رواية عقدة نقص الفصل العاشر 10 والاخير بقلم شذى عبدالمكرم
عزام سافر بس كنا متواصلين وعلاقتنا كانت حلوة شديد رغم مشاكلنا وجوطتنا دي
__ سدين انا لو دخلت ليكي بالتلفون ما بتحصل خير
_ السماعة ما بتشيلك لكن
__ قايلاني بقرة زيك
_ ولا بسألك نهائي
__ ما بتقدري اصلا
_ عزام ما تستفزني
__ انا ما بستفزك انا بقول حقائق بس خليكي من دا كلو
_ اها
__ في حاجات حتستلميها من غسان
_ حاجات شنو؟
__ لمن تستلميها حتعرفي
_ تمام الشغل معاك كيف؟
__ والله متعب ياااخ
_ ربنا يعينك يا رب
__ آمين يا رب اها ما نفسك تجي تخففي عني شوية ، كنت رافضة فكرة السفر ما عاوزة اكون بعيدة من امي
_ امممم انت تعال
__ انا صعبة اني ارجع شغلي هنا
_ وانا شغالة هنا
__ بس يا نينا شغلك بفرق ممكن القى ليكي شغل هنا بس انا ما بقدر اكون نفسي هناك
_ اممممممم
__ خايفة من شنو؟
_ ممكن نحكي في الموضوع دا يوم تاني
__كل مرة بفتح الموضوع بتتهربي لمتين يا نينا نفضل في قصة الهروب دي ليه ما بتواجهيني دايما عشان نلقى حل لكل مشاكلنا
_ عزام
__ لمن تلقي نفسك جاهزة انك تواجهيني انا موجود ، وقفل الخط اتنهدت بتعب وعرفت انه زعلان مني مشيت لامي
سدين: امي عزام ما حيقدر يرجع قال انا اسافر ليه
امي: وانتي متوقعة شنو اكيد لو اتزوجتوا حتسافري ليه
سدين: انا ما دايرة امشي بعيد منك ، حضنتي عليها وانا بقيت ابكي وهي دموعها نزلت
امي: والله انا ذاتي ما دايراكي تمشي بعيد مني بس دي سنة الحياة والبت مع راجلها هسي انا اهلي في ولاية تانية والحياة خلتني اسافر بعيد منهم كانت صعبة بالنسبة لي بس اي بت حتمشي بعيد من اهلها يوما ما
سدين: لالا انا ما ماشة خلي يلقى ليه عروس تانية غيري ، جات خالتو اماني داخلة في اللحظة دي
خالتو: دا منو اليلقى ليه عروس تانية؟ ، اتخلعت وعاينت ليها بخجل شديد
خالتو: اوع يكون قصدك عزام ولدي ، امي بتضحك بس
امي: هي ما دايرة تسافر برا بعيد مني ومنك
خالتو: كفاية واحد سافر هسي حنفقد التاني ما بتجي دقيقة اتكلم معاه ، وطلعت تلفونها تتصل لعزام انا قربت اقول ليها ما تتصلي بس من الخجل ما قدرت هي اتصلت وسلمت عليه وبعدها فتحت الاستيكر قدامنا
خالتو: اسمعني يا عزام ما عندنا بنات للعرس
عزام: ما فهمت عليكي
خالتو: لو قال تسفر نينا ليك ما بنرضى يا تجي انت وتتزوجها هنا يا ماف بنات للزواج لانو لا هي راضية تسافر ولا نحنا راضيين تسفرها برا
عزام: تمام مدام هي ما راضية
خالتو: هسي نفهم شنو من ردك دا يعني
عزام: حتفهموا براحة ، وقفل الخط امي وخالتو ضحكوا وانا خوفت زيادة كدا عزام حيفكر اني اشكيته واني ختيته تحت الأمر الواقع خليتهم بيضحكوا وبتونسوا ودخلت غرفتي بفكر يا الله اعمل شنو اتصل حاليا ولا حيكون معصب بس كمان لو قعدت اكتر الموضوع حيجوط اكتر مسكت تلفوني واتصلت ليه رد لي
__ سدين انتي بالجد عاوزة تتزوجيني ولا الحاصل شنو؟
_ كيف يعني يا عزام دا كلام تقوله
__ نحنا من متين بنحكي مشاكلنا لاي زول انتي لو ما عاوزة تسافري بس قولي لي ما تدخلي امي في النص حصل انا جبرتك على حاجة؟
_ ما حصل يا عزام وحتى اني ما كلمتها والله كنت بحكي مع امي وهي سمعتنا
__ في النهاية حكيتي لامك واكيد حتكلمها كان تجي تواجهيني انا
_ انا اتكلمت مع امي لاني كنت خايفة ابعد عنها ودا سبب رفضي للسفر وكانت بتقول لي البت لازم تكون مع راجلها ودا سنة الحياة وبتنصحني
__ يعني خايفة انك تبعدي من امك؟
_ اكيد يا عزام وانت عارف علاقتي مع امي وما حصل بعدت منها يوم واحد وحياتي كلها متوقفة عليها فجأة اسافر لقارة تانية اكيد حأخاف
__ كان تحكي لي
_ ما قدرت يا عزام
__ كل مرة ما قدرت يا سدين لمتين حنفضل كدا بس بسبب انك ما قدرتي كنتي حتتزوجي وكنتي حتدمرينا التلاتة
_ انت كل مرة حتذكرني بالموضوع دا
__ ما بذكرك بس بحاول اوصل ليكي الفكرة فاهمة علي لو انا الحأبقى راجلك ما سمعت همومك وخوفك يبقى فائدتي شنو في حياتك
_ وجودك مهم يا عزام
__ ما شايف كدا والله
_ والله يا عزام ما تزعل
__ زعل وزعل بعمل تراكمات يا سدين
_ تاني وعد مني اواجهك بأي حاجة
__ وعد؟
_ وعد والله يا عزام
__ تمام نشوف هسي عندي شغل شغال فيه اخلص وبجيكي
_ متأكد انك ما ماشي عشان زعلان مني؟
__ انا لو زعلان منك بجيكي لو ملاحظة
_ ملاحظة
__ بس خلاص
_ تمام منتظراك ، قفلت منه وقاعدة متوترة وخايفة ان عزام يكون لسع زعلان لاني ما اعتذرت اصلا وهسي مشى ومتأكدة حيرجع بس حاسة بزعل شديد ما قدرت انتظر طوالي رجعت ليه
__ ايي يا سدين
_ ما قدرت
__ ما فهمت عليكي
_ حاسة انك لسع زعلان مني بس بتحاول تحسسني انك اتجاوزت بس انا قلبي ما بقدر بتحمل زعلك انا اسفة على كل الحصل زمان والحصل هسي وعارفة انك حتجيني راجع لانك عارف اني حأكون منتظراك بس عاوزة ترجع لي وانت قلبك صافي اتجاهي ومشتاق لي ما عشان قولت لي حأرجع واوع تنسى رغم الحصل والحيحصل نينا بتحبك والله وحأكون معاك دايما ، سكت مسافة وانا منتظرة انو يحكي
__ نينا
_ عيوني احكي
__ والله قبل ما تتصلي كدا زعلان بالجد بس بعد كلامك دا حاسي اني بحبك اكتر ، بقيت ابكي
__ خلاص ما تبكي موضوع وانتهى بس اخلص الشغل الفي ايدي دا ونرجع نحكي في موضوع السفر ونلقى حل وسط
_ تمام منتظراك
__ ما حأتاخر حبيبي انا ، هنا اتأكدت انه ما زعلان مني خلاص وقفلت بأرتياح ولمن رجع لي ما اتناقشنا في موضوع السفر نهائي فتح لي موضوع تاني واتونسنا بمزاج وقفلنا
اليوم التاني قابلت غسان واداني الامانة القالها عزام كانت شوكولاتات وعطور وحاجات كتيرة فرحت شديد بيها
غسان: مطلني من نص الدوام عشان امشي اجيبهم ، ضحكت ليه
سدين: معليش تعبتك معاي
غسان: المرة الجاية عليك الله استعملي عطر متوفر ما عطر نادر ذي دا
سدين: دقيقة اي عطر دا؟
غسان: .........
سدين: مستحيل طبعا ، وفتحت الكيس لقيته طبعا لو ما غسان جنبي كان صرخت من الفرحة
غسان: وانا اقول لعزام ما لقيته وهو بقول حتلقاهو فتش بس ، وضحكنا مع غسان
سدين: تاني ان شاءلله ما حيكون في مرة جاية
غسان: مع عزام ماف حاجة اسمها ماف مرة تانية ، ضحكنا وشكرته تاني ومشيت واتصلت لعزام شكرته كتير كتير على المفاجأة دي وانبسطت بيها شديد بالاخص العطر.
عدا اسبوع في يوم كنت تعبانة وعندي ألم في وسط البطن ما قدرت امشي الشغل راقدة بس اليوم كلو فجاة الالم بقى ماشي على جنبتي اليمنى والالم ماشي في زيادة وبقيت اتلوى وابكي وامي لمن خافت وخالتو اماني جات وضربوا لابوي لاني من الالم لمن اتشنجت وحرارتي ارتفعت شديد والخوف زاد عليهم
امي: ابوكي جاي اتحملي بتي
سدين: امي حأموت من الالم ، جات خالتو اماني قعدت جنبي وختت رأسي في حضنها وبتمسح لي في عرقي
خالتو: حرارتك مرتفعة بس اتحملي هسي حنمشي المستشفى ، فجأة شديت على رجلها
سدين: خالتو دايرة استفرغ " لا مؤاخذة " ، امي مشت تجيب جردل ما استحملت لحدي تجي عملتها في الارضية وتعبت زيادة والالم زايد ابوي جا وجرى بينا المستشفى الدكتور عمل كم حاجة كدا ولمن لمس اتجاهي اليمين صرخت
الدكتور: شاكي ان الزائدة ملتهبة لازم اعمل ليها فحص ، بالفعل طلع الزائذة وقالو عملية مستعجلة وطبعا انا خايفة شديد والدكتور طمني انها بالمنظار بس وكلها نص ساعة وبطلع ودخلوني العملية .........
__________
عزام حاول يتصل لسدين ما كانت داخلة تاني زمن الفطور برضو اتصل ما كانت في النت استغرب لانها اول ما تصحى بتلقى رسائله وبترد ليه وبتكلموا مكالمة حتى لو في الشغل بصبح عليها وبقفل بس ما دخلت حاول في تلفون امه برضو ما داخلة ما عرف يعمل شنو كان محتار شديد صحبه في الشغل لاحظ ليه
صاحبه: مالك؟
عزام: ما قادر اوصل لناس البيت ماف زول داخل
صاحبه: اعمل خدمة دولية واتصل ، عاين لصاحبه
عزام: بتعرفها؟
صاحبه: ايي جيب تلفونك بس نزل رصيد كافي
عزام: تمام ، ادى صاحبه التلفون وعمل الخدمة واتصل لسدين خمسة مرات بس ما كانت بترد ودا الخوفو اكتر فاتصل لامه بعد مسافة ردت
عزام: امي من قبيل بحاول في تلفوناتكم مالكم
امه: والله نحنا في المستشفى
عزام: مالكم العيان منو؟
امه: نينا ، اتخلع وللحظة خاف شديد
عزام: مالا نينا؟ عندها شنو هي جنبك اديني ليها
امه: في العمليات حاليا ، هنا حسا قلبه بقى في ايده
عزام: دي منو الفي العمليات؟ دقيقة دقيقة كيف في العمليات وامس كنت بتكلم معاها الحاصل عليها شنو
امه: كدا اهدى بالاول
عزام: امي انتي بتقولي نينا في العملية
امه: ايي عملية زائدة هاجت ليها ودخلوها عملية مستعجلة
عزام: تعبت شديد؟
امه: والله الصراحة تعبت شديد حالتها بتحنن شديد
عزام: دخلوها من متين؟
امه: عندها ربع ساعة كدا الدكتور قال بتأخد نص ساعة وبالمنظار يعني ما خطيرة شديد
عزام: امي عليك الله قاعدة تقولي الحقيقة؟
امه: والله ما تخاف حتكون كويسة ان شاءلله
عزام: ان شاءلله بس اول ما تتطلع من العمليات كلميني عليك الله ما تنسي
امه: تمام ، قفل منها ومسك رأسه وصاحبه كان متابع الحديث
صاحبه: دي منو الفي العمليات؟
عزام: خطيبتي ، مسح على ضهره
صاحبه: ربنا يقومها بالسلامة
عزام: ان شاءلله يا رب
صاحبه: امشي اخد هواء وانا بشتغل مكانك
عزام: شكرا ، هز ليه رأسه وطلع برا وهو متوتر شديد ومنتظر مكالمة من امه بس اتأخرت تلت ساعة بس ورجع ليها
عزام: امي انتي قولتي نص ساعة وحتطلع
امه: يا ولدي دي حاجة افتراضية يعني ما بالضبط بس يااهو طلعوها
عزام: صاحية؟
امه: ما عارفة دقيقة خليها يودوها الغرفة العادية وبرجع ليك ، قبل ما يرد قفلت الخط ومشت مع نينا الغرفة كانت شبه صاحية الدكتور قال فكوا التخدير تدريجيا بس حتصحى بعد نص ساعة رجعت لعزام وكلمته بالتفاصيل وقال ليها لمن تصحى تفتح النت حيتصل فيديو كول لازم يتأكد بنفسه انها كويسة ..........
___________
لمن طلعوني من العمليات حاسة راسي لافي وفي جفاف في حلقي ونعسانة بس صحيت وكنت مرتاحة ما زي قبل العملية كنت حأموت من الألم طمنت ناس امي اني كويسة فجأة خالتو اماني جابت لي التلفون
خالتو اماني: في زول عاوز يسلم عليكي ، مسكت التلفون كان عزام في الشاشة ابتسمت ليه
عزام: الف حمدلله على السلامة
سدين: الله يسلمك
عزام: كيفك هسي؟
سدين: احسن الحمدلله
عزام: متأكدة؟
سدين: عزام انا طالعة من عملية لو ناسي
عزام: والله خوفت عليكي شديد ، رفعت عيني عاينت لامي وخالتو كانوا مركزين معانا خجلت شديد لمن عاينت ليهم ضحكوا رجعت عاينت لعزام بخجل
عزام: مالك؟ ، قربت التلفون مني براحة وهمست ليه في التلفون
سدين: امي وامك مركزين معانا شديد ، ضحك شديد رفع صوته عشان يسمعوا
عزام: انتو الزول ما يخافوا على مرته ، هنا عزام زاد الطين بلا ودخلني في ضفوري وهم ضحكوا شديد
خالتو: لو عارفة يا سدين قبل ما تطلعي من العملية تعبني معاهو تعب بقول ليه نص ساعة وحيطلعوها كل رأس دقيقة يتصل لي اها لسع وانتي قولتي نص ساعة بس ، وضحكوا شديد وانا ضحكت بالراحة وعاينت ليه بحب واستغليت انشغال امي وخالتو اماني بالضحك قربت التلفون مني تاني
سدين: عزو نينا بتحبك
عزام: وانا بحبها
خرجوني في نفس اليوم لانها ما عملية كبيرة شديد وما فتحوا البطن بس فتحات صغيرة وبالمنظار يلا وعزام كان خايف كل ساعة يتصل لي وانا بطمنوا اني كويسة لحدي ما بقيت كويسة حتى استقر
جا اليوم الفتح لي موضوع العرس
__ نينا اها ما نحدد العرس خلاص؟
_ حتجي ولا اجي انا ، اتفاجأ مني لاني ختيت جيتي انا خيار
__ حتجيني؟
_ما هو انت ما حتجي معاهو انا امشي ليك
__ من متين بقينا فاهمين كدا؟
_ اسمعني ما جاية خلاص
__ لالا والله سكتا خلاص حأبدا ليك في الاجراءات حقك
_ تمام بس اتكلم مع ابوي اول
__ اتكلمت معاه اصلا وهو ما عندو مشكلة قال نحدد نحنا بس
_ اممممم يعني جاهز؟
__ باقي انتي تجهزي بس
_ ان شاءلله حأجهز يعني هسي حيسفروني ليك زي كرتونة الابري ، هنا فكا الضحكة
__ احلى كرتونة ابري والله
_ عزاااام
__ سكتا والله
حددنا العرس خلاص بس عرس من دون عريس كنت زعلانة في الحتة دي انو ما حأعمل كل المراسم زي باقي العرسان بس حأعمل الحنة والكرامة بس وحأسافر لراجلي وامي وخالتو كانوا واقفين جنبي بالاخص خالتو اماني كأنها من اهل العروس ما العريس نهائي لمن خلاص باقي اسبوع على المناسبة قاعدة في آمان مع البنات صحباتي وبنات اهلي تلفوني ضرب عاينت للرقم كان عزام والرقم سوداني قلبي عمل شح تاني اتذكرت لمن عملت العملية وهو اتصل معناها عمل خدمة دولية تانية
__ سديني
_ نعم
__ ما ملاحظة حاجة؟
_ بالنسبة؟
__ المكالمة
_ عارفة متصل لي عادي بالخدمة الدولية
__ متأكدة؟ ، وقفت بعد ما كنت قاعدة من الصدمة
_ عزام ما تلعب بمشاعري ، قام ضحك شديد
__ ما بلعب
_ احلف انك في السودان؟
__ والله في السودان ، فكيت الصرخة جااااااك لمن البنات اتخلعوا وجوني جاريين وبقيت ابكي وهم مستغربين فيني
_ نينا انتي معاي؟
__ عزام جيت عشاني؟
_ جيت عشان مرتي ما يرسلوها لي زي كرتونة الابري جيت اسوقها بنفسي ، ضحكت وسط دموعي
__ ما قادرة اصدق
_ جيت عشان نعمل عرسنا ذي كل الاعراس بكرة حنتي وانتي حتمشي مع سما بعد شوية حتحجزي زفافك
__ حنعمل زفة؟
_وجرتق كمان ، بقيت ابكي بفرحة
__ عزام ما قادرة اصدق
_ دي ابسط حاجة ممكن اقدمها ليكي
__ انت عارف حاجة
_ عارف انو نينا بتحبني وانا بحبها ، بكيت بفرحة وقفلت وانا طايرة من الفرحة وكلمت البنات وفرحوا شديد ولمن كلمت امي فرحت لي اكتر لانها حتشوف بتها الوحيدة بالزفاف وانا كنت مبسوطة اني حألبس زفاف لانها مرة في العمر وعزام ما حرمني من الحاجة دي وبالفعل جاتني سما ومشينا معاها واخترت زفاف عرسي بمزاج وحجزنا للميكب حق الزفاف بالمرة ورجعنا
عزام عمل حنته وانا عملت حنتي وعملنا الكرامة والعقد كان يوم الكرامة كانت فطور عقدوا قبل الفطور واتصل عزام بارك لي
عزام: من صغار ما كنا بنفترق لانك مكتوبة لي وهسي كتبت ملكيتي عليكي وما بفرقنا الا الموت وبعد عمر طويل ان شاءلله
سدين: ان شاءلله ، ما عرفت ارد هو اتكلم وانا ببكي بس لحدي ما قفلنا ومشيت اتجهزت ولبست زفاف وعملنا الحفلة وعملنا الجرتق وكان عرس سوداني مكتمل وبعدها طوالي سافرنا مع بعض ما رسلوني ليه
مرت السنين ما بقول كانت مثالية كانت فيها مشاكل عديدة بس كنا بنتجاوزاها مع بعض وكان عزام حنين علي لاني بعيدة من اهلي ما كان بنسى الحاجة، كان دايما الطرف المتنازل كالعادة وبسببه زواجنا كان ناجح جيبت منه بنوتين وذي ما كان بدعي لي انهم يأخدوا مني الشعر اخدوا مني الشعر القصار وعندي ولد بس دا طلع لابوه وطبعا للان عزام بسرح لي انا وبناتي
كنا قاعدين في الصالة منتظرين سيبال تجيب حاجات التسريح من الغرفة
عزام: ابدأ لمنو فيكم بالاول ابدأ من الكبير للصغير ولا العكس
سدين: ابدأ لي انا لانو وراي مطبخ
عزام: تعالي ، جيت وقعدت تحته وبدأ يسرح لي
عزام: مرات الشعر القصار ليه فائدة ساهل في التسريح ، ضحكنا كلنا بعدها اتكلم محمد ولدي
محمد: بابا في الschool البنات كلهم شعرهم ما شاءلله طوال الا بناتك بس
سدين: شايف ولدك متنمر زيك كيف ، محمد شايل كل صفات عزام
عزام: والله يا ولدي ما عارف طالعين لمنو ، قرصته في رجله شديد لمن نفض رجله
سدين: دا كلو بسبب دعاويك زمان ، قام يضحك
عزام: يعني ما طالعين ليكي؟
سدين: عزام ما تتنمر ياااخ
عزام: خلاص معليش
سيبال: بابا انا بعد ماما
عزام: حاضر عيوني ليكي يا حلوة انتي
سيلا: انا بعد سيبال
محمد: اكيد انتي بعد سيبال يا غبية
عزام: محمد الا وبناتي فاهم؟
سدين: محمد ما صح تتكلم مع اخواتك كدا انت المفروض سندهم والمفروض تدافع ليهم
سيبال: ماما لو شوفتي محمد موش بتتنمر في شعرنا؟
سدين: ايي
سيبال: كان في واحد بضحك فيني في ال school محمد أخد لي حقي ، رفعت رأسي وعاينت لعزام وابتسمت وهو ابتسم لي لانو اتذكرنا طفولتنا وبعدها عزام خلص لي شعري وقومت وسرح لبناته وكنا مبسوطين شديد ..........
"حين تُحب، خُذ القلب كله بلُطفه وقسوته، بثباته وخوفه، بنوره وظلامِه، بلحظات صفاه وضعفِه، أو دعهُ كريمًا في مكانه".♥
♥النهاية♥
كسرة
في ناس كتيرة بتحس بالنقص مثلا حتة الشعر وناس حتة اللون وناس حتة الجسم بس دي كلها ميزات من ربنا والبحبك بتقبلك ذي ما انت ما لازم تغير من روحك عشان زول لانك لو ما حبيت نفسك ذي ما هي ماف زول حيحبك وذي ما بقول المثل " الما دايرك اغبش ما تتمسح ليه " وبس يعني ماف زول كامل لانه الكامل لله وحده لكن البحبك حيحب عيوبك قبل مميزاتك