أشهر هناك
بس الأم حريصة يتعلم لغة العربية حتى لا تندثر كبر وأمه تكولة أزوجك من بناتنا العرب ما أزوجك أجنبية
بس ماتت أمه وأبوه وجده بحادث ببلدهم الأصلي أما الجدة الأجنبية بعدها عايشة وتعرف هنا حرية أختيار الدين يعني الجدة متكدر ترفض أو تتصرف تصرف سيء..
: هواي علاقتكم زميل عمل و من خطبج مجرد تقليدية دخل أسلام ويريد مسلمة وأنتِ أفضل أختيار..
درت وجهي بخجل وسكتت تمت الخطوبة و الزواج يومها نزعت حلقة حسن رغم هو ما حجه بيها بعد
نزعت من كلادتي حلقة أيد حسن وخليتها هي وحلقتي بعلبة رزمتهم ويه السترة بجنطة يومها كعدت أكلب البوم الصور وصور الخطوبة وصور أستوديو الزواج الما تم وقتها من الصالون للمصورة قبل لا نجي للبيت وتصير المصيبةشهكت أبجي وأنوح
تعبت حسن وكبرت وأريد طفل أريد أحس بأمومتي تعبت ولك وآني أنتظر
جريت السترة من الجنطة الرزمتها بيها ونمت بحضنها وحلمت بحسن يبتسم و يسلم علي ودعني وراح فزيت خايفة ليش عافني وراح ليش هم بالأحلام تعوفني ولك ليش ليش
تم الزواج بسيط و ماجدة.. تكفلت ترتيبات الحفل البسيط على ذوقها
من عقد الزواج للبيت بدلنا وجنطنا مرزومة كبل سافرنا لبلد أمه العربي..
يومها كال أريد نتمم زواجنا ببلد أمي
لزم أيدي وكال..
: مسكت إيديكي وعم ترجفي شو بكي خايفة؟ ولا خجلانة؟
اللئيم ضحك و حضني وهو يهمس بأذني ..
: كان معها حق أمي أتجوز عربية العفة بالجواز والخجل والبراءة أنا بحب المرة تكون عفيفة..
ردت أجفص وأكوله وأنت عفيف لو بس سكتت خاف يفهم غلط تذكرت من تزوج وحدة من الشلة وثاني يوم أو بعد فترة من زواج نسألها بتول لو خبرة هسة آني بس ماجدة يمي وهاي فاهية زين متسأل..
وصلنا للفندق و بالغرفة رحت للبلكون أباوع للنجوم وصلنا بليل حسيته وراي التفتت نازع السترة وفاتح نص دكم قميصه خجلت من جرني لحضنه
رفعت وجهي أله وهو بالغزل مبدع..
: متلهف فهمتي شو قصدي؟ وأنتِ؟ كمان متلهفة إلي؟إطلعي فيني لا تهربي بنظراتك شايفة هيدا قلبي عم يدق سيوداد سيوداد.. حبيبتي أنتِ..
أخذ جف أيدي خلاه على صدره جهة قلبه تحت القميص المفتوح الدكم
توترت من لمسي لصدره وحسيت حدوخ خجل أرتباك وين لسانج سـؤدد صارت صدك أكيد ينتظر أتغزل بس شكوله جفصت وكوتله
يتبع 6017 كلمة
ملاحظة: نتفق بعض القصص القديمة الحوارات باللغات الاجنبية جنا نسويها فصحى ما حبيت أحس يطلع المتابع من الأندماج. فأنتم ميزو يعني اجانب أكيد سؤدد واي عربي يكلم أجنبي بلغة أجنبية بس مترجمة بقصتنا للعراقي
أما الحوارات الي تكون عربية سواء عراقي اولبناني هنا كل شخص يحجي عربي حسب اصوله من يا بلد
وملاحظة ثانية والتر جاد لبنانيته مكسرة حتى لو امه عربية بس هو وين سكنه اغلب سنينه وين يعيشهم
لذا تتأثر لهجته أكيد بس بالقصة منعا من ملل ومتابع ميفهم شقصد من اشكلب كل حواراته
لذا صح ممتازة عربيته بس بيها لكنة أجنبي و برزتها بالأغنية. ببارت يجي تقرون