المقدمه والفصل الاول
شاب فى الثلاثين من العمر وسيم انيق لبق رياضى .... نصاب
يجيد التنكر ويستخدم العديد من بطاقات الهوية وجوازات السفر باسماء مستعارة ورغم ذلك تعددت البلاغات ضده وصدرت بعض الاحكام حتى اضطر للهرب الى ليبيا لانها لا تحتاج لتاشيرة او لاموال كثيرة وهناك يخوض مغامرات عديدة فى عالم المغتربين فى طرابلس او البرانية حتى ينتهى به الحال لارتكاب مذبحة ويعاود الهروب الى مصر بعد ثلاث سنوات ولكن هل يفلت من العقاب ام ان عدالة السماء ستطبق عليه بعد ان نجح فى الافلات من عدالة الارض
الفصل الأول
فى فترة من الفترات كترت البلاغات قوى وصدرت بعض أحكام فى قضايا نصب بعضها لصالح ستات ليهم علاقات قوية قدروا يحركوا الأمور ويخلوا الشرطه تكثف البحث وتعمم نشرة باوصافى ولقيت صورى فى كل الجرايد وكمان التليفزيون .... ايوه انا نصاب النساء !!!
وقتها انا كنت فى حدود تلاتين سنه طويل أنيق لبق رياضى وسيم ... نصاب لكن مؤخرا قدرت أضيف صفه جديده وهى مطارد وشكلى بقى معروف وبقى ضرورى جدا اهرب لان وجودى فى مصر معناه انى واقع واقع ان ما كانش النهارده يبقى بكره .
انا ما نسيتش اقول أسمى لكن أسمى مش حيفيد بحاجه وعموما انا متعود اعمل كل مصلحه باسم وعندى اكتر من بطاقه وجواز سفر بأسماء مختلفه وأشكال مختلفه اصلى غاوى تنكر ومعظم البطاقات دى طالعه رسمى بورق سليم والمهم انى فى الوقت ده كان معايا جواز سفر باسم سعد عبد الله الشيمى كان لسه بشوكه ما اتزفرش وباظبط بيه مصلحه وكنت مواعد ضحيتى الجديده فى كافيه ومستنى وصولها لقيت التليفزيون بينشر صورتى ومكافأة ماليه وفورا قمت دخلت الحمام ولزقت شنب على وشى ( اصلى باشيل حاجات رفايع كده احتياطي للطوارئ ) وخلعت قبل ما حد يلمحنى ووقتها قررت الهرب لكن لما وصلت عند شقتى علشان اخد الغله واهرب لقيت البوليس محاوط الشقه وعامل اكتر من كمين واضطريت اهرب من غير فلوسى وبجواز السفر اللى باسم ... سعد عبد الله الشيمى .
طيب اهرب اروح على فين ؟ مستحيل اهرب داخل مصر وما فيش فرصه اطلع تأشيره لأى دوله فى العالم وكمان فلوسى كلها فى الشقه اللى البوليس حواليها فى كل مكان يبقى مافيش غير مكان واحد بس للهروب مش مكلف وفى نفس الوقت مش محتاج تأشيره ( طبعا فى الفتره دى ) مافيش غير ليبيا .
طلعت على محطة مصر ورحت مكتب سفريات قبل محرم بك بشويه ولقيت أتوبيس طالع بعد ساعتين حيتحرك الساعه اتناشر بعد نص الليل وفيه أماكن كمان وقالولي ان السفر حياخد يوم ونص لكن لقيت ان شكلى حيبقى مريب جدا من غير شنطة سفر !!!
فورا رحت عند السنترال واشتريت شنطه مستعمله وشوية هدوم مستعمله ومش مهم اصلا ان كانت الهدوم مقاسى او لا المهم ان المسافر يكون معاه فى الجوازات شنطه وهدوم او يشكوا انه هربان لكن كل ده طبعا سحب كتير من الفلوس البسيطه اللى معايا ولسه كمان محتاج اجيب اكل للطريق وشوية مصاريف فى الاستراحات ولازم طبعا اجيب خط ليبى اول ما اوصل مش مهم المهم نوصل .
وركبت الاتوبيس واتحرك فى ميعاده باتنين سواقين يريحوا بعض وفى برانى لقيت واحد من السواقين بيقول
السائق :: دلوقت النبطشيه دى رخمه وممكن يقعدونا فى امن الدوله سبع تمن ساعات وفى السلوم قدهم وممكن يتلككوا لاى حد على اى حاجه ما يسافرش واحنا ممكن ننجز ونشترى نفسنا ومش حناخد فى امن الدوله اكتر من نص ساعه ومش حنطول فى السلوم لو كل واحد دفع خمسين جنيه
راكب :: يعنى ممكن واحد جواز سفره يكون سليم وما يسافرش ؟
السائق : ممكن وبتحصل ويقولوا اشتباه عادى وممكن يسافر فى الاتوبيس اللى بعده او يرجعوه مطروح او اسكندريه ويسافر من هناك هو وحظه ده غير ما حيركن الاتوبيس جنبه خمس او ست ساعات انما لو انجزنا تبقى هى نص ساعه فى امن الدوله يختموا من غير ما يبصوا فى الجوازات اصلا وفى السلوم حيعدونا من غير حتى ما يفتحوا الشنط قولوا ايه رايكم علشان خلاص قربنا
طبعا انا اول واحد وافقت وكل الركاب وافقوا ما عدا واحد بس قال وحلف ان مافيش معاه فلوس وانه مستلف اجرة السفر والسواق قال
السائق :: مش اشكال واحد نشيله ونتوكل على بركة الله
وطبعا دى كانت سبوبه بيعملوها السواقين ياخدوا من كل راكب خمسين جنيه يبقى الفين وشويه ويظبطوا هنا وهنا بالف جنيه او اقل والباقى يقسموه الاتنين سواقين مع بعض ماشى بس نعدى يا مسهل .
عدينا من بوابة امن الدوله بسهوله الحمد لله ودى كانت اكتر حاجه خايف منها وعدينا كمان من السلوم وخرجنا من البوابه رايحين على مساعد فى ليبيا خلاص كده بلوا الاحكام واشربوا ميتها مش راجع غير لما تسقط وكده كده الاحكام مش باسم سعد وحتسقط حتسقط اما فلوسى ماحدش اصلا يعرف مكان الخزنه وماحدش بيدخل الشقه غيرى انا واختى الوحيده اللى مسافره المانيا من سنين طويله وبتنزل مصر اجازات ومش كل سنه يعنى فلوسى فى امان وانا كمان بقيت فى امان وارجع بقى بعد تلات او اربع سنين تكون الاحكام سقطت والناس نسيت ..... نصاب النساء 🤣🤣🤣🤣🤣
المهم انى فى الاخر وصلت طرابلس وهناك راحت السكرة وجاءت الفكرة 🫣
يا نهار اسود دى غير مصر خالص مافيش وجه شبه نهائى هنا صعب انصب على النسوان هنا لازم اشوف شغل بس اشتغل ايه ؟ 🤔
انا ما اعرفش اعمل حاجه غير انى امسك ودان الواحده من دول اتوهها واعيشها فى بحور الاوهام واغسل دماغها لحد ما تدينى حبابى عينيها بمزاجها طيب هنا حاعمل ايه ؟ انا مش شايف نسوان مافيش نسوان خالص 🥺
الله ؟ ايه اللى انا شايفه ده ؟ مزه ؟ اه والنعمه دى مزه لقيت نسواااااان .
كان حتة فرسه جباره طويله وجسم زى المانيكان ولابسه عبايه سوده مفتوحه من الجنب ورافعه طرف العبايه بايدها مبينه سمانة رجلها وكانت سايبه شعرها الطويل ولابسه شبشب بكعب عالى وماشيه تطرقع بيه وهى بتضحك مع ده ومع ده على اليمين وعلى الشمال وشايله فى ايدها شنطه فيها اكل وحاجات اشترتها من السوق
فورا قربت منها وقعدت اعدل فى الجاكيت والكرافت واتلفت حواليا زى اللى بيبص ومش واخد باله وهوووووب !!!!! حصل الصدام .
حركه بلدى قديمه قوى لكن لسه شغاله وبتجيب نتيجه مع اى ست فى العالم
سعد : اوووه سورى اسف اسف جدا يا مدام ما اخدتش بالى
شهد : مصرى انت ؟ انى بنعشق اللهجه المصريه بزاف بنحب نشوف الافلام المصريه رشدى اباظه احمد مظهر احمد عز احمد السقا
سعد :: ياااه فكرتينى باعز اصحابى
شهد :: كل هادول اصدقاءك ؟
سعد :: لالا انا قصدى على السقا احمد السقا هو اللى صاحبى كنا بنلعب فروسيه مع بعض فى النادى
شهد :: انت تلعب فروسيه ؟
قالتها بانبهار وانا ابتسمت الخطه ماشيه تمام
سعد :: يا مدام انا والدى الله يرحمه لما اتوفى سابلى من ضمن الميراث الكبير اللى سابه مجموعة خيول اصيله انما كلها سلالات نادره
شهد :: على هكى انت ولد ناس
سعد :: اه لكن ده كان فى مصر انما هنا .....
شهد :: وشين جابك ليبيا ؟ سياحه ؟
سعد :: لا بدايه جديده اسمعى مافيش هنا قهوه او كافيتريا اشرب فيها فنجان قهوه ؟ انا لسه اول يوم فى طرابلس ومش عارف اى حاجه هنا ودماغى خلاص حتضرب
شهد :: تعالى عندنا فى النجمه
سعد :: نجمه ؟ نجمة ايه دى قهوه ؟
شهد :: هدا فندق النجمه عند ميدان الجره والكافيه فى الارضى تعالى معاى توا انى شريت غدا وبنمشى توا
اول ما دخلنا كافيتريا فندق النجمه لقيت تلات اربع بنات انما ايه غزلان ويحلوا من على حبل المشنقه وقعدت انا والبنت اللى معايا على ترابيزه وقلتلها وانا مستغرب
سعد : غريبه ما كنتش اتصور ان الليبيات وصلوا لكده
شهد : هادول مش ليبيات هادول برانيات
سعد : يعنى ايه برانيات ؟
شهد : كيفك انت يا اخونا انت مصرى برانى وانى تونسيه برانيه
سعد :: انتى تونسيه ؟
شهد : اها وكمان هادى دعاء مغربيه واللى بعدها الهام مغربيه والاخرى اللى قاعده غادى تشيش جزايريه كلنا برانيه
محمد :: تشرب ايه يا اخونا ؟
سعد : انت مصرى ؟
محمد : من الفيوم
سعد : اهلا اهلا بيك هاتلى قهوه زياده بن تقيل وشوف الانسه تشرب ايه
مشى محمد من غير ما يسالها وجاب القهوه ومعاها كانز بيبسى !!!!
سعد : على فكره احنا لحد دلوقت ما اتعرفناش انا سعد من اسكندريه من مصر
شهد :: وانى شهد من سوسه تونس
سعد :: شهد اسم على مسمى وانتى بتشتغلى ايه واللا جايه مع جوزك
شهد :: لالا انى مش متجوزه انى بنخدم فل الكافيه والفندق
سعد :: بتخدمى فيهم ايه ؟
شهد :: كيف باقى البناويت خيرك ما تشبحش
يتبع
الفصل الثاني من هنا
لقراءة باقي الفصول من هنا