رواية احببت وانا علي ذمة اخر الفصل الثاني والثلاثون 32 بقلم نوسه حمد
رامي بدا يلمح لي بالكلام بس م ركزت معاهو شديد لاني كنت كرهانه حاجه اسمها ارتباط مستحيل اقدر اتجاوز قصتي بعلاقه جديده رغم اني حاولت اتجاوز تجاهلو لي وهجرانو لي وانا في عصمتو لكن لحظتها م كنت بالعقل الانا فيهو هسي دا لمن اتخزلت من طارق اول حاجه صابتني انكسرتا وضعفتا وم حسبت اي شي لكن انا هسي مستحيل اخاطر ادخل في علاقه ولا احب رامي لانو اصغر مني من لحظه لمح لي شبه فصلت نفسي منو بقيت م بتكلم معاهو كتير زي زمان وما برسل ليهو كتير وهو اتحسس من الحركه دي لمن واجهني قلت ليهو معليش انا مشغوله اخوي مرتو عيانه وبالي معاهم ومفكره انزل السودان بس اتزكرت العقد الكاتباهو مع ناس الشركه قال لي هانت كلها شهور وح تنزلي واعفي لي اذا غلطت عليك بي كلمه او ضايقتك بس صدقيني م قصدي انا اسف ي نوسه اعتزارو لي قطع قلبي بطبيعتي ما بحب زول اعتزر لي بالذات لو كان راجل او زول اكبر مني قلت ليهو لا يا رامي م تعتذر وزي ماقلت ليك انا مشغوله بس مشيت البيت وكنت مضايقه من تصرفاتي مهما كان مفترض م اكون كده ولا ردودي تكون كده حكيت للبت القاعده معاي قلت ليها رامي بدا يلمح لي وانا والله ما عندي استعداد لاي شي بالذات انا بطني طامه من الرجال بصوره م طبيعيه قالت لي انتي غلطانه اول شي رامي دا وقف معاك وقفه والله اخوك ما اظنو وقفها معاك وع فكره انا كنت حاسه انو ح يحصل كده وكنت محتاره فيك بتتعاملي معاهو عادي كانك م عندك مشاعر وكانك راجل زيو قلت ليها انا شبه بقيت م عندي مشاعر لانو التجربه المريت بيها م ساهله اولادي اهم قالت لي نوسه اكون معاك واضحه انتي بت صغيره وجميله والبشوفك بقول ما والده اصلا وبعدين لا عيب لا حرام انك تتزوجي تاني قلت ليها اتزوج انتي م جاده اجيب لي نور وفارس راجل غير ابوهم قالت لي ومالو هم محتاجين لابوه قلت ليها ابوهم قاعد قالت لي قاعد بس م قاعد معاهم ولا عارف البيهم والعليهم بتجيهم لحظات محتاجين فيها حنان الاب قلت ليها ومتين الراجل بكون حنين علي اولاد مرتو قالت لي انا بقول انتي ذكيه بس م ذكيه نوسه ممكن الراجل لمن يتزوج واحده بي اطفالها يكون بحنيه ابوهم واحتمال اكتر بس المره م بتكون بحنيه الام اذا اتزوجت راجل بي اطفالو سميها غيره سميها كيد لانو ربنا قال ان كيدهن عظيم يعني يا نوسه اطمني من الناحيه دي وادي رامي ونفسك فرصه قلت ليها م عارفه بس حاليا حاسه نفسي محتاجه لسه اكون براي م عشان الراجل والمسؤوليه بالعكس انتي عارفه انا لمن كنت متزوجه طارق كان نفسي ازهج منو او من الشغله او من الحياه الزوجيه عاما بالعكس كنت الطرف الايجابي والحصل لي كلو ما اقدر ابصم بالعشرة بس انا متاكده كان سببو غيره امو وعبله كانت صاحبتي وبتجيني زيارات اتزوجها كيف انا م عارفه بس الحمد لله وهسي انا والله ما خايفه من الزواج ومسؤوليتو اكتر مما متخوفه في خوض تجربه تانيه انا بعرف رامي بس م بعرف عنو شي لا اهلو ولا قصه حياتو وهل ح يوافقو علي علما باني اكبر منو وبي اولادي اكيد م ح يوافقو عشان كده انا والله في غني عن الحاجات دي قالت لي م تسبقي الحوادث واديهو فرصه وما بحصل الا الخير وبقت تحنس فيني قالت لي الفشل انك تدمري حياتك مهما انجزتي انتي محتاجه راجل يسندك ويقويك قلت ليها خليها ع الله انا ح استخير واشوف البحصل شنو كلامها قادرانو يخليني اتراجع من قراري بس التسرع مافي صالحي رغم اني شايفه هديه مع مهيد علاقتهم ناجحه شديد بس لسه م معروف رده فعل اهلو بس مهيد ع حسب كلامو انو اهلو متوفين وعايش مع خالو وعلي ما اظن الرجال م عندهم مشكله التناظير بتجي من النسوان الله يستر ويهون لي ولي هديه
تاني يوم مشيت الشغل رامي قال لي نازل السودان ضروري قلت ليهو فشنو قال لي مافي شي م تشغلي بالك المهم انتي ديري الشغل وسدي لي مكاني وانا م بتاخر بس دعواتك قلت ليهو رامي فشنو عاين لي بنظره حنيه وقال لي نوسه ماف حاجه يلا خلي بالك من نفسك ومن نور وفارس احتجتي اي شي انا موصي عليك اصحابي برسل ليك ارقامهم قلت ليهو لا لا م بحتاج بس ممكن توريني ماشي السودان لشنو قال لي امي عيانه قلت ليهو الف سلامه ليها ان شالله م تشوف شر قال لي امين نازل عشان اشوفها واطمن عليها لو ماتت التموت قدام عيني قلت ليهو بعد الشر ان شالله بعد تشوف اولادك قال لي نوسه كان نفسي اعرفك عليها قلت ليهو يا ريت يا رامي بس زي ما انت شايف انا وانت ما بنقدر نمشي الاتنين قال لي ان شاءالله ح تنزلي السودان وح اخليها تشوفك وح تحبك زي ما انا بحبك واكتر كمان امي طيبه ومسكينه عاشت كل حياتها عشان تربيني كانت مظلومه في حياتها عاشت حياتها كلها نكد احتمال قصه امي قريبه لقصتك قلت ليهو كيف يعني قال لي نوسه انتي مفتكره براك الفي الدنيا دي الاتخزلتي وحياتك اتبهدلت بسبب ام زوجك قال لي انا كمان امي كانت مسكينه وطيبه كانت استاذه اتزوجت ابوي وما كان عندو القدره يشتري ليها بيت انجبرت عاشت مع امو وكل الناس تشهد علي معامله حبوبتي السيئه لي امي كانت بتهينا وبتزلها مجرد انها عايشه معاها وناس زمان ديل بي اي وضع بعيشو يعني امي صبرت وصبرت وابوي كان يومو كلو بره البيت عشان يبعد من نقه حبوبتي مرتك عملت ومرتك سوت وكلو كذب ما عايزاهم يستقرو ابوي مرض فتره واتوفي خلاني انا صغير بعد اتوفي حبوبتي طردت امي قبل تتم حبسها وجات المرمطه التانيه بقت قاعده مع اخوها وزوجتو وبناتو ما رضيانات ورغم انو بيت ورثه امي كانت مجبوره انها تستحمل بس عشان انا اتم تعليمي عشت عنصريه م يعلم بيها الا ربنا بس الحمدلله امي كانت لي حضن دافي ربتني احسن تربيه لغايه ما اتخرجت واشتغلت بس راتبي كان ضعيف كان لازم اسافر السعوديه عشان اقدر اشتري لي امي بيت والحمد لله اشتريت ليها بيت بس المرض غدار امي صغيره ي نوسه ادعي انها تقوم منها قلت ليهو رامي م عارفه بس انا متاكده انو امك ح تبقا كويسه وح تفرح بيك وبي اولادك قال لي ان شاءالله نفسي اعوض تعبها ونفسي اعيشها ملكه قلت ليهو ان شاء الله يا رامي ودموعو كانت نازله قلت ليهو رامي استهدا بالله ان شاء الله بتبقا كويسه وما تجي لو م اطمنت عليها انا مستعده اقعد سنه اشتغل شغلك بس امك ما تفوتها عوض تعبها راحه قال لي والله يا نوسه بدل البت جايب ليها بتين وبنات ناس واحده تطبخ واحده تنظف ومونساتنها عارفه الظريفه شنو ومسكنه امي خالي قال ليها داير رامي لي واحده من بناتي وهي طوالي وافقت وبقت تلح علي بس ي نوسه انا مستحيل انسا نظره بنات خالي لي امي ورغم انهن اطفال كانن الطفل بي براءتو العدو ممكن يعاملو كويس الا بنات خالي ديل يدسن منها الحاجات امهم مدرباهم ع الشر بطريقه م طبيعيه اجي انا اتزوج وانا الحمد لله عندي بي زولتي الداير اتزوجها من غير م اشعر قلت ليهو منو قال لي ح تعرفي بس م هسي قلت ليهو ع فكره انا كمان مرت اخوي طردتني عديل بس اخوي طيب وبناتو بحبني لكن هي تشوف الموت م تشوفني وهسي عيانه بين الحياه والموت وزعلت شديد لمرضتها ابدا ما شمتا فيها البحزن اخوي بحزني وربنا يرفعها ليهو قال لي انتي طيبه يا نوسه وانتي مدرسه ع فكره انا اتعلمت منك كتير م اتعلمت الشغل وبس عشان كده يارب 🙏 قلت ليهو شنو قال لي يارب امي تبقا كويسه ويلا ي نوسه عشان مواعيد طيارتي خلي بالك من نفسك في وداعه الله
رامي قطع قلبي بي قصه امو بقيت اسال نفسي لي اهل الراجل بكونو كعبين مع مرت ولدهم وبكون شعورهم شنو لمن يخربو حياتهم سبحان الله بكونو عديمين احساس عديل كانو ربنا بنزع منهم الاحساس والظلم ما برضوهو لي بتهم برضوهو لي مرت الولد كانها متزوجاهو عرفي غايتو حسبي الله ونعم الوكيل في اي ام ولد تغلغل مرت ولدها وتزعزع حياتو بحجه انو هي مرت ولد ولازم انداس عليها بالجزمه
اشتغلت شغلي وشغل رامي ورجعت تعبانه شديد وروحي طالعه رسلت لي رامي واطمنت عليهو قال لي انا وصلت بالسلامه والان مع امي في المستشفى ح تعمل عمليه قلب مفتوح دعواتك ليها بقيت ادعي لي وقومتا صليت ركعتين وبقيت ادعي ربنا يشفيها وينجح العمليه وتقوم بالسلامة والنوم غلبني رامي قال لي امي طلعت من العمليه بس م بخلونا ندخل ليها وكويسه الحمد لله قلت ليهو الحمد لله الصبح اذن صليتو ونومتا صحيت بصوت المنبه لبست ومشيت شغلي جيت راجعه منو تعبانه نومتا من غير م اطمن علي ام رامي وشالتني نومه ما صحيت الا بليل رسلت لي رامي قال لي الحمد لله دخلت شفتها وامي بالف خير قلت ليهو حمد لله ع السلامه وما تشوف شر ان شاءالله قال لي امين 🙏
مرت الايام ورامي طمني علي امو واتكلمت معاها فيديو وامو صغيره م كبيره اطمنت عليها وشكرتني وظاهر انها انسانه راقيه شديد رامي قال لي امي اطمنيت عليها بس عندي مشوار تاني قلت ليهو ياتو مشوار قال لي عبله نسيتي عاوز بكره الاقي مهيد ونشوف بنعمل شنو قلت ليهو اعمل حسابك قال لي م تخافي علي انا ربنا جابني عشان اخد ليك حقك وعندي يقين بي كده وحق البت المسكينه الماتت دي لازم يرجع والولد يتحاسب علي فعلتو دي وياعالم اكون عمل شنو في حياتو قلت ليهو ديل عصابه قال لي عصابه عليك وعلي طازق ما علي انا انتي بس شوفي بي عينك الح يحصل قال لي م تخافي انا مأمن نفسي للنهايه وعامل خطه تدمرها لمن تموت قلت ليهو ربنا يوفقك
هديه اتصلت علي قالت لي مهيد قال ماشي لي رامي امو عيانه قلت ليها اي نزل عشان اعمل ليها عمليه انتي كيفك ومهيد كيف معاك قالت لي كل يوم بدعي ليك نوسه بجد مهيد طيب شديد وبخاف علي موت دي آكتر حاجه حبيتها فيهو قلت ليها ربنا يسعدكم انتي طيبه وتستاهلي وتشكريني ع شنو اصلا دا نصيبك بي وبراي كان وصلتي ليهو قالت لي عارفه بس ليك الفضل قلت ليها تستاهلي ونسيت اسالك اخت طارق كيف قالت لي نوسه والله بقت كويسه وكل زول اجيها تشكرك ليهو ومره مشيت ليها بكت عليك بي دمعتها قالت لي طارق م يستاهل يطلقها لكن لخير ليها انظلمت كتير وكنت بشوف ظلمها بي عيني بس م كنت بقدر اعمل حاجه ما بقدر اعادي امي لانها في النهايه امي بس لو الزمن رجع بي بقيف مع الحق واي باطل حتي لو من امي بتصداهو امي دخلت حياتنا عبله دمرتها قلت ليها معناتا توقعاتي صاح وشكوكي صاح ام طارق هي السبب في زواج طارق علي قالت لي ما اصلا نوسه الغبي بفهما كيف ام طارق تقيف مع عبله وماتقيف معانا معناتا في قصه قلت ليها حسبي الله ونعم الوكيل فيها حقي يخلص قالت لي خلص يختي هديك عيانه دايره تموت وطارق اخبارو مقطوعه ما حصل اختو جابت لي سيره قلت ليها الله يهون عليهو
مرت الايام ورامي كان متابع معاي قال لي نوسه قدرت اخطط لي وقوع عبله وبالقروش قدرت أتحصل علي معلومات كتيره والشي المؤسف يا نوسه واحد من اولادها مختفي وطارق م عندو علم قلت ليهو لا ياخ قال لي جد والله حكت لي هي بي خشمها وانا سجلت كلامها يا نوسه والليله عاوز الاقي طارق لازم ي نوسه يشيل بتو منها وهي م ح تديهو ليها بالساهل بس انا تبع الخطه انو طارق يشوف بي عينو افعال عبله وكده بكون شيلت ليكم حقكم منو بعد اشوف الاختارها وحقيقتها شنو وانتو حقيقتكم شنو كده حقكم خلص ومن ناحيه تانيه البت المسكينه دي م تضيع عارفه ي نوسه قالت لي شنو انا كان مره قلت ليها داير بتك عارفه قالت لي شنو قالت لي بتي صغيره لو كبيره ما عندي مشكله شوفي يعني موقفها انو هي صغيره ويا عالم البت دي حاصل عليها شنو المهم ي نوسه انا ما برجع الا اوقعها وادعي لي ……….يتبع