رواية حبيبتي ذات النقاب الفصل الاول1بقلم زينب محروس
" عشت أجمل فترة في حياتي أجمل سنة حرفيًا مكنش فيهم غير السعادة، سعادة وبس، لكن بعد كدا اتقلبت حياتي رأسًا على عقب، وطلعت متزوجة من أكبر خاين إنسان ميعرفش أي حاجة عن الرحمة أو الإنسانية"
دي القطعة الأخيرة اللي قرأتها نيروز في الدفتر الفاضي!
هو مش فاضى بمعنى الكلمة هو مقطعوع منه صفح كتير يعني عشان تعرف سبب إختفاء ملك فقدامها علامات استفهام كتير لازم تعرفها، وعشان كدا قررت تنزل مصر عشان تعرف الحقيقة.
ملك بالنسبة لها كانت أكتر من أخت دايمًا مع بعض من الطفولة، ولما نيروز سافرت مع أهلها أمريكا عشان شغلهم، بعدها بسنة سافرت لهم ملك وطلبت منهم تقعد معاهم ونيروز واهلها رحبوا بوجودها، وفي آخر سنة دراسية نزلت زيارة لأهلها لكنها مرجعتش واتخطبت واتجوزت من شاب أكبر منهم اسمه أنس وحاليًا دي كل معلومات نيروز عنه لأن التواصل بينهم اتقطع لما سافرت واتقطع تواصل نيروز مع ملك بعد الزواج، لكن مذكرات ملك وصلت أمريكا عن طريق شذى صاحبة ملك.
بعد محاولات كتير مع أهلها عشان تقنعهم بزيارة مصر إلا إنهم رفضوا رفض قاطع، لحد ما تدخلت خالتها وطلبت من أختها تنزل مصر لأن صحتها مش كويسة ومحتاجة حد يهتم بها، ونظرًا لأن أهل نيروز مشغولين جدًا ومتمسكين بشغلهم فقررت الأم تبعت نيروز لأختها تهتم بها في فترة الإجازة.
قبل ما تركب نيروز طيارتها أكدت عليها والدتها إنها ترجع قبل بداية السنة الدراسية الجديدة، وأكدت عليها أكتر من مرة بعدم زيارة الحارة اللي كانوا عايشين فيها.
بمجرد خروجها من بوابة المطار كانت شذى في انتظارها واللي طلبت من نيروز تركب عربيتها الملاكي قبل ما السواق اللي بعتته خالتها يشوفها.
طول الطريق وشذى بتحكى عن معاناة ملك وقد ايه كانت تعيسة في حياتها وقبل اختفائها بكام يوم طلبت منها توصل الدفتر لأمريكا بأي طريقة وفي أسرع وقت وبرغم الحزن والخوف اللي بان عليها إلا إنها رفضت تعطي أي تفسير عن حياتها.
نزلت نيروز من العربية بعد ما اتفقت مع شذى على خطة التقرب من أنس لمعرفة الحقيقة وإنقاذ ملك.
اول ما خالتها فتحت لها الباب اخدتها في حضنها وكانت في كامل صحتها، واتضح إن موضوع تعبها دا اتفاق بينها وبين نيروز عشان تنزل مصر وكانت متأكدة إن أختها هتبعت بنتها عشان الخالة عايشة لوحدها بعد وفاة زوجها، ومش بتخلف.
في اليوم التاني قبل ما تخرج نيروز من البيت وصلتها خالتها لحد الباب وقالت بقلق:
_ أنا سايرتك في كدبتك عشان عارفة انتي بتحبي ملك قد ايه، بس لو الموضوع فيه خطر عليكي يبقى بلاش عشان وقتها هكلم اهلك.
ابتسمت لها نيروز وقرصتها من خدها بخفة:
_ متقلقيش يا عسل.
★★★★★
بدأت نيروز خطتها في جذب انتباه أنس، وبما إن شذى معاها كل تحركات أنس فسابت لها خبر بوجوده في البنك.
دخلت البنك ومعاها ملفات فاضية اشترتهم من مكتبة مجاورة للبنك، وأول ما انتبهت إن أنس خارج من البنك اتحركت بسرعة وعملت نفسها راجعة مكانها، وهنا تصنعت اختلال في مشيتها وحدفت الملفات في الهوا وصرخت بخفة، وقبل ما تقع على الأرض كانت أيد أنس أقرب لها، فابتسمت نيروز وقالت بعته:
_ شكرًا، كنت هقع من غيرك.
لكن فرحتها مكملتش لأن أنس قبل ما يستوعب إنه ماسكها، شد ايده عشان يرد على مكالمة تليفون، وبالتالي وقعت نيروز على الأرض، وتخطاها أنس ومشي بدون اي اهتمام، بصت له نيروز وقالت بحزن طفولي:
_ كنت تلم معايا الورق طيب!!!
طول الطريق وهي بتشتم فيه، وقد ايه هو شخص عنده جفاف في التعامل من طفولته!!
الشركة اللي بيشتغل فيها أنس أستأجروا قصر يعملوا فيه الحفلة السنوية، ونظرًا لقرب أنس من المدير فطلب منه يروح يتأكد من التجهيزات قبل ما يرجع بيته.
وصلتها شذى لقدام القصر وأول ما دخل أنس دخلت نيروز بعده، ابتسمت للبواب وأشارت على أنس على أساس إنها معاه، وهي أصلا كانت ماشية على أطراف رجلها عشان متعملش صوت، لحد ما وصل أنس لجنينة القصر وبمجرد ما تخطى حمام السباحة سمع صوت طش الميه.
والحقيقة إن نيروز حدفت نفسها في حمام السباحة، وادعت تعرضها للغرق، كانت متأكدة إنه هينقذها ويكون دا تاني لقاء بينهم في نفس اليوم ويبدأوا التعارف.
لكن اللي حصل غير توقعاتها لأن أنس سابها ودخل لملحق الجنينة، فوقفت نيروز اللي بتعمله وخبطت الميه بغيظ وهي بتقول:
_ حيوان وعديم الإنسانية! معفن زي ما أنت!
أول ما فتح باب الملحق رجعت تاني تمثل الغرق وهنا ظهر أنس ومعاه العصاية الطويلة اللي بينضفوا بها الميه، وبدل ما ينزل يخرجها مد لها العصاية وطلب منها تمسك الطرف اللي عندها وهو هيشدها وبالفعل نفذت كلامه وهي بتجز على أسنانها لأنه للمرة التانية بيبوظ خطتها، وعشان كدا أول ما خرجت من الميه قالت بغيظ:
_ شكرًا.
نطق شكرًا كان مُصاحب لدفعة قوية منها وقعت أنس نفسه في الميه.
بصلها أنس باستغراب وقال بسخرية:
_ طب ولازمتها إيه شكرًا!!!
في اليوم التاني دخلت نيروز الحفلة على أنها ويتر، واول واحد قدمت له المشروبات كان أنس اللي تعامل معاها وكأنه مش فاكر الموقفين اللي فاتوا، وهي استغربت جدًا لأن واحد غيره كان أكيد هيعطي رد فعل، أقل حاجة أصلًا كان ممكن يرخم عليها عشان ردت مساعدته بطريقة مزعجة!!!
والواضح كدا إن هو اللي هيشغل تفكيرها، وأفعالها هتنعكس عليها.
★★★★★★★
رجعت صينية المشروبات مكانها وخرجت برا القصر تمامًا وهي بتفكر في طريقة تفتح بها كلام مع أنس، وأخيرًا قررت تجر الماضي وراها عشان يفتكرها لأنه من الواضح كدا إنه متعرفش عليها لحد الآن.
دخلت تاني للحفلة والمرة دي وقفت مع بنات البوفيه عشان يغرفوا الغدا، ولما قرب أنس عشان يختار من أصناف الأكل الموجودة، قرب من السلطة فمنعته نيروز وقالت بابتسامة:
_ بلاش عشان فيها بقدونس، وأنت عندك حساسية.
بصلها أنس باستغراب وضيق عيونه وكأنه بيخمن هي عرفت بخصوص حساسيته منين؟؟!!!
تحفزت نيروز عشان تعرفه بنفسها لكنه خالف توقعه كالعادة، وابتسم لها ببرود:
_ شكرًا على المعلومة.
عيونها كانت بتطق شرار وهي متابعة أنس بيتحرك بعيد عنها، ولما طلب منها حد تحط له سلطة ردت عليه بغيظ:
_ خلصت، شوف غيرها.
بصلها الشاب باستغراب وقبل ما يتكلم هي مشيت وخرجت تمامًا برا الحفلة وخرجت وراها شذى اللي اقترحت عليها تدخل الشركة وتشتغل في قسم المحاسبة بما إنها دارسة إدارة أعمال في أشهر كليات أمريكا، وبالفعل وافقت نيروز إنها تقدم على الوظيفة عشان دي الفرصة الوحيدة لتقربها من أنس.
وبالفعل عملت انترفيو واتقبلت في الوظيفة، ومن اول يوم لها في الشغل كان أنس بيتعامل معاها زي باقي القسم، والسؤال الوحيد اللي سأله كان اسمها اللي بردو معلقش عليه ودا كان بيغيظها اكتر وأكتر.
وفي يوم طلب أنس من نيروز و واحد زميلها يعملوا خطة مالية للمشروع الجديد، وبعيدًا عن خطتها فهي كانت بتشتغل بضمير وكانت شاطرة جدًا في شغلها، وكذلك الشاب اللي معاها واللي متعين قبلها بكتير، لكنه تسرع في شغله عشان يرجع البيت ولما طلبت منه نيروز يراجعوا الخطة قبل ما يقدموها لأنس اعترض الشاب واخدها وسلمها، ومع الأسف اكتشف أنس وجود خطأ في الحساب المالي فطلب منهم يحضروا لمكتبه وطلب منهم يرجعوا يعيدوا الحساب مرة تانية فاعترض الشاب إنه لو في خطأ فبسبب نيروز وهي اللي المفروض تعيد الشغل لوحدها لأن عمره ما أخطأ في حسابات مالية.
نقل أنس نظره بينهم الاتنين وسأل نيروز بترقب:
_ مش عايزة تقولي حاجة؟؟
ردت عليه نيروز بجدية:
_ أنا راجعت الجزء بتاعي أكتر من مرة ومتأكدة إنه صح، بس لو حضرتك شايف خطأ في الموضوع أنا معنديش مشكلة أعيدها تاني.
سند أنس على مكتبه وقال بجدية:
_ انتم الاتنين هتعملوه سوا.
اعترض الشاب مرة تانية وحاول يقنع أنس إن الخطأ مش منه، فاتنهد أنس بضيق قبل ما يقول:
_ انت اللي هتعيد الشغل كله لوحدك، الآنسة نيروز هتشتغل على خطة مالية تانية.
بصله الشاب بصدمة فوضح أنس رأيه وقال:
_ ببساطة جدًا الخطأ فعلاً مش في جزئية نيروز لأن نيروز بتكتب الرقم اتنين بالشكل المعاكس لرقم سته وعمرها ما كتبت الاتنين بشكل السنتين (اللي هو ده٢) والجزئية المحسوبة خطأ مكتوب فيها الاتنين بشكل السنتين.
في اللحظة دي أدركت نيروز إن أنس بالفعل فاكرها، وقاصد يتجاهلها طول الفترة اللي فاتت!!!!
★★★★★★
قفل أنس باب عربيته وقبل ما يسوقها اتفتح الباب وركبت نيروز اللي سألته باستغراب:
_ لما أنت فاكرني، تجاهلت وجودي ليه؟؟