رواية كابوس قريه
الفصل الرابع4
بقلم دانيا
مشيت على الزول الواقع براحه وانا قلبي بدق بسرعه قلت لا إن شاء الله م تكون ليان ، وقت شفت وشو قلت الحمد لله واخدت نفس عميل دي م ليان ، قلت ليهم زحوا منو مالو الامام الحصل عليهو شنو ، قعدت جنبو وبقيت اتحسس نبضو كان لسه فيهو الروح قلت ليهم ياجماعه سريع انقلوهو المركز.
قاعد اتكلم معاهم كدا تلفوني دقى عاينت للاسم مكتوب ابو ليان ، حسيت بالقلقل ياربي اقول لعمي دا شنو هسي اثناء ما انا لسه قاعد في مكاني داك وبفكر اقول شنو المكالمه فصلت ، والناس جابو عربيه رفعوا فيها الإمام ماشين المستشفى تاني اتصل عاينت لقيتو دا هو زاتو ، قلت يلا ياسراج مافي حل تاني إلا ترد ليهو ، سعد كان واقف جنبي قال لي رد ليهو يمكن لقوها هم او مشت ليهم .
عاينت ليهو مسافه قلت ليهو انت شايف كدا ، قمت فتحت الخط قبل اقول ليهو السلام عليكم قلت ليهو ليان ، ليان ياعمي قاطع كلامي وقال لي تعال المستشفى سريع ، قلت ليهو ياعمي ليان طوالي قفل الخط ، قلت لسعد قال لي تعال المستشفى وقفل الخط لازم امشي بسرعه ، قال لي ورح خلاص قلت ليهو لا انت امشي البيت انا بصل المستشفى وبكلمكم بالحاصل .
بقيت اتلفت يمين شمال م شايف اي عربيه في الطريق ، بقيت جاري بس في الشارع الرئيسي البودي للسوق ، لمن شويه جات عربيه ركبت ، اول ما وصلت المستشفى اتصلت لعمي وصف لي مشيت لقيت ليان مرقده ، قلبي عمل شح حسيت برجفه وقصه في قلبي لمن شفت مرتي حبيبتي ليان راقده في العنبر وكركبين ليها درب ، قلت لعمي ليان مالها قاطع كلامي وقال لي انا المفروض اسألك ليان البوديها الخلا بالليل شنو ياسراج.
بقيت اعاين فيهو بخلعه لمن حسيت راسي تقل قلت ليهو الخلا؟ قال لي لقوها ناس حاج محمود مغمى عليها في شارع الخلا ، قلت ليهو والله ياعمي انا من صلاه الصبح بفتش فيها وم عرفت مشت وين ، اثناء ما بتكلم معاهو جو ابوي وسعد وامي المستشفى ، بقو يسألو من ليان واقفين قدام العنبر ليان صحت جرينا عليها ، قلت ليها ليان وين مشيتي و كنتي بتعملي شنو في الخلا في انصاص الليالي ؟ وهي لسه بتعاين فينا مصدومه ، ابوها بقى يسأل فيها انتي كويسة بابتي حركت راسها بإيجاب انها كويسة.
ابوها تلفونو ضرب وطلع برا قعدت جنبها قلت ليها ليان انتي كويسة ؟، سراج بسأل فيني انتي كويسة والحاصل معاكي شنو وانا بعاين فيهو مستغربه من اسإلتو عمي قال لي يابتي انتي ليه طلعتي من البيت في نص الليل قلت ليهم كنت ماشه وراء سراج من قلت كدا بدت في ملامحهم الدهشه ، وبقو يعاينو لسراج ، سراج عاين لي مصدوم شديد قال لي يابت قولي بسم الله انتي مجنونه انا دخلت الحمام وجيت لقيتك مافيشا ، وبقيت افتش فيكي زي المجنون .
انا بقيت اعاين ليهو بعدم تصديق قلت ليهو والله انت الكنت ماشي قدامي انا اكذب ليه ، بقى هو بحلف وانا احلف عمي قال لي بنبره حاده اذا سراج قال ليكي م طلع معناها م طلع نفرض انو هو طلع انتي البخليك نطلعي انصاص الليالي وراهو شنو من غير ما تفكري بحالتك او صحتك ، الاتنين بقو يعاينو لعمي مستغربين هو م حصل اتكلم معاي بالطريقه دي رفعت يديني شبكتهم في راسي وبقيت ابكي قلت ليهم انا ليه اكذب عليكم لو م شفتو ، عمي انتبه لكلامو واستوعب هو قال شنو قال لي معليش يابتي انا م قصدي حاجه لكن تصرفك غلط .
وياهو سراج قدامك حلف إنو م مشى الخلا ولاا طلع من البيت ، انتي عارفه اهل القريه كلهم راجنك تصحي عشان يعرفو الحاصل معاكي وكلامك دا لو سمعوهو ح يلومو سراج على كل البحصل في القريه دا وطالما هو قال م طلع انتي لو فضلتي مصره على رأيك صدقيني ح تخسري سراج وح نخسرو كلنا وفكري في طفلك الجاي وطلع من العنبر مشى .
نزلت يديني من راسي عاوزة امسح دموعي عاينت في يدي ، قلبي عمل شح من الخلعه وبقيت اعاين ليها بصدمه ، طوالي سراج مسك بدي وبقى يعاين ليها قال لي دا شنو مكتوب الطفل لنا مكتوب بالدم ، سعد قال لا حوله ولا قوه إلا بالله الكلام دا معناهو شنو ، مسكت في سراج وبقيت ابكي قلت ليهو دا يعني شنو وهم منو زاتو ، قال لي اهدي مافي حاجه قومي ورح الحمام غسلي ايدك دا مجرد كلام م تشتغلي بيهو مشيت غسل لي يدي ، قلت ليهو عاوزة امشي البيت .
فمنا طالعين لقينا ابوي في الباب قلت ليهو عاوزة امشي ارتاح في البيت ، قال لي ناس امك في الطريق لو عاوزة ممكن تمشي معانا البيت ترتاحي هناك الفترة دي وانتي اصلاً م فضل ليكي كتير ، سراج قاطع كلامو وقال ليهو معليش ياعمي بس انا بهتم بيها ولو حست نفسها م مرتاحه بجيبها ليكم اساساً هي م فضل ليها كتير ح تجيكم في السابع .
مشينا البيت ودخلت نمت شويه سمعت صوت ونسه برا جاتني سهيله قالت لي حريم الحله جو يكفرو ليكي قلت ليها تمام هسي بجي ، طلعت قعدت معاهن بقو يتونسو بالحصل للإمام قالوا بعد دخلو المستشفى وعى شوية قال كلمه مكونه من حرفين (سر)وبعدين دخل في غيبوبه ، اتخلعت من سمعت كلامهم قلت ياربي بكون قصدو شنو تاني اتزكرت كلام عمي واتزكرت كلام سراج لمن حلف إنو م طلع من البيت .
قاطع تفكيري صوت واحده منهم سألتني انتي الحصل عليكي شنو ، ناس الحله قالو طالما الشيخ دخل في غيبوبه معناها م فضل غيرك انتي الشخص الوحيد البكون عارف الحاصل شنو امبارح لأنك انتي برضو اتعرضتي لهجوم ، بقيت مخلوعه وفي راسي الف علامة إستفهام اعمل شنو والحقيقه شنو والحاصل دا شنو