رواية حين هربت العروسة
الفصل السادس6
بقلم وفاء الدرع
رنّ جرس الباب…
محمود:"مين يا حبيبتي اللي على الباب؟ أسامة ولا إيه؟"
نور:"لأ يا حبيبي… دي نرمين."
فتحت نور الباب، ودخلت نرمين وهي بتقول:"إزيك يا محمود؟ عامل إيه؟"
بصلها محمود من فوق لتحت من غير ما يتكلم، وسابها ودخل أوضته.
نور بابتسامة:"اتفضلي يا حبيبتي، تعالي."
قعدوا على الأنتريه، فقالت نرمين بحزن:"حاسه إن محمود مش حابب قعدتي معاكم يا نور."
نور:"لا يا حبيبتي أبدًا، إحنا لسه جايين من القاهرة وتعبانين من الطريق.يلا أوريكي أوضتك، هتعجبك أوي."
دخلت نرمين الأوضة، وعينيها بتلف في كل ركن…الستارة، السرير، الدولاب…
وسرحت في أفكارها:"الملك ده كله كان المفروض يبقى ليا أنا…لازم أرجّعه تاني.ما ينفعش أعيش هنا وأنا حاسة إني غريبة.لازم أعمل أي حاجة ترجع محمود ليا." 😔
نور لاحظت سرحانها وقالت:"بكلمك يا بنتي، مالك سرحانة في إيه؟"
نرمين بسرعة:"لا يا حبيبتي، مفيش… بس زعل بابا وماما مني مضايقني."
نور بحنية:"إن شاء الله هيرضوا عنك، دي مسألة وقت بس."
كانت نور طيبة جدًا…ما تعرفش الحقد ولا الغل، وقلبها أبيض، بتحب الخير لكل الناس.
أما نرمين، فكانت الغيرة والطمع بياكلوا قلبها، ونفسها تكسر أختها اللي بتحبها بصدق.
دخلت نور أوضتها عند محمود.
محمود بضيق:"إيه اللي جاب دي هنا يا نور؟أنا مش عايزها في بيتي، فاهمة ولا لأ؟"
نور بهدوء:"آسفة يا محمود، ما أقدرش أطرد أختي.مالهاش حد غيري، وبابا رافض يستقبلها دلوقتي.عشان خاطري استحملها شوية."
محمود:"أنا ما أقدرش أزعلك يا نور، بس خلي بالك منها…دي مش زيك، وممكن تخرب بيتك من غير ما تحسي."
نور:"هي مكسورة يا محمود، واللي حصل فيها كفاية."
محمود:"يا ريت يكون اللي حصل ده درس ليها.يلا عشان ننام."
نور ضحكت:"ننام إيه؟ إنت لسه ما أكلتش، تعالى ناكل الأول."
محمود:"لا يا نور، نفسي مقفولة."
نور قربت منه وقالت بحب:"أنا عارفة إنك متضايق من قعدتها هنا، بس عشان خاطري استحملها شوية يا حبيبي."
محمود ابتسم وقال:"البيت بيتك، واللي انتي عايزاه اعمليه.كفاية كلام عن أختك، تعالي نختار اسم للبيبي." ❤️
نور ابتسمت بخجل:"أول طفل من حقك إنت تسميه، والمرة الجاية دوري أنا."
ضحك محمود وأخدها في حضنه:"حبي ليكي بيزيد يوم عن يوم.لو بنت هسميها (ليلى) على اسم ماما،ولو ولد هيبقى (عبد الله) على اسم بابا.إيه رأيك يا نور عيني؟"
نور:"أسماء جميلة طبعًا."
وبعدها ناموا من تعب الطريق…لكن نور كان جواها خوف، ومش قادرة تطرد فكرة إن أختها ممكن تسبب لهم مشاكل.
🌤️ تاني يوم الصبح
صحيت نور بدري، دخلت الحمام، وصلت ركعتين، وبعدها بدأت تحضر الفطار.
لانشون، جبنة، بيض بالبسترمة…كل الأكل اللي محمود بيحبه كان على السفرة.
محمود خرج من الأوضة بابتسامة:"صباح الخير يا نور عيني."
نور:"صباح الفل والياسمين يا حبيب قلبي."
قعدوا يفطروا ويشربوا الشاي، وبعد ما خلص، باسها على خدها وقال:"عايزة حاجة أجبها وأنا راجع؟"
نور:"لا يا حبيبي، كل حاجة موجودة.ترجعلي بألف سلامة."
محمود:"السلام عليكم."
نور:"وعليكم السلام ورحمة الله وبركاته."
قال بعدها بابتسامة:"لا إله إلا الله."
نور ضحكت وقالت:"محمد رسول الله." ❤️
خرج محمود وركب عربيته وراح الشركة.
🏢 في الشركة
دخل مكتبه وقال للسكرتير:"هاتلي أسامة فورًا."
بعد دقائق، دخل أسامة:"إزيك يا محمود؟ حمد لله على السلامة."
محمود:"الله يسلمك.فين أوراق الصفقة؟"
أسامة:"كل حاجة جاهزة وتحت السيطرة يا فندم."
محمود:"تمام، نادِ الموظفين على اجتماع بعد ساعة."
وبعد تعب ومجهود كبير، نجحوا في المشروع، وقدروا يرجعوا للشركة مجدها من جديد.
🌙 بالليل
رجع محمود البيت بعد يوم طويل، ورن جرس الباب.
فتحتله نرمين، وكانت متزينة ومبتسمة.
وقالت بصوت ناعم:"إنت عارف إني بحبك…انسى اللي حصل، ونبدأ من جديد.أنا حاسة إنك لسه بتحبني."
اتجمد محمود مكانه من الصدمة! 😳
وصرخ بسرعة:"نور! يا نور عيني!"
نرمين قربت منه وقالت:"نور نايمة…بس إنت بتبعدني عنك بالعافية، وأنا حاسة إنك لسه بتحبني."
محمود دخل بسرعة ناحية أوضة نور وهو بينادي عليها:"نور! يا نور!"
صحيت نور وابتسمت:"جيت يا حبيب قلبي؟"
قبل ما يرد، دخلت نرمين بسرعة وقالت:"نور! أنا عايزاكي ضروري."
نور قامت وقالت لمحمود:"عن إذنك يا حبيبي."
خرجت مع أختها وسألتها:"فيه إيه يا نرمين؟"
نرمين:"أنا عايزة أشتغل…أنا مهندسة مساحة ومش عايزة أفضل قاعدة كده."
لكن جواها كانت بتقول:"لازم كل العز ده يبقى ليا أنا وبس…حتى لو على حساب أختي." 😈💔