لقيت نفسى وايتر وكملت شغل عادى ولما نروح الاقيه بيتجاهلنى خالص عادى برضه لكن سحر تبقى كابتن صاله ؟ ده العجيب والاعجب انها بقت تتدلع على ده وده لدرجة ان الدور الفوقى بقى كله شباب والزباين بقت تتكلم عن البرامج وان المكان اتغير وما بقاش زى الاول ومافيش فرق بينه وبين اى مكان فى طرابلس رغم اننا ما عندناش برامج وكمان فاتن فى الصاله الرئيسيه تحت بتبذل اقصى جهدها للحفاظ على سمعة المكان وكل ده بيروح على الارض بضحكه مايعه يسمعها الزباين من فوق ... من سحر !
كل ده كوم واللى اكتشفته بعد كده كوم تانى خالص لما جمال بدا يظهر عليه الحمل هاهاها !!!
اه والله على الضوء الضعيف اللى جاى من الشباك من كشاف الشارع لاحظت وبدهشه عارمه ان جمال حامل ؟؟؟؟؟؟
جمال بدا ياخد معاه الايراد ويحوش الفلوس فى حزام بيلفه حوالين بطنه لما ينام بعد ما كانت مع فاتن وبتحافظ عليها والواضح انه بدا يسحب كل اختصاصات فاتن وبقت زيها زى اى واحده بتشتغل وهى سكتت وكملت شغل عادى وانا ؟ بدا النصاب اللى جوايا يصحى وافكر فى سرقة الايراد .
................................
جمال بدا يتحول ١٨٠ درجه الاول كان بيتجاهلنى خالص وانا سكتت وسكوتى استفزه وبقى يتعصب ويشتم وفى الاخر بقى يخلينى فى الفندق اغسل هدومه وبقى كل ليله يحشش ويبعبع
جمال : خيرك اول مره تغسل هدومى ؟ تتذكر يوم ما اترجيتنى اخدمك عندى ؟ غسلتلى الشخشيرى ( الشراب ) ولمعتلى الكوندره ( الجزمة ) نسيت واللا شنى يا مصرى ؟
سعد : يا استاذ جمال انا ما قلتش لا وانا باغسلهم اهه
جمال : انتوا المصريين هكى لابد ينعفس عليكم والا تغدروا
سعد : يا باشا انا حصل منى حاجه ؟
جمال : شنى باشا ؟ باشا هادى عندكم غادى فى مصر انتوا تديروا روحكم باشوات وتدوخوا عقول البناويت بالكلام ووين ما تقدروا تغدروا تضربوا ضربتكم وفيسع تختفوا
وبدا يعيط وطلع قزازة خمره فتحها وقعد يشرب ويبكى ويبعبع
جمال : انى قلتلها بلاش السفر والغربه مصر هادى واعره وانتى بنيه وحيده كيف تعيشى بروحك غادى ؟ قالت انى بميت راجل لا تخاف عليا ابن عمى لا تخاف انى فاتن القويه ما حد يقدر يلعب على راسى
رجع يشرب وولع سيجارة حشيش وبقى عامل زى المجنون
جمال : رجعت حامل !! كيف تدير انت لما تلقى حب عمرك كله راجع هكى ؟
عينيه كانت بتطق شرار وشرب بق كبير وقال
جمال : ومين دارها ؟ واحد مصرى ملعون لعب على عقلها ومشاعرها الين عشقته وسلمته روحها وشرفها
سعد : استاذ جمال كفايه كفايه شرب
جمال : رجعت مكسوره وما لقت الا ابن عمها المسكين اللى يستنى فيها العمر كله . فكرت وقتها انى نقتلها وننتقم لشرفى وفكرت حتى نمشى لمصر ندور فى المصرى الملعون اللى دار هكى ونقتله لكن خير من كل هدا اخدتها فى حضنى واتجوزتها ونزلنا الجنين وحافظت على شرفها قدام الناس
سعد : استاذ جمال استاذ جمال فوق كفايه
جمال : اللى هى ضيعته وودرته انى لميته وفى الاخير تضربنى على خشمى . وترجع تقول انى اسفه ككككككيف يصير لا لا يا فاتن مش انى اللى ننضرب كان اصول المصرى اللى خانك تضربيه خير ما تبوسى ايده وتترجيه وتجرى على ابن عمك يصونك وتهينيه
.........................
تانى يوم لما صحينا جمال سالنى واحنا بنلبس
جمال : شين صار امس ؟
سعد : غسلتلك هدومك كلها ونشرتها ولما نرجع بالليل المها واكويها يا استاذ جمال انا ما اعترضتش اغسل هدومك انت اللى ما طلبتش
جمال : شين صار منى ؟ انى ما نتذكر اى شى
سعد : ولا حاجه حضرتك شربت كام سيجارة حشيش وطلعت قزازة خمره شربت منها ونمت
جمال : وشين قلت وانى سكران ؟
سعد : ولا حاجه كلام عامل زى الامازيغى هو حضرتك امازيغى ؟
جمال : لالا انى دزيرى عربى
سعد : اصل الكلام كان غريب ومش مفهوم حسيت زى ما يكون بالمقلوب او امازيغى وما بقيتش فاهم ولا كلمه
قعد يبصلى بشك وواضح انه مش مصدقنى وفكر شويه وقال
جمال : اسمع انت من اليوم عندى فى الصاله اللوطى ورد بالك نلقاك تكلم فاتن كلمه واحده ولا حتى صباح الخير دير بالك انى نزلتك باش تكون تحت عينى
سعد : حاضر يا استاذ جمال تحت امرك
.........................
نزلت الصاله الرئيسيه بس وايتر وبقيت كل ليله الاحظ ان بطن جمال بتكبر قصدى الايراد اللى بيشيله فى حزام حوالين بطنه وينام بيه وبدات ارسم خطه واسال على مواعيد الطيران وادور على نوع مخدر قوى ما بيسيبش اى اثر او حتى سم بشرط يكون مفعوله سريع وقررت انى اقتله واسرق الايراد واهرب لكن كان نفسى اخد فاتن معايا .
انا ماليش فى الدم ولا فى السرقه انا طول عمرى نصاب باخلى الضحيه تدينى فلوسها بنفسها لكن المره دى ومع جمال بالذات قررت انى اقتل واسرق واهرب لكن لازم تكون الخطه محكمه .
#رواية_داغر
جهزت خطتى وقدرت اجيب نوع مخدر قوى بيصيب اللى بياخده بالشلل الكامل ما عدا مخه وعينيه بيبقى شايف وسامع وفاهم كل حاجه بس ما يقدرش يتكلم ولا يتحرك والمهم انه ما بيسيبش اى اثر فى الجسم بعد ست ساعات ومفعوله بيبدا بعد ربع ساعه وبقى كل شيء جاهز على موعد السفر لكن فجاه حصل شيء غريب .
فى يوم جمعه وكان جمال قاعد على الكاش وجاله تليفون وفجاه نادى فاتن خلاها تقعد مكانه ولبس الجاكيت وعلق الاستيكر ونزل الصاله وبعد شويه دخلوا تلاته اتراك وفورا جمال استقبلهم وقعدهم على طاوله متطرفه واخد طلباتهم وطول معاهم فوق العاده رغم انه لما بلغ بطلباتهم كانت بسيطه .
مش ده المهم المهم انه صمم لازم ينزل طلباتهم بنفسه
فاتن : من امتى كابتن الصاله ينزل طلبات ؟ هكى مش اصول السرفيس
جمال : هادول ما يتكلموش عربى ولا حتى انجليزى مين يتفاهم معاهم ؟
فاتن : الوايتر مش شرط يتفاهم معاهم بينزل طلباتهم ويمشى
جمال : خيرك تعارضينى فى كل حاجه ؟ انسى الاصول هادى اللى اتعلمتيها فى مصر ما شفنا من مصر غير هاها كل باهى
فاتن سكتت وانا وقفت مستنى انزل لباقى الطاولات وبصيت عليه لقيته حط الصينيه على الطاوله !!!
غريبه اول مره تحصل لو فاتن شافته اكيد ... لا مش اكيد دلوقت بقى اكيد حتسكت لكن انا مش حاسكت ولا حاتكلم حاراقب وانا متاكد ان جمال مش جديد ولازم فيه سبب .
نزل طلباته وراح ناحية المخزن وبيشوف حد شايفه واللا لا وانا دورت وشى الناحيه التانيه ورفعت صينية طلبات فى التانيه فى التالته لحد ما لقيت نفسى فاضى بعد ساعه تقريبا دخلت المخزن ادور وافتش يمين وشمال مش لاقى حاجه غريبه !
وبعدين قلت اكيد حيسالونى بتعمل ايه فى المخزن قلت اجيب كيس دقيق وكلمت شهد قلتلها لو حد سالك انتى طلبتى منى كيس دقيق للمطبخ قالت باهى .
اول ما مديت ايدى على رف الدقيق لقيت كيس صغير فى النص زى اكياس البهارات فيه حاجه بيضه شبه الدقيق لكن طبعا مش دقيق ومش محتاج ذكاء كبير علشان اعرف ان ده بودره . هيروين .
اخدت كيس دقيق من رف تانى بعيد وسبت كيس البودره زى ما هو وخرجت لقيت جمال فى وشى
جمال : شى تدير عندك وتارك الصاله بره ؟
سعد : باجيب كيس دقيق للمطبخ
خرجت شهد من المطبخ
شهد : خيرك ساعه تجيب الدقيق ؟
سعد : انا ما اخدتش خمس دقايق وقلتلك حادخل الحمام الاول
شهد : كل هدا فى الحمام ؟
سعد : معلش عندى اسهال وبطنى تعبانه وطولت فى الحمام غصب عنى
جمال دخل المخزن بسرعه وبعد شويه خرج ونادى عليا
جمال : من وين جبت الدقيق كل الدقيق موجود
شاورت على الرف اللى اخدت منه الدقيق وقلت
سعد : انا ما شفتش الدقيق ده اصلا انا جبت من اللى هناك ده
جمال : هدا مش دقيق هدا سكر بودره يا حمار
سعد : معلش انا عندى مغص واسهال ودخلت الحمام كتير وحاسس ان عينيا مزغلله ودايخ
جمال فكر شويه وقال
جمال : باهى مش شورك المخزن بعد هكى رد بالك تقرب من المخزن
........................
بعد تلات ايام لقينا واحد ليبى سبهاوى داخل الكافيه لكن برضه قبلها جمال جاله تليفون وقعد فاتن مكانه ونزل الصاله واستقبل السبهاوى وقعده على طاوله متطرفه برضه وطول معاه قوى وراح بلغ بطلب بيتزا وشاى احمر وميه معدنيه ما تستاهلش كل الوقت ده ابدا وبعدها دخل المخزن وخرج وصمم انه ينزل الطلبات بنفسه وبرضه حط الصينيه على الطاوله !!!
انا مش غبى ومش شرط اكون عبقرى علشان افهم انه حط الصينيه على الطاوله علشان كيس العينه بتاع البودره تحتها واضح ان جمال بيخطط لضربه سريعه شال الحمام حط الحمام يشترى من الاتراك ويبيع للسبهاوى ويضيف ارباحه للجنين اللى فى بطنه كده نستنى شويه على الولاده علشان المولود ينزل مكتمل النمو الصبر طيب .
بعد شويه لقيت السبهاوى قام يدخل الحمام دخلت وراه لقيته دخل حمام من الحمامات وبعد شويه خرج من غير ما يشد السيفون دخلت لقيت الحمام نضيف وفهمت انه كان داخل يعاين البضاعه خرجت بسرعه لقيته واقف مع جمال بيحاسبه وطولوا مع بعض قوى وبعدها جمال راح المخزن اكيد علشان يرجع كيس العينه بتاع البودره .
.......................
فريق الاتحاد هو اكبر فريق كرة قدم فى الدورى الليبى لما بيكون عنده مباراه بتبقى الشوارع كلها فاضيه والكافيه عندنا بيكون زحمه جدا وممنوع الاجازات لاى سبب من الاسباب لاننا بنعرض المباراه على الشاشات العملاقه عندنا وبيبقى الجو حماسى وبيطلبوا طلبات كتير ويدفعوا بقشيش كبير لو الاتحاد فاز والاتحاد غالبا بيفوز باللعب بالحكام باى وسيله مش مهم المهم يفوز .
فى يوم مباراه للاتحاد صحيت فى ميعادى لقيت جمال مش موجود وفى الكافيه فاتن بلغتنا ان جمال اجازه وانها ما تعرفش الاسباب ولا تعرف راح فين
( هل هى فعلا ما تعرفش ؟ مش مهم المهم انا عارف انه راح يقابل الجماعه الاتراك طبعا )
بالليل جمال ما رجعش الفندق ولما رحنا الكافيه تانى يوم لقينا جمال هناك ولقيناه حط قفل على باب المخزن واصدر تعليمات ان ماحدش يدخل المخزن او يقرب منه غيره ولما سالت سميه فى الورديه الاولى قالت انهم جم لقوه موجود ههههه مش مهم اللى فى المخزن انت لو قفلت عليه خزنه حافتحها لو عاوز انما انا مش عاوز اللى فى المخزن انا عاوز اللى فى بطنك يا جميل خليك ترمى اوراقك كلها وانا اقش فى الاخر بالكومى .
لكن لما روحنا بالليل لقيته رجع من غير الجنين يا نهار اسود راحت فلوسك يا صابر شقى عمرى ضاااااع .
الله هو انا زعلان ليه اكيد استلم من الاتراك ودفع اومال كان مقابلهم يشربوا شاى بلبن ؟ الصبر جميل
....................
اليوم الاهم فى الدورى الليبى يوم مباراة الاتحاد الليبى واهلى بنغازى المنافس الاوحد للاتحاد وفى اليوم ده بيبقى الزحام عندنا اضعاف ايام المباريات التانيه والشوارع بتبقى مهجوره ومافيش غير البرانيه وبس .
فى اليوم ده توقعت ان جمال حيسلم السبهاوى وقررت افضل صاحى وانزل وراه اراقبه لكن لقيتنى الليله اللى قبلها نمت فجأه بهدومى ودى حاجه غريبه اول مره تحصل اكيد جمال حطلى مخدر فى العشا او اى حاجه هو اللى بنعمله فى الناس حيطلع علينا واللا اييييه ؟
لكن مش مهم انا عارف هو رايح فين اكيد حيروح المخزن يطلع البضاعه ويقابل السبهاوى انا مش فاهم كنت عاوز اراقبه ليه وانا مالى ؟ انا استنى وانام واشخر واستنى رجوع الغالى بالف سلامه وادعيله من قلبى ربنا ينجيه من عيون الشرطه ويرجع ويملا بطنه اكتر من الاول وفى اليوم ده كمان جمال كان اجازه وفاتن ما تعرفش ليه ولا راح فين خليها نايمه فى العسل .
المره دى غير المره اللى فاتت المره دى جمال رجع الفندق بالليل وانا عملت نفسى نايم لحد بعد ما نام بصيت على الضوء الضعيف اللى جاى من الشارع لقيته رجع بالجنين واكبر من الاول يا سعدى يا هنايا كده ننفذ الخطه استعننا على الشقا بالله
...................
لما سالت على مواعيد الطيران لقيت ميعاد طيارة طرابلس القاهره يوم الاتنين الساعه خمسه العصر وطيارة بنغازى اسكندريه ميعادها الخميس الساعه تسعه صباحا ولما قررت انفذ خطتى طلبت جواز سفرى من الفندق بحجة انى ابعت فلوس لمصر واخدته ورحت حجزت على طيارة بنغازى يوم الخميس وحجزت طيران داخلى طرابلس بنغازى الساعه سته صباحا وبعدها علشان ماحدش يشك رحت بعتت فلوس لمصر باسم مراد فهمى عبد الله بعدين اقول لكم ده مين لكن مبدئيا الانسان الوحيد اللى اقدر اثق فيه فى مصر وانتم سيد العارفين ان اى نصاب محترم بيحب مهنته لا يثق الا فى نفسه واى نصاب يحط ثقته فى اى حد بتبقى نهايته يا ترى حتكون نهايتى انى وثقت فى مراد فهمى عبد الله ؟ حنشوف الصبر طيب