ورجعت الشقه باغلى من الغيظ
يعنى ايييييه ؟ يعنى ايه اقعد اخطط واراقب واجمع معلومات عن ساره وابو ساره وام ساره وجيران ساره واللى جابوا ساره واحط خطط واحتمالات واشترى ارض وعربيه ولبس واربى دقن والبس عدسات وفى الاخر تطلع فاتن تبوظ كل ده بمجرد ما ابتديت اقابل ساره واجيبها سكه ؟ ليه يا شيخه حرام عليكى ضيعتى تعبى ومجهودى اربع شهور وصور وفوتوشوب وجرافيك وبرامج انزلها علشان ايه كل ده ؟ انا عملت فيكى ايه ؟ انا حيا الله قتلتك تعملى فيا كل ده ؟ حسبى الله ونعم الوكيل فى النسوان المفتريه انتى قادره .
فاتن : داغر وين انت ؟ تعال هيا
الصوت جاى من اوضة النوم ده ده صوت فاتن وقفت على الباب وبصيت لقيتها هى ازاى ؟
سعد : انتى ... انتى مين ؟
فاتن : خيرك يا كلب نسيتنى ؟ نسيت فاتن ؟ علاش ؟ اخدت غرضك منى ؟ خلاص ما عادش تبينى ؟ هكى انتوا يا صنف الرجاله
سعد : انتى ... انتى ميته انا قتلتك بايدى
فاتن : وانى شين قلتلك قبل ما تقتلنى ؟ انى قلتلك انى ما نسيب حقى حتى بعد ما نموت
سعد : انتى عاوزه منى ايه دلوقت ؟
فاتن : انى نبى توا اللى كنت تبيه منى انى نبى نتمتع وياك
سعد : ازاى ؟ انتى عفريته انتى شبح خيال
فاتن : طريقه واحده ممكن بيها تحضننى ونتمتع مع بعضنا
سعد : ايه هى الطريقه دى ؟
فاتن : ما تعرفها ؟ بعدين نقول لك عليها
سعد : قوليلى ايه هى الطريقه دى
ضحكت واختفت وانا قعدت اتلفت حواليا مرعوب ومش عارف حتطلع من ورايا واللا مش حتطلع تانى لحد ما سمعت الصوت الحنين الدافى اللى كله حزن
شهد : كيفك حبيبى اتوحشتك ؟
سعد : ش ش ش شهد ؟
شهد : اها شهد حبيبتك شهد ما زال تذكرنى ؟
سعد : عمرى ما نسيتك . شهد انا ... انا باحبك
شهد : قلتلى هكى يوم ما قتلتنى . قلتلى انك تحبنى لكن تحب روحك اكثر
سعد : انتى ايه اللى جابك ؟
شهد : ما تبيش تشوفنى ؟ خيرك نسيت اللى قلته لك ؟ مش قلتلك انى نحبك اكثر من روحى ؟ انى جياتك نبى نشوفك ونبيك تاخدنى فى حضنك
سعد : ازاى ؟ انتى ميته
شهد : طريقه واحده ممكن بيها تاخدنى فى حضنك وتحس بيا ونحس بيك
سعد : ايه هى الطريقه دى ؟
شهد : بعدين نقول لك شين هى الطريقه حبيبى بعدين . توا بنرجع سلام حبيبى
سعد : شهد قوليلى ايه هى الطريقه دى يا شهد
لكن اختفت
......................
قعدت اسبوعين كل ما اروح مكان الاقى فاتن والكلب ولو اختفت الاقى شهد وبرضه تختفى لحد ما بطلت انزل خالص اخر مره نزلت فيها كنت جعان قوى رحت مطعم على شارع خالد ابن الوليد وطول الطريق شايف فاتن ابص على اليمين الاقى فاتن هى والكلب وتنادى عليا
فاتن : داغر وين ماشى ؟ تعال جاى
امشى الناحيه التانيه الاقى فاتن ابص على الشمال الاقى فاتن ابص قدام الاقى فاتن ابص ورايا الاقى فاتن عشره فاتن فى الشارع وكل واحده منهم ماشيه ومعاها الكلب وتنادى عليا
فاتن : خيرك ما تردش يا كلب تعال جاى
فكرت ارجع لكن كنت جعان قوى وصلت المطعم وطلبت اكل ومستنى
شهد : علاش تبى تعزمنى اليوم حبيبى
لقيت شهد قاعده جنبى سبت المطعم وجريت ورجعت على شقتى قفلت الباب والشبابيك وبقيت خايف افتح التلاجه يطلعوا منها خفت حتى افتح الحنفيه ينزلوا منها بقيت عايش فى رعب ادخل الحمام
فاتن : خيرك تدخل عليا هكى وانى عريانه يا كلب
اطلع وادخل المطبخ
شهد : تبينى ندير لك قهوه حبيبى ؟
سعد : انتوا عاوزين منى ايه انا مش سعد مش سعد مش سعد
...........................
بقالى تلات ايام قاعد فى الشقه ما بانزلش خالص وخلصت كل الجبن والمعلبات والعيش اللى عندى ومن امبارح وانا جعان وخايف انزل الشارع وحتى لما اتجرات وخرجت من شقتى وطلبت الاسانسير ووصل عندى لقيت فاتن هى والكلب
فاتن : هيا اركب خيرك ما تركبش ؟
قفلت باب الاسانسير عليها وجريت على السلم لقيت شهد قاعده على البسطه
شهد : خيرك حبيبى كل هدا بنراجى فيك ( استناك ) ؟
خلاص مش حانزل مش حاروح اى حته لكن حتى فى الشقه مش سايبيننى
فاتن : داغر وينك يا كلب ؟ تعال جاى
الصوت جاى من اوضة النوم هى احتلت اوضة النوم ؟
وقفت على الباب لقيتها ممدده على السرير وبتضحك
فاتن : خيرك ما تبيش فاتن ؟ نسيتنى ؟
سعد : انتى عاوزه منى ايه ؟
فاتن : نبيك تحضننى ونتمتع مع بعض واللا ما تبيش ؟
سعد : قلتى ان فيه طريقه واحده ممكن احضنك بيها
فاتن : اى نعم هى طريقه واحده ما تعرفها ؟ بعدين نقول لك عليها
سعد : انا مش سعد مافيش سعد اصلا ولا فيه داغر دى شخصيه من خيالى انا .. مش .. سعد
سبتها ورجعت على الصاله
شهد : خيرك حبيبى علاش تفوتنى وانى نحبك اكثر من روحى ؟
سعد : لان انا مش سعد والله العظيم انا مش سعد
شهد : سعد او غير سعد انت حبيبى شين هى اهمية الاسم ؟
سعد : انتى عاوزه منى ايه ؟
شهد : نبيك تاخدنى فى حضنك وتحس بحبى
سعد : قلتى ان فيه طريقه واحده احضنك بيها
شهد : اى نعم هى طريقه واحده بعدين نقول لك عليها
سعد : انا مش سعد انا مش سعد انا مش سعد مافيش سعد خالص سعد انتهى ومش فاضل منه اى ذكرى
لأ فاضل حاجه واحده بس جواز سفر سعد اللى فى شنطتى
..........................
فاتن : انت خيرك ما تبيناش بكل ؟
سعد : عاوزكم وباحبكم بس قولولى ايه هى الطريقه
فاتن : الاول لابد انك تختار انى او شهد . فاتن اللى تحبها او شهد اللى تحبك . المتعه او الحب .
سعد : زى ما فيه طريقه واحده المسكم بيها اكيد فيه طريقه اخلص منكم بيها
شهد : هكى حبيبى ؟ تبى تخلص منا ؟ علاش تبى تفوتنى وانى نحبك ؟
سعد : لان انا مش سعد اللى فاضل من سعد جواز السفر بس وانا حاحرقه ويبقى مافيش اى حاجه من سعد
فاتن : هاهاهاهاهاهاهاها هيا احرقه واخلص خلصت روحك
جريت جبت الشنطه وفتحتها علشان اطلع جواز سفر سعد لكن ايه ده ؟ ايه اللى جاب ده هنا ؟
#رواية_داغر
سعد : ايه اللى جاب ده هنا ؟
فاتن : شينى هادا ؟ ما تعرف شين جابه لدبشك ؟
مسكته بايدى وانا مرعوب صاحبه كمان يطلعلى تبقى كملت
سعد : ده ده ده ده ده ... ده كيس البودره العينه بتاع جمال لكن انا ما اخدتوش انا سبته مكانه وسط الدقيق وجبت سكر بودره وعملت عبيط
شهد : باهى كيف جاه لدبشك ؟
سعد : ما اعرفش هو ده الطريقه اللى قصدكم عليها ؟
فاتن : اختار فى الاول لابد انك تختار
شهد : اختار مين فينا وصدقنى حبيبى لو تختار فاتن ونلقاك سعيد باكون سعيده تدرى علاش ؟ على خاطر انى حبيتك اكثر من روحى
فاتن : هيا اختار مين تبى فاتن او شهد ؟ المتعه او الحب ؟
سعد : انتوا الاتنين
فاتن : ديما طماع تبى كل شى وما تبى تفوت اى شى الحب المتعه الفلوس .... المزاج
سعد : الا المزاج ده انا ماليش فى المزاج ده خالص عمرى ما جربته
شهد : لو جربته تلقى الحب وتلقى احضانى
فاتن : لو جربته تلقى المتعه وتلقى احضانى
سعد : والفلوس ؟
فاتن : هاهاهاهاها هدا كان فى حزام جمال اللى كان يدس فيه الفلوس
شهد : عرفت توا كيف جه لدبشك ؟ عرفت توا شين هى الطريقه اللى تقدر تحضننا بيها ؟
سعد : عرفت
فاتن : غير هيا خيرك واقف احنا منتظرين
لقيت الاتنين على السرير وبيشاوروا ويضحكوا فتحت كيس البودره واخدت منه شمه وبعدين حطيت مناخيرى جوه الكيس وسحبت لكن كان قوى جدا حسيت ان قلبى حيفط منى ويجرى عليهم ولقيتهم الاتنين بيبتسموا ويفتحوا احضانهم ويشاوروا جريت عليهم ونطيت على السرير لكن ما لقيتهمش وسمعت ضحكتهم ورايا باتلفت رجليا اتكعبلت فى البطانيه واتكفيت من على السرير ورجليا متشعلقه فى الهوا ووقعت على رقبتى اتكسرت وشفتهم واقفين قدامى وانا رجليا فوق السرير وراسى فى الارض بين رجليهم وشايف روحى بتطلع من جسمى وتقف فى النص ما بينهم اختار مين ؟؟؟؟؟ فاتن واللا شهد ؟؟؟؟؟ المتعه واللا الحب ؟؟؟؟؟ واللا الاتنين ؟؟؟؟؟؟؟؟؟؟؟؟؟؟
انا دلوقت ميت والحكايه خلصت مين اللى قال العفاريت ما بتحكيش حواديت ؟ انا حكيت حكايتى بعد موتى ودلوقت اقدر اقول لكم اسمى مختار عبد الله صلاح الشهير بنصاب النساء بعدين ابقى احكيلكم حكايتى من طفولتى لكن دلوقت لازم اختار تمت بحمد الله