رواية من انا الفصل الخامس عشر 15 والاخير بقلم مروة الصافي
قمت فجأة اصرخ وانكش في شعري ناس البيت كلهم جو مخلوعين وقدر ماحاولو يهدوني انا بكورك شوية كدا دخت ولا خشيت في غيبوبة ماعارفة
شالوني وودوني المستشفى ماخلو فحص مافحصو لي طلعت كل حاجة نضيفة صحيت وبقيت بتلفت انا وين امي قالت لي نحن في المستشفى قلت ليها في شنو قالت لي ماف حاجة كنتي عيانة شوية وجبناك نشوف في شنو
قلت ليها جسمي واجعني شديد قالت لي بكون تعب السفر
طلعنا جينا البيت وكل الليل مقلقة قلق ماعادي
جاء الصباح قمت نشيطة وكويسة عايزة البس امشي الجامعة امي قالت لي ماشة وين قلت ليها الجامعة قالت لي يابت انتي عيانة تمشي وين بعد تبقي كويسة
قلت ليها انا كويسة فجأة التلفون اتصل عاينت لقيتو حيدر بقيت ارجف وبعدها تاني بقيت اكورك وضربت التلفون بالارض امي مسكتني وبقت تقرأ لي ابوي ومحمد جو جارين ابوي بقى يقرأ لي وامي اتصلت لي خالتو نسيبة
خااتو نسيبة جات مخلوعة مالها في شنو امي حكت ليها انو امس جاتها الحالة دي واسه نفس الشي
خالتو نسيبة قالت ليها حا اتصل لي شيخ خالد يجي يعمل ليها رقية انا شاكة في حاجة بس لازم نجيبو اسه يرقي ليها البت دي لحد امس كانت كويسة
اتصلت عليه شوية والشيخ جاء وبدأ يقرأ لي المهم هديت شوية بس ما ظهرت اي حاجة قال ليهم لازم كم جلسة عشان نشوف الحاصل شنو وطلع
حيدر اظن لمن زهج من الانصال وكمان ماجيت الجامعة جا عشان يشوفني مالي كنت كويسة بتونس عادي اول ماجاء داخل بقيت اكورك واتدسيت منو ورا امي امي ساقتني ودخلتني غرفتي
ابوي اعتذر لي حيدر وقال ليه والله من امي بالليل نحن في الحالة دي واسه جبنا ليها شيخ يرقي ليها قال لي ابوي طيب بتصل عليك عشان اتطمن عليها ومشى وهو وجع الدنيا كلو فيه وشو ملان دموع وبقى يسأل نفسو في الحاصل علي شنو
المهم الشيخ يومين ورا بعض بجي البيت يرقي لي ما استجبت الا اليوم الثالث اخيرا نطقت بالحاصل العاملة لي العمل طلعت ريم وكانت عايزاني اكره حيدر وامرض وانها كانت بدت تعمل العمل دا من قبل رمضان
بعدها هديت ونمت . خالتو نسيبة قالت بعد دا ماف اي كلام الا اكلم علي بي عمايل بت اخوهو وفعلا مشت كلمت عمو علي وهو ماكذب خبر دور عربيتو ماشي على بيت اخوهو قبل يصل اخوه ضرب ليه قال ليه نحن في المستشفى ريم دي عيانة وطلبو منها فحوصات كتيرة لو ممكن تجي علينا
عمي قال سبحان الله العملتو في بت الناس اترد ليها بي سرعة
مشى ليهم المستشفى لقى ريم راقدة وامها تبكي لحد ماطلعت النتيجة طلع عندها كانصر في الدم
نحن بنتكلم مع الدكتور هي جات براحة وسمعتو بقول في شنو ريم بقت تبكي وتكورك دا حق حياة ربنا رداه فيني قالت لي عمو علي وهي بتبكي عليك الله وديني لي حياة اعتذر منها قال ليها بس تفتكري حتسامحك قالت ليه لازم ابريء ذمتي قدامها وقبل كدا عليك الله غشيني مشوار كدا
عمو علي ساقها وبتوصف ليه لحد ماوصلت للعمل ليها العمل وطلبت منو يفك العمل قال ليها لو فكيتو تاني مابتعمل قالت ليه بس فكو انا ماعايزة اعملو تاني طلب منها قروش كتيرة وهي ماعندها عمو علي دفعهم وفك العمل وطلعو
اول ماطلع بلغ عن الفكي ومن هناك طوالي مشو على البيت ريم اول ماشافتني قعدت تبكي وتقول لي عليك الله سامحيني وبقت تحكي لي من يوم مشت للفكي لحد ما قال ليها العمل ظبط
انا قعدت ابكي قلت ليها انا عملت ليك شنو عشان تعملي فيني كل دا انا اذيتك في شنو عشان تأذيني قالت لي اسفة والله انا حبي لي حيدر عمى عيوني خلاني ماشايفة الصح من الغلط قلت ليها هل حيدر في يوم حسسك انو هو عايزك قالت لي لأ وكان دايما بحذرني ما اسألك وما اتعرض ليك
بس انا كنت مصرة ما اخليك في حالك بالرغم انك ماحصل سمعتيني اي حاجة شينة
قلت ليها يلا ربنا يسامحنا كلنا قالت لي اعفي لي عليك الله انا مريضة ومامعروف حا اعيش لي متين قلت ليها انا مسامحاك وربنا يسامحك ان شاء الله
استأذنت وطلعت وانا حسيت بي تغيير حسيت اني احسن ودخلت غرفتي اتصلت لي حيدر وحكيت ليه بي كل الحصل واعتذرت ليه على العملتو معاه قال لي ولا يهمك ماكان بيدك المهم اسه عايزك تكملي السمستر دا سريع عشان نعمل العرس
فعلا رجعت الحمدلله للجامعة وبقيت من الجامعة امشي السوق شتري حاجاتي عشان بعدين الزمن مايسمح لي وناس امي في البيت بجهزو لي في الحاجات امي وخالتو نسيبة ماخلو شي ماعملوهو وعمو علي اتفق مع ابوي انو هو زاتو يساعد في الزواج طبعا بتو برضو
السمستر انتهى خلاص وطلعت الاولى على الدفعة وابوي ساقني المحكمة وغير لي اسمي وطلعو لي ورق رسمي باسمي الجديد وكانت اريج امتحنت خلاص واجزت وكان اسامة اخوي برضو جاء وكان احلى يوم لي وسط اخواني
يوم العرس ونحن في الكوفير وكان مشت معاي اريج اسامة جاء مع حيدر بي عربية الزفة ونحن طلعنا ليهم طبعا احساس كان مختلف شديد سعادة ماعادية بس اللفت نظري حسيت اسامة بعاين لي اريج بي اعجاب كدا وهي كمان اتبسطت طبعا لانه ما حالقى لاخوي احسن من اريج ولا حالقى لي اختي احسن من اسامة
تم الزفاف وسافرنا اسبوعين وجينا راجعين عشان السمستر الجديد حيبدأ خلاص وبعد جينا مشينا خطبنا اريج لي اسامة بس حيستناها لحد ماتدخل الجامعة ان شاء الله
مرت الشهور وجبت احلى تالا وكانت تشبهني شديد وحيدر كان طاير بيها السماء
وكدا انتهت حكايتي او بدت سعادتي الحمدلله ...
#تمت
#ماعيب تتربى في ملجأ العيب انك تفكر الاتربى في ملجأ دا اقل من الناس وانو ما انسان مفروض يعيش زي باقي الناس ويتعلم ويكون مستقبل زيو وزيك
كتير منهم بكونو متعشمين لي كلمة حلوة منك او احساس بسيط محتاجين للاحتواء احتر من الاكل والشراب
ماذنبهم انو فتحوا لقو روحهم في ملجأ دا ذنب ناس غيرهم وماصح نحاسبهم بي ذنب غيرهم
لازم ينخرطوا مع المجتمع ماننفر منهم لانو النفور دا هو البجيب الاحقاد والكره من بعضهم
لو انتبهنا ليهم واهتمينا بيهم حيطلعو احسن ناس وحيكونو من قادة المجتمع في مجالاتهم كلها حيكون منهم الطبيب والمهندس والمعلم وكل المهن ببساطة لانهم فيهم الاذكياء وفيهم العندو طموح يغير
الوضع الهو عاشو وعايز يكون احسن ...
تمت بحمد الله