رواية باائعة الحطب
الفصل الثالث3
بقلم دانيا
الصباح اجتموا الاء وصاحباتها في بيت الاء وكل واحدة فيهم باين على وجهها الغضب والإنزعاج ،، اصبحوا يفكروا ويفكروا في طريقة يتخلصوا فيها من كنوز ؛ الاء قالت ليهم خطرت في بالي فكرة.....بهناك كنت بعمل في الفطور وكمال اخوي الصغير قاعد جنبي ابوي جاء قعد معانا وكنا بنتكلم في موضوع السوق وما السوق قال لي اهل المنطقه اعترضوا على إنو تبيعي الحطب يا بتي عشان مستقبلك لبعدين.
خليت الفي يدي وجيت قعدت جنب ابوي قلت ليهو ؛ ياابوي انا سمعتهم في السوق وقت كانوا بتكلمو بس م اشتغلت بيهم ،، ياابوي مش انت دائماً بتقول لي المستقبل في يد رب العالمين وانو يعتبر غيب ونحن ما لازم نزحم عقلنا بالبحصل لبعدين ، اهل المنطقه تفكيرهم محدود عشان كدا بحاولو يخططو ويتوقعوا البحصل بعدين انت م تشتغل بيهم ،، وانا مرتاحه ومستمتعه ببيع الحطب.
قلت ليهو ياابوي في حاجه عالقه في راسي ، الكل بعرف إنو امي ماتت بعد ولادة اخوي كمال طوالي ،، انت قلت امي سافرت لأهلها للولادة وبعدها اتوفت بس وقت ولادة كمال انا كان عمري 6 سنه ليه م بتزكر الحصل في الوقت داك؟! وكمان وين ساكنين اهل امي وليه ما بجوا يزورونا مضت سبعه سنه ومافي واحد جاء زارنا منهم.....بدأت في ملامح ابوي الدهشه والتوتر ،، سكت مسافه وقال لي انتي كنتي صغيرة م ح تتزكري الحصل ؛ قلت ليهو معقول سته سنه وما بتزكر ! يعني اخوي كمال بعدين م ح يتزكر زمنا دا؟ .
قال لي يمكن وسكت ، تاني قال وبالنسبة لأهل امك هم ساكنين في منطقه بعيدة شديد مننا عشان كدا م بقدرو يزورونا ،، اثناء ما بتكلم معاي سمعنا اصوات ناس بسلموا برا ، طلعنا بقيت واقفه وبعاين بدهشه شديدة وإستغراب....الطلاب من متين بزوروني في البيت ؟! حاجه كدا خلتني اجمد في مكاني ، ابوي سلم عليهم واتلفت عاين لي كنت لسه واقفه في مكاني كأني مثبته بمغنطيس ؛ ابوي قال لي كنوز ما تستقبلي ضيوفك يابتي عيب.
قالت ليهو بصوت متردد ااا اهلا وسهلا فيكم نورتو ،، الاء العمرها م فكرتها ح تتلاطف معاي ، لا وكمان تتنازل وتزور بياعة الحطب في بيتهم زي ما بلغبوني هي وصاحباتها.....جات علي وقالت لي مفآجأة سلمت علي بالأحضان ،، وانا من الدهشه قربت افقد الوعي ؛؛ سلمت عليهم وفضلتهم في الصالون بنات على اولاد ، جبت ليهم موية ومشيت المطبخ ابوي قال لي انا بعمل العصير قبل انطق بحرف قال لي بنبره جامده " من غير نقاش" سكتت وبقيت اعاين ليهو بإستغراب ليه ابوي من جية الضيوف الفاتو ديك تاني رافض يخليني اعمل لضيف حاجه؟!.
بهناك الطلاب كانوا بتونسو مع بعضهم جاتني زهرة قالت لي ممكن تجي شوية ،، قلت لأبوي لحظه بس مسافة تحضر العصير طلعت معاها....كانت متوترة وم على بعضها قلت ليها انتي كويسة؟ قالت لي بصوت متردد اسمعيني يا كنوز ،، بهناك الطلبه اثناء ما بتكلموا مع بعض الاء قالت لصحباتها شوفو تصميم البيت الناس ديل رغم بساطتهم شوفو بيتهم مصمم بطريقه كيف تحسو حاجه من الخيال.....اسمعوني يابنات البت كنوز دي من هسي كدا بكرة لو كبرت نحن مستقبلنا ح يكون في خطر خاصة شوفوها لو اتأملتوا ملامحها تحسها م بشر جميله بطريقه هادية وحلوة كدا ، وكل ما تكبر كل ما بقت اجمل ،، في واحدة قالت ليهم انتوا خايفين على الفاضي منو بفكر في بياعة الحطب دي وبقوا يضحكوا.
هنا زهرة قلت ليها اتكلمي يابت قالت لي انتي زي اختي وانا عاوزة مصلحتك ،، انتي عارفة يوم الأمتحان الباب قفل فيكي كيف؟ قفلتو الاء وصاحباتها ، بقيت اعاين فيها بخلعه ومستغربه من كلامها ، قالت لي الطلبه ديل م رايدين ليكي الخير....قلت ليها بس طالما جوني في البيت يباركوا لي النجاح يمكن حسوا بغلطهم ،، اثناء ما بتكلم معاها جاني كمال اخوي قال لي بابا بناديكي...زهرة قالت لي دا اخوكي ماشاء الله عسل والله.
مشيت شلت العصير اديتوا ليهم بعد شربوا قالوا لي جاينك في موضوع....طوالي اتزكرت كلام زهرة بقيت اعاين ليهم بإستغراب ،، الاء قالت لي عاوزين نعمل رحله عشان نحتفل بنجاحك ومنها نهاية عام تاني م ح نجتع يمكن الا بعد الأجازة والإجازة طويله.....قلت ليهم بصراحه الفكرة حلوة شديد وتسلموا كتير لأنكم فكرتو فيني بس انتوا عارفين ابوي عيان وانا شغاله في السوق واخوي صغير محتاج عنايه م بقدر اخليهم آسفه م بقدر امش معاكم.
بقوا يعاينوا لبعض وفجأة كلهم طلعوا برا لقوا ابوي قاعد تحت الشجرة مشوا عليهو....بقوا يحنسوا فيهو ياعم زين خلي كنوز تمشي معانا الرحلة عليك الله ، نحن اول مرة نجيك ونطلب منك م تردنا خايبين لو سمحت ،، عاين لي وقال ليهم بس انا م منعتها إذا هي حابه تمشي ؛؛ من قال ليهم كدا خلوا ابوي واتجهوا علي بقوا يحنسو فيني قالوا لي لو اجزتي يوم واحد م بحصل شيء ، عاينت لزهرة الكانت عيونها بتقول لي اوعك توافقي .... بعد إلحاح منهم وافقت ، قلت ليهم بس الرحله وين رايكم شنو نمشي الغابه البجيب منها الحطب بالجد في مناظر روعه !! عاينوا لي وبقوا يضحوا كانوا عاوزين يهينوا الفكرة بس لاحظوا لوجود ابوي الكان مستغرب من ضحكهم ،، قالوا اسفين الاء قالت لي الفكرة م سيئة بس نحن مجهزين مكان افضل ؛؛ خالي عندوا مزرعه وح يجي يسوقنا من السوق بالعربيه ، عاينت لأبوي قال ليهم فكرة حلوة بس انتبهوا على نفسكم وم تغيبوا الشمس برا قالوا ليهو حاضر.
قالوا بعدا نحن نستأذن ونتلاقى بعد ساعه في السوق يا بياعة الحطب ،، ابوي عاين ل الاء القالت كدا بإستغراب فجأة انتبهت في قالت شنو ، طوالي قالت قصدي كنوز آسفه قلت ليها عادي ... يلا نحن مشينا ، زهرة كانت واقفه جنبي شكلها عاوزة تقول شيء بس ساقوها وم خلوها تتكلم ،، بعد مشوا قلت لأبوي ليه ختيتني في موقف محرج ياابوي انا م عاوزة امشي ؛ كمال قال لي انا بمشي يا كنوز ابوي ضحك قال ليهو انت لسه صغير لمن تكبر شوية انا بسوقك رحله حلوة....فرح وبقى ينطط جهزت وطلعت قلت لأبوي ح امشي لأنو بكونوا منتظرني قال لي انتبهي على نفسك يابتي وما تضيعي اوقات الصلاه ،قلت ليهو حاضر ، بهناك الاء وصاحباتها كانوا بتكلموا بعد وصلوا السوق الاء قالت ليهم كنوز انتهت