رواية باائعة الحطب
الفصل الثامن8
بقلم دانيا
قمت دخلت انوم وخليتو قاعد برا ،، مشى غرفتو وقال انتي الليله كنتي وين لمن حصل دا كله؟ قالت انا آسفه م قدرت اجي واساعدهم لأنو ابوي والمعاهو قالوا لي تاني لو نزلتي تساعديهم نحن الحنعاديهم وم ح يقدروا يقيفوا في طريقنا او يحموا نفسهم مننا ؛؛ انا خفت عليكم منهم عشان كدا ووعدتهم عشان سلامتكم تاني م اساعدكم .
انا آسفه واعتني بنفسك وبكنوز وكمال ، يلا مع السلامه تاني م ح اقدر ازوركم....بقى يعاين ليها محتار وفي وشو ملامح الحزن على فراقها ،، قادرت المكان وهو غلبو النوم بقى قاعد للصباح صاحي ،، الصباح قمت عملت الشاي وسخنت ل كمال الحليب وديت الشاي لأبوي لاحظت من وجهو م طبيعي كانت ملامحو شاحبه و عيونو محمرة من قلة النوم.
قلت ليهو ياابوي انت كويس ؟ قال لي كويس يابتي ، مشيت عملت الفطور وجيت قلت ليهو ابوي قوم الفطور لقيتو نايم على غير عادتو....قلت ليهو ابوي انت الليله ما كويس هبشت جسمو لقيتو مسخن ، حاولت معاهو عشان اوديهو الدكتور رفض يمشي قال لي امبارح فوتت الجرعه حقت السكري هسي بأخدها وببقى كويس م تشيلي هم .
بعد فطر واخد الجرعه حس نفسو متحسن شوية انا طلعت جهزت العربه حقت الحصان ومشيت السوق ،، عاوزة انزل الحطب جاء واحد قال لي الدكان دا انا اجرتو وعاوز افتحو بقالة ، قلت ليهو كيف يعني دا مكاني انا ومأجراهو قال لي انتي ليكي شهرين م دفعتي الإجار وهسي المكان بقى حقي انا.
من غير ما اتناقش معاهو مشيت طرف السوق نزلت الحطب وربطت الحصان في شجرة جنب السوق وكومت الحطب ،، قعدت جنبه كانت الشمس تلفح بس لحسن حظي بعت الحطب بسرعه وبعدها كانت الدنيا عصر دخلت السوق جوا اشتريت حاجات للبيت وجيت طالعه مشيت على محل ربطت الحصان عشان اجهز العربه واطلع امشي الحله بسرعه لأنو ابوي خليتو عيان وم عارفه الحصل عليهو شنو.
جيت م لقيت الحصان بقيت اتلفت ياربي الحصان دا انا خليتو هنا متأكده اني ربطتو هنا مشى وين ؟! بقيت خايفه اكون ضيعت الحصان قلت لو ضاع مني كدا يعتبر مصدر الرزق انتهى....جاتني فكرة اتتبع الدرب بقيت اعاين في الأرض لقيت درب شخصين كان اثار اقدامهم من محل ربطت الحصان وبعدها هم والحصان اتجهوا غرب بقيت ماشه وبعاين في الأرض ، عشان الدرب م يروح مني لقيت الدرب ماشي بإتجاه حله جنب السوق... قلت ياالله ساعدني انا خليت الحاجات الإشتريتهم في العربه جنب السوق انا لازم اسرع عشان ارجع البيت.
راغبت اثار الاقدام لمن وصلت لآخر الحله بالطرف التاني ، الحله دي اول مره اخت رجلي فيها....وصلت لمكان زي الحصيرة جيت جنب السور بالثقوب الفي السور شفت الحصان حقي ومعاهو مجموعه من الأحصنه ،، لمن قلبي بدقى يدق بسرعه قلت حصاني اتسرق انا ح اقدر اطلعو من هنا كيف؟ بقيت افكر وم قادة اعمل شيء والشمس خلاص قربت تغيب ، قلت يلا كنوز اتشجعي وادخلي إن شاء الله تبكي ليهم المهم تسوقي الحصان وتطلعي من هنا ابوكي بكون منتظرك.
جيت ماشه على الباب عاوزة ادخل جاء زول مسكني من يدي قال لي يابت ماشه وين انتي ؟ قلت ليهو حصاني اتسرق وقصيت دربو لقيت جوا هنا ،، بقى يعاين لي مسافه قام قال لي يابتي الناس ديل كعبين وم ح يدوكي الحصان ارجعي بيتكم قبل الدنيا تعتم الناس ديل لو شافوكي ممكن يأذوكي ومشى خلاني ،، كلامو خلاني اخاف واتردد بقيت واقفه ارجف بس لمن اتزكرت ابوي واخوي الصغير اتشجعت وقلت البحصل كله يحصل.
دخلت اول ما وقفت في الباب لقيت اربعه رجال كانوا قاعدين يتونسوا ويضحكوا ، اول ما شافوني قاموا على حيلهم واحد قال الشافعه الحلوه دي جات من وين في الوقت دا؟! مشيت عليهم بقوا يعاينو لي في دهشه التاني قاليهم هوي دي م انس دي جن شوفوها حلوه كيف.....قاطعت كلامو وقلت ليهم انا عندي حصان ضايع وعارفاهو ياتو من بين الأحصنه دي عليك الله رجعوهو لي ، بقوا يعاينو لبعض في صمت وبعدها بقوا يضحكوا ، قلت ليهم عليك الله رجعوهو لي انا لازم ارجع بيهو القريه قبل الدنيا تضلم والمغرب يجي انا خليت ابوي العيان واخوي الصغير براهم بكونو قلقانين لي.
واحد فيهم قال ليهم والله الليله حظنا حلو كيف ، معقولة نحصل على بت وحصان ،، من قال كدا انا حسيت قشعريرة سرت في جسمي بقيت اعاين ليهم بخلعه.