رواية غدر وقدر الفصل العاشر10 بقلم دانيا
صلوا على النبي.....
عمي جاء من صلاة المغرب مشيت عليهو سألتو إذا رسل رساله لإبراهيم عمي كان قاعد في السرير في الحوش جيت مسيت عليهو وسألتو قال لي والله يابتي ناس التحويلات مشيت عليهم لكن قالوا لي كلام م فهمتو زي وقفو إستلام الرسائل او حاجه زي دي ... قلت ليهو وقفوا الرسائل كيف ياعمي الكلام دا من هنا ول من هناك ؟ انتكى في السرير وقال لي والله م عارف يابتي لكن قالوا لي م بنستلم رسائل ،، كنت مستغربه شديد قلت لعمي خير ياعمي مامشكله قال لي كدي يومين كدا وارجع ليهم تاني قلت ليهو طيب وقمت دخلت جوا همي كله في إني الحق اسجل قبل التسجيل يكمل .
يوم السبت الصباح كنت طالعه على بيتنا صادفت معتذ اخوي في الباب قال لي ماشه وين ياغفران جايب ليكي خبر يفرحك وقفت وعاينت ليهو قلت ليهو قول كدي .. قال لي جات قروش من المدينه بإسمك الظرف مكتوب عليهو ... قبل يتم كلامو قلت ليهو بنبرة إستفزاز " ياخ قروش شنو انا طلبت قروش انا همي شنو وهو همو المصاريف واصلاً منو قال ليهو يرسل لي مصروف براي انا ما متصرفه وبديت اجوط واتأفأف " معتذ جاء علي ومد لي الظرف قال لي هاااا العويرة دي انتي افهمي وخليني اتم كلامي بالأول والله حق ارجع الظرف لعمي امسكي هااك ،، جبدت منو الظرف وانا مكشرة وشي عاينت للظرف بإشمإزاز ومن الخجله على كلامي القلتو م قدرت اقول اي شيء قريت المكتوب في الظرف " رسوم مدرسة غفران " عاينت لمعتذ تاني واول ما عاينت ليهو كان شايل الصوت البضرب بيهو الحمار في يدو رفعو وقال لي والله حق زول يديكي خبطة بالصوت دا ،، جات إلهام قالت ليهو ياود عيب اتعلم الأدب دي اختك الأكبر منك ... معتذ م رد ليها وطلع مشى جات وقفت جنبي وقالت لي سامعاك بتجوطي خير ؟! حركت راسي وقلت ليها لالا مافي حاجه انتي عارفه انا ومعتذ م بنتفق عاينت للظرف وقبل تسأل قلت ليها دا إبراهيم رسل لي قروش عشان انزل المدرسه ،، ختت يدها في كتفي وقالت لي مبروك والله تستاهلي .
قلت ليها دخليهم معاكي جوا انا ماشه بيتنا وجايه قالت لي سمح شالت مني الظرف وانا طلعت مشيت .
إبراهيم :
قاعد مع مرام في البيت بحاول اقنع فيها إنو نسدد الفاتورة العلينا لأنو في النهايه البضاعه حرقت داخل الحدود حقتنا وكدا يعتبر إنو نحن إستلمناها والحبشي م ح يرضى إنو تحمل الخسائر يكون شيء مشترك بينا وبينو ... فكت يدي وقالت لي انت م بتفهم هي في النهايه لو م حرقت عندهم حرقت بسببهم عشان كدا ح نديهم نص المبلغ انت قضيت مع ابوي سنين معقولة م قدرت تتعلم اسس التجاره لسه شوف هنا خسارة زي دي م مقبوله عندي وانا م بتحملها دايرني اديهم قروش كدا ساي مجان قايلني بوزع صدقات انا ،، انا بقيت بعاين ليها ومستغرب كيف الإنسان بتحول لشخص تاني لمن يكون الأمر متعلق بالقروش كيف المرا فقدت المنطق وم قادرة تفهم إنو م من صالحنا نعادي زول .
قمتا على حيلي وعاينت ليها وقلت ليها خير يازول دامك مصرة وم ناويه تقتنعي بكلامي اتحملي العواقب انتي ويكون لمعلومك انا التجارة مع الحبش دي تاني م بدخل فيها شوفي ليكي زول يتولى موضوعها ... عاينت لي بغضب وقالت لي جداً هسي بتصل لميسرة عشان يمشي الأمور انت خليك برا ،، لبست نظارتي وطلعت ركبت العربيه ودورت بي كله بسبب غضبي منها قلت في نفسي ريح بالك يا إبراهيم خليهم يتصرفو كان بقدرو .
بعد مرور اسبوعين :
هيثم جاء بيت مرام فتحت ليهو الباب البت الشغاله سألها الملكه قاعده ؟ قالت ليهو بصوت متردد " اا ااي قاعده لكن بلعت مهدئ ونامت وقالت م دايره زول يزعجها " هثيم ضرب يدو مع الباب وقال للبت زحي كدي دفرها وخشى جوا وبغضب قال ليها " كماان عندها نفس تهدئ اعصابها وتنوم وجولص ليهو اسبوعين م عارفنو طفش وين ناديها لي " البت جسمها كله بقى يرجف قالت ليهو لالا م بقدر اناديها هي قالت مايزعجوها م بقدر .... هيثم اتلفت عاين للبت بعين حاره وقال ليها بنبره حاده " طيري ناديها " البت خافت وجرت طلعت السلم بعد كم دقيقه مرام جات نازله من فوق وهي بتعاين لهيثم الكان واقف وماديها ضهرو .
جات وقفت وراهو وقالت ليهو " خير داير شنو انت كمان " قبل تتم كلامها قال ليها قالوا لي مرتاحه لمن نايمه بالنهار كمان وصاحبي مختفي ليهو اسبوعين م هامك ،، عاينت ليهو بغضب وقالت ليهو اتلفظ صاحبك دا م هاميك اكتر مني احترم نفسك واطلع من هنا .... عاين ليها بغضب وقال ليها وقسماً باالله لو م لميت فيهو إلا اقتلك وطلع مشى خلى الدم فاير في عروقها .
غفران :
نزلت المدرسه لي قريب شهر ياامي حاولت امشي ارسل رسالة شكر لإبراهيم لكن ناس التحويلات م عارفاهم مالهم بقو غريبين خلاص م بقبلو يرسلو رسائل والسبب شنو م عرفنا يعني العندو رساله إلا يمشي بنفسو ولشنو ؟! امي قالت لي هاا بت ها ترسلي ليهو شنو مش قروشك جاياتنك وامورك رايقه م تشتغلي بيهو كان داير بجي ،، عاينت ليها بإستغراب وقلت ليها والله ياامي بقيت م قادرة افهمك لكن يلا م علينا انا ماشه بهناك عشان نسوي الغداء قالت لي كويس طلعت منها مشيت بيت عمي دخلت المطبخ لقيت إبتسام بتقطع في اللحمه قالت لي الله جابك تعالي قشري لي البطاطس ... اول ما خشيت حسيت بطني طمت شديد من ريحة اللحمه قربت استفرغ بقيت بعاين في اللحمه وقفلت انفي بالتوب إبتسام بقت تعاين لي قالت لي مالك يابت ... عاوزة ارد ليها م قدرت حسيت بطني طامه شديد طوالي طلعت برا