رواية باائعة الحطب
الفصل الحادي عشر11
بقلم دانيا
اتلفت ورا لقيت كمال ماسك الراجل مثبتو في الحيطه وبضارب فيهو ،، جريت عليهم فكيت كمال من الراجل واعتذرت ليهو ومسكت كمال من يدو ومشينا خطوتين الراجل ورانا قال ولد م مأدب انا قلت شنو في النهايه كلامي صاح ول عشان عاوز انقذها منكم انت وابوك المانافع قاعد في البيت زي النسوان ومتعب البت المسكينه بالشغل....اول ما جاب سيرة ابوي حسيت بالغضب وم حسيت بنفسي غير رجعت ليهو وضربتو بالكرسي الجنبو في راسو لمن وقع.
الناس كلهم وقفوا مصدومين فيني كيف كنوز البت الهادئه يجي منها تصرف زي دا....انا زاتي بقيت واقفه ومصدومه من نفسي من غير ما انطق بحرف سحبت كمال من يدو وطلعنا من السوق ؛؛ طول الطريق وانا برجف وبلوم في نفسي واتزكرت وعدي لأبوي قبل سبعه سنه ، قلت ابوي لو عرف ح يزعل مني شديد ،، اثناء ما انا شارده في افكاري قاطع تفكيري صوت كمال وهو بقول لي الراجل مات؟! كلمتو دي خلت قلبي يدق بسرعه وخوفي زاد.
عاينت ليهو قلت ليهو بصوت خايف ومتردد لا مستحيل يموت الضربه م قوية ، قال لي انتي من وين جبتي القوة دي كلها ؟ قلت ليهو وصلنا انت اربط الحصان وانا بودي الحاجات جوا....صادفت ابوي في الباب سلمت ليهو وخشيت جوا م قدرت اعاين ليهو من الخوف ،، ناديت كمال قلت ليهو م تجيب سيرة لأبوي عشان م يزعل قال لي حاضر وطلع ، اليوم كله وانا متوترة ، بهناك الراجل بعد نحن مشينا قام لكن كان في جرحه في راسو .
قال إلا يجي يشتكي لأبوي بس ناس السوق منعوهو وختو الحق عليهو قالوا ليهو انت الغلطان مافي زول برضى بابوهو....وقت رجع بيتو المساء ولدو ماهر كان قاعد سألو مالك ياابوي دا شنو الجرح الفي راسك دا ؟ قال ليهو مافي حاجه وقعت في السوق من الكرسي ، الولد طلع ماشي يصلي العشاء لقى واحد زميل ابوهو في السوق سألو اها ابوك بقى كيف قال ليهو كويس لكن قال مصدع عشان كدا م قدر يجي الصلاه ؛؛ طوالي الراجل قال ليهو والله البت دي كلنا حيرتنا هجمت زي المتوحشه لكن نعمل شنو مافي زول برضى في ابوهو عشان كدا م خلينا ابوك يمشي يشتكي.
الولد استغرب قال ليهو بت شنو؟ الراجل قال ليهو بت زين الدين كنوز ،، الولد استغرب قال ليهو مالها ؟ الراجل هنا استوعب انو م عارف بالحصل لأبوهو في السوق بس بعد إصرار منو حكى ليهو ، الولد غضب وقال خليها تصبر لي.
بكره الصباح بعد كمال مشى المدرسه ونظفت البيت وجهزت الفطور لأبوي....جهزت الحصان وطلعت الغابه اجيب حطب ، وصلت ربطت الحصان في شجرة وعاينت يمين شمال مافي زول استخدمت القوة عشان اقطع الشجر ، فجإة ظهر ماهر ولد الراجل الأمس ظهر وراء الأشجار وشافني بعمل في شنو اتصدم ونسى موضوع الإنتقام لأبوهو وطوالي جرى القريه ونشر الخبر بين اهل القريه " كنوز ساحرة " .
بعد انتشار الخبر بس الناس سكتت خوف مني فكرو اني ح ااذيهم.....حتى في السوق تعاملهم معاي بقى محدود دا كله خوف ،، بس في يوم من الأيام م مشيت السوق طلعت الغابه لبعد الظهر كدا بعد قطعت الحطب وجيت راجعه اتأخرت شديد وكانت الدنيا مغرب ؛؛ كنت سايقه الحصان في الطريق في امان الله فجأة ظهرت قدامي حاجه سوداء ضخمه شديد اعترضت طريقي وقفت قدامي لمن الحصان اتخلع وقطع الطريق بسرعه حاري كدا اتصدم بشجرة ووقع في مكانه والحطب وقع من العربه.
وانا طرت وقعت بعيد من الحصان قمت لقيت الحاجه السوداء دي واقفه فوق راسي....بقيت ارجف وم عرفت اعمل شنو قلبي بقى يدق بسرعه من الخوف والغابه فاضيه م فيها ناس الكل رجع بيوتهم ،، اتزكرت الجينات والقوة الورثتها من امي ، حاولت استخدمها وادافع بيها عن نفسي بس طلعت ولا شيء قدام الكائن الغريب دا ، من غير ما احس شالني فوق ودق بي الأرض وبقى يضحك ويطلع اصوات غريبه بقيت حاسه بألم كبير بصعوبة قدرت اقوم بقيت بقول وينك ياامي ساعديني .
بس امي ما جات بقيت اتصارع مع الكائن دا في الغابه المظلمه دي ، لحد ما اغمى علي....لمن فتحت عيوني لقيتو مافي ولقيت نفسي واقعه وفي عمك عجوز كدا بصحي فيني قمت مخلوعه زحيت منو بسرعه وانا ميته من الخوف ، قال لي يابتي مالك الحاصل عليكي شنو عاين للعربه حقت الحصان قال لي الحصان عتر بيكي ول شنو؟ هزيت راسي بنعم ،، مسكني من يدي شداني لمن قمت ورفع لي الحصان وخت لي الحطب في العربه وساعدني اركب ، قلت ليهو شكراً ليك ياعم انت ماشي وين ممكن اساعدك ، قال لي انا جيت بحصاني راجع على القريه ولقيتك واقعه شكرتو واتحركت رجعت البيت.
ابوي سألني مالك والحاصل شنو قلت ليهو وقعت كان جسمي كله مجرح ،، الليل كله م نمت وبتزكر في الكائن داك جاء من وين؟ وفي اليوم التاني م قدرت امشي السوق النهار كله نايمه بقت بالليل ظهر لي نفس الكائن في البيت....بقيت اصرخ وناديت ابوي جاء من شافو اتخلع وبقى يعاين ليهو