رواية خطايا واجتثات الفصل السابع والأربعون 47 بقلم نور علي البصري
لا أكدر أعوفك
ولا أضل وياك
لا أنت لعفتني
ولا رضيت أنساك
ماريدك و أريدك
حرت و أحتاريت
لعفتني ولبقيت
أثنينهن بلوه
ــــــــــــــــــــᥫ᭡ــــــــــــــــــــــــــ
مــــــــــــ♡ــــــــــــــريم
العصفور الصغير يريد نطير آني وياه بس هذا رجل القط بزون يا ميو غول البزازين.. صاير كولش نحس ما يقبل نطلع آني وياسر.. عصفوري المدلل
و جابلي لعابة و كعد يركب براسها الي مرصته جان من يحجي كلامه ما مفهوم بس آني أفهم عصفوري.
_ مامي ركبيت راسه (رطين أطفال)
_ هذا طير مذبوح أسمه مثلك ياسر ويشبهك.
ما أعرف.. أحس ومضة ضوة بعقلي
فركت عيوني جانت گونية ما أعرف الصبغ البيها شنو و حذاء بيدي وآني واكفة بباب بيت كبير بس فجأة إجه طائر الوطواط باك من عندي الومضة اللي بعقلي ورجعت للظلام ظليت أنش بيدي وطاويط الظلام وآني أباوع للسدرة اللي بالحديقة شفتها تتحرك تمد أغصانها وتريد تبلع ياسر.. اللي عنده راس عصفور الفنجس أبو شعر الذهب الطويل لزمت المشط وبديت أمشط عشه الذهبي و أخليله تكاكة وشعره جان نازل للكتف.
صاح : آي شعري.
_ أش ولك عصفوري خليني أشد الريش حيل حتى نطلع برى ونطير شلون كل مرة نغافل غول القطط وأمك الغولة وجدان.. ونطير ونركض ونلعب ونشمر حجار على بيبان بيوت الوطاويط.
_ يلة نطير.
باوعلي بعيونه وتلفت للصف وبيده أشر:
_ بابا هناك.
لزمت إيده وآني أمشي على أطراف أصابيعي.. ويسوري عصفوري يقلدني بالمشية الطارمة جانت حارة تغلي مثل التنور بس آني ما حاسة بحرارتها جان كل همي عصفوري ياسر.. الواكف بجماله بشعره الأشقر الذهبي المربوط لورى ذيل حصان كلما غول القطط يريد يقص ريش العش اللي براسه أنتفض بوجهه وأثور فيسكت و يعوف ريشات عصفوري طويلة وما يمسها الغول عـون جان ملتهي يعلم جهال الوطاويط اللي مأذيني و من يجون أهلهم وطاويط الكبيرة يستلموهم من بيت الغول القططي يكولون لأهلهم يأشرون علية شوفوها هاي مسودنة و أوقات حتى حجار يضربوني سمعت صوته.. القط الغول يجي من ورة باب الصف الخصوصي اللي بانيه بالطرف الثاني مالت الحوش يدرس طلابه أستغليت رنة صوت عـون.. ويه الطلاب لزمت إيد ياسر وهمست إله:
_ يلة عصفوري.. نمشي على أطراف أصابيعنا حتى غول القطط ما يسمعنا.
ياسر قلدني و بدينا نخطو لحد ما وصلنا لباب الحوش فتحتها على كيف وعبرنا للشارع.. الشارع جان ميت ظهرية وهدوء والناس كولها ساكتة وخاتلة ببيوتها من حر الجنوب رغم شتا ومحد برة.
_ يلة نطير قبل لا تطلع الغولة وجدان
ظلينا نركض بالشارع.
_ ياسر العصفور ومريم الغيمة يلة نذب حالوب ببيبان الغول وأنت يا عصفور تعال أنكر بيبان الوطاويط نفتر بالشارع ندك بيبان و نشرد.
وكفت مصفنه يم باب أزرق بي خط فضي جان ياسر يضحك وهو يدك بيبان ونشرد برطين الأطفال:
_ يلة غيمة نشرد راح يطلع الغول عمو أبو حاتم ويكتلنا ليش واكفة.
بس بقيت صافنة بالباب وآني أشوف الباب أنشق وبرز منه طفلة بشعر ذهبي صفحة مضفورة والثانية محلولة وتركض.
_ لا ما تمشطيلي أريد العب بالشارع.
طلعت الطفلة من الباب الأزرق وظلت بوكاحة تدك بيبان وتشرد صوت غارة والعالم تتراكض للملجأ وأم الطفلة أي هاي نفس الجانت عدنا أسمها أم كرعة وشعر طويل بس العدنة كبيرة أكبر من أم مـريم.. وطارت بعيد وبعد ما شفتها حيل مشتاقتلها.
لزمت الطفلة: يلة بساع غارة أبوج جاي ورانه ألتفتت الطفلة وهي تأشر بيدينها الناعمات.
_ تعال نشرد بالملجأ.
راحت الطفلة هي وأمها وأبوها بالملجأ الأب يشبه ذاك أبو صنديحة اللي أكرهه بس الأب عندة شعر مو صناديح تلمع.
الأب : جبتي الفلوس والذهب كولشي يصير.
_ نسيت.
_ أروح أجيبهم غطي البت بهاي بطانية الجو برد.
_ لا حبيبي لا تروح بنص القصف يولن فدوة.
بس هو طلع وهو يبتسم:
_ راجع ما أتأخر.
بس راح وما رجع بعد.
جرني ياسر.. العصفور.
_ يلة..
هاي الثواني خلتني أعرف مـريم الطفلة هي نفسها وصال الكبيرة صوت القصف والصاروخ اللي وكع ببيتنا و أستشهاد أبوي وعدد من أفراد عائلتنا كل هذا أنحفر بذاكرة أنمحت لسنين وهسة رجع يمر مثل شريط سينما كدامي شفت الفاتحة وأمي اللي طردوها عمامي وجدي طردوها وما سألوا ببنتهم مريم.
لهنا ورجع العقل سد بيبانه وأنقفل عن كل وعي ورجع بهذيان يعبر عن بواطنه من ألم ومعاناة ووجع هزيت راسي بتوتر وآني أهذي :
_ باب بيت هذي الطفلة جان يشبه هذا الباب وهذي الطفلة جان أسمها مـريم.. ومـريم.. هي آني محد طلع من الباب الأزرق فرجعنا نلعب آني وياسر يعني مـريم وياسر التفتت أريد أركض و أبتعدت وهو وراي يفحط.
_ ليش عفيتيني..
بس فجأة.. شفت.. مرة من ورى الركن طلعت لياسر.. لافة روحها بعباية عبالك شفتها بعقلي.. تشبه وطواط طالع بنص الظهر ما حسيت إلا وهي تملخ إيد ياسر وتسحبه بقوة ياسر.. أخترع و صرخ صرخة فززت الشارع:
_ ماما !
المرة جانت قوية و مفرعنة رادت تشيله وتبوكه بس من شافتني ركضت بكل سرعتي هجمت عليها صرت أشامرها بحجار وآني أصرخ وأرافسها مثل المخبولة أجر بياسر وهي تجره و تغلط علية وتفشر فجأة جرت من جوة عبايتها سجينة تلمع بضوة الشمس وجهتها بعيني وصاحت بصوت مكروه:
_ يا مخبلة! وخري لا أذبحج وأذبحه وياج أدري بيج فاقدة وما عليج عتب!متابعتج من زمان هذا الطفل أخذه
وأبيعه.
شافت عيني السجين بس ما خفت على روحي خفت على عصفوري المرأة جرت ياسر.. و حطت السجينة على ركبته الناعمة تريد تنهي الموضوع و تترس الشارع بدمه بلمحة بصر وبدون وعي هجمت عليها وعضيتها من إيدها الحاضنة السجينة عضة مال ذيب بكل حرگة گلبي المرأة صرخت صرخة قوية و فلتت السجينة من إيدها و بنفس اللحظة دفعتها حيل وكع ياسر بصف الحايط وصرت آني فوكاه أحميه بجسمي وأصرخ بأعلى صوتي:
_ عووووون! الحكنيييي يا عوووون! غول الوطاويط راح ياكل عصفوري!
بس رفستني و جرت ياسر.. شفت دم منه يكطر موتت أبني كتلته صرخت لاااااا.. ياااااسر لاااااا..
صياحي والخوف مالتي ترس المنطقة وهز البيت هز لحظات.. و أنفتحت باب الصف الخصوصي حيل و طلع عـون.. يركض مثل المجنون و عايف الطلاب وراه بالصف والجهال كولهم حشروا جهرهم بالباب يباوعون على عياطي بدت بيوت الجوارين تنفتح باب ورا باب وطلعت الزلم بالدشاديش والهدوم الخفيفة مالت البيت.
المرأة من شافت الشارع فز وعون.. ركض عليها صرخت وركضت لراس الشارع و جانت أكو سيارة مجهولة تنتظرها آني بقيت منططة عيوني الكونية راس عصفوري الدم والراس الثاني.. منو؟ شنو؟ الفلوس الأنباكت و نوري اليضرب بية ونصير.. جاب مرة علية وخلفت جنات و حادث موت أم جنات وجدي وباقي ناسي كلهن مرن بسرعة البرق بذاكرة مبعثرة كوة تلملم مواضيعها وكوة تفرزن.
فجأة صارت ظلمة وأحس بألم هطرتي على الأسفلت الحار وراها غبت للمجهول
عــــــــــــــــــــــــــــون
بكل قوتي أركض وأبني يصرخ وأعتقد راسه مفتوح ما أعرف شلون بس دم طلع جيرانه اللي بركن الشارع وتلكاها وبأيده مسدس رمى بالهوه هي من الرعب شمرت الطفل من إيدها ورادت تفلت للسيارة اللي تنتظرها راحت بصورة ميلان عن أبو راضي جيراني بس السيارة المجهولة عافوها وشردوا لزموها أهل المنطقة وآني شلت ياسر.. أگلب بي و أحضن وأشمه بس سمعت صوت وراي صاح:
_ المرأة تخربطت.
درت وجهي لكيت مـريم.. متكومة بالشارع بدون حجاب وشعرها مطاير بكل مكان ومخربط إحنا بمنطقتنا بيها منتسبين أثنين جوارينا واحد منهم أبو راضي الشرطي والثاني ضابط لزموها و أخذوها سلموها للمركز ولكيت وجدان.. تدك وتلطم:
_ يما زين ما أنباك وليدي ولك عـون.. شلون طلعت بالولد غير تقفل الباب.
أخذت الطفل مني و هي تشم بي وهو يبجي وولدي البقية بعمر مراهق وهم ما بينهم فرق هواي كل ولد عن الثاني فرق سنة.
_ بابا ياسر.. راسه يصب دم.
_ إي بابا الظاهر واكع عليه.
أحجي و نزعت قميصي لفيت راسه أبني وگلت لوجدان أخذيه لزمت الولد وآني سندت مريم أصحيها بس فتحت عيونها الكبار بوسعهم و متحجي بس ترجف تتلفت وهي بأنهيار تام صحت لأبني البكر.
_ باهر.. وليدي خابر أهالي الطلاب يجون عليهم.
أخذت مريم.. وياسر.. وتبعتني وجدان شايلته بحضنها وهو رغم الإصابة جان يرطن ويسولف هواي يبچي ويصيح:
_ الوطواطة دفعتني شوفي واوا.
جان يصرخ ويبچي وصوته وترني كولش.
_ كافي بابا ولك بيا حال و دسولف هذا شيرطن مو كل كلامه مفهوم.
ترجمتلي وجدان كلامه وهي حاضنته لصدرها تشم بي و ضاغطة على راسه هذا الصغير يحب الإهتمام ومدلل و أثنينهن خوش مدللاته صاح ياسر.. وصوته مخنوك:
ـــ مليومة.. تعاي شيليني ولج وجدان راسي لا حيل.
ظل يوخرها وهو حرك هواي وبيديه يدفعها صاحت بي وجدان:
_ ماماتي.. دوكف غير حتى أوقف النزف أگولك عيني عـون أعتقد الجرح سطحي و النزف متوقف ألمن أضغط على راسه خطية.
_ ما أعرف يجوز جلد فروة الشعر أنخدش وميحتاج خياط بس عبالك مضروب بموس!
ورجع أبني يسمي أمهاته بأسمائهن:
_ ولج سوصة راسي وينج.
ويبجي ويريد يشمر روحه:
_ كول ماما عيب وسوصة.
ــ شنو ماما مـريم.. مريضة.
يقصد وصال.. يلفظة وسال ويدلعه سوصة.. أخذتهم للمستشفى ياسر خيطو راسه وكل شوي يشاهك من البجي يحضن وجدان وهو من نوع لبق لسانه رغم ما يلفظ أحرف بس يسولف هواي ويعرف يحجي تقريباً
_ ماما وجدان.. مرة ذيج وطواط مليومة طكتها هيج ها أها عوفي ياسر وطك طك شوفي راسي يعور.
_ وجدان بنجوه موضعي ولا داخ ونعس بس يسولف سكتيه خلي ينام.ابو مليومة.
وجدان : الله لا ينطيها البواكه همزين لزموها شرطة.
شوي وسألتني :
_ عـون.. شخبار مـريم.. التهيت بياسر وما كدرت أروح أشوفها.
_ شرحت وضعها للطبيب وسألني إذا من فترة نلاحظ تحسن بكلامها تسلسل الكلام رغم الهذيان كتله إي و تذكر مواقف بس ما تعرف لشنو ومنو من فترة حسينا وضعها يتحسن فكال توقع لعد صدمتها و الهبطة راد أبنها ينخطف حافز قوي ترجع لوعيها والإدراك خاصة هي حسب ما تفضلت وكتلي خسرت إدراكها بسبب حادث قتل أبنها.
مــــــــــــــــــــــــــــريم
جان زلزال كاعد يصير بداخل راسي.. الصرخة.. السجينة.. الشمس الحارقة.. والدم اللي جان ممكن يسيل من ركبة ياسر.. كولها أشتغلت مثل الصاعقة اللي ضربت يافوخي الظلام بعقلي أنشك وطاويط الظلام طارت واختفت و العصافير ردت لعشوشها والغيلان رجعت بنص البشر بنص الألم والوجع.
ومضة الضوة هذيج هالمرة ما باكوها فركت عيوني حيل و الكونية مالت الخيش اللي جانت ريحتها تارسة خشمي صبغ ومواد غريبة تذكرت آني جنت واكفة بباب بيت كبير الفجر والدم يطلع من جوة الخيشة ويوصل لحذائي اللي بجرته بإيدي من فتحت حلك الخيشة بذاك اليوم المشؤوم ما جانت أكو لعبة مقطوعة راس ولا راس العاب مصبوغة بصبغ أحمر جان بشر أبني وزوجي.. جان أكو راس نصير رجلي عيونه المغسولة بالموت تباوع علية وبصفه وبنفس الخيشة جان أكو جثة أبني الصغير أبن نصير مذبوحين ومتروكين مثل الغنم بباب البيت
الصورة رجعت كاملة ملامحها حادة وتجرح مثل السجينة.
وسط زحام الممرضات.. و هوسة الطوارئ والسيروم اللي معلك وهو يرخي تشنج عقلي قبل جسمي دخل عـون.. أسوأ كوابيسي جان شايل طفل ركزت بي عبالي الذبيح ياسر أبني بس لا هذا جان مدري شلون مختلف هذا مملي صحة ومو مريض ذاك دومه مريض بديت أركز بالزايد لزمتني الصدمة إجت صور إلي وآني بوضع مخزي أحچي حچي مموزون وأصيح وأريد عصافير شنووو شنوو آخ راسي كون أنام نعست بس هذا شيريد جاي.
لا يا الله.. بديت أستوعب السنين و حياتي وي عـون.. جهالي وسعت عيني بصدمة.. أستغلني أبو العرك أستغل مرضي و تعمد أخلف حتى يورطني وياه فكيت حلگي ردت أهجم عليه بس النعاس جان أقوى غمضت عيني ونمت ما أعرف شگد وقت مر ساعتين أكثر فزيت لكيت عـون واگف بس والطفل مختفي.. دنك مبتسم لوجهي وباس راسي.
_ كعدت وصالي.
باوعت لعون و الوعي رجع يضرب بضلوعي مثل الخناجر وعرفت آني وين ومنو وشنو المأساة اللي خلتني أعيش وية العصافير والقطط والغيلان طول هالفترة كل الكدرت أهمس:
_ ولك.. ولك.. ولك.. شنو شنو سويت بحياتي أبني ياسر.. وينه.
_ أخذته وجدان.. للبيت يرتاح..
جاوبني.. بنتر وهو يحاول يعرف رجعت لعقلي لو بعدني المغفلة اللي خوش خلف منها وهو مستغل مرضها
باوعت بوجهه وكل كره الدنيا بگلبي:
ــ أنت واحد نذل وقاتل ومجرم وما أسامحك أنت قتلت رجلي وأبني.
رد علية وهو يبتسم بصفاقة:
_ ردت مـريم.. الحمد لله على السلامة.
صحت بي وأني أرجف:
_ ولك أنت شسويت؟!
رجع جاوبني بضحكة مستفزة يتعمد يغثني بيها ويكسرني:
_ شسويت؟!
_ أنت واحد نذل وقاتل ومجرم وما أسامحك قتلت رجلي وأبني أستغليتني مو؟بس لحظة أستوعب وين أمي؟!
صفن وغصيت بالألم وهو دنك:
ــ قبل ثلاث سنين توفت وآني ما أستغفلتج آني حميتج ولا قتلت رجلج.
_ أنت أكيد منو غيرك دوم تهدد.
_ أهوو ترى تردين حجج علية لو ظالة على التحديث القديم أحسن.
_ شنو قصدك تريد أضل مريضة ويحلالك تغتصبني.
_ وي وي منو يغتصب منو لا عيوني هنا حدج أنتِ تجين نلعب غيمة عصافير.
كعدت و إيدي على صدري بصدمة:
_ آني.
_ إي نعم.
_ أنت واحد واحد حقير وبلا ذمة وضمير.
عــــــــــــــــــــــــــــون
مر هذا اليوم و طلعت مـريم.. للبيت كلت أكيد مصدومة أو مو من گلبها هالكلام بس ظلت تسوي مشاكل هواي و تتعمد تبعد الجهال عن وجدان وهمه متعلقين بيها وصل بيها بيوم رجعت من دوامي من المدرسة لكيت وجدان تبجي..
_ شبيج؟
_ أخذت جهالي كولهم وكالت راجعة لبيتي.
_ الخبلة شنو هيته.
_ لا وين خبلة مضطربة هسة صارت خبلة يا عـون.
هزيت إيدي وطلعت وصلت لبيتها لكيتها جايبة عامل يكسر الباب لأن المفتاح من سنين حتى ما أدري بي.
_ وصال.
رفعت حاجب وكالتلي :
_ مـريم إي مـريم المغفلة ولك شلون أسامحك وأنت سبب دمار عائلتي أبني راح مني وهسة أريد أبقى آني وجهالي حتى ما تبيعهم أنت أنسان بلا ذمة وضمير قاتل.
_ كافي منا الجهال.
_ إي خلي يعرفون أبوهم أبو العرك..
تقربت تشمني وكالت:
_ ويع ريحة البيرة والعرك من حلكك تفوح.
_ أقسم بالله مو صاحية ومخبلة ولج من سنين تبت ومنا الجهال.. عيب ترى تهزين صورتي كدامهم!
_ رجعة ما أرجع وأگابل مرتك شلون عصابة أنت وياها أخلفلكم بسيطة.. إلا آخذهم جهالي و بكيفي وأنتم فنة اللي يحوس ويگول لا.
ظلو ساكتين متعجب يطيعونها وهم عرفوها أم مجنونة:
_ مستحيل تسكنين ببيت نـصير.. و ماخذة جهالي يلة ولكم يلة للبيت.. لا هسة أجرم بيكم.
آني كلت هيج وهدت علية:
_ فنك.
تعجبت بس طخت بعقلي أكيد مترجع لعقلها بصورة تامة.. والله هالمخبلة دولبتني أنتبهت لنفسي صرت أسميها مخبلة من وعت.. بس أولادي طاعوني وصعدوا للسيارة بقيت بسيارتي أنتظر تجي ردت بس أخوفها بإنو راح آخذ الجهال منها شغلت المحرك وهي بساع ركبت السيارة و نزلت صعدت جنط الملابس وراها ورجعت صعدت وسقت بهدوء.
_ آني هم ما أكدر أعيش ببيت ذبحتم أبني بي راح أبيعة و أخذلي بيت الم جهالي وأنت َ الله وياك.
أسوق ساكت.. و أگول بگلبي والله لو ظالة مخبلة ولا هالعقل نايم بي مطي و مو إي مطي ومتربع بعقلها حشا السامع آني وخطف أبنها ورجلها شكو وليش أذبحهم هاي من كل عقلها تتهمني أباوع لوجهي بالمراية وشعري المتناثر شيب الأربعينات هسة لو ما كبرنا والله زحمة آني بالأربعينات وهي بنهايات الثلاثينات كضت أغلب شبابها تهذي شوي وسكتت بس رجعت النوب تهذي بكلام ما مفهوم هنا عرفت مـريم حتبقى خيط وخيط وعالعلاجات وحتى لو رجع عقلها لذا ما راح ترجع طبيعية ولازم أسايرها شسوي لعد.
_ إذا مصرة الج بيت مجمع مبلغ والله ردت أسوي بي عملية للمسكينة تسترد ولو جزء من وجهها بس هسة راح أشتري بي بيت بس الجهال ترى إجو وياج أعتقد وجدان خلتهم يرافقوج لأن معلمتهم ما يعقوج كأم و ربتهم أحسن تربية ما تخرب تربيتها لخاطر نزوة خبالاتچ الجديدة.
_ لا عيني شسوي بفلوسك خليهن لمرتك عشتو آني أصلاً حتى أملاك نـصير.. حرجعهن لأهله ما أريد شي منكم أشتغل وأدفع إيجار بيتي.
_ مال أغلط غلطة هسة أشك سكف السيارة بيها أسكت آحسن.
مــــــــــــــــــــــــــــريم
أوي شنهاي عود صاير عصبي بس ما
جادلته بس خلي نوصل وآني إلهم بس وصلنا نزلت بساع ولكيت وجدان بالباب كاعدة ومتنكبة بشالها تبجي وتنوح.
يا دهر كافي عتب.. رويحتي مابيها حيل
ردت بس ريحة ضنا.. يضوي دربي بهالليل
شبت ناري بوسط الحشا.. والگلب صار له ويل
عاگر وتنوح.. وتنتظر مگسومها بدمعة!
بس شافتنا هبت وكفت فتحت إيديها وأولادي الخونة شلون طائر طيور مرفرفة لأحضانها فتحت وجدان.. أيديها وهي تنشغ وتشهك.
_ ولكم يمة يا يمة رديتم يبعد حيلي ورباي يا سهر ليلي ويا ضنا حضني.
تشبك بيهم وهم يحضنوها يبجون
شبت نار الغيرة وخرتهم وكلتلها:
_ ترى ذول جهالي و أستغفلتوني و أستغليتوا مرضي حتى يصيرون بس هم يبقون إلي أوكي.
سكتت ما جاوبتني وهاي مو عوايدها كلتلهم :
_ فوتوا يمة للبيت يلة.
التفتت علية وجدان وحجت :
_ شوفي مرايم.. هذا واقع تعاندين الله أكيد لا هذا قدرج أحمدي الله حبيبة حمدي لو ما عـون.. جان أنتِ هسة بالشوارع أمچ الله يرحمها جانت مرة مريضة و جان أنتِ هسة يجوز حتى خاطفيچ وبايعيچ أعضاء ربج وفرلج اللي يحميج يمكن لو ما آني عاقر فلا أقبل يعرس علية كل هذا تدابير رب العالمين وحكمته.
_ أكولج ما أطيقكم.
صوت عـون.. وراي وهو يقلد صوتي:
_ ما أطيقكم ترللي ههههههه.
و راد يفوت يدخل وكال بحزم:
_ كدامي للبيت يلة لازم عاجبجن وكفة الشوارع.
هنا وجدان كلتله تبسمره مدري شنو.
_ لا تكول ترللي كول مضطربة نفسيًا.
ضحك ودخل وهو يدردم:
_ هاي قبل بس هسة لا ترللي بعد.
رديت بقهر :
_ خبيث دومك نحيس يا ابو العرك.
ضربت وجدان صدرها:
_ يا طايحة حظ.
كلتلها : لا تدخلين بينا رجاءًا وهذا هم سبب ما أريد أبقى وياج أريد بيت الي وافاركم.
لليل إجت وجدان :
_ تردين بيت صار.. أنتِ أخذي هذا البيت هو لرجلج وآني عندي بيت أبوي كاتبة بإسمي بس تدرين أنتِ جبانة أنتِ تهربين متردين تشوفينه يفوتلي بليلتي تموتين قهر أنتِ من جنتي مخبلة وشلعتي گلبي متقبلين يجيني آني أشجع منج لأن عاشرتج و بيدي زفيته الج هة تستنكف المسودنه تعيش وياي.
_ طبعًا أستنكف لأن أستغفلتوني.
حسيت صداع براسي وهم ذكريات مخبوطة بين فترة جنوني وبين الماضي دخت ردت أوكع لزمتني.
_ كللوووش أكيد حامل بالسادس.
وخرتها : وهذا هم سبب أعوفج أنتِ بالذات لأن خلقتي مني رحم الج مفرخة بكيفج وبمزاجج أخلف لا عيني مو حامل يلة دي.
وكدرت وجدان تقنع عـون.. تعيش ببيت أبوها مسجلة بأسمها يصير نفس القضاء طابو زراعي أيضاً بس بيتها بين البساتين جيران لبيوت إخوانها عـون وعدها يسدد فلوس البيت يشتري لأن يفضل يسكن نسوانه ببيت ملك إله إما الفلوس اللي عنده عرض وجدان على أشهر أطباء وحتى سافر بيها بس رجعوا ماكو إلها حل أنسجة ما بيها مرونه وعدها جلد وراثياً يسبب جذرة تضخمية يعني ممكن العملية تزيد من التشوه لأن وجهها يفرز كولاجين مبالغ بيه زائد ضعف التروية و إي رقعة جلد ممكن تموت لان تروية ضعيفة فتفشل عدها بكتريا كامنه تحت طبقات الجلد بسبب الحرق القديم و إي فتح لجرح ممكن يهيج البكتريا وتسبب تسمم بدمها والموت الحتمي و حتى يرضيها حول رحلة العلاج اللي فشلت لشهر عسل و خوش مونسها وآني هنا أكل بروحي بس رجعوا كبل لبيتها الجديد
ظليت أفتر بالبيت ولكفت باهر.. يخابر بنقالة وهو مبتسم:
_ صار أسوي عملية مراوغة و نجيج بس ها يمة هداياج كون تشجع ترى الغول مـريم.. متخلينا.
مدري شكلتله لأن رد:
_ أعتذر وصار بعد ما أتجاوز على أمي مـريم.. ترى مدا أجاوز بس أشتاقيت لسوالفها قبل مال قطط وغيلان وهاي الأمور تعرفينا يمة وجدان.. فطنا على أمي مـريم وهي تهذي هاي هي تدللين.
سده و ألتفت وطفر من مكانه وصار أحمر :
_ يمة.. من يمتى تتنصتي.
ــ أتنصت؟
_ أحم عندي إمتحان يلة أروح لخالي رافد هو تخصص عربي يدرسني.
أخذ كتبه و شرد أما أبني أحمد.. ظل يتلفت :
_ ماما أروح أشتري وأجيج مو تضوجين.
باسني وطفر لمرت أبوه وتبعوه إخوانه البقية بس ياسر ظل ملتهي يلعب يمي ضجت أنقهرت يحنون إلها ومو إلي صرت مخبلة بيهم أدور إهتمام حتى حتى تظاهرت بالمرض ونمت بالفراش أتونس وآني أشوف أهتمام أولادي بيه صاروا هم كل حياتي والعوض عن كل الصار أما أبوهم بقيت آني وياه بزعل مستمر يجي أطرده وأتهمه بإنه ينتهز الفرص حتى يتقربلي وصارت هاي حياتنا شحتته وشمرت ملابسه گلتلهم ياخذوها لمرته ذيج وحتى أستوليت على صفه بس هو ما خبث وياي بالعكس صار يدزلي طلاب أدرسهم خصوصي بسبب وضعي والصدمات المريت بيها مرت السنين الفاتت ما تعينت يعني خسرت حتى الوظيفة شهادة تعبت حيل حتى أحصلها بس ما أيست هذا الحاضر بعد ماضي أليم حاضر أمرأة من حديد قدمت على ملفات التربية وگمت أطلع للمظاهرات حتى أطالب بالتعيين ووعود الدولة ما تنتهي.
طبعاً ما گلتلكم زارتني شيلان.. وبنتها وخالتي رايحات لبيت نوري من سنين طويلة طاردهن وگايلهن شردن خارج الوطن فأيسن من شوفتي ورجعن للشمال بس واحد من عمال المشتل طلع جنوبي ومن منطقتنا ومن سائلته مسولفلها بكل الصارلي فأجت هي و خالتي يركضن ودموعهن على مصايبي المريت بيها النذل باهر عندة فيديوات إلي وآني مخبلة مراويهن لشيلان.. لواك اللوكي يتلوك لأن شاف عند شيلان بنت أبو درب سوالف أبوك هاي متعبر علية أبوك جان هيج لوكي.
باوعتلي شيلان وحضنتني:
_ كل هذا صار بيج مرايم.
جانت خالتي ساكتة بس تبجي وجهها صار أصفر حجت وشيلان وشهگتها تسابق دموعها:
_ الله يشهد أجينا من سنين طويلة لبيت خالتي.. بس طردنا نوري وگال شردن خارج البلد عبالنا نـصير.. طلع وطلع خالتي ويه عائلته بعد ما سألنا أحد خلينا و رجعنا للشمال شمدرينا بكل هذا الصاير بيج يا بنت خالتي.
ظلت تبجي فعاتبتها:
_ لو جنتن موجودات جان رحنا وياجن وما عشنا هالمذلة أمي ماتت والغرب غسلوها وجفنوها ودفنوها عاشت بديرة غرب بعيدة عن إقليمها وناسها وماتت غريبة.
راويتهن فيديو التشييع والفاتحة اللي دزه إلي باهر.. وأعتقد أخذه من أبوه ظلينا نبجي وخالتي تخربطت بوسط هذا الحجي عرفت شيلان.. أنفصلت حيل أستغربت وصدمتني لأن أعرف بـروان.. شگد يحبها و هي من عرفت قصتي وگالت:
شيلان : عندي تواصل ترى وي مـاجدة و سـؤدد.. أكيد بس يعرفن بحالج حيل ينقهرن.
ومرت أيامي بين رفض و بين قبول لعـون.. بين أخونه وأتهمه بگلبي وبين آني تفكيري غلط لأن دأشوفه كولش متعاون وياي بس ما أدري شبية أكو ترسبات وخوف متغلغل بداخلي ما يخليني أرتاحله هو دوم جان يعارك نـصير.. ويهدده بس معقولة توصل بي النذالة يقتل طفل.. أجاني الخبر خالتي بلغت باهر.. لازم يروح وياي للشمال.
_ بس يمة شلون ترحين وأبوي ميدري ترى ما يصير.
_ بصفته شنو؟
_ زوجج.
ضحك بتفاهة من كوتله:
_ من تزوجني ما أدري لذا ما أعترف بيه كزوج.
سكت و ظل يحوم يريد يطلع هذا خاين تابع لأبوه ومرت أبوه ساعة ودخل عـون.. رجعت لورى بخوف:
_ هاي مو أول مرة تدخل جفت ترى للبيت حرمته.
آشر بيده علامة ترللي:
_ ترللي وأقسم عقلج ما رجعلج عقلج رجعلج بالمگلوبي شلون واحد يمشي على إيديه ورجليه معلكة فوك.
ضحك باهر.. وأحمد.. رزلهم أبوهم:
_ روحوا غرفكم يلة وعيب الضحك أصلاً ما أنتبهت تصنتوا.
طلعوا معتذرين.
باهر : أسف مرايم.
احمد : ماما آسف بس ممتعودين عليج ماما مـريم.. عرفناج الغيمة وصال..
واشتاقينا لسوالفج ولعبج ويانا والله أيام حرامات ما تنعاد.
أياد : عيب عيب الغيمة تبقى غيمة يا غيلان يبتوع المدارس.
فضل : جان أستحيتو تحاجون الغيمة بدون حدود ترى هسة ترعد وتمطر عليكم حالوب تفشخكم والله عيب شفت بابا سوالف ولدك.
رزلهم : شوي أحترام.
طلعوا يتمضحكون وهنا عرفت لازم شوي حزم لازم أستعيد هيبتي اللي طيرتها وصال الغيمة الممطرة وي عصافيرها التافهين ذول تعلموا على وصال الجان عقلها بگدهم فصارت نظرتهم الي كصديقة ولعبة مو كأم
بس طلعوا ولدي بعصبية هديت على عـون.. أكتل بيه هم أستغل وضعي
وخلف مني وهم جهالي ينظرولي كصديقة مو أم.
_ ترى زودتيها مـريم.. المهم آني أجيت حتى تحضري روحج أخذج للشمال بعد شتريد وصولتي ترى وصال هذا أسمج الروحي أسم سنين خسارتج وأسم سنين دمعتي تسيل عالمخدة بالليل هذا الأسم جان صفة لمشاعري جنتي وصالي المفقود بس هسة وصالي مفقود وموجود بنفس الوقت.
دنكت محتارة.
_ متحملج والله أعرف وعيتي بصدمة جديدة متزوجتني ومخلفة خمسة لذا عاذرج
تقربت أشم بحلگه :
_ ترى ما أشرب شبيج أصلاً أصلي و أصوم و أريد أخذكم عمرة أنتِ و أم غايب.
_ بيها الخير ما تسميها أم باهر.
_ لا حياتي باهر وليدج والمرة ما تاخذ مكانج ولا تنسى فضلج حسستيها أمومتها بجهالج.
_ شكراً لطريقة نصب الجديدة و أستغفال بس آني هسة تحسنت واتكفل جهالي.
_ لا تاخذين الموضوع من هيج جانب تعرفين آني أحبج لا سنة وسنتين عمر كامل يا مريم كبرنا بعد كافي تصرفات تغث.
رحت للشمال وتلكتني شيلان.. حضنتني تبجي:
_ بقيت وحدي مـريم.. راحت أمي من يوم اللي عرفت بأختها متوفية وأمي أصلاً جانت مو على حال لمن راحت كوله من نوري لو گايل الحقيقة وما مكذب ولا جان تفرقن وماتن بغصتهن
مسحت دموعها ورفعت راسها لعـون.. اللي وجهه أنطى ألوان أنتبهت لشكل عـون.. وعرفت روحها وحاولت تغطي على جفصتها:
_ هلاو شلونك عون و شلون الجهال.
_ الحمد لله الله يسلمج.
_ تفضلوا هلا بيكم دخلو.
أباوع للطبيعة وجمال البيت و المشتل :
_ شيلان.. هذا شغلج اللي سولفتيلي عنه صدوك جنة و عاشت إيدج أنتِ مهندسة رائعة ومبدعة بعملج.
كعدنا ورى سوالف همست لا يسمع عـون:
_ ترى مضطرة أجيبه وياي أسمه رجال و طريق بعيد بس لا عبالج أسامحه هذا القاتل.
فشلتني:
ـــ أنتِ فد وحدة أخ.. يلساني حمدي ربج وشكريه على عـون.. سولفلي ترى من وراج بجيتي الكم أخذت رقمه من باهر و نزلت بيه غلط ورزايل بس الرجال حجالي و بالأدلة دزهن إلي لا مـريم.. لا تزعلين مني بس أنتِ غلطانة ولج لو تدري سـؤدد بيج والنبي تسافر تتعنالج للوطن حتى تبيس بيج ولج ولج عـون.. هذا ذهب الله يساعدني على طليقي اللي خذلني.
سكتت.. و النوب كولها تدافع عنه حاجتني عن صديقاتي:
_ دوم يسألن عليج وماجدة تريد ترجع للوطن بتها طلعت عايشة شفتي الزلم شلون بـروان وماجد ذول مال صوندة و منفى أبدي حمدي الله على عـون..
_ لتكوليلهم نتواصل آني بحالة ووضع نفسي ما أتحمل صداقات أريد أنعزل عن العالم و أطير.
باوعتلي و أنتبهت بديت أهذي بس بوعي دون فقدان أدراك عاد بقينا يومين ورجعنا راد يدخل عـون.. وطردته :
_ لازم تراجعي طبيبج لا عبالج وعيتي هاي هي بعد ترسبات عندج.
و بيوم أتصفح بالنقال و علقت لمشتل شيلان وراها دخلتلي سـؤدد وأنكشفت وأنتم ببداية القصة قريتوا المشاهد ميحتاج تكرار.
بديت بسكته أروح.. لأطباء نفسيين أتعالج لأن بعدني بوساوس الماضي وما أريد أظلم عـون شو كولها تمدح بي بس نفس الوقت ما إنطيه وجه لمن أشوف الحياة شلون تصفى طبعاً جابلي طالبات أدرسهم إنكليزي وبيوم اللي أحمد فاتحلة الباب و إجه أخذ حقوقه مثل ما قريتم وراها طلع إتصلت بشيلان.. وسولفتلها وهم نصحتني الماضي خلص وهذا حاضرنا العمر 36 مواليدي 81 اما عـون.. بالاربعينات من عمره.
الجديد إنو قررت أعيش لأجل الاولاد و أنطي فرصة ما أتبع شك ووسواس دون دليل و بديت أخذ بالنصيحة رغم الشك داخلي و شفت ولدي مشلوع گلبهم بالبوكة يرحون لوجدان ويمي تعلموا يكذبون مرة ندرس وي صديق مرة نطلع ووووو.. أعذار عاد رحت لوجدان طلبت ترجع.
_ وجدان رجعي بيتج هيج الأولاد ترى تشتت لخاطرهم ورجلج الج آني يعني بس حتى جهالي ترتاح وميتعلمون الكذب.
كابرت بس هي بلسانها الطويل:
_ نشوفج يزمو.
_ نعم؟!
_ أقصد نشوف.
دخل عـون.. مستغرب وجودي.
_ هلو خير؟ شو هنا!
_ لو ترجع وجدان.. عادي أقبل ترجع.
_ ليش وجدان.. حسب الطلب شنو.
ردته وجدان:
_ إي أقبل نمشي ورى زمو و كل ربعج التموا والله كريم بس ها ولج من هسة إي عملية سرقة لليالي متخصج أبيس بيج خاف تريدين أرجع حتى عـون.. يرجع يعيش يمج تكابرين أنتِ متردين تبينين تردينه فترجعين وهنا هو أكيد يرجع وياي.
ظل عـون.. متونس بالحجي ينتظر جوابي.
_ لا عون شنو بيش الكيلو لخاطر العصافير لا تطير لغير عشي.
هم هذيت بس بوعي رجعت أنتبهت جريت نفس وهمست :
_ أريد نرجع لخاطر الجهال حتى لا يتعقدون.
ظليت مدنكة أستحي أباوع لعـون.. الصراحة داشتاقله و رغم هو ممقصر يجيني سطو لدرجة رحت طبيبة وحددت مانع حمل ما بية لعصفور سادس.
_ راح تندمين على قرارج كافي ولج مـريم.. تعبنا سنين نعالج بيج حتى نعيش حياة طبيعية مو حتى تنفريني لحظة عطشان.
شوي وراجع طب للمطبخ ورجع بيده بطل بني زغير مدري حيل تنرفزت رحت هديت:
_ تكول تبت مو جاي تشرب أبو بطاله بيرة ولك أنت مثل نوري.
وجدان مصدومة والكل أنصدم.
من رد فعلي:
وجدان : شبيج هديتي عالزلمة على مود بطل ترابي شراب الزبيب طاح حظج هاي بعدها مخبلة.
هو صفن بوجهي وآني من الفشلة خليت إيدي على خدي أبجي همس بصبر :
ــ لازم تستمري بالعلاج لأن بعدج يتخيلج.
سكتت و رجعت أتوسل بوجدان ترجع لأنها ورقتي لأولادي اللي يعوفوني ويشردون لبيتها.
شـــــــــــــــ♡ـــــــــــــيلان
أسمع أصواتهم جوة بالصالة وصوت بنتي الخاينة دتتمضحك ويه أبوها وجدها و طلعت بس آني المغفلة هنا لسنين وللمرة الثانية يستغفلني ويعبر ألاعيبه علية مو أول مرة يسويها بية
بقيت بحيرة وين أروح مستحيل أبقى دقيقة وحدة ببيته
_ بيته..
همستها بأستغراب.. عزا بعيني آني ماخذة قرض بإسمي من شركة الإستثمار و سددت بي ديون أمي
طلعت للصالة باوعتله جان گاعد بكل برود و مسترخي يباوعلي بأبتسامة ورفع إيده علامة سلام حتى يغثني طبگت شفايفي حيل وطلعت قررت أدور على بيت إيجار و شغل.
بس تبعني وكال:
_ وين شيلان.
_ أريد أستقيل وها راح أترك هالمكان والمشتل كوله يا نذل يا مخادع.
_ إي منين تحصلين أخليهم يطردوج ههههههه وأنتِ مديونة للشركة فكري زين إجه وقت أستعيدج.
تقرب مني وراد يحضني عزا الما يخجل وأبتعدت.
_ لا تنسى روحك.
_ فكري زين يا شـيلان.. عليج ديون ترى كمبيالات وقت السداد متأخرة شهرين عن دفع القسط.
_ وإذا ما دفعت شسوي لأم بنتك.
همس وهو يستهزأ وبعيونه غضب.
_ اسلمج للشرطة وأرفع قضية عليج يعني سجن.
وسعت عيني بغضب :
_نعم؟ تسجن أم بنتك؟!
_ سبق سويتيها وي أبو بنتج!
دك نقالي فتحت خط:
_ هلاو سـؤدد.. شوي مشغولة.
_ روحي بس دأكولج راجعه للوطن ورى أمي وعمي وأحتمال والتر يجي عاجبة يجرب حر الوطن مرت خالي رجوة توفت أم حسن خطيبي الشهيد.
_ انا لله وانا اليه راجعون.
_ هم أريد أشوف مـريم.. وابيس بيها وهم أشوف ماجدة.. هاي رفيقة الغربة والألم والوجع ولا مطمئنه لإختفائها هذا مـاجد.. خاف النوب اذاها.
_ ما أعتقد اليحب ما يأذي تبقى أم بنته مياذيها لو شما سوتله سابقاً ينجب ويتقبل ويسكت لخاطر البنت بينهم.
_ منو يمج أحسج تبسمرين.
_ أييه يمي يمي..
_ ها سلميني عليه.
_ أنجبي يلة باي بعدين نتواصل صدوك مريم.. صالحت عـون..
_ هي وينها أخابر لو تجاوب لو تنطي رفض صايرة كولش معقدة بس خليني الزمها.
_ هم عذريها ترى طابت بس بعدها تعالج يعني بعد ترسبات بعقلها و أخر تشخيص راسلني عـون بلغني الطبيب يكول عدها وساوس و تهيؤات.
_ بيها الخير هو كولجن ترللي للعلم بس أريد وحدة بيجن بيها حظ ومو عدها خيط وخيط.
رديتها : اولنا أنتِ الكبيرة بينا واكبرنا عمراً واخبلنا عقلاً.
ترخصت وسديته و بـروان.. منتجي على شجرة ويبتسم :
_ تبسمريني بس هم ما أعوفج إما سجن أو نتزوج أختاري.
باوعتله وهزيت إيدي ودطلع رجع سد الطريق ولزمني من إيدي حيل :
_ بسبب عدم توفر الظروف الملائمة لتربية البنت من مال و تكفل مادياً و بيت ايواءها ممكن أكسب الحضانة وها الفلوس تعمي نفوس موقفج ضعيف.
تقربت وخليت عيني بعينه و تحديته بنظرة...
_ تحلم تاخذ بنتي مني .
_ لعد رجعيلي إذا مو لخاطري لخاطر البنت كبرت وأريد الم شملها بأخوانها.
ســــــــــــــــــــــــــــؤدد
أمي تبجي على مرت أخوها ولا عبالك رجوة دوم تنتقد فوزية و بنت فوزية وعرايك والله لو ما زحمة ماأروح دوم تعيب علية بس بعد أذكرو محاسن موتاكم.
و أكثر رجعتي لأجل ماجدة.. وأشوف صديقاتي بلكت شيلان.. تجي و نلتم كولنا سوة و هم أعرف أخبار رحاب و بتول ونرجس وباقي شلة السنافر بس وصلنا لبيتنا الإجره حسين منا و كل سنة يدز مبلغ إيجار السنوي لأمي
المهم الفاتحة مو بالريف طلعت هنا عبالنا بالريف بس وصلنا و إتصالات فتوجهنا للبيت هنا لكينا كل العشيرة مال خوالي مجودرين ببيتنا زلم ونسوان و الجوادر منصوبة لاكونا النسوان برى ينتظرن أمي تلاكت وياهن دك ولطم وصريخ فوتوها جوة
_ فوزية خية تعاي جوة تعبانه خية بسج بس شنسوي هاي دنيانة المات ما يرجع أوي خية يا رجيوة بعدج زغيرة عالموت يخية.
لو ما عيب جان كلتلها الموت ميعرف عمر لو يعرف ما حرمني من حسن وهو توه بالعشرين أول مطبيت للبيت جانوا مخلين النسوان جوة و الجادر بالشارع للزلم ناسهم هواي سمعت صوت أمي جوة بدعت بالكولات و صرخت يبووي خية أم حسين يبووي ظليت مصفنة عليها بس شمت ريحة أهاليها شمرت وراها سنين المهجر والغربة ورجعت بنت الريف التعدل لطمتها وتنحب وياهم هي مو هنا المشكلة.. أول ما وصلنا ونريد نفوت جوة والتر.. مشى وراي سيدااا يريد يدخل وياي لو ما حسين.. لزم جتفه جان متنگب بيشماغ أسود طالع جزء بسيط من وجهه.
_ ووووويييين فاااايت للحرم؟! تعال يمعود منا حرمة أنت َ وتفوت جوة منا الزلم يلة.
وأشر عالجادر ظل والتر.. مفهي شنو حريمة باوعلي و أشرتله براسي روح.
_ روح أنت بأيد أمينة ما يخطفوك.
هو من البداية جان متخوف من جيته و متردد أجي و عرضلي عرضة لبنانية بس قنعته وهو شرط علية يرافقني بوقتها گوتله:
: حبيبي ترى البلد بخير وأمان الأخبار اللي توصلك كولها كذب وما بيها أي مصداقية ناس يتعمدون يشوهون بسمعة بلدي حتى محد يرجعله ولا أكو سواح يزوروه وينتعش سياحياً.
أنتبهت لوالتر.. لزم إيدي عبالك فراق أبدي شوف الحظ لزم إيدي و رفعها وباسها.
_ رح أشتقلك كتير يا حياتي.
ضرب كصته و نفخ علامه النسيان.
_ ليكِ يا حياتي شوفي كيف نسينا نجيب ورد معنا؟ هون ببلدك يا سـؤدد الورد هو اللي بيحكي عن مشاعرك بمجالس العزا.. نسينا باقة الزنبق الأبيض أو حتى ورد جوري أبيض أخ على هالنسيان شو بيفشل كتير مستحي هلق رح يعتبروها قلة ذوق إنو فتنا ومن دون ورد أبيض.
باوعتله.. وجان أشوف حسين واكف وراه عيونه وصلت لكصته لأن والتر.. واكف بباب الحوش الي تفوت منه النسوان وفوگاها يريد يعزي أبن خالي حسين.. بباقة ورد أبيض.
_ حبيبي إحنا هنا نقرأ سورة الفاتحة صينية شموع وياس وقرآن هذا أفضل من كل الورد الأبيض.
_ يعني مافي قلة ذوق.
_ لا أبد.
جره حسين.. حيل بكل قوة:
_ أكلك تعال مناك الزلم شنو فلمك لازم باب الحريم.
ظل والتر مصفن بلهجة حسين صعبة عليه يباوعلي والتر بأستفهام أبتسمت:
_ حياتي ونور عيوني وگليبي روح وي الأخ حسين.. أمان والله هذا ابن خالي وأخوي العزيز كولش أمان أكول حسين فدوة دربالك على جاد والتر.. حبيبي جاد.. ما أعوفك نتراسل ونتخابر.
وأشرتله بإيدي يم راسي علامة نتصل راح والتر وهو متوتر أمي ملتهية ويه النسوان دك ولطم وبجي عدلت الشال ونزعت نظارتي الشمسية وخليتها بجنطتي ودخلت جوة يم أمي شوي و صوت رن..رن.. مسج وصلي دنكت لأن الملاية دتقرا و تخزرني واخذتلي بسمار لعن الله قلب لا يخشع وعين لا تدمع غطيت راسي كوله بالشال حتى وجهي و النقال بيدي أراسل جاد أحب أسميه بالأسم العربي أحسه أكثر يلائمه.
_ ها حياتي
جاد يكتب... دز رسالة:
_ سـؤدد.. حبيبي أهلك وقرايبينك عم بيحاصروني.. عم بيلمسوا وجهي ويبوسوني وعم بيبكوا كتير نحيبهم أوفر أوفر كتير وعم بيحكوا بين بعضهم حكي ما عم بفهمه بالمرة بس عم بسمع بيقولوا (لو ما راح كلنا هو) والله مش مرتاح هلق كل شوية بيلمسوا وجهي الجو هون كتير تقيل خلينا نرجع ع بلادنا بليز.
سويت الرسائل صامتة و كتبتله :
_ حياتي أكيد فرحانين بيك بنسيبهم.
خوما أكوله لمسو الشبه بينك وبين حسن لا صعب أنبهة وهو متعقد من هذا الشبه ويغار من ميت.
_ يا عمري ما فيي أتحمل حسين يطلع فيي كأني عم جرب أسرق منو شي أو كأني سارق منّو شي.
بگلبي كلت هو أنت سارقني منه يمكن حسين بعده ما مسامحني على زواجي بأجنبي من أصول لبنانية وفوگها جان مسيحي بس شعليه حياتي وآني حرة بيها لو متزوجة حسين جان تطلگنا من زمان ما يتحمل لا لساني ولا أعصابي ولا أسلوبي بالحياة ثاني يوم ردت أفلت حتى أشوف مـاجدة.. بالي يمها كولش راسلت جاد ورغم هو أجنبي بس آني بنت أصول أخذت إذنه برسالة.
_ حياتي صباح الخير تريكت دزيتلك تراك بدلت لا.
_ صباح النور يا عمري حسين.. حكي حكي ما فهمتو بس اللي فهمتو إنو لازم ألبس دشداشة وهيدا غطا الراس متلهن قال بكون أفضل وقال لي كمان لو بتموت ما بتوصل أو هيداك راح قلتلو شو؟ مين اللي راح؟ قال لي ولا شي أسكت بقا سكت حبيبتي ما فيي إبقى هون إيمتى بدنا نرجع ع بلادنا؟
أهو هذا حسين ديضايق رجلي آني اله و جاد.. ما يفهم لهجة حسين.. صعبة عليه بس الفهمته ديشبهوه بحسن و يتنمر على رجلي يكله تشبهة بس متوصل لذاك الراح بس بطريقة ريفية لذا ما فهمه بلغته أطلع لصاحباتي وراسلني يجي وياي:
_ لا حبيبي وين تجي أبقى يم الرجال عيب تعوفهم آني وحدي أروح.
بين خوفه علية لأن بعده يتصور البلد ما بيه أمان بس گلتله أطمن بيوتهم قريبة سكتته وهو قبل بس بطريقة غصباً عنه ومن ورا خشمه يلا المهم استأذنته مو شرط يقبل من كل گلبه
بس آني عقلي كوله يم ماجدة طلعت اتمشى بمنطقتنا أتذكر بقايا ملامح البيوت اللي تحولت بنيان عصري وكفت بوجع يم باب بيت جد ماجدة الي إستولى عليه لؤي وانقتل بيه هو وعائلته ذبيت حسره ونزلت دموعي وعيون حسن أحسها انرسمت على بيبان هالبيت.
بس دروح و صوت باب سلايد ينفتح واشوف كدامي صخام شنو ما مات لا مستحيل هو عيوني غوشت وآني ألزم بعامود كهرباء وشهكت أهمس اسمه بغضب.. و عيوني برزن بجحود الصدمة. ..