رواية عشاق الصمت الفصل التاسع عشر 19 والعشرون 20 بقلم هاجر طه
الحلقة التاسعةعشر
ليخرج حسام متجها لعمله,وتذهب والدة حنين لغرفة ابنتها؛ لكي توقظها
رباب:با حنين...قومي يلا عشان تساعدينا
حنين بصوت ناعس:ياماما بقى...لسه بدري
رباب:بدري من عمرك...قومي خلصى اللى ورانا وبعدين ابقى ريحي
حنين:آه ما انا عارفة الراحة بتاعتكم
رباب: يا بنتى بطلي لمضتك دي...ربنا يكون فى عونه
قامت حنين وابعدت الغطاء عنها فى ضيق
حنين:ليه الكل بيقول ربنا يكون فى عونه؟...ايه هو انا بلوة..ولا ايه؟.. انا بنتكم ولا هو؟! ...اذا خايفين عليه اوى كده متجوزهوليش
رباب:مفيش فايدة يارب صبرنى....آل هادية آل ...ميعرفوش اللى بتعمله معانا فى البيت
حنين:ماشى ياماما...اما نشوف اخرتها ايه؟ ومين اللى امه دعياله؟
تمر سا عات النهار سريعا,والكل منشغل بتجهيز المنزل وغرفة الاستقبال...حتى عاد حسام من العمل
حسام:السلام عليكم....خلصتوا؟!
حنين بتعب وتجلس ع الاريكة:آآآآآآآآآآآه خلصت وخلصت
حسام:ههههههه طب يلا روحي البسى لانهم نص ساعة وجايين
حنين بصدمة:ايه؟....هم هيغيروا المعاد من اولها مفيش التزام؟؟
حسام:لأ مغيروش هم قايلين على المعاد ده من زمان
حنين:مقولتوش كده....ماما قالت انهم هيجوا بليل
حسام:اممممممممممم ....لأ ده المعاد من الاول....وبطلي تضيع وقت
حنين:امري لله ...اما نشوف اخرتها
هنا غامزة لها:أخرتها حلوة ان شاء الله
حنين وهى تقترب من هنا وتتفحص وجهها:مش عارفه ليه حاسه انك مخبية عليا حاجة يا هنا؟!!
هنا وهى تحاول ان تتهرب:حسام ...تعالا عشان نشوف هتلبس ايه واكويهولك
حنين:بقى كده بتهربى ...ماشى
لتأتى والدتها
رباب:يا بت انتى لسه واقفة ترغي.....وشدتها خلفها من معصمها الى داخل غرفتها لتجهز ابنتها لأحلى ايام عمرها
¤¤¤¤¤
ع الجانب الاخر فى منزل أ/مختار
كان هشام يستعد للخطبه ومعه عمر
هشام:ياعمور...البس بدله ولا قميص ولا تيشرت؟
عمر:امممممم بقول البدل عليك حلوة
هشام:طب البسها لونها ايه؟بقول البس السودا
عمر:آه بيبقى خطير عليك...والقميص؟؟
هشام:امممم بفكر....لأ بص انا غيرت رأيي
عمر:اللهم ما طولك ياروح...يابنى كده مش هنخلص ارسى ع حاجة بقى...ده انت غلبت البنات
هشام وقد رماه الشماعة :بلاش خفة ظلك دى النهاردة....ماشى راعي مشاعري المضطربه يا اخى
عمر :آآآآآآآه يعنى هتجبلى عاهة قبل فرحى...حد يحدف حد كده...قولت ايه؟ مشاعرك المضطربه؟والله ووقعت يا بن مختار
هشام بعد ان نظر للساعة وجد انه قد يتأخراذا استمر فى محادثة عمر لذا قرر ان ينجز فى ارتداء ملابسه
هشام:انا هلبس القميص الاسود والبدلة البيج كده احلى
عمر:آه والبنطلون البيج تمام...هتلبس جرفته؟؟
هشام:لأ...كده حلو...ناولنى البرفان الازرق من ع الكوميدينو اللى جنبك
ارتدى هشام زيه وكان فى غاية الاناقة والوسامه؛ليخرج من غرفته ليجد امه تمسك بالبخور
هشام:كح كح كح كح ...ايه ده ياماما؟
فايزة:ربنا يحرسك من العين...ببخرك ياابنى
هشام:ماشي ياماما بس أنا بتخنق من ريحة البخور
زياد:كان الود ودى آجى معاك
هشام: معلش يا زيكو عارف انه مش وقته وانها جت ع امتحاناتك ..ربنا يوفقك...هتبدأ بعد بكرا صح؟؟!
زياد:آه ...عادى ولايهمك ياكبير...وربنا يتمملك بخير
ودعهم زياد وهو تدعو له بالتوفيق والسداد, ينزل هشام وعمر ومدام فايزة ليجدوا د/جلال بأنتظارهم
جلال:يلا بينا...
يركبون السيارة ليتجهوا الى محل الازهار, ويشترى هشام باقة ورد رائعة ,وبعدها ينطلقوا الى محل الحلوى ليشتروا علبة من الشيكولا
يتجهون الى منزل أ/رياض ,,وعند ناصية الشارع يتصل هشام بحسام؛ ليخبره بقدومهم ....ينتظرهم حسام على باب المنزل
يسلم عليهم وبعدها يصعدوا جميعا للشقة,ويتجه بهم حسام الى غرفة الاستقبال
فى غرفة الاستقبال
جلس جلال ع الاريكة وبجواره عمر وهشام,بينما جلس حسام ع الكرسي المجاور للأريكة ,,,وجلست مدام رباب فى الكرسي المقابل له,وبجوارها مدام فايزة ع الاريكة الاخرى
بدأ هشام بالتحدث عن نفسه وكليته ومحل ابيه ,,اعجب حسام به كثيرا كذلك والدة حنين
فايزة:وهي فين العروسة بقى...مش هنعرف رأيها؟!
حسام:طب عن اذنكم اروح انادى عليها...
ليخرج من الغرفة ونادى لزوجته بصوت منخفض
حسام:يا هنا يلا هاتى حنين
هنا:خلاص روح انت واحنا جايين اهو...ثم تقول لحنين:يلا ياحونى بقى...
حنين:اهو خلصت
هنا:ما شاء الله ...الله اكبر...قولي بقى تشيلي الجاتو ولا الحاجة الساقعة؟؟؟
حنين:انا مش عاوزة اشيل حاجة خالص
هنا:بطلي دلع بقى وخدي شيلي....واعطتها الكعك
حنين:ماشى ....وسارت بأتجاه الغرفة ,وما ان اقتربت حتى سمعت صوت امها :منور ياهشام ياابنى
دق قلبها بشدة فرحا ام احراجا ام كليهما......فهى لا تعرف لم يدق بهذه القوة
حنين فى نفسها:"بجد هشام....ايه ده جه اتقدملي!!...انا مش مصدقة نفسى...انا بحلم ..ألف حمد وشكر ليك يارب ....ثم راجعت نفسها...ايه يابت ياحونى ؟؟انتى مدلوقة كده ليه ...اجمدى كده ...آه..."
لتقاطعها هنا:اتخشبتى كده ليه يلا ادخلي
لتدخل حنين وتلقى التحية بصوت منخفض للغاية ممزوج بالارتباك,,,وينظرون اليها ..خاصة هشام الذى اصابه الذهول من شكلها ورقتها...نعم لقد كانت فى غاية الجمال والوقار,اذ كانت ترتدى
فستان باللون الاحمر الغامق "نبيتى",وبه شريط "ستان بيج" ,وارتدت فوق الفستان جاكت يصل الى الخصر "بيج", وطرحة "بيج" بها خطوط بنفس لون الفستان
وضعت الجاتو ولم تنطق بشىء فالمفاجأة عقدت لسانها,وجلست ع الكرسي المجاور لوالدتها,حاولت هنا انقاذ الموقف فدخلت من خلفها مسرعة تحمل المياه الغازية ووضعتها ع الطاولة وقالت:احم.. اتفضلوا ياجماعة....منورين
وذهبت لتجلس بجوار زوجها
فايزة:ماشاء الله ايه الجمال ده....ما تيجي يا حنين يابنتى جنبى..وقامت حنين من مكانها؛ لتذهب وتجلس بجوار مدام فايزة,وظلت مدام فايزة تحدثها
ظل هشام ناظرا لحنين؛معجبا بجمالها وحياؤها,رآه عمر شاردا فى حديث امه مع حنين فقرر ان يمزح معه
عمر هامسا فى اذن هشام:يابختك ياهيشو....آلا هو ينفع نبدل؟!
لينظر له هشام نظرة غاضبة ويقول له بهمس:لم نفسك ...بدل ماأقول لشروق
عمر:ايه ..كله الا كده
جلال:احم...احنا جايين عشان نطلب ايد الانسه حنين...وعاوزين نعرف رأيها؟
حسام:قولتى ايه يا حونى؟
حنين ووجها فى الارض:اللى تشوفه يا ابيه
لتنطلق بعدها اصوات الزغاريد والتهانى لكليهما,يتم تحديد موعد شراء الذهب يوم الخميس المقبل,وبعد ان تناولوا الكعك
جلال:طلاباتكم ايه؟
حسام: طلبات ايه بس..احنا بنشترى راجل..والى يقدر عليه يعمله
فايزة:احم طب لوسمحتى يا هنا هو فين الحمام؟
هنا:آها اتفضلي معايا
غمزت رباب لحنين لكي تخرج هى الاخرى,خرجت هنا وحنين وفايزة الى الصالة وظلوا يتحدثن سويا,اما فى داخل الغرفة بدأوا يتفقون ع المهر ولوازم الشقة وغيرها من أمور الخطبة والزفاف,وتم تحديد موعد كتب الكتاب بعد سنة
وتستأذن اسرة هشام للرحيل,يقف هشام وهو يسلم ع حسام ويقول له:امممم كده انا وحنين متكلمناش مع بعض وهي متعرفش عنى حاجة
حسام:لو عاوز تيحي بكرا او بعده تقعدوا مع بعض تتكلموا ..تشرف فى اي وقت
هشام:ماشى تمام.....ان شاء الله هاجى الساعة 8 بليل
حسام:ان شاء الله تنور
مر اليوم والسعادة تملا قلبيهما..ويدعوان الله فى كل وقت وكل صلاة ان يتم عليهم الافراح والسعادة
فى مساء اليوم التالى,فى غرفة الاستقبال
جلس هشام منتظرا حنين لتأتى ليتحدثا معا,وبعدها تدخل حنين وهى فى قمة احراجها
حسام:اقعدي يا حونى..بصوا اتكلموا براحتكم انا هقعد ساكت اعتبرونى مش موجود
هشام:متقولش كده انت منورنا....اعجب هشام بتلك العائلة المحافظة والملتزمة,وان حنين نشأت فى تلك العائلة
ثم يستأنف كلامه مع حنين,وظل حسام صامت,ا لايصدر اي صوت ,ويقوم بأنجاز بعض الامور المتعلقة بعمله فى هدوء تام
هشام:اولا انا عاوز اعرف رأيك بصراحة...انتى موافقة؟!
حنين محرجة:انا الحمد لله صليت استخارة ...وان شاء الله خير...وياريت انت كمان تصلي استخارة قبل ما نشترى الشبكة
هشام واعجب كثيرا بكلامها:ان شاء الله...وظلا يتحدثان فى الدراسة وطموحاتهم وايضا اشياء عن الماضى
هشام:تحبى فرحك يكون ازاي؟
حنين:اهم حاجة ان الفرح يكون اسلامى....مفيش اغانى ولا اختلاط.................
....يتبع
الحلقة العشرون
هشام:تحبى فرحك يكون ازاي؟
حنين:اهم حاجة ان الفرح يكون اسلامى....مفيش اغانى ولا اختلاط
هشام:اومال هنشغل ايه ؟!
حنين:اناشيد اسلامية...متعرفهاش؟؟!
هشام:اعرفها يعنى بحب اسمع لماهر زين وساعات حمزة نمرة وسامي يوسف دول اللى اعرفهم
حنين وقد زال حرجها قليلا فهى تحب الاناشيد كثير وتعشقها:فى كتير اناشيد ليهم ولغيرهم وكمان فى اناشيد افراح حلوة
هشام وقد تنفس الصعداء اذ كان يظن ان الفرح سيكون صامتا:ماشي ودول ألاقيهم فين؟؟
حنين: ع النت واللى يدور ميتهش
هشام:اللى يدور ميتهش... بقى كده...طيب انا هدور وهفجائك
حنين وتبتسم ابتسامة رقيقة فقد تحداها :ماشى
استأذن هشام للرحيل وقد كان مسرورا بحديثه مع حنين ومعجبا ايضا بأخوها حسام المتفهم فهولم يزعجهما ابدا فى حديثهما,واعتبره هشام اخ وصديق له
عند باب الشقة ودع حسام هشام:نورتنا والله ...بس ليه مصمم متتعشاش معانا؟
هشام:معلش بقى ..مرة تانية
حسام:ماشى ساعتها هقعدك بالعافية ..آه
هشام:ههه ماشى....آه كنت هنسى ده كرت دعوة لفرح عمر عمو قالى ادعيكم وتنورونا فى الفرح
حسام:الف مبروك وعقبالك ان شاء الله
هشام:يارب
حسام بمكر:انت مستعجل بقى!!
هشام باحراج:احم... لأ عادى
حسام وقد شعر بحرجه:هههه ولا مش عادى ده جواز يابنى ربنا يوفقكم
ويأتى يوم الخميس وتجتمع الاسرتان عند احد محلات الذهب ,ويختار هشام وحنين "الشبكة"الخاصة بها, ويعجب الجميع بها لرقتها وجمالها وذوقهم الراقى
جلال:معلش عملناها ع الديق عشان امتحانات العيال وكده
حسام:ولا يهمك يا د/جلال....احنا مقدرين وربنا يكون فى عنكم
يعود الجميع لمنازلهم ,ويذهب هشام بصحبة اسرة حنين ليوصلهم ,ويصعد معهم بعد الحاح حسام ليتناول العشاء معهم...
تمر الايام والجميع مشغول,فزياد ويمنى فى امتحاناتهم "الثانوية العامة" ,وكذلك عمر وشروق وحنين وهشام "امتحانات الجامعة"
انهى عمر امتحاناته ,وذهب يقدم اوراقه للتقدم لوظيفة مرشد سياحى ومترجم فى احدى المدن السياحية بالغردقة "حيث تدرب فيها سابقا...واتفق مع مالكها بأنه سيعمل عنده بعد انتهاء دراسته؛ حيث اعجب المالك بتفوقه وشخصيته المرحة"تم قبوله واستلم عمله بعد استلامه لشهادة تخرجه,, وبعد ان انهوا الامتحانات
يمنى:يااااااااااه ...اخيرا خلصنا يازيكو
زياد:آه الحمد لله
فايزة وسوسن:عقبال النتيجة يا ولاد
يمنى وزياد:يارب
فايزة:ياهشام.....ياعمر
هشام وعمر:نعمين
سوسن:ايه مش ناوين تنزلوا مع اخواتكم يشتروا لبس لفرح عمر؟
هشام:آه ..صحيح...طب يلا اجهزوا
عمر:وانا مالى هو انا كنت ولي امر الانسة يويو..هى صغيرة ما تنزل هي
يمنى:ومين قال انى عاوزة انزل معاك اساسا...انا هروح مع زيكو وهشام برقبتك
عمر:بتقولي ايه؟.......وانطلقت يمنى تجرى الى غرفتها خائفة من بطش اخوها
عمر:طب بالعند فيكي بقى هنزل معاكو
ينزل الجميع ليركبوا السيارة فجلس عمر بالمقعد الخلفى
هشام متسائلا:انت قعدت ورا ليه؟
عمر:كده مزاجى
هشام:مع انى مش مقتنع... بس براحتك,,,ويجلس زياد بجوار اخيه فى الامام
تنزل يمنى فترى اخوها فى المقعد الخلفى فتعلم انه بدأ فى استفزازها...ومنعها من الجلوس بجوار زياد
انتهوا من شراء الملابس, وعادوا وكانوا منهكين تماما؛ من كثرة السير بين المحلات,فى تلك الايام شغل هشام مع عمر فى تحضيرات الزفاف,وكانت زياراته لحنين شبه منعدمه,ولم تكن حنين تؤنبه فالامر مجرد خطبه
¤¤¤¤¤
فى منزل د/جلال
استيقظ كل من فى المنزل مبكرا ليستعدوا للفرح.....
عمر:ياماما فين الفطار خلينى الحق العيال...زمانهم تحت
سوسن:حاضر ياحبيبى خلاص أهو
عمر:يمنى....بت يا يويو....انتى فين؟
يمنى:ايوا ياعمور انا فى البلكونه....فذهب اليها
عمر:بصي يا يويو...عاوزك بقى تطلعى شقتى تنفذى اللى قولتك عليه..وتعملى أحلها شغل رومانسي ع ذوقك
يمنى :اكيد ياعمور ...من عنيا...بس كده هتأخر ع الكوافير
عمر:يعنى العروسه يااختى....متروحى فى اي وقت وبعدين لو حطيتى ميكياجك هنا... ماانتى بتعرفى ولا هي موضه وخلاص
سوسن:نعم ...يمنى اخت العريس ومتروحش الكوافير...ليه هى اقل من البنات اللى فى الفرح؟
عمر:ولا اقل ولا حاجة ياماما...انا الغلطان ...خليكي مدلعاها كده
سوسن:بنتى حبيبتى لازم تبقى احسن واحدة فى فرح اخوها
عمر:انا رايح افطر سلام
يمنى وبعد ان تركها عمر: هخلص بدري وأروح الكوافير هه ...وأخرجت لسانها
سوسن:هتخلصي ايه؟!
يمنى:ولا حاجة ياماما شوية طلبات بسيطة...وتركت امها وذهبت ؛فهى لا تريد اخبارها اذ تعلم أن امها لا تطيق أي شىء يتم من أجل الزوجة التى ستأخذ ابنها منها.
نزل عمر بعد ان انهى فطوره...ووقف ع السلم واخذ ينادى
عمر:ياهشااااااااام....يلا ياهيشو هنتأخر
هشام وهو يركض مسرعا ع السلم ومن خلفه زياد
هشام:حاضر ياابنى ...براحه ...وراك الديوان...اشحال مكنتش الحكاية عربيه
هتتزين وتحت بيتنا..
عمر:يلا بقى ياأخى...انا متوتر وخلاص
هشام:معزور...معلش ..هتتأهل
نزل ثلاثتهم للأسفل وامام محل المختار للسيارات وجدوا اصدقاء عمر ينتظروهم 3 شباب (محسن,خالد,جمال) سوف يساعدوهم فى تزين السيارة للعرس
عمر:منورين ياشباب عقبال ما نتعبلكم
محسن وخالد وجمال:بنورك يا عريس..ازيك ياهشام؟..اهلا يازيكو
هشام وزياد:الحمدلله بخير....اهلا
خالد:مبروك يا عمور ...خنتنا.....ومجتش حفلة العزوبية امبارح
جمال:ياابنى قلتلك تلاقيه عند زوجته المستقبلية وكلها يومين وينسانا
عمر:كنت مشغول والله....بقى كده ياجمي..وانا اللى بقول هتعزرونى ....خيبت ظنى فيك
هشام:دلوقتى بترغي ومش من شويه مصربعنى وكأن الفرح بدأ من غيرك
محسن:هو كده علطول ...استحمله ياهيشو انت الكبير
خالد :طب يلا نبدأ....عشان فى واحد كده هيتعصب ومش هنخلص منه
ضحكوا جميعا,وبدأوا فى تزين السيارة بأحلى الورود واللاصقات
¤¤¤¤¤
فى شقة عمر
كانت يمنى تقوم بترتيب جو رومانسي ,وتحدث سلمى ع الهاتف لتعرف منها ذوق شروق؛عن بعض الالوان المفضلة والاشكال...لتستطيع تنسيق المكان
يمنى:الاضاءة تمام....وفازات الشمع كويسه....ياسلومه هى شوشو بتحب مخدات ع الارض؟
سلمى:آه بتحب المخدات...لو ع شكل قلب هتبقى حلوة
يمنى:ايوا..ما انا جبتها ع شكل قلوب...الحمد لله...وفى مخده عليها صورة لعمر وشوشو فى الخطوبه
سلمى بفضول :بجد..انهى صورة؟؟!!
يمنى:صورة اما كان بيلبسها الدبلة
سلمى:آه دى جااااامدة..شوشو كانت طمطماية....ههههه حلوة
يمنى :اي خدعة
سلمى:انتى ملكيش حل...مكنتش اعرف انك رومانسية كده...يابخته
يمنى تتنهد:آآهه يابخته
سلمى:طب يلا بسرعة عشان نخلص ..لان فاضل ربع ساعة ع معاد الكوافير ولو اتأخرت شروق هتبهدلنى
يمنى:طيب آخر حاجة...احط ايه فى طبق الفاكهة؟ بتحب انهى فاكهة؟
سلمى:هي بتحب التفاح والموز والخوخ
يمنى:تمام...اممم جبت ورد ابيض واحمر وبنبى احطه فى الفازة ولا اعمل ايه؟؟
سلمى:لأ...حطيه فى اوضة النوم افرشيه ع السرير...ع شكل قلب واكتبى اول حرف من اسمائهم بالورد
يمنى:ماشي....بس ايه فرح القلوب اللى احنا بنعمله ده؟
سلمى:معلش هى بتحب القلوب اوي
يمنى:طيب...كده تمام....يلا سلام هروح اعمله وانزل
سلمى:سلام يا يويو....اشوفك فى الكوافير............