الفصل الاول1
بقلم دانيا
خالاتي الأربعه بأمي خمسه وخالي واحد "محمد" كلهن اتزوجن وبيت حبوبه فضى بعد زوجت بناتها الخمسه كانت دائماً تفتقد لجوء العائله الزمان بس كان عندك حبوبه شرط كل ما تجي تزوج بنت من بناتها شرط للعريس واهله بإنو " ثاني بنوته ينجبوها يدفعوها ليها تربيها تعويضاً عن بنتها " وكل واحد كان بوافق على الشرط بكل سرور.
انا من وعيت على الدنيا لقيت بيت حبوبه فيهو تلاته بنات وكلهم دون سن العاشره ... وبعد اصبح عمري خمسه سنه نقلوني من بيتنا لبيت حبوبه كنت مبسوطه شديد لأنو حبوبه بشوشه وبتحبنا شديد ،، اختي الأكبر مني كانت بتقول لأمي عاوزة امشي اقعد معاهم بس امي ما كانت بترضى بتقول ليها ممكن تقعدي معاهم عطلة الجمعه وتجي يوم السبت واخوي الأصغر مني سيد كان متعود يلعب معاي عمره تلاته سنه اختي الأكبر مني اسمها سناء وانا سهير وامي اسمها عزه.
وبكدا حبوبه اتعوضت اربعه بنات بي انا " سهير ، و ضحى ، و مكارم ، و تقى " وخالتي الخامسه دي لسه ماانجبت لسه عروس جديد .... حبوبه كانت ماهره في الخياطه والتطريز رغم كبر سنها .
جيت مع امي واختي الكبيره حبوبه كانت بتخيط جيت مسكتها من كتافها من ورا وقلت ليها حبوبه .... فرحت ومسكت يدي قالت لي كنت منتظراكي من زمان بنات خالاتي جوا سلمو علينا وناس امي قعدو حبه ومشوا مرت الأيام نحن بنهتم بحبوبه والبيت وبالغنم حقتها كنا كل صباح اتين يمشو يودو الغنم السقايه ويجيبوهم المساء .
مرت السنين ومكارم بقى عمرها 13 وضحى 12 وتقى12 وانا سهير عمري عشره سنه ... كنت دائماً بشوف معاملة خالي محمد الصعبه لبنات خالاتي وبكدا عرفت خالي دا متشدد وصعب قدر شنو بقيت اعمل ليهو الف حساب ،، رغم إنو هو اكبر من امي بس مااتزوج قاعد بس مع امو مرا يسافر اسبوع او اتنين وبجي راجع الكل في القريه بعرفه بطبعو الصعب وبعملو ليهو الف حساب .
كنت قاعده مع حبوبه وهي وبتخيط في جلابه قلت ليها دي لمنو ياحبوبه ؟ قالت لي الجلابيه دي يابتي لزوج مكارم .... استغربت شديد قلت ليها ياحبوبه مكارم ح تتزوج ؟ ضحكت وبإبتسامه بشوشه ختت يدها على خدي وقالت لي كلكم ح تتزوجو ،، خالي محمد جاء قال احم احم طوالي قمت براحه مشيت المطبخ قلت لمكارم قال ليكي جيبي الشاي لخالو محمد ،، اتأفأفت وشالت الصونيه ومشت وضحى وتقى كانو بغسلو في العده .
قلت ليهم انتوا عارفين الجلابيه دي لمنو العند حبوبه دي ؟ ضحى قالت لي لمنو ؟ قلت ليهم بهمس لزوج مكارم .... هي من خفتها ردت بصوت عالي مكارم شنو انا العاوزة اعرس ،، فجأة صوت عالي سمعنا خالي محمد " قال ضحى "