رواية باائعة الحطب
الفصل العاشر10
بقلم دانيا
بعد ولادة اخوكي كمال قبل خمسه سنه ظهرو بعض الأشخاص وهي من شافتهم خافت واتوترت....قعدت اتكلمت معاهم مسافه طويله كم ساعه وانا كنت محتار ديل منو وعاوزين شنو وبتعرفهم من وين على اساس م عندها اهل؟ جاتني كنت قاعد في ظل الشجرة وافكاري مشتته ومحتار ،، عاينت ليها وقبل انطق بحرف قالت لي في حاجات انت م عارفها وجاء الوقت عشان تعرفها قمت على حيلي وقلت ليها قصدك شنو؟ قالت لي الصراحه يا زين انا جيت عالمكم لأني بحبكم شديد بحب الإنس وكان حلمي الوحيد اتعرف عليهم عن قرب واعيش معاهم.
اتصدمت من طريقة كلامها وبقيت اعاين ليها في استغراب شديد...قلت ليها قصدك شنو بكلمة إنس ؟ قالت لي صراحه انا م بنتمي للإنس انا من الجن بس عمري م ازيت بشر ولااا بفكر ،، من قالت كدا حسيت كأنو خناجر اتغرست في قلبي قلت انا كنت عايش السنين دي مع منو؟! قالت لي عشت معاكم احلى سنين بس هسي ديل اهلي جو عشان يأخذوني معاهم....حاولت اقنعهم انو انا دي حياتي وديل اولادي م بقدر اتخلى عنهم وعنك بس هددوني بيكم وقالوا لي لو عاوزة سلامتهم وحياتهم تمشي معانا ، وانا هسي مجبورة امشي .
اولادي في امانتك وح اراقبكم من بعيد وم ح اتخلى عنكم ،، انتبه على نفسك وعليهم ودعتني وفجأة اختفت هي واهلها....بس هي رغم كل شيء م خلتكم ودائما كانت تجي تزوركم بس انتوا م بتشوفوها انا بس البحس بوجودها لكن آخر مرة جات امس وقالت تاني م بتقدر تجي لأنو اهلها م رضو ليها تجي وهددوها بيكم مرة تانيه ،، وبالنسبه للقوة الجاتك وخلتك تضربي الراحل رغم انو اكبر منك ، دي جينات من امك اتورثت ليكي ودي الحاجه الكنت خايف منها انا انا م كنت عاوز حاجه زي دي تحصل لأنو اهل المنطقه لو عرفو بالحاجه دي م ح يسيبونا في حالنا.
سمعت كلامه دا كله وانا مصدومه وم قادرة استوعب ،، حسيت راسي تقيل من شده الصدمه ،، جاء قعد جنبي وقال لي يابتي اوعديني تخلي الموضوع سر بينا واوعديني ما تستخدمي القوة دي مرة تانيه لو مهما حصل....بقيت اعاين ليهو وبحاول استوعب هو بقول في شنو ، قلت ليهو امي مشت وخلتنا صغار وم فكرت فينا وبقيت ابكي قلت ليهو الوقت دا كله نحن فاكرين امي ماتت وفي النهايه تطلع واحدة من الجن ؟! قال لي هي مشت لمصلحتكم عاينت ليهو وقلت ليهو بوعدك م ح استخدم القوة وم ح احكي لزول حاجه وقمت دخلت جوا.
بعد مرور سبعه سنه ابوي بقى مُقعد م بقدر يمشي بسبب المرض ،، انا بقيت امشي اقطع الحطب من الغابه براي وبجيبو وبوديهو السوق ببيعو ، عملت لي دكان في السوق لبيع الحطب ...بمشي الغابه بعاين بكل الإتجاهات لمن م اشوف زول بستخدم القوه لتقطيع الشجر ،، الكل في السوق كانوا مبهورين من طريقة تقطيع الحطب كيف بت بتقدر تقطع الشجر بالطريقه دي؟! طبعا ما انا بقى عمري 18 سنه بس حتى لو كبرت في نظرهم في النهايه بت م ح تقدر تقطع الحطب.
كنت بقفل في الدكان كان الوقت عصر جاني كمال الكان عمرو 12 سنه اخوي القمر كبر وبقى احلى شاب ، مشى المدرسه وغشاني في السوق قفلنا الدكان ومرينا في السوق اشترينا حاجات للبيت....اثناء ما نحن ماشين في نص السوق في ناس كانوا قاعدين قدام دكان وبتونسو في واحد قال ليهم شوفو الجمال الجاي بجنبنا دا ،، انتوا م ملاحظين بت زين الدين دي كل ما تكبر كل ما بتبقى احلى ، حلوه بطريقة كدا م عاديه رايكم شنو انا عاوز اخطبها لولدي ماهر ، بقوا يضحكوا قالوا ليهو ولدك متين قام من نومو عشان تعرس ليهو ولدك الخميل دا ،، اثناء ما بتكلمو كمال رجع ليهم.
انا كنت ماشه وبعاين للحاجات م انتبهت غير سمعت اصوات الناس ، اتلفتت م لقيت كمال عابنت ورا مكان الناس قاعدين لقيت كمال مثبت الراجل في الحيطه ، جمدت في مكاني