رواية المجنونه والحلانجي الفصل السادس6بقلم سلوي عوض
وها هو الليل قد مر علي الجميع، فمنهم من نام خالي البال ومنهم من لم ينم وقضي ليلته في التفكير.
لنجد أن سمسمه قد نزلت الي كوافيرها لتفتحه، لتجد سالم يقف أمامها.
سالم: استني ارفعلك الباب
سمسمه: لاء شكرا، مش عايزين، انا هفتحه
سالم: يابت اسمعي الكلام
سمسمه: مقولنا شكرا، هيا رخامه وخلاص
سالم: ماشي، بس مسيرك تعرفي انك عمرك مهتكوني لحد غيري
سمسمه: طاب وسع من قدام المحل، اصل ده كوافير حريمي، وله ليك شوق اقصلك شعرك؟
سالم بعصبيه: يا بت همد ايدي عليكي
سمسمه: طاب مدها كده وانا اقطعهالك، هيا سايبه ولا ايه؟
سالم: انا ماشي احسن
سمسمه: ايوه كده شاطر
وهنا تدخل عليها زبونه من خارج الحي، الزبونه واسمها صافي.
صافي: كويس اني لقيت كوافير فاتح، من فضلك ممكن بس تعمليلي شعري؟ اصلي اتاءخرت علي الشغل والكوافير بتاعي لسه قافل
سمسمه: اتفضلي
صافي: ميرسي خالص
لتبدء سمسمه في كي شعر صافي.
صافي: انتي ايدك خفيفه اوي
سمسمه: تسلمي، عايزه شعرك ليس ولا بلح؟
لتضحك صافي.
صافي: هو لسه في حد بيقول بلح؟ اسمه كيرلي، بس علي العموم عايزاه ليس
سمسمه: من عنيا حاضر
وبعد أن انتهت سمسمه من كي شعر صافي.
صافي: ميرسي ليكي اوي
ثم تبحث صافي في حقيبه يدها عن المال.
صافي: اوبا! ده انا نسيت الفلوس ف البيت
سمسمه: ولا يهمك، روحي شغلك عشان متتاءخريش، وابقي عديهم عليا ف اي وقت
صافي: طاب بصي هاتي رقم الكاش بتاعك احولك عليه
لتضحك سمسمه.
سمسمه: وغلاوتك ما عندي محفظه، روحي بس شغلك وانا يا ستي مسمحاكي، ياله بقا
صافي: مش عارفه اقولك ايه، بس ميرسي اوي
لتتركها صافي وتذهب.
سمسمه: ياله ادي اول زبونه طلعت معهاش فلوس… مش مهم كله في ميزان حسناتك يا سماسم، اروح اجيب كوبايه شاي بحليب وقرصايه افطر ويحلها الحلال
وهيا خارجه من الكوافير تجد أن والدتها كانت ذاهبه إليها.
سمسمه: خير يا اما؟ في حاجه؟
نحمده: لاء يا قلب امك، انا قولت بس اجي افطر معاكي، اصل عربيه الزرع لسه ماجاتش
سمسمه: انا كويسه وبخير يا اما، متخافيش عليا
نحمده: اه ما انا عارفه
سمسمه: ياله روحي علي فرشتك وانا هجيب الفطار واجي افطر معاكي
نحمده: انتي شايفه كده؟ طيب
سمسمه: بتك ميتخافش عليها يا نونه، انا تربيت ايدك، ياما دقت علي راسنا طبول
نحمده: بقولك ايه، هو فاضل اد ايه علي عيد الضحيه؟
سمسمه: اربع ايام
نحمده: كل سنه وانتي طيبه ياقلب امك
سمسمه: من بكره بقا وجع القلب يشتغل، البنات والستات عايزني حاوي، سمسمه شعري بيقع، سمسمه اصبغيلي واكويلي، وف الاخر الواحده تطلع عشين جنيه كاءنها بتضحي
لتضحك نحمده.
نحمده: فكرتيني، عايزين نشتري اتنين كيلو لحمه علي نص كده، كبده وكمان ابدء اخبز رقاق لاهل الحاره، اهي نوايه تسند الزير
سمسمه: ندرا عليا يا اما لاقعدك ف بيتك واستتك، والسنه الجايه إنشاءالله اطلعك الحج
نحمده: الهي يديكي ويراضيكي ويسترك ويسعدك ويوسع عليكي يا اسماء يا بت بطني، خدي من قلبي وسري
وهنا تذهب سمسمه الي السيده نبيهه باءعه الشاي.
سمسمه: صباح الخير اخالتي، عايزين كوبايتين شاي بحليب
نبيهه: بت يا سماسم، انتي يا بت عايشه حياتك يا اختي لا همك
سمسمه: ايوه اعيش حياتي، وايه اللي حصل يعني؟
نبيهه: يا بت عريسك هيتجوز رسميه بت رتيبه
سمسمه: يا اختي مع السلامه، والقلب داعيله، ده يغور من وش أمه
نبيهه: يا بت ده انتو حكايتكو الحاره كلها عارفاها
سمسمه: لاء بقا مخلاص
نبيهه: ربنا يهدي سرك يا سمسمه يا بت
نحمده: سمسمه شوفتي بقا؟ اديكي عطلتيني، ودول يومين عيد، انجزي بقا
نبيهه: روحي علي محلك وانا هجيب ابو حليب واجيلك
لتتركها سمسمه وتذهب الي كوافيرها، لتجد أن عبير وسعاد تقفان ف انتظارها.
عبير: ايه يا سمسمه؟ كتي فين وسايبه المحل؟
سمسمه: كت بجيب شاي
سعاد: طاب ياله يا اختي اتاءخرنا
سمسمه: هتعملو ايه؟
سعاد: هقص شعري واكويه
عبير: وانا شرحه
سمسمه: طاب هنبدء بمين الاول؟
عبير: انا طبعا، انا الكبيره
سمسمه: بس خلو بالكم الاسعار غليت عشان العيد، كل سنه وانتو طيبين
عبير: هو انتي كل عيد تغلي؟
سمسمه: كل حاجه بتغلي، اشمعنه انا؟
عبير: طاب اشتغلي يا اختي، الا قوليلي صحيح؟
سمسمه: اه، سيبنا بعض وهو هيجوز رسميه بت رتيبه، حاجه تاني؟
عبير: خساره يا بت، الواد بيحبك وانتي بتحبيه
سمسمه: مخلاص بقا، انقلو علي محطه تانيه عليها فيلم حلو
لتضحك عبير: والله انتي بت مشكله ولا ف دماغك الدنيا بحالها يا سمسمه
سمسمه: مخلاص بقا المهم انتو مافيش عريس كده ولا كده؟
عبير: حتي لو جيه العريس ما انتي عارفه جوز امي بيرفض اي عريس يجيلنا بيقول معهوش فلوس يجهزنا وكفايه عليه مصاريف الجامعه
سمسمه: ايه الهبل ده؟ ده انتو ابوكم الله يرحمه سايبلكم شيء وشويات
سعاد: تقولي ايه بقا؟ امي سايبه كل حاجه ف ايده وهو بيسمم بدنا بكل جنيه يدهولنا، عارفه يا سمسمه نفسي بعد منتخرج انا واختي نروح نعيش لوحدنا ونشتغل ونصرف علي نفسنا
سمسمه: وتسيبو امكم؟
عبير: امنا بتبهدلنا عشانه ومشغلانا خدامين ليه؟
سمسمه: طاب بس بس وجعتو قلبي، كت ناقصاكو انا، صحيح يا ولاد محدش خالي من الهم حتي قلوب المراكب
وبعد أن انتهت سمسمه من كي شعر عبير وسعاد:
سعاد: عايزه كام يا سماسيمو بس خليكي حنينه علينا، اخواتك طالبات غلبانات
لتضحك سمسمه: المره ديه علي حساب صاحب المحل
عبير: لاء طبعا مينفعش
سمسمه: ورحمه جوز امكو ينفع، ياله بقا عشان منتاءخروش علي الجامعه