رواية في قلب القريه الفصل العاشر 10 والحادي عشر 11 بقلم نوسه حمد
قررت اني اقنع البت الاسمها مهاد دي تقع في حب استاذ وليد عشان يخليني في حالي ولاقيتا في حوش الجامعه قالت لي انا مخطوبه من الحته الفلانيه وطبعا الحته الفلانيه دي حلتي قلت ليها م شاء الله الخاطبك منو قالت لي خاطبني فلان الفلاني لمن سمعت اسمو جاني هبوط وقلبي بقا في يدي معقوله احمد اخوي يخطب دي وبقيت اسال في نفسي عرفها كيف ولاقاها وين علما بي انو احمد اخوي دا صعب واتجاه واحد م عندو علاقه بالبنات البت تتكلم معاي انا طشيت شبكه وفي راسي الف سؤال خليت ليها كلاما في خشما ومشيت طبعا هي زمان شافتني وبتعرفني بس هسي عشان لابسه النقاب ما عرفتني اليوم داك م كملت المحاضرات ورجعت البيت لقيت امي ومعاها خالتو سعاد اجهزو ليهم في طلبيه عرس وانا في وشي ظاهر علي الهم خالتو سعاد قالت لي انتي مالك بسم الله قلت ليها لا لا مافي شي وبقيت افكر اكلم امي ولا اخليها اخوي مسكين ماليهو في اللف والدوران وما يستاهل يقع في البت دي وامها اكبر شمشاره في الحله سايطه البلد والبلدين وخايضه في اعراض الناس الصاح والكذب هي ماسكاهو قلت امي م بتستحمل لو عرفت اقوم انا امشي الحله واقول ليها ماشه الجامعه لازم اتكلم مع اخوي دا انسب حل وانا اساسا نفسي بقت ما فارقه معاي ومن ناحيه تانيه خايفه علي مشاعر امي
تاني يوم طلعت بدري قبل مواعيد الجامعه ودا كلو قلت عشان الحق اخوي والقاهو في البيت ومشيت ركبت المواصلات ووصلت حلتنا ونزلت مشيت بيتنا طقيت البيت جاتني بت شكلها عروس سلمت عليها وشكلها خافت مني وحسيت انها زوجه اخوي التاني صهيب قلت ليها انتي زوجه صهيب صاح قالت لي بتعرفي صهيب من وين وليه سالتي منو قلت ليها اسمعيني احمد موجود قالت لي انتي منو قلت ليها انا نسيبه اختهم البت لمن شهقت خليتا كملت شهقتا جوه وقلت ليها طالما اخوي اتزوج ما صاح ادخل ساي ممكن تدخلي تناديهو لي البت محتاره وفاتحه خشما وتعاين لي شويه كده صهيب واحمد جو جارين اول شي احمد اخوي اداني كف لمن وقعتا صهيب اخوي مسكو قال ليهو كفايه فضايح قال ليهو الفضايح جابتن لينا زمان بقينا ماشين وما قادرين نرفع راسنا قلت ليهو ليه م ترفعو راسكم انا م طلعت براي انا معاي امي قال لي اريتك لو طلعتي براك شهر شهرين بننساك قلت ليهم شكرا والحمد لله المعاي امي عشان في الدنيا دي ما انداس بالجزمه مهما كنتو اخواني بس ما زي امي وانا هسي ما جايه الومكم جايه قاصداك انت يا احمد وجايه من ورا امي وما تفتكرو امي كويسه امي ما بتنوم الا بحبوب مهدئه كل يوم تتزكركم وتبكي عليكم بس انتو قسيتو علي بقراراتكم وعاوزين تغصبوني علي وضع ما نفع معاي وقلتو ح تطلعو من البيت خافت عليكم من البهدله واختارت البهدله ليها هي بس ربنا كريم من يوم طلعنا يوم واحد م اتبهدلنا لقينا احسن بيت في الخرطوم وامي اشتغلت وكويسه بس فاقداكم قالو لي نحنا كمان فاقدنها صهيب قعد ابكي قال لي اتمنيتا تحنني وتسيرني هي قلت ليهو معليش يا صهيب بس انا متاكده يوم عرسك دا اليوم الاضايقت فيهو امي لمن وديتا لطبيب نفسي قلب الوالد بحس وما تفتكروا امي كويسه امي محتاجه ليكم شديد وفارقكم صعب عليها وضحت عشاني انتو راعو للحته دي انا لو بنفع في الزواجه دي م طلبت الطلاق انا تعبت نفسيا من القريه والفيها وفهمن احمد قال لي مالا القريه براك مكبره الموضوع والله ناس كرم وبيتهم فاتح للغريب وناس حاره قلت ليهو ليك حق عشان ح تناسبهم احمد بقا مخلوع قال لي عرفتي من وين قلت ليهو دي قصه طويله وانا جيت عشانك قال لي كدي ادخلي نتفاهم دخلت ومرت صهيب شكلها بت محترمه وراقيه نهاي م قعدت عشان تسمع بنقول في شنو قامت بي ضيافتي وقالت لي صهيب لو احتجتو لحاجه ناديني وقالت لي قبل تفوتي عاوزاك قلت ليها حاضر وانا زاتي عاوزاك
احمد قال لي عرفتي من وين بالخطوبه قلت ليهو ممكن تفهمني انت خطبتها كيف قال لي قسمه قلت ليهو ماقسمه طالما ماعقدت عليها لسه قال لي ح اعقد ان شاءالله قلت ليهو لا يا احمد البت دي نهاي ما تخطبها قال لي ليه انا راجل واديت كلمه رجال م بتراجع منها لو انشقت الارض دايره تطلعيني شافع كفايه انك نزلتي راسنا قلت ليهو لسه مصر علي نزلتي راسنا دي انا لا قليت ادبي لا حملت بالحرام دا البنزل الراس انا عشت في بلدي محترمه وفي بلدهم محترمه كذاب البقول رفعت عيني عاينت ليهو ممكن يقولو خوضتا في اعراضهم بس انا نفسسي يوم ما لعبت بيها رغم انو كل السبل متاحه لي الاولاد داخلين طالعين والحاله واحده والقصص دي م بتنفع معاك انت احمق ولا حياتهم بتنفع معاك قال لي وانا مالي بيهم عندي معاهم مره يوم عرسي بجيبا قلت ليهو تبقا غلطان البت دي ماتفرق عنهم بشي انا شفتها وشفت اسلوبها قال لي شفتيها وين قالت م بتعرفك قلت ليهو لا شفتها وشافتني بس ماعرفتني اني اختك انا وهي بنقرا في جامعه واحده وعرفت بالصدفه انها مخطوبه ليك لو عرفت الطريقه العرفت بيها انها مخطوبه تخليها هسي قال لي حته اني اخليها دي تنسيها انا وديت ليهم الشنطه وحددنا العرس بقيت احنس فيهو قلت ليهو عليك الله اسمع كلامي لو مره قال لي ياتو يوم انا بسمع كلام نسوان صهيب قال ليهو دي اختك قال ليهو اختك سمعت كلامي انا الراجل ولي امرها عشان اجي انا اسمع كلامها
قال ليهو بختلف بقو اتناقشو شديد قلت ليهم عليكم الله م تتناقشو انا بس ما برضا ليك الشين وعشان عارفه الزواج استقرار ما عايزاك تتورط لكن طالما اخترتا ربنا اتم علي خير وانا ماشه قال لي ماشه وين ستين يمين ما بتطلعي الا ونحنا معاك نجيب امنا قلت ليهم يلا النوريكم امي لو شافتكم وغصبتوها علي الجيه ممكن تنجلط لا انتو تلمو فيها لا انا الم فيها وامي ح ترجع وانا الحا اجيبا ليكم وامي في اتم الصحه والعافيه ادعو لينا ربنا يسترنا صهيب حنين شديد دمعتو في عينو بس احمد قاسي شغلو شغل هرش بس مشيت لي مرت صهيب وشكلها مرتبه ونظيفه وراقيه و رقيقه قلت ليها الف مبروك انا لو عارفه صهيب اتزوج كان جبت ليك الهديه قالت لي العفو انا العاوزه اهديكم اهلي مع الحاجات جابو ليك انتي توب وامك توب شليهم وسلمي علي امك قلت ليها نفسي اسلم عليها واحكي ليها بس خليها بالنيه صهيب ح يحكي ليك انتي بس ابقي علي نفسك وبيتك وعشره ماليك بالحله وفيها كوني في حالك قالت لي والله من جيت غير جارتكم صفيه ما جاني زول طبعا صفيه دي بتريد امي شديد وروحها ونفسها امي قلت ليها خالتو صفيه اطيب مره في الحله ماتقصري منها وهي ما بتقصر منك وانا لازم امش اتاخرتا اخواني قلت ليهم خلوني بمش براي م تقدموني ومشيت ركبت وصلت متاخره لقيت امي في الشارع منتظراني قلت ليها يمه مشيت السوق مالك مخلوعه قالت لي سوق شنو قلت ليها مشيت اجيب ليك التوب دا وطلعتو ليها وهي كانت مضايقه لمن بتناهد خايفه علي قلت ليها يمه اعفي لي قالت لي عافيه ليك بس انتي امانه في رقبتي كان جاتك حاجه فايده حياتي شنو قلت ليها بعد الشر عليك يمه انا عايشه عشانك عشان لمن اصل مرحله البس روب التخريج البسك ليهو انتي الكافحتي عشاني وانحرمتي من اولادك قالت لي اولادي خليتهم رجال انا متاكده انهم كويسين ومبسوطين بقيت مخلوعه وبعاين لي امي معقولة قلب الام بحس للدرجه دي قلت ليها في زول من اهلك كلمك ولا حاجه قالت لي زول منو واهلي زاتهم الفضل فيهم منو وكل زول في حالو وخالتك الله اديها العافيه ويشفيها لي اولادها وخالك م جايب خبري لو موتا ولا حييت ياني انا الكنت مواصله صله الرحم انقطعتا منهم انقطعت وانا قطعتني الظروف قلت ليها معليش يمه قالت لي خالك شمتان علي عشان كان دايرك لي ولدو العاطل السكران الحيران قلت ليها كان اخير لي السكران الحيران بعدلو قالت لي مابنعدل دا ابوهو معجنو وبقا ليهو حار قلت ليها نسال الله ليهو الهدايه وربنا يرزقو بالزوجه البتصلح حالو من حال لحال افضل قالت لي ان شاءالله وكدي النشوف التياب لمن لبستو لمن اتكيفت وفرحت قالت لي ان شالله تشتغلي وتجيبي لي الأكتر فجأه سكتت وبقت تعاين في عيوني وقالت لي جبتي القروش من وين وانا عيون امي بخاف منهم سريع بديها الحقيقه قلت ليها يمه ديل هديه من مرت صهيب اخوي………يتبع
#في_قلب_القريه11
#نوسه_حمد
امي قالت لي كدي التوب الجبتيهو لي طلعتو ليها ولقتن توبين لبست واحد وبقت تعاين لي روحا في المرايا وعجبها عجب شديد قالت لي تعيشي وتتخرجي وتجيبي لي امي في النهايه ركزت انو التوب غالي وانا جبت القروش من وين بعد تعابير وشها كانت كلها رضا فجاه ملامحها اتغيرت لملامح حاده جدا وعيونها بقت تبرق عديل وامي بطبيعتها عندها نظره اخواني بتكسرهم قالت لي بصوت قوي نسيبه جبتي قروش التياب ديل من وين وكنتي وين انا بقيت اتمتم واتململ في السرير ودي واحده من علامت الكذب عندي وامي حافظاها صم يعني لو كسرت رقبتي لازم اقول الحقيقه قلت ليها يمه ديل هديه من مرت صهيب اخوي امي بعد كانت واقفه قعدت وقالت لي صهيب ودموعها في طرف عينها وبقت تردد في كلمه مرت صهيب انا بقوه واندافع وفرح وخوف وهلع بقيت اقول ليها يمه صهيب ما شاء الله مرتو طيبه وبت اصول وشكلها محترمه لدرجه انو مخليا بيتنا نظيف ومرتب امي ادتني عين حاره قالت لي بيتنا نسيبه انتي كنتي وين وعيونها كانت شرار ودموعها وقفت خوفت منها شديد قلت ليها يمه دقيقه افهمك قالت لي تفهميني شنو يابت انتي عرفتي الكلام دا من وين مستحيل تكوني مشيتي الحله قلت ليها م مستحيل يمه انا مشيت الحله امي بقت تكورك وتقول لي الوداك شنو انا طلعت عشانك ومستحمله اي شي عشانك وقلبي انهرد من شوقي لي بيتي واخوانك وما فكرت امش عشان ما اخليك براك تجي تمشي انتي قلت ليها يمه ممكن تهدي افهمك قالت لي اهدا كيف بعد مشيتي لي اخوانك ووريتيهم دربنا قلت ليها يمه اخواني م عارفين مكان سكنا قالت لي احمد اخوك بعد شافك بعرف وبجي يعمل لينا فضيحه هنا قدام الناس قلت ليها لا لا يمه النشرح ليك ممكن تديني فرصه اوريك انا من اساسو مشيت ليه وما كنت عايزه اكلمك عشان ما تتعبي قالت لي في مصيبه اكتر من دي قلت ليها واكعب منها قالت لي اها فشنو قلت ليها يمه بالصدفه انا مشيت المكتب لي استاذ وليد لانو شيلني الماده قالت لي يعني شنو قلت ليها سقطني فيها قالت لي سجمي سقطتي قلت ليها يمه انا والله قريت واشتغلتا بس وليد دا قصتو قصه قالت لي كمان وليد عندو قصه يابت انتي بتقتليني قلت ليها يمه بعد الشر عليك انا لو م انتي كان موتا في روحي دي خليني اشرح ليك قالت لي اها قلت ليها لقيت معاهو بت وشكلو بعرفا لمن سالتو البت اتضحت بت مني جارتي سبب الفتن والمشاكل الحصلت لي قالت لي اي عرفتها الله لا جاب عقابا قلت ليها شكلو عقابا جاي قالت لي كيف قلت ليها لحقت البت وبقيت اسال فيها وكده دايره اعرف اخبار محمد قالت لي حمه يا نسيبه محمد دايره بيهو شنو قلت ليها يمه دايره الطلاق دقيقه افهمك البت بالصدفه قلت ليها انتي مخطوبه قالت لي اي ولمن قالت لي مخطوبه من حلتنا لمن بطني طمت وطمت اكتر لمن سالتها مخطوبه لمنو وعرفت انها دي خطيبه احمد اخوي قالت لي احمد شنو البخطب البت دي شكلها كذابه ساي احمد اخوك الجنس دا ولا بنفع معاهو وطبعهم دا ولا بخارج معاهو قلت ليها يمه نفس كلامي القلتو ومشيت عشان انصح اخوي مهما كان دا اخوي الكبير يمه ومشيت بس للاسف يمه احمد مصر علي البت وقال ادا كلمه رجال وما بتراجع منها لو قامت الدنيا وقعدت وودا ليها الشبكه والشيله امي قامت علي حيلا وجدعت التوب الجديد وقالت لي ناوليني توب من جوه قلت ليها يمه ماشه وين الدنيا ليل قالت لي قلت ليك ناوليني توب من جوه ودموعها كانت سايله سيل جبتو ليها وقالت لي طلعي ليك قروش من المكان الفلاني والبسي عبايتك وانا بسبقك علي الشارع بكلم سعاد قلت ليها يمه نقوم بدري قالت لي لا انا م برجع عملت القالت لي عليهو ولحقتها في الشارع لقيت خالتو سعاد تقنع فيها وامي مصره خالتو سعاد صحت ولدها لمن جا امي قالت ليهو عندي بكا في الحله خالتو سعاد قالت ليهو وديها الميناء البري لبس وطلع وصلنا الميناء وبالعافيه حتي لقينا مواصلات ركبنا ورجع وامي الشارع كلو سرحانه ومهمومه قلت ياربي نحنا لمتين ح نكون مشيلنها همنا بدل تكون مرتاحه وبالا مرتاح كل واحد مننا عندو قصه احسن صهيب الله يديهو العافيه وصلنا الحله وزول شافنا ماف الباب كان فاتح امي دخلت طوالي مسكتها قلت ليها يمه صهيب اتزوج م صاح ندخل كده بقيت اصفق ليهم وجا صهيب لمن شاف امي بقا يبكي باعلي صوت وامي كانها مكتومه انفقعت معاهو بالبكا وتشيل وتوصف وتتاسف انها م حضرت عرسو احمد اخوي جا من الصالون مخلوع لمن شاف امي زاتو قعد ابكي وسلمو عليها جنس سلام ودموعهم في عينهم بس حسيت في عيون احمد توتر وفي لحظه جاني احساس انو احمد ح يكسر كلام امي ويحرجها مرت صهيب جات سلمت علي امي وامي اتكيفت منها قالت لي صهيب عرست يا ولدي ربنا يخليكم لبعض وترزقكم الزريه الصالحه صهيب قال ليها مرتي حامل باركنا ليها وكنا مبسوطين انا وامي وقالت ليهم م تتعبوها قال ليها تاني ماف تعب انتو رجعتو ح تساعدوها امي م ردت عليهو وقالت لي احمد مبروك صهيب طوالي اتحسس وقال لي مرتو سوقي نسيبه وامشي بهناك قلت ليهو لا لا خليني قاعده بمش معاها بعدين مرتو قالت ليهو م مشكله انا ح اعمل العشاء وفاتت احمد قال لي امي نسيبه كلمتك قالت ليهو اي قال ليها يمه والله خطيبيتي بت كويسه ومحترمه نسيبه دي عشان الحله دي كرهتا بقت شايفه ناسا كلهم كعبين قلت ليهو احمد والله العظيم دي حقيقه وسبب مشاكلي امها يا احمد سايطه الدنيا والعالمين وبتها الشافتا عيني دي والله انا الكبيره اسمع كلامي يا احمد بناتن عينن قويه اهلن ما فايقين ليهم عشان اربوهم قال لي بس خطيبتي متربيه وزوله محترمه شديد قلت ليهو الضمنك شنو طالما امها خايضه في اعراض الناس خواضه وبتها دي ما بتزكر زاتو شفتها في بيتهم اسمع كلامي يا احمد استهدا بالله البت دي م بتنفع قال لي انا وريتك ردي كان تسمعي كلامي انتي طوالي امي ردت ليهو قالت ليهو هي مالا انت ليه ما قادره تحس بيها نرجعا ليهو يجننا واجيبوها لينا مجنونه م تقدر تلمها من الشارع قالت ليك م قادره اعيش معاهو تجربه وفشلت ودا ماضي وهي هسي بحكم تجربتها معاهم ما عايزه البقا عليك يبقا عليها قال ليها انا البسكني في حلتهم شنو تاني يوم بجيب مرتي امي قالت ليهو لا انا م موافقه بالعرس دا بت زي دي م بتعرسا احمد قعد اجوط قال لي خلاص حرشتيها خلاص مليتي ليها راسها قلت ليهو اقسم بالله انا م كنت عاوزة افتح خشمي بس القدر وقعني بالكلام وحصل الحصل قالت ليهو يعني انت بعد كلام اختك وكلامي دا عندك كلام قال ليها اي يمه انا راجل واديت كلمه رجال م بتراجع منها مهما كان قالت ليهو حتي لو امك م موافقه قال ليها امي وليك الاحترام بس دايره اقولو ولدك م راجل وما عندو كلمه قالت ليهو دا م عندو علاقه بالرجوله دا مصير يا ولدي انا دايره ليك السمح والبعجب الناس قال ليها خلاص دا نصيبي وطلع امي العبره خنقتا ودموعا نزلت صهيب لحق احمد وشاكلو وصوتهم كان عالي قال ليهو ما عايز زول يدخل فيني صهيب جا زعلان منو وبقا يعتزر لي امي قالت ليهو اخوك وقت م قدر غصب اختك ودمرا اظنو داير يدمر نفسو والبت دي لمه فيها وين قال ليها كل من امها جاتنا هنا كم مره وما عارف احمد شاف بتها وين وخلاص يمه م تزعلي خليهو يشيل شيلتو قالت ليهو ما بشيلا براهو هدي اختك شالت شيلتا براها ما قتلتني بالهم قعدت ابكي قلت ليها يمه عشان كده انا احسن لي ارجع لمحمد وما اتعبك معاي قالت لي ومنو القال ليك انا تعبانه بالعكس وكمان بعد اصرار اخوك دا البيت دا ما بشيلني انا والبت دي وقالت لي صهيب امشي لي مرتك قال ليها مرتي من قبيل جهزت العشاء لمن سمعت صوتكم عالي نادتني ورجعت ترقد عشان الحمل تاعبها وحامل بتؤام امي قالت ليهو تستاهل بت طيبه وانت زاتك ما ساهل الله يسعدك وعقل اخوك انا خلاص م عندي معاهو قول والله اسعدو صهيب جاب لينا العشاء وصحا مرتو اتعشينا واتونسنا وضحكنا لي قريب الصبح لمن امس طردهم وقالت لي ننوم ساعه الاذان الاول نطلع قلت ليها من غير م نكلمن قالت لي لمن طلعنا زمان كلمناهم ولا لمن جينا كلمناهم لو عرفو اخوك ما بخلينا ما نومنا سمح امي صحتني طلعنا وماشين علي الظلط قالت لي لا ماشين لي راجلك قلت ليها يمه لا قالت لي اللا شنو لازم نصل وركبنا مشينا وشكلهم ي داب صاحيين من النوم فتح لينا محمد لمن شافني لمن انخلع وانا زاتي انخلعت وحيلي مات …………يتبع