رواية في ذمة الغريب الفصل التاسع عشر 19 بقلم كنوز

رواية في ذمة الغريب الفصل التاسع عشر 19 بقلم كنوز

مو نخلة إتعوض 

ميت البستان 

لا تحجي بسعر... 

دفنة.. وجفن و تراب 

شتطيح النه مغلوبين 

يالدفان 

براءة :: رجعنا للبيت بعد ما عون رفض يحجي منين هل طفلة و شنو تگرب اله  كعد جدي متنهد بتعب خطية ارتكز ع عوجيته ذاب ثكله عليها و صافن بالفراغ حسبة تاخذة و حسبة تجيبه 

نهض اديه ورا ظهره يروح و يرد طگ ايد بالآخرة بخشرة 

هاشم :: هذا الولد راح يموتني ناگص عمر 

العلوية :: ع كيفك وياه ابو حاكم ما شفت حاله غادي تراب 

هاشم :: جا انا شـ كاتلني غير حاله ومن احجي وياه ما يرد يضم بگلبه اگله جدي سولفلي ذب حملك عليَّه اشيلنه وياك يسكت 

العلوية :: ما يريد يتعبك وانت مريض هسه يحجي لغفار هو أخيه ما يضم عنه شي 

كض جدي ظهره حاني جذعة من توصل السالفة يم عون جدي يكبر فوك عمره مرتين يحدب و لون وجه يسود من القهر 

:: راحوا و خلولهم جومة أمانة بركبتي ااااخ يابوي كسرتوا لظهري مرتين وعلي 

يعاتب اولاده لان توفوا و تركوا أولادهم جدي شما كبرنه يشوفنه صغار بعيونه 

كاعدين ننتظرين غفار بس هو بقى يمه واكيد راح يعرف الصدك ويجينا بالخبر

جدة واكفة بالحوش تكلب بخرزات السبحة بين اصابعها 

وكل شوية تفتح الباب و عيونها تناظر صوب بيته جسمها هنا و و روحه و عگلها هناك و لسانها يتمتم أدعية اله 

العلوية :: دخيلك يابو خيمة الزرگ عاين  لهل يتيم و ارحم لحاله 

ركضت عمتي إصالة جابت ماي و علاج جدي انطته و غسلت وجهه جدة هم وقاست سكرها تفتر بينهم لا يصير الهم شي 

عنبر :: خليتهم يطلعون من البيت يمشون وانا اخر وحدة امشي خففت خطواتي وكلت لبراءة 

عنبر :: انا راح امشي لبيتنه اريدن اغسل هدوم ابوي 

براءة :: هدوم أبوج لو البيج ما يخليج تريدن تصنتين حتى تعرفين السالفة 

عبست بوجهه راحوا للبيت وانا سويت روحي دخلت بيتنه من طبوا بيتهم طلعت اركض لبيت عون الباب مفتوح 

دخلت امشي ع أطراف اصابعي حتى لا اطلع حس سحگت ع ماسحة جانت بالگاع انرفعت العودة ملتها طگتني بوجهي 

كضيت خشمي بوجع و صميت حلگي لا يطلع صوت شلتها رجيتها ع حايط و دخلت 

الطفلة تبجي وعون يهشهش الها ما تسكت و غفار مربع اديه ع صدره و مرتجي ع إطار الباب يعاين اله من شافه مخبوص تكرب اله يعاين لطفلة و گاله 

غفار :: اخافن جوعانة بيها شي ليش ما انطيتها  للبنات يشوفنها احسن 

ضماها عون لصدره بتملك عيونه غادية دم وهز راسه برفض 

عون ::  شني قابل احسن مني يديرن عبالهن عليها 

:: جم طفل مخلف گبلها بلا زحمة عليك حتى تگدر تدير بالك عليه 

كلما يتگرب اله غفار يضمها لصدره أكثر رافض حتى يتركها من ايده 

:: لا هي تركت وصية تبقى يمي انا اربيها و اديرن بالي عليها انا محد يجيسها غيري 

عگد مابين حواجبه غفار ينشد عن المجهولة اللي أمنت الطفلة يمه و يحجي عنها بصيغة الغائب 

سالت دمعة من عينه رفع ذراعة هو كاض الطفلة مسحها يدنگ راسه يضمه بين راسها و جتفها عبالك هو محتاجها 

تنهد غفار من مدلگ فوك حاجبه من شاف طال السكوت... الطفلة تصرخ مد ايده يريد ياخذها و عون عصرها بين اديه لصدره حيل لدرجة الطفلة صرخت بفزع زمخ بيه غفار 

:: خنگتها ابن الاوادم هدهااااا

جان عون متشبث بيها چن غرگان و مجلب بكشاية عبالك هي انفاسه ولو خذاها منه غفار يسلب الهوى من ريته وياها 

حاول غفار ينتزعها من احضانه بس عون بحالة لا وعي دخل طبگ ذرعانه عليها لدرجة الطفل فحطت بعد مالها صوت و ازرگت رفع ايده غفار بساع وطگه راشدي دار رسه بيه 

:: راح تموت بيدك  هددهاااا حيواااان 

فز بساع رخى اديه عنها أخذها منه غفار ينفخ بوجهه ينفضها وعون سود وجه يفتر ورا يردد مثل كاسيت و ينعاد 

::  ماتت... ماتتت مو شگول الها شلون اروحن الها بعد 

ما جاوبه غفار بس حاير شلون يخليها تاخذ نفس ويطلع صوتها ثواني إلى دقيقة.. شهگ وصرخت ثنينهم جروا نفس براحة صد غفار اله بلهجة أمر گاله 

غفار :: سوي الها حليب شي البت فحطانة جوع 

هز راسه عون بطاعة بحركته عشوائية ما يعرف شني يسوي ركض فتح جنطة جابها وياه  بيها ثياب بيض كم قطعة بس طلع قوطية الحليب سوالها حليب خطية رضعت بلهفة 

ندار غفار اله بهدوء و نبرة حانية نشده 

::  عون شمالك خوية.. وين جنت من  امس اختفيت واجيت بيدك هل طفلة.. شتعود الك 

گعد عون ع طرف الجرباية نظرته باهتة يحملق بالفراغ يسد و يرخي اصابعه چنه يحاول يتمسك بشي غير مرئي وهل شي يفلت من ايده... بلع ريگه بوضوع وگال بصوت مكسور 

عون :: لكيت امي 

ما فرح غفار بالعكس قلق يحس بيه ويعرفه من صوته اكو شي صاير 

غفار :: وينها وين لكيتها خوالك كالوا الك مجانها ليش ما جبتها وياك اذا زوجها ما يقبل انا احجي وياه 

جان السكون مغلف عون دنگ راسه ع طفلة و طاحن دموعه ع خدها عكرت جبينها مزعوجة أخذها منه غفار خلاها ع جرباية و عون صاح من غمج روحه 

::   دخيلك ياعلي 

فزت الطفلة تصرخ ع صوته و غفار احتار بينهم لمحني غفار اشرلي براسه عليها ركضت شلتها احاول اسكتها

وهو كعد ع ركبه جدام عون يستفسر منه 

:: عون  خوية عاينلي.. شمالها امك و وين لگيتها انا اروجن وياك اجيبنها ما اعوفنك وعلي 

:: ماتت امي غفار ماتت گبل لا اشوفنها واحجي وياها 

گالها و اختنك الحجي بصوته وبهل ساعة لاحظت شلون هو مهدوم امس من راح شفته شلون متلهف راح قصر و رجع انقاض بس 

دموعي كامت تجري وحدها و الطفلة تصرخ ماعرف شلون اسكتها ولا ترضه هي تهدأ.... 

جراه غفار لصدره بساع يهمس اله بكلمات المواساة رغم يعرف كل أحرف اللغة بهل لحظة تعجز تكون كلمة تگدر تواسي 

غفار :: انا لله وانا اليه لراجعون.. الله يرحمها ويغفر لها 

رخى عون راسه ع جتف غفار يبجي بنحيط و غفار رفع راسه ليفوگ يكض روحه لا تطيح دموعه 

رفع راسه عون مسح عيونه چن شي داخله انكسر ومحد صوت هل الانكسار غيره 

عون :: جانت بالعناية و من صحت دزت ممرضة عليه  طلعت دربي ما اشوفنه وعلي بس لگيتها ميتة صعدتني لسما وهدتني مناك  خلتني لوحدي 

غفار :: مووش لوحدك انت عون ديربالك تعيد هل حجاية انا وياك لدوم وصية ابوي انت ولو يصح بيدي اشيلن شكو وجع بيك و احطنه بيه 

عون :: بعدني بعازتها والله بشني الموت احسن مني و راحت اله.. لا حجيت وياها لا لمتني لحضنها لسه ما شبعان منها والله 

::  كول يالله عون كول يالله عاين هل طفلة بعازتك لخاطرها شد حيلك 

اشرلي غفار اطلع اخذت الطفلة و طلعت ما اشوفن دربي من دموعي عيوني مغوشة امشي كاضتها ع صدري واتعثر گوه سيطرت ع دموعي امشي وادحگ ع گاع زين لا انجبح و تطيح مني 

براءة :: جدي ما تحمل يبقى أكثر راح الهم گاعدة و اسمع صوت بجي بنحيب يتگرب صوب بيتنه انخمش گلبي گ مت بساع ويا ما فتحت الباب صارت بوجهي عنبر بيدها الطفلة و تبجي تشاهك 

جدة سمعت صوتها هبت من مجانها و القلق ماكل روحها 

العلوية :: هاا حبوبة لويش تبجين وگفتي گلبي بنحيبج هذا 

اخذت سجدة الطفلة منها وهي ربعت جدام جدة فرفحت بالبجي اشرت ع طفلة وگالت 

:: طلعت هل طفلة اخته  حبوبة 

كل ظن عنبر تبجي جي فرحانة جي هي دوم من تفرح تنزل دموعها انرسمت الفرحة ع وجوهنه كلها فرحانة اله معنى الكلام لگه امه 

العلوية :: شوباش للعباس يعني لگه امه مو وينها لويش ما اجت وياه

فرحتنا جانت لحظات خفيفة مثل نفس دافي ع جفوف بردانة و عنبر بعثرتها بهل خبر من گالت 

عنبر ::  ماتت امه حبوبة و گبل لا تموت وصت ينطوها اله و زلمتها سلمها اله 

لطمت جدة ع صدرها و فخذها بعزاء  غشت وجهه بالشيلة تنعى عليها چن عاشت وياها دهر جدة تحبها ع حب عون و دوم تلهج بذكرها و البنات گابلهن هي تنعى وهنه يبجن 

العلوية :: ما يشيلون ما يشيلون

 تمنينه النحبهم ما يشيلون 

اي والله يظلون... يظلون

 وطول العمر ويانه يظلون 

بويه اتحمل شلون.. اتحمل شلون 

و لفراگم اتحمل شلون 

بويه ما تهونون ما تهونون

 عزاز و علينا ما تهونون 

و اليموتون كون البجي يرجع اليموتون 

ويالعيون العيون ابجي لمن ما تعمن يالعيون 

ونة ع ونة لون انا عليج يا يمة هاجر ونة ع ونة 

سبحانك ربي مكتوب ع اولاد هاجر الهجر و الفگد و

اليقهر أكثر من أولادها هي... عاشت عمرها تعبها مبيوگ مثل شجرة يغرسوها بمجان ولمن تثمر ياخذون ثمرها ويشلعونها من الجذر يغرسوها بتربة لخ 

لا فرحت بـ اولادها لا شافتهم يكبرون جدام عينها لا هي سمعت كلمة الـ يمة ولا همه تغنوا بنطقها من رحمها لرحم الدهر 

الطفلة تصرخ مانعرف شبيها يمكن فگدت ريحة امها ظلت من وحدة لوحدة نريد نسكتها عجزنه انطيتها حليب ماكو ع فرد صرخة حتى خوفتني طلعت رحمة من للحجرة تعدل بحجابها 

رحمة ::  شبيها خطية دا اصلي و اسمع صوتها اخذ گلبي ما عولت اكمل و اطلع اشوفها 

براءة ::  ماعرف ما ترضه تسكت بس جدة تعرف لجهال و هاي جدامج بس تبجي و تنعى خالة هاجر

طوت شالها عدل ومدت اديها الي 

رحمة :: شو انطينياها اجرب وياها لان مرات جنت ابقى بالخدج اعرف لهيج عمر 

اخذت مني ربعت بالگاع و گلبت الطفلة ع ذراعها و تمرغ الها جتافها و ادكك ع كيف  صدك هدات و سكتت شوية و عدلتها ساكتة ارتاحت 

نفتح الباب اجه غفار جدة گاعدة بالحوش تنتظر گامت بلهفة اله تنشده بقلق واضح 

العلوية :: هاا حبوبة تعال احجيلي شلون ماتت والله بعدها صغيرة بعمر الورد 

طلعنا كلنا اله وهو عاين ع رحمة و البنية ساكتة بحجرها عيونه حمر كاتم غصته.... كعد و خلى راسه بين اديه و جدة جدامة ربعت 

العلوية :: ولك حبوبة احجي مو فتيت گلبي 

غفار ::  شحجي  خوالة ماكو گطرة غيرة بگصصهم متاجرين ابنتهم من خذوها منا زوجوها لواحد شراب خمر مسربت و خلفت منه بنت و نسجن طلگوها منه و شمروا بنتها ع عمها و ردوا زوجها واحد آخر اكبر من عمرها مرتين و بناته دايرات عليها طاگتها وهي توها جايبة ما تحملت و ربج حن عليها خذاها يمه 

طكت جده خدها و شهكت مفجوعة 

العلوية :: يمه سودة بوجهي شنهي من طك طاكاتها هل موتنها عمت عيني عليج يمه هاجر عشتي و متي غريبة 

غفار :: جدة الله يخليج لا تحجين هيج كدامه تره شعرة بس ها اها لو يتخبل لو يموت لاسامح الله هوني عليه موش تزيدينها 

نزلت دموعي بقهر عليها هالمرة ما شافت يوم راحة لا أبيت أهلها ولا أبيت الرجل جانت الدنيا فعًلا دار شقاء الها 

العلوية ::  وهو زلمتها وين شلون يخليهن هيج يطكن حرمته وهو ساكت 

غفار :: لا يحل ولا يربط هو اجه سلمه الطفلة لعون بحجة الوصية الدين يخرخر منهم زعم

العلوية :: و البت الثانية  وينها لويش ما جابها و لم اخياته هنا احطنهن ابطن عيني مثل ما ربيته و كبرته اربيهن وانطيهن ماي عيوني لو يردن 

غفار :: عد عمها يگولون خل ندفن الحرمة هسه ونكف الفاتحة و الله كريم 

عنبر :: بس لا البت الاجت تنشد عليه نوبتين

ندارينه ع عنبر كلنه من نطقت كلامها ترفة جانت گاعدة ع باية الدرج هم حفزت من مكانها 

ترفة :: اي وعلي تذكرت يمكن هي تذكرين من گالت  شوفني اشبه الدكتور وانا گلت الها اي نفس لون العيون 

وياه كلامها دخل عون وياه جدي سانده من سمع كلامهن عبالك جرعة امل انطنه بساع عدل قامته ينشد بلهفة من ريحة امه ويريد يملهن يمه 

عون :: شني... صدك جاية لهنا نشدت عني جا ليش ما حجيتن الي 

عنبر :: نسيت والله صارت هوسة بيومها و راحت عن بالي هينوب وهسه من حجه غفار تذكرتها 

ترفة : : ولج مو گصيتي الها صورة يم ذيب فطرس راويها اله خله يشوفها والله تشبه عيونك 

عنبر :: اي والله گصيت الها صورة تهدالي اطلعها الك

ركضت عنبر تدور ع نقالها وعون وراها بلهفة ينطر الها طلعت الصورة ومدته الها عاين الها اديه ترتعش يكبر الصورة يركز بالملامح انترست عيونه بالدمع وهمس 

عون :: تشبه امي... وبعد شگالت الجن 

عنبر :: گالت اسمها سدرة 

مد ايده بجيوب سترة يدور ع شي وبعدها جيبوب بنطرونه يدور مخبوص طلع گصگوصة صغيرة فتحها وگال 

عون :: اي هي امي مخلية ورقة يم الممرضة اليه بيها اسمها وعنوان عمها هم هاي شوف مكتوب سدرة رافد 

رفع الورقة لغفار يشوفه بلهفة اله چن بنص كسرته جبر خاطره رب العالمين وبدل الأخت انطاه ثنين.. رجع صد وجه لعنبر ينشدها 

عون :: وبعد ما حجت شي 

عنبر :: جانت تعاين لبيتك جثير تتأمله  و تنشد عنك وعن كلشي يخصك 

ترفة :: و نشدت عنك إذا سبع و تكدر تدافع الها مبين عمها و حبوبها موش زينين وياها و... 

خزرها غفار من ورا عون سكتت 

عون :: وشني كملي شمالها يطگونها مو 

ترفة :: لا لا ما گالت هيج بس هي رادتك الك خطية 

دكدك جدي ع جتفه بدعم حتى يخلي يلتهي وياه خواته شوية 

هاشم :: يله شد حيلك كف الفاتحة ولم اخياتك موش وگت تميل و اخياتك يردن جتف يسندهن 

تحرك عون خطوة لطفلة يعاين الها يتهمه يريد ياخذها و يرجع يسحب ايده يريد يطلع بره و يرد يوكف بمجانه صد ع غفار وگاله 

:: شسوي غفار وين اروحن والمن اصد ليا وحدة بيهن 

كضاه غفار من جتافة و دنگ يحجي وياه وجه لوجه بنبرة هادئة يرتب بعثرة حاله و تفكيره 

غفار :: نمشي لطب العدلي نسلتم المرحومة ونمشي لدفن وبعدها نروح للمنطقة نشند هناك عنهم نشوف وين گاعدين أول عبن هي ما ذاكرة الك بس  اسم المنطقة  

هز راسه اي اله عبالك چان ضايع بنص درب أظلم و غفار بهل كلمتين البسيطة كضاه من ايده وصله لنور... الامتنان چان يملع بنظرة عيونه لغفار هز راسه بـ ايماءة بسيطة اله 

دخل غفار بدل ملابسه دشداشة سودة و شماغ و الولد كلهم وياه امي من شافت جدي طلع خلى الها البيت 

فضيلة : يعني هسه أولادها كل واحد من زلمة والله فشلة شني گاع وكل يوم تضمن بيد واحد 

العلوية :: چا هي أمرها بيدها ما تعرفين أهلها وادم طاغية ومن ترفض الهم أمر يملخونها 

فضيلة :: لا دافعين الها عمة الحرمة لو ما تريد هي تزوج محد اله سلطة عليها و يجبرها

:: جا هي المثلج وين يگدرون يغصبونها ع شي تمنيت أهلها اهلج و السدى عليها يسدي عليج حتى تعرفين الله حگ و تكفين لسانج بلهاتج 

:: شحجيت هسه انا واكلتيني بكشوري لو هي حجاية الحگ دومها تغث 

:: شو ماخذة راحتج بالحجي وياي فضيلة شني بنبتج انا و تحاججيني 

گبل لا ترد امي وگبل لا تبرر و ادافع عن نفسها طگة جدة براس العوجية نگرتها نگرة خلتها كاضة راسها و تون گامت الها ع حيلها 

العلوية :: و دم أولادي يا فضيلة ان سمعتج غاثة عون بكلمة لو شامرتلج حجاية عوجة ع امه المرحومة طلعتج من السلف ع أيدي تصير و بعد تحلمين تدخلين هذا البيت حتى أولادج احرمنج منهم 

گامت امي مغتاظة جانت سجدة واكفة دفعتها بيدها ليغاد و طبت ترعد من تعدت من يمي سمعتها تهمس تدعي ع جدة بالموت و المرض 

رحمة :: البنات كلهن لبسن اسود حتى اني اللي ما اعرفها ولا عمري شايفتها متت قهر عليها من سمعت قصتها 

فضيلة أشك بيها مخلوقة من نار الشيطان لان ابن آدم مهما جان قاسي لابد يلين لموقف... لطفل... لشيخ كبير..المرأة 

بس هي حالة شاذة..... حتى أولادها اللي شالتهم بوسط احشائها ماحن گلبها عليهن.... هي بشر مو انسان 

سمعت صوت سيارة اجت وعليها تابوت جمرة قديمة 

جانت خامدة.. هب هوي عليها و اشتعلت بصدري 

واني اتذكر امي من جابوها چنت راجعة من المدرسة 

صيف و امتحانات لگيت فرعنا هوسة بابنا مفتوح والناس ملتمة النسوان تتلگاني يشبگني و يبجن و اللي تذب الها كلمة مواساة عليَّه 

واللي تمسح ع راسي.... صديت راسي و شفت تابوت امي وسط الطارمة عورة نايم عليه و ينحب عرفت روحي صرت يتيمة 

طلعت من تفكيري ع صوت بيبي تحشم البنات واگفة بالباب و رافعة ايدها تأشر الهن 

:: يله يمه همتجن ماعدها بنيات هنا يصيحن وراها و الجنازة الما بيها بنات ماصخة تصير 

دائما المرأة تريد بخلفتها  لو وحدة تكول حتى من اموت تصيح ورا جنازتي... 

وصدگ طلعن كلهن تلگنها عبالك عايشات وياها سنين دخلوها للبيت ومن رادوا يشيلون التابوت نام عون عليها يتوسل بيها 

:: لا تاخذونها مني عليكم والله ما شبعان منها غفار گلهم يعوفونها يمي عندي حجي مضمون بصدري الها بس اسولف وياها و اخذها 

أشر الهم يطلعون كلهم لف الشماغ ع وجه وكعد يمه و عون شال البطانية كشف وجهه  صفنة الميتين صفن عليها... يمسح دموعه حتى يركز بيها... حتى رمشة ما رمش دنگ باس راسها و خدها و شمها حيل يشبع ريته منها 

عون :: يمه... اول نوبة اكولن كلمة الـ يمه ليش ما تردين عليه... انا عون يمه 

لزم كفها بين كفوفه و لثمه 

:: صدگ يمه تروحين و تخلينيها حسرة بگلبي عليج 

يشيل اديها يخليها ع اكتافها كأنها دا تشبگه  و اديها يطيحن 

:: لميني لحضنج يمه انا تعبان حتى لو ميتة انا قابل بس خليني يمج 

:: ااااااخ كسرتوا ظهري واحد ورا الاخر رحتوا مني هيج شفتوتي گوي و خليتوني وحدي.... ابوي.. ارسلان مادري بيه وين... وهسه انتِ 

:: هديتي حيلي يمه والله جنت انتظر نرجع سوا موش انا امشي وانتِ ع جتفي 

هو يسولف وياها و الواگفين الغريب و القريب كلها دموعها تصب فتح عيونها بيده يتوسلها 

::  شني ما تفتحين عينج تعاينلي... بس مرة وحدة والله نظرلي وما اريد شي بعد... ضبي ايدج ع أيدي اريدن احس بالأمانج يمه 

گعد يمه غفار بساع بعد ايده يسد عيونها و عون ضج بالنحيب 

:: هديتي حيلي يمه والله جنت انتظر نرجع سوا موش انا امشي وانتِ محمولة ع جتفي.... لو رايحتلي الدنيا كلها ولا رايحة انتِ يمه 

شبگه غفار و عمة إصالة غطتها بساع.. و شالوا نعشها الولد بس عون ما گدر گوه يمشي فطرس لازمة و يمشون وراها 

براءة :: كضت ايام الفاتحة و مرت عشرة أيام عون كل يوم يطيح من طولة ما يبقل ياكل الا يجبرونه وجدي تعصب 

اخر شي منعه يشوف الطفلة الا ياكل و صدك قبل ياكل كمل غسل اديه 

عون :: براءة جيبها اللي اخذها للبيت وياي 

گبل لا احجي رد جدي عليه 

هاشم :: البت تبقى هنا يم البنات 

:: جدي هاي اختي تره و

هاشم :: اعرف اختك شني ماخذها منك انا بس انت ما تدبرها لوحدك تبقى هنا البنات ما مگصرات وياها و ليمت ما تجيب اختك الثانية تاخذهن ثنينهن يمك يصيرن مسؤوليتك 

طلع مغتاظ كلش يدردم جدي موش رافض 

العلوية :: ع كيفك وياه ابو حاكم توه دافن امه و جرحه بعد حار 

:: و شمسوي انا اله كاضة خيزرانة واطك بيه طفلة تريد كلشي وهو زلمة زحمة يتگرب الها لزوم بنت وياه... 

تعكرت ملامح جدي مغتاظ اخذ شماغه و عگاله لبسهن وصاح لغفار 

هاشم :: كوم غفار 

غفار :: وين 

:: نشوف عمام اخته وين بس لا تگله خله يرتاح واحنه نشوفهم وين نندلهم اول 

طلعوا ثنينهم و جراح و فطرس راحوا خاف يصير خلاف شي هناك 

عنبر :: كاضة كتابي باجر امتحان وكلشي ما قارية ولا أكدر اركز بشي افكر بـ عون كاسر خاطري جلجل الليل 

لملمت كتبي الجابهن غفار الي و ابوي جابلي جنطة جديدة و نسبلت بلا صوت فززتني براءة من حجت وراي 

براءة :: وين رايحة موش عمي و جراح طالعين شسوين لوحدج رايحة 

:: اضمن جنطتي هناك عبن صارتلي عبرة 

:: هذا كنتور و مفتاح ضميها وغفلي عليها 

:: لا صارتلي عبرة ما أأمن الا أبيت ابوي بعد هسه اوديها و اجي ما اتأخر 

عفتها و طلعت انگل بالجنطة من هل الجتف لهل الجتف عاينت صوب بيته 

صنته و ما مشغل ضوه بس سيارته واگفة بره يعني موجود امشي وعيني تربي لهناك طبيت بيتنه ضميت جنطتي و غفلت عليها زين 

وكفت بعتبة الباب افرگ ايد بالاخر بتوتر اتذكر من انطاني كتبه بلاش لزوم اردن الفضل اله بس ما اگدر افوتن بيته وهو لوحده بيه 

البستان اضلم موحش و كئيب درت بعيوني عليه اريدن اشوفه ماكو... بعد موت امه چان كل يوم يگعد يم النخلة بليل لوحده 

بقيت باب الحوش مفتوحة جريت طابوكة وكعدت  اعاين انتظره يجي لجحته طلع من بيتهم يمشي بهوان 

اجتافة متهدلة بلا روح گعد بنفس مجانه يعاين لسما گمت بساع لبست عباتي وطلعت اتلفت لا يشوفني احد 

وصلت يمه انتبه بساع دار راسه يعاين منا ومنا وگالي

عون :: شعندج طالعة بهل ليل 

عنبر :: اجيت اشوفنك اخافن معتاز شي 

::  زين انا ردي لبيتكم بساع لو شافج عمي كزار يظل يألف بكيفه 

:: هسه أردن بس انت ليش گاعد لوحدك بظلمة اصيحن الك غفار 

زميت شفايفي متورطة غفار موش هنا هسه لو گالي اي منين اجيبنه اله..دار راسه يعاين من شاف ماكو احد بره و البيوت كل بيبناها مسدودة ارتجى ع جذع النخلة متنهد بوجع 

:: لكيتها ميتة عنبر 

رجفت شفتي بقهر عليه لاهو بنت واكدر المنه لحضني ولا انا زلمة واگدر اتگرب عليه أكثر واهون عليه مصابه 

:: حضنتها بس باردة ما دفتني جا مو يكولون حضن الام دافي ليش انا يوم الگه امي ألگاها باردة... من رديت عليها التراب احسن دفنت روحي وياها 

:: راحت يم رب كريم هو ارحم بحالها بس انت لزوم تصير گوي علمود خواتك 

دعگ عيونه حيل عبالك يريد يطلع فصوص عينه وگال بوجع 

:: موش يكولن ما توكف الدنيا ع احد بس انا وگفت عندي ... كلشي وگف يمي بالساعة الشفت امي بيها ميتة مات بيه كلشي 

بقيت واكفة يمه هو يحجي وانا استمع اله افرگ ايد بالاخر حتى ما اعرف اواسي انا دوم يواسوني موش العكس سلهم عيونه وغفى هو گاعد 

الجو ثلج وهو لابس نص ردن نزعت قمصلتي من حدر العباية غطيته بيها لجحت ضوه سيارة من بعيد عفته و ركضت لبيت عمي حاكم 

براءة :: غفار و جدي و جراح وياهم راحوا ينشدون ع عمام اخت عون وين گاعدين بس ما گالوا اله جي تعبان طلعوا من ورا الظهر 

وهل صار الليل ولسه ما اجوا سويت العشة و سجدة و رحمة متگابلات ع الطفلة طلع اسمها آية... اعاين الهن رحمة نست همها بيها 

و سجدة هم تشرد من واقعها وياها.... رحمة تبدل الها و سجدة تسوي الها حليب حتى غسلن الها و الطفلة هدات عدهن حتى من تنام يتناوبن يكعدن يمها ما يخلهنا لوحدها ابد 

نفتح الباب و طبت عنبر تركض فززتني 

براءة :: شمالج تركضين ولج يبستي دمي 

عنبر ;: ركض وراي الجلب و نهزمت منه 

:: ومن شوكت تخافين من الجلب ولج 

:: شنهي كصدج براءة عود انا موش أنثى 

:: أنثى والله غصبًا عليَّه و ع اهلي يله فوتي جوه  الجو برد 

دخلت يم البنات توها سجدة نيمت الطفلة ركضت عنبر كعدتها تريد تشيلها و سجدة طارت وراها بالمس طگتها 

ما اشوفن الا غفار گطف قمصلته عنبر ع بيت وهمس بحده من بين اسنانة 

غفار :: گلها بس يجي غفار يجنزج اليوم 

راح مشه و عون راح وياهم طلعت رحمة بيدها المميات تريد تعقمهن نشدتني 

رحمة : هاا بشري لگوها اخته الثانية 

براءة : ما حجه بس ردوا راحوا وعون وياهم يمكن لگوها 

:: خطية ع اقل يلتهي وياهن شوية 

طبيت للحجرة عنبر كاضة الطفلة تسوي الها حركات و الطفلة صفنت و طگتها بجيه طگتها سجدة تأخذها منها 

سجدة :: خرعتيها ولجج

شمرت عليها القنصلة وگلت 

براءة : وين جنتي ولج غفار جاب قمصلتج ويكول بس ارد اجنزها 

عنبر :: صدك هو هيج گالح 

:: وعلي 

خوفتها وهي راحت كرصت يم سجدة ابد ما تحركت بعد ولا طلعت من الحجرة 

بقيته ننتطرهم حتى عشه محد قبل ياكل ساعة تقريبا و اجه جراح لوحده گامت اله جدة بلهفة 

العلوية :: هاا حبوبة شو رديت لوحدك جا الولد وينهم البت وينها 

جراح :: العمام انگس من الخوال يردون فلوس ياله ينطوها اله

يحجي مغتاظ منهم اخذ مفاتيح بيتهم من عنبر وگبل لا يطلع كضته جدة من ايده 

:: شكد يردون حبوبة حاجيني  لا تسكت 

:: خمسين 

راح لبيتهم جاب فلوس العرس و غفار خابر طلعت فلوسه هم انطيتهن اله و مر ع بيت عون طلع اللي مجمعهن و فطرس خابر ع ترفة ركضت جابت العنده مليون ونص 

گعد جراح يحسبهن

العلوية :: هاا حبوبة بشر شكد صارن 

جراح :: ٤٢ بس 

خرطت جدة ذهباها بساع و انا والبنات بساع نزعنه الترجي رحمة برگبتها كلادة نزعتها هي و التراجي لمتهن جدة بوصلة وخلتن بيده 

العلوية :: هاااك حبوبة اخذهن الهم وجيبوا البت إياكم تردون من دونها اليبوعون بنت اخوهم ،،شرفهم لأجل الفلوس ما يتأمنون تظل يمهم بعد 

:: هو من طلبوا فلوس جدي ما قبل يرد و يخليها يمهم بقى هناك هو والولد وانا اجيت اخذ الفلوس 

راح بساع وانا صفنت لـ اي درجة وصل جشع البشر يبيع دمه لحمه مقابل فلوس و شني شعورها هسه من عماامها باعوها  دارت حبوبة علينه 

العلوية :: كومن حبوبة حضرن لگمه للبت حضرن.. مجان الها،، هدمه نظيفة.. حضرن كلشي الها ما اريدن نگصر عليها بشي هم يتيمة وهم مهظومة 

براءة :: اخافن تبقى أبيت اخوها تريد 

:: حضرن انتن ومن تجي وين ما تريد خلها تبقى البيوت كلها مفتوحة الها 

گمنه طيشنه عنبر راحت لبيتهم جابت الها ثوب من ثيباها الجدد و سجدة راحت تطبخ عبن طبخها أطيب طبخ بالبيت 

رحمة بقت يم الطفلة وانا خبزت خبزة حار الهم هم ساعتين تقريبا و سمعت صوت سيارات وراها نفتح الباب دخل جدي وياه البت 

و الولد كلهم وياه تلگتها جدة عبالك بنتها حبتها و تهلي بيها عون شال الصغيرة وگالها مستجعل 

عون :: يله امشي نروح لبيتنه 

العلوية :: وين جدة خل البت تاكل الها لگمة وانت تعشه وياها وعود روحوا 

وكفت البت ورا جدة كاضه ثوبها بخجل وگالت اله 

سدرة :: عرفت امـ.. امي ماتت يعني انت وحدك 

هز راسه الها اي وهي عيونها مغورگة بالدمع جان عدها بصيص امل تكحل عيونها بشوفة امها بس قضاء رب العالمين چان أقوى 

أشرت براسها ع عنبر و ترفة وگالت 

سدرة :: جا انا ابقى يم البنات هنه يعرفني وانا احبنهن 

عون :: شني تبقين هنا امـ... 

فززها من صاح اشرله جدي بمعنى اش خلى يبتر كلامه تگرب الها أشر ع بيوتنه 

هاشم :: هاي البيوت كلها تحت أمرج جدي وين المجان اليعجبج كعدي بيه واللي يسحك الج ع طرف اسحك ع راسه وراس الخلفة 

اخذ غفار الصغيرة من عون انطاها لرحمة ومن تگرب منها حيل حباها من جبينها يتعمد يعودها ع گربه حتى تحبه و اخذ عون ه جهة لوحدهم 

غفار :: شمالك انت ع شني مستعجل ع روحة البيت مگصرين وياكم بشي 

عون ::موش مگصرين بس شني ما تريد تبقى يمي جا موش هي جاية لهنا نوبتين حتى بس تجي تعيش يمي 

عون صوته عالي يحجي بحرگة والبت خطية عيونها عليه بخوف خزره غفار 

:: لا تصيح حيوان و البت بعدها ما متعودة عليك تستحي منك 

:: اخوها انا غفار شني تستحي مني 

:: من شوكت اخوها  تعرفك ب الاسم بس واليوم ياله شافتك حالك حال الغريب عليها تريدها من اول يوم تبات يمك حتى ما ترتاح والله 

:: ولو تبقى يمكم  تتعود عليكم  وما تريدني بعد 

:: انت تگرب الها شلونج خوية.. جيب الها شني معتازة عودها عليك كلمة والآخرة گول الها خيتي رويحتي دخل بعگلها انت اخوها وهي لوحدها راح تجيك 

:: اريدنها يمي شني لا هي والصغيرة ثنينهن اخذوتهن مني خواتي الي تره 

:: ولي من جدام وجهي عون اليسمعك يكول بايگين خواته منه 

براءة :: بليل من نمنه اسمعها تبجي تعاتب امها شلون تموت و تعوفها كلنا سمعنه صوتها بس خليناها تعيش حزنها عليها وتبجي ع راحتها لحد ما ارتاحت و غفت 

وجه الصبح اسمع صوت شي يدوي و طگطگة مواعين شلت راسي اعاين البنات كلهن نايمات 

بس فراش سدرة فارغ طفرت من فراشي طلعت لگيتها مشغلة التلفزيون مطلعة فلم كارتون و هي بالمطبخ و ريحة الاندومي تارسة البيت 

براءة :: سدرة 

گمزت فازة بس ندهت بـ اسمها من شافتني نخبصت تبتسم خجلانة بادرت انا بالحديث اكسر خجلها 

براءة :: جوعاعة سودة عليَّه جا ليش تاكلين اندومي من الصبح موش زين روحي كعدي وانا اسويلج ريوك هسه 

ابتعدت عن الطباخ انتبهت مخلية معجون لاصبعها مبين مجوية عصرت جانب ثوبها بيدي احس بعيونها تراقبني من شلت جدر الاندومي اريدن اذبنه صاحت 

سدرة :: لااااا ليش تذبينه غبينة انا اكلنه من زمان نفسي اكعد ع تلفزيون واكل اندومي 

عگلي ع حاجيتها من زمااان جا شكد نظلمت ومن شكد نحرمت 

:: من هاي عيني گبل هاي اسويلج بس ما يصير تاكلينها ع معدة فارغة موش زين تمرضج 

غندبت و برطمت شفتها اعرفها ما قانعة بس سكتت خجلانة تعترض عرفتها بنفسها أجواء حلوة وهي تعاين تلفزيون 

براءة :: راح اسويلج ريوك طيب وأكثر من نوع و زيتون هم احطنلج وكعدي عايني و اكلي ع راحتج محد يگلج تدني ليوراج

لمعت عيونها بفرح هزت راسها اي راحت للهول كعدت جدام التلفزيون تعاين طفلة بعدها سودة عليَّه..

البنات كعدت ع صوت هم حسبت حسابهن بالأكل سويت الها مخلمة و بيض سلگ ما اعرف شني تحب فـ سويت الها نوعين... وطلعت جبن كصكصته و خليته

و رحمة ثرمت زلاطة و طلعت  دبس و راشي و صحن برتقال و زيتون كلشي عدنه طلعت 

صار نشاط بالبيت من البنات شكد حلوة لمتهن حياة والله 

سجدة ترست الصوبة و جابتها نحمي عليها الخبز فرشنه سفرة و كعدنه صفنت عنبر ما ترضه تگعد 

براءة :: ما تكعدين شمالج اليوم ضاربة دالغة 

عنبر :: اريدن خاثر من امس بليل اشتهيته بس جنت نعسانة ما گمت اكلت 

براءة :: كعدي هسه اجيبن الج 

عنبر :: لا كعدي انتِ تعبتي انا رايحة 

راحت تركض للمطبخ جابت صحن و ملته خاثر وكعدت تاكل منه 

اجوا جدي و جدة ايد بـ ايد ابتسم جدي من شافنه 

هاشم :: بوية يا شوفتجن بالبيت ترد الروح و تشافي العليل  

حبانه من روسنه كلنه و كعد صبيت اله جاي متعود الصبح يشرب جاي بس 

هاشم :: هاا جدي سدرة مرتاحة يمنه 

:: اي جدي بيتكم حلو أول نوبة انامن لحد ما اشبع نوم جنت يم بيت عمي جدة تكعدني من غبشة تغلط عليه حتى امشي ابيعن الروبة 

:: منا وغاد محد يزعلج لا بكلمة ولا بفعل أميرة تعيشين هنا و كلشي تريدينه يجرالج 

هزت راسها و الفرحة مالية وجهه من كلام جدي وياه كل كلمة حلوة تسمعها تبتسم جن اول نوبة تسمع هل حجي 

جدة اكلت بس جاي و خبزه مگسبة ع صوبة صفن جدي وگال 

هاشم :: بعد بندق  مجانها فارغ لو صايحت الها جدي وياجن ع ونسنج تاكل الها لگمة 

حفزت عنبر بساع دگت صدرها لجدي بحلگها اللكمة تمضغ بيها و تحجي گوه فهمنا عليها 

عنبر :: انا انا راح اصيحن الها واجي انتظروني لا تاكلون 

طلعت تركض و عبايتها تهف وراها دقايق اجت وياها ترفة فرحانة چي فكدناها طبطب جدي ع مجان حذاه وكالها 

هاشم :: تعاي يا جمار گلبي تعاي كعدي يمي 

ابتسمت خجلانة كعدت يمه بيده صب الها جاي و حمه الخبزة الها 

من كملنه رحمة و ترفة ما قبل اشتغل أخذن المواعين يغسلن بيها و يسولفن اجه عمي ابو طالب و التموا الولد بالديوانية مدري شكو 

عنبر ركضت صبت جاي و راحت الهم من طلعوا راحوا اجت بجعبتها كل العلوم 

عنبر :: عرفت عليمن جانوا ملتمين ولجن 

ترفة :: عليمن ولج انا سمعت عمي ابو طالب يگول لغفار اريدن التصوير الكاضه ع آل جبران بس ما فهمت شريد بيه 

عنبر :: هسه انا سمعتهم ابوي راح يروح هو وجدي يطلبون مرمر  و عبن متأكدين جبران راح يرفض من هيج ابوي رتب وضعه واخذ التصوير يضغط ع جبران بيه وما يخلي مجال يرفض 

براءة :: يااا والله عمي طلع ذكي و يحسب حساب لكلشي

عنبر :: جا شعبالج ابوي صح هادئ و يسولف بالدين بس مغشغش 

صفنه عليها كلنه وهي طگت حلكها حيل 

عنبر :: حجيت ع ابوي مو.. هاي حجاية موش زينة صح 

سجدة :: منين سمعتيها و اجيتي مثل الببغاء تعيدين بيها 

عنبر :: فطرس من سمع ابوي يريد يتزوج مرمر گالي أبوج خوش زلمة مغشغش وانا عبالي مدح 

اغتاظت من فطرس شلون ضحك عليها... اجه عون يريد ياخذ سدرة يشتري الها ملابس هي واكفة بعيد عنه وحتى هو من شاف ترددها منه ابتعد دفعه غفار  

غفار :: احجي وياها شمالك سطرك الحمزة سلام الله عليه 

عون :: شحجي غفار ما تشوفها شاردة مني عشر أمتار 

:: تكرب انت لو شني ناوي تتواصلون بالزاجل 

:: شكولن الها يعني 

:: انشدها ع أحوالها حب راسها يله تحرك ابقى اعلم بيكم زمايل 

فرك اديه وحدة بالآخرة متوتر راح وكف يمها و غفار يهز بيده مستهزء 

حجه وياها و رفع ايده بتوتر حاوط جتفها و حب راسها يسولف وياها ومن رادوا يرحون اخذت عنبر و ترفة وياها يساعدنها بس الصدك هي بعدها تستحي منه 

نكعت خبز و طلعت انطي لدجاجات و نظفت الگن هم 

اسمع صوت امي طالع لشارع انخمش گلبي رجلية كامت تركض لوحدها طبيت و اشوفن سجدة واكفة بنص الحوش 

ملابسها مرربعة و ريحت النفط تارسة الحوش و بيدها جداحة 

براءة :: شمالج سجدة تسودتني ذبيها من ايدج 

سجدة ::  امج  ما خلت عگل براسي جلماتها مثل السرطان و تنهش بگلبي واليوم اريد اريحها مني و ارتاحن 

لطمت امي ع خدها و تزلغ ب اظافرها بصوت خافت تحجي وياها 

فضيلة ::  ولج ذبيها من ايدج طلعتي صوتي شيگولون الوادم اكيد بيها شي و حركت روحها  

فتحت عيوني ع وسعها ع كلامها.... امي ما هامها وضع سجدة وصلتها لهل حالة وما دايرة بال كل همها الناس و شتحجي و شتكول 

تكربت ع سجدة دموعي تصب و عيوني كامت تغوش حيلي كله يرجف وخوفي ما تسمع مني و تحرك نفسها من صدك 

براءة :: خيتي فدوة اروحن الج عوفيها ومالج غرض بكلام امي والله بس يجي غفار اخلي يحجي وياها و تكف عنج 

ايدها ترتعش تمسح دموعها و ثوبها يكطر نفط ومضة نار بس وتصير أخيتي رماد تگربت رحمة عليها بهدوء و حذر 

رحمة :: سجدة باوعيلي لا تسمعين الها لا تخلي تأثير عليج و تضعفين والله تعلمت منج القوة اني تذكرت كلامج و نصيحتج و وكفت بوجه قسيم... لخاطر اخوانج و خواتج كلهم يحبوج و خاصة غفار والله دوم ع لسانه اسمج لا تفجعيهم 

جان انتباه سجدة وياها امي استغلت الفرصة ما اشوف الا كضتها و جرتها من شعرها و صمت ايدها و دك ع ظهرها ركضت اجرها عنها وامي آدك بيها بحقد موش خوف 

فضيلة :: تردين تسوين حجاية بحلك شمات شيكولون الوادم شعده و حركت نفسها 

انا و رحمة نريد نكضها عنها ماكو وامي بكل قوتها تطگ تشوف سجدة عدو و حدر ايدها صار گامت رحمة و لگطتها عضة من زندها خلتها تصيح شايفة روحه و فلتت شعر سجدة من ايدها 

رحمة :: كاااافي عوفيها البنية وصلت للانتحار بدل ما تندمين ع قسوتج عليها وتحضنيها جاية تضربيها فوگ وجعها كل همج شتكول الناس هم حاسبه نفسج ام انتِ 

كفت امي ردانها كاشفة عن آثار أسنان رحمة نابتات بلحمها 

فضيلة :: الصفرة الخوينسية طلع كل البلا بيج 

رحمة :: لعد تردين تكفخين و تظلمين ونسكت الج شايفتنه عبيد جوه ايدج والله الا اكول لغفار عليج اليوم وهو يموت ع سجدة لو درى بيج موصلتها لهذة الحالة يگلب ثوبج ع راسج 

فضيلة :: كول وفعل مدري شسوتيله جان يعبد الله صار يعبدج 

رحمة :: استغفري ربج شهل حجي هذا تره هذول أولادج مو غربة 

ما دارت امي الها بال و بطبعها تتجاوز بالكلام حتى وياه ربها ندارت ع سجدة 

فضيلة :: تطلگين من جراح اموتن منه اشوفن دم سنوني ولا اشوفنه وتاخذين مصطفى يعني تاخذينه  

هزت سجدة راسها بلا معنى عيونها تدور بالكاع ركضت الجداحة جانت واكعة بالماي و جدحت 

 براءة :: لااااا سجددددة لاااااا عليج الله 

صرخت و الصوت طلع من غمج گلبي احسه الجداحة ما تشعل بعد ركضت للمطبخ ناوية تاخك غيرها ركضت وراها اجه جراح ع صوتنا يركض وهي اخذت الجداحة 

تريد تشعلها طگاها بساع مخليها تطيح من ايدها 

بجت تطك نفسها بثنين اديها حيل جتف اديها بين اديه من شافها انفاسها ثگلت صاح

جراح :: البخاخ براءة بساع 

ركضت رحمة جابته اله يريد يخلي بحلگها صكت اسنونها حيل ما ترضه تأخذه كعدت ع ركبي جدامهم وكضيت ايدها احب بيها 

براءة :: لا تسوين هيج سجدة عليج الله اذا موش لخاطري لخاطر علي حاسبج امه لا تيتيمنه مرتين 

نزلت دموعها بقهر و جراح ما انتظرها تفكر ضغط فكها بيده حيل جابرها تفتح حلكها وخله البخاخ بساع طگت ايده خرمشته ما ابتعد ولا هدها 

استقر تنفسها و رد لون وجهة طبيعي طاحت ايدها بجانبها بتعب و جراح لأمها لصدره عيونه واكف بيها الدمع وهو يشوف حالها 

جريت نفس مرتاحة احمد الله ما صار الها شي انتفضت ع جراح من طكاها ع خدها 

جراح  : وعلي اذا عديتها بعد اموتنج سجدة 

صحت بيه بساع احاول ابعده عنها هو متشبث بيها 

براءة :: ليش تطكها ما تشوفها تعبانه كوه تجر النفس 

وهي دفعت ايده عنها نهضت نفسها زحفت ارتجت ع حايط تعاين لـ امي رفعت ايدها جاست خدها جن توها حست بوجع طكة جراح 

سجدة :: مد ايدك عليَّه نوبة لح اخليك تاخذ راتب رعاية بيها 

جراح ::  و النعم منج بلور اهم شي الراتب فكرتي بيه خو ما معوق وبلاية راتب بيمن اعيش ابقى اكرط حصو 

دارت وجهة عنه و رحمة جابت الها ماي شربتها 

سجدة :: امي ما راح تفوت حالنه انت مامليت مني ما تعبت طلگني و ارتاح و ريحني وياك 

جراح :: اكولن برأيج جم طفل نسوي 

:: صدك تحجي انت 

::  انا اكولن موش هواي فد عشرة خمسطعش كلش كافين نغيض بيهم امج اخافن هسه انا واحد جالطها النوبة منين ما تندار تشوف خلفتي تطك راسها بالحايط وتموت 

::  جراح 

::  عايني شلون تخزر بينا بروح أبوج حبيني جدامها بلجن الله يصعد ضغطها و تنطحل 

صدت وجهه لامي جانت كاضة عضة رحمة بوجع و تخزر بيهم صدك تخزر بيهم و تأشر الها براسها بمعنى عوفي 

ابتسمت سجدة عرفتها تريد تحرك گلبها مثل ما سوت بيها كربت وجهه عليه و حبته من خده وانا و رحمة صدينه وجوهنه بساع 

جراح :: عمي لو ادري النفط هيج يسوي شي جا من زمان نكعت روحي بصهريج فطرس كل يوم من الصبح 

:: يله كوم اطلع گبل لا احرك هسه 

_ راح ابدل ملابسي واجي الكاج مبدلة 

گامت تسح بروحها سح التعب بروحها موش بجسدها عاينت لامي صافنة و نزلت دمعتها چن طافن براسها حجايات امي عورن گلبها وبجت 

دخلت الحمام غسلت من النفط و بدلت اجه جراح خذها و طلعوا للبستان فطرس طلعت وراهم لگيته گاعد ساند ظهره ع جذع النخلة و هي امددة ع عشب و راسها بحجرة تطمنت عليها رديت 

رحمة :: بليل كعدت ع صوت سدرة اختها تبجي وهي تبجي وياها من شافتني كعدت كالت 

:: تبجي ماعرف شبيها انطيتها الممة تغص 

كمت الها ردت انطيها الحليب بس رفضت أخذها من حضنها 

:: لا بقيها بحضني و علميني شلون اخليها ترضع بلا ما تغض 

صدك علمت و سجدة هم صحت كعدت يمها گمت للمطبخ اغسل الممة الثانية شفت من الشباك دخل من الباب صارت عيوني بعيونه ابتسم واجه 

:: گالوا ما ماكلة من الصبح ع ريوك شني مريضة 

:: لا بس ما اشتهي

شابك اصابعه وياه اصابع أيدي واخذني وياه طلعنه گوه مسيطرة ع رعشة أيدي بين ايده تمشينه باابستان جان بليل يصير حلو 

نسمات باردة حلوة و بعدها اخذني للورشة جانت دافية شاعل جمرية و مخلي القوري عليها سوالي لفة من جبن و صبلي جاي 

:: وهاي جاي بالكوب الجبير مثل ما تحبينه 

دا اكل صارت عيني ع خشب تذكرت من خربت شغله وهسه ضمنته بجانبي 

:: عن الحلال و الحرام غمد السيف الجنت تشتغل عليه ردت ارسمه و خربته خفت منك و.. 

:: و شلتي ضميتي حدر الخشب حتى لا اشوفنه 

غصيت بالگمة فاتحة عيوني وهو دكدك ع ظهري و انطاني مي سئلته اريد اعرف 

:: شلون عرفت 

أشر براسه ع زاوية الورشة الفوگ مبتسم رفعت راسي ادور لمحت كامرا 

:: يعني شفتني شلون خربته و شلون ضميته وما حجيت 

:: وشنهي يغلى عليج فدوة الج الخشب و راعية 

سكتت خجلانة كملت اكل وصارت سكوت بينه لزم كف ايده فتحه يمشي اصبعه ع خطوط باطن كفي ما بيه جانب بارد حتى ايده چانت دافية 

:: خطوط ايدج تشبه خارطة روحي لا تهديني أيدي ديرتي خلافج تصبح ديرة غرب رحمتي 

سمعت صوت الولد جاين ع ورشة گام رجعني للبيت و اسمعهم يتعاركون ع السيف الجان يشتغل عليه كل واحد يريده اله 

رانيا :: بعد كم يوم من ولادتي و من گدرت شوية اوكف ع طولي رجعنه للبيت الليل كله الصغيرة ما تنام بس بالنهار 

شوية غفت مددت ارتاح ومهدي يغار منها أخذوا عروة و أزاد يمهم سمعت صوت طگطكة بالبيبان وصوت خطوات ناس يمشون بالبيت 

نهضت بساع وكعدت ابراهيم 

رانيا :: ابراهيم اسمع صوت بره عبالك اكو احد دا يمشي بالبيت 

نهض بساع طلع واني لبست حجابي ورا ما نحس الا جام باب المطبخ تكسر و فتحوا الباب... دخلوا علينا برمشة عين البيت 

نترس رياجيل لابسين اسود و ملثمين عروة تلوى وياه واحد 

التموا عليه بطحوا ع گاع و جتفوا اديه و واحد منهم گال لابراهيم 

:: اذا ما تگول وين ضام بنتك لو تجيبها تسلمها النه ذوله ثنيهم ناخذهم وبعد ما تندل الهم أثر 

اشر ع عروة و أزاد 

ابراهيم :: همه واني وياهم هم وحتى هذا الطفل اذا تريدوا أخذوا وما اسلمكم بنتي شرفي 

اندفع أزاد عليهم لزمة واحد ضخم من ايده لواها ورا ظهره و لزمه من شعر راسه ضربه بالحايط حيل أكثر من مرة 

ابراهيم ركض اله و عروة يصرخ ثنين مخلين ركبهم بظهره حتى لا يكون 

الدم گام يطفر من راس أزاد ع بياض الحايط و فقد بين اديهم....

                 الفصل العشرون من هنا 

لقراءة باقي الفصول اضغط هنا