رواية في عشقها هلاكي الفصل الثالث3 بقلم زهرة الربيع
اهي اغمى عليها وريحتنا...كده مش محتاجين تخدير مش كده يلا ابدا العمليه بقى وخلصنا
الدكتور بصله بدهشه وقال...عملية ايه اللي مش هتحتاج تخدير ...هو احنا هنخلع لها ضرس يا مختار بيه
مختار اتنهد وبص لشاكر اللي كان بيحاول يفوق روعه وهيتجنن عليها قاله بضيق...شاكر شلها دخلها الاوضه اللي الدكاتره هيشتغلوا فيها ...يلا بسرعه مش وقت نحنحه يا حبيبي انا عندي مراره واحده
شاكر قال بتوتر....مش نستناها تفوق طيب
مختار قال بخنقه.... لا...مش هنستنى حاجه كفايه كده
وبص للدكتور وقال ...دكتور التخدير جاهز
الدكتور قال.... اه تمام جاهز...بس المفروض نعملها شوية تحاليل عامه قبل ما نبدأ
مختار قال...موجوده شاكر اخد منها العينه وعملها الفحوصات اللازمه ..كل حاجه جاهزه
شاكر دخل روعه اوضة العمليه وطلع بحزن
ومختار قال بضيق....هات التحاليل والصوره يا شاكر
شاكر هز راسه بطاعه وجاب التحاليل والصوره اداهم لمختار
مختار قال بجديه وتحذير.... دي تحاليل شامله ....ودي صورة البنت عايزك تخليها شبها بالملي ولا غلطه لان الحوار ده فيه رقبتي ورقبتي يعني رقبتك يا دكتره
الدكتور بلع ريقه وقال....هتبقى نسخه منها متقلقش
وبقى يبص للصوره كانت لبنت تقريبا في نفس السن بس ملامحها مختلفه تماما
ومسك التحاليل بقى يقراها وبص لمختار وقال ....انت مش قولتلي البنت سليمه معندهاش مشاكل
مختار قال باستغراب.... ايوه فيه دكتور كشف عليها من ايام وقال انها سليمه
الدكتور قال..لا مقصدش الكشف اقصد التحاليل...فيه سيوله شديده في الدم ونقص متوسط في الصفائح
مختار قال بعدم فهم...... مش فاهم يعني ايه الكلام ده
الدكتور قال...ببساطه يعني العمليه متنفعش تتعمل تحت اي ضغط دلوقت ...لان احتمال 90% يحصل نزيف كارثي ونفقد البنت
مختار مسكه من هدومه وقال بغضب وقلق ...انت بتخرف تقول ايه العمليه دي لازم تتم انت مش دكتور اتصرف
شاكر بقى يحوشه عنه وقال...يا مختار بيه اهدى علشان نعرف نلاقي حل
مختار ساب الدكتور وقال بقلق وجنون...حل ايه...بيقولك مينفعش يعملها العمليه...ده انا ابقى ضعت كده....احنا صدقنا ما لقينا بنت بالمواصفات الللي محتاجينها حلني بقى على ما نلاقي غيرها اكون انا بقى الله يحسن للي خلفوني
الدكتور قال بسرعه وخوف....وتلاقي واحده تانيه ليه ..انا قولت مينفعش نعمل العمليه دلوقت يا باشا مش للابد...نقدر نعالج البنت ...هتحتاج ادويه محفزه للنخاع وشويه فيتامينات وهتبقى كويسه جدا
مختار قال بسرعه ...طب هتحتاج وقت قد ايه
الدكتور قال..... اقل حاجه اسبوعين او تلاته
مختار جذب شعره لورا وقال بحيره...كتير...مش هعرف انيمهم كل ده..ولسه محتاج قدهم بعد العمليه علشان وشها يبقى طبيعي
وبص لشاكر وقال....كل ده بسببك...قولتلك اعملها كل اللازم كان المفروض تشوف موضوع التحاليل ده يا غبي
شاكر نزل راسه بحرج وقال ....انا يا باشا مكنتش اعرف موضوع التحاليل ده غير من كام يوم بس لما انت قربت تطلع انا كلمت الدكتور وقولتلو يجهز ..فقالي ان لازم تحاليل كذا وكذا قبل ما نبدا
مختار قال بغضب....الغلط من عندي لاني اعتمدت عليك و.....
بس قطع كلامه لما جاله اتصال وبص للتليفون بغضب شديد لما لقاه غانم اللي بيتصل ورد وقال بانفعال...نعم عايز ايه انت كمان مكانش ناقصني انهارده غير اسمع صوتك
غانم قال بتوتر شديد....اكيد انا مش قاتل نفسي علشان اسمع صوتك يا مختار ...بس مضطر اكلمك قلقان على اخوك جدا...حمزه عندك او كلمك او تعرف عنه حاجه
مختار اتبدلت ملامحه لقلق شديد وقال....مالو حمزه فيه ايه .