رواية بين الضياع واللقاء الفصل الثلاثون 30 والواحد والثلاثون 31 والاخير بقلم شذى عبدالمكرم
اليوم التاني للعيد طلعنا انا وهو وعمتو زرنا الاهل وعيدنا ليهم وقاعدين بعد العشا فجأة بدون مقدمات محمد قام ودخل الغرفة وجا راجع وهو رافع الفنيلة بتاعت الجيش الشيلتو بالمكواة فتحت عيوني بصدمة قام جاي علي طوالي قومت سريع وقعدت جنب عمتي وحضنت ايدها واتحاميت فيها
نعيمة: امي مريم شوفي محمد دا
عمتو: مالك يا ولد . رفع الفنيلة محل الحريق
محمد: دا شنو يا امي
عمتو: دا فنيلة ومحروقة
محمد: عليك الله يا امي فنيلة ومحروقة؟ ما كنت عارف . ضحكنا انا وعمتو
عمتو: فنيلة واتحرقت داير تعمل شنو حتدقها يعني والله تهبشها ببيتك برا البيت . رفعت ليهو حواجبي بمغرزة وغمزت ليهو
محمد: امي داير اعرف انتي امي انا ولا امها هي
عمتو: امكم الاتنين
محمد: اشك والله لو لقيتوني قادم الجامع وروني عليك الله
نعيمة: محمد ياااخ خلاص اتحرق بالخطأ
محمد: عرفنا انو اتحرق بالخطأ خلاص ليه تخليني اشك في نفسي انو نسيتو في المأمورية . عمتو قامت تضحك
عمتو: سبحان الله انا ذاتي مرة عملت في ابوك كدا بس انا حرقت الطاقية . قومنا ضحكنا
عمتو: ومرة حرقت البنطلون لانو نسيت الحلة في النار
نعيمة: وعملتي شنو
عمتو: قعدت ابكي بالغصب قبل ما يرجع وبالفعل جا لقاني ببكي شديد قال لي مالك بتبكي افتكر حاصلة لي حاجة كلمتو انا حرقت البنطلون بتاعت الكاكي قال لي فداكي . ضحكت ومحمد كان بضحك وهو بقول
محمد: كيدكن عظيم . قومت فوق واتجهت على غرفتنا
نعيمة: تحت الجلسة في تلاتة قمصان محروقات . وقومت جريت دخلت الغرفة عمتو فكت الضحكة وهو كان بحاول يستوعب كلامي الزمن داك دخلت وقفلت الباب جاني ضرب الباب
__ نعيمة افتحي الباب دا قبل ما اكسرو
_ والله بالخطأ
__ افتحي نتفاهم . فتحت وجريت ركبت فوق السرير
_ محمد ما تقرب والله بصرخ بنادي ليك امي مريم
__ تلاتة قمصان يا نعيمة بالله خافي ربك على الاقل . قومت ضحكت
_ المفروض تقول لي فداكي ذي ما عمو قال لامي مريم
__ يودوكي فدية للجيش قولي امين . ضحكت
_ امين
__ انزلي تعالي هنا عشان ما تحصل حاجة ما تعجبك . نزلت جيت ليهو مسكني من ايادي الاتنين وبقرص فيني في جضومي شديد وكان حار اتفكيت منو وبقيت اخبط فيهو وهو يخبط فيني بس خفيف لمن وقفنا وضحكنا لانو كنا ذي الشفع ومسكت جضومي
_ شوف اكيد جضومي حمرن ياااخ انا تعبت في وشي
تعب ودفعت فيهو دم قلبي عشان يزبط لعرس عبدالله
__ العروس انتي؟ . لويت ليهو خشمي
_ لا يا فهيم اخت العريس بس احتمال اطلع لي بعريس من اصحاب العريس
__ تعالي اوريكي تلقي عريس كيف
_ لا والله بهظر . مسكني وقرب مني ومسح وشو في خدي ذي ما بعمل كل مرة وانا اضحك بعدها قرب مني وحصل الحصل
خامس يوم في العيد جا عرس اخوي عبدالله وكنا جاهزين ليهو ويوم الحنة محمد قال انتظرو امشي معاهو بالفعل انتظرتو بس اتأخر شوية كنت في بيتي عشان البس هناك اصلا البيت ما بعيد فرجعت وديلاك مشو الصالة حتى عمتو مشت معاهم بعد محمد وصل جا لبس الجلابية وانا لبست التوب وكشرنا ومشينا جيت داخلة الحفلة مع محمد مشينا باركنا للعريس وخليت محمد معاهو وانا مشيت لناس امي
امي: صلاة النبي فيكي اتحصني
نعيمة: حبيبي انا وانتي طالعة حلوة يا ام العريس
امي: لازم . وضحكنا ولقيت صحباتي تبع الجامعة عزمتهم
فردوس: ما اتعرفنا لكن طالعة حلوة
نعيمة: حلوات عيونك حبيبي
سمر: جنابو لكن . وغمزت لي قومت ضحكت
نعيمة: يا زولة لازم جنابو
ريم: واحد جنابو بلقى؟
نعيمة: اكلم ليكي راشد؟ . حبيبة اخوي راشد
ريم: دكتوري مالي العين . ضحكنا الحفلة كانت حلوة محمد جا لي
محمد: نعيمة تعالي دقايق . مشيت ليهو
نعيمة: في شنو
محمد: راجع البيت
نعيمة: مالك راجع الحفلة لسع
محمد: صدعت . تلقائيا لقيت نفسي هبشت جيبنو
نعيمة: ماف حرارة انت كويس
محمد: انا كويس بس مصدع شويه
نعيمة: دقيقة خلاص برجع معاك
محمد: لالا خليكي احضري الحفلة
نعيمة: لالا برجع معاك . حاول معاي كدا كنت مصرة مشيت ودعت ناس امي وقولت ليهم محمد مصدع شويه واتفهمو الموضوع وودعت صحباتي ورجعت معاهو
محمد: كان تخليكي ياااخ
نعيمة: ما بخليك براك واصلا الحفلة في نهايتها . سكت وصلنا البيت عملت ليهو قهوة شربها بس ما فك ليهو الصداع اديتو بندول ونام وبقيت اهبشو كل نص ساعه اشوف لمن حرارتو ارتفعت بس لا والصباح كان تمام التمام
عرس اخوي انتهى بشكلو المعروف ذي باقي الاعراس ونزلت الشغل من جديد
بعد تلاتة اشهر محمد سافر مأمورية وقال حيطول فيها وفي يوم تعبت شوية وعمتي ودتني المستوصف فحصت طلعت حامل في شهرين فرحت شديد واتمنيت لو محمد كان معاي في اللحظات دي بس قولت اعمل ليها مفاجأة
عمتو: اخيرا ربنا كافئك على صبرك
نعيمة: الحمدلله
عمتو: محمد حيفرح شديد ربنا يرجعو بالسلامة
نعيمة: ان شاء الله يا رب . وبشرت الخبر لامي فرحت لي شديد
امي: ما حتجيني
نعيمة: لالا ما بخلي امي مريم براها
امي: كويس بس محمد لو جا حتجيني
نعيمة: ايي حأجي
بقيت كل يومين بقول لعمتي ارح لامي نقيل معاهم لمن اتحسست
__ انتي دايرة تقعدي مع امك
_لالا بقعد معاكي
__ بس الوحدة لمن تكون حامل بتمشي تقعد مع امها
_ امي مريم انا ما بقدر اخليكي براكي
__ ما بتجيني عوجة . مسكت يدها
_ انتي امانة محمد خلاها لي ما بفوتك نهائي بس انتي لو ما دايرني وبقيت تقيلة مع الحمل دا حاجة تانية
__ والله بالعكس اتعودت على وجودك وبحملك دا ما بتخليني اعمل حاجه قولت بكون دايرة امك في الفترة دي لانو دي حاجه طبيعية بالنسبة للحامل
_ انتي ذاتك امي . فرحت بكلامي لمن بكت
__ والله بعتبرك بتي بس
_ خلاص انا هنا معتبرة نفسي في بيت ابوي وانا لمن اقول نمشي لناس امي عشان نغير جو بس خلاص نوقف رجلنا . قامت ضحكت
__ قومي البسي توبك ورح بيت امك نشرب معاها القهوة . ضحكت وبالفعل لبسنا تيابنا ومشينا شربنا القهوة ورجعنا
وبقيت اتابع مع الدكتور وعمتي وبتمشي معاي اي مقابلة ما بتخليني براي
_ امي ما حاسة انو بطني دي كبيرة زيادة
__ والله ما اكذب عليكي بس انتي في السادس وبطنك دي كبيرة زيادة شوية
_ خلاص بكرة نعمل موجات وبالمرة اشوف نوع الجنين الذي جنا الفيل دا . قامت ضحكت
__ بس قولتي ما دايرة تعرفي وتجي ذي ما تجي
_ بس خايفة لانو بطني دي كبيرة
__ خلاص بكرة نمش
_ تمام . اليوم كلو شيلتو هم ومنتظرة متين امشي الدكتور
بالفعل الصباح مشينا للدكتور المتابعة معاهو وشكيت ليهو
نعيمة: دكتور بطني دي كبيرة من انو اكون في السادس . الدكتور ضحك
الدكتور: ما حسيتي بحاجة من حركة الجنين
نعيمة: حركتو كتيرة شديد وبنضرب بجهتين . قام ضحك شديد
الدكتور: ودا بفسر شنو انا ما كلمتك لانو قولتي ما دايرة تعرفي نوع الجنين . عاينت ليهو بهبالة
نعيمة: بفسر شنو
الدكتور: ما فهمتي؟
نعيمة: عندي لحمية؟
الدكتور: حماكي الله انتي حامل بتوأم . فتحت خشمي استوعب الصدمة لمن استوعبت قومت ابكي شديد
نعيمة: ممكن تنادي عمتي من برا . طلع ناداها جات لي ولقتني ببكي
عمتو: مالك يا بتي دكتور مالها ما عيانة صح؟
الدكتور: لالا
عمتو: مالك يا نعيمة ما تخوفيني
نعيمة: انا حامل بتوأم . سكتت وقامت تبكي شديد
الدكتور: ربنا يقومك بالسلامة انتي واولادك
نعيمة: امين يارب تسلم يا دكتور دا احلى خبر في حياتي . عمتي فتحت مطبقتها وطلعت قروش وختها ليهو في ايدو
عمتو: دي العيدية بمناسبة الخبر السمح دا . قام ضحك
الدكتور: شكرا . وساعدتني قومت لانو حركتي تقيلة وبطني كبيرة شديد شكرناهو تاني وطلعنا ورجعنا البيت تاني بكينا وكلمنا امي جاتنا
امي: ما تمشي معاي بعد دا
نعيمة: امي قولت ليكي عمتي امانة عندي ما بقدر اخليها براها والله وهي من دخلت الخامس ما بتخليني براي وبتعمل اي حاجه ما مقصرة معاي
امي: خلاص تمام بس قربتي على الولادة وراجلك لسع ما ظهر
نعيمة: حيظهر يا امي حيظهر والله بس ما بعرف متين
امي: كويس
لمن دخلت السابع بطني بقت قدامي وحركتي تقلت اكتر بس بتحرك عشان ما اتورم وتوأمي بصحة وعافية وعمتي منظمة لي ادويتي واكلي ما مقصرة معاي في يوم اصريت عليها انو اعمل عصير قالت هي حتعملو بس اصريت انا وبالفعل دخلت المطبخ وعملتو وجيت اكبو في الكبابي سمعت عمتي بناديني بصوت عالي اتخلعت و سريع سريع طلعت ليها لقيت محمد واقف وهي ماسكاهو وبتبكي وانا اتفاجأت وقفت بعيد هو اتخلع في شكلي وكرشي اتخلع ما عرف يعمل شنو قال يضحك
محمد: بتهظرو صح؟ . انا لسع واقفة في محلي بعاين
عمتو: في شنو
محمد: نعيمة اتنفخت كدا كيف . ضحكنا التلاتة كدا
نعيمة: لقيت نفسي فاضية قولت يا نعيمة ليه ما تنفخي روحك حتكوني كيوت . وختيت ايادي الاتنين في بطني . هو فكا شنطتو وجا علي وهبش بطني
محمد: حامل؟ . هزيت ليهو رأسي بمعنى ايي قام بكى وانا قومت ابكي وعمتو بكت تاني اتأثرنا معاهو قام حضني قدام عمتو
محمد: اخيرا ربنا قسم لينا الخلفة
عمتو: الحمدلله
محمد: انتي كويسة؟
نعيمة: كويسة الحمدلله عمتو اصدمو تاني ولا اخلي يرتاح بالاول . عمتو ضحكت
محمد: في شنو تاني
عمتو: ارتاح بالاول
محمد: لا في شنو عليك الله لانو بديت اخاف انتي كويسة صح؟
نعيمة: كويسة انا
محمد: والطفل
عمتو: مرت حامل في طفلين . فتح عيونو بصدمة والتفت علي
محمد: توأم؟ . هزيت ليهو رأسي بمعنى ايي ختا ايدو في عيوني وبكى وانا قلبي رهيف تاني بكيت معاهو ورفع اياديهو وبدأ يدعي ويحمد ربو على النعمة دي
عمتو: تعالو اقعدو وانتي يا نعيمة من قبيل واقفة على رجلك ما صح
محمد: تعالي اقعدي . مسكني من كتفي وقعدني في الجلسة
محمد: في الشهر الكم انتي
نعيمة: دخلت السابع قبل اسبوع
محمد: متابعة مع دكتور
نعيمة: ايي وعمتي ما مقصرة معاي بتمشي معاي اي مقابلة ونحنا التلاتة بخير
محمد: الحمدلله وعرفتي نوعهم شنو
نعيمة: ايي اولاد
محمد: الحمدلله ان شاء الله تقومو التلاتة بخير . عمتو جابت ليهو موية وعصير
نعيمة: محمد قوم غير وارتاح
عمتو: انتي ذاتك ارتاحي
نعيمة: كويس . محمد قام وقومني معاهو لانو لمن اقعد تاني بجد صعوبة في الوقوف
محمد: قولتي لي بقيتي تقيلة . وضحك
عمتو: طفلين ما ساهل وهي بالاخص جاها نقص سكر تاني . اتخلع
محمد: متين وانتي كويسة؟
نعيمة: كويسة والله جاني في البدايات بسبب تغدية الجنين
محمد: متأكدة انك كويسة
نعيمة: والله يا محمد كويسة انا . ومشينا غرفتنا فجأة من دون مقدمات قومت حضنتو شديد ضماني عليهو زيادة
نعيمة: اشتقت ليك والله
محمد: انا اكتر والله ورجعت ولقيت احلى مفاجأة
نعيمة: اتمنيت انك كان تكون معاي لمن عرفت الخبر
محمد: معليش انو ما حضرت معاك الخبر الحلو دا بس بحضر معاكي الولادة
نعيمة: ان شاء الله يا رب . فكيتو وقعدت في السرير وهو مشا استحمى وصلى وصلى معاهو ركعتين شكر لله عمتو جابت ليهو حاجة يآكلها وطبعا اكلت معاهو لانو كل ساعتين بجوع ما تستغربو ومرات بقوم اخر الليل وبقوم عمتو معاي وهو بقت حافظة مواعيدي بصحى بلقاها في المطبخ عادي بتسخن لي في الاكل
اليوم تاني طوالي محمد ضبح لينا كرامة انو حامل بتوأم وكلمنا الجيران وكلمت ناس امي ومحمد ما كان مصدق فكان ما بخليني نهائي ناقل لي اي حاجه محتاجة ليها
نعيمة: امي مريم والله الا انتي تجهزي لي شنطة البيبيهات مع امي لاني ذي ما عارفة ما قادرة
عمتو: جدا حبيبتي
بالفعل عمتي مع امي جهزو لي شنطتي وشنط البيبيهات ومحمد جاب باقي الحاجات والسراير بتاع البيبيهات وجاب كمية العاب على اساس حيحتاجو ليهو وهم صغار كدا بضحك فيهو بس وامي لسع مصرة انو امي ليها بس قولت ليها خليني ادخل التاسع واجيكي قالت كدا عملت شنو اقنعتها
مرت فترة كدا وانا اخلاقي بقت ضيقة شديد مع الحمل دا بس محمد متحملني شديد في مرة محمد كان بتكلم بالتلفون وفهمت انها مع مرا لمن خلص سألتو
_ دي منو
__ دي فيحاء
_ فيحاء الوحدة دي
__ ايي
_ ايواااا . وسكتا خليتو بس شعور الغيرة كانت ملازماني بس كتمتها عدا ذي يومين كدا وهو بتكلم معاها مكالمات شكلو عندهم حاجة
_ محمد انت مالك مع فيحاء
__ عندها موضوع بحل ليها فيهو
_ وما لقت غيرك انت؟
__ الموضوع عادي جدا . بس ما كان عادي بالنسبة لي كأني دخلت النار وطلعت بس سكتا وبراقب من بعيد لمن مرة محمد في الصالة وخلى تلفونو قاعد هي اتصلت طوالي رديت
_ الو
__ اهلين
_ اهلين
__ معاي منو
_ انتي ضاربة لمنو
__ لمحمد نصرالدين
_ انا مرتو
__ ايوااا نعيمة؟
_ ايي
__ محمد وين
_ محمد طلع مشوار
__ ايواااا خلاص لو جا خلي يرجع لي ضروري
_ كويس . وطق قفلت في وشها بدون مقدمات وجدعت التلفون وطلعت برا لقيتو بشاهد في التلفيزيون حمرت ليهو وطوالي مشيت المطبخ عشرة دقايق جا داخل المطبخ وهو هايج
__نعيمة . بكل برود رديت ليهو
_نعم
__ انتي رديتي لفيحاء وقولتي ليها اني طلعت؟
_ هي قالت ليك كدا؟
__ ايي حصل ولالا
_ حصل
__ كيف تعملي كدا وليه ما وريتيني موش قولت ليكي عندنا موضوع ضروري . اعصابي تلفت خلاص
_ هو شنو موضوعكم الضروري دا كرهتك بالتلفونات و24 ساعات بتتكلو
__ انتي مجنونة
_ ايي مجنونة واسمعني اطلع لي من المطبخ عشان ما اخسرك
__ ما طالع كدا شوفيني هنا كيف تعملي كدا . اتنفست بتعب
_ محمد اسكت واطلع لي برا المطبخ دا
__ عارفين انك حامل بس دا ما بخليكي تتصرفي على كيفك فاهمة؟ . قولت ليهو بعصبية وصراخ .
_ ما قولت ليك اسكت ياااخ. . قومت شيلت الكباية من المصطبة وفنيتو بيهو بكل قوتي بس هو انتبه ونزل رأسو في اخر دقيقة والكباية جات في الشباك العلى الصالة وكسرتو حتة حتة ..........
31 والاخير
لمن حصلت الشكلة وفنيت محمد بالكباية بس جلتو وكسرت الشباك بتاعت المطبخ محمد عاين لي بصدمة وعاين للشباك انو الضربة دي لو كانت فيهو حتحصل شنو
__ قولي والله؟ . عاينت ليهو ويداب استوعبت الانا عملتو ما عرفت اقول شنو عمتو جات بسبب الصوت العالي بتاعت الشباك
عمتو: دا شنو والحاصل شنو ان شاء الله ما حصلت ليكم حاجه . ماف زول رد كنا بنعاين في بعضنا بس
عمتو: بتكلم معاكم الحاصل شنو
محمد: اسأليها هدا قدامك دا اخر ما توصلت ليهو
عمتو: نعيمة الحاصل شنو . ما رديت
محمد: شكرا جزيلا على الاحترام . وطلع يداب استوعبت حجم المصيبة الانا عملتها قومت ابكي عمتي مسكتني
عمتو: مالك يا بتي كدا تعالي اقعدي . طلعتني برا المطبخ وقعدنا في الصالة
عمتو: مالك مع محمد والشباك دا اتكسر كيف
نعيمة: كسرتو انا
عمتو: كيف
نعيمة: ما كنت قاصدة ومحمد عصبني
عمتو: وانتي فنيتي بحاجة وجات في الشباك . عاينت ليها بأستغراب
نعيمة: عرفتي كيف
نعيمة: واضحة من كلام محمد وتاني حاجة اخلاق المرا الحامل بتكون كدا
نعيمة: ما كنت قاصدة والله
عمتو: لو في الوضع الطبيعي ما كنتي حتعملي كدا والحمدلله انها جات سليمة
نعيمة: الحمدلله والله خوفت . قامت تضحك
عمتو: انتي دايرة تقتلي عديل . قومت ضحكت
نعيمة: واااي يا امي معليش والله ما قاصدة اضرب ولدك
عمتو: لو ما عصبك عارفة ما بتعملي كدا بس انتبهي تاني لانفعالياتك لانو المرة دي جات سليمة ما معروف
نعيمة: لا تاني توبة والله الدخلت فيني بعد جدعت الكباية للان ما طلع . وضحكنا وفجأة اتذكرت انو محمد زعلو كعب
نعيمة: امي محمد تاني ما حيتكلم معاي
عمتو: انتي حامل بأطفالو ما تنسي وخلي اطفالك حجة بس . قومت ضحكت وحضنت ايدها لانو عمتي دايما في صفي حتى لو انا غلطانة عشان كدا بحبها
عمتو: امشي راضي قبل المشكلة ما تكبر
نعيمة: تمام . ساعدتني قومت ومشيت الغرفة لقيتو قاعد شغال بتلفونو
_ ابوحميد . ما رد لي مشيت وقفت قدامي جريتو
__ نعيمة خليني في حالي عشان انتي حامل ما داير اعمل ليكي حاجه خليكي بعيدة مني لاني على اخري منك والله
_ محمد ما قصدي
__ ما قصدك على شنو على العملتي مع فيحاء ولا ما قصدك على انو ما احترمتيني وفنيتيني بالكباية لو كانت جاتني فيني عليك الله زحي لي من وشي
_ ما قصدي على الاتنين اسفة
__ نعيمة زحي من وشي
_ قوم . ابى يرد علي مسكتو من ايدو وجريتو من يدو لمن زهج وقام وقف قدامي حضنتو من وسطو شديد وبطني كانت كبيرة فشكلي وانا حاضناهو مضحك شديد
_ محمد والله اسفة ما قاصدة عارفة اني انفعلت شديد اما موضوع فيحاء كانت غيرة مني والله ياااخ انا الموضوع لمن يكون بخصك تاني ما بعاين قدامي براك شوفت الحصل شنو المرة الفاتت
__ زحي مني
_ والله ما بزح الا تسامحني
__ يعني ما واثقة فيني دا معنى كلامك وافعالك بتثبت كدا
_ والله بثق فيك اكتر من روحي بس الغيرة عمتني دا من حبي ليك ما تزعل مني تاني ما بعمل كدا وما حأغير
__ كويس زحي مني
_ لا ما بزح منك الا تقول سامحتني . بقيت حاضناهو لمن تعبت من الوقفة
_ محمد انا تعبت من الوقفة
__ اقعدي خلاص
_ لا ما بقعد الا تسامحني والله واهو حلفت . سكت ثواني
__ خلاص سامحتك
_ احلفي
__والله
_ قول لي بحبك . قام ضحك
__ بحبك يا سجمانة يا بقرة . قرصتو في ضهرو
_ السمينة دي مرتك
__ والله شكلك بقى بضحك خلاص وانتي منفوخة كدا . زحيت منو ونفخت جضومي بزعل
_ بقيت شينة صح؟ . قام يعاين لي ويضحك شديد
__ شديد . وهو لسع بضحك مسكني من جضومي واتحرك مني ولا كذبت طوالي بكيت لمن بصوت جاني راجع والله مصدوم وبضحك
__ نينا اقسم بالله ما جادة . زحيت ولسع ببكي وهو يضحك غلبو اليسوي
__ والله بهظر بس يا مخلوقة انتي
_ انت خلاص قنعت مني ماشة لامي
__ ربنا يحلنا من الحمل دا بالسلامة لانو بقيتي نكدية بشكل غريب . عاينت ليهو وانا عيوني فيهو دموع
_ دا من الحمل انت عارف انو انا ما كدا بس هرموناتي ملخبتة بسبب الحمل دا خلاص بمشي لامي لحدي اوضع بالسلامة عارفة بقيت لا اطاق عشان كدا حأريحك من خلقتي دي شوية . واتحركت من جنبو جا ثبتني وقعدني في السرير لانو وقفت كتير وفتح لي ايدو فرحت ومديت لي ايدو بقى يدلك لي فيها
__ والله انا بهظر انتي حلوة في كل حالاتك بس عشان مع الحمل دا زدتي وزن شوية وبقيتي كلبوظة بس حلوة والله
_ اممممم بس بقيت نكدية
__ دا ما منك والمفروض اتحملك لانو المارة بيهو ما ساهل ودا اقل حاجة ممكن اقدمها ليكي
_ بحاول اخفف نكد ان شاء الله.
__ بكون ما قصرتي ولو خففتي افعالية بكون ما قصرتي برضو الليلة قربتي تقتليني . قومت ضحكت
_ والله ما عارفة عملت كدا كيف
__ جات على خير تاني نهائي ما بتناقش معاكي في المطبخ لسلامتي . قومت ضحكت
_ محمد
__ اها يا الجننتني محمد انتي
_ امشي لم القزاز
__ كسرتو انا؟
_ دايرني انا ولا امي يلمو
__ لا والله؟
_ اي والله . اتفف وطلع لقى عمتو بتنضف فيهو ساعدها ولمو الفوضى العملتو وقال حيجيب زول يصلحو
بالليل تاني فيحاء ضربت ليهو قاصد بتكلم معاها قدامي وبرفع لي في حاجبو قاصد يغيظني وانا دخلت النار وطلعت فجأة ختيت ايدي في عيوني وبكيت بس بصمت عشان ما يحس ورقدت على جنبتي وعملت فيها نومت بس شكلو حسا بس خلص سريع وجاني بجهة غمضت عيوني عملت فيها نايمة
__ نينا . ما رديت عليهو
__ عارف انك صاحية اول حاجه زول ما بنوم في دقيقة وتاني حاجه زول ما بنوم وهو ببكي قومي . ما رديت عليهو مسح على رأسي
_ عملت كدا عشان اغيظك بس والله ما عارف انك حتبكي معليش ما تنومي زعلانة قومي . برضو ما رديت
__ موش دي فيحاء دي بكرة بتكلم مع علي يحل ليها مشكلتها دي وانا بطلع منها ولا اقول ليكي دقيقة هسي بخلص الموضوع دا . قام علي تلفون لعلي واتفاهم معاهو واتصل لفيحاء وحولها لعلي وانا كنت بسمع في مكالماتو لانو فوق رأسي لمن خلص لانو قاعد جنب رأسي
__ نينا شوفتي خلاص انتهينا من موضوع فيحاء . سكتا شوية وجريت ايدو رقدت فيها
_ انت حقي براي . قام ضحك
__ ايي حقك براكي . بعدها نومت بسلام وانا مطمنئة انو محمد قفل موضوعو مع فيحاء لانو كان عامل لي حساسية
لمن كان باقي لي اسبوعين للتاسع امي قالت لي حتجي تسوقني عمتي ستفت لي ملابسي وجهزت لي حاجاتي كلها ما قصرت معاي لمن كنت بلبس في عبايتي محمد كان حارسني عاينت ليهو قام ضحك
_ ايي اضحك عشان حأفكك من النكد شوية فيك تعمل كرامة عديل . قام ضحك بصوت
__ اخيرا الواحد ينوم بسلام
_ محمد هسي ابكي ليك . قام ضحك
__ لالا هوي ارح نوصلك بسلام بعدها ابكي براحتك
_ موش دا كلامك بوضع بسلام لا حتشوفني انا ولا اولادك
__ انتي قايلة البيت بعيد ولا شنو لو ما بشارعين بس
_ انت حقار
__ خلاص اسف وحأشتاق ليكي شديد ياااخ ما تمشي
_ اطلع توبي واقعد؟ . رفع ايدو سريع
__ لالا ما تطلعي . قومت ضحكت
_ سجم الرماد
وطلعنا وداني بالعربية مع انو البيت قريب بس عشان معانا شنطتي وشنط البيبي وصلنا ونزلنا امي وابوي استقبلونا
امي: اخيرا جيتي لو ما كلمت راجلك ما كنتي حتجي
نعيمة: والله يا امي انا وريتك الاسباب
عمتو: انا كنت مصرة انها تقعد معاي وهسي البيت حيكون لي فاضي
امي: تقيلي معانا ولو على الاكل نعملو كلو مع بعض الموضوع ساهل
نعيمة: ايي يا امي مريم وافقي
عمتو: كويس بنشوف
من تاني يوم محمد اتصل لي
__ والله البيت بقى فاضي
_بقى فاضي ولا هادئ
__ والله رغم نكدك دا كنت خالقة لي جو
_ تاني لم فيني
__ حترجعي بعد الولادة طوالي صح
_ وين يااه برجع بعد الاربعين
__ بعيدة لكن
_ المفروض تكون مبسوط على الاقل تريح رأسك شهرين
__ لا والله هسي فقدتك والله
_ جد؟
__والله
_ بس لازم تنتظر شهرين حتى ارجع
__ حأنتظرك . اتكلمنا شوية وقفلنا حتى انا فقدتو
عديت ايامي مع امي مرة قاعدين وحتى عمتي مريم معانا من الصباح صحيت بوجع بس بروح وبجي لمن خلاص زمن الفطور قاعدين كدا صرخت ليهم عرفو اني حأوضع
امي: خلاص حتوضعي . صرخت فيهم
نعيمة: اتصرفو
امي: مريم اضربي لمحمد
عمتو: كويس . قامت اتصلت ليهو ما رد ليها حاولت مرتين ما رد
عمتو: ماف رد
امي: دقيقه اشوف راشد . اتصلت ليهو بعد قفلت
امي: قال نأجر عربية وهو حيستقبلنا في المستشفى
عمتو: خلاص شوفي اي زول يجيب لينا عربية وانا بطلع الشنط
امي: تمام تمام . وبقو يتجارو وانا بصرخ بس وببكي حسيت شوية ويغمى علي من الام لمن العربية وصلت وطلعنا على المستشفى
راشد: محمد وين
عمتو: ما عارفة اتصلنا ليهو ما برد
راشد: لازم يجي عشان يوقع او يوصي لانو المستشفى دي قوانينها صعبة
امي: خلاص شوفو حاجة تخفف عنها ما شايف كيف متوجعة
راشد: الدكتور المتابعة معاهو منو
نعيمة: دكتور حامد
راشد: عمتي مريم اتصلي بيهو . اتصلو بيهو وقال لازم يجيبوني ليهو تاني اتحركنا من هناك للمستشفى الشغال فيها دكتور حامد وانا روحي دي طلعت خلاص وصلت منتهية الا جابو نقالة رفعوني بيها دخلوني العنبر وانا دي ميتة عديل
الدكتور: كان المفروض توضع طبيعي بس شايف انها ما حتقدر بالاخص هم طفلين ما حتحمل وعندها ضغط جنين لازم تدخل عملية ضرورية وين راجلها
عمتو: راجلها ما برد
الدكتور: لازم توصلو ليهو وانا بعمل اجراءات العملية
نعيمة: امي انا حأموت؟
امي: ما بتموتي حبيبتي اتحملي شوية بس . كنت بتنفس بصعوبة
نعيمة: محمد وين
عمتو: ما برفع تلفونو
نعيمة: اتصلي لعلي
عمتو: ايي نسيت دقيقة . وطلعت.....
___________
من جانب محمد
كان في اجتماع مهم مع كبار الضباط شايف اتصالات امو بس تلفونو صامت ما بقدر يقطع الاتصال ويرد ليها اثناء ما بتناقشو جا علي داخل
علي: اسف على المقاطعة بس في موضوع ضروري شديد لجنابو محمد
العميد: اتفضل جنابو محمد . محمد معاهو وطلع برا جنب الباب
محمد: في شنو يا علي
علي: الحجة امك اتصلت وقالت نعيمة دي في المستشفى ومحتاجة عملية ضرورية ومحتاجين موافقتك
محمد: متين حصل الكلام دا
علي: والله هسي اتصلت
محمد: بس انا عندي اجتماع ضروري ما بقدر اقطعو
علي: اتصل للدكتور ووصي اي زول ينوب عنك كدا ممكن
محمد: ايي صح . طلع تلفونو واتصل للدكتور واتكلم معاهو وحل الموضوع وقفل ورجع وهو فكرو مع نعيمة انو حتدخل عملية و انو هو ما معاها في اللحظة دي وهو قال ليها حيكون معاها لحظة الولادة اكيد حتزعل منو لانو كدا خزلها مرتين بس ما بيدو حاجة وكان بدعي انو ربنا يقويها وتتحمل وترجع ليهو سلامة و رجع دخل
محمد: معليش بس زوجتي داخلة عملية وكانو محتاجين موافقتي وحليتها
العميد: ان شاء الله كويسة؟
محمد: لالا كويسة عملية ولادة
العميد: ربنا يقومهم بالسلامة
محمد: امين يارب . وكلهم دعو ليها وواصلو الاجتماع وجرا زمن طويل ولمن خلصو خلاص
العميد: اتصل شوف جابو ليك شنو عشان نبارك ليك كلنا . قام ضحك
محمد: تمام . قام اتصل لامو وفتح الاسبيكر قدامهم
محمد: بشري . امو غردت ليهو في التلفون
امو: جاك ولدين صلاة النبي عليهم يتربو في عزك . ما قدر يتحمل طوالي بكى
محمد: ان شاء الله يا رب . قفل منها الاجتماع كلهم باركو ليهو
العميد: لو ما كنا حنخوف الشعب كنا ضربنا ليك رصاص . محمد ضحك
محمد: مباركتكم دي كفاية
العقيد: بنصلكم وحنبارك للمدام
محمد: ان شاء الله منتظرينكم
العقيد: هسي امشي الحق عشان تشوف اولادك . استأذن منهم وركب عربيتو وكان معاهو علي وطلعو على المستشفى وكان فرحان وفي نفس الوقت خايف من ردت فعل نعيمة انو ما كان معاها في اللحظات دي وصل المستشفى وبكى مع امو تاني ونسيبتو
امو: نعيمة من قبيل منتظراك
محمد: عارف والله بس كان عندي اجتماع مع الضباط
امو: عارفين امشي الحضانة لازم تأذن لاولادك ماف زول اخد الحق دا منك
محمد: الحمدالله . مشى للدكتور واتكلم معاهو ودوهو غرفة التعقيم طلع الكاكي الفوق ولبس مريول واتعقم كويس ومشى الحضانة لقى اطفالو وقف بتأمل فيهم وهو ما مصدق الدكتور مد لي الاول أذن ليهو وبعدو التاني وهو ايدو بترجف ورجعهم وطلع لبس الكاكي ورجع لناس امو ومسك ايدها بحنية وهو ما مصدق
محمد: امي جابو لي ولدين . امو تاني بكت واتأثرت بكلامو وهي شايفة النظرة ديك في عيونو
امو: ايي جابو ليك ولدين
محمد: وين نعيمة
امو: في الغرفة ديك . غمض عيونو وقال بسم الله ومشى ضرب باب الغرفة ودخل.............
___________
من جانب نعيمة
عمتي مريم اتصلت لعلي وخمسة دقايق محمد اتصل للدكتور وكلمو والدكتور جانا
الدكتور: اخدنا الموافقة من راجلك . فرحت
نعيمة: محمد جاي؟
الدكتور: هو في اجتماع بس قال اخوها ينوب عنو ويوقع
راشد: تمام . وطلع معاهو زعلت انو محمد ما حيحضر معاي الولادة بس عارفة لو ما مشغول ما حيخليني لانو وعدني انو يكون معاي في اللحظات بس انا الدايما حظي كعب كدا بس الحمدلله انو ما مأمورية لمن يخلص اجتماع حيجيني ودخلوني العملية خدروني بس كنت صاحية وراشد معاي وبتكلم معاي وانا ماسكة ايدو شديد بس ما فاهمة حاجة لمن خلصو متين ما عارفة ونقلوني غرفتي الخاصة والاطفال مشو الحضانة وانا البنج ما فكا مني وناس امي وعمتي يبكو ويغردو في نفس البيت وجو بكو معاي وكنت تعبانة شديد نومت شوية وصحيت وكنت منتظرة محمد يجي ومنتظرة اطفالي اشوفهم
امي جاتني
امي: محمد جا
نعيمة: عليك الله
امي: والله بس مشى يشوف اولادو ويأذن ليهم وبجيكي ان شاء الله . هزيت ليها رأسي بمعنى تمام ما عارفة كنت حاسة بتوتر التقول عروس امي ريحني وملتني ريحة قالت من ريحة الدم وكدا وقعدت معاي لمن
باب الغرفة ضرب وفتح ودخل محمد امي طوالي طلعت وقفلت الباب ورا وقف ورا مسافة وبعاين ليهو
محمد: ام اولادي السمحة . دموعي نزلت بفرحة جا علي وحضني عليهو شديد وبكى معاي وسلم علي في رأسي
محمد: الحمدالله انكم جيبتو بخير كلكم
نعيمة: الحمدالله
محمد: معليش ما كنت معاكي في اللحظات ديك ذي ما وعدتك
نعيمة: كنت منتظراك بلهفة . باس ايدي
محمد: والله بعتذر بس كنت في اجتماع والاجتماع كلو بالي كان معاكي
نعيمة: عارفة لو ما مهم ما كان خليتني براي
محمد: ما عارف اعوضك كيف
نعيمة: ماف داعي ما زعلانة منك عارفة انو ما كان في ايدك حاجة ذي كدا دايما بقول صعب انك تكوني مرت ضابط . قام ضحك وسلم علي تاني في رأسي
نعيمة: محمد شوفت البيبيهات؟
محمد: ايي وما شاء الله عليهم
نعيمة: انا ما شوفتهم
محمد: شوية وحيجيبهم ليكي . هزيت ليهو رأسي
محمد: دقيقه علي معاي برا داير يبارك ليكي
نعيمة: تمام طلع لي توبي من الشنطة ديك . مدا لي التوب لفيتو فيني وهو طلع وجا مع علي وبارك لي حمد لي السلامة وبعدها جابو لي اولادي بكيت بكي ما مصدقة انو بقيت ام وخلوهم معاي امي كانت شايلة واحد وعمتي شايلة واحد ذي العشا كدا خرجوني طوالي رجعت البيت وراشد شال لي كل ادويتي
اليوم التاني الناس بدت تجي تبارك لي وصحباتي جوني ما كانو عارفين كلمتهم بالليل طوالي الصباح جو قيلو معاي ومحمد قال الضباط كلهم جو باركو ليهو واتصلت لشمائل فيديو كول واتكلمنا ساعة كاملة
بعد سبعة ايام عملنا السماية وطبعا محمد يقصر؟ لا عمل سماية التقول عرس بس عزم كل ضباط المدنية اتخلعنا لمن كلمنا بس ما قصر وفر اي حاجة وحتى جاب طباخين وعمل سماية كبيرة لانو بقى اب اول مرة كان فرحان شديد بأولادو ورؤساءو كلهم حضرو السماية ضرب لي مشيت سلمت عليهم وباركو لي وانا شايفة نظرة الانجاز في عيون محمد وطبعا سمينا الاولاد يزن ويزيد وطبعا اكيد انا اخترتو لاني انا الشيلتهم تسعة شهور وانا التعبت فيهم فأدوني حقي كامل في انو اختار اسماءهم
السماية خلصت وخلص معاهو الاربعين ورجعت بيتي امي زعلت قالت انو خلينا ليهو البيت فاضي وعمتي معاي دايما حتى انها كانت رحلت معاي بس بتمشي بيتها فترة لفترة وهسي رجعنا البيت سوا
محمد: وين اولادي
نعيمة: نايمين جوا
محمد: لو صحو البعرف منو
نعيمة: بسمع صوتهم
محمد: وين صوتهم اصلا كيف تخليهم براهم دا شنو الاهمال دا . عاينت ليهو برفعة حاجب
نعيمة: اجي يا محمد
عمتو: محمد هووي
نعيمة: موش خايف عليهم هديلك ليهم في الغرفة امشي احرسهم
عمتو: ايي كلام نعيمة صح
محمد: انتو ما حاسين بحجم الحاجة العملتوها دي . عاينت لعمتو وضحكنا
عمتو: والله ما بنسألك يا محمد
نعيمة: خليهو يا امي . فجأة سمعنا صوت واحد ببكي قومت اشرت ليهو نظام سامع هو سكت قومت طوالي مشيت لقيت يزن صحى ومع دخلتي كدا يزيد صحى وقام يبكي محمد جا داخل شال واحد وانا شيلت واحد والاتنين سكتو لانو بعرفو ريحتنا ومحمد دايما بشيلهم لمن بجي بزورنا في بيت ابوي عشان يتعودو على ريحتو وبقول الجنا بحس بأهلو عشان كدا طوالي سكتو يزيد نام لمحمد طوالي وانا رضعت يزن حتى نام رقدناهم وقعدنا
نعيمة: عاين ليهم حلوين كيف . مسك ايدي
محمد: شكرا على النعمة القدمتيها لي دي . ابتسمت ليهو
نعيمة: بعد دا تساعدني فيهم لانو تربية التوأم صعبة
محمد: والله قدر ما اقدر بساعدك فيهو وربنا يخليكم لي
نعيمة: امين يارب
تعبت تعب مع التوأم بس محمد كان معاي خطوة بخطوة وقولت ما احمل تاني الا اولادي يكبرو ولمن تمو اربعة سنة حتى تاني حملت والمرة دي تعبت معاي محمد اكتر كنت بتوحم على البيض وقالو بعمل ضغط جنين محمد كان بتعب معاي تعب عشان يقنعني اغير رأيي بحاجة تانية كنت لمن ببكي
محمد: نينا اتحملينا قربنا
نعيمة: ما دايرة ماشة بيت ابوي حيجيب لي بيض
محمد: ياااخ لمصلحتك انتي والبيبي البيض ممنوع والله توضعي بالسلامة بجيب ليكي خمسة طبق وعد . مسحت دموعي
نعيمة: امممم طيب
محمد: الحمدلله . وقام مسح وشو في خدي قومت اضحك وجوني التوأم جارين ركبو فوق في السرير و اي واحد مسح وشو في خدي قومت عاينت لمحمد وضحكنا لانو اتعلمتو الحركة منو هو بقول ليهم عشان ماما ترضى الا تعملو كدا وهو لمن يعملها ما بعملها قدامهم بس كنت بحب حركاتهم دي قطعة من ابوهم
نعيمة: في شنو يا اخر صبري انتو
يزن: انا داير ابقى عقيد في الشرطة . عاينت ليهو بصدمة
يزيد: وانا داير ابقى عقيد في الجيش ذي ابوي . طبعا محمد من مقدم اترقى بقى عقيد في السنين دي
نعيمة: وانتو منو وراكم الرتب منو
يزن: حبوبة
نعيمة: هووي لا ماف واحد حيبقى عقيد كفاية ابوكم قاطع قلبي دايما
يزيد: ماما يااااخ
يزن: انا حأبقى عقيد
نعيمة: قولنا لالا
محمد: يزن ويزيد يلا . وهز ليهم رأسي طوالي مسحو وشهم فيني تاني لمن اقتنعت
نعيمة: خلاص خلاص تمام
يزن يزيد: يس . وجرو برا لحبوبتهم التفت لمحمد وختيت ايادي في بطني
نعيمة: صعب تكوني مرت جنابو بس الاصعب تكوني تكوني مرت جنابو برديسي وام لاولادو . وضحكنا
"حينما عرفتك عرفت تمامًا أن يأخذ أحدٌ قلبك ليس تعبيرًا مجازيًا، أنت فعلاً أخذت قلبي مني و شعرت بحقيقة ذلك حتى أني لم أعترض ، لذالك أشعر بفرح بالغ أني عرفتك، وأستطعت تمييزك، وخوض معركتي الذاتية للوصول إليك،أشعر أني محظوظة جدا،كوني عرفت الحب، وكوني غامرت كثيرًا لأحصل عليك."♥
"الاستثناء الحقيقي الذي يمكن أن يمنحك اياه أحدهم؛ أن تكون أول اهتمامته رُغم زحام يومه و انشغاله و ظروفه أيضًا، أن تطمئن به حتى تستشعر قربه مهما طالت المسافه بينكم أو نقصت، فالحُب اهتمام. "😴♥
♥النهاية♥
نعيمة: امي مريم انا ماشة بيت ابوي مالي ومال الهم دا كلو من ولدك واولادو حيجننوني انا لسع صغيرة ما استمتعت بحياتي هسي لو كان ما اتزوجت وجيبت المصائب ديل كنت راقدة والمكيف ضاربني وكان سمنت وعملت لي جضوم . عمتو تضحك ومحمد واولادو بعاينو فيني
عمتو: والله حالتك بالبلا يا بتي
نعيمة: شعري شاب بسببهم وانا في بداية عمري لالا ما بجي والله انا ماشة بيت ابوي كدا ما بجي و الله بعرف انا اتحملت قدر شنو وحيجازيني عليهو . قومت ولبست توبي جاتني يارا جارية ومسكت توبي
يارا: ماما اشي معاتي؟ " امشي معاكي"
نعيمة: نهائي ما بتمشي معاي خليكي مع ابوكي انا خلاص تعبت منكم . بقت تنطط
يارا: اشي معاتي بث . حمرت ليها وهي حمرت لي
نعيمة: زحي مني بت عاملة ذي الكعونجة دا . محمد وعمتي ضحكو والشخصية الباردة اتكلمت
يزيد: معناهو شنو كعونجة
نعيمة: انت يا ابو العريف اي حاجه داير تعرفها؟
يزيد: عشان استخدمها بعدين
نعيمة: اوعك بكسر ليك اسنانك العامل فيهو تقويم دا .
يزيد: بابا اسناني ديل شينات؟
محمد: منو قال كدا
نعيمة: معاذ صحبي في المدرسة
محمد: لالا هم شوية مفرقات بس مع التقويم حيصلح
يزيد: احلف . محمد ضحك
محمد: والله . يداب يزن جا طالع وفي ايدو مضرب بلاستيشن
يزن: امي ماشة وين
نعيمة: ماشة بيت ابوي استمتع بحياتي هناك
يزن: تعالي استمتعي معانا بالبلاستيشن قبيل يزيد جاب قون ظابط من قبيل بحاول اعمل ذيو بس ما قدرت
نعيمة: بلا بلاستيشن معاكم انا ماشة مخلية ليكم البيت دا
محمد: وتخلي مصائبك ديل لمنو
نعيمة: ليك انت انا دايرة اعيد زهرة شبابي
محمد: موش ماشة بيت ابوكي
نعيمة: ايي
محمد: خلاص نمش كلنا
التوأم: ايي نمش كلنا
نعيمة: شنو كلنا ماف بتبعني
يزيد: بابا اتكلم معاها
يزن: ايي يا بابا قول ليها نمشي معاها
محمد: خلوها انا بتفاهم مع حبوبة . طلع تلفوني واتصل لامي وفتح الاستيكر واولادو كان واقفين حول التلفون
محمد: عمتي نحنا عازمين نفسنا لبن المغرب عندكم ولا هو العشا ما عارف . وقام ضحك وامي ضحكت
امي: تنورو طوالي
يزيد: حبوبة انا داير عصير برتقال
امي: طوالي يا عيون حبوبة انت
يزن: حبوبة وانا داير لبن وعصير برتقال ذي يزودي
امي: طوالي حبيبي
محمد: وانتي يا يارا ما عاوزة حاجة من حبوبة
يارا: واوا
امي: وحلاتي يا ناس احلى واوا بجيبو ليكي وانت يا ابو العيال داير شنو
محمد: انا عايز قهوة بس
امي: بعملو ليك
محمد: تسلمي يا غالية
امي: وام العيال ما عايزة حاجة؟ . قام ضحك والتفت لي كنت قاعدة بعيدة جنب عمتي وبتابع بصمت
محمد: وانتي يا نعيمة ما دايرة حاجة؟
نعيمة: دايرة ابوي بس . قام ضحك وكلمها امي ضحكت
امي: متوفر عندنا
محمد: قالو ليكي متوفر خلاص يا عمتي بنجي عليكم
امي: منتظراكم . وقفل منها
محمد: يا جيش استعداد . كلهم اترصو صف والتوأم ضربو تحية ويارا حاكتهم محمد دايما بعملهم انا وعمتي بنضحك
محمد: اي واحد يلبس شبشبو ويكون حضور هنا
التوأم: حاضر سيدي . جرو عشان يلبسو شباشبهم ويارا وراهم ضحكنا فيهم
محمد: اها وانتو
عمتو: لو مديتو لي توبي معاكم بكونو ما قصرتو معاي
نعيمة: امي يعني كسرتي تحالفك معاي؟
عمتو: دي عزومة مجانية خلينا نمش ونجي نعتصم تاني . قومت ضحكت
نعيمة: كويس . قومت جيبت ليها توبها ومشيت عشان اغير توبي محمد جاني
محمد: ام اولادي
نعيمة: انت واولادك انتهيتو مني
محمد: اتحملينا شوية بس
نعيمة: حتمشو وين
محمد: بيت ابوي . قومت ضحكت
نعيمة: استعجلو خلاص
محمد: نينا تعبتي مننا خلاص؟
نعيمة: ماف زول بتعب من روحو بس انتو شيبتو لي رأسي . قام ضحك
محمد: وين الشيب دا انا ما شايفو
نعيمة: لانو داخلي
محمد: ايوااا لالا تمام نحنا نعتذر داير اسألك
نعيمة: اها
محمد: ما خلاص؟
نعيمة: لشنو
محمد: انو تجيبي لي بيبي جديد
نعيمة: لالا كفاية المصائب العندي ديل براهم مطلعين روحي
محمد: ياااخ ما كفاية خلينا نجيب طفل تاني
نعيمة: انت بتهظر صح؟
محمد: والله جادي يااااخ انا منك اطفال كتار . سكتا مسافة وعاينت ليهو
نعيمة: ما لاحظت حاجه من تصرفاتي الايام دي
محمد: من ياتو ناحية
نعيمة: يعني من حيث المزاج
محمد: والله ملاحظ انو بقيتي عصبية ومزاجية
نعيمة: دا مني دا من ولدك
محمد: اي واحد فيهم يزن ولا يزيد
نعيمة: دا من الجديد . عاين لي مسافة بحاول يستوعب
محمد: بتهظري صح؟ . قومت ضحكت
نعيمة: ايي بهظر اصلا
محمد: مالك ياااخ والله لمن خلاص داير اطير من الفرحة . ختيت ايدي في بطني وبقيت اتكلم معاهو
نعيمة: ابوك ولا بعرف ولا بحس بيك المفروض من تصرفاتي يعرف اني حامل بيك بس للاسف
محمد: نينا ما تهظري ياااخ
نعيمة: والله حامل ما حسيت؟ . طوالي حضني شديد
محمد: الحمدلله اخيرا والله من فترة داير افتح معاك الموضوع اقول ليكي وقفي حبوب التنظيم بس كنت خايف تقولي لي انت اناني لانو انتي البتعبي والبتربي . قومت ضحكت
نعيمة: اصلا اناني عشان ما بتربي
محمد: نينا جد كدا حامل؟
نعيمة: والله جد كدا حامل
محمد: اطلبي اي حاجة وبنفذها ليكي
نعيمة: تربي اولادك ديل انا قدمت استقالة
. قام ضحك
محمد: هسي الخارب ليكي اولادك منو
نعيمة: انت
محمد: خلاص دي ما براها تربية؟ . ضحكت
نعيمة: والله نعم التربية
محمد: ليه ما كلمتيني انك حامل
نعيمة: عشان كنت راجعة بيت ابوي
محمد: وكم رجعتي تخبي كيف؟
نعيمة: للزمن داك بلقى طريقة
محمد: سجمانة عليك الله ليه ما اتكلمتي
نعيمة: لانو عرفت الصباح بس
محمد: ايوااا . ولبست توبي وطلعنا بيت ابوي ولقينا امي جهزت لينا اللبن
نعيمة: امي ما عايزة لبن انا
امي: ليه بكب ليكي بكاية صغيرة خلاص
محمد: كبي ليها اكبر كباية لانها ما براها
امي: كيف ما براها؟
محمد: نعيمة حامل
امي: شايفة يا مريم كلمتك قولت ليكي حاسة اي نعيمة حامل من تصرفاتها دي . ضحكنا كلنا
عمتو: كلمتيني والله الف مبروك يا بتي
نعيمة : الله يبارك فيكي . وباركو لي كلهم ومحمد كان مبسوط شديد ميلت عليهو
نعيمة: موش كنت عايز طفل جديد تتحمل هرموناتي بتاعت الحمل والمرة دي حاسة انها حتكوني اكعب من حقت يارا
محمد: عمتي ممكن ندفع ليكم نعيمة دي ونستلمها بعد الاربعين . كلهم ضحكو
امي: انا كبيرة عمر ومرتك صعبة للاسف طلبك مرفوض
نعيمة: بقت كدا صح . نفخت ليهم جضومي محمد عرف خلاص انو لو اتمادو حأبكي ليهم
محمد: لا ما بقت بنهظر الله يرضى عليكي لا موش بنهظر يا عمتي؟ . امي ضحكت
امي: والله يا محمد انت حتدخل الجنة بسبب بتي دي
محمد: اتحملتني سنين بتحملها تسعة اشهر . كلامو ريحني وابتسمت بفرحة .
نعيمة: امي املي لي كباية اللبن دي لعينها واديني بسكويت معاكي . ضحكو فيني
محمد: نينا وريهم جملتك الشهيرة . صلحت قعدتي
نعيمة: احم احم صعب انك تكوني مرت جنابو بس الاصعب تكوني مرت جنابو برديسي وام لاولادو . وضحكنا كلنا
تمت بحمد لله