رواية اللون السابع للحب الفصل التاسع والعشرون 29 والثلاثون 30 والاخير بقلم شذى عبد المكرم
____________
من جانب عمار
سافر مع همس ورجعو لاهلهم وصلو اخر الليل والبيت فرح بجيتهم نزلو في غرفة عمار لانها فاضية وهمس طوالي مشت للبنات وهو ابوهو اتصل ليهو انو دايرو في موضوع ضروري مشى لقى معاهو عمو صابر وعزيز سلم عليهم وقعدو
عمو محمد: والله يا ولدي عمك ابراهيم دا اتصل وطلب مساعدتنا في حاجه
عمار: في شنو يا ابوي
عمو محمد: والله وحدة من بناتو ديل نزلت سمعتو في الواطة وسيرتو بقت في كل الحي واترجانا انو نسترها ليهو ذي ما عارف ما عندو اولاد في اسرتو كبار كلهم صغار شفع
عمار: اها
عمو محمد: طلب مساعدتنا
عمو صابر: واديناهو كلمة كدا لحدي بكرة في الاجتماع نلقى ليهو حل . طبعا عزيز شغال بتلفونو كأنو ما بتكلمو كدا
عمار: ان شاءلله بتلقو حل
عمو محمد: ان شاءلله هسي انت امشي ارتاح جاي من سفر . ودعهم وطلع حسا كأنو في حاجه حتحصل لانو مستحيل يكلموهو كدا وقاعد يقول ان شاءلله ما الفي بالي رجع غرفتو وقعد يفكر لمن نام من التقكير وهمس نامت بهناك الصباح رأسو بقى يودي ويجيب لقى همس صبحت عليهو بس كان سرحان ما فاهم حاجه بعد شوية رجال الاسرة كلهم اجتمعو
عمو محمد: بما انكم كلكم هنا لازم تعرفو امر الاجتماع . قام حكى ليهم كلهم بنفس كلام امس
عمو مصطفى: يبقى الحل الوحيد واحد فيكم يتزوج البت فترة مؤقتة بس لمن الاشاعات تخف
عمر: بس دا ما حل ويعتبر حرام
عمو محمد: نحنا دايرين نستر البت بس ونستر عمكم . طبعا ابراهيم ود عمهم لاعمامهم
عمو صابر: محمد قال الصح اها يا اولاد
عمر: بس كلنا متزوجين
عمو محمد: بس عزيز لالا . يداب رفع رأسو
عزيز: انتو عارفين موقفي من الزواج
عمو محمد: فترة مؤقتة بس
عزيز: والله ولا تحاولو دايرين تدبسوني فيها
عمو محمد: عزيز احترم نفسك انت ما بتتكلم مع اصحابك
عزيز: ابوي انا زواج ما بتزوج ولا تدخلوني في مزاضيعكم دي براكم اديتو الراجل كلمة بس انا ما اديتو ولا بتحملها ليكم ولا برضي عمي على حسابي . قال كلامو وطلع خلى المجلس طبعا معروف عزيز حقار وصعب وكلامو برا
عمو محمد: شايفين الولد دا؟
عمو مصطفى: خليهو اها يا سفيان
سفيان: ابوي انا مرتي حامل وقدامها اقل من شهر تولد وانتو عارفين فردوس ما بتتحمل فما بقدر اخاطر بحياتها ولا حياة جناي
عمو محمد: سفيان معاهو حق
عمو مصطفى: عمر
عمر: انا براي علاقتي مع وئام متوترة حاليا وهي طالبة الطلاق فموضوع ذي دا حيخرب لي بيتي بالمرة والله واصلا باقي ليها طلقة وحدة بس ششط . سكتو
عمو محمد: عمار قولت شنو
عمار: ابوي انا من اتزوجت ما تميت سنة
عمو محمد: والله فترة مؤقتة بس
عمار: همس ما بتتحمل
عمو محمد: انا بتكلم معاها وبقنعها ديل كلهم رفضو انت املنا الوحيد
عمار: لكن يا ابوي
عمو مصطفى: عمار اسمع كلام ابوك وذي ما دخلناك في الحتة دي بنطلعك منها
عمو محمد: ما داير اقول ليك كدا بس لو داير رضاي وافق . سكت ما قدر يقول حاجه ابوهو ختاهو في حتة ضيقة شديد
عمار: كويس يا ابوي . وطلع وهو زعلان شديد ما داير حاجه تعكر زواجو من همس هو ما صدق انو بقت ليهو وهمس عنيدة احتمال تطلب الطلاق واحتمال ما تسمع منو بقى سرحان بس لمن جا زمن الفطور الرجال جو لانو كان في كرامة وابوهو واعمامو كلمو الجيران انو الضهر عندهم عقد وعمار ما اكل ذي الناس من الزعل بس والموضوع انتشر انو عقد عمار الضهر جا ماري بجهة النسوان شاف همس جاية عليهو وهو حفيانة وتوبها نصو في الارض كان بدعي في سرو انو تكون ما سمعت بس حالتها بتوحي انها سمعت وجات لامو ومنظرها وهي مكسورة كان عالق لسع في رأسو ما قدر يتحمل دي بتو مستحيل يتحمل يشوفها مكسورة رجع لناس ابوهو وطلب اجتماع تاني اجتمعو سريع في الصالون قبل الضهر
عمار: ابوي اعفي لي والله ما بقدر اعمل كدا في همس والله ما بتتحمل . ومسك رأسو ونزلو
عمو محمد: نحنا لمن كلمنا الناس
عمار: عارف والله وما داير اكسركم قدامهم بس كدا زواجي حيتخرب اتخيل لو همس ما اتفهمت وطلبت الطلاق انت حتوافق عليهو لانها بت الغالي وما حترفض ليها طلب بس انا الحأدمر . محمد عارف انو ما بقدر يرفض لهمس طلب
عمو محمد: انا بفهمها الوضع
عمار: ابوي همس دي بتي وانا بعرفها هسي هي وصلها الخبر اني حأعقد وجاتني وكانت مكسورة ومتأملة انو اقول ليها الخبر كذب بس خيبت ظنها ما بقدر ارضي عمي ابراهيم على حسابها نهائي والله اعفي لي
عمو مصطفى: هسي البحصل شنو
عمار: ما بعرف والله بس ما بقدر اعقد على الاقل راعو اني لي كم شهر بس من اتزوجت كدا ذاتو الناس حتتكلم فيها انو راجلها اتزوج قبل ما يتم سنة معاها اكيد العلة فيها وما بنقدر نسكت الناس وكلامهم . كلهم سكتو ما بقدرو يجبروهو على العقد وكلامو صح وابوهو وقف معاهو لانو شايفو مسكور وكدا حيضحي بسعادة ولدو وزواجو
عمو محمد: مدام كدا بس لازم يحصل عقد يبقى عزيز هو الحيعقد
عزيز: انا كلمتكم قبيل رأيي في الموضوع ما حتدبسوني فيها بالاخص ديل متزوجين ممكن يطلقوها عشان ينقذو زواجهم بس انا ما متزوج
عمو محمد: ما قولنا اتزوج بت ابراهيم خلاص اعقد على بت عمتك سلوى عشان الناس الكلمناهم ديل
عزيز: ما في النهاية زواج يعني فرقت منو العروس؟
عمو محمد: انا قولت كلمتي حتتزوج صفا
عزيز: ابوي انا ما شافع لمن تجبروني اتزوج
عمو مصطفى: هسي خلينا ديك هسي بت عمتك مالا
عزيز: على عيني ورأسي بس زواج ما بتزوجها
عمو محمد: هسي عاجبك حالتك قاعد كدا بس
عزيز: ابوي لو ما عاجبكم قعدتي بخلي ليكم البيت والله
عمو محمد: عزيز احترم نفسك
عزيز: ابوي بس انتو قولو كلام منطقي
عمو محمد: منطقيّ اكتر من كدا؟ حتعقد على صفا بعد شوية حتكسر كلمتي؟ . ما رد وقام طلع ابوهو عرف انو حيوافق وعمار ما صدق انو اتخلص من الموضوع داك
عمار: وبت عمو ابراهيم
عمو محمد: والله ما حصلت قسمة نعتذر ليهو بس . وانتهى الاجتماع على كدا
الضهر مشو صلو طوالي عقدو لعزيز على صفا بدت المباركة وطوالي عزيز انسحب بس ابوهو واعمامو عللو للناس انو عندو حاجه ضرورية ورجعو البيت وكلمو الاسرة الكريمة والنسوان قامو يزغردو اما عمار طوالي مشى اتجاه البنات لقى ناس فردوس
فردوس: عمار انت عقدت؟
عمار: جنة وين بطة؟
فردوس: سألتك عقدت؟ وعلى منو
عمار: ما عقدت انا
فردوس: النسوان بزعردو لشنو
عمار: يااخ سألتك وين بطة
فردوس: جوا الغرفة
عمار: تمام والعقد عزيز . خلاها مخلوعة ودخل الغرفة لقاها راقدة وخاتة اياديها في اضنينا عشان ما تسمع الاصوات وصفا كانت معاها من شافتو قامت طلعت خلتو مع همس بس قلبو وجعو انو وصلها للمرحلة دي بس بعدها حكى ليها انو ما عقد وبرد قلبها وقال ليها انو العقد عزيز فجأة قالت ليهو عمار كدا صفا حتموت وقامت جارية برا وخلتو في خلعتو...........
_____________
من جانب فردوس
خبر عقد عمار هزانا كلنا اما همس دخلها في حالة تانية بقينا قاعدين بس لمن سمعنا النسوان بزغردو قلبنا وجعنا على همس فجأة جا عمار سأل منها وسألتو من عقدو بس رمى لينا قنبلة ومشى انو عزيز هو العقد جا في بالنا صفا سكتنا جات صفا طالعة
صفا: اها العروس منو . سكتنا والانظار كلها بقت عليها
صفا: مالكم . ما عرفنا نصدمها كيف بس انتي يا عمتو مها تعالي ذي القدر جات تزغرد ساي
صفا: اصدموني انو دي عمتو مها بتزغرد على عقد راجل بتها . وصلت لينا
مها: ومبروك لود عمكم عزيز و.... . دايرة تتم كلامها نادوها مشت عاينا كلنا لصفا قربت تقع من الخبر الا ثبتتها وسام وقعدناها
فردوس: صفا . كانت مصدومة وسام مسكت ايدها
وسام: ما قسمة يا صفا . هي من الصدمة ما نزلت دمعة
صفا: ربنا يتم ليهو على خير . سكتنا والله صدمتها كانت كبيرة جات مرا من نسوام الجيران
المرا: منو صفا فيكم؟ . اشرنا عليها جات حضنتها
المرا: الف مبروك . اتخلعنا طبعا
فردوس: بس هي ما العروس
المرا: كيف يعني موش هي صفا؟
فردوس: ايي
المرا: هسي قالو العروس صفا . اتفاجأنا كلنا وانصدمنا من كلامها خلتنا في حيرتنا وهي مستغربة فينا
فردوس: وسام اجري نادي عمتي مها . وسام مشت نادت عمتي مها وجات معاها
فردوس: عمتي عزيز عقد على منو؟
عمتي مها: على صفا . كلنا بصوت واحد صرخنا من الفرحة لمن خلعنا الناس بعدها ضحكنا وبقينا نزغرد الله وقدرتنا وصفا قامت تبكي وانا الحامل دي ازغرد ساي عمتو مها ضحكت فينا ومشت ونحنا لسع بنزغرد.........
____________
من جانب همس
الحمدلله موضوع عقد عمار طرشق بس فاجأني انو العقد عزيز اتهجمت وقولت ليهو عمار كدا صفا حتموت هو استغرب ما خليتو يفهم حاجة وقومت جارية لقيت البنات بزغردو وصفا بتبكي ساي قولت اكيد بزغردو فرحانين لود عمهم بس كانو يراعو لصفا جيت قعدت تحت ومسكت اياديها
همس: ما تبكي حبيبتي كلها لخير . البنات كلهم ضحكو فيني استغربت
فردوس: الشمار ما وصلك لسع
همس: في شنو
فردوس: عزيز عقد عليها هي ذاتها وهي بتبكي من الفرحة . انصدمت الليلة يوم الصدمات العالمية
همس: احلفو؟ .
كلهم: والله . قومت جارية للغرفة وصلت كدا اطاقشت مع عمار طالع ضربت فيهو
عمار: يا ساتر مالك . ما رديت بس سلمت عليه في خدو شديد
همس: بحبك . خليتو مصدوم ورجعت للبنات وبقينا نزغرد تاني
همس: جيبو لي جردل . ضحكو ووسام مشت جابتو وبقينا ندق ونغني ومبسوطين شديد وانا قبيل كنت مصدعة من البكي هسي طار لي زاتو دقينا لمن قولنا بس وبعدها اتونسنا وجا عمار قال داير صفا ساقها ومشى......
_____________
من جانب عمار
جا ساق صفا من نص البنات ومشو ورا البيت عشان يتكلم معاها براحتو
عمار: ما داير اكسر ليكي فرحتك في يوم ذي دا بس في موضوع لازم تعرفيهو
صفا: في شنو
عمار: يمكن عزيز ما يجي يبارك ليكي عشان هو انجبر انو يعقد عليكي . عاينت ليهو بخيبة امل كدا
عمار: ما داير اخيب ظنك والله بس عشان تكوني في الصورة ورأسك ما يودي ويجيب ونحنا كلنا عارفين موقف عزيز من الزواج شنو
صفا: اي صح عشان كدا للان ما مستوعبة . ختا ايدو على رأسها
عمار: وانا عارف انك بتحبيهو ودا الفهمتو من ردت فعل همس لمن قولت ليها العقد عزيز قالت لي كدا صفا حتموت. نزلت رأسها بخجل كدا
عمار: عشان انتي اختي وهو اخوي وانا داير مصحلتكم هسي البحصل شنو؟
صفا: اطلق منو . قام ضحك وضربها خفيف في رأسها
عمار: هبلة انتو بنات الاسرة ديل مالكم معلقين في الطلاق كدا اي وحدة تنخسها ساي طوالي تقول ليك طلقني . قامو ضحكو
صفا: والبحصل شنو يا عمار
عمار: مدام بتحبيهو لازم تنفذي زواجك والمفروض المبادرة والاهتمام يجي من عزيز بس هو حالة خاصة حاليا حاولي معاهو حيلين لانو حاليا ماف زول حيقدر ليهو غيرك والله اخوي وبعرفو قلبو ريشة بس . وضحكو الاتنين
عمار: يلا شدي حيلك مشوارك طويل شوفتي انا تعبت كيف عشان اتحصل على همس
صفا: بس انتو حالتكم غير
عمار: الاختلاف بس انها كانت بتي وهو حاليا راجلك استعملي كيدك . قامت ضحكت وهزت رأسها بمعنى تمام ومشى خلاها واقفة وهي بتفكر في عزيز والحيحصل في زواجهم وكويس انو عمار حكى ليها موقف عزيز عشان ما ترجى منو حاجة بس موش بتحبو حتخليهو يحبها غصبا عنو وحتستخدم كيدها وكيد النساء عظيم اتنهدت ورجعت للبنات ....
____________
من جانب فردوس
اليوم كان حلو شديد وذي المغرب كده قاعدين في امان الله فجأة بطني مغزتني شوية ما اهتميت فجأة شدت علي اكتر من قدرت اتحمل
فردوس: وااااي بنات بطني بتوجعني
همس: واااااي دايرة تولد
فردوس: واااي لا انا لسع باقي لي شهر
وسام: البحصل شنو
فردوس: ما قادرة . وبقيت ابكي من الوجع كلهن خافو والبيت اتلمى عليها
همس: احتمال ولادة
فردوس: نادو لي سفيان . مشت همس وجات راجعة مع سفيان وعمار وسفيان خايف شديد
سفيان: بطة مالك
فردوس: بطني يا سفيان . ومن شوفت سفيان لازم ادلع زيادة فزدت في البكي
همس: احتمال حالة ولادة
سفيان: بس هي لسع قدامها شهر
فردوس: ما قادرة اتحمل
سفيان: خلينا نمشي المستشفى قومي
فردوس: ما قادرة . جا مسكني من جهة وعمار من جهة قوموني من السرير وهمس صلحت لي توبي وبقى يمشيني شوية شوية والبيت كلو وراي وصلنا لباب الشارع المغز خلاني
فردوس: دقيقه
سفيان: في شنو يا بطة
فردوس: الوجع راح خلاص . البيت كلو فكا الضحكة
سفيان: فردوس لا اله الا الله؟
فردوس: محمد رسول الله وجع وراح رجعني جوا . البيت تاني ضحك على الدراما الحصلت دي عاين لي بغيظ كدا ومشى خلاني في محلي جنب الباب
فردوس: الله مالو كمان عامل لي رأسو المربعة دي همس ورحكم جوا . قامو البنات ضحكو
همس: عاد يا جنة ما بسألك . ورجعنا جوا اتصلت لسفيان
_ابوالسيوف
__ مالك
_ لو ما فيها تعب نفسي في كريبسي يعني
__ ماف ليكي
_ هسي انت زعلان مني عشان الوجع راح؟
__ الله لا جاب ليكي الوجع بس حسيت كأنو بتهظري كدا
_ والله كنت موجوعة يعني هسي بزمتك ابكي ساي
__ انتي دايما بتبكي ساي في فترة الحمل دا . ضحكت
_ حصل والله بس المرة دي كنت موجوعة بالجد
__ وهسي؟
_ هسي كويسة
__ الحمدلله
_ اها وبالنسبة للكريسبي؟
__ نومي نومك عليك الله
_ يعني ما راجعين الليلة؟
__ اليوم كانو في مناسبة وكنتي مبسوطة ما داير اخرب ليكي مزاجك لانو اكيد لو قول ليكي نرجع حتزعلي خليكي الليلة انا برجع
_ شكرا يا ابو بتي . وقفلنا وقعدنا ذي ساعة كدا وسام جات داخلة بكيس وزعت لينا كريبسي وادتني انا اتنين
وسام: راجلك مع قصر معانا
فردوس: جابهم سفيان؟
وسام: ايي . كنت مبسوطة واكلت الاتنين مع بعض واتونسنا شوية ونومنا من التعب.......
_____________
من جانب همس
يوم السبت قيلنا بمزاج وكان خلاص لازم نرجع عشان عمار بكرة شغال جاتني امي
امي: بطة انا حأمشي معاكم حأقعد معاكي اسبوع وبرجع
همس: احلفي؟ . قامت ضحكت على ردت فعلي
امي: والله دي اوامر عمار . قومت اصفق من الفرحة وحضنتها
همس: واااي يعني حتمشي معانا ما مصدقة . وبدينا نستف ليها ملابسها وانا اشيل اخم ليها في الملابس
امي: يا بتي انا راجعة بعد اسبوع بس
همس: حتى ولو ممكن تحتاجي ليها . ستفنا ملابسنا وبعد الغدا اتحركنا ورجعنا وانا التقول اطير من الفرحة انو امي معاي وصلنا متأخرين كدا طوالي دخلت امي غرفة الضيوف حتقعد فيها ورجعت غرفتي مع عمار من دخلت طوالي مشيت حضنتو شديد لانو ما لقيت فرصة اشكرو
_ شكرا . طوالي شد علي
__ مبسوطة؟
_ اكتر مما تتخيل . حضنتو مسافة حتى فكيتو بعد غيرنا
_ عمار الحصل شنو ما سألتك من العقد والحصل هل بالجد كنت ناوي تعقد؟ . عاين لي مسافة وهز لي رأسو وقام يضحك وقام من جنبي
_عمااااار
__ دقيقه افهمك
_ تعال هنا . وهو لسع بضحك وانا عصبت فنيتو بالمخدة
__كدا اهدي ما صح يااخ امك معانا
_ عمى الجور ان شاءلله داير تدبل فيني؟
__الله حلل لي اربعة
_ يحلحل عصبك ان شاءلله . وهو يضحك وانا دمي فاير
__ كدا اهدي عشان اشرح ليكي الحصل
_ ما تشرح لي واحد وعينك زايقة وسجمان ساي وما نافع . فتح عينو بصدمة
__ دا كلو فيني انا؟
_ ايي . وقعدت في السرير وبقيت ابكي اتخلع وجاني قريب وجراني عليهو
__ والله ما ذي ما مفكرة انا مستحيل اعاين لغيرك وانتي عارفة
_ بإمارة انك داير تتزوج فيني
__ والله كان غصبا عني انتي عارفة انا بحبك قدر شنو . ونزل رأسو في كتفي ومسح وشو فيهو طبعا نقطة ضعفي عمار
_ والحصل شنو . حكى لي الموضوع بالضبط وكيف ما قدر يكسرني ورجع اعتذر منهم وكان رضاي اهم من رضى عمو
_ انت عارف كل مرة بحبك اكتر
__ كل مرة برجع وبقول ليكي انتي قطعة من روحي . استكنت بين اياديهو وقضينا اجمل ليلة رغم تعبنا
الصباح صحيت وانا مبسوطة شديد وصحيتو للشغل وجهزت معاهو للشغل
__ شايفك مبسوطة من الصباح ان شاءلله ديمة مبسوطة
_ مبسوطة لاني معاك بس والله . سلم علي في خدي وطلع للشغل مشيت لامي لقيتها صحت شربنا الشاي مع بعض وقيلنا بمزاج اخيرا في زول اقضي معاهو اليوم وكمان ما اي زول دي امي يا ناس شربنا قهوتنا بمزاج لمن عمار رجع من الشغل وقعد معانا مشيت اجيب ليهو موية
عمار: قيلتي كيف يا عمتي
امي: والله الحمدلله . جيت انا
عمار: الليلة بتي قيلت كيف . ابتسمت بحب لانو عادي بهتم بي قدام امي
همس: الحمدلله ومبسوطة الليلة ما قيلت براي . هز لي رأسو بأبتسامة
عمار: بكرة ناس الشغل عامل عشا ولازم نحضرو
همس: ونحنا معاك؟
عمار: اكيد طبعا
امي: انا البوديني معاكم شنو انتو امشو
عمار: انتي اهم فرد من اسرتنا دي . حبيت كلامو دا وكبر في نظري
امي: لكن يا ولدي
عمار: لو انتي ما ماشة نحنا ما حنمشي موش يا بطة؟
همس: ايي
امي: خلاص تمام
عمار: بستأذن منكم داير ارتاح شوية
امي: اذنك معاك . وقام دخل غير ونام
اليوم التاني بالليل اتجهزنا ومشينا العشا وكان مجهز على اكمل وجه استمتعنا وغيرنا جو ورجعنا واليوم البعدو لمن عمار طالع الشغل كنا في غرفتنا
عمار: بما انو امك معاكي كدا انا مطمئن فيكم تطلعو للجيران
همس: احلف
عمار: والله . نطيت ليك فيهو لمن خربت ليهو القميص
عمار: خربتي ام القميص
همس: فداي عارفة . قام ضحك وصلحو وطلع وبالفعل بعد الفطور طلعت لجاراتي قسمة واسراء وانبسطو بزيارتي ليهم وعرفتهم على امي وشربنا مع قسمة القهوة ورجعنا البيت .......
لروح أحبها:
أنت أحن شخص لمسني من الداخل وانا الأكثر حظآ بك و بوجودك ، أدامك الله لي ولا فرق فيما بيننا أبدآ ف انا احببت حياتي لأجلك.♥️
30 والاخير
قضيت ايام حلوة وانا معاي امي كنا بنطلع للجيران يداب حسيت نفسي ما مقيدة واني ما محبوسة في البيت لمن الاسبوع انتهى امي قررت ترجع بس اصريت عليها وكلمت عمار هو برضو اصر عليها علشاني وبالفعل قعدت معانا وجرا لحدي شهر
امي: حأرجع بعد دا
همس: وتخليني براي؟
امي: قعدت كتير خليني ارجع
همس: خلاص انا برجع معاكي
امي: لالا وتخلي راجلك براهو؟
همس: يتصرف بس هنا بكون قاعده براي ذي المجنونة الجيران ما بخليني امشي ليهم
امي: من خوفو عليكي وانتي عارفة من زمان حتى قعدة البنات بخليكي تمشيها وبعد تعب كمان
همس: بس انا بعرف احمي روحي لاني ما صغيرة
امي: في بت بتكبر في عيون ابوها؟ . هزيت رأسي بمعنى لالا
امي: انتي لايقة زول يخاف عليكي؟ شوفو السجمانة دي . قومت ضحكت ورقدت فيها
بالليل في غرفتنا
_ عمار بكرة امي راجعة
__ عارف
_ دايرة ارجع معاها
__ اصلا حنمشي معاها ونرجع المسا
_ لالا دايرة اقعد هناك . عاين لي بإستفهام
__ كيف يعني؟
_ الما مفهوم من كلامي دا شنو
__ همس انا داير انوم تمام؟ . ورقد جيت ركبت ليهو في السرير
_ ما حتنوم لو ما اتفاهمنا . فجأة بدون مقدمات لزاني في السرير لمن اتخلعت ووكان بفوق لي
__ ما ناقص جنون وهرمونات تمام؟ . خوفت وهزيت ليهو رأسي بتمام زح ورجع رقد وانا جيت زحفت جنبو
_ عمورة؟
__ همممم
_ انت مالك صعب كدا؟
__ همس ... . قاطعت كلامو
_ بطة لو سمحت . قام ضحك
__ بطة لا اله الا الله؟ . قومت ضحكت
_ محمد رسول الله
__ نومي الله يرضى عليكي
_ تديني شنو؟
__ روحي دي بديكي ليها بتكفي؟
_ وزيادة كمان . وبعدها نومنا والصباح كان الجمعة سافرنا مع امي ورجعناها بيتها بعد شهر وقيلنا معاهم وفردوس كانت جات لانو قربت على الولادة
همس: اها ولادتك متين
فردوس: لحدي الاسبوع الجاي
همس: ربنا يحلك بالسلامة كدا
فردوس: امين يارب
همس: اها البنوتة حتسموها منو
فردوس: والله سفيان قال لي خاتي اسم في رأسو بس حاعرف معاكم يوم الولادة . قومت ضحكت
همس: ما عندك حق في الاختيار ولا شنو
فردوس: اتخيلي بس
همس: ما مشكلة تسمي البعدو
فردوس: البعدو؟ حاسة روحي ما حأنتظر للجاي
همس: ليه بتقولي كدا؟
فردوس: ما عارفة والله بس انتو براكم شوفتو تعبي بداية الحمل انا ما باقي لي حاجة من الموت وتعبت سفيان معاي
همس: والله اول ما تشوفو البنوتة حتنسو كل المريتو بيهو وتجيبو طفل تاني متأكدة والله
فردوس: والله متحمسة انو اشوف التعبتني دي
همس: قربتي حتشوفيها ان شاءلله . وقضيت معاهم اليوم ورجعنا المغرب كدا والمرة دي انا وعمار بس وكنت ساكتة
__ بطة
_ همممم
__ مالك
_ ماف حاجة
__ ما حابة ترجعي معاي؟
_ لو قولت ايي البحصل شنو
__ برجعك بس والله لانو ما بخليكي معاي بالجبر
_ بتقدر تقعد بلاي؟ . قام ضحك
__ لالا
_ وانا ما بقدر اكون انانية . قام ضحك
__ ايي ما تكوني انانية . وبقيت اتونس معاهو عشان ما يحس انو ما مبسوطة كدا انا طبعا مبسوطة معاهو بس شوية زعلانة لانو امي رجعت بيتها
عدا اسبوع وفردوس قالت الا دايراني جنبها للولادة واديتها كلمة و عمار رفض في الاول بس سفيان اتدخل وحسم الموضوع انو لازم امشي
__ هسي ماشة مخلياني كدا قلبك بسمح ليك؟
_ ما بسمح بس جنة محتاجاني
__ وانا محتاجك برضو
_ خلاص ورح مع بعض
__ والشغل
_ شيل اجازة
__ صعبة انا مدير قسم كامل يعني مشرف على قسم كامل ما بقدر اخليهم
_ انت ما بتقدر تخلي شغلك عشاني فأنا ما حأخلي جنة عشانك .
__ قولي والله . عاينت ليهو بإفتراء واديتو ضهري
وصلني وكان يوم السبت عشان اجازتو وهو رجع اخر اليوم فرق معاي شديد بس كلها كم يوم وبرجع بس اتفاجأ بعمار تاني يوم بشنطتو
_ الجابك شنو
__ جيت عشان سفيان ما عشانك انتي . وعاين لي بإفتراء واداني ضهرو قومت ضحكت كأنو بكفي حقو مشيت وراهو دخل غرفتو في بيتهم
_ عمورة
__ ما اسمي يا زولة
_ والله مشتاقين ياااخ
__ تشتاق ليكي العافيه . قومت ضحكت شكلو حلو وهو عامل فيها زعلان
_ واحد رز باللبن كيف وكيف بترضى . ورفعت ليهو حواجبي قام ضحك
__ ومعاهو جوز هند؟
_ ايي عشان ما يكون صلح ناقص . قام ضحك
__ اتفقنا . رسلت ليهو بوسة في الهوا وكنت طالعة
__ وما تنسي تنقلي ملابسك بجاي
_ عيوني ليك . وطلعت
سبحان الله في نفس اليوم اخر الليل فردوس تعبت لينا وجرينا بيها المستشفى
عمار: انتو خليكم تعالو الصباح
ام فردوس: انا ماشة مع بتي
عمار: تمام عمتو ابوي انتو خليكم وبوريكم بالبحصل .
عمو محمد: تمام . شيلنا ليها حاجاتها وشنطة البيبي وطلعنا للمستشفى وهي بتتألم شديد بس قالو لسع ولازم يمشوها
فردوس: لالا ما بقدر
سفيان: شوية بس . مسكوها امها بجهة وسفيان بجهة وانا وعمار وراهم وبقو يمشوها في المستشفى وهي بتتألم والدنيا 2 صباحا والدكتورة كل شويه تفحصها تقول لسع وانا بشوف فيها كدا بمسك في عمار قوي لانو حالتها كانت صعبة وسفيان خايف وانا بطني قلب وخلاص تنشنت و لمن فردوس فكت الصرخة انا حيلي مات معاها ووقعت في عمار كمان جرا بي الاسعاف وعملو لي فحص كنت شبه صاحية بس جسمي تقيل لمن خلاص وعيت عمار كان في رأسيّ
__ انتي كويسة؟
_ لالا نهائي ما كويسة
__ حاسة بشنو
_ انا ما دايرة احمل ولا داير اولد تمام؟ . قام ضحك
__ ليه؟
_ ما شايف جنة دي تعبانة كيف انا ما بقدر والله عمار لو ما حملت ما حتتزوج فيني صح؟
__ بس انا داير اولاد
_ يعني حتتزوج فيني؟
__ بس انتي تكوني امهم
_ بس انا ما دايرة احمل
__ والفي بطنك دا نوديهو وين
_ الفي بطني شنو؟
__ والله قالو حامل . قومت فرحت شديد
_ احلف انا حامل؟ . قام ضحك على الرياكشن حقي
__ هسي قولتي ما دايرة تحملي . ختيت يدي في بطني
_ ما مشكلة دا بس وخلاص . قام ضحك على تغيري المفاجئ وقرب مني عاين ماف زول في الاسعاف سلم علي في رأسي
__ ربنا يحلك بالسلامة
_ ان شاءلله يا رب
__ كدا بمشي بشوف فردوس لو طلعت من العمليات انتي ارتاحي شوية وبجي بسوقك
_ تمام . ومشى كنت ما مصدقة اني حامل ومن عمار كمان ........
____________
من جانب فردوس
كنت خلاص قربت للولادة بقيت اجهز عشان امشي بيتنا لاني بقيت تقيلة ومحتاجة لامي
_ سفيان
__ نعم
_ ما اخترنا اسم للبابوية
__ انا اخترت اسم اصلا
_ موش المفروض نتفق عليهو مع بعض؟
__ المفروض بس اخترتو خلاص
_ انا التعبت فيها ما احترمتني نهائي والله . جا قرب مني
__ جنة
_ ماف داعي تقول حاجه يا سفيان
__ بعتذر منك المفروض احترم رأيك بس ما ختيت انك ممكن تعترضي
_ ما معترضة بس ما قدرتني ولا استشرتني في الاسم حتى
__ هسي البحصل شنو لانو اخترت الاسم وما مستعد اتنازل عنو
_ للدرجة دي؟
__ ايي
_ اها اخترت الاسم
__ خليها بعد تولدي بالسلامة حتعرفي
_ لا اسمع مع الناس اسم بتي يعني
__ جنة ما تصعبيها علي
_ ما بصعبها بس انت ما مقدرني نهائي يا سفيان
__ حتعرفي اذا بقدرك ولالا
_ كويس يا سفيان . سكتا خليتو وكملت تستيف وجهزت حاجاتي كلها جاني راجع تاني ومسك يدي
__ ما عارف والله بس ما هاين علي انو تمشي وانتي زعلانة كدا
_ اممممم
__ مدام الموضوع مزعلك كدا اختاري الاسم انتي خلاص
_ انت اخترت وانتهى
__ بس انتي زعلانة ودا ما برضيني نهائي والله
_ خلاص ما زعلانة
__ لا زعلانة
_ والله ما زعلانة خلاص
__ اطلبي اي حاجة
_ امممم حاليا ما مفكرة في حاجه بس حأخد منك كرت مفتوح
__ جدا والله
_ اتفقنا خلاص . وبعد رضيت ووصلني بيتنا وقعدت مع امي وكنت محتاجة همس جنبي بس عمار رفض طوالي كلمت سفيان وهو حسم الموضوع وهمس جاتني
لمن تميت ايامي خلاص وجا زمن الولادة تعبت اخر الليل جرو بي المستشفى بس الدكتورة قال لي لسع على الولادة ولازم اتمشى كنت ببكي من الالم
_ سفيان ما قادرة والله
__ لازم يا جنة عشان البيبي يجي سريع
_ انت ما حاسي بالالم الانا حاسة بيهو حاليا
__ يمكن ما بقدر احس بألمك بس عارف قدر شنو انتي متألمة بس قربنا خلاص اتحملي
_ سفيان انا حأموت
__ لسع قدامنا عمر كامل يلا خلينا نمشي خطوتين بس عشاني طيب . عاينت ليهو وعيوني مدمعة هز لي رأسي بمعنى يلا مسكت يدو شديد وبقينا نتمشى وامي جات بشمالي وبقيت اضغط وانا بتمشى ومعرقة من الالم وكل مرة بضغط علي ايد سفيان لمن احس بالالم شديد وكل دقيقتين اقيف عشان اخد نفس لمن اخر مرة حسيت انو نزلت مني موية عرفت موية رأس الجنين وقفت فجأة وفتحت عيوني بخلعة
__ مالك . فجأة فكيت ليهم الصرخة وطوالي همس وقعت من الخلعة وعمار رفعها وجرا بيها الاسعاف
_ سفيان موية الرأس نزل . هو عاين تحت لقى كلامي صح من الخلعة ما عارفة ليه وقفت من البكي
__ خلينا نرجع . يداب حسيت بالالم وقفت في مكاني بس جابو لي كرسي وجرو بي العمليات وولدت طبيعي طبعا ماف داعي احكي الالم الحسيت بيهو بس لمن ولدت بسلام حسيت يداب اني قادرة اتنفس ركبو لي درب بكيلونة وبعدها طلعوني غرفتي الخاصة امي دي تبكي بس وحتى سفيان بكى ودا اول مرة اشوفو ببكي طوالي بكيت انا ذاتي وحمدو لي السلامة ولدت مع اذان الصبح
فردوس: امي وين همس صحت؟
امي: ايي بس راقدة في الاسعاف
فردوس: ان شاءلله هي كويسة
امي: ايي كويسة طلعت حامل . فرحة شديد ليها
فردوس: والله ما شاءلله . جا عمار داخل وسلم علي وحمد لي السلامة وباركت ليهو
عمار: شوية كدا بجيبها برقدها معاكي هنا . ضحكت
فردوس: كويس . وطلع جا سفيان داخل وهو شايل البنوتة
سفيان: سمي
فردوس: بسم الله . ختاها لي في حضني بقيت ابكي بس يعني دي بتي حاجة كدا حتة بس نسيت ألمي كلو بمجرّد ما شوفتها بقيت اشم فيها جا يشيلها مني
فردوس: داير توديها وين
سفيان: داير اديها لعمتو جيهان عشان انتي ترتاحي
فردوس: كدا مرتاحة خليها
سفيان: لالا نومي شوية انتي طول الليلة متألمة . سمعت كلامو وفكيتها وعمار جاب همس وحمدت لي السلامة وباركت ليها الحمل ورقدت في السرير التاني والاتنين نومنا من التعب صحيت بجوطة ديل ناس البيت جو الصباح وباركو لي والجو حلو والغرفة مليانة ناس وفرحو لهمس بموضوع حملها
والمفروض كان يخرجوني بس سفيان رفض قال ارقد يوم كامل للضمان ويخرجوني اليوم التاني يلا بالليل كل ناس البيت رجعو امي كانت معاي وسفيان لمن سفيان رجع الغرفة فجأة امي طلعت كأنو دايرة تدينا مساحة قرب مني وقعد جنب رأسي
_ سفيان
__ نعم
_ اها ما حتوريني سميت البنوتة منو
__ جنة
_ نعم . قام ضحك استغربت لاني ما قولت حاجه بتضحك
_ مالك بتضحك
__ انا قاصد انو البنوتة سميتها جنة . انصدمت
_ كيف يعني بس انا اسمي جنة
__ وهي برضو جنة
_ بتهظر صح؟
__ والله جادي حأسميها جنة
_ وانا؟
__ والله من محبتي ليكي حأسميها جنة . دموعي نزلت من الفرحة من كلامو دا
_ سفيان انا بحبك والله
__ انتي عارفه رغم لائمتك وعنادتك وقوة رأسك دا بس حبيتك والله صح زمان بعاملك كعب وبعصب فيكي كتير بس من ريدتي ليكي والله
_ سبحان الله بمعاملة وحدة حلوة منك نسيت تعذيبك لي كلو واتعلقت بيك وهسي جيبت ليك بنوتة تربطك بي طول حياتنا
__ عشان كدا حابي اسميها جنة عليكي
_ كدا حيكون عندك جنتين
__ احلى جنتين وانا ما داير اكتر من كدا . ياااخ احساس يكون عندك زوج حنون دا احلى حاجه في الدنيا يمكن سفيان نادرا ما يعبر عن حبو لي بس افعالو بتثبت وانا ما دايرة اكتر من كدا وكونو داير يسمي بتنا جنة ما كنت مصدقة نهائي
__ خليني اطلع عشان امك تدخل . هزيت ليهو رأسي بمعنى تمام سلم علي في رأسي وطلع وامي جات داخلة
فردوس: امي اصدمك بأسم بتي ولا تسمعي بكرة مع الناس
امي: اصدميني عليك الله . طبعا حتى امي سألتني زمان قولت ليها سفيان اختار الاسم مسبقا بس ما كلمني
فردوس: اسمها جنة
امي: وانتي جنة . قومت ضحكت
فردوس: دا المحتارة فيهو وسفيان مصر على الاسم
امي: والله من ريدتو ليكي بس اكيد . ابتسمت بخجل نفس كلام سفيان كنت مبسوطة شديد وفي نفس الزمن بضحك يعني انا وبتي نفس الاسم صح انا اسمي الحقيقي فردوس بس كل البيت بناديني جنة وهسي بتي جنة دي بتبقى كيف بس دا قرار سفيان ما بقدر اعترض
اليوم التاني من الصباح خرجوني ورجعت بيتنا الكبير واستقبلوني بفرحة شديدة انا وبتي وكانو مجهزين لي الغرفة ووسام جات شالت البنوتة
وسام: اها سميتوها منو كلنا متلهفين نعرف اسمها . عاينت لامي وضحكنا الاتنين كلهم عاينو لينا بإستغراب
عمتو سلوى: مالكم
فردوس: بتي اسمها جنة . كلهم انصدمو قومت ضحكت
همس: بتهظري صح؟
فردوس: والله سفيان سماها جنة
صفا: وانتي موش جنة؟
فردوس: قال نبقى ليهو جنتين . قامو ضحكو وقايليني بهظر
فردوس: هوي عشان ما تقولو بهظر والله العظيم بتي اسمها جنة
صفا: وااااو طبعا ودي حتبقى كيف دي
فردوس: اسألو ابوها هو الاختار
عمتو مها: محظوظة بيهو انتي والله يا جنة كونو يسمو بتو عليكي دليل على ريدتو ليكي . كل الناس بتقول كدا كنت طايرة من الفرحة بسبب الحاجة دي وحبيت سفيان فوق ما انا بحبو
همس: يا بنت المحظوظه
امي: المحظوظه دي انا موش . قومنا ضحكنا كلنا
سفيان كان فرحان ببتو شديد ومجرد ما يجي يشوفنا بكون شايلها بس لمن خلاص يكون راجع حتى بديني ليها وكنت وسط اهلي لقيت منهم كل الاهتمام لمن عملت سماية بتي وتميت الاربعين حتى رجعت بيتي ولسع سفيان متعلق ببتو لمن مرات بغير منها
_ سفيان ما ممكن لكن
__ مالك
_ من قبيل بتلعب معاها
__ والمشكلة وين
_ حتى ما سألتني من حالي انا كويسة ولالا؟
__ ياهو شايف انك كويسة . زعلت منو
_ شكرا يا سفيان . وقومت ماشة على الغرفة
__ جنة . وقفت وعاينت ليهو
_ داير حاجة؟
__ كنت بتكلم مع بتي . هنا عصبت زيادة صرخت فيهو
_ سفيااان . جنة الصغيرة اتخلعت وقامت تبكي وهو عصب
__ مالك جنيتي انتي؟
_ ايي جنيت وقوم اطلع لي من البيت دا انت وبتك ما دايرة اشوفكم الاتنين . قولتها بصوت عالي
__ صوتك ماما . طوالي بكيت قاعدة على هبشة بس
_ بتقول سميت بتك علي من ريدتك بس وين الريدة ما شايفاها من جيت ما شغال بي اذا من اول يوم كدا بكرة حيحصل شنو
__ لا اصدميني انو غيرانة من بتك؟
_ ما مشكلة غيرة بس فاقدة اهتمامك انا . قام جاني وختا جنة في رجلي
__ ياها خليتها . ثانيتين ما تمت رجع شالها تاني ما عرفت اضحك ولا ابكي
__ والله ما قادر متعود عليها يااخ
_ كونو تحب بتك للدرجة دي ما عندي فيها مشكله بس اعدل بينا نحنا جنتين على فكره . قام ضحك وجرا لي رأسي في كتفو بقيت خاتة رأسي في كتفو وهو بهز في جنة
__ والله انتي الاساس وانتي جنتي . حضنت ايدو مسافة بعدها بقينا نلعب مع جنة نحنا الاتنين
كبرنا وكبرت مشاكلنا بسبب جنة يعني سفيان رجع من اول وجديد يربيني مع بتي جنة لمدة اربعة سنين حتى جيبت ليهو ولد تاني وسميناهو مصطفى على جدو ابو ابوهو وطبعا خلاص بقى حبيب جدو .............
"لكنني ورغم كل هذا التعثر فينا نحن الإثنان، أحب هذه الألفة التي بيننا"❤❤
____________
من جانب همس
ولادة فردوس مرت على خير وكانت المفاجأة انو البنوتة ابوها سماها جنة كانت صدمة لينا وفي نفس الوقت نكتة الام والبت جنة وبقو لسفيان جنتين وانا بعد ولادة فردوس والسماية حتى رجعت بيتي بس عمار رجع قبلي عشان شغلو وبعد اسبوعين جا رجعني وامي ابت تمشي معاي قالت حتجيني في الشهور الاخيرة وطبعا وريت عمار الويل بالحمل دا
_ انت عارف نفسي يجي ولد عشان ما يشاركني فيك . قام ضحك
__ حتى لو جيبتي بت حتكوني انتي بتي الاولى والكبيرة
_ دا كلام ساي بس حتهملني انا عارفه
__ والله ما بتحصل نهائي
_ نهائي نهائي؟
__ نهائي نهائي يا ام جضوم
_ بجضومي دي مكسراك . قام ضحك شديد ومسكني منهم
__ صح كلامك
تميت ايامي بتاعت الحمل وامي جات اخر شهرين قعدت معاي شهر ونص وساقتني معاها وخلينا عمار هناك للشغل
_ حتجي بتين عشان ممكن اولد في اي لحظة
__ عندي اجتماع مهم الاحد احضرو وبعدها بشوف
_ دايما شغلك اهم مني
__ ليه دايما بتقولي انتي عارفة والمفروض تقدري ظرفي
_ خلاص يا عمار احضر اجتماعك وما تجي ذاتو
__ زمان كنتي بتفهميني بس ما عارف الحاصل عليكي شنو . سكتا مسافة
__ بطة
_ فاهماك بس انا محتاجاك جنبي
__ عارف والله وانا داير اكون جنبك بس مرات الظروف بتجي عكسنا . عمار عمرو ما قصر اتجاهي وهو عودني على الاهتمام الزايد عشان كدا بتدلع فيهو
_ بس حتحضر ولادتي صح؟
__ معقولة؟
_ اها كيفك انت وقاعد تتصرف كيف بدوني
__ شايفة قولتي بدوني والله تعبان شديد امس عملت بيض للغدا وحرقتو . قومت ضحكت
_ لازم تتعود لاني ما حأرجع قريب بعد الولادة عندي الاربعين
__ بتبالغي والله تعالي قضيهو في بيتك
_ ما بقدر والله بس بتمر
__ ما مشكلة بس المهم تكوني انتي كويسه
لمن خلاص ايامي دخلت وممكن اولد في اي لحظة و لمن احس ان شاءلله بألم خفيف بقول ليهم اتصلو لعمار وهم يضحكو فيني ما دايرة اولد وهو بعيد مني لمن في يوم قومت الصباح والبنات بعاينو لي ساي وهو بضحكو ما عرفت مالم ناديت امي ساعدتني استحميت وطلعت برا عشان امشي اشرب اللبن في مظلة المطبخ بس اتفاجأت انو عمار قاعد بشرب شاي مع عمتو سلوى
همس: عمااار!!!! . قام ضحك
عمار: الجرسة
همس: جيت متين
عمار: تعالي اقعدي بالاول . مشيت قعدت
همس: جيت الصباح؟
عمار: من امس بايت هنا . فرحت شديد وعمتو قامت تجيب لي اللبن
همس: جيت عشاني؟ . قام ضحك
عمار: لا حأكون جيت عشان منو يعني . قومت ضحكت
همس: الحمدلله
عمار: بقيتي نكدية لو اتأخرت شوية احتمال تطلقيني . قومت ضحكت شديد
همس: بعملا اانا
عمار: لاني عارف انك حتعمليها جيت سريع
بعد يومين حتى ولدت وعمار كان معاي خطوة بخطوة لانو عارفيني جرسة لو عمار اختفى دقيقتين بقول ليهم وين ابوي طوالي بفتشوهو لي عمار ما اتحسس ابدا بالعكس كان مجرد ما يرجع بمسك يدي وبضغط عليهو وهم متعودين انو عمار بهتم بي قدامهم فماف زول كان بسألني ليه بتعملي كدا وماف زول بتدخل بيني وبين عمار واخواني جو باركو لي الولادة وفرحت بجيتهم
عديت ايامي في بيتنا البيت وجيبت ولد سميناهو محمد ومجرد ما سميناهو محمد عمي محمد بدل السماية عملها اكبر سماية من فرحتو وعمتو حنان قالت الا انزل في غرفة عمار لانها فاضية واصلا عمار رجع طوالي بعد يومين ما زعلت لانو شغلو وما دايرة اضغط عليهو بس جا حضر سماية ولدو وقعدين يومين تاني ورجع وكان بجينا الخميس بالليل بقعد الجمعة وبرجع السبت اخر اليوم لمن خلصت ايامي ورجعت معاهو بس سوقت امي معاي ما بقدر بالاخص محمد غلباوي وبكاي شكلو طالع لامو
امي قعدت فترة معاي ورجعت بقيت انا وولدي بس برانا لانو عمار مشغول بس بقيل مع ولدي وهو بملا لي يومي حمودي لمن تم سبعة اشهر تعبت وعمار وداني المستشفى ظهر لي حمل تاني يلا دي الجرسة ذاتها بقيت ابكي
_ عمار كلو بسبب انت المنعتني استعمل حبوب التنظيم
__ خوفت انو يعمل ليكي حاجه
_ حمودي صغير يااخ سنة ما تماها . وبقيت ابكي وهو ما عارف يعمل لي شنو
__ بطة ربنا اراد كدا ما بنقدر نعمل حاجه
_ عشان انت ما بتتعب لا في الحمل ولا في الولادة ولا في التربية طلقني هسي دا . سكت خلاني عشان اهدأ ورجعنا البيت وانا ما بتكلم معاهو نهائي
__ بطة خلاص ياااخ دا يداب التاني التالت حتعملي شنو . حمرت ليهو قوي
_ انا ولد تاني منك ما دايرة وبكرة ترجعني لامي وطلقني
__ قولي والله . سكتا جاني قريب ومسك يدي
__ بطة . طوالي حضنتو وبكيت
_ عمار حمودي صغير يااخ
__ بكرة حيكبر مع اخوهو سوا وعارف انك بتقدري تعمليها
_ حتكون جنبي؟
__ انا ياتو يوم ما كنت جنبك؟
_ كنت دايما جنبي
__و هسي جايبة لي الطفل التاني في احلى من كدا؟
_ لالا بس ان شاءلله تكون بت لانو لو طلع ولد وذي حمودي دا انا بموت والله . قام ضحك
__ يلا انتي جايبة نسخة منك بس والله
_ عمار انا كنت كدا؟
__ والله غلباوية وبكاية ذي ولدك دا بس
_ اكيد تعبتك معاي
__ اكيد تربيتك كانت صعبة . قومت ضحكت
_ وهسي برضو حتربيني انا واولادي . وضحكنا
وكلمنا ناس البيت بالخبر وفرحو لي بس كنت خجلانة شوية لانو حملت قريب شديد بس ما حسسوني وعمار اصر على امي تجي تقعد معاي في بداية الحمل دا ووافقت فرحت شديد وجاتني وراعتني انا وولدي وعمار ما مقصر وخلاص اتعودت على حياتي البعيدة من اهلي دا وتميت ايامي ومشيت ولدت مع ناس امي هناك وطبعا جيبت ولد برضو وهنا الجرسة على اصولها وحمودي كان تم سنة ونص بس ومتعلق بي شديد بس اضطريت افطمو بدري بس دايما متلصق فيني الا امي بتشيل البيبي الجديد وانا انوم حمودي حتى ارضع مازن
_ عمار البهدلة الفيها انا دي بسببك بس . وهو بضحك بس
__ اتأدبتي بدري
_ ما عافيتو ليك نهائي ياااخ انا لسع صغيرة . وهو يضحك
__ المشكله ربنا بريدني عشان كدا قاعد يآخد لي حقي منك على هيئة نسخ صغيرة منك . طبعا قاصد انو مازن طبعو ذي حمودي وانا دي ابكي وشفعي يبكو وعمار يقعد يحنس فينا التلاتةة لمن كبرت مع اولادي بعد المرة دي نظمت بس بعد تحنيس شديد لعمار لانو اولادي صغار.....
"إنّ مَوطني الحَقيقي هو ذاكَ القلبُ الّذي يَعرفني أكثر من أيّ شخص، و يَقبلني رُغم كُل شيء، و يَحميني كما يجب، و يَعودُ إليّ و أعود إليه مَهما حدث♥️."
____________
من جانب وسام
بعد ولادة فردوس بشهر احمد كلمني انو نازل السودان عشان نعمل العرس وافقت وهو كلم ابوي وانا كلمت باقي الاسرة وفرحو لي شديد وبديت حبستي وكنت عاوزة اشوفو بس ماف طريقة وتميت ايام حبستي وفردوس كانت والدة وهمس حامل في شهورها الاوائل بس وقفو معاي ما قصرو وتميت عرسي وشوفت احمد في الطبيعة كنت خجلانة خجل ما طبيعي لانو ما اتعاملت معاهو في الواقع نهائي وتما لي اجراءاتي وسافرت معاهو وبديت حياتي معاهو وبنينا مستقبلنا مع بعض وهمس ولدت بس ما قدرت انزل احضر الولادة لانو احمد ما عندو اجازة قريبة بس لمن حملت انا وقربت على الولادة احمد قدم لامي وجات نفستني ما قصرت معاي وقعدت معاي تلاتة شهور بعد الولادة لمن اتمكنت من نفسي حتى رجعت السودان واحمد كان دايما جنبي عشان ما احس بالغربة ما قصر ابدا معاي وكنا في كل اجازاتو بنرجع السودان نقضي الاجازة ونجي راجعين انا واولادي.........
الله عطاني إيّاه حبيب ورفيق وأهل ❤
____________
من جانب صفا
بعد عقدي من عزيز كنت خايفة من كيفية التعامل معاهو صح ولد عمي بس عزيز صعب وبالاخص بعد وفاة مرتو الاولى بقى اصعب وحاليا انا مرتو بس كأني ما مرتو حتى ما جا بارك لي لقيتو بعد تلاتة يوم من العقد اتلاقينا بالصدفة جنب الباب النص انا داخلة بيتهم وهو جاي البيت الكبير وقف عاين لي مسافة حتى ما قال لي كيفك وطوالي مشى زعلت شديد ودخلت لعمتو حنان لانها هي الرسلت لي
__ صفوية
_ ايي عمتو
__ هسي انتي مرت عزيز ولدي بس اكيد عارفة طبعو
_ عمار اتكلم معاي
__ يعني فاهمة الوضع؟
_ فاهمة الوضع والله
__ عليك الله مهما حصل ما تطلبي الطلاق اتحملي شوية حيتغير والله
_ بس عزيز ما دايرني في حياتو وانجبر علي . طبطبت على ايدي
__ ابوهو عمل كدا لمصلحتو وانتي بس حتغيريهو
_ ان شاءلله يا عمتو . وبقينا نتونس مع بعض وهي بتريدني ذي ريدتها لهمس بس همس عندها محبة خاصة في قلوب الكل
عدا فترة ما شوفتو لمن مرة طالعة السوق اتقابلت معاهو في باب الشارع
__ ماشة وين؟ . التفت وراي ماف زول
_ بتتكلم معاي انا؟ . استغربت طبعا لانو ما بتكلم معاي نهائي
__ ماشة وين؟
_ ماشة السوق
__ اركبي . ركبت معاهو وكنا ساكتين
_ عزيز
__نعم
_ انت شوفت مني حاجه كعبة؟
__ لالا
_ في النهاية انا كنت اختك وبت عمك استحق المعاملة دي منك من حاجه انا ما عملتها؟ . طوالي جرا فرمل تقيلة لمن قربت اضرب رأسي قدام
__ انا كنت رافض فكرة الزواج من اساسها بالمرة . قومت ابكي
_ وانا فجأة بين يوم وليلة لقيت نفسي مرتك يعني ما ذنبي عشان تكرهني كدا
__ انا ما بكرهك
_ لا بتكرهني يا عزيز لانو حتى مستخسر فيني السلام كأنو انا القولت ليهم زوجوني لعزيز عارفة انك لسع ما اتجاوزت ريم الله يرحمها برضو ما قولت حاجة لو شايف اني حمل تقيل طلقني وانا قابلانة والله وبكلمهم انو ما اتفاهمنا ولا عمرنا حنتفاهم
__ الكلام ساهل
_ بس العصمة في ايدك انت . سكت ورجع ساق مسحت دموعي وصلني السوق
__ بتتأخري؟
_دايرة اشتري هدية لبيبي فردوس الجاية دي تعال معاي . عاين لي مسافة ونزل ودخلنا السوق مع بعض واخترنا الهدية يداب حتى اتعامل معاي كويس
__ نأكل في حتة رأيك شنو؟
_ تمام . ومشينا حتة ظريفة وطلبنا
__ عزيز انسى حتة انو انا مرتك وانا ما حأرجى منك حاجه خلينا نتعامل كأصحاب وخليها تجي ذي ما تجي . كأنو مستني الكلام دا من زمان وكسرنا حاجز التعامل بقيت اتعامل معاهو على راحتي وبقينا نتونس عادي وهو كان عندو مشوار مشيت معاهو ورجعنا وانا مبسوطة
وولادة فردوس ما حضرتها لانها ولدت اخر الليل نحنا قررنا نمشي الصباح بس
عمتو حنان: عزيز دا نايم انتظري يا صفا وتعالو سوا وجيبو معاكم الفطور
صفا: تمام . وكلهم مشو جهزت الفطور وانتظرت عزيز سمعت صوتو دقيت ليهو باب النص
__ ناس البيت وين
_ انت اذا بتنوم كدا حتعرف من وين
__ الحاصل شنو
_ فردوس ولدت
__ متين الكلام دا
_ البيت كلو صحا على صوتها امس الا انت وولدت مع اذان الصبح
__ وانتي قاعده؟
_ منتظرة حضرت جنابك تصحى عشان نمش مع بعض
__ تمام انتظريني استحمى ونطلع؟
_ شربت الشاي؟
__ لالا
_ خلاص مسافة تلبس بعملها ليك . هز لي رأسو ومشى يلبس وانا عملت ليهو الشاي ومسافة يشربها انا كبيت الفطور في المواعين وقفلت البيت وطلعنا للمستشفى
__ جات بت صح
_ ايي تتربى في عزهم ان شاءلله
__ ان شاءلله يارب البت نعمة والله
_ بتحب البنات؟
__ شديد كنت بقول للمرحومة ان شاءلله اول طفل لينا تكون بت . حسيت بحاجة انكسرت جواي ما ظنيت في يوم يتقبلني كزوجة ليهو وهو لمن انتبه لكلامو عاين لي ابتسمت ليهو بكسرة حسيت شوية ودمعتي تنزل والاتنين سكتنا لمن وصلنا جاني بعد فترة
عزيز: صفا نازل على السوق داير اجيب حاجات تمشي معاي؟ . فرحت هزيت ليهو رأسي بمعنى ايي وطلعنا واتونسنا شوية شكلو داير يصحح غلطو القبيل وكونو هو البادر المرة دي كنت مبسوطة شديد
في نهاية المطاف انا البادرت وكسرت حواجز كتيرة مع عزيز صح كانت صعبة بس ماف حاجه مستحيلة عودتو على وجودي في حياتو على تدخلي في اي تفصيلة بتخص حياتو نظام انا صديقة بس في النهاية هو اتقبل وجودي في حياتو واتقبلني كزوجة وتمينا عرسنا والبيت كلو كان مبسوط لينا
وجيبت منو طفليين ولد وبت عمار وعسجد لانو عزيز كان داير يسمي على اخوهو عمار وانا ما اعترضت نهائي وحياتنا بقت حلوة شديد.....
"في وصُف لطيف عَن الألُفة:
حِين كُنت بصحبته لم أكن القي بالاً أبدًا لما أقول، كان الحَديث معه سلسًا مَن دون جُهد كما التنفس."💛
بعد مرور سبعة سنوات
الاسرة كانت مجتمعة في البيت الكبير والشفع بلعبو مع بعض جات جنة بت سفيان الكبيرة " عمرها سبعة سنوات " وقفت قدام ابوها
جنة: بابا
سفيان: نعم
جنة: موش انا اسمي جنة؟
سفيان: ايي
جنة: خلاص ليه خالتو بطة وخالتو صفا بقولو لماما جنة؟ . البيت كلو ضحك
فردوس: جاوب يا ابو جنة
سفيان: لانو ماما برضو اسمها جنة
جنة: يعني ما اسمها فردوس؟ . تاني ضحكو
سفيان: اسمها فردوس وبقولو ليها جنة
جنة: بس كدا كيف
سفيان: انا بحب اسم امك عشان كدا سميتك عليها . هزت رأسها وجرت تلعب مع الاولاد
عمتو جيهان: متوقع اصلا انو يجي يوم وتسأل السؤال دا
فردوس: صح كلامك وهي عندها قوة تركيز شديد . جا محمد ولد عمار الكبير " عمرو ستة سنوات"
محمد: ماما انتي ابوكي وين . قامت اشرت على عمار
همس: هدا ابوي . وعمار ابتسم ليها بحب
محمد: بس دا ابوي انا ومازن وتوتة . قامت ضحكت والبيت ضحك
همس: وكان ابوي انا قبالكم كلكم
محمد: خلاص لشنو مرات بتقولي ليهو عمار كدا ما صح . البيت كلو ضحك
عمار: تعال هنا يا فصعون
عمار: بطة دي بتي الكبيرة هووي
محمد: امس اكلت لي حلاوتي وانت ما سألتها لشنو موش قولت ما اكل حاجات مازن بدون اذنو؟ . البيت ضحك
عمار: بطة انتي اكلتي حلاوة محمد بدون اذنو؟
محمد: ايي اكلتها موش اكلتيها يا ماما؟ . همس ضحكت
همس: هسي في داعي للفضيحة دي
عمار: خلاص يا محمد بديك حلاوة بعدين في عقد وحلاوتها البجيبها ليها دايما بديك ليها انت تمام
همس: ابوي كدا ما صح .
عمار: والصح انو تأكلي حلاوة محمد؟
همس: انت ما جيبت لي معاهم
عمار: في جيب البنطلون بس انتي ما سألتيني منها
محمد: خلاص انا بشيل الفي جيب البنطلون
همس: لالا ديك حقتي انا
محمد: وانتي اكلتي حقي
همس: ابوي اتكلم مع ولدك دا
عمار:انا ما عارف اربيكي انتي ولا اربي اولادك . والبيت يضحك في درامتنا انا واولادي وطبعا وسام برا السودان كل ما نشتاق ليها بنضرب ليها فيديو كول
صفا: عمار ما تأكل التراب ياااخ
عمار: ماما ما اتلت تيتر " اكلت كتير"
صفا: عزيز عليك اتهرش ولدك دا لانو حيتعبني انا بس بالليل بوجع البطن
عزيز: عمار قوم فوق . طوالي قام بخاف من ابوهو جا جاري وقف جنب امو الشايلة عسجد
صفا: ما تهبشها حتوسخها كدا
عمار: ماما امس بلدو اتلت تراب" برضو اكلت " . وقام جرا ركب في عمو عمار والبيت كلو ضحك على حركتو دي وصفا تعيط لانو مدام قعد جنب عمار ماف زول بهبشو ولا بسألو وعاشو في احلى جو اسري.
أنا معك :
في حب العشرين، وعشق الثلاثين، أنا معك حتى ضحكة الأربعين، ومرض الخمسين، و وحدة الستين، و يأس السبعين، أنا معك إلى أن يقولوا "رحمة الله علينا"❤❤
"اللون السابع للحب هو ذاك الشعور النادر الذي تراه القلوب قبل العيون، وتحتضنه الأرواح قبل أن تلمسه الأيدي، لون لا يوجد في الطيف المرئي، لكنه يسكن بين ضوء الحلم وظل القدر." ♥️♥️
تمت بحمد الله