رواية شلة بنات الفصل الخامس والثلاثون 35 والاخير بقلم شذى عبدالمكرم
عدت فترة حملي وكل مرة كنت ببقى تقيلة وبس خليت النكد شوية بس بقيت جرسة شديد ودخلت التامن وجا الشتا والجو بارد
_ سام المفروض امشي لامي بعد دا
__ انتي عاوزة كدا؟
_ ايي لانو بقيت تقيلة وانت شغال فصعبة علي
__ مدام فيها راحتك حاوديكي . ابتسمت ليهو بحب وبقينا نشاهد في التلفزيون هو في جلسة وانا في السرير متغطية بدفاية وقاعدة في الصالة فجأة مسك تلفونو وبقى شغال بيهو شيلت تلفوني ورسلت ليهو رسالة في الواتس كتبت ليهو
برد الشتاء يحتاج حضنك من الاخير يعني♥️🙈
قرأ الرسالة وضحك وعاين لي دخلت رأسي جوا دفايتي ضحك تاني طلعت رأسي بالراحة عاينت ليهو
سام: تعالي . نزلت بالراحة ومشيت ليهو مسك الدفاية ولفانا بيهو الاتنين وبقينا نشاهد التلفيزيون وانا مبسوطة شديد
بعدها مشيت لامي واستقبلتني واهمت بي لمن ولدت وجيبت ولد سميناهو غيث واهل راجلي جو سلمو علي وباركو لي بس لسع في حساسيات بينا وعمتي للان في مطاعنات من اتجاهها بس كنت بتجاهل عشان سام ما يقع ضحية بينا جوني شلتي ودي احلى ما في الموضوع
روز: يحليلا قمر فقدتها
هديل: كلنا والله
نوسة: رأيكم شنو نتصل ليها فيديو كول
ريان: فكرة حلوة . بالفعل اتصلنا ليها وسلمنا ليها كلنا
قمر: ياااخ اشتقت ليكم نفر نفر
روز: حتى نحنا اشتقنا ليكي حبيبتي كيف حياتك ماشة
قمر: والله الحمدلله بس الوحدة كاتلاني
نوسة: ما جاية قريب
قمر: احمد ما عندو اجازة قريبة
هديل: حياا انا . واتونسنا معاها وغيرنا ليهو جو وقفلنا منها
خلصت فترة النفاس بخير ورجعت لبيتي و لراجلي
سام: اخيرا رجعتي البيت كان فاضي شديد بدونك
روز: معناهو انا مهمة
سام: شديد
روز: والله انا ذاتي فقدتك واشتقت لبيتي وانا اشتقت ليك
سام: انا اكتر طبعا ناس امي بكرة حيجوكي . بقلبي قولت الله يستر
روز: ينورو
سام: من قلبك؟ . وقام ضحك ضحكت معاهو
روز: لالا من كليتي . وضحكنا
بعدها اليوم التاني قومت رتبت البيت وجهزت بعض الحاجات لاستقبالهم وسام ساعدني شوية وخليتو اكتر يمسك لي غيث عشان اعرف اشتغل لمن خلصت الحمدلله كنت محننة جاهز مشيت لبست ولبست غيث وبقينا منتظرينهم وصلو واستقبلناهم غيث قام يبكي قومت عشان اديهم موية
سام: خليكي انا بديهم موية
ام سام: كيف يعني انت تدينا موية مرتك مكسرة؟ . عرفتها دايرة ليها مشكلة غمضت عيوني بحاول امسك اعصابي
سام: وفيها شنو لو اديتكم موية يا امي ومرتي ما مكسرة بس ذي ما شايفة ولدي ببكي وانا حاجة ذي دي ما برضاها ابدا
روز: سام امسكو انا بجيب الموية
سام: لالا خليكي . ودخل المطبخ فضلهم الموية وحتى انا اداني ابتسمت ليهو بحب وقعد جنبي وغيث سكت قومت ختيتو في رجل سام وقومت جيبت ليهم العيدية وجيبت العصير وقعدت جنب سام وبقيت اشاغل في غيث قاصدة عشان اميل على سام عشان احرق قلب بنات عمي الجو مع عمتي
ام سام: ليه ما عاملة بخور في بيتك انتي والدة جديد المفروض يكون دايما في بخور . ما اتكلمت اشرت ليها على الركن كان المبخر مولع
ام سام: ليه ما عندو ريحة
روز: شكلو كعب عليك الله عمتي اعملي لي واحد حلو لو ما فيها تعب . سكتت ما اتوقعت اقول ليها كدا وانا عملت كدا قاصدة عشان اسكتها وفي نفس الوقت اخليها تعمل لي واحد يعني عصفورين بحجر واحد
بت عمو: خلي امك تعملو ليكي ليه تتعبي عمتي
سام: وفيها شنو يعني امي ذي امها برضو ولا ما صح يا امي . هنا لو ما كانو قاعدين كان بوست سام شديد ياااخ حبيتو شديد
ام سام: صح كلامك حأعملو ليكي
روز: ربنا يحفظك لينا
قعدنا اليوم بصعوبة كلو مرة بضربو بالكلام بس انا برد بطريقة غير مباشرة وسام ما مقصر واقف في ضهري برد حار حار بطريقة باردة حبيتو حب الليلة دا لمن خلص اليوم مشى وصلهم ورجع نومت غيث سريع مجرد ما دخل البيت اتعلق في رقبتو
روز: ياااخ انا بحبكك يا سمسوم . قام ضحك
سام: والله انتي دي تعبانة مع اهلي ديل شديد
روز: عشان شيلت ولدهم بس يشمو قدحك تاني والله قلعتك قلع من بنات عمك عشان كدا شاميني بس يبقى ليهم بمبي . قام ضحك
سام: انتي ذاتك ما هينة
روز: من الموضوع فيهو سام معناهو موت بس . قام ضحك وضماني شديد
ومرت الايام وطبعا حياتي كانت فيها صعوبة مع اهل سام بس في النهاية عمتي لانت من اتجاهي لمن شافت انو سام متمسك بي وبحبني وجيبت منو اربعة اولاد وحتى لمن مرضت وجات قعدت معانا مارضتها هنا اتصاحبنا وزال الحساسية البيناتنا لانو ما نست لي الجميل ابدا وسام اخيرا ارتاح من انو يحاول يكون محايد وكان نعم الزوج بالنسبة لي كان بفهمني قبل ما اتكلم
ممكن اقول انو هو
"إنّ مَوطني الحَقيقي هو ذاكَ القلبُ الّذي يَعرفني أكثر من أيّ شخص، و يَقبلني رُغم كُل شيء، و يَحميني كما يجب، و يَعودُ إليّ و أعود إليه مَهما حدث♥️."
وهنا انتهت قصتي مع سمومتي
__________
من جانب نوسة
اتقبلت فكرة انو تاني ما حألد اكتفيت بيمنى ويمان كانو ملايني لي حياتي وحب رامي لينا التلاتة من اهتمامو خلاني ابقى طفلة بس ما بفرزني من اولادو ابدا اولادي كبرو وكبرت معاهم واصبح عمرهم ستة سنوات ودخلو المدرسة وبقو مشاغبين وحتى انا بقيت مشاغبة ذيهم مرة بعد المغرب رامي كان عندو عملية ما رجع لسع جو التوأم
يمان: نوسة
نوسة: قول ماما هوووي . وقرصتو قام ضحك بقيت اكلكل فيهو وهو يضحك
يمان: خلاص ماما ماما
نوسة: اها في شنو اوع يكون جايين بمصيبة
يمنى: دايرين نفتح لابتوب بابا . خلعت عيوني
نوسة: شنوووو انتو جنيتو
يمان: عليك الله يا ماما خمسة دقايق ونقفلو
نوسة: ابوكم حيقتلونا . حنسوني
نوسة: خلاص سريع ونقفلو قبل ما يرجع
الاتنين: يسس . وقامو ينططو دخلنا الغرفة وقعدنا في السجادة تحت وربعنا وفتحنا اللابتوب ودخلت تاريخ زواجنا وفتح معاي
نوسة: يمان جيب لي موية . جرا مشى وانا ويمنى بقينا ننخس فيهو ويمان جا راجع
يمان: ماما هاكي . اتعتر بالسجادة وانكفى في اللابتوب والكباية انكسرت واللابتوب انبرش عديل وجرحو قزاز الشاشة في كوعو بس ما انتبهنا ليهو من الخلعة بتاعت اللابتوب بقينا فاتحين خشمنا من الخلعة ويمان ما عرف يبكي عشان جرح ايدو ولا ينصدم معانا من اللابتوب الكسرو
نوسة: الليلة الموت جانا والله . يمان لمن استوعب الحصل وانو كسر لابتوب ابوهو بتاع الشغل قام يبكي وانا الخوف قطع قلبي لانو محذرنا منو
نوسة: يمان انت الليلة حيقتلوك حيقتلوك . قام يبكي شديد ما عرفت اضحك على منظرو ولا ابكي لانو رامي حيقتلنا كلنا
نوسة: اسكت
يمان: بابا حيقتلنا
نوسة: اسمعوني هنا انتو الاتنين انكار حتى النهاية يوجد موت ولا يوجد اعتراف . جاني صوت رامي من ورا
رامي: دا بالنسبة لشنو . من الخلعة قومنا وقفنا تلاتتنا وهم وقفو وراي ومسكوني من ورا وانا بقيت في وجه المدفع رامي عاين بالجنبة لقى اللابتوب بقى في خبر كان
رامي: دا الاتاري حق التوأم صح؟ . هزيت برأسي بمعنى لالا . مشى يشوف الحطام دا شنو رفعو لقى اللابتوب حقو غمض عيونو شديد وصرخ فينا
رامي: موش حذرتكم من الزفت دا انو ماف زول يقرب منو . كلنا اتنفضنا مع صوتو ويمان بقى يرجف وراي
رامي: منو عمل كدا
نوسة: نحنا التلاتة هبشنا ويمان مشى يجيب لي موية واتعتر وهو ما منتبه ووقع فيهو دا الحصل بس انا بتحمل المسؤولية كلها وخبيت يمان وراي اكتر عشان كان خايف . مسك رأسو وقعد في السرير ونحنا لسع واقفين في محلنا
رامي: انا محذركم منو ولالا
التلاتة: محذرنا
رامي: لو قتلتكم ربنا بحاسبني؟ . ماف زول رد صرخ فينا
رامي: جاوبوني؟ . بسرعة ردينا
التلاتة: لالا
رامي: تمام يمان تعال هنا . مسك فيني اكتر التفت عليهو وميلت عليهو
نوسة: امشي ليهو ما حيعمل ليك حاجة . مشى وقف قدام ابوهو وهو ببكي
رامي: كدا اياديك . وبقى يفحص فيهو لقى كوعو مجروح انا اتخلعت جريت عليهو
نوسة: جرحتو متين
يمان: لمن وقعت . رامي جاب الاسعافات ضمدو ليهو
رامي: سريع جهزو ملابسكم
نوسة: مودينا وين
رامي: بيت ابوكي خلاص انا تعبت منكم
نوسة: رامي انت جادي؟ . حمر لي
رامي: شافاني بهظر؟ اصلي المغرب القاكم جهزتو ملابسكم . كان جادي شديد
نوسة: طردونا يا اولادي خلونا نجهز ملابس . مشينا ستفنا ملابسنا اي واحد غيارين وهو صلى
رامي: اطلعو . طلعنا هو كان معصب شديد
نوسة: رامي نحنا اسفين
رامي: انتو عارفين اللابتوب دا فيهو شغل المستشفى كلو وحذرتكم بس انا منو عشان تسمعو كلامي
التوأم: بابا اسفين . ما رد وصلنا واشكانا لابوي و
رامي: عمي دفعتهم ليك خلاص تاني ما بلزموني ديل دمروني عديل . ابوي ضحك
ابوي: بس انا ما بقدر اتحملهم توأمك ديل مصايب انا كبير سن ما بقدر ليهم
رامي: بتعرف زول ممكن ابيعهم ليهم؟
ابوي: ماف زول بقبل بيهم الا ترجع بيهم بس وربنا يعينك
رامي: لالا تمام ادعي لي بس يلا اطلعو قدامي . ما صدقنا شيلنا شنطتنا ورجعنا وناس امي ضحكو فينا ركبنا العربية والله دراما عجيبة
نوسة: رامي
رامي: ما عاوز اسمع صوت واحد فيكم نهائي لمن القى زول ابيعكم ليهو
يمان: في الملاهي هناك واحد ببيع شفع . طبعا يمان ذكي ذي ابوهو جاها بفوق
رامي: متأكد؟
يمنى: يمان كلامو صح في الملاهي موجود موش يا ماما
نوسة: صح كلامكم وبعرف مطعم كدا فيهو واحد ببيع زوجة وشفع لو ما لقيناهو ممكن بعدها نشوف الملاهي
التوأم: ايي ايي . رامي غصب عنو ضحك
رامي: والله انتو مصائب بس بحبكم رغم الحصل كلو
التلاتة: ونحنا بنحبك . وبعدها اعتذرنا ليهو بطريقة حلوة وقبل اعتذارنا وطلع بينا على المطبخ وبعدها الملاهي رغم انو كان تعبان قضينا يوم حلو ورجعنا
الإهتمام : أن تشعر بأن شخصًا يحتويك بكل طرق المحبة في كل الظروف..!♥
دا رامي بأختصار
"وبعد سنواتٌ من الآن أُحب أن أكتبُ يومًا ما إنني أفنيت عُمر على رجلٍ يستحق."♥
وهنا انتهت قصتي مع رامي
_________
من جانب نبأ
في فترة حملي عمتي كانت مدلعاني شديد ودا مخليني مبسوطة شديد و اي حاجة اشتهيتها بتجيبا لي وحتى قبل ما اطلبا او بتخلي وحدة من حمواتي تعملو لي مرة شاكلت مع مراد وجاط فيني
_ بشتكيك لماما حنان " امو" كيف تجوط فيني . رفع لي حاجبو باستغراب طوالي لبست توبي ومشيت لعمتي واشتكيتو ليها رسلت واحد من الشفع نادوهو جا عمتي جاطت فيهو ما خلت ليهو حاجة
ام مراد: كدا تاني بس زعلها عشان تشوف حاجة مني ما بتعجبك
مراد: امي!!!
ام مراد: بلا امي معاك انا حذرتك بس نبوية خط احمر عندي
مراد: تمام . وطلع
ام مراد: ما تزعلي تاني ما حيزعلك . هزيت ليها رأسي بمعنى تمام
نبأ: عمتي نفسي في سلطة اسود بس لو عملتها نفسي حتطلع منها
ام مراد: جدا حبيبتي حاكلم ميار هسي حتعملها ليكي
نبأ: تسلمي حبيبتي . قومت براحة مشيت بيتي لقيت مراد قاعد عاين لي لويت ليهو خشمي
مراد: انا تشكيني لامي؟
نبأ: ايي بشتكي تاني برضو بشتكيك
مراد: مراد انت ذاتك غلطان البتجيب ليها سلسلة مملكة البلاغة وهي من اقل مشكله بتشكيك حتى ما راعت للعشرة البينكم . مشيت عليهو
نبأ: مراد احلف . ما رد لي قربت ابكي هزيتو شديد
نبأ: مراد اتكلم جيبت لي منهم شنو . برضو ما ادى اي ردت فعل
نبأ: مراد اتكلم ياااخ والله اشتكيك تاني . قام ضحك
مراد: نبأ امشي اشتكي خلي امي تجيبهم ليكي محامية الدفاع
نبأ: اسفة والله ما قاصدة انو اشتكيك بس انت جوطت فيني . وعاينت ليهو بزعل ونزلت لي دمعة من وين ما عارفة لمن شاف دمعتي قلبو حن لي
مراد: خلاص ما تبكي بس اوع تكرريها . هزيت ليهو رأسي بمعنى تمام قام مشى على الدولاب طلع لي الكتب طلع جايبهم لي الاربعة " ايكادولي . أوبال . كويكول . أمانوس " . مسكتهم بفرحة وحضنتهم
نبأ: شكرا شكرا ياااخ انا بحبكك شديد بس ما بوعدك انو ما اشتكيك يلا باي ماشة اشوفهم لماما حنان . قام ضحك فيني رسلت ليهو بوسة في الجو وطلعت وانا مبسوطة شديد مشيت لعمتي
نبأ: ماما حنان شوفي مراد جاب لي شنو . بقيت اشوفها ليهو وانا متحمسة كأني طفلة وهي كانت مبسوطة لانبساطي
نبأ: ديل مملكة البلاغة للكاتبة حنان لاشين افضل كاتبة ياااخ ما مصدقة
ام مراد: دا موش مراد القبل شوية شاكلناهو ؟. قومت ضحكت
نبأ: هو ذاتو . وضحكنا وبقيت احكي ليها عن السلسلة دي لمن ميار جابت لي سلطة الاسود قعدت اكلت مع عمتي بمزاج لاني كنت مشتياهو شديد
كل ما مراد يزعلني بشتكيهو وعمتو بتشاكلو لي وبرجع بعتذر ليهو لانو بكون جايب لي حاجة معاهو لمن ولدت بسلام وخليت عمتي تختار الاسم لانو ليها الفضل في فترة حملي كانت بترعاني كأني بتها فخليتها هي تختار الاسم وكانت مبسوطة انو خليتها هي تختار الاسم وربيناها مع بعض كانت واقفة جنبي في كل خطوة كانت ام لي قبل ما تكون نسيبة بالنسبة لي وحمواتي كانو اخواتي بالجد
انا ومراد جمعنا كتاب وبعدها كتبنا قصتنا الخاصة
قبِلتُ بِك صديقًا لأيامي وحبيبًا لرُوحي، أستقريت بقلبي وصرت لرُوحي الرُّوح، أصبحت لي عمراً و حباً ورفيقاً ❤️
وهنا انتهت قصتي مع مراد
__________
من جانب هديل
انا لمن اقول حمزة معناهو الكلام منتهي حروف اسمو بتكفي وبتوفي
الحاء: حنية وحب
الميم: مودة و مسنادة
الزاي: زاد الروح
التاء: تفاهم
هو سندي وعزوتي وابو بتي اختياري ليهو كان صح كان نعم الاب لروز كان بحبها اكتر مني حتى هي مقربة منو اكتر مني
_ ابو روز
__ نعم
_ قاعد تعمل شنو
__ شغال في مشروع
_ ايوااا ومشروعنا حتبداهو متين . رفع رأسو من اللابتوب
__ مشروعنا بتاع شنو
_ بهظر بس
__ كدا عايني لي . عاينت ليهو
__ تعالي هنا انتي في حاجة واقفة ليكي في حلقك ملاحظ ليكي من قبيل . رقدت روز النامت ومشيت ليهو
_ يعني مركز معاي
__ هديل حتى لو شغال بركز معاكم انتو الاتنين هسي اقول ليكي الحصل شنو انتي من قبيل بتحاولي تنومي روز عشان عندك موضوع معاي حافظك انا وروز عاوزة تلعب لانو اكيد نامت النهار بس نومتيها غصب لحاجة ضرورية لانو انتو الاتنين بتساهرو لمن تنومو البنهار وتاني حاجة انتي بكرة عندك مقابلة مع دكتور الاسنان بخصوص الفرقات دي واحتمال كبير تركبي تقويم لاني انا ما شايف اي فرق حصل ويوم الخميس روز عندها تطعيم ولازم أخد اجازة عشان امشي معاكي لانو لو مشيتي براكي حترجعو بدون التطعيم ذي المرة الفاتت لانو زور حتبكي وانتي ما حتتحملي والسبب التاني انتي ذاتك بتخافي من الحقن وتاني حاجة التلاتاء الجاي بتكون اجازتي والمفروض ارتاح فيهو بس لا انتي وبتك حتجوني عشان تقنعوني انو نطلع على واحد من بيوت الاهل زيارة وكدا انتي حتقلبي لي عيونك ذي الكديسة وبتحرشي بتك وهي تمسك طرف قميصي وتشبكني بابا بابا وبتحاولو تقنعوني وانا بكون مقتنع انو في نهاية المطاف حاوافق بس بحب انكم تحنسوني شايفة كيف . عاينت ليهو بأستغراب
هديل: حمزة انت حافظنا كدا كيف؟
حمزة: والله عشان بحبكم مركز معاكم في عز انشغالي وشغلي مرات اتذكر مواقفنا مع بعض وبضحك يعني انتو الاتنين دايما في عقلي ما بتفارقوني . بعد كلامو دا حضنتو شديد
هديل: ياااخ انا اكتر بت محظوظة في الدنيا دي ربنا يحفظك لينا
حمزة: ويحفظكم لي يا رب اها احكي لي الحاصل شنو
هديل: امممم الموضوع انو روز حاسة بالوحدة وعاوزة ليهو اخ يونسها
حمزة: طيب وين المشكلة نجيب ليها اخ طوالي
هديل: ما هو الموضوع ما كدا
حمزة: اها الموضوع كيف
هديل: انا حامل
حمزة: كدا احلفي
هديل: والله حامل . حضني شديد وسلم علي في رأسي
حمزة: الف مبروك حبيبتي
هديل: الله يبارك فيك وكدا العائلة حتزيد فرد جديد
حمزة: ودي احلى حاجة نفسي اكون معاك عائلة كبيرة
هديل: حنكونها ان شاءلله
المرة دي تعبت في الحمل شديد لمن ضعفت شديد قربت اموت وحمزة كان خايف شديد بس ولدت بخير وبعدها الاهتمام بي زاد لمن رجعت لي صحتي وعيشت مع راجلي واولادي احلى عيشة وكونت عائلة كبيرة من خمسة اولاد وكان خير سند لي
مره صاحب ومره حبيب وألف مره وطن وأمان❤️
___________
من جانب ريان
مر على زواجي تلاتة سنين وما حصل لي حمل مشيت لكم دكتور قال انا سليمة بس دا قضاء ربنا الموضوع دا كان عامل لي شوية نفسيات وكم مرة حسيت بأعراض الحمل وفحصت طلع حمل كاذب الدكتور قال لي دي كلها اوهامات لاني مصرة على موضوع الحمل لمن اخدت قرار مع نفسي مشيت لريان
_ ريان
__ نعم
_ عندي موضوع معاك بس بتمنى تفهمني وما تجوط
__ احكي
_ دايرة اتبنى لي طفل
__ بتهظري صح؟
_ لالا
_ فكرة ذي دي ما تفكري فيها حتى . وقام مشى خلاني بقيت ابكي ليه هو ما بفكر فيني وما حاسي بي
بس انا ما استسلمت ابدا حاولت معاهو تاني وتالت ورابع وخامس شهر كامل بحاول اقنع فيهو لمن موافق
__ تمام بس لازم نتكلم الاسرة بالقرار دا
_ تمام . كنت مبسوطة اخيرا حيكون عندي طفل اربيهو
مشينا لاهلو بالاول لاني مسبقا مكلمة امي ووافقتني الرأي يعني من ناحية اسرتي شبه مضمون بس اسرتو هو لمن كلمناهم جاطو ورفضو
ام ريان: انت لو عاوز جنا اتزوج تاني بس ما تجيب لينا طفل جنسو وفصلو شنو ما عارفين . انا بكيت طوالي
ريان: يا امي موضوع انو اتزوج تاني دا اقفلوهو دا ما موضوعنا نحنا بنتكلم عن التبني
ام ريان: نقفلو ليه داير ولد اتزوج تاني غير كدا لا
والموضوع جاط شديد وماسكين ليهو في الزواج التاني انا لمن شوفت انو كدا حأخرب زواجي
_ ريان خلينا ننسى فكرة التبني كدا حيجبروك تتزوج تاني وانا ما حأتحمل . وبقيت ابكي شديد
__ ماف داعي للبكي لانو انا حاجة ما عاوزها ماف زول بجبرني عليها اطمني واما موضوع التبني ماف طريقة يقتنعو بس . اما لمن كلمنا اهلي كانو ما عندهم مشكلة اهم حاجة سعادتي
بالفعل مشينا الميتم واتبيننا طفل عمر ستة اشهر حلاتو من شوفتو حبيتو وقولت دا بس هو وتمينا الاجراءات كلها وادونا ورقو وبعدها ريان سجلو بأسمو عشان شهادة الميلاد وسميناهو احمد اهلو كلو رافضين كل الرفض بس انا متقبلاهو بكل قلبي حتى ريان في البداية كان شبه ما متقبل بس عشان يرضيني وعشان حالتي النفسية وافق بس شوية شوية اتعود عليهو ولمن احمد كبر واول كلمة قالها بابا ريان فرح شديد واتقبلو بالجد احمد عوضني شديد
احمد تم سنتين وبقى يتكلم ويمشي شوية شوية وكلامو مكسر بديت احس بأعراض الحمل بس اتغاضيت نظر لانو فكرتو حمل كاذب ذي كل مرة ما اديت اهمية للموضوع كتير في يوم كنت تعبانة شديد وراقدة واحمد كان بلعب في الارض فجاة جا ركب في السرير وبقى يضربني في وشي
احمد: ماما ماما
ريان: حمودي عليك الله اقعد ساي ماما عيانة
احمد: ماما عيانة
ريان: ايي ارقد جنبي . فهمني ورقد جنبي وبقينا راقدين لمن ريان رجع من الشغل
احمد: بابا
ريان: تعال يا حبيبي بابا . قام وقف فوق في السرير وريان شالو فوق وسلم عليهو
__ مالك راقدة كدا
_ ما عارفة تعبانة شديد
__ ما تكوني عيانة
_ ما عارفة والله
__ خلاص قبل ما اغير ورح المستشفى . هزيت رأسي بمعنى تمام قومت بتعب لبست عبايتي وطلعنا المستشفى عملو لي الفحص وما وروني النتيجة شيلناها ومشينا للدكتور
الدكتور: انتي حامل . قلعت عيوني
ريان: مستحيل طبعا . اتخلع من ردي فهم اني ما عاوزة
الدكتور: كيف مستحيل . قومت ابكي كأنو مات لي زول الدكتور اتخلع وعاين لريان راجلي
ريان الشب: من زمان مستنيين اللحظة دي ليها خمسة سنة بتحلم باليوم دا
الدكتور: ايوااا الف مبروك ربنا يتم ليكي على خير
ريان: دكتور ما ممكن اعيد الفحص احتمال ما يكون صح . ضحك فيني
الدكتور: صح لانو الاسبوع الجاي حتدخلي في الشهر التالت يعني واضح جدا . تاني بكيت وطلعنا وطول الطريق ببكي لمن وصلنا ودخلنا ريان ختا احمد وجا حضني شديد وبكينا الاتنين
__ اخيرا ياااالله
_ للان ما مصدقة والله يا ريان
__ صدقي بعد تعب السنين دي كلها
_ احمد حيكون عندو اخوان
__ ان شاءلله يارب
بعدها بشرنا الخبر للاهل
ام ريان: بعد دا ربنا رزقك بجنا رجعو الجيبتو دا . من قالت كلامها دا حضنت احمد شديد الكان في رجلي
ريان الشب : قصدك شنو يا امي
ام ريان: قصدي واضح احمد دا ترجعو محل جيبتو موش مرتك كانت دايرة جنا وهسي خلاص . عاينت لريان بعيون دامعة لانو خوفت يوافق امو الرأي
ريان الشب: امي احمد دا ولدي والبكر بتاعي كل ما استوعبتو بدري احسن والله بضحي بالجنا الجديد ما بضحي بأحمد . قلبي فرح بكلامو لانو حتى انا بضحي بالجديد بس احمد لا لانو احساس الام عيشتو معاهو ولمن قال لي ماما مستحيل انسى اليوم داك يعني الامومة كلها عيشتو معاهو
ريان الشب: ريان قومي خلينا نرجع بيتنا شكلو ما مرحب بينا
ام ريان: كيف الكلام دا
ريان الشب: امي كونو ما ترحبي بولدي معناهو ما مرحبة بي . قال كدا وطلعنا وانا حاضنة احمد علي لمن نام بوستو كتير لمن بقى يتململ في نومو وريان لاحظ لي
__ ما تخافي مستحيل نتخلى عنو مهما حصل . هزيت رأسي بمعنى تمام وكنت مطمنة وميلت عليهو ونومت صحيت بريان بصحيني انو وصلنا ونزلنا ودخلنا بيتنا
الايام مرت وولدت وجيبت بت وبعدها جبيت ولد وتوالت الولادات واحمد كان البكر بتاعي وبحب اخوانو شديد وكان سند ليهم وحبي ليهو اكتر من حب اخوانو لانو البكر المحبب لقلبي حتى كان محبب من ابوهو لانو هادئ ومطيع شديد وشاطر وبعامل اخوانو بحب وفي النهاية اهل ريان اتقبلوهو بصفاتو الحلوة دي ولمن وصل عمر معين كلمناهو بالحقيقة بس اتقبلها بقلب رحب وتعاملنا ليهو ابدا ما اتغير بالعكس حبنا زاد اتجاهو وكنت بعتمد عليهو في اي حاجة كنت فخورة بيهو شديد
اما ريان للان صحبي ذي زمان ولسع مشاكلنا الحلوة قاعدة وانقسمنا لفريقين انا وولدي احمد في فريق وريان وباقي اولادو في الفريق التاني
ريان البت: ابوحميد شايف ابوك واخوانك ديل . جا حضني شديد وسلم علي في رأسي شديد
احمد: خليهم يا ست الكل ارح مطلعك
ايڤا: احمد طالعين وين
احمد: مكان انا وامي بس
ريان البت: ايي ما توريهم يا سندي ورح . وطلعنا خليناهم ومشينا اكلنا ايسكريم واتكلمنا في مواضيع كتير وقرايتو ماشة كيف وخططو المستقبلية
احمد: امي بعد اخلص تالت داير اقرأ برا السودان
ريان: خليك عارف انت بس جيب درجة حلوة وانا بقريك في تركيا او روسيا او اي مكان انت عاوز والله لو امريكا بقريك
احمد: بالجد يا امي
ريان: والله بس انت اجتهد لي لانو انت سندي وسند اخوانك بعدين
احمد: انا بوعدك حتكوني فخورة بي
ريان: وانا واثقة من الحاجة دي
خلصنا قعدنا ورجعنا وكلمت ريان بالحديث الحصل بينا ووافق انو احمد يقرأ برا
وكدا نختم حكايتنا انا وريان توأم الاسماء
"يارب أجعلني زوجته الأولى والأخيرة وحبيبته الاولى والأخيرة ، اللهم أجعلني وإياه من الفائزين في الحب ، اللهم أكتب لنا نصيباً معاً يالله ، اللهم أنت الواحد الصمد رب قلبي وقلبه ، اللهم أجعله زوجاً وسنداً صالحاً ، أباهي فيه أهل السموات و الأرض يارب العالمين♥️."
__________
من جانب قمر
الغربة كانت شوية صعبة علي شوية لانو ما معاي زول بس احمد كان مخفف عني رغم شخصياتنا المختلفة تمام بس كان نعم الزوج حتى بقيت اتكلم ذيو شخصيتو اتطبعت فيني ما قدرنا نرجع السودان الا بعد خمسة سنوات رجعت بطفلين ولقيت الشلة اي وحدة عندها جيش اطفال كونا برانا قبيلة كاملة اجتمعنا في بيت روز واحلى جمعة كانت
حياتي ما فيها تفاصيل كتيرة بس كنت سعيدة فيها ربنا يحفظ لي اولادي وراجلي
صرت أشبهك ..
أخذت من طبعك كثير و لهجتك
حتّى الكلام اللّي سرقته من شفاهك
إذا حكيته أبتسم بنص الحكي و أتذكّرك ..♥
تمت بحمد الله