شايفين العربيه الهيونداى سوناتا الحمره اللى جايه من ناحية الابراهيميه رايحه ناحية بوابة نادى سبورتنج اللى على الترام دى ؟
دى ساره فهمى الخولى طالبه فى كلية صيدله سنه تانيه بتعشق الجرى والفروسيه والتنس وبنت الصيدلى المعروف فهمى الخولى صاحب اربع صيدليات وبيدير عشرين صيدليه بنظام المشاركه وعنده شركة استيراد ادويه وبيشارك بالتمويل فى اى مشروع يشوف انه مربح وناجح ومحتاج تمويل .
ساره منظمه جدا كل يوم الساعه تلاته بالظبط تدخل النادى تلعب جيم تنس وتقابل بعض اصدقائها وتخرج الساعه خمسه بالظبط تروح تذاكر والفجر تطلع تجرى على البحر من الساعه خمسه للساعه سته وترجع تاخد شاور وتروح على الكليه ومالهاش علاقات ولا تجارب .
ساره دخلت النادى خلاص
.........................
فى يوم تانى
الساعه دلوقت تلاته الا خمس دقايق وساره جايه من الابراهيميه رايحه النادى . ساره بتحب تدخل من الباب اللى على الترام لكن النهارده يوم غير عادى !!!!!!!
شايفين العربيه المرسيدس السوده اللى جايه من كليوباترا رايحه ناحية النادى وسايقها شاب من سنى تقريبا لكن عنده سكسوكه منمقه قوى وشعره ناعم بنى محمر شويه وعيونه زرقه لكن مش واضح ان كان ده لون عينيه الطبيعى واللا عدسات متطوره جدا ومش باين انها عدسات .
الشاب ده بيسوق بتهور جدا وراجع من امريكا قريب واسمه ..... اوببببااااااااا كان حيخبط عربية ساره لكن ربنا ستر
مراد : اووووففففف انا اسف . اسف اسف اسف
ساره جسمها كله تلج ونشف ومش قادره تنطق
مراد : انتى حصل لك حاجه ؟ انتى كويسه ؟
ساره : الحمد لله الحمد لله ربنا ستر ابقى خلى بالك حضرتك انت جاى مخالف
مراد : انا اسف انا لسه راجع من امريكا قريب ولسه مش حافظ اتجاهات الشوارع هنا
ساره : لكن انت كنت طاير بالعربيه
مراد : معلش انا اسف جدا يا انسه انتى داخله النادى ؟
ساره : اه اه داخله النادى اه
مراد : طيب بعد اذنك انزلى
ساره : ليه ؟
مراد : حادخلك النادى جوه وارجع اخد عربيتى وادخل مش حاسيبك تسوقى وانتى كده ابدا
ساره : انا داخله جوه خالص عند ملعب التنس عند المبنى الاجتماعى حترجع كل ده مشى ؟
مراد : هاهاها كل ده ايه ؟ انا كل يوم اطلع اجرى من ميامى للشاطبى وارجع دى حاجه بسيطه جدا انا مجنون رياضه وبالذات المشى والجرى
ساره : معقوله انت بتحب المشى والجرى كده ؟
مراد : اه والفروسيه كمان
ساره : دى فرصه سعيده انا ...
مراد : لالالا مش حاتعرف عليكى دلوقت لما ندخل جوه ونقعد نشرب قهوه مع بعض ياللا انزلى
مراد قفل عربيته ووصى عليها الامن ودخل النادى بعربية ساره وراح جاب عربيته على ما هى خلصت جيم التنس وهى مش لعبته المفضله وبعد كده راحوا قعدوا فى الكافيه اللى على بحيرة الاطفال وطلب لنفسه قهوه وهى طلب لها ليمون فريش وبدا يعرفها بنفسه
مراد : اعرفك بنفسى انا مراد فهمى
ساره : اخويا يعنى انا اصلى اسمى ساره فهمى
مراد : على اسم اختى بس هى عايشه فى المانيا
ساره : صدفه سعيده
مراد : فعلا صدفه سعيده جدا يا انسه على فكره انا اسمى مراد فهمى عبد الله
ساره : وانا اسمى ساره فهمى الخولى بنت فهمى الخولى الصيدلى المعروف
مراد : للاسف ما سمعتش اسمه قبل كده اصلى لسه راجع من امريكا قريب ما كملتش اسبوعين
طبعا افتكرتم الاسم مراد فهمى عبد الله اللى انا حولت فلوسى من ليبيا عليه والوحيد فى مصر اللى اقدر اثق فيه واللى لسه راجع من امريكا من اسبوعين رغم انى حولت فلوسى عليه من اكتر من ست شهور ؟؟؟ ما علينا خلينا فى المهم .
ساره ومراد قضوا اليوم بالكامل مع بعض فى النادى واتفقوا يتقابلوا تانى يوم الفجر يجروا على البحر والحقيقه مراد نفسه طويل وما بيتعبش بس ساره برضه رياضيه وما بتتعبش بسهوله وبعد الضهر عزمها على الغدا فى النادى وابتدت اللقاءات بينهم تبقى يوميه وابتدى يحكيلها عن نفسه
ساره : وقعدت فى امريكا قد ايه ؟
مراد : اربع سنين
ساره : انت كنت مسافر شغل ؟
مراد : اه يعنى تقدرى تقولى شغل . فراغ . بحثا عن مغامره كده يعنى
ساره : وكنت بتشتغل ايه هناك ؟
مراد : فى السيارات المستعمله كنت باشترى وابيع
ساره : يعنى ما كانش عندك وظيفه ؟
مراد : وادور على وظيفه ليه ؟ انا كنت باكسب فى الاسبوع قد السالارى بتاع الوظيفه فى تلات شهور انا كنت عامل لنفسى كارير شغل معين كنت كل يوم اتنين اشوف اعلانات النت وانزل اشترى العربيات عربيه عامله حادثه او فيها بارومه او حكه فى الصاج او شغل فى الموتور اشترى واوديها ورش بتاعة ناس من الكاريبيان واتفق معاهم على السعر ادفع النص والنص لما يخلصوا والاتنين اللى بعده اعمل اعلان وابيعها بعد ما ترجع عروسه واكسب تلات اربع الاف دولار وفى بعض العربيات الفلتات كان مكسبى بيوصل تلاتين الف دولار فى عربيه
ساره : يعنى مقضى كل حياتك انك تنزل تشترى عربيه وتبيعها ؟
مراد : عربية ايه ؟ انا كنت كل يوم اتنين انزل اشترى ٢٠ او ٢٥ عربيه واحيانا اكتر ومكسبى اقل اسبوع بيعدى ١٠٠ الف دولار
ساره : يااااه وايه اللى رجعك لمصر
مراد : الحنين الى الجذور
ساره : هاهاها لا انا باتكلم بجد
مراد : ايه ما عجبكيش الاوبشن ده ؟ نشوف اوبشن تانى
ساره : لا والنبى عاوزه اعرف بجد
مراد : طيب يا ستى يبقى احكيلك من الاول خالص بداية انا والدى لما اتوفى ساب لنا شركة مقاولات كبيره وقصر فخم جدا وشاليه فى مارينا وواحد فى سيدى عبد الرحمن وواحد فى شرم الشيخ وكام قطعة ارض فى الساحل والسخنه ومرسى علم غير العربيات والاسهم والفلوس السايله وشوية حاجات تانيه كمان اخواتى الكبار مسكوا الشركه وانا بدات امشى مع بنات واهلس واسافر يمين وشمال لحد ما خلصت كل الفلوس السايله بتاعتى وطلبت من اخواتى يشتروا نصيبى فى الشركه قالوا لا الشركه دى ابونا سايبها ماحدش حيخرج منها حاولت ابيع نصيبى لحد غريب وقفوا فى الييعه يمين شمال مافيش فايده قالوا مش حنسيبك تبيع نصيبك وتضيع فلوسك وترجع تشحت وتفضحنا نصيبك موجود لحد ما ربنا يهديك وتعقل وتقرر تتجوز تلاقى حاجه تسندك من ريحة المرحوم قلتلهم انا عاوز اسافر ومصمم اخويا الكبير قاللى انت هنا صايع واحنا مش قادرين نلم وراك لو سافرت بره حتعمل ايه قلت حاسافر يعنى حاسافر بعت عربيتى وشوية حاجات وسافرت امريكا وفى اول ليله وانا لسه نازل من الطياره قلت اشرب كاس فى بار المطار لقيت واحده فرسه مالهاش حل فى البار حاجه طول بجسم بشعر اصفر وعيون عسلى جباره عزمتها على كاس قالت اوكى وصوتها ايه ناعم مالوش حل حاجه تهوس تخبل وقلتلها
مراد : انا مراد من مصر اول يوم فى امريكا ممكن نتعرف
جورج : انا جورج من نيويورك
مراد : انتى .... انت ... يعنى ... انت ... انتى .... جورج ازاى ؟ انت شاذ ؟ are you a gay ?
قالت yes
قلت نهار اسود هى دى امريكا ؟ انا لو حاصيع هنا حاضيع يبقى بناقص الصياعه بس كده لازم اشتغل علشان لما ارجع اخواتى ما يشمتوش فيا رحت اشتغلت كام يوم فى مطعم اغسل صحون ووزعت جرايد واشتغلت فى بنزينه وفى يوم بالصدفه وانا فى البنزينه لقيت اعلان عن سياره عامله حادثه قلت اشوفها لقيتها متدشمله رحت اكلم صاحبها عاوز كام ؟ كان عدى عليه اكتر من زبون وزهق قاللى اللى عاوز تدفعه ادفعه مش عاوز سيبنى وامشى وانا حاولع فيها قلتله ليه بدل ما تولع فيها خدلك ٥٠٠ دولار خدى بالك كانت مرسيدس ١٨٠ وانا باقولها هزار لقيته بيقول اوكى واخدهم وباعلى العربيه كان معايا واحد زميلى فى البنزينه من الهندوراس مهاجر غير شرعى قاللى ان ابن عمه شغال فى ورشة سيارات جبناه اتفرج على العربيه قال حتتكلف خمس الاف دولار وترجع جديده لان فيها مشكله فى البودى سالت على سعر السياره لو حالتها كويسه لقيته من ١٥٠٠٠ وطالع قلت حلو قوى واديتها للاتينى ده يصلحها وقلتله مش حادفع الا لما الاقيها فعلا اتصلحت قال لا فيه قطع غيار للموتور لازم تجيبها والباقى لما تتصلح عادى لكن مش حتاخدها الا لما تدفع وسافرت جبت قطع الغيار من ديترويت ورجعت واتصلحت وبعتها ب ١٦٥٠٠ دولار ومن يومها بقت هى دى لعبتى لحد ما وصلت انى اشترى تلاتين عربيه واكتر فى الاسبوع
ساره : طيب ايه اللى رجعك مصر وانت بتعمل كل ده هناك ؟
مراد : اخواتى يا ستى مش مبطلين زن لازم ترجع تعالى اشتغل معانا واتعلم شغلك وحافظ على شركتك وراس مالك مش تبقى واحد مالتى مليونير ورايح امريكا تشتغل سمكرى سيارات . يا نهار اسود انا سمكرى ؟ دول مش فاهمين حاجه قررت انى لازم ارجع ومصمم ابيع نصيبى وافتح مركز صيانة واصلاح سيارات ضخم يكون اكبر مركز صيانه فى مصر وافريقيا علشان اقنعهم
ساره : كويس جدا مشروع هايل
مراد : ولا كويس ولا حاجه برضه رفضوا وحتى بعد دراسة الجدوى اللى عملتها برضه رفضوا قالوا مشروع كويس وناجح لكن مش كارنا يا جماعه كارى انا ومش باقول شاركونى باقول ادونى فلوسى اعمله برضه لا منشفين دماغهم وانا دماغى انشف من الزلط
ساره : طب وبعدين ناوى تعمل ايه ؟
مراد : اشتريت حتة ارض كبيره على طريق الكافورى علشان المشروع وبادور على شريك وحاعمله يعنى حاعمله
ساره : ربنا يوفقك ممكن بابا يمولك فيه
مراد : اااااااااااه
فجاه مراد حس بوجع جامد فى رجله بص لقى كلب لولو كانيش بيعضه فى رجله لكن عضه جامده عورته والدم سال على رجله وقبل ما يمسك الكلب سمع صوت بينادى
& : داغر تعال جاى
جسمه كله اتخشب مش ممكن مستحيل الصوت ده صوت ... لالالا مش ممكن
الكلب جرى لاخر الكوريدور ودخل ممر على اليمين ومراد قام يجرى ورا الكلب ودخل الممر لقى مدخل صالة جيم السيدات ومافيش اى حاجه تانيه فتح الباب ودخل لقى الموظفه اللى قاعده فى اول الصاله بتوقفه
الموظفه : يا استاذ انت ازاى تدخل هنا ؟ هنا للسيدات بس
مراد : انا اسف بس اصل ...
الموظفه : بس ايه من فضلك اتفضل بره
مراد : حاضر حاخرج بس عاوز اسال عن ...
الموظفه : تسال عن ايه من فضلك ارجوك اتفضل اخرج بره واسال زى ما انت عاوز انا ممكن اتفصل بسبب دخولك من فضلك اخرج
خرج بره ومعاه الموظفه
الموظفه : عاوز تسال على ايه ؟
مراد : فيه واحده ست دخلت دلوقت ومعاها كلب صغير كانيش ؟
الموظفه : مافيش كلاب خالص بتدخل هنا ممنوع
مراد : ده دلوقت حالا كلب صغير كده من نوع لولو كانيش لونه ابيض فى اصفر
الست قالت بنفاذ صبر
الموظفه : يا استاذ اساسا من نص ساعه او اكتر مافيش ولا واحده دخلت هنا لا بكلب ولا من غير كلب
مراد : ازاى ؟ ده لسه من دقيقه الكلب لسه عاضضنى وجرى على هنا وهى كانت بتنادى عليه حتى العضه عورتنى ودمى زى ما انتى شايفه .....
لكن مافيش ولا نقطة دم رفع رجل البنطلون ما لقاش اى اثر للعضه حس انه دايخ ومش فاهم اى حاجه .
ايه اللى بيحصل ؟ انا متاكد انى شفت الكلب وعضنى ومتاكد انى سمعت صوت فاتن .
لالالا فاتن ازاى ؟ فاتن ماتت انا قتلتها بايدى .
ايوه انا سعد . مراد يبقى هو سعد
#رواية_داغر
طلعت تانى يوم الفجر اجرى على البحر وعند ملف جليم شفتها بتجرى قصادى لالا مش فاتن دى ساره كنت نسيتها خالص كانت لابسه تريننج سويت وحاططه ووكمان فى ودانها وبتجرى
مراد : صباح الخير
بصتلى من فوق لتحت وسابتنى ومشيت عندها حق انا بصراحه لو منها كنت ضربتنى بالجزمه لكن هى شكلها بنت ناس المهم جريت وراها مش حاسيبها
مراد : ساره انتى زعلانه منى ؟
وقفت وشالت الووكمان من ودانها بعصبيه وقالت
ساره : لو عادى عندكم فى امريكا وما يزعلش انك تكون بتتكلم مع واحده وفى نص الكلام وبدون اى مقدمات تسيبها وتمشى من غير حتى ما تستاذن هنا فى مصر ده يزعل لكن شكلك نسيت مصر خالص
مراد : انا اسف انا اسف جدا امبارح حصل حاجه لحد دلوقت مش فاهمها
وطبعا نزلت الدمعتين اللى انتوا عارفينهم وساره اتاثرت
ساره : مراد انت بتعيط ؟
مراد : انا اسف ممكن نقعد نشرب حاجه فى افندينا ؟ عاوز احكيلك على حاجه مهمه جدا بعد اذنك
ساره : طيب اوكى مافيش مشكله بس مش حنطول
دخلنا على افندينا وطلبنا عصير فراوله ليها وانا عصير مانجو وقهوه
الجرسون : مانجو وقهوه ؟ الاتنين يا افندم ؟
مراد : ايوه يا سيدى انا حر حاحطهم على بعض واشربهم
الجرسون : حاضر يافندم حاضر اجيب الاتنين تحت امرك
وبعد ما الجرسون مشى بصيت لساره وقلت
مراد : عارفه ليه انا رجعت من امريكا ؟
ساره : قلتلى علشان الشركه واخواتك و...
مراد : ده سبب من الاسباب لكن فيه سبب اهم
ساره : هو ايه ؟
مراد : كان عندى جيرل فريند هناك وكنت باحبها جدا برغم انى عرفت بنات كتير قبلها هى كانت مجنونة سواقه ومتهوره
ساره : هى اللى متهوره ؟ صلاة النبى عليك
مراد : انا اتعديت منها هى كان تهورها اضعافى وفى يوم خرجنا نعمل سفارى فى منطقه صحراويه فى كاليفورنيا واحنا ماشيين على طريق جبلى ضيق هى شغلت ميوزيك بصوت عالى جدا وزودت السرعه جدا وانا فعلا خفت اترعبت وقعدت اقول هدى السرعه بلاش تهور بالراحه وهى عماله تضحك وتقوللى chicken chicken يعنى يا جبان وفجاه الدركسيون فلت من ايدها وانا اتنطرت بره العربيه كانت كابريوليه مكشوفه انا اتنطرت منها على الاسفلت وهى طارت بالعربيه لسفح الجبل
ساره : ما تقولش انها ....
مراد : ماتت وقعت بالعربيه من فوق الجبل وماتت للاسف انا اول ما شفتك اتصدمت ما بقيتش مصدق عينيا
ساره : ليه ؟
رسمت فى عينيا حتة دين نظرة حزن استاهل عليها اترشح للاوسكار
مراد : ممكن تشوفى صورة الجيرل فريند بتاعتى ؟
وطلعت التليفون وفتحت الاستديو علشان تشوف الصوره انا كنت مصور ساره من غير ما تاخد بالها وبالفوتوشوب عملت تعديلات على الملامح واللبس بحيث تبان انها شبيهه لساره لكن بملامح مش مصريه واستايل غربى
طلعت الصوره ومديت ايدى ناحيتها بالتليفون واخدته من ايدى وشافتها
ساره : مين دى ؟ مستحيل
مراد : this is my girlfreind
ساره : دى شبهى جدا
مراد : ياريت الشبه وبس دى كان اسمها ساره . ساره ميتشل جونز انا لما عرفت انها ماتت قعدت اتعالج فى مصحه نفسيه تلات شهور وبعد ما خرجت من المصحه قررت انى مستحيل اقدر اكمل حياتى فى امريكا ورجعت مصر . امبارح وانا معاكى شفتها فى نهاية الكوريدور ما بقيتش عارف هى اللى واقفه معايا واللا انتى اللى واقفه فى نهاية الكوريدور وجريت عليها لقيتها اختفت حصل عندى حالة ذهول ما فقتش منها غير عند القلعه
ساره : ايه اللى وداك عند القلعه ؟
مراد : مش عارف ومش كده وبس تصدقى انى قعدت ساعه كامله الف فى لوران ادور على العماره اللى فيها شقتى ؟
ساره : انت ساكن فى لوران ؟
مراد : لا انا ساكن فى ميامى
ساره : وبتدور فى لوران ليه ؟
مراد : مش عارف افكارى كلها كانت مختلطه ودماغى كانت عامله زى مكنة الفيشار وحاسس ان مخى بيطقطق ومش مدرك لاى شيء ولا عارف انا رايح فين ولا جاى منين لحد ما نزلت اجرى دلوقت وشفتك
ساره : انا اسفه امبارح لما سبتنى فجاه قلت ايه الانسان عديم الذوق ده ما كنتش اعرف بالموضوع ده
مراد : انا اللى اسف انا فى البدايه اتشديت ليكى بسبب الشبه لكن ......
وفحاه شفت قدامى فاتن بتجرى على البحر ومعاها الكلب وبتنادى عليا
فاتن : داغر هيا تعال
جسمى كله اتخشب وعرقى نازل بارد
مراد : مش ممكن مستحيل
ساره : مراد فيه ايه مالك ؟
مراد : بصى بصى انتى شايفه الست دى ؟
ساره : ست مين ؟ انا مش شايفه حاجه
مراد : الست الجزائريه اللى بتجرى ومعاها الكلب
ساره : ست مين ؟ لا شايفه ست ولا شايفه كلب
مراد : اللى هناك دى اللى بتجرى ولابسه كعب عالى
ساره : ازاى بتجرى بكعب عالى ؟ هى فين ؟ مش شايفه
مراد : اهيه اللى .....
لكن ما كانش فيه حد خالص على البحر
ساره : مراد . مراد اهدى مافيش حاجه تعالى نقعد جوه افضل
دخلنا جوه وبعد اقل من دقيقه وقفت وقالت
ساره : انا اسفه لازم امشى علشان الجامعه
...........................
لما رحت النادى العصر ساره ما كانتش موجوده لاول مره من مده طويله وكمان تليفونها كان مقفول وتانى يوم الفجر برضه ما قابلتهاش على البحر وفضلت تلات ايام مش عارف اشوفها لحد ما قابلتها صدفه فى السلطان حسين
مراد : ساره انتى فين ؟
ساره : استاذ مراد . اهلا بيك اخبارك ايه ؟
مراد : استاذ مراد ؟ غريبه . بقالى كام يوم مش عارف اقابلك مالك متغيره ؟
ساره : لا ابدا بس عندى ضغط مذاكره ومحاضرات كتير
مراد : انتى بطلتى تروحى النادى ؟
ساره : معلش قلتلك عندى محاضرات كتير ومذاكره
مراد : وبطلتى كمان تجرى على البحر وحتى حاولت اكلمك لقيت تليفونك مقفول
دورت وشها الناحيه التانيه وما ردتش
مراد : مالك يا ساره ؟ انتى متغيره من ناحيتى ؟
ردت بعصبيه وصوتها كان عالى لاول مره
ساره : انا باقول لحضرتك عندى مذاكره يعنى مش فاضيه اقول ايه تانى ؟
مراد : طيب ممكن اعزمك نشرب حاجه مع بعض ؟
ساره : حضرتك انا مشغوله يا دوب خارجه من الجامعه ومحاضرات طول النهار وحاطلع على الكورس ومنه على البيت اذاكر خلاص الامتحانات على الابواب
مراد : خلاص نخليها بكره ؟
ساره : بكره برضه عندى محاضرات وكورسات ومذاكره انا متعوده طول عمرى اجيب تقديرات عاليه ولازم احافظ على مستوايا
مراد : يعنى مش حتفضى نص ساعه ؟
ساره : بعد الامتحانات ان شاء الله ممكن افضى وساعتها حارجع اروح النادى
مراد : والامتحانات دى حتخلص امتى ؟
ساره : كمان شهرين
مراد : معقول يا ساره ؟ شهرين كاملين مش حاشوفك فيهم ؟
ساره : استاذ مراد انا حقيقى اتشرفت بمعرفتك وكنت سعيده جدا بمقابلتك واحاديثنا مع بعض لكن بيتهيالى صعب يكون فيه صداقه بيننا بصراحه موضوع الحاجات اللى بتشوفها ده بيخوفنى انا اسفه بس ميعاد الكورس وانا متاخره بعد اذنك
ودورت عربيتها ومشيت وسابتنى واقف زى القفا