أحيانًا لا نعرف كيف نجونا، رُبما بدعوة مخلصة من قلب يحبنا، ورُبما بمشيئة الرب!"
تسمرت محلها حين لمحت بجانب عينيها وقوفه القريب لحد ما، وصمتت تمامًا عن الحديث غير قادره على التفوه بحرف واحد ورد الفعل الصحيح تجهله، فماذا ستفعل وأين ستخفي الهاتف وهو يقف مجاورًا لها وعينيهِ بالتأكيد لا تفارقها، ثواني مرت عليها كالساعات حتى أتت مشيئة الرب حين دلفت "نورهان" لغرفته فجأة ليلتفت لها فتسرع "فيروز" التصرف وهي تسقط الهاتف في اناء زرع قريب منها ووقفت تعدل خصلات شعرها وكأنها لا تنتبه لهم...
_ ايه يا حبيبتي محتاجه حاجه؟
نظرت له بتردد واضح جعله يحثها على الحديث فقالت بحذر:
_ كنت عاوزه اسألك سؤال لو هيعصبك بلاش ترد.
ابتسم لها ابتسامة صغيرة وقال مشجعًا:
_ اسألي..
فركت كفيها بقلق بالغ وسألته:
_ مبتفكرش تحل مشاكلك ما مازن؟
استند على سور الشرفة بإحدى زراعيهِ وقال ببسمة ساخرة:
_ لأ، مبفكرش.
قطبت ما بين حاجبيها بحزن وضيق في آنٍ:
_ ليه؟ عمر العداوة ما تستمر بين الاخوات يا شاهين.
_ بتستمر عادي.. طول ما هم اتفننوا في أذية بعض.. تحبي اعدلك كام مرة مازن أذاني؟ أو محتاجه اعرفك هو أذاني لدرجة ايه؟
احنت رأسها أرضًا وصمتها كان مفسرًا فلوى فمه باستهزاء والتف ينظر خارج الشرفة يتعمق في السماء السوداء الكاحلة والتي بات قلبه يشبهها في عتمتها.
زفرة خانقة صدرت منها وبعدها ربتت على كتفه بمواساة وقالت:
_ أنا أسفة.. مكانش قصدي افكرك.
_ مبنساش عشان تفكريني.
قالها بنبرة ظهر فيها القسوة والألم، فسحبت كفها وانسحبت هي نفسها بعدما القت نظرة على "فيروز" الواقفة بشرفتها تعطيها ظهرها..
بعد ثواني من الانغماس في قسوة الماضي وذكرياته الأليمة نفض رأسه عن كل ما يدور بها، والتف للواقفة على الجهة الأخرى ليجدها تضع كفها على أذنها كما كانت فتجعدت ملامحه قليلاً محاولاً فهم ما تفعله، ولِمَ تضع كفها هكذا!
_ فيروز؟
وعنها فلقد استمرت على نفس الوضع كي لا تثير شكوكه، لأنها تعلم أنه إن نظر لها سيسألها عن وضعها الغريب وحينها ستخترع له حجة تبدد أي شكوك لديهِ..
نظرت له وكأنها تفاجأت الآن بوجوده، رفرفت بأهدابها قبل أن تجيبه:
_ نعم!
_ انتِ حاطة ايدك على ودنك ليه؟
دلكت أذنها بكفها وجعدت ملامحها في ألم مصطنع قبل أن تقول:
_ وجعاني بقالها شوية وحساها بتوش.
سألها بحيرة:
_ دي أول مرة ولا ساعات بتتعبك؟
أنزلت كفها وابتسمت بهدوء وهي تجيبه:
_ لا متقلقش هي ساعات كده بتتعبني اصل مانا وانا صغيرة وانا عندي مشكلة في طبلة ودني اليمين حتى تلاقيني مبسمعش بيها كويس.
وقد كانت حقيقة فعلية، فهي لديها مشكلة في أذنها اليمنى أثر حادث تصادم حدث لها حين قررت العمل في بيع الفل لأول مرة.. كانت تائهة وتشعر بالتوتر والتخبط في آنٍ فلم تكن قد اعتادت بعد المرور بين السيارات واشارات المرور المغلقة والمفتوحة! وكعادة أي فتاة فكانت سرعة السيارات تربكها وتخيفها، وفي أول يوم لها في العمل حين فُتحت إشارة المرور دون انتباه منها وبدأت السيارات تتحرك أصابها الارتباك وهي ترى السيارات تمر من حولها دون توقف وأصوات الزمور القوي عزز ارتباكها، فتحركت بعشوائية جعلت إحدى السيارات تصطدم بها، لم يكن الصدام قوي، ولم يحدث بها ضرارًا واضحًا، لكن بعد عدة أيام عانت من ألم في أذنها التي سقطت عليها على الأرضية الصلبة، لتكتشف أنها قد أصيبت بثقب صغير في طبلة الأذن.. يسبب لها ألم من حين لآخر، ومع علو الأصوات تحديدًا يفقدها صوابها وهذا كان له السبب الأكبر في عدم تحملها لصراخ الرجل الذي كان في القبو...
_ مقلقتش.
قالها ببرود، فرفعت حاجبيها باستنكار لرده وقالت ساخرةً:
_ حتى قولي انك قلقت ولو بالكدب! وانا اللي كنت بسأل نفسي ليه المسافة دي كلها بينك وبين مراتك.. دلوقتي فهمت.
استند على سور شرفته الجانبي ليصبح قبالتها وهو يسألها بتهكم:
_ايه بقى اللي فهمتيه يا فيلسوفة؟
ربعت ذراعيها أمام صدرها وهي تجيبه بتهكم مماثل:
_ مش محتاجة فلسفة ولا حاجة.. يعني بصراحة أنا شايفة إنك شخص ملكش تعامل مع البشر، فأكيد مراتك كمان مش عارفة تتعامل معاك وده سبب الخلاف اللي مش فهماه بينكوا، رغم أنها متتخيرش عنك يعني المفروض تليقوا مع بعض جداً.
ارتفع جانب فمه ساخرًا:
_ وانتِ بقى اللي بتعرفي تتعاملي مع البشر، عشان كده مش عارفه تاخدي قرار في حياتك وأي حد يقولك كلمتين تقفي في صفه.
قطبت ما بين حاجبيها غاضبًة بعدما فكة عقدة ذراعيها وسألته بتحفز:
_ يعني ايه؟
اعتدل في وقفته هو الآخر وقال:
_ يعني أول ما مازن اقنعك انه هيحللك مشكلة القضية وهتبقى شقة امك ملك ليكي وقفتي في صفه ونفذتي اللي هو عاوزه، وبذكائك عشان تكسبي قضية كان ممكن تكسبيها بطرق كتير تانية وقعتي نفسك في مصيبة مش هتعرفي تخلصي منها.. ده طبعا لو الحكاية حكاية قضية.. وشقة.. ميكونش ماسك عليكي حاجه كده ولا كده.
_ المصيبة دي اللي هي انتَ مش كده؟
مسد وجهه بكفه وحرك رأسه يائسًا منها فلقد تركت كل ما تحدث فيه وعلقت على أتفه ما بهِ..
_ مش بقولك ذكية!
اقتربت من السور المشترك بين الشرفتين حتى أصبحت ملاصقة له وبات يفصلها عنه عدة سنتيمترات قليلة، نظرت له بغضب حقيقي وهي ترغب في سبّه لكنها تحكمت في لسانها بالكاد وهي تقول:
_ انتَ مش بس مصيبة، ده انتَ مصيبة سودا ووقعت على دماغي.. لو كنت اعرف اني هتقابل مع شخص زيك عمري ما كنت وافقت وتغور الشقة، بس للاسف دلوقتي مازن عنده فعلا اللي يهددني بيه عشان اكمل..
وتركته دالفة لغرفتها وقد اغلقت باب الشرفة بالقفل الالكتروني...
حسنًا لقد اعترفت.. هناك شيء ما لم تقوله وهو ما يهددها مازن بهِ، إذًا الأمر بات واضحًا، الحقيقة ليس لها أي علاقة بشقة وقضية الوضع أخطر بكثير، ولكن ما الشيء الذي يضغط بهِ مازن عليها؟ هل الأمر يتعلق بالشرف أم شيء آخر؟؟!!!
والغريب أنه حين خطر بباله أن الأمر قد يتعلق بعلاقة ما جمعتها بمازن أو بغيره شعر بنفسه يضيق، وكأن صدره يرفض ما توصل إليه عقله، والاغرب أن هناك صوت في قاع عقله يخبره أنها لا تفعلها، لا تتورط بهذا النوع من المصائب القذرة، وهناك في قمة عقله صوت يخبره ولِمَ لا؟ ألم تفعلها غيرها؟ وغيرها لم تتوقع منها أن تكون على هذا القدر من الحقارة.. هل ستثق مرة أخرى؟ ألم تأخذ عهدًا على نفسك ألا تضع رأيًا في أي امرأة أيًا كانت.. مجرد رأي! وأن تتوقع منهم دائمًا أن يدهشوك بالخيانة والغدر والحقارة التي يتلاعبن بها!
زفرة قوية أخرجت الكثير والكثير من خبايا صدره، تبعها بدلوفه لغرفته ليخلد لنوم جديد يهرب فيهِ من الماضي الأليم والحاضر المؤذي..
حين سمعت اغلاق باب شرفته فتحت بابها برفق وحذر وخرجت تأخذ الهاتف من اناء الزرع ودلفت مسرعة للداخل تتنهد براحة.. وما ان فتحت شاشة الهاتف لتطلب رقم والدتها حتى تفاجأت أن مكالمة مازن قيد الاستمرار!
_ الو؟
_ أمان؟
جلست فوق الفراش وهي تجيبه:
_ ايوه تمام انا في اوضتي، انا فكرت الخط فصل.
_ لأ.
كان صوته غريبًا لم تفهم سبب وجومه وحدته، ولم تدع نفسها حائرة كثيرًا وهي تسأله بتردد:
_ مال صوتك؟ في حاجة حصلت؟
بالطبع لن يخبرها انه استمع لحديث "نورهان" و "شاهين" الذي حرك بهِ شيئًا ما يمقته، وأثار الضيق في نفسه حتى أنه فكر أن يغلق المكالمة لكن الفضول دفعه للاستمرار ومعرفة ما سينتهي اليه الأمر.. وكالعادة "شاهين" ينال اعتذرًا مُحملاً بالأسف، و "مازن" ينال اتهامًا مُحملاً باللوم، متى سيقف أحدهم في صفه دون أن ينصر" شاهين" عليهِ؟ متى سيجد من يفهم ألمه هو الآخر ومبرراته كما يفعلون معه؟
_ زعلت من كلام شاهين؟ ولا إن نورهان مقالتش في حقك كلامك تدافع عنك؟
تجمدت ملامحه تفاجئًا بحديثها، هل فهمت ما أزعجه دون أن يبوح؟
_ الاتنين.
تنهدت قبل أن تقول بنبرة لينة:
_ أمي دايمًا كانت تقولي مفيش حد بيعترف بغلطه، عشان كده ملكش حق تزعل من كلام شاهين.. هو طبيعي مش شايف نفسه غلطان حتى لو هو فعلاً غلطان، ونورهان حتى لو عاوزه تدافع عنك مش هتعمل كده لأنها شافته ازاي مضايق، فهتأجل انها تقول كلمة تضايقه أكتر حتى لو كانت كلمة الحق.
ولأول مرة يقرر الإفصاح عن بعض ما يعتمر صدره فسألها:
_ ولو نورهان فعلا شايفة شاهين مظلوم ومعندهاش كلمة أصلا تقولها في حقي تدافعي بيها عني.
_ يبقى ده لسببين.. إما شاهين عارف يقنعها كويس بغلبه ومسكنته وانه مستحيل يأذيك وده أنا شوفته بعيني وشوفت ازاي ألف حكاية عني أنا وهو واقنعها بيها.. إما انتَ فعلاً مش مظلوم بس زي أي انسان مبيعترفش بغلطه.
_ وتتوقعي انهي الصح فيهم؟
صمتت قليلاً، وأخذت نفسًا تبدد بهِ حيرتها:
_ انا شوفت بعيني ازاي قدر يقنعها بحكاية مزيفة في دقايق.. حكاية لو أنا مش طرف فيها كنت صدقتها وكرهتك.. وفي نفس الوقت قلبي بيقولي انك مش السبب في الخلاف بينكوا، وبعدين امتى المجرم بيكون بريء وصادق!
لقد اعطته الشعور الذي يفتقده، أن يثق بهِ أحد دون أن يحتاج لكثير من الدلائل والمبررات المقنعة، أن يؤكد أحد على أنه الطرف المظلوم وليس الظالم، الطرف الصادق والبريء.
وبالتأكيد هذا ما جعله يخرج عن صمته ويبوح بالكثير من الأسرار التي لم يتحدث بها مع أحد من قبل:
_ شاهين كان اخويا الكبير وابويا وصاحبي، كان مثلي الأعلى وقدوتي، كل حاجة كنت عاوز اكون شبهه فيها، طريقة لبسه وتسريحة شعره، نوع البرفان اللي بيستخدمه، الوانه المفضلة واللي بيلبسها معظم الوقت، طريقة كلامه ومشيته.. لو قولتك اني كنت مهووس بيه لدرجة اني طول الوقت براقبه عشان اكون نسخة منه هتقولي عني ببالغ، بس دي كانت الحقيقة..
صوت صمت ساد لثواني جعلها تجلس مستريحة على الفراش وهي تدرك أن المكالمة ستطول، وصوته الشاجن المحمل بلوم وعتاب خفيان ربما يلقيهما على أكتاف شقيقه، وربما يقصد بهما الزمن الذي بدل الأحوال وفرق العزيزين جعل ملامحها توصم بالحزن دون أن تدرك.
وعنه فقد ترك الهاتف فوق الفراش واسترخى جاعلاً ذراعيهِ أسفل رأسه وكأنه يتحدث مع نفسه ويري مشاهد الماضي تتجسد أمامه على سقف الغرفة!
_ دايمًا الأخوات بيحبوا يكونوا مختلفين عن بعض، حتى التوأم اللي شبه بعض في الشكل بيكونوا حابين يكونوا مختلفين في الطريقة والكلام ومجال الدراسة والهوايات كنوع من التميز، لكن أنا كنت العكس خالص.. شاهين بيحب اللون البني والأسود يبقى أنا كمان احبهم، شاهين بيكره الأصفر.. أنا كمان أكرهه، شاهين بيلعب بوكس يبقى انا كمان العب زيه، كل حاجه كنت ماشي وراه فيها، ومكنتش شايف ده عيب على قد ما كان حب مني له، كان بابا دايمًا يقولي انتَ تابع لشاهين.. انت بتحاول تكون نسخة منه لكن هتكون نسخة ماسخه ومهما حاولت تكون شبهه هتفشل، كان دايما يقولي انتَ ملكش شخصية وبتعمل كل حاجه شاهين بيعملها مبتعملش حاجه من نفسك ابدًا، كل الكلام ده على قد ما كان بيوجعني على قد ماكنت مبهتمش افهمه او حتى افكر فيه، وفضلت ورا شاهين في كل حاجه..
صمت آخر، وتنهيدة طويلة..
_ ماما كانت مهتمة بيه اكتر مني ومدياله مكانة وحب اكتر مني بكتير، كنت فاهم إن المكانة دي لأنه الكبير، لكن ليه بتحبه وبتخاف عليه اكتر؟
_ مجربتش تسألها؟
انتفض بخفة على صوتها كأنه نسى وجودها، ولكن سريعًا ما استكان وهو يجيب وكأن ذكرياته أبت أن تتركه:
_ سألتها... مرة، قالتلي عشان شاهين اتيتم بدري وابوه مات وهو لسه صغير فبحاول اكون له الأب والأم واعوضه.
_ واقتنعت بإجابتها؟
ابتسم ساخرًا وهو يجيبها وقد بدأت الدموع توخز مقلتيهِ دون شعور:
_ مش بس اقتنعت ده انا كمان بدأت أمارس دور الأب واهتم بيه زيها واخاف عليه اكتر منها، ماما من غير ما تقصد زودت هوسي بوجود شاهين، فبقيت شايف ان أي حاجه في الدنيا تغور بس شاهين ميزعلش، اي حاجه تغور بس شاهين ميتأذيش، وهكذا بقى..
ظهر التأثر واضحًا في صوتها، والحزن زين نبرتها وهي تسأله:
_ وبعدين؟ ايه اللي بعدكوا عن بعض كده؟
_ عارفه لما يكون في شخص كل ده بالنسبالك وفجأة ينزل من نظرك؟ احساسك ايه لو في شيخ معين بتحبيه أوي ووخداه قدوة، وفجأة شوفتيه بيشرب خمرة مثلاً..
_هحس بالقرف ناحيته.
قاطعته قبل أن يكمل، ليبتسم برضا وهو يؤكد كلامها:
_ بالضبط ده اللي حسيته ناحية شاهين لما اكتشفت متجارته في السلاح، اتصدمت وحسيت بالقرف ناحيته و ناحية نفسي انا كمان، خصوصا اني وقتها كنت في كلية الشرطة فكان إحساسي إن حاميها حراميها.. وعلى فكره شاهين هو اللي ساعدني ادخل الكلية لما عرف انها حلمي من سنين بس كنت عاوز اضيعه عشان اكون بيزنس مان زيه.
_ هو اللي ساعدك! مكانش خايف تكتشف شغله وتنقلب ضده؟
_ معرفش، يمكن مكانش متخيل اني اكتشف شغله أصلاً.
_ طب ليه محاولتش تتكلم معاه وترجعه عن الطريق ده، انا حاسه انه بيحبك بجد واكيد وقتها كان هيسمع منك.
جاء صوته مختنقًا:
_ عشان اللي حصل يوم ما اتواجهنا كان أصعب من انه يتلم..
وسرح في ذكريات الماضي الأليم يتذكر تلك الليلة التي تحولت لكابوس يطارده في يقظته ومنامه.
قبل خمس سنوات..
_ وطي صوتك امك هتسمعنا!
نظر له بأعين تتقد غضبًا:
_ يعني هو ده كل اللي هامك؟ امك هتسمعنا! رد عليا وجاوبني انتَ ازاي مشيت في الطريق الو** ده!
توترت نظراته وهو يشيح بها بعيدًا وقال:
_ انا معملتش حاجه غلط، انا كل اللي بعمله اني بدخل السلاح البلد.. يروح فين او يروح لمين مش شغلي، وبعدين مش كل اللي بيشتروا سلاح بيستخدموه في الأذية في بدو كتير بياخدوا أسلحة عشان يدافعوا عن أهلهم في المناطق الصعبة اللي عايشين فيها.
جذبه من كتفه بقوة ليلتف له ويصبح في مواجهته وصرخ به:
_ انتَ بتبرر!! هي البجاحة واصله معاك للدرجادي؟ أنا تخيلتك هتتكسف مني، هتعترف بغلطك وندمك، لكن انتَ حتى مش شايف نفسك غلطان!
نظر له بقوة يناطحه:
_ لا مش غلطان، عارف ليه؟ لأن كل انسان فينا عنده عقل يفكر بيه عشان كده هو مسؤل عن افعاله، أنا بدخل السلاح اه، لكن مبقولش لفلان يروح يقتل بيه فلان عشان خناقة تافهه! السلاح زي ما له أضرار له فوائد كتير ولا انتوا مبتستخدموش السلاح في شغلكوا يا حضرة الضابط المستقبلي عشان تحمي بلدك ونفسك!
ارتد "مازن" للخلف مصدومًا من منطقه، وقال بدهشة تعبر عن صدمته:
_ مش شغلك! دخول السلاح البلد هو شغلة الحكومة وبس، ثم إنك لم توفر مسدس لشخص ده مش تحريض منك له انه يخلص بيه كل مشاكله، كام واحد بيشتري سلاح عشان ياخد تاره ولا حتى يقتل حد ويسرقه وغيره وغيره!
نظر له" شاهين" هازئًا:
_ تحريض مني! ماهو يا حضرة الضابط انا لو اتخانقت معاك دلوقتي وطلعت في دماغي اقتلك مش لازم يكون معايا مسدس أنا ممكن بكل سهولة اجري على المطبخ اجيب سكينة ادبها في قلبك، يا ترى بقى هتمنعوا السكاكين من البيوت؟ مهو تحريض على القتل بقى!
صمت ولم يستطع مجابهته في الرد، بالطبع ليس لصواب حديثه، ولكن ربما لتفاجئه بردوده، او صدمته فيه التي لم تزول بعد..
_ من أول ما اكتشفت انك ماشي في الطريق ده وانا كنت عارف انك خلاص روحت بلا رجعة، واني يوم ما هقف في وشك مش هاخد فيك حق ولا باطل، عشان كده خليت ليلى تبعد عنك.. محبتش اشيل ذنبها هي كمان وتتغش فيك.. عرفتها حقيقتك وهي اختارت تبعد عشان بتفهم.
وقد كانت القشة التي قسمت ظهر البعير، هو السبب في بعد حبيبته عنه، هو السبب في اختفائها الغريب والمفاجئ دون ان يستطيع الوصول لأي معلومة عنها وكأنها قصدت هذا، هُزمت ملامحه وهو ينظر له بعتاب جم:
_ مانا عرفت، اصلي نسيت اقولك اني وصلت لليلى وحكتلي اللي حصل، وقالتلي إنك بعدتها عني وفرقت بينا رغم إنك أكتر واحد عارف اني مدبوح من الموضوع ده بالذات بعد اللي عملته شدوى، انتَ اكتر واحد كان شاهد على اللي عشته وقتها وكان عارف ان حبي لليلى كان آخر أمل لقلبي انه يعيش.. يمكن مكنتش بحب شدوى للدرجة اللي تكسرني فيها، بس هي كسرتني بطريقة تانية.. كسرة رجولتي وحنت راسي قدام الكل، ٣ سنين مكنتش عارف ادخل حد حياتي لحد ما ظهرت ليلى وحبيتها، حسيتها الدواء اللي ربنا باعتهولي عشان يطيب خاطري من كسرة مكانش ليا يد فيها ولا ذنب...
قاطعه مازن بصياح غاضب:
_ فوق يا شاهين.. فووووق، انتَ محبتش شدوى ولا حبيت ليلى.. كل واحده فيهم كانت محطة في حياتك لكن مش حب.. انتَ عجبك المحاولات اللي ليلى كانت بتعملها عشان تقرب منك وتكون جنبك، عجبك دورها في انها تصلح كل اللي اتكسر فيك، ليلى حبتك.. وانتَ حبيت حبها ليك، لكن محبتهاش.. بطل توهم نفسك بقى، ليلى محدش حبها... غيري.
جحظت عينا "شاهين" بصدمة زلزلت كيانه وضربته في الصميم وهو يردد ذاهلاً:
_ انتَ بتقول ايه؟ ليلى! انتَ كنت بتحبها؟؟؟ ازاي!؟
ابتسامة مريرة زينت ثغر "مازن" وهو يقول:
_ متفاجئ عشان عمري ما بينت، ولا كنت هبين، وكنت هسيبك تتجوزها ومكانتش هتكون في نظري غير مرات اخويا، لكن لما لقيتك بتخدعها وحسيت انها ممكن في يوم تتكسر بسببك، اخترت لها البعد عن الكل.. عني وعنك.. بعدها أهون من إني اشوفها بتتوجع قدامي واقف عاجز.
استند "شاهين" على مكتبه بهم وضعف واضحين، كل ما سمعه الآن كان صدمة مزلزلة له، لم يتوقعها حتى في اتعس احلامه.
_ مش وقت تفكير، اللي حصل حصل، خلينا في دلوقتي.. قولي انك هتسيب الشغل.
نظر له بغضب لون خضرواتيهِ:
_ اسيبه! لو كنت عاوزني اسيبه كنت واجهتني قبل ما تعرفها حقيقتي وتبعدها عني.. اسيبه بعد ما نفذت عقابك فيا قبل حتى ما تواجهني!! ده انتَ حتى ياخي مكنتش هتواجهني لولا إني وصلت لليلى وهي اللي عرفتني.. كنت هتفضل مستغفلني وعمال تضرب فيا من تحت لتحت من غير ما تفكر تواجهني..
_ خوفت عليها.
ابتسم هازئًا بعدما وجده يتخطى جزئية عدم مواجهته:
_ حد قالك اني كنت هعذبها ولا كنت هشغلها معايا!
_كنت هتخدعها، وفجأة تكتشف ان جوزها او خطيبها تاجر سلاح.
_ كان هيبقى وقتها ليها حرية الاختيار يا تكمل معايا يا تسبني، محدش طلب منك تكون فاعل خير، زي ما محدش طلب منك تكون مُضحي.. انتَ شوفت ان ليلى فضلت كام شهر تحاول تقرب مني وانا كنت قافل ورافض أي محاولة منها، ليه ملفتش نظري عشان انسحب من الصورة؟ انا وانتَ قريبين كفاية اوي انك كنت تصارحني خصوصا وانت عارف انها مكانتش في بالي لسه.. بس انتَ اخترت تعيش دور الضحية.
ضحك بألم والتمعت الدموع في عينيهِ وهو يقول:
_ عشان كنت مفضلك عليا، كالعاده... كنت بسبلك فرصة تحبها عشان تنسى وجع شدوى اللي انا عشته معاك، ضحيت بحبي عشانك زي ما بضحي بكل حاجه عشانك، وانتَ دلوقتي رافض تضحي بشغلك الشمال عشاني وعشان العيلة كلها.
تحرك بعيدًا عنده وهو يقول بصرامة يعرفها:
_ متفتحش معايا الموضوع ده تاني.. عشان منخسرش بعض، كفاية الحاجز اللي اتكون بينا بسبب عملتك.
وكنوع من انواع التهديد ليس إلا، كحل أخير.. أخرج "مازن" مسدسه وسدده لرأسه وهو يقول:
_ يبقى قدامك حل من اتنين.. يا تسيب شغلك و توعدني دلوقتي يا هتخسرني.
التف "شاهين" ليرى المنظر الذي قلب الدنيا فوق رأسه، لم يستطع أن يشهق الهواء الذي زفره، أو يرمش بعينه التي جحظت كأنها ستخرج من مكانها، فقط وجد نفسه يردد بلا توقف وهو يمد ذراعه له:
_ لأ لأ... بطل جنان، انتَ بتعمل ايه نزل الزفت ده.. نزله بقولك..
صرخ بالأخيرة لكنه لم يتحرك وهو ينظر له بقوة، ويخبره:
_ عاوزني انزله اوعدني انك تبعد عن الشغل ده.
كلاهما يعرف أن وعد "شاهين" لا يُخنث، وعده لا يخلفه ابدًا تحت أي ظرف ومهما كان الوضع، لذا هو واثق أنه إن وعده سيصدق..
_ بطل جنان!
ابتسم وكأنه مجذوب:
_ طب ده حتى الفرق بينا، اني مجنون ومتهور، وانتَ العاقل الرزين.
مال برأسه بعيدًا وهو يسّب "مازن" من بين أسنانه هو يدرك ما يحاول فعله لكن في نفس الوقت يخشى تهوره وجنانه الذي يعرفه خير المعرفة، يخشى أن يؤذي نفسه..
وعلى غرة انقض عليهِ لتبدأ مناوشة خطيرة بينهما، الأول يريد أن يأخذ السلاح، والثاني يريد أن يظل محتفظ به حتى يحقق غايته..
وبين هذا وذاك... ضغط "مازن" على الزناد دون قصد، في نفس الوقت الذي فُتح فيه باب الغرفة لتخرج رصاصة غادرة في اتجاه الضيف المفاجئ...
الفصل الثاني
الفصل الثاني من الجزء الثاني
فراشة في سكّ العقرب (حب أعمى)
"الحقيقة أن الأفعال البسيطة هي ما تُغذي مشاعرنا السيئة التي تتسرب لداخلنا لتحدث الكره والحقد، وتبني ألوفًا من الحواجز.. تقطع علاقات وتفرق أحبة، ومع تكرار المواقف يصبح الصديق عدو، والحبيب غريب مكروه، حتى وإن كانت تلك الأفعال غير مقصودة"
والزائر لم يكن سوى والد مازن" ممدوح" الذي سمع صوتهما العالي من الخارج فقرر الدخول لفهم ما يحدث، فاخترقته رصاصة طائشة أسقطته أرضًا..
صراخ وربكة وصدمة وضجيج في الوسط حتى وصل الجميع للمستشفى القريبة لحد ما..
وهناك وقفت" نادية" تصرخ بولديها من بين بكائها:
_ أنا عاوزه افهم ايه اللي حصل؟ ايه المسدس ده وازاي الرصاصة جت في ممدوح؟
اعتدل "شاهين" في وقفته بعدما كان مستندًا على الحائط خلفه وقال محاولاً اخفاء الحقيقة:
_ كان مازن بينضف سلاحه و...
اتسعت عيناها وهي توجه نظرها لمازن الذي ينظر لباب الغرفة التي اختفى فيها والده ونظراته تائهة، يخشى فقده ويخشى أن يكون بتهوره قد تسبب في موته فيحمل ذنبًا سيكويه طوال حياته..
_ جبت المسدس ده منين يا مازن؟ وجايبه ليه اصلا بتعمل بيه ايه؟
نظر لها معاتبًا:
_ معتقدش ده وقته.. احنا حتى لسه مطمناش على بابا.
وبعد انتهاء جملته خرج الطبيب ليندفعوا ناحيته بلهفة قلقة فيخبرهم انه بخير وان الرصاصة ولحسن الحظ كانت بعيدة عن القلب بعدة سنتيمترات، وأنها مسألة وقت وسيتم نقله من غرفة العناية لغرفة عادية بعد التأكد من مؤشراته الحيوية..
وبقى الوضع على أشده بين الجميع، نورهان التي التصقت بشاهين تبكي خشية فقد والدها وهول المنظر الذي رأته ووالدها غارق في دمائه، وشاهين الذي يحتضن شقيقته يدعمها ويهدأ من روعها وفي الوقت ذاته يلقي نظرة على والدته التي اتخذت الصمت والابتعاد عنهم عقابًا على الكارثة التي حدثت.. عقاب مؤقت! وأما عن الذي أصبح يقف مقابلاً له الآن لم ينفك عن رميه بنطرات اتهامية واضحة أثارت غيظه وأشعلت نيران غضبه ولا يتمنى الآن سوى أن ينفرد بهِ ليفهم معنى نظراته.
وجاء الانفراد بعد ساعات حين خرج ممدوح من غرفة العناية لغرفة أخرى وسُمح لوالدته وشقيقته بالبقاء بجواره، وحينها قرر "مازن" الانسحاب والعوده إلى المنزل ليبدل ثيابه التي تلطخت ببعض الدماء، وكذلك يجلب ثياب نظيفه لوالدته التي لم يختلف حالها عنه، وحينها استغل شاهين الفرصة وهو يبرر خروجه لحسابات المستشفى ليدفعها..
وأمام المستشفى وقبل أن يفتح "مازن" باب سيارته.
_ استنى يا مازن.
توقف بضجر واضح وهو يلتفت له بنظره يراها شاهين للمرة الأولى، نظرة لا يكمن فيها سوى الكره والشر، اقترب منه متجاهلاً نظرته وسأله بتحفز:
_ بتبصلي كده ليه؟ ونظراتك ليا فوق مش عجباني، كأنك بتتهمني بأني السبب في اللي حصل.
رفع جانب فمه ساخراً وهو يعقب:
_ بتهمك! لا طبعا حاشا لله، وانتَ ذنبك ايه يعني في اللي حصل.
قطب "شاهين" ما بين حاجبيهِ وهو يقول مؤكداً على حديثه رغم علمه بأنه مجرد سخريه:
_ أنا فعلا مليش ذنب في اللي حصل، لا انا اللي جبت المسدس اللي ما اعرفش انتَ جبته منين ولا بيعمل ايه معاك، ولا انا اللي طلعته من جيبي، ولا انا اللي هددت بيه.. ولا حتى انا اللي ضغطت على الزناد، قولي بقى انتَ المسدس ده كان بيعمل معاك ايه؟ انتَ لسه مجرد طالب في الكليه يعني لسه ما استلمتش سلاحك، جبته منين وكان غرضك ايه لما جبته؟ يا ترى كنت ناوي تخلص عليا بيه؟ ولا جايبه مخصوص عشان تهددني وتخليني اعمل اللي في دماغك؟
_ ما يخصكش.
رددها "مازن" بقسوة ونبرة يسمعها منه "شاهين" لأول مره، وكأن اليوم هو يوم تعامل شاهين مع نسخه جديده وغريبه من مازن! تنهد قبل أن يقول متجنبًا الشِجار الذي على وشك الحدوث:
_ عمومًا لما ابوك يفوق هقوله إن الغلط غلطي، وهقوله كمان أن المسدس بتاعي جايبه عشان أؤمن نفسي بيه، هو عارف كويس إن احنا في المجال بتاعنا واقعين مع ناس مش سهلين وهيصدقني ما تقلقش هبعدك انتَ عن الحوار ده.
ضحك "مازن" ضحكة تهكميه ساخرة تخفي خلفها وجعًا مؤلمًا وهو يقول:
_ هتقوله كده عشان عارف إنك لما تقوله ان الغلط غلطك انتَ الموضوع هيعدي وهيقولك حصل خير حتى لو كان اللي حصل ده كان في موته، لكن لو عرف ان الموضوع أنا طرف فيه هيشيله ليا وهيشوف إني مذنب كنت هموته و مش بعيد يقاطعني فيها.. كالعاده هيقف في صفك حتى لو كنت انتَ غلطان، وحتى لو غلطك كان هيموت بني ادم.
_ انتَ من امتى بتفكر كده؟ انا مستغرب كلامك! مستغرب طريقتك! حاسس إني واقف قدام حد ما اعرفوش، من امتى بتفكر إن ابوك بيفضلني عليك ولا بيعديلي انا غلطي وبيقفلك انتَ على الواحده!؟ ده حتى ابوك انتَ مش ابويا أنا!
قالها "شاهين" بدهشه حقيقيه وهو يشعر أنه لم يعد يفهم الشخص الواقف امامه...
_ في حاجات كتير قوي انتَ مش فاهمها عشان عمرك ما شفتها ولا حسيت بيها، لكن انا بقى فاهمها كويس قوي وملاحظها من زمان بس كنت ساكت عشان كنت شايفك تستحق كل اللي بيتعمل لك، لكن دلوقتي وبعد ما نزلت من نظري انتَ ما تستحقش ربع اللي بيتعمل معاك، ولا تستحق تاخد حق واحد من حقوقي.. ومن النهارده يا شاهين انا مش هسمحلك تيجي على اي حق يخصني.
انهى حديثه وفتح باب سيارته منسحبًا بسرعه من أمامه تحت نظراته المصدومه والمدهوشه من كل ما سمعه منه اليوم...
وإفاقة "ممدوح عمران" واسترداده وعيه كانت جحيم سقط فيه "مازن" الذي لم يشفع له اعتراف شاهين بأن المسدس يخصه وانه من ضغط على الزناد دون قصد، ليتفاجئ الاثنان برد ممدوح وهو يقول:
_ أنا متأكد إنك بتداري عليه يا شاهين، انتَ عمرك ما تكون بالتهور والطيش ده انك تطلع مسدس في مكتبك اللي في بيتك وتتخانق انتَ واخوك عليه، عمرك ما تعملها أنا متأكد ان المسدس ده يخص مازن وهو اللي خرجه وكنت انتَ بتحاول تاخده منه.
وبعد الكثير من القيل والقال، ومحاولة اقناعه بعكس ما توصل له عقله فشلت كل محاولتهم ليخرج مازن عن طور حكمته وهو يفجر الحقيقه في وجه والده:
_ ايوه المسدس بتاعي، وكان معايا بقاله فترة كنت شاريه ومرخصه عشان بحب لما انزل الاجازات اروح اتدرب على الرماية في أماكن بره، والنهارده انا كنت راجع من بره وهو معايا عشان كنت لسه راجع من التدريب، بس يا ترى مش حابب تعرف انا ايه اللي خلاني اطلعه وتحصل الخناقه بيني وبينه عليه؟ من غير ما تتعب نفسك وتسأل عشان انتَ أصلا مش هتهتم تسأل وما هتصدق ترمي اللوم عليا، المشكله اللي حصلت النهارده كانت عشان اكتشفت ان شاهين بيه اللي كلنا شايفينه ملاك ما بيغلطش، وعاقل وذكي وبيزنس مان قد الدنيا، طلع مش بس بيزنس مان ده رئيس عصابه كمان، الباشا بيتاجر في السلاح ولما واجهته حصلت بين الخناقه اللي انتهت باللي حصلك.
والرد كان صادم للجميع حين قال "ممدوح" بعدما تجاوز صدمته:
_ شاهين عارف هو بيعمل ايه كويس، وانا واثق فيه وإن عمره ما يعمل حاجه غلط، اكيد المعلومه اللي وصلتلك دي مش صحيحة.
هز رأسه مبتسمًا بعدم تصديق وهو يقول:
_ مش صحيحة! طب ولو قلتلك انه بنفسه اعترف ليا لا وبيبرر كمان عملته هتقول ايه؟ عندك اهو اسأله.. اسأله!
_ مش محتاج اسأله وما يهمنيش اعرف الإجابه، هو مش صغير هو عارف هو بيعمل ايه كويس مش محتاج حد ينظر عليه، ويا ريت انتَ اللي تعقل وتتحكم في طيشك شويه، اديك شفت أهو كان هيجيب أجلي النهارده لولا ستر ربنا.
وانتهى الأمر...
انتهى بخيبة أمل جديده انضمت لخيبات مازن من أبيه، أبيه الذي لم يقف في صفه ولو مره واحده.. والذي لم يقف في وجه شاهين ولو لمره مماثلة،
أبيه الذي لم يشعر منه ولو لمرة بمشاعر الأبوه أو حتى يلتمس منه موقفًا من مواقف الأب مع ولده، والأمر في مجمله لم ينتهي هنا..
فرد فعل والده أشعلت نيران لم تهدأ في صدر "مازن" والذي وبكل تهور اعترف لوالدته في نفس اليوم بكل شيء عرفه عن شاهين لتنشأ مشاجره كبيرة بين شاهين ووالدته وعلى أثرها تركت "ناديه" المنزل عائده الى منزلها القديم والذي يخص أهلها ومعها مازن ونورهان التي ورغم رغبتها في البقاء مع شاهين ووالدها إلا أن ناديه لم تقبل أن تتركها هناك ومن هنا كان تفرق العائله...
"عودة للآن"
_ أنتَ روحت فين؟
افاق من ذكرياته التي لم ينتهي ألمها لهنا.. بل كان كل هذا مجرد بداية لبوابة جحيم محمل بالألم والفراق والغضب!
_ معاكي.
كلمة بسيطة لكنها هزت دواخلها، وكأنه لا يخبرها أنه معها في الحديث بل معها في الحياة! هكذا كان شعورها حين سمعت الكلمة البسيطة التي لا يقصدها من الأساس، وهذا ما جعلها تتسائل هل أصحبت بائسة لهذه الدرجة! نفضت افكارها الغريبة وهي تقول بتوتر طفيف أثر تفكيرها:
_ أصل ساكت بقالك مدة فكرتك قفلت.
خرج صوته مخالف تمامًا لِمَ كان عليهِ قبل، خرج جامدًا وهادئًا خاليًا من أي مشاعر التمستها منذ قليل:
_ أنا فعلا هقفل عشان تلحقي تكلمي والدتك وتقفلي تليفونك ده تماما وتخفيه في أي مكان محدش يعرف يوصله، ولما تحبي تكلميني طلعيه واتصلي بيا بعد ما تتأكدي انك في أمان ومحدش سامعك.
_ حاضر.
قالتها باحباط بعدما عاد لسابق عهده، الدقائق التي نسيا فيها من هما وما صلتهما ببعض جعلتها تحلق بعيدًا وهي تشعر أنها شخص مهم لديهِ، يشرح له معناته ويشاركه مشاعره واحداث حياته، لكنه سريعًا ما سحب البساط من تحت قدميها ليعيدها للواقع... هو الضابط وهي بائعة الفل تجمعهما مهمة فور انقضائها لن يعرفها في طريق وسينسى انه قابلها من الأساس!
اغلقت معه واتصلت على الفور بوالدتها التي اجابتها بلهفة أم قلبها ينكوي بنيران الخوف على ابنتها، وبعد عدة دقائق كانت تنهي معها المكالمة بدموعها التي تساقطت اشتياقًا لها:
_ ادعيلي يا ماما المهمة دي تخلص على خير وفي أسرع وقت وارجع لحضنك ولبيتنا اللي اكتشفت انه أأمن بكتير من القصر اللي قاعده فيه دلوقتي.
وقالت والدتها من بين بكائها:
_ دعيالك يا بنتي، دعيالك والله في كل صلاة وفي كل قعدة ونومة، ربنا ييسرلك طريقك ويسترها معاكي ويبعد عنك ولاد الحرام يا فُلة يا بنت بطني.. بس متغبيش عني وطمنيني من وقت للتاني.
_ حاضر، هكلمك كل ما ظروفي تسمح.. مع السلامة يا ماما.
_ مع السلامة يا حبيبتي في رعاية الله.
اغلقت المكالمة وبعدها تأكدت من اغلاق الهاتف تمامًا ونهضت تدور في الغرفة تبحث عن مكان مناسب لاخفائه حتى جاء برأسها أن تخفيه في مكان أكثر حساسية الا وهو الدرج المخصص لملابسها الداخلية، رفعت القطع الداخلية بحرص ودسته تحتهم لتشعر بأن المهمة قد تمت كما يجب، واغلقت الدرج عائدة للفراش والقت بنفسها فوقه تنظر للسقف بشرود سابحة في أحداث وأفكار كثيرة.. حديث مازن معها، وحديث نورهان مع شاهين، ثم حديث شاهين معها.. وشعورها تجاه مازن الذي يتعمق كل يوم.. وخوفها من شاهين الذي يزداد بمرور الوقت وبقائها هنا... كل هذه أفكار كانت كفيلة أن تغرقها في النهاية في نومٍ عميقٍ...
*******
صباح اليوم التالي...
شركة العقرب...
دلفت للشركة التي لم تأتيها مُنذُ مدة، بل وحُرمت عليها مُنذُ انفصلت هي ووالدتها ومازن عن شاهين ووالدها.. والدها الذي لطالما وقف في صف "شاهين" حتى بعد تناثر الاقاويل حول متاجرته في السلاح!
وصلت لطابق الإدارة واتجهت فورًا لمكتب "شاهين" لتخبرها السكرتيرة الخاصة بأنه بالداخل ومعه احد اعضاء الإدارة، فدقت فوق الباب ودلفت بعدها بابتسامه واسعة اختفت بالتدريج حين رأت الذي يجلس في مكتب أخيها والذي لم يكن غير "معاذ"..
تقدمت منه ووجها قد اشتعلت به حمرة الخجل على الفور وبالأخص حين لم ترى شقيقها في المكان فقد كان معاذ يجلس بمفرده..
_ صباح الخير..
منذُ انتبه لفتح الباب والتفت ليرى الزائر وطلت هي بطلتها البهية، وقد ارتسمت فوق شفتيهِ ابتسامة ساحرة ومحبة، لا يصدق أنه يراها الآن فلقد كان يفكر فيها للتو وفي حيلة لرؤيتها بما إنها أصبحت في منزل العقرب، لتتحقق أمنيته دون عناء ويجدها أمامه، بمظهرها المرتب البسيط الذي يتكون من بنطال قماش ابيض، وكنزة خضراء حريرية مع حذاء أخضر ذو كعب عالي وزينتها البسيطة جدًا التي تخطف العين وقلبه! وكالعادة تترك لشعرها كامل الحرية، وحين سمع صوتها كان أحب لأذنه من تغريد عصافير الصباح لتتسع ابتسامته أكثر وهو ينهض ويمد كفه ليصافحها:
_ صباح الخير يا نورهان نورتي.
وتصافحا الكفان لتسري كهرباء لذيذة تصل فورًا لقلب كليهما، ولكنها سريعًا ما سحبت كفها بارتباك كبير وهي تنظر حولها بتلجلج:
_ اومال... اومال شاهين فين؟
ابتسم على توترها الواضح الذي يلازمها طول الوقت في وجوده، لكنه يبرر هذا بأنها ليست معتادة على التعامل معه.
_ شاهين في اوضة اللبس بيغير هدومه عشان القهوة وقعت عليه من غير ما ياخد باله.
نظرت لباب غرفة الملابس الصغيرة المغلق والتي حرص شاهين على وجودها تحسبًا لمواقف كهذه، وقالت بقلق:
_ هو كويس طيب؟
طمئنها مبتسمًا:
_ متقلقيش كانت بردت شوية مأذتوش.
تنهدت براحة، ليسألها راغبًا في خلق حديث طويل معها:
_ بس هو لسه جاي من ساعة ليه مجتيش معاه بدل ما تيجي لوحدك.
نظرت له تقول بحلق جاف من كثرة توترها في وجوده:
_ انا روحت شغلي بدري، بس قعدت ساعتين ومشيت لأن هنبدأ في الجرد السنوي النهاردة من بعد العصر لبليل متأخر، فقولت اعدي على شاهين بما إن الشركة هنا في طريقي.
عقب بعدم رضا:
_ نفسي افهم ازاي عندكوا شركة زي دي وتشتغلي في مكان بره، الأولى يكون مكانك هنا.
اجابته برقة:
_ بس أنا حابه شغل البنوك بلاقي نفسي فيه عن الشركات.
وأمام رقتها ابتسم يقول:
- أكيد أهم حاجه راحتك.
_ نورهان!!
رددها "شاهين" بتعجب بعد أن خرج من الغرفة ووجدها أمامه، ابتسمت وهي تقول:
_خرجت من شغلي بدري قولت اجي اشرب معاك فنجان قهوة لو فاضي.
اقترب منها يبتسم في حنو:
_ ولو مش فاضي يا حبيبتي افضالك، كفاية انك نورتيني.
تنحنح "معاذ" في حرج وهو يقول مقررًا الانسحاب:
_ طيب هسيبكوا على راحتكوا واروح مكتبي.
رفض "شاهين" انسحابه وهو يقول:
_ لا استنى اصلاً هطلب فطار اعتقد كلنا لسه مفطرناش.
_ مانتَ عارف انا زيك مبفطرش غير بعد ما اصحى بكذا ساعة.
نظر "شاهين" في ساعته وهو يقول:
_ ماهو يدوب كده الساعة داخله على ١١ اهي.. تعالوا اقعدوا.
قالها وهو يتجه للاريكة والكرسيان القابعان في جانب الغرفة، ليجلس هو ونورهان فوق الاريكة ويجاورهما معاذ على أحد الكراسي..
نظر لنورهان بعدما طلب الافطار لهم وهو يقول بحنان:
_ الشركة نورت.. بقالك سنين مدخلتيهاش.
نظرت حولها تستطلع المكان وهي تقول بحنين:
_ بس متغيرتش كتير، اخر مرة دخلتها كانت مع ماما الله يرحمها لما كانت جيالك عشان تكلم بابا انه ميدخلش مازن كلية الشرطة.
التمعت عيني "شاهين" بحنين وشوق لوالدته الغائبة عن الدنيا، وانتبه لصوت "معاذ" يسأل باستغراب:
_ معقول طنط نادية كانت رافضة دخول مازن الشرطة؟
ابتسم "شاهين" بشوق يقول:
_ رافضة بس! دي جننتنا لحد ما وافقت او اتقبلت انه يدخلها، ماما كانت خايفة على مازن اوي و مرعوبة عليه من السلك ده، عارضت كتير واحنا حاولنا نقنعها كتير اوي لحد ما في الآخر رضيت.
_ ماما كانت بتحبنا كلنا وبتخاف علينا من الهوا، بس شاهين كان له معزة خاصة.
قالتها "نورهان" بدون قصد، لتنقلب ملامح وجه "شاهين" ويظهر عليها الضيق الشديد وهو يقول بنبرة حادة:
_ مكانش ليا معزة خاصة ولا زفت، انتوا بس اللي كنتوا شايفين الوضع كده، لكن الحقيقة امكوا كانت بتعاملني زي ما بتعاملكوا وعمرها ما فرقت بينا.
فوجئت "نورهان" من حدة رده وصمتت بوجه مصدوم وحزين من طريقته، فهي لم تقول شيء سيء حتى وإن كانت والدته تفضله بطريقة ما وتحمل له حبًا زائدًا ما المشكلة في هذا!!؟
_ اهدي يا شاهين طيب، نورهان مقالتش حاجه غلط يعني!
قالها "معاذ" محاولاً تهدئة الوضع، لينهض "شاهين" واقفًا والتف حول الاريكة ليصبح مواجهًا للحائط الزجاجي المطل على الخارج وقال بخنقة:
_ جزء كبير من مشاكلي مع اخوها كانت بسبب كده، انه شايفني واخد حب واهتمام اكبر من امي وابوه.
اغضبها عدم رغبته في ذكر اسمه فقالت بعصبية طفيفة:
_ اخويا ده هو نفسه اخوك.. بعدين مازن عمره ما فكر كده ولا شال شيء جواه من الناحية دي، واه يا شاهين ماما كانت بتفضلك عنا وبتحبك اكتر مننا واحنا عمرنا ما زعلنا من كده لأن احنا كمان بنحبك وبنحترمك.
التف لها بدهشة كبيرة لم تظهر على ملامحه كالعادة لكنها كانت بداخله، حتى هي!! يشعر انه يقف امام مازن، نفس الحديث، ونفس التفكير، هل ستنقلب هي الأخرى عليه يومًا بسبب تفكيرهم العقيم هذا!
_ وأنا بقولك مازن شايف اللي بتقوليه ده بالضبط، وده كان سبب كبير اوي في مشاكلنا..
اعترض "معاذ" متدخلاً:
_ اسمحلي يا شاهين، مازن فعلا حتى لو شايف ده بس مكانش سبب في مشاكلكوا ابدًا.. لان كل المشاكل اللي بينك وبين مازن ما ظهرتش غير بعد الحوار اللي وصله عن إنك بتاجر في السلاح والكلام اللي بيقوله ده.. لو المشاكل اللي ما بينك وبينه بسبب أن والدتك بتحبك اكتر ولا مفضلاك عنه كانت هتكون المشاكل دي بادئه من قبل ما هو يقول انك بتاجر في السلاح والحوارات دي.
ابتسم ساخرًا يقول بألم خفي:
_ كلامك ده انيل.. لأن كلامك معناه انه طول الوقت كان بيخدعني، كان شايل جواه من التفضيل اللي شايفه من امه ومن ابوه ليا لكن كان بيتعامل معايا عادي.. كان بيتعامل معايا كويس قوي.. لكن لما حصل موقف خرج كل اللي جواه وقتها انا اتصدمت فيه، ومش فاهم ازاي كان جواه كل ده وفي نفس الوقت كان بيتعامل معايا بالطريقه اللي كان بيتعامل بيها.
اقتربت "نورهان" منه وهي تقول بتوضيح:
_ عشان انا كمان شايفه كده شايفه ان ماما كانت بتحبك اكتر وبتهتم بيك اكتر وبتخاف عليك اكتر.. لكن عمري ما كرهتك وعمر ده ما بنى حاجز جوايا ليك، شاهين انتَ لو مخلف وعندك ولد وبنت وشايف ان بنتك بتحبك اكتر من ابنك عمرك ما هتكره ابنك او هتحس بحاجز بينكوا، دي بتكون مجرد ملاحظه انك عارف من جواك ان بنتك بتحبك اكتر من تصرفاتها من مشاعرها اللي بتظهرها، لكن حبك لابنك هيفضل هو هو وعمره ما هيقل.
أراد الهروب من الحديث في الموضوع، وهروب شاهين لا يعني سوى شيء واحد انه اقتنع....او بدأ يقتنع، فقال بهدوء وهو يتجه لهم:
_ تشربوا قهوة مع الفطار ولا بعده!؟
نظر "نورهان" و "معاذ" لبعضهما تلقائيًا كأنهما يعلنان انتصارهما في اقناعه وهما خير من يعرفه، ولكن ما لبثت ان اشاحت نورهان ببصرها بعيدًا بارتباك حين وجدت معاذ يبتسم لها.
*******
نزلت درجات السلم بسرعة ليقابلها هدوء تام في اجواء الفيلا، زفرت بضيق وهي تنظر للساعة المعلقة لم تلحق موعد الإفطار، دلفت للمطبخ مبتسمة والقت التحية ليرد الجميع عليها، فقالت لصفاء بعتاب مزيف:
_ كده يا صفاء ماتصحنيش على الفطار.
ردت "صفاء" ببرود كاد أن يجلطها:
_ مش حضرتك من كام يوم لما شدوى هانم اتأخرت على الفطار منعتيني اصحيها وقولتي هي عارفه الميعاد لو عاوزه تنزل كانت نزلت.
ضغطت على أسنانها بغيظ حتى كادت تكسرهم، هي ترد الموقف لها! هل هي من حلفاء تلك الحيزبونه شدوى!
_ تمام، اعمليلي فطار بقى.
قالتها بحدة وغضب وهي تلتفت لتخرج لتتوقف على جملة "صفاء" :
_ بس القواعد هنا في الفيلا إن اللي الفطار بيعديه بيستنى ميعاد الغدا.
التفت لها قاطبة ما بين حاجبيها بشدة وهي تخرج عن طور هدوئها:
_ ليه احنا في مدرسة يا ابلة!
_ دي القواعد يا هانم ومن ايام الباشا الكبير كمان.
ضربت كف بآخر وهي تتلفت حولها كأنها تريد أن تلتقط شيء وتكسره فوق رأس الوقفة أمامها، لكنها على الاحرى لم تجد!
_ عدي اليوم واعملي الفطار لأحسن انا دلوقتي العفاريت كلها بتتنطط في وش أمي.
_ يا هانم انا هنا بنفذ القواعد وعلى أي حد... حتى الباشا الصغير تميم بيه، بصحيه في ميعاد عشان يفطر في ميعاده.
نظرت لها نظرة حارقة قبل أن تقول بتوعد:
_ ماشي....انا بقى هكسرلك القواعد دي خالص... قال قواعد قال.. اتصليلي بشاهين فورا.
قالتها بغضب جم بعدما شعرت بالاحراج من وقوف صفاء في وجهها امام الفتيات العاملات بالمطبخ، ولكن قبل أن تفعل صفاء وتخرج هاتفها سمعت من تقول:
_ متتصليش بحد.. والقواعد مش هتتغير واللي مش عاجبه يخبط راسه في الحيط.
هزت رأسها بعصبية وهي تسمع صوت "شدوى" من خلفها، لتلتفت لها بغضب:
_ انتِ بتدخلي ليه أصلا! محدش طلب رأيك.
ضرب الغضب وجه شدوى وهي تقف ندًا لها لتثبت لها من هنا له الكلمة الأولى والأخيرة:
_ أنا هنا صاحبة البيت وكلمتي اللي تمشي وادخل في أي حاجه تحصل هنا.. انتِ اللي ضيفة وضيفة بايخة وتقيلة اوي وياريت لو تخلي عندك دم وتخرجي من بيتي لانك مش مرحب بيكي.
واستمعت "فيروز" لتهامس الفتيات في المطبخ حول ما يحدث، فاتقدت نيران غضبها أكثر وأكثر لتصرخ بوجه شدوى:
_ انا خطيبة شاهين و....
قاطعتها "شدوى" وهي تسخر منها وتتهمها بمكر خفي:
ومن امتى والمخطوبة بتروح تسكن في بيت خطيبها؟ إلا بقى لو انتوا مخطوبين اه بس العلاقة بينكوا في حكم المتجوزين.. وواخدين على قعدتكوا سوا في بيت واحد.
جحظت عيني "فيروز" بصدمة وشعرت بدلو ماء بارد صُب فوقها، وارتفعت الهمسات والشهقات من الواقفات في المكان، التفت لتنظر للفتيات لتجد أعينهن مسلطة عليها وبها اتهامات لا تُقبل، عادت تنظر ل "شدوى" لتجدها تبتسم بخبث وانتصار، وفي هذه اللحظة الحريق الذي شب بفيروز كان أكبر بكثير من أن تتحكم بهِ او في رد فعلها، الذي خرج على هيئة صفعة مدوية لطمت بها خد "شدوى"... ولم تعطيها فرصة للرد أو الدفاع بل انقضت عليها تكيل لها الضربات واللكمات وكأنها تخرج بها همومها بأكملها تحت محاولة الجميع في الفصل بينهم وتعالي صرخات شدوى المتألمة...
يتبع