شهد : انى بنخدم فى الكافيه والفندق
سعد : بتخدمى فيهم ايه ؟
شهد : كيف باقى البناويت خيرك ما تشبحش ؟
بصيت على باقى البنات اللى قاعدين لقيت واحده فيهم قاعده مع واحد شكله ليبى ومنزلين طلبات كتير ومعظمها كانز ومش مفتوح ونازلين ضحك ووشوشه وتحسيس عادى كده وشفت بنت تانيه قاعده مع واحد شكله صعيدى ونفس النظام وبنت تالته قاعده على جنب حاططه رجل على رجل وبتشرب شيشه وعينيها رايحه على ده وعلى دى
شهد : هدا هو شغل كل البناويت البرانيات فى ليبيا المتعه وكل شيء وسومه
سعد : يعنى ايه ؟
شهد : يعنى كيف ما بتقولوا فى مصر كل ... شينى هوا ؟ ... حشره هكى
سعد : اااااه قصدك كل برغوت على قد دمه
شهد : تمام هاهاها معناتها نمشى وياك لغرفه بالفندق 40 دينار نمشى وياك لحوشك 100 دينار نقضى معاك اليوم كامل 24 ساعه وكيف ما تبى 250 دينار ما عدا هادى تطلب فى 400 دينار وما تمشى ابدا للفندق لابد من حوش ويوم كامل
سعد : مين دى ؟
شهد : خيرك نسيت ؟ هادى الهام من المغرب وانت ايش تخدم ؟
سعد : ولا حاجه لسه حاشوف وادور
شهد : شين تبى تخدم ؟ شين تعرف تخدم ؟
سعد : ولا اى حاجه اول مره فى حياتى اشتغل ولسه حاشوف
شهد : ما قلتلى انك وارث ثروه كبيره او هكى ؟
سعد : اه فعلا انا ورثت من والدى ميراث محترم لكن عندى شوية مشاكل عائليه فى الميراث مع اخواتى
شهد : شنى خنبوا حقك واللا شنى ؟
سعد : والبنى راعى انى اول يوم فى طرابلس وما اعرفش اللهجه الليبى ولا التونسى يعنى ايه اللى بتقوليه ده ؟
شهد : يعنى خواتك سرقوك ؟
سعد : لا مش كده اصل انا اصغر اخواتى ووالدتى كانت مدلعانى قوى ولما مات بابا ساب شركة مقاولات كبيره وفلوس كتير وفيلا فخمه عايشين فيها وعربيات واسهم وشوية حاجات تانيه وانا طبعا سهر وفسح وسفر يمين وشمال لحد ما خلصت كل الفلوس السايله اللى طلعت من نصيبى وعرضت على اخواتى يشتروا نصيبى فى الشركه لكن رفضوا حاولت ابيع نصيبى لحد غريب لكن وقفوا فى البيعه وبوظوها وقالوا الشركه حتفضل زى ما هى ماحدش حيخرج منها وانت بطل صرمحه وتعالى اشتغل معانا واتعلم شغلنا ونحافظ على راس مالنا قلت لا انا عاوز ابيع حصتى قالوا لو مسكت سلك التروماى مافيش بيع
شهد : شين معناتها لو مسكت سلك ... شينى هوا ؟
سعد : التروماى The tramway يعنى قصدهم لو عملت المستحيل
شهد : علاش ما يبوش انك تبيع ؟
سعد : بيقولوا حاضيع فلوسى وادور اشحت وافضحهم وهم عاوزين يحافظوا على راس مالى لحد ما اعقل وربنا يهدينى
شهد : تبى الحق ؟ عندهم كل الحق بارك الله فيهم
سعد : على ايه ؟ دى فلوسى اضيعها زى ما انا عاوز انا حر انا مش عيل صغير
شهد : هاااه واضح هاهاها وبعدين شين صار ؟
سعد : انا قلتلهم انى مش حاشتغل قالوا حيعملولى مرتب اعيش منه لحد ما اراجع نفسى قلت مش عاوز من وشكم حاجه انا حاسافر بره مصر وجانى اخويا الكبير خالص يصالحنى قاللى ما تزعلش احنا عاوزين مصلحتك قلتله لو مصلحتى تبقى غصب عنى مش عاوزها انا حاسافر ومش عاوز منكم حاجه بس سيبونى فى حالى انا حر لقيته ادانى عشر الاف دولار وقالى خلى دول معاك حتحتاجهم بس قوللى حتسافر فين ؟ رميت الفلوس فى وشه وقلتله اى دوله فى اوروبا وسافرت ليبيا علشان من غير فيزا وعلشان يدوروا عليا يلاقونى فجاه مش موجود
شهد : وقديش عندك فلوس توا وانت فى ليبيا ؟
سعد : شوية ملاليم فكه حتى تليفونى سبته فى مصر وماشى بتليفون اى كلام
شهد : يعنى انت توا مفلس ولقحت على خشم اخوك ( رميت فى وش اخوك ) عشر الاف دولار ؟ هاهاها
وقامت وقفت وشاورت لمحمد الفيومى وقالت
شهد : محمد ياسر هكى ( كفايه كده ) هدا ما يصيرش منه
سعد : ايه انتى زعلتى منى واللا ايه ؟
شهد : لالا انت مزعل روحك لكن هادى دوه فاضيه ( كلام فاضى ) خلينى نشوف زبون نخدم على راسى خير من البلاش
ولقيت محمد بعد ما قامت جاى يأمن على الحساب
محمد : الحساب يا برنس عشره دينار
سعد : اه اه مافيش مشكله اتفضل قوللى يا محمد عندك فكره ايجار الغرفه هنا بكام ؟
محمد : غاليه عليك روح سوق الرشيد واسال على فندق القاهره حتلاقى سرير فى غرفه مشتركه بخمسه دينار
بعد كده عرفت ان الكانز فى اى كافيتريا كبيره دينار والقهوه بنص دينار ومحمد لسعنى فى عشره دينار علشان قاعد مع المزه وفهمت ان البنات بيطلبوا كانز علشان ما يتفتحش ويرجع وفهمت ان اكيد محمد حيدى شهد خمسه دينار ويحاسب على القهوه ويضرب الباقى فى جيبه وان البنات مش بس شغالين فى المتعه لا دول بيشغلوا الكافيتريا والفندق كله على قفا الزباين اللى زيى انا البرم اللى مقطع السمكه وديلها انا اللى الحكومه داخت ورايا علشان نصاب النساء اتنصب عليا
بس معلش الغربال الجديد له شده والايام دول
................
طبعا انتوا فاهمين ان القصه اللى حكيتها لشهد كلها اونطه وخيال فى خيال وانى اصلا ما عنديش غير اخت وحيده ولا فيه شركه ولا فيلا ولا اراضى انا كنت بافكر اعمل نصبايه ولسه بامهد لقيت البناويت اللى فى الفنادق هم اللى بينصبوا
طيب وبعدين شكل النصب هنا صعب والحوارات كتير قوى بس انا مش حاغلب لازم الاقى سكه انما لحد ما الاقى سكه لازم ادور على شغل من اللى بجد اللى الناس بتعرق وتشقى فيه ده لكن المشكله انا ما اعرفش هم بيعملوا ايه فى الشغل اللى بجد ابو عرق ده 🥺
اخدت قرار انى اتعرف على البلد الاول قبل ما اخد اى قرار واول حاجه رحت فندق القاهره وحجزت سرير فى غرفه مشتركه وكان معايا واحد مغربى دخلت الحمام اتشطفت وغيرت هدومى ورجعت الغرفه نمت ولما صحيت لا لقيت المغربى ولا لقيت التليفون 😱
لأ بقى مش انا اللى يتعمل فيا كده ودينى لانيمك من المغرب يا طرابلس انا يتنصب عليا الضهر واتسرق اخر النهار ؟ انا هلهوله على كده بس معلش تتعوض وفى داهيه التليفون انا لا اعرف حد ولا حد يعرفنى هنا واللى يعرفونى فى مصر نوعين ستات نصبت عليهم وظباط بيدوروا عليا والنوعين طبعا ما يعرفوش الرقم الليبى بس انا كنت شايل التليفون منظر اولا وثانيا لو اتزنقت ابيعه وعموما انا كنت مقلبه من واحده من الضحايا يعنى تقريبا كده بعته بتمنه وادينا بنتعلم سهله اهيه هاهاها
..................
سكن معايا فى الغرفه ناس كتير اللى يقعد يوم واللى يقعد يومين لحد ما سكن معايا مره واحد صعيدى كان شغال فى بنغازى ونازل طرابلس لمصلحه وكان على طول ساكت ومسهم لكن اى بنى ادم مسيره يفضفض
محمود : واااه طرابلس دى واعره قوى يا واد عمى
سعد : شكلك اتعلم عليك هنا يا بلدينا
محمود : واه حتة عيل ليبى علم عليا علام واعر والمشكله انه شغال فى الامن الداخلى ولو ما كانش اكده كنت عرفته المصريين على حق لكن غصب عنى احط لسانى فى حنكى واسكت انما فى صدرى نار يا واد عمى
سعد : ايه اللى حصل ؟ ما تحكيلى
محمود : رحت ابيت فى فندق دخل عليا الولد بتاع الامن الداخلى ده قلب كل فلوسى لدرجة سبت الفندق وجيت اقعد فى الفندق المعفن ده
سعد : لا ازاى يعنى قلب فلوسك ؟ ده يبقى حرامى كنت عملت محضر
محمود : ما قادرش يابوى ما قادرش
سعد : ليه ؟ احكيلى والكلام حيفضل سر بيننا بس وعينى انا جديد فى البلد دى
محمود : تحلف انه حيبقى سر ؟
سعد : فى بير مالوش قرار وحياة مصر الغاليه حيفضل السر فى بير
محمود : انى اول ما دخلت الغرفه جاتنى بنت جزايريه قالتلى تبى تدير برنامج ؟ قلتلها برنامج ايه ؟ قالتلى متعه تبى واحده من البناويت تنام معاها ؟ ما اكدبش عليك يابوى انا بقالى تلات سنين فى ليبيا والغربه صعبه وبصراحة ربنا مش اول مره ادير برنامج كنت فى بنغازى نمشى لفندق اسمه الرايه الحمره البناويت فيه شغالين فى المتعه قلتلها ادير برنامج معاكى انتى يا قمرايه قالتلى لا انى توا مريضه ومايصيرش منى انى نجيب واحده صاحبتى احلى منى ولو جيت الاسبوع الجاى تلقانى واتيه انما توا شوف صاحبتى وراضينى
سعد : طلعت قواده يعنى ؟
محمود : ياريت على كده . هى خرجت على اساس تجيب صاحبتها وبعد شويه الباب خبط فتحت لقيت واحد دخل وقفل الباب وانا اقول مين سيادتك قاللى توا بنعرفك مين نكون يا مصرى شنى جاى تدير برنامج ؟ جاى من مصر تخدم على راسك وتدير برامج مع البناويت يا ممسخ ياحقير وضربنى قلم جيت امسك فيه قاللى نحى ايدك يا مصرى انى من الامن الداخلى وطلع الكارنيه وقاللى اشبح ورجع حطه فى جيبه تانى وقال شين درت مع البنيه اللى خرجت توا ؟ قلتله والله يا باشا ما درت حاجه قاللى كذاب انى بنعرف كل حاجه وتوا ندير قضيه ونرحلك من ليبيا يا حقير قلتله والله يا باشا ما مسيتها قاللى اخرس توا نوريك وطلع تليفونه ورانى صور البنت وهى بتدخل الغرفه وتكلمنى وصورها وهى خارجه وانا باسلم عليها واعطيها فلوس قلتله والله كان علشان طلب وما لمستهاش قاللى كذاب الصور واضحه وانى بندير قضيه وكلمتى مصدقه حتى لو ما مسيتها طلع اللى فى جيوبك قلتله ليه قاللى نفتشك ربما يكون معاك سلاح او ممنوعات قلتله والله ابدا ادى كل اللى فى جيوبى وطلعت فلوسى وتليفونى واخد كل حاجه وقاللى يا اما بناخدهم وانت تمشى وتنسى انك جيت الفندق هنا او بندير قضيه ونحبسك قلتله لا خدهم وانا حامشى من هنا وعمرى ما اجى الفندق ده تانى ابدا
سعد : انت متاكد انه من الامن الداخلى ؟
محمود : يا واد عمى ده ورانى الكارنيه وفيه صورته
سعد : وقريت مكتوب فيه انه من الامن الداخلى ؟
محمود : يا واد عمى انى ما نعرفش نقرا ولا نكتب
سعد : هو اسمه ايه الفندق ده يا محمود ؟
محمود : والله مش فاكر اسمه لكن هو فى ميدان الجره قبل ما توصل الظهره
سعد : فندق النجمه ؟ هاهاهاهاها ربنا يعوض عليك يا بلدينا تعيش وتاخد غيرها