رواية في قلب القريه الفصل الرابع 4 بقلم نوسه حمد
مرت الايام وبقيت مدمنه شمارات وما ساي بس بقيت اعرف الكبيره والصغيره في الحله اخر همي بيتي وراجلي اتغيرت ١٨٠ درجه مره سمعت جارتي البباريها انها زوله كعبه وقصص طويله انصدمت شديد لاني الزوله دي اقع واقوم معاها الكلام القالو الناس دا عملتو متين معقوله اليوم كلو سرحانه ونهاي م طلعت وطبعا راجلي لو جا بس اعمل ليهو الاكل والفح توبي وامرق وماده كرشي قدامي وهو ما بسالني وبقيت الحله احوما بيت بيت لمن سمعت بي تهاني وقصصها شيلت الكلام ومشيت اديتو لي جارتي مني التانيه وهي زاتا انصدمت وسبحان الله واحده قدرت تنصفها وتقول لا هي م كعبه ماف رغم اننا ما شفنا عليها شي
وتمر يا الايام وتعدي انتي يا مني شيلي الكلام ادي تهاني وقولي ليها نسيبه قالت انتي كعبه وانتي قليله ادب وقبضوك وكلام نصو قلتو ونصو م قلتو وقالت ليها اتهمتك في شرفك والحله كلها تتكلم بيك يوم انا راقده كنت تعبانه في الشهور الاخيره م طلعت وقللت طلعتي خوفتا انا زاتي يقولو فيني كلام
بقا ماف ضمان وبديت اتحسر علي روحي جاني ولد جيرانا قال لي في نسوان واقفات ليك في الشارع قالن ليك تعالي لبست توبي حق الهزاز المقطع والمبلول مويه داك ومشيت لقيتا تهاني ومني ومعاهن نسوان قلت ليهن مالكن واقفات في الشارع اتفضلن جوه تهاني قالت لي فضيل معاك ما دايرين تعالي لينا هنا ونبره صوتن كانت حاده والرجال قاعدين في ضل الشجره اعاينو لينا قلت ليها بسم الله يا تهاني خير فشنو قالت لي خير نجيبو من وين من دخلتي الحله سوطيها سواطه والفيك عاوزه تبقي في الناس قلت ليها سواطه شنو الليله بقيت انا السواطه وانتي ست السواطه بريئه قالت لي انا سواطه يا القليلت الادب وتتهميني في شرفي وقليله الادب فينا منو هسي انتي البتتلبسي وتطلعي ولا انا البطلع مبشتنه قعدت اضحك قلت ليها قادر الله هسي انتي عاوزه تلبسيني تهم قالت لي ما البسك تهم انتي ست قله الادب ولو في قول اتقال فينا بسببك انتي نحنا عايشين في الحله دي سنين مافي زول جاب فينا كلام ماشين جنب الحيط ودي مباراتك انتي يا صايعه يا بتاعت فلان وفلان وباعلي صوت الحله كلها عرفت طبعا فلان وفلان ديل انا من عرست لقيتهم يومي بجو للقهوه في المظله بشربوها مع نسيبتي وعندهم عادي هسي عاوزات اتهمني غايتو بعد قالت كلاما دا لا سمعت لا شفتا مسكتها ليك من شعرا ووقعت بيها الواطه وهي تقلبني وتطلع في بطني وتضربني ما فكتني الا لمن جاني نزيف واغمي علي ودا كلو ورجال حلتهم اعاينو لينا انا تاني م وعيت بي شي الا بعد يوم كامل اظنها البت ماتت في بطني وكنت في التاسع علي وش ولاده راجلي الرجال شالو ليهو الكلام غلط وادوهو ليهو ونسيبتي قالت لي فضحتينا في الحله الحله دي كانو غير كل خير ما بجيبو سيرتنا بي حاجه وراجلي م قصر جا اداني حقي وسمعني وسخ اضني انا لاخر لحظه بعاين بعيوني بس جات الممرضه قلت ليها ولدي وينو قالت لي ولدتي بت وماتت انا ما قدرت استحمل بكيت وجنيت عديل امي جات مخلوعه واخواني واخواتي وجيرانا كلهم انا بقيت ساكته سكات عجيب وقلت لي اهلي سوقوني معاكم اخوي جاب العربيه وساقني مشيت بيتنا وقعدت اسبوعين لا نسابتي سالو مني لا سالت منهم وراجلي زاتو جدعني وفات اهلي حسو انو في حاجه غريبه لانو علامات الضرب في جسمي امي قالت لي صارحيني قلت ليها اصارحك بشنو ولا شنو اصارحك بحظي الوقعني في قريه كعبه ولا بس حظي الوقعني في راجل ليهو بس البسمعو انا وحياتي معاهو ما مهمه اخوي جا قال لي مالو راجلك م جاك تاني قلت ليهو انا طلبت منو الطلاق وفي حين انو انا م طلبت الطلاق بس بطني طمت منو ومن حلتهم كلها اخوي قال لي ماف حاجه اسمها طلاق الطلاق عندنا عيب قلت ليهو عندنا شنو ما تجمعني معاكم انا زوله واعيه وبقول ليك عاوزه اطلق
يا تطلقوني منو يا برتكب في نفسي جريمه واخليكم ترتاحو مني والحمد لله بتي الماتت عشان ما اتقيد بيهو وتغضبوني عليهو امي بقت تبكي وطبعا امي بتحترم محمد وامو شديد قالت لي عايني لي نسيبتك بتريدك قعدت اضحك قلت ليها بتريدني اي صاح بس خلوني يمه ما عاوزه زول يريدني انا عاوزه انفصل منهم وانتو م عارفين الحاصل وبقيت احكي لي امي وامي قربت تدقني قالت لي مالك ومال الجبنات ومالك ومال النسوان والقطيعه بتاعتهم اها جبتي لي نفسك الشبهه وبقت تبكي وتتحسر وطلعوني غلطانه ومافيهم زول انصفني وطبعا الجمره بتحرق الواطيها اتعذبت شديد علي العذاب العلي وبقيت اتحسبن عليهم واحد ورا التاني راجلي الجبرني اطلع في مجتمع غير سيره الناس م فيهو شي وفي نسيبتي الما رحمتني وجاراتي الفيهن بقنو فيني وفي نظر الناس انا الكعبه انصفن روحن واجهت مجتمع غزر واغزر مافي الموضوع رجال الحله الواقفين اعاينو لينا واحد عندو زره نخوه ماف وقفنا وقف الشكله بس تربيه نسوان ما راجيه منهم شي عشت اصعب ايام حياتي عافرت الهم معافره وبديت اتعافا وتميت الاربعين وقررت انزل جامعه اخوي قال لي م تنزلي جامعه انا بتصل لي راجلك اجي اسوقك قلت ليهو تتصل لي راجلي الجدعني وما سال فيني يوم انت ليه عاوز ترخصني ليهو وانا لو انطبقت الارض ع السماء ما ح ارجع ليهو
دخلت جوه اتصلت علي محمد قلت ليهو انا عاوزه اطلق قال لي ليه تطلقي قلت ليهو شنو الليه انا طالبه اطلق انت هسي شغال بي قال لي انتي م عارفه المشاكل العملتيها وبي سببك تهاني طلقوها اتهمتيها في شرفها عملت ليك شنو المره دي قلت ليهو عملت لي شنو انت م جادي ي محمد وكمان بتدافع ليها وبتشن هجوم علي انا حسبي الله ونعم الوكيل فيك ورقتي تصلني قال لي لا ورقتك ما بتصلك وانا م بطلقك واحسن ترجعي بيتك قلت ليهو بيت شنو انت م جادي انا والله اهون لي اموت ولا ارجع حلتكم دي تاني قال لي خلاص انتي حره طلاق انا م بطلق قفلت ليهو الخط في وشو ومشيت هددت اهلي قلت ليهم بتجبروني عليهو بقتل روحي وبرتاح امي خافت وبقت تشاكل في اخوي قالت لي خلاص روقي ما تعملي لينا فضايح اخوي قال لي عملتي فضايح هناك جايه تعملي هنا قلت ليهو ناس حلتنا بعرفوني كويس ومافي فضيحه بتجيني لو انتو عاوزين تنفضحو فعلا رجعوني للراجل دا واغصبوني عليهو امي قالت لي اخواني البت دي انا بعرفا سكوته بس شكلو كتر عليها ونحنا ما عارفين الحاصل والحقيقه ما نبقا عليها نحنا ونسابتها تطلقوها منو بس لو م طلقتوها بسوقا وبطلع بيها امي فهمتني وانصفتني الحمد لله اخوي قال ليها قلتي كده يا حاجه طيب ان شالله واتصل لمحمد ومحمد سمعو فارغ قال ليهو بدل تربي اختك تجي تقول تطلقها اخوي بقا يسب ليهو وحلف امش اقتلو امي مسكتو منو وقالت ليهو خليهو بس اختك لو وزعتها كيمان ما بديهو فيها كوم
مرت الايام ورجعت الجامعه وبقيت ملتزمه وزوله في حالي الجامعه البيت مرت الايام والشهور اتصلت علي مني احترت فيها قلت ليها خير يا صحبه السوء قالت لي كتر خيرك الحاله دي انا جايبه ليك شمار راجلك قلت ليها احتفظي بيهو لنفسك قالت لي لا الا اوريك طبعا دي شمشاره درجه اولي قالت لي تهاني اتزوجها محمد انا راسي لفه عديل تهاني كبيره وكيف محمد اتزوجها وكانت متزوجه ولد جيرانهم قلت ليها محمد ان شاء الله يعرس امو م عندي فيهو شغله وقفلت الخط وبقيت اتعوذ واستغفر وقلت معقوله محمد يعرس المره الكبيره دي …………….يتبع