رواية بيت جنب المقابر
الجزء الثاني2 الفصل الحادي عشر11والاخير
بقلم دانيا
قال لي لو عاوزة محمد اتبعيني وقفت في حالة زهول وبقيت بعاين ليهو بنظرات كلها خوف استغربت شديد دا منو ومن وين بعرف محمد وانا ليه اصدق كلامو واثق فيه الأفكار بقت تأخدني وتجيبني .... قاطع تفكيري وقال لي التأخير م لصالحك واتحرك من مكانو مشى من دون ما يتلفت فكرت في آخر جمله قالها لي وصورة محمد بقت تجي في راسي وتختفي قبل انا اتحرك عليهو هو كان فتح باب واحده من الغرف ودخل ،، مشيت وراهو بخطوات مترددة ورجلين ترتجف من الخوف وقفت قدام باب الغرفه قبل افكر افتحو فتح براهو لقيتو واقف وبعاين برا بالشباك اول ما انا خشيت الباب قفل لمن اتهجمت .
مااتلفت عاين لي بس قال انتي جاهزة ؟ قلت ليهو مابعرف إنت منو او جاي من وين بس عاوزة اسألك وين محمد ؟ اتلفت عاين وقت عاين لي لمن قشعريرة سرت في جسمي بقيت بعاين ليهو بإستغراب قلت ليهو محمد انت بتهظر ول دا مقلب او الحاصل شنو اشرح لي كيف بتمشي وم بترجع وكمان بتختفي فجأة قبل اتم كلامي قاطعني وقال لي انا م محمد ..... انا م محمد دي اترددت في راسي مية مرة كيف م محمد ؟ رجعت خطوتين وراء اصطدمت بالباب .
دار وشو واتلفت مني غادي وقال لي م عندي وقت للشرح لكن ح اوضح ليكي كم فكره عشان م تتفاجئي اكتر بعدين لسه الجاي اكتر " صراحه انا ما إنس ، انا من الجن " انا من قال لي كدا الدم جمد في عروقي عارفه نفسي الجنون والشواطيت دي في الونسه ساي جسمي كله بكش من سيرتها لمن اقابلهم في الحقيقه ،، واصل كلامو وقال لي لكن م تخافي انا مستحيل آذيكي انتي لأنك من جيتي البيت دا ومن شفتك اعجبت بيكي وعشان م اضطر استخدم معاكي اسلوب الجن واجيبك بالقوة والحاجه دي انا م عاوزها إستخدمت معاكي إسلوبكم إنتوا الإنس إسلوب الإستعطاف عن طريق نقطة الضعف وعرفت قدر شنو إنتي متعلقه بمحمد .
عشان كدا سحبت محمد لعالمنا عشان اجيبك بإرادتك وانا دائما بجيك على هيئة بشر سواء كان بملامح محمد او غيرو عشان م تخافي مني ،، واعرفي إنو انتي انا م بقدر آذيكي لكن محمد لا انا ممكن اقتلو عديل ..... من سمعت كلمتو دي حسيت بالخوف اكتر على محمد ،، قلت ليهو بصوت مرتعش وين محمد انت دامك عارف إنو انا متعلقه بمحمد شديد وهو زوجي داير مننا شنو تاني ؟ خلينا في حالنا وانا بوعدك نطلع من المنطقه كلها خلي البيت وعمرنا مانرجع ،، فجأة نبرة صوتو اتغيرت وقال لي لا م ح تطلعي من هنا لمن قال كدا لمن اتخلعت وخسيت بالخوف رغم إنو مقبل مني بس حسيت بنبرة صوتو كأنو الشيطان الجواهو طلع .
قال لي انا العندي قلتو ليكي وهسي قرري عاوزة تطلعي محمد من عالمنا او لا ؟ كل ثانيه بتمر عليهو هناك ح تكون خطر عليهو .... من سمعت كلمة خطر دي رديت عليهو سريع قلت ليهو اكيد عاوزة اطلعو يلا طلعو راجي شنو ؟ قال لي بشرط اوعديني قلت ليهو بشنو ؟ قال لي بس اوعديني بشنو دي م مهم تعرفي ،، هنا ادركت إنو الجاي خطير بس قلت ليهو بوعدك كل شيء فدا محمد من قلت كدا الغرفه ضلمت وبقيت م شايفه اي حاجه من الخوف بقيت بتخيل إنو الشيطان دا ح يهجم علي في اي لحظه طوالي زحيت من مكاني .... ثواني والغرفه نورت ضوء خافت عاينت مكان الزول كان واقف م لقيتو اتلفت شفت محمد واقع في زواية من زوايا الغرفه للحظه فرحت وقمت ماشه عليهو فجأة الزول داك ظهر وقف بيني وبين محمد قال لي اوعك تقربي منو زح من قدامي واشر لي على محمد قال لي شوفي عاينت عليهو لمن جسمي نمل لمن شفت مخلوقين قاعدين جنبو واحد عندو قرون غريبه وشكله مخيف والتاني وشو وش زول وجسمو بشبه كأنو جسم حمار عاينت ليهم بخلعه وعاينت لمحمد الكان راقد على الأرض كأنو ميت راقد من غير حركه عاينت للواقف جنبي دا وقبل اتكلم معاهو قال لي ديل لو عملتي اي حركه غلط ح يقضو على محمد شوفيهم متحمسين كيف ،، اتلفت عليهم كانوا بعاينو لمحمد نظرات كلها شر كأنو وحوش لقت فريسه .
قلت ليهو من فضل بعدهم عنو خليهم يبعدو عنو قال لي يلا انتهى الزمن بعدا محمد هنا ح يكون بأمان وح يرجع لحياتو وإنتي اهلا وسهلا فيك بعالمنا ..... وقبل اتلفت اعاين لمحمد نظرة اخيرة لقيت نفسي في مكان تاني تماماً مكان م بشبه عالمنا ولا ناسو بشبهونا غير واحد المتنكر بشخصية محمد دا عاينت ليهو وعاوزة اسألو انا وين ؟ سبقني بالإجابه وقال لي م تخافي إنتي في نفس البيت لكن في الجزء التاني من عالمنا ،، بس لو ركزتي شوية ح تعرفي إنك لسه في نفس البيت وانتظري هسي بوريكي كيف محمد ح يصحى ويفتش عليكي م يلقاكي ويمكن يطلع يفتش برا ويمكن يستعين بأشخاص وفي النهايه ح يزهج ويرجع بيتو ومنطقتو .
ملتقانا في الجزء القادم نشوف هل محمد ح يبحث عن ساجده او لا .....
تمت