رواية في قلب القريه الفصل السادس 6 بقلم نوسه حمد
اخوي قال لي امي لو ما عايزاها تسمع كلامنا نحنا رجال البيت اعملو الفي راسكم ونحنا ح نطلع نخلي ليكم البيت قلبي وجعني وكلامو نزل علي زي الصاقعه وغلبت حيله قصاد قرار اخوي بالذات انو هددني اتحرم من التعليم وارجع لمحمد وانا اكتر واحده عارفه نفسي اضررت كيف من مجتمعهم الما برحم ومستعدين يعلمو قصه يألفوها ويخرجوها وتكون ماليها اي اساس من الصحه وتتداول في الحله وكل زول يزيدها حبه انا واثقه من نفسي جدا بس اكيد ح الد البنات والاولاد ما معروف يقولو فيهم شنو وما معروف لو عاشروهم يكونو كيف بطني طمت من الدنيا وكنت ببكي لمن برجف امي قالت لي قشي دموعك ديل ما عاش ولا كان البنزل دمعتك وانا حيه قلت ليها كيف يمه قالت لي اخونك ما ح يغصبوك علي راجل وناس انتي ما عايزاهم قلت ليها يمه بس هم ح يطلعو يخلو لينا البيت وانتي عارفه يمه ما عندنا زول يصرف علينا قالت لي ارض الله واسعه وانا زاتي ما قاعده ليهم عشان يطلعو اخلو لي البيت قلت ليها يمه نمش وين لا لا يمه انا عارفه انتي قدر شنو بتحبي اولادك وعاوزه تفرحي بيهم مستحيل يمه اخرب حياتكم قالت لي حبي ليهم بعلمو الله بس كمان انا سندك بعد ابوك م عندك سند غيري اجدعك لراجل يدمرك ويدمر مستقبلك واخوانك يشوفو مستقبلهم انا م ح اكون مرتاحه لا ح اغمد ليل لا نهار وزي هم م اختارو انا كمان اخترت وما بهددوك طول ما انا عايشه جهزي شنطتك وانا كمان بجهز شنطتي وما عندي قعاد هنا وبحولك من جامعتك دي لجامعه في الخرطوم انتي بس اتوكلي وربنا كريم قرار امي كان صادم وامي النوع المن البيت م بتطلع تجي تقرر عشاني تطلع من الحله قلت ليها يمه لا لا انا زاتي عاوزه محمد دايره ارجع ليهو قالت لي انا اكتر واحده بعرفك كويس ياما شفت في عيونك حيره وبتجي منو زعلانه وما بتقولي لي زعلك شنو عشان فعلا الزمن داك كنتي عايزاهو بس هسي انتي م عايزاهو وانا امك بحس بكلامك قبل تتكلمي وكنت كل م تجيني زعلانه وما تحكي لي اصلا ما بسالك عشان انتي جواك حافظه العشره وانا ما الام البسكك في حياتك الخاصه عشان اعرف الفيها شنو كنت بميل لي اني اشكر راجلك واهلو ومن جواي بقول ياربي العملو ليها شنو خلاها تزعل وما تحكي لي كنت بقيف في صفو عشان م اخرب حياتك وادمر بيتك بالتحاريش بس شكلك صبرتي كتير والصبر عندك نفذ ولو رجعتي ليهو لا ح تكوني مرتاحه لا هو مرتاح ولا انا مرتاحه بالذات انو اتزوج انا البسندك لو كل الناس وقفت ضدك لاني انا البحس بيك وكل الناس ديل ان شاء الله في ستين انا م خايفه من زول طالما ما عملنا شي غلط وربنا عالم بحالك انتي بس خشمك عندك وجهزي شنطتك نخليهم نايمين ونطلع قلت ليها يمه نمش وين انا خايفه وانتي عارفاني بخاف من العاصمه قالت لي قوي قلبك وخلي ايمانك بربنا قوي واتوكلي علي الله وانا معاك قشه م ح تعتر ليك ممكن تخافي لو كنتي براك وهسي خلي التفكير قومي جهزي مشيت جهزتا شنطتي وجهزت اي شي وورقي وامي كمان جهزت حاجاتا اليوم داك امي م عملت للبيت اكل اكلنا طحنيه ومربي من الدكان ورقدنا بدري اخواني كانو في السوق جو المساء يفتشو في الاكل قالت ليهم تعبانه م قدرت اعملو حسو بيها زعلانه بقو يتكلمو معاها قالو ليها عاوزين مصلحتها م عاوزنها تنهي حياتا وتطلق وتقعد في البيت البعرسها تاني منو قالت ليهم بلاش كلام فاضي اختكم قعدت مع زوجها واستحملتو واستحملت اهلو وكلمتكم بالحاصل انتو هسي رضيانين انها تعيش معاهو بعد القالتو لينا دا والجهل العايشين فيهو الناس ديل لو انتو موافقين انا م موافقه قالو ليها بنشترط عليهو يطلعها من حلتهم تعيش معاهو قلت ليهم انا من عرستو قلت ليهو مستعده اعيش معاك في راكوبه برا حلتكم ولا في شقه هنا ورفض رفض تام لانو اهلو ما ح يوافقو ليهو سكتو ما قالو شي قالو لي علي العموم نحنا اديناهو كلمه قلنا ليهو الجمعه تعال سوقا انتو عاوزين تكسرو كلامنا امي م ردت عليهم قالت ليهم انتو اخترتو وانا اخترتا بقو يجوطو وكل م اجي اتنازل واقول ليهم طيب ودوني ليهو هسي امي تقول لي هووووووس خشمك عندك ونومي نومك نومتا قلبي مقطوع ودموعي ماليه الوساده والهم ح يشق راسي النص
الصبح امي صحتني صلينا وطلعنا الشاي م شربنا وقالت لي اكتبي لي ورقه لي اخوانك ديل قلت ليها شنو قالت لي اكتبي ليهم انتو كبار وكلمتكم سيف علينا بس قراركم ما صاح تودو اختكم للنار بكرعينا وبدل تخيروني وتطلعو من البيت انتو محتاجين للبيت عشان تعرسو فيهو انا اخترت اطلع واعلم بتي واسندها وما اكسر عينها قدام الناس وعشان الناس ما تنكسرو قدامهم قولو ليهم اختي حولوها جامعه في اي ولايه وامي فاتت معاها وانا لو قعدت في الجوامع ما بجي راجعه تاني وخلو بالكم من روحكم وانا عافيه ليكم وادعو لينا كل ما تتزكرونا وكانت بتبكي وبتملي فيني واخواني عندهم صوره معلقه في الحيطه معاهم ابوي شايلاها وتبكي وتسلم عليهم قدر ما اقنعتها نقعد اصرت اننا نطلع والدنيا كانت ي داب باديه تكشف طلعنا وماف زول شافنا من حلتنا وقفنا في الظلط وبقينا نأشر للعربات في عربيه بعد فاتتت جا راجع لينا ولد صغير بكون اكبر مني بشويه سلم علي امي وقال ليها يمه عافيه ان شاءالله قالت ليهو عافيه بس ماشين الخرطوم انت ماشي وين وبنديك حقك العاوزو قال ليها العفو يمه عاوزه لي دعوه قويه واركبو يلا امي ركبت معاهو قدام وانا ركبتا ورا والولد شكلو روحو حلوه بقا يونس في امي وامي ما شالله تونس فيهو وانا ورا شبعانه بكا وهو شايفني بالمرايه قال لي امي بتك دي مالا هو النوع الصريح بقول اي شي امي قالت ليهو عيانه قال لي يا ساتر بتحسي بشنو انا ممكن اساعدك انا طبيب شغال في مستشفى فضيل امي قالت ليهو م شاء الله عندها ملاريا بتي قال ليها اخدت العلاج قلت ليهو اي قال لينا تمام ربنا يشفيك لو احتجتي لاي شي النديكم رقمي دا الناس لبعضيها م معروف الظروف امي شكرتو وقالت ليهو وقفتك معاي دي بالدنيا قال ليها العفو انتي زي والدتي ربنا يرحمها وانا م عملت ليك حاجه وونستوني في السكه ولو م حسيتكم محترمين ابدا م كان جيتكم راجع امي شكرتو شديد وادانا رقمو امي قالت لي ختي في شنطتك ونزلنا في الخرطوم ونحنا لا بنعرف شمال لا يمين قلت ليها يمه نحنا اتسرعنا هسي نقبل علي وين قالت لي كيف نقبل علي وين ارض الله دي ما واسعه نتوكل علي الله ونفتش لينا مكان نرقد فيهو عندي قروش انا قلت ليها مصيرن يكملن يمه قالت لي الله كريم بشتغل قلت ليها يمه تشتغلي شنو هو انتي بتعرفي شنو قالت لي بعرف اطبخ بخت لي صاج في الشارع بعمل لي طعميه قلت ليها مستحيل يمه ونرجع هسي دي وقعدتا ابكي واجعر وهي تشاكل فيني قالت لي اوعك تنزلي دمعه تاني نحنا خلاص طلعنا والبقا بقا تتوكلي علي الله ولا كل دقيقه زي الماسكاك هستريا تبكي البشوفك تبكي بقول ضعيفات بغشو علينا امسكي دموعك دي وخليك شجاعه لو خضتي النار استحمليها ودا اخر كلام عندي قلت ليها حاضر يمه وطبعا امي م كبيره صغيره وماعندها امراض مرات بحسها اقوي مني لانها نهاي م حسستني انها خايفه من شي مشينا في البلد الما مفهومه دي وانا غلبني اظهر القوه القالتا لي امي بقيت استغفر واتوكلتا قلتا موتنا موتنا حيينا حيينا بس لو امي جاتا حاجه م ح اسامح نفسي ولا اخواني ح يسامحوني مشينا لمن تعبنا والمكان النزلنا فيهو شكلهم ناس راحات زول لافي في الشارع ماف غيري انا وامي طوالي امي قالت لي المكان دا شكلو حق ناس الراحات نمش لينا مكان شعبي سالنا لينا واحد قلنا ليهو دي وين قال لينا كافوري انتي عندكم اهل هنا ولا شنو امي قالت ليهو لا لا يا ولدي انا جيت من البلد ودايره لي مكان ااجر لي فيهو غرفه ان شاءالله وتكون رخيصه جبتا بتي دي للجامعه قال لينا لا لا المكان دا هنا لو لقيتو فيهو ايجار ح يكون بالمليارات امشو اي مكان تاني امشو شرق النيل ولا الحاج يوسف ووصف لينا مكان نركب ركبنا ونزلنا في شرق النيل وبقينا لافين اكلنا في الشارع وامي سالت بتاع الدكان من مكان ناجرو بسعر رخيص قال لينا عندي ليكم زول بسكنكم لا قرش لا تعريفه امي قالت ليهو هوي ما تفهمنا غلط نحنا ناس محترمين قال ليها معقوله يا حاجه انتي زي امك والما برضا لي امي واختي ما برضا ليكم صراحه انا خوفتا قلت ليها يمه ارح نرجع بيتنا قالت لي تروحي في البحر انتي ي بت جنيتي ترجيعني لي اولادي وادمروك انا هينه احسن تسكتي سكتا م اتكلمت بقينا منتظرين قال لينا اصبرو الولد بجي هسي بقينا منتظرين جا ولد شكلو استاذ ولا محامي لانو الاحترام ظاهر في وشو بتاع الدكان قال ليهو الحاجه وبتها ديل دايرين مكان يقعدو فيهو وانت اليوم داك قلت لي بيت اخوي فاضي وقال بدل يكون فاضي اسكنو فيهو زول قال ليهو والله لقيت لي شباب بقعدو فيهو معليش امي قامت علي حيلها وبقت تترجا في الولد وتبكي ليهو قالت ليهو انا قدر القروش العندي خايفاهن يقطعني والشباب ديل يمكن يقعدو في اي مكان وانا اقول ليها يمه عليك الله اسكتي ما تنزلي لي زول الولد عاين لي وقال لي امي طيب يمه انا بعتزر ليهم وقومو ارح الولد بقا ماشي قدامنا وانا بطني طامه وحاسه احساس غريب ما اطمئنيت لا لي بتاع الدكان لا لي الولد رغم انهم ينشافو كويسين وربنا يستر ……….يتبع