رواية في ذمة الغريب الفصل السادس عشر 16 بقلم كنوز

رواية في ذمة الغريب الفصل السادس عشر 16 بقلم كنوز

هو الما ينام الليّلل

لازم سالفة باله

لو مبيوع مِن أعزاز

لو متمرمرة أحواله

━━━━━━━━━ ⚖ ━━━━━━━━━

لزمني من زندي احس اصابعه طبگت ع العظم من گد ما ضاغط ع أيدي 

:: ع منو تضحكين ولج اليوم اذا ما خليتج تزوعين شكو عندج انا موش قسيم 

گال كلامه وتهديده وجرني وياه براءة تصيح تريده يهدني ماكو رجليَّه بعد ما يشيلني من الخوف وگعت سحلني للغرفة دفعني بيها وكعت وجهي 

خشمي گام يصب دم امسحه بـ اديَّه و رداني و جسمي كله يرجف گبل لا يسد الباب دخلت براءة شبگتني و تحجي وياه بعصبية

::  شجاي تسوي قسيم شبيك تخبلت شلون تمد عليها 

قسيم :: بت وراها طلابة موش اطگ بس اخلي جيلة براسها واخلص منها هم 

نطق كلامه بتهديد واضح و مبين مستعد يسويها صدك جر براءة حيل عني دفعها خارج الغرفة و قفل الباب سمعت تكات القفل من انسد 

حسيت شي طبگ ع صدري حيل وغلق مجرى الهوى تقرب مني خطواته تبث الرعب بيه زحفت ارجع ليورا وهو يتقدم بهدوء 

طخ ظهري بالحايط وصل يمي كمبص ركبه ونص گدامي 

قسيم :: اي بله غردي شلون گتلتيها للبنية فاتحة صالة ولادة بدون اجازة وتلعبين عدكم ارواح الناس لعبة مو 

هزيت راسي لا ما انطاني مجال افتح حلگي وانطق ابرر ادافع عن نفسي لزم شعري من فوگ الشال و ركع راسي بالحايط وراي 

قسيم :: اهم شي الفلوس عدكم يموت المريض يشتعل ابو ابوه ما يهمكم ولا النوب شاردة وجاية مسوية روحج فقيرة و مصلحة يمي 

كلامه عالي بس ما اسمع منه بس كلمات و حروف متقطعة طنين صار بـ اذني وراسي ثگل من الضربة راد يضربني بعد دفعته

رحمة :: كاااافي مو فصيلة عندك اني حتى تضربني اذا تشوفني مجرمة سلمني لشرطة وماعليك 

باوع لايده شلون دفعتها صمها حيل و فتحها وضربني بظهر ايده ع حلگي 

قسيم :: صووووتج ما اريد اسمعه و هذا حلكج ما تفتحي الا بـ نعم سيدي اذا حرف واحد زيادة اجنزج وعلي 

رحمة :: بريئ منك الامام علي ع ومن أفعالك هاي ياهو الاجه وحلف بـ اسمه وانتم حتى الإسلام ما محسوبين 

لزم فكي ضاغط عليه حيل دافع راسي وياه الحايط وجه مگابل وجهي يحجي من بين أسنانه بصوت حاد 

قسيم :: تدرين اذا ما بلعتي لسانج و سكتي شسوي بيج هسه الا اخليج طول العمر خرسة 

حركت راسي بحركات عشوائية عنيفة انفض روحي من بين اديه 

رحمة :: ما خايفة منك لان اعرف نفسي ما مسوية شي غلط وهذة سوايتك وياي ادفعك ثمنها غالي وعلي اللي تحلف بـ اسمه 

رفع ايده راد يضرب مرة ثانية واني عيونه بعيونه رغم كل ذرة و خلية بجسمي ترتجف واحس ضلوعي واحد 

ارتجي ع ثاني بس بقيت امثل الصلابة گدامة مثل ما گالت سجدة ممكن لحظة ضعف بسيطة تخلي المقابل ينهش لحمك وابقي عمري كله بندم 

ابتعد عني من دگ موبايلة شفتي طگت دم مسحته برداني اضغط ع اسناني حيل لا ابجي وتنزل دموعي 

من گد ما كتمت دموعي گامت تطلع شهگات من صدري 

ضربت ع حلگي بيدي و اهمس لروحي 

" اشش لا تبجين لا تبجين لا تضعفين لا تخلي يشوف خوفج و يستغله " 

القهر بگلبي شكبره وينك يابه مدللتك انهانت وصار اللي يكوم واللي يكعد يمد ايده عليها 

براءة بره تدك بالباب شوية و يتكسر الخشب من گد الضرب وتصيح بصوت يرجف بخوف 

براءة :: قسيم و دم المظلوم اذا ما فتحت الباب و فتت حال البت هسه اخابر ع غفار  وبس يجي و يشوفك شمسوي بيها يگلب السلف ع راسك وانت تعرف من يغتاظ بعد ما يشوف جدامه 

سمع تهديدها و الغضب جان من نصيبي تقدم مني بخطوات ترهب جرني من ايدي يريدني انهض واني نترتها منه حيل 

:: لا تلمسني اعرف امشي وحدي مو مشلولة حتى تسحلني هيج 

كز ع اسنانه حيل يعض مقدمة لسانه بغضب أشر بيده تحركي 

:: تفضلي خاتون و لسانج هذا گصري عبن صبري منج بدا يخلص 

فتح الباب صارت براءة بوجه و بساع مدت ايدها جرتني الها راد يلزمني قبل تلمس ايده أيدي صاحت بيه أول مرة اشوف عصبيتها 

براءة :: شنهي قسيم نسيت روحك نسيت تربيتك لو نسيت دينك بت غريبة عليك شلون تجيسها 

مسح ع وجه بضيق يأشر بيده لـ براءة بمعنى ابتعدي 

قسيم :: خوش شيخنا ما اكضنها بعد خلها تمشي جدامي 

براءة :: شعندك وياها  البت ذمة برگبة غفار شيگول لأهلها لو نشدوا عليها عذروني اخوي ماعرف وين أخذها 

قسيم :: براءة لاخر مرة اگولن لا تدخلين ما اريدن أمدن ايدي عليج 

براءة :: مدها انا اگولن الك مدها و طكني شتريد تسوي بيّه سوي بس رحمة لا تدنه الها وصية غفار هاي ما اخليك تگرب الها 

هز راسه بتوعد ثواني بس و جر مسدسه وجه عليَّه وهو يتقرب 

قسيم :: وعلي  اذا ما ميلتي عنها احط چيلة براسها هسه و اردنها بتابوت منين ما اجت 

منين ما يريد يجيني براءة توگف مثل سد منيع بوجه 

براءة :: شبيك شني سامع و تخبلت تعوذ من الشيطان وخل نفتهم 

قسيم ;:  انا الشيطان بذاته هسه ميلي عنها گتللللج 

صاح بنهاية كلامه حتى براءة حسيتها رجفت بس بقت واگفه گدامي كأنها جدار قديم  اساس هش وياه كل روجة ريح يهتز بس باقي صامد

و اني مجلبة بـ سترتها من ورا بثنين اديَّه وهي كأنها فهمت خوفي بدون ما احجي لافت اديها لازمة أيدي.. همست الها صوتي مخنوگ بصدري 

:: براءة عليج الله ساعديني لا تخلي ياخذني 

جوابها چان ضغطة ع أيدي بدعم و مساندة ..... موبايله ما سكت ابد استغلت براءة انشغاله بيه جرتني من ايدي 

و رگضت  للغرفة قبل لا ادخل حسيت قبضة قوية ع راسي جرني من شعري من فوگ الشال دگ ظهري بصدره و بأيده الثانية خلى المسدس ع راسي 

قسيم :: اخر تحذير براءة بس تتگربين خطوة وحدة احط جيلة براسها هسه 

يحجي و يضغط بالسلاح ع صدغي حيل كأنه يحفر الجلد و ايده الثانية خانگ رگبتي حتى لا اتحرك..... رعبه... خوف.. هلع.. فزع... شكو مشاعر واسم للخوف انجمع بيه هذيج اللحظة 

لطمت براءة ع وجهه تصرخ وصوتها تشحرج 

براءة :: خاف الله قسسم و هد البت شوفها غدت صفرة راح تموت بيدك شيخلصك من غفار و أهلها 

طلعت فضيلة من غرتها بعد كل هذة الأصوات ياله حست شعرها منثور ع اكتافها و تلف بشيلتها فاتحة عين و مغمضة عين من شافت قسيم شلون لازمني 

جحظت عيونها 

فضيلة :: يا ستار ياربي ولك شعندك كاضة البت هيج 

ما دار الها بال يسحل بيه و براءة تتوسل بيه بس تخاف تتقرب لان سلاحه براسي 

فضيلة :: ولك هدها هسه يجي ذاك المسودن انا امه خلاني اعتذر منها شيسوي بيك اذا شافك هيج كاضها 

قسيم :: انا وياه نتفاهم يمه لا تدخلين 

جرني طلعنه من باب الهول وقفلها من برا عليهن جر عباية من الحبل ذبها ع راسي و طلعني سحل من صدمتي 

بفعله ما گدرت انطي رد فعل لا مقاومة صرت مثل لعبة ماريونيت وخيوطها بيده 

دفعني ع كرسي الورا بقوة و سد الباب صعد و شخط السيارة مخلف ورا بس الغبار 

گعدت ساكنة العباية جانت رطبة و ردت ع جسمي اللي ينتفض ما اعرف خوف او برد 

طبگ السيارة ع جهة و نزل دار الي فتح الباب و خلى وصلة سودة ع عيوني و بلهجة آمر گال 

قسيم :: لا تنزعينها 

قابلني الظلام غمضت عيوني احاول اهدئي نفسي حتى لا تجيني نوبة واني بهذا الوضع و ع اصابعي  اسبح  يالله 

غير هذة الكلمة ما كدرت الفظ ولا عقلي گدر يفكر او يستذكر دعاء يالله يالله يالله يلهج لساني ب اسمه... خطفت ذيج الصورة 

القماش اللي تتوسل الها عنبر من كدام عيوني بنفس الهيئة يالله... ياعلي 

الطريق كله اردد بهل اسمين كأن ماعرف بعد غيرهن وكفت السيارة وسمعت صوت الباب نفتح عرفته نزل وبعدها فتح الباب اللي نزلت ما اعرف وين احط رجلي حتى 

من طرف ردان العباية اخذني امشي وياه للمجهول خطوات قليلة و بعدها وگفنه شال الوصلة عن عيوني غمضت عيوني بساع 

ما اگدر أواجه الضوه بعد الظلمة... رمشت أكثر من مرة ياله استقر وضعي 

جلت بعيوني وين اني واگفة بيت قديم الحديقة يابس الشجر بيها و طالع عاگول.. الأرضية صبة مفطرة كلها تراب واثار أقدام بيها يعني أكو أشخاص هنا يجون 

طلع رجال من الصحيات يسد بسحابة البنطلون مالته من شافنه بساع ضرب اله تحية وبهذة اللحظة عرفت شغل قسيم شنو 

:: اهلا سيدي ما جنت ادري بيك راح تجي اليوم 

قسيم :: اكو احد جوه 

:: لا سيدي المتهم أخذوا الصبح 

قسيم :: خوش روح انت ولا تجي بعد 

:: صار سيدي تأمر 

اشرله بيده اطلع و الرجال قفل حزامة واخذ قمصلته جانت ع ظهر الكرسي ومن فات من يمي باوعلي بنظرة  حسستني ان اني.... بنت هوى... 

مو مجرد نظرة حسيت واحد دار عليَّه نفط و حرگني اني عدلة من گد الحرارة الصارت بصدري.. شهكت من لزمه قسيم من ياخة قميص من ورا دار عليه و ضربه بوكس ع عيونه 

وگع الرجال و هو دنگ عليه يضرب بوكس ورا الثاني كلهن ع وجه عظام فكة.. عيونه.. أسنانه.. كل ضربة محسوبة يحطم جزء مهم من وجه 

قسيم :: عيونك لا ترفعهن من الگاع لا اعميهن الك 

:: اسف سيدي اعتذر والله ما قصدت شي 

:: انهض اطلع وحسابك ما خلص هناه 

گام بساع الدم تارس وجه اشرله براسه طلع وهو يتعذر مشه دخل واني ورا 

ما متنه اله لان بسببه انحطيت بهيج موقف و بسببه انظر اليه هيج نظرة 

رحمة :: شنو هذا المكان وليش جبتني لهناه

ما رد تجاهل سؤالي دخلني غرفة فارغة بيها ميز حديد الصدأ عليه و حفر شخابيط بمسمار أو ابرة جان عليه سفري 

مال اكل فارغ شاله ذبه بالسلة و جر كرسي حديد سحله ع أرضية مخلف صوت مزعج و دگة حيل 

:: تفضلي خاتون 

كعدت افرگ ايد بالثانية من التوتر اشلع بالجلد المحيط بأظافري طلع فايل اصفر نايلون فتحه و طلع الأوراق اول ورقة والثانية خلاهن ع جهة سحب ثالث ورقة خلاها كدامي 

:: وقعي 

شلت الورقة بين ادية أقر وكل سطر تتوسع عيوني و گلبي ينبض برعب 

إفادة يتوسطها اسمي ،،اعترف واقر أن الخطأ مني وبسبب تقصير وخطأ طبي مني توفت طيبة دفعت الورقة عليه برفض 

رحمة :: بس اني ما انطيت إفادة ولا حجيت هيج كلام اصلاً هذا كله كذب و تلفيق الي

قسيم :: يعني مو بسببج ماتت الحرمة 

:: لا مو بسببي طبعا 

:: لعد شعندج شاردة اذا برئية ليش ما بقيتي و رحتي للمحكمة و حجيتي الصار

:: لان نزار واهله مثلك بالضبط بدون تفاهم يردون يخلون دمها برگبتي 

:: وانتِ تدرين بهروبج هذا ثبتي التهمة عليج و سجلتي نقطة الهم 

:: ناس طغاة ما أكدر اواجهم ولا يردون نتفاهم واني بنية و اهلي يستصعبون دخلتي السجن 

:: خوشش 

بعثر أوراق الملف كلها عاگد مابين حواحبة كأنه مضيع شي لحد ما صارت عينه ع زاوية وراقة طالعة من بين الأوراق قرأ عنوانها وجراها دفعها گدامي 

:: هسه الإفادة نكول صدك همه محضرينها الج ما يردون يتعبونج حتى بس توقعين عليها و هذا شتكولين عليه 

تقرير الطب العدلي رسمي بتوقيع و ختم دكتور مكتوب سبب الوفاة خطأ أثناء الولادة سبب الها نزيف أدى للوفاة... ضحك مستهزء وبنبرة ساخرة گال 

:: هاا بس لا الدكتور الكاتب التقرير هم يكرهج ويريد يروطج 

:: لا ما اعرفه لهذا الدكتور بس الاعرفة ومتاكدة منه اني ما خطأت و النزيف جان عدها من البداية قبل لا اروح الهم حتى 

باوع بعيوني ينقر بأصابعه ع حديد الميز ماكو كلام لا سؤال ولا حتى اتهام بس نظرات تخلي المقابل يتوتر كأنه يعرف شي عني حتى اني ما اعرفه... تنهد ساحب نفس قوي يقرا بوحدة من الأوراق 

:: تگولين انتِ رحتي الها للبيت بعد ما اجه زوجها عليج طالب المساعدة مو 

:: بالضبط هذا الصار 

:: بس هنا مكتوب انتِ فاتحة صالة ولادة بالبيت و بدون اجازة تمارسين مهنة 

انتشلت الورقة من بين اصابعة عيوني تدور ع الأسطر اللي قراها لحد ما لگيتها مكتوب الگاله بالحرف الواحد سحبها مني 

قسيم : ماعندي وكت اضيعه وياج وقعي و فضيتي 

:: اذا انت هيج متأكد اني مجرمة مو بس متهمة ليش جايبني لهنا سلمني لشرطة من البداية واخلص ما طول ما عندك وقت الي 

:: لخاطره جبتج لهنا عبن اذا سلمتج الهم راح يخلونج انتِ تتوسلين بيهن حتى توقعين ع هاي الأوراق وهم ما اريدنه يتورط وياج بالتستر ع مطلوبة للقضاء 

:: ماعليك بيه اني أدبر نفسي وغفار فضله جبير عليه مستحيل ااذي و اجيب طاري اسمه 

:: ماكو داعي تجيبن طاري اسمه همه بس يلزمونج ابيته يعرفون هو جان ملفيج يمه يطبكونكم سوه بقضية وحدة 

:: بس انت طلعتني من بيته بعد وين يعرفون جنت يمه 

لملم الأوراق داخل الفايل من جديد يدردم بينه وبين نفسه 

"وانا اكولن ليش مال الج اثاري نفس الطبع " 

عافني وطلع بقيت وحدي و الأفكار تنخر براسي والبرد ينخر بعظمي 

براءة :: راح گلبي من خذاها و طلع بقيت الطم و افتر بين الحجرة و الهول ربعت امي بالكاع ضاربة دالغة وجان تلطم ع وجهة 

فضيلة :: تصخم وجهنه بين العربان يا براءة ماكدر هنا خذاها لغير مجان 

براءة :: يمه بروح موتاج غيري الموجة الموضوع موش مثل ما ابالج 

:: چا شنهي تفسيرنها اول هيلة حصرها بالحجرة و النوب من شافنه نحجي وانتِ خابرتي ع غفار سحولها و خذها حتى يخلالى الجو 

دكيت ع راسي النوب مفرداتها كله حصرها و نهبها حتى الما يدري درته 

:: يمه ترا قسيم يعرف غفار رايدها  كل عقلج يحط عينه عليها و اصلا غيرها بگلبه 

::  هااا صدك ذكرتيني عاشگ ترفة العرمة ام لسان المشرشب 

ماعولت گلبت الموجة و عافت السالفة ردت ع ترفة المگرودة خطية يله اهون من الشرف 

اخابر ع غفار ما يرد يمكن بعد بالمركز ينطي إفادة و مسلم النقال للستعلامات 

گمت ادور الجرارات ع مفاتيح النوب بيتنا متاهة كلشي بيه ضايع اجت امي وراي جرتني من ايدي 

:: تعاي ولج اذا موش عينه عليها جا وين خذها سحل تعرفين شي انت 

:: ما اعرف اي شي يمه غير غفار وصاني عليها واذا اجه و لگاها موش هنا و قسيم هيج مسوي يكوم الدنيا وما يكعدها 

طكت ايد بالآخرة 

::  ها اها عرفتها والله أولادي راح يتكاتلون من ورا النسوان 

عفتها دردم و كل شوية تكول عرفتها موش خالية وراها مصيبة هل جابها اخوها لهنا 

لگيت نسخة مفتاح ركضت للباب حاولت افتحه ما أكدرت عبن هو عاف المفتاح من بره بالقفل 

رجعت أدور مفتاح لباب المطبخ الخارجي حتى اطلع منه لكيت نسخة قديمة و عليها زنجار اريدنه يفتج ماكو يحشر ع نص 

تذكرت سجدة مرة دهنته بالزيت ركضت حطيت اله زيت وحاولت صدگ فتح 

اخذت عباتي و طلعت البيوت فارغ لا بيت عمي ابو طالب لا عون حتى سيارة فطرس موش بمجانها يعني طالع 

بس ع اقل موش بالمركز ركضت لترفة حتى تخابر عليه يروح لغفار 

گبل لا اوصل بيتهم اجه عمار جروح بوجه و سحجات ملابسه كلها تراب يمشي و ينفض بيها مدري ياهو طاگه 

من شافني ضحك واجه صوبي  ريحة النتن سابگته تعط منه عبالك مدخن تكة كاملة عفته و كملت دربي ما احس الا 

كضاني من جف أيدي فزيت و نترت أيدي منه بساع وهو عاجل بالتبرير و الاعتذار 

عمار :: اعتذر والله اعتذر 

:: هو شني تعتذر و روحه ابوي اذا نعادت اخلي غفار يبترها الك من عرجها 

:: ما تنعاد والله بس اوكفي خل احجي وياج 

عفته ومشيت وهو وراي كضاني من طرف عباتي حتى اوكف جريتها من ايده وهو معرت بيها 

:: راح ابقى بعيد عنج والله بس انتِ اوكفي سمعيني عندي سالفة وياج 

:: وانا ماعندي حجاية وياك ولا اريدن اسمع سالفتك

:: بروح أبوج اذا اله خاطرج عندج بس اسمعني هي حجاية وحدة 

:: شكو 

:: عنبر 

:: شمالها 

::  رايدها بس لا هي تنطي مجال احجي وياها ولا جراح ينطيها الي ما تحجين وياها انتِ 

:: من كل عگلك تحجي طامس بالوحل و تريدلك فص الماس روح دورلك وحدة من ثوبك 

::  اتوبن من كلشي والله وانعدل 

::روح عمار لو بيك خير جا حافظت ع اختك موش خليت فطرس يأمنها عد غفار منك ومن سوالفك واظن الما بيه خير لخيته ما بيه خير لغيرها و انصحك اذا تريد تسلم ع روحك لا تفتح هل موضوع ويا جراح ولا حتى وياه عمي ابو طالب لاتشوفة سيد و يتصرف بهدوء من توصل لعنبر يجرم بيك 

عفته و مشيت وهو بيده نقاله طكه بالكاع و كفر امشي و اردد مرجوم الما يرجمك كزبر كل جسمي من اللفاظ اللي لفظها.. ولا يكول اتوبن  

دكيت الباب ع ترفة اسمع صوت تلفزيون يقرا قران عالي دكيت الباب بقوة أكثر حتى تسمع طلعت مبتسة 

البيت كله ماي جاي تنظف بيه 

:: هلا همزين من وحدة منجن فگدتني واجت من الصبح لسه انظف وحدي و.. 

قاطعت كلامها مستعجلة 

:: عندج رقم فطرس 

:: شكو خير خو ما صاير شي 

:: اريدن اخابره بس ماعندي رقمه 

ركضت للحجرة شوية واجت بيدها دفتر صغير بيه رقم 

:: ماعندي نقال گال راح يجيبلي وياه من يجي و للاحتياط خلى رقمه گال اخافن يصير شي خابريني من الولد 

اخذت الرقم نقلته يدگ بس ما يرد دكيت نوبة لخ شوية و رد 

:: الو فطرس 

سكت ثواني و گال بنبرة حسيتها تختلف من يحجي وياهم

:: هلا علوية هلا شلونج 

::  فطرس عفية جاي اخابر ع غفار ما يرد اظنه بعده بالمركز تكدر تروح اله خله يجي للبيت بساع 

:: خير صاير شي انا جايكم هاي  خمس دقايق و اوصل 

:: لا اريدن غفار لازم هو يجي 

:: يجوز عنده شغل  انا موجود علوية و التردينه اسوي الج شنهي الكهرباء طگت .. ماطور الماي عطل... الغسالة وگفت كلشي اعرف 

استغفرت ربي اجر نفس قوي وهو مستمر يعد الا گتله 

:: ماكو شي عطلان و السالفة تخص غفار روح اله گله البت امانتك خذها قسيم خله يرد بساع 

:: شنهي 

:: فطرس عليك الله گلبي خلصان افهمني عدل و روحله خله يجي 

:: شنهي بت و أمانة ياخذها قسيم شو هذا صار فرد مرة سرسري و تصرفاته بعد ما ينسكت عليها 

:: هسه شني فطرس راح تروح اله لو انا اروحن بنفسي 

:: اي روحي و بدربج گبل لا تمشين علگي اريلات اثنين ابابكم 

:: اريلات شني 

عاگدة جبيني بعدم فهم انشد شني المعنى و ترفة تگمز و اطگ بيدها ع حلگها بفشلة اتكرب يمي وتهمس اله 

ترفة :: فطرس اسكت كض لسانك عليك لا تفشلني وياه بيت عمي حاكم 

مبين تعرف شنهي اريلات ثنين هي الوحيدة تفهم مصطلحات اخوها تنهد بصوت مسموع وكال 

:: استجني انتِ علوية وانا رايح اله هسه اجيبنه الج للباب 

سديت النقال و بقيت واكفة بمجاني بقهر عليها لسه احس بأديها كاضة سترتي و صوت الضمير بداخلي يصرخ 

الصوج مني انا قصرت جان مفروض انتبه الها أكثر لو كاضتها أقوى جا ما گدر ياخذها ... اي انا غبية لو كاضتها زين جا ما كدر يجرها

لو... و لو... اجلد بروحي بكلمة الـ لو... شلون أواجه غفار شلون احط عيني بعينه واگله امانتك خذوها مني

احس مثل واحد كاضلة سجين عمية لا هو ذابحني ولا هو عايفتني يحز بيه ع كيفه هيج فشلتي شلون أواجه اخوي من يجي 

حسيت ع ترفة تلوح بيدها جدام وجهي من طال سكوتي و شرودي 

ترفة :: ولج براءة موش احجي وياج شمالج صفنتي 

:: هاا شگلتي ما سمعت 

:: شبيها رحمة صدك قسيم خذاها شيريد منها

عاينت الها حتى الكلمة استعصب نطقها من الحمل الصار عليَّه 

:: بعدين ترفة بس لا تگولين لاحد لا يطلع هذا الحجي ابد 

:: لا توصين حريصة 

مشيت للباب و درت راسي مامش اي شك بعيونها لقسيم لا سوء ظن وهي بس تحبه جا شمالها امي تطعن ابزر بطنها 

:: براءة عليج الله اذا محتاجة شي گولي انطيكم عيوني وما اجازي وكفاتكم وياي 

:: و شسوينه قابل بالعكس جثير مقصرين وياج جان مفروض ما خلي عمي كزار و عمار يجيسونج ابد 

:: لا والله ماكو قصور منكم انا جنت ارد بيتنه رغم غفار جان دوم يحذرني 

:: و تردين لوحدج غير حجايات امي دگت بصدرج 

تنهدت الدموع تلمع بعيونها مثل اليلو و رسمت ابتسامة مرتاحة ع ثغرها 

:: كافي بواجي فطرس و طلع بعد ماكو عذر نريد نشوف ضحكتج 

ابتسمت تمسح دمعة سالت ع خدها و شبگتني حيل 

:: اهلي انتم والله اللي يصيبكم يصيبني ما احبن اشوفنكم طايحين بشيع

حبيتها من راسها 

:: جا غير بنيتنه انتِ و كافي شغل لا تهلكين نفسج هسه أيدي ما تاخذ ع شي بس خل تفض هل سالفة واجي اعاونج 

رديت لبيتنه و اشوفن امي لابسه عبايتها و كاعدة بعتبة الباب 

:: هاا يمه خيرج كاعدة بره 

شالت طرف شيلتها لفته ع وجهه تنگبت بيه و مدت راسها تعاين منا ومنا شلون واحد يراقب حتى من تحجي بهمس 

::  اشوفن الوضع اطقس الاخبار 

:: يا وضع يا اخبار يمه 

::  جا اخوج سحلها لشارع سحل اخافن وحدة من نسوان العگد شافنه و يطلعن صيت حتى اعرف اردهن

هزيت راسي بيأس من امي و طبيت البيت حاطة ع ايد ع ايد  

سمعت صوت سيارة هبيت من مجاني بساع طب غفار مثل الرعيدة يصيح مغتاظ وامي ورا تصيح 

فضيلة ::نصي صوتك لا تسمع الوادم شتكول علينا اولاد العميد حاكم، ،السادة والسلف يحلف براسهم حاطيلهم بت شگرة و يتعاركون عليها 

غفار :: شلج بهل حجي الماصخ يمه 

فضيلة :: موش انا يمه بس الوادم لو سمعت حجاية تحرفها و تسويها سالفة شرف 

غفار :: اللبي زود خل يحجي جدامي عليها اودي بتابوت لـ امه 

ترك امي جي يعرفها مراح تسكت و گال بتعب مرد روحي 

غفار ::شلون تخلينا ياخذها وانا مأمنج عليها براءة 

براءة :: والله وكفت بوجه و حميتها بروحي بس جراها من بين اديَّه و غفل الباب علينا و خذها 

جان يدور بالكنتور مدري ع شنهي عاف كلشي و ندار عليّه شرايين عيونه من الغضب صارن حمر 

غفار ::  هو جراها يعني كضاها و جاسها 

سكتت بلا جواب  فتح الكنتور اخذ سلاح و اخذ أوراق مدري شنهي يستغفر و ايده ترتجف من الغضب كل تفكيره قسيم جاس ايدها 

طلع مثل العاصفة وهو يحلف يمين لو قسيم مأذيها يگتله مثل ما طلع مثل رجع اشرلي ع حجرة 

غفار :: دواها براءة شوفي وينه من تخاف بعد ما تگدر تگف ع طولها 

ركضت بساع للكنتور طلعت جنطتها بيها علاكة علاجات شلتها كلها انطيتها الها و راح 

امي ما عولت تلكه الها سالفة تلطم عليها بساع تكبعت بعايتها و ربعت اباب الخوش 

فضيلة ::  ع بنية الأخ راح يكتل اخوه وين صرنا حتى الله راح يگلبها بينه يبووو وينك يـ حاكم ترد و تشوف أولادك كل واحد راكضلة ورا حديثة شتگول الوادم علينه 

:: يمه والله الوادم كلها گاعدة ببيوتها واذا عرفوا راح يعرفون منج ومن صوتج انتِ بس گومي طبي جوه ومحد راح يعرف

:: وين تردين اطبن و هل طركاعة الوكعت ع روسنه يمه اولاد حاكم ما شايفني حگهم وين شايفني هيج صفار و عيون مدري شلون لونهن تسودنوا 

هم رجعت ربطتهم ثنينهم بيها اااخ لو بس جده هنا جا هي عرفت شلون تخلي امي تخنس بحجرتها 

عنبر :: رجعت من المدرسة غادية ونيدة اجر بروحي جر و من الجوع احس معدتي گامت تاكل بروحها من الباب گطفت جنطتي ع حوشنه ومشيت لبيت عمي حاكم  گبل لا ادخل 

لجحت نفس البت اللي نشدت گبل ع عون واگفة گبال باب بيته ادگ بيها ومن شافت محد طلع الها 

صعدت ع نقشة وع حديد مدت راسها من فوگ الباب تصيح بنص الحوش 

:: دكتووووور.. عووووون ابن هاجر هجورة وينك 

عگدت جبيني ليش جاي تصيحله بـ اسم امه شنهي يوم القيامة وما ادري عكست اتجاهي و مشيت صوبها 

:: هاي ثاني نوبة اشوفنج تجين لهناه تنشدين ع عون تعرفينه انتِ 

دارت وجهة اللي بوزت شفايفها بضيج جاي تنزل من الباب جلبت عبايتها بالنقشة و انرعطت... اصفر وجهه تگلب بالعباية منين انشگت بأديها وبخوف گالت 

:: عباية جدة هاي شيخلصني منها اليوم يخلوني انامن بالصريفة بلا عشه 

اتعجبت كلامها عاينت ع عباية جردة حمرة من الرس و الطرف مسلت خيوط جي طويلة عليها وتسح بالگاع و قماشها قديم من هذا اليبرگ بالشمس 

:: هي خرگة شظال بيها حتى يحاسبونج وينمونج بلاية عشه علمودها 

مشت لساگية غرفت ماي تغسل وجهه و تنفض التراب الصار ع عباية همين و تسولف بقهر اللي رغم ما تعرفني چن غيمة ومن گد الحمل وفاضت مطر 

:: انتِ ما تعرفينها حرمة طاغية كلش امشية البيت كله ع مسطرة و كلمتها ما تصير اثنين حتى ع زلم حاجيتها ماشية 

:: موش صوجها صوج الشوارب الراضخة الها 

ابتسمت بوجع ودارت راسها صوب بيت عون اشوفن لمعة امل بعيونها من تنظر اله و ردت تنشدني ووتبلع بغصتها 

:: ما عندج ابرة وخيط اخيطنها هلبت الله وما تنتبه الها مشكوكة 

تذكرت ابوي جابلي عباية جديدة من راح لنجف هذيج النوبة اشرت الها توكف تنتظر بمجانها و ركضت لبيتنه وانا احجي وياها 

:: اوكفي هسه اجيبن الج عباية عندي ثنين 

ركضت للبيت فتحت الباب ونفضت الكنتور كله طلعت عباتي القديمة حطيتها بعلاكة سودة وطلعت بخطوات سريعة حتى الحگ عليها لا تمشي وصلت باب الحوش

تذكرت كلام ابوي دوم يگلي الله تعالى گال انفقوا مما تحبون و السيدة فاطمة الزهراء عليها السلام قدمت ثوب خطبتها وهو اعز شي ع گلبها 

زميت شفايفي اعاين للعباية وهي بالعلاگة و رفعت نظري للبت اخذت برتقالة من الشجرة تگشر بيها و صافنة ع بيت عون 

رجعت بساع طلعت العباية الجديدة حطيتها الها وأكو شعور غريب جوه گلبي احسن روحي فرحانة بهذا العطاء الأول الي 

وصلت يمها حطيت العلاگة بيدها رغم الخجل بعيونها اخذتها بتردد مجبورة حتى تخلص من بطش جدتها 

وگالت تداري خجلها 

:: تره اني اشتغل وعندي فلوس اضم عنهم نوبات و اجمع صح يطگوني من يلگون الفلوس ناقصة بس انا اتحمل من اجي مرة الح اجيبن الج حگها

:: لا هاي مني الج هدية الج واحلالج بس شنهي تشتغلين انتِ 

:: ابيعن بالسوك روبة و جبن و زبد همين 

:: هاا صدك شتردين من عون....عاينت منا ومنا تگربت الها همست يم اذنها بصوت خافت اشاورها.. بس لا عاشكته ولج

جانت مايلة بجذعها عليَّه تستمع بتركيز من گلت عاشگته انتفضت فازة تنفي بثنين اديها 

:: لااا استغفر الله شني عاشكته ولج 

:: جا شنهي سالفتج وياه ما تحجبن 

:: اريدنه عندي حجي وياه 

ما احسن اله رشگت ماي ع رجليه من زاحت ترفة الماي من حدر الباب تغسل بالحوش شوية وفتحت الباب ايد كاضة بيها الصوندة والآخرة الماسحة من شافتني عبست بوجهي 

ترفة :: هاا بعد ما كضيت الشغل جايتني يله امشي ردي منين ما اجيتي 

عنبر :: وياهو گالج جاية اعاونج توي رادة من المدرسة روحي گوه شايلتها 

رشتني بالماي تضحك وانا شلت ماي بجفوف اديه من الساگية و ارشن عليها 

عنبر :: كافي ولج تبربعت و هدومي راح تلطش عليَّه 

سدت الحنفية و طلعت يمنه بالباب عرفتها ع البت اللي نسيت نسيت اسمها رغم هذيج النوبة گالته الي 

عنبر :: صدك شنهي اسمج ذكريني تره صايرة انسى 

:: سدرة انا... 

صفنت شوية و ابتسمت بوجوهنه وگالت 

سدرة :: انا جوعانة  من امس ع عشه ظالة ماعندج شي اكله ومن اجي نوبة لخ اجيبن فلوس العباية و الأكل 

دكت صدرها ترفة شايلة حنية للغريب و للعرف 

ترفة :: يخسى الجوع وانتِ يمي هسه اسوي الج أطيب غده 

تحمحمت زامة شفايفي فضول عندي اريدن اعرف عنها أكثر من هي تبيع ليش ما تاكل و عبن ما أكدر اسكت كلت الها 

عنبر :: جا ليش ما اكلتي موش تبيعين جبن و روبة 

سدرة :: جدة حاسبة الروبة جم كيلوا و الجبن كله حاسبته اذا الفلوس ناقصة ربع تخلي عمي يطگني و يخليني انامن بالصريفة و ياه الدواب

عنبر :: صدك اذا تسمع مصيبة غيرك تهون عليك مصيبتك سمعتي ترفة هذول انذل من اهلج 

ترفة :: اي والله الحمد لله بس ع اقل انا عندي عمامي وعندي فطرس صدك انتِ ماعندي احد يفزعلج لا ام لا ابوه لا اخوه 

سدرة :: ابوي طلگ امي و تزوج و طلع للخارج و خوالي من انا صغيرة ذبوني ع عمامي و جدة گالت الي امج ميتة بس طلعت تجذب عليه عايشة 

ترفة : جا ما تروحين تعيشين يمها ولج 

فتحت حلگها رايدة تحجي تروي النه قصت حياتها و الأسباب من شافتنه صافنين عليها بانتباه و تركيز عيونها تنتقل بيني و بين ترفة وگالت 

سدرة :: انتن تردن تجرجن لساني و تشبعني سوالف شني 

ترفة :: لا شني اشبعج سوالف عندي عجين كباب زاد من عشه امس هسه اگلي بساع 

ركضت ترفة جدامنه تريد تدخل بيتهم وانا وراها بس البت بقت واكفة بمجانها رافضة تتحرك 

ترفة :: تعاي فوتي شمالج وكفتي بس لا تردين تاكلين بره 

سدرة :: اي اكعد هنا وانتن سون الي لفة وجيبنها و اريدن وياها جاي ما اگدر ابلع اللگمة بلا غموس 

عنبر :: ولج كومي فوتي فشلة الفلح يفوتون منا شيكولون ماعدهم بيت مخلين البت تاكل بره 

سدرة :: خلهم يحجون يشيلون من ذنوبي اصلاً فد اكيف من واحد يشيل غيبتي حتى اخذ حسناته 

عرفت البت تخاف تدخل بيت غريب و حذرة كلشي بكل خطوة تحطيها أشرت الها ترفة صوب بستان فطرس 

ترفة :: جا تعاي لبستان اخوي مسيج محد يشوفنه لو كعدنه 

صفگت بـ اديَّه بحماس من گالت ترفة بستان فطرس عبن مسيجه و غافلة ما يخلي احد يفوت اله وبعد ما وافقت سدرة ركضت ترفة جابت المفتاح 

جانت لوحة من خشب معلگة ع باب مكتوب عليها بالفحم الأرض المحرمة و جوه بخط أصغر ع كزار و حرمته رحاب و اسماء اخوانه هم عگدت جبيني من شفت اسم عمتي انعام من ضمن القائمة و اسم ابنها حيدر همين 

دخلنه للبستان انا و سدرة و ترفة راجت تسوي الغده... فتحت عيوني منبهرة بجماله موش بستان عادي لا.. محاوط الگاع بشجر البرتقال و بظلهن زراع ورد 

البستان كله ورد بكل انواعه و الوانه 

و بنص الگاع نبگة جبيرة و معلگ بيها مرجوحة من خشب ركضت سدرة صعدت بيها تتمرجح لحد ما اجت ترفة بيدها 

صينة الاكل و دولكة لبن كعدنه ناكل و سدرة نشدت 

سدرة :: ماعدجن صورة لدكتور

ترفة :: لا شنسوي بصورته نخليها عدنه 

سدرة :: ما يشبهني يعني ماكو شبيه بينه شوية 

عاينت الها بعدم فهم عاگد جبيني 

عنبر :: ليش حتى يشبهج يعني 

صفنت ترفة عليها ادقق بملامحها وگالت 

ترفة :: نفس لون عيونج سبحان الله يخلق من الشبه أربعين 

لاحت ابتسامة ع وجهه من كلام ترفة و رجعت تاكل بنهم و جوع وبين دقيقة والآخر تذب سؤال علينه 

سدرة :: شلونه هذا الدكتور سبع يكدر يعارك لو ترف جي دكتور 

ترفة :: هو صح ضد العنف بس وكت المكاون سبع هذاك اليوم ابوي راد يزوجني غصب حجاية منه خلى ابوي يتراجع كلمة سيف هنا جي جدي يعزه 

سدرة :: يعني اذا شغلة مالته و رادوا ياخذونها منه ما ينطيها مو

وكفت اللكمة ابلعومي آدك ع صدري ااشر لترفة الماي وهي صافنة عليه طگيتها ع فخذها ومديت روحي فوك الصينة خذت الماي شربت وصحت بسدرة 

عنبر :: ترا دهونتيني انتِ شنهي هاي اسئلتج هو جاي تلحين عليه 

سدرة :: هيج غاية بنفس يعگوب بس جاوبي ع سؤال ينطيها لو لا 

ترفة :: ال هاشم كلهم عدهم تملك هذا اخوي فطرس جان عنده ذيب رباه من هو صغير و مرت ابوي الا مرحومة سمته وهو ما قبل يدفنه حنطه وذاك وينه نهاية البستان حاطه

شهكت سدرة مصدومة وانا سامعة بهل سالفة بس ما صدكت وگتها كضيت ترفة من ثوبها اكوم بيها من الاكل 

عنبر :: گومي راويناه ولج وينه 

اخذتنه لنهاية البستان صدك ذيب محنط دنگت اشمه ماكو ريحة بيه ابد يعني يعرف يحنط صدك و سدرة بساع وگفت يمه رافعه اصابعها السبابة و الوسطى بعلامة نصر

سدرة :: كصيلي صورة وانا يمه عليج الله حبوبه 

عيونها تلمع وهي تطلب جن طفل وما كدرت اكسر بخاطرها طلعت نقالي اخذت الها صورة اجت يمي شافتها 

سدرة :: الله اخبل كلش حلوة أكبرها واحطنها بالديوانية 

عنبر :: شنهي شيخ عشيرة و يحطونج بالديوانية 

سدرة ;: جا شنهي الشيخ احسن مني وصدك وينه هذا جدكم الشيخ صدك حجايته مسموعة و زلمة حوك 

صفكت ايد بالآخرة منها 

عنبر :: النوبة ردت ع جدي ولج شنهي سالفتج ولج  

سدرة :: ماعندي شي بس اشوفن بس نسوان هنا جا الزلم وينها 

عنبر :: ولج يمدهورة شسوين بالزلم رديتي عليهم 

سدرة :: شسوي بيهم بس اريدن اعرف عدكم زلم كبار بالسلف لا 

ترفة :: عندج عركة وماعندج احد تردين تنخينهم يفزعولج 

بوزت شفايفها هزت راسها اي رافضة تصرح بأي شي يخصها بعد ردت الصينية الاكل اخذت كباب لفته بخبزة و ضمته بعلاگتها 

سدرة :: اخافن جدة تشوف عبايتها مشكوكة و تحرمني من العشة اخذت لفة احتياط و اذا اجه الدكتور كليله سدرة اجت عليك 

راحت تمشي وبين دقيقة والثانية توكف و تلتفت براسها صوب بيت عيون أطيل النظر ثواني واتابع مشيها خطواتها واهنة چن ما تريد تترك هل مجان 

:: ترررفة 

فزيت ع صوت عمار من اجه يركض صوبنه و يصرخ بـ اسم ترفة راسه مفشوخ يجري دم ع خده و رگبته ينهج بأنفاسه و قميصه مشگگ عليه كض ترفة من جتافها ويحجي وياها بين يتوسل بين الرعب واضح بنرة صوته 

عمار :: ما عليَّه بيج بعد والله بس گليله يفك ياخة عني من امس بليل ولسه هو ما فايت حالي 

نزلت عيوني للگاع ادور شي شلت حديدة مزنجرة و مشمورة حضرتها حتى بس يرفع ايده عليها اطگنه 

وهو من شاف سكوتها گال 

عمار :: حتى من السلف اذا تردين اطلع والله اخذ هدومي واهج بس خله يعوفني بحالي يركض وراي مثل المخبل وين ما يشوفني يطگني ما خلالي كرامة جدام الوادم 

ارتفعت زاوية حلگ ترفة بسخرية زاحت ايده عن جتفها تنفض و صبت ماي من الدولگة ع ايدها تغسلها جي جاست ايده

ترفة :: وانت ليش ما فتت حالي من جان هو بالسجن ليش  نسيت شكد توسلت بيكم حتى المدرسة حرمتوني منها وهسه جايني تتوسل تريد احجيلك وياه 

جرت نفس قوي  زفرته وهي مبتسمة بوجه مطمئن گلبها هل النوبة وگال 

ترفة :: الله شكد حلوة عدالة الله من يخلي أعمالك مثل دولاب تفتر و ترجع الك و الچنت تذلة تطيح يم رجله ذليل 

رص ع سنونه بغضب يصم قبضة ايده و يرجع يفتحها و رجع يحاول يقنعها 

عمار :: مالي غرض بيج بعد روحي للمدرسة وين ما تريد تروحين روحي والله ما ادخل بحياتج بعد 

كلما يتقدم خطوة صوبها هي تبتعد خطوتين كلما يمد ايده يريد يكض ايدها تخلي ايدها ورا ظهرها حتى لا بجيسها 

ترفة :: وشني تريد تصير صاحب فضل عليه هسه عود انا اذا راح اردن للمدرسة اردن بفضل فطرس لو ما هو انتم تبقون تنهشون بيه مثل ضباع جوعانة ملتمة ع الفريسة 

يتوسل بيها و يدور براسه ع جهة الباب يخاف لا يجي فطرس جان راسم البراءة و وجه و يحجي بمسكنة من شافها ما تعاطفت وياه 

عمار :: اگتلنج ترفة وعلي اذا ما خليتي يفوت حال اگتلنج و اطب السجن ارتاح بيه 

ما شفت الا طابوگة ثلثية اجت تور بظهر عمار صوت ارتطامها بعظم جتفه طلع صوت من گد ما قوي 

صرخ شايغة روحه يتمرغل بالتراب من الوجع و فطرس تقدم يمشي برهدنة 

فطرس :: يعني احاسبنك ع طگك الها و اذيتها تجي تهددها اول مرة اشوفن انسان حيوان مثلك 

عمار :: والله ما اتكرب الها والله فطرس انا أخيك 

فطرس :: ماعندي اخوه انا بس خوات 

گالها و دنگ عليه كضه من شعره و طگه ع كاع و دفرات ابطنه موته گتل الا ترفة جرته عنه 

ترفة :: كاااافي عوفه 

تخبل من گالت اله عوفه ندار عليه و شريان رگبته برز من گد ما صيح 

فطرس :: ليش كافي شنهي رف گلبي اله وعلي اذا تكولين نقهرت عليه هسه اطبگنج وياه اصبغ جلدج ازرگ 

ترفة :: لا والله وعلي ما نقهرت واذا فد يوم رف گلبي اله اگصنه بيدي من عرجة 

فطرس :: جا عليمن تردين اعوفنه ترا توي بديت و اريدن اتدرب عليه صارلي هواي ما محرك اديّه عظامي كله مجيمة 

صارت عيونها ع عمار شلون يتدحرج ع تراب بوجع و دم يسيل من خشمه و راسه بعد ما عاينت لفطرس ولا چنها سمعت صوته جتفها يهتز و راسها يميل عليه... انتبه الها فطرس تگرب منها بساع 

فطرس :: ترفة... شبيج خويه لا تخوفيني عليج 

عيونه التقت بعيونها وياه ما جاسها و ايده طخت ايدها تشنجت و رعشة صارت قوية انتفض كل جسمها بحركة لا ارادية

عنبر :: يا شمالج ترفة اذكري الله كولي بسم الله الرحمن الرحيم 

هزت راسها اي وكلما تريد تعاين لعمار يصير فطرس جدامها حاجب عنها منظره من دون كلام فهمها

فطرس :: هاي هي والله راح اعوفنه و اللي تريدي يجرالج بس لا تخوفيني عليج كلشي ولا يصيرلج شي 

كضت ايده تعصر اصابعه حيل وتاشر براسها صوب عمار اله 

ترفة :: بس طلعه منا حبوبي 

هز راسه اي بحركة سريعة.. واضح صارت بيها خوفة من شخص ينطگ جدامها و الدم ومن عمار خاصة 

فطرس :: عنبر فوتيها جوه ولا تعوفينها لوحدها غسلي الها وجهه هسه اجي 

اخذتها طببتها جوه كعدت لامة رجليها لصدرها صوت عمار يصرخ بوجع من دفعه فطرس يطلع صمت اذانها بـ اديها 

ترفة :: ما احبنه والله ولا مقهورة عليه بس لا يطكه جدامي لا يطكه ما اريدن اسمع هل الصوت يخوفني يفزز گلبي من جوه 

ركضت طبگت الباب و سديت حتى الشباج حتى يخف صوته وما يوصل مسامعها و اجيت كرفصت جدامها جريتها لصدري بساع ضميت راسها بين جتفي و رگبتي وايدي الاخرة تمسح ع ظهرها 

عنبر :: هاي هي  طلعه والله فطرس يسمع كلامج ما يسوي شي بيه اذية الج 

ترفة :: عباله حن گلبي عليه لا والله ما حن بس اخافن عنبر اخافن صوت عمار يخنگني مثل قبضة ايد گوية ملتفة ع رگبتي 

عنبر :: راح بعد ما يرجع و فطرس موجود محد يگدر يلمس شعره من راسج بعد 

بقيت امسح ع ظهرها و اهدي بيها أول مرة اشوفنها هيج منهارة من طبيها اجت علياء هي و ازل جايبة ملابسها بعد ما قررت تكعد يمها 

علياء ::شبيها بس لا عمار طكها 

عنبر :: لا هو فطرس طگاه هسه 

علياء :: موش اكولن ما يتجرا يتكرب الها و فطرس هناه 

من اختفى صوت عمار هدات شوية طلعت الها من جنطتي قمر الدين حطيته بيدها 

عنبر :: هاج جبتلج قمر الدين التحبينه و حسبت حساب رحمة وباي 

ترفة :: هي وينها المگرودة  غير قسيم خذها ما اعرف وين ومن الصبح لسه غفار يدور عليهم 

انا سمعت كلامها عفت كلشي و ركضت صوب بيت عمي حاكم گلبي يدك عبالك اختي الاخذها موش غريبة 

رحمة :: فزيت ع روحي غافية واني گاعدة و مرتجية ع حايط حلگي يابس و ريگي مر باوعت ع غرفة قديمة كلها غراض ميوزة حديد ناسج العنكوب عليهن انتبهت هدوء يعني 

طالع ماهو گمت ع كيف اباوع من فتحة القفل صغيرة كلشي ما اشوف حاولت افتح الباب ماگدرت رجعت ع شباك نفس الشي الجام مكسر  بس قافل الحديد و من الخارج داگ الواح خشب عليه ماكو اي فتحة أكدر اطلع منها گمزت ع صوت فتحت الباب دخل و سده ورا 

بيده علاكة شمرها عليَّه 

قسيم :: هاج حتى لا تكولين عافني جوعانة 

رحمة :: انت مو ما تريد غفار يتورط وياي سلمني لشرطة واني ما اجيب طاري اسمه والله 

ضحك بستهزاء طلع لفة من العلاكة و كعد ع ميز ياكل 

:: عبالج تخلصين اذا سلمتج وعلي الفحل يخلونج تترحمين ع  الساعات العشتيهن هنا  

:: شيردون يسون أكثر من هذا العذاب 

ضحك حيل يقهق مسح دموعه من الضحك فتح بطل المي شربة كله دفعه وحدة 

::  لا ازعل منج تره كل هذا الدلال واطلع معذبج 

::  دلال !!! هذا الرعب كله وكل شويه تعالي اعترفي و وقعي جريمة ع ما مرتكبتها هذا دلال بنظرك 

:: و داعتج هاي كلها مقبلات اذا اسلمنج للمركز يرسمولج بايسكل ع حايط و يگلولج اذا مشيت بيه انطلعج 

::  لعد خوش اذا هنا عذاب و ضغط و هناك تعذيب سلمني و ماعليك گتلك ما اجيب اله طاري لو يلفون حبل الإعدام ع ركبتي ما اذكر اسمه 

:: شو مستعجلة انتِ ع روحتج للمركز  خاف عبالج يكعدونج ع كرسي وينشدونج وحضرة جنابج تسفطين جذبج عليهم ويصدكونج 

صفنت بوجه اكل اخر لكمة حتى الكمع مال الصمونة اكله و كمل  

:: الله مو بالعقل يخلونج تشوفينه هناك يعلكونج من كراعج و يصلخون جلدج عن عظمج هاي اذا طحتيلج بواحد شريف واذا وكعتي بيد واحد  بايع ومخلص حتى اغت/صاب يغتص/بج يخليج حتى ع المامسويته تعترفين 

:: وانت شتفرق عنهم حاطلك ورقة وكاتب بيها كلشي و تعاي وقعي عليها 

::  موش انا كاتب هذة الإفادة سحبتها من قضيتج محضرينها الج حتى بس يكضونج يجبرونج توقعين وانتِ اظن فهمتي شلون يجبرونج وانا احترام اله اريدنج توقعين هنا گبل لا اسلمنج حتى گبل تصعدين للقاضي 

:: واني دا اكلك ماعليك بيه سلمني

شرب جايه و طلع يصوفر رجعت رجيت راسي ع حايط البرد يدگ بعظامي شلون المسمار من يندگ ع لوح الخشب 

لليل وبعد ذاك السكون فزيت ع صوت واحد يصرخ بصوت يرن وياه نبضات گلبي صوته مبين ذاك و وينه دا يعذبوه

حشرت روحي بزوية الغرفة وياه كل صوت منه انتفض گلبي يفز استمر صوته ساعات واسمعه يصيح سيدي والله مو اني ما سويت الها شي 

رجفت من فتح الباب و دخل ينفض بـ ايده بوجع و آثار دم ع ملابسه هم ضحك بوجهي 

:: اشوفنج من صوت خفتي موش الج ساعة تصيحين سلمني لشرطة اذا سلمتج يخلونج تصرخين مثله 

امتنعت من الجواب انسان يتغذى ع خوف غيره عمله عاكس ع شخصيته يشوف الكل مجرمين 

:: هاا بعدج ع قرارج تردين اسلمج 

:: انت ما عندك رحمة بگلبك ماعندك مخافة الله تجبر شخص يعترف ع شي ما مسوي ما تكول باجر افعالي ترجع اللي 

:: ياهو البريئ بس لا هذا الصارلة ساعة يصيح مثل الـ... 

قطع كلامه ما نطق الغلطة كدامي مشه للميز شغل الاب توب

:: شتگولين انتِ مجرم لو بريئ 

:: مو دا يحلف بالله ما مسوي شي اكيد بريئ 

عض باطن خده مبتسم بسخرية دار شاشة الاب عليَّه و قربه أكثر نقر زر التشغيل تصوير من كامرة بيت لشاب طفر من بيت يركض 

:: هذا هو نفسه عابر ع بيت ناس و معتدى ع بتهم وكاتلة وجان شارد لغير محافظة هم وهسه يحلف موش هو مثلج من گتلتي البت و تحلفين 

غلق الجهاز و طلع خلاني بدوامة أفكاري... مرة يعرض عليَّه تقرير الطب العدلي.... مرة يروي اليه قصة شخص مجرم ينكر افعاله.... مرة يفتح الباب ويخليني اشوف شلون يعذبون ذاك الشاب 

كلامه و أفعال خلفن شرخ داخلي و دخل منه الشك يمكن صدك الخطأ مني يمكن اني السبب... اي اني السبب 

هزيت راسي وحدي مثل المجنونة احجي وياه نفسي بصوت عالي.... اي اني... من وراي ماتت طيبة كله مني لازم اتحاسب حتى ينغسل مني هذا الذنب 

من اجه مرة ثانية قبل لا يحجي هل مرة اني سبقته بالكلام 

:: وينها الورقة 

:: شسوين بيها شني صحى ضميرج و قررتي تعترفين 

هزيت راسي اي باوعلي بنظرة شك طلع الورقة من الفايل و سحب قلم احذته منه وقعت ع الإفادة 

يتبع....... 

              الفصل السابع عشر من هنا 

لقراءة باقي الفصول من هنا