رواية باائعة الحطب
الفصل السادس6
بقلم دانيا
بعد سمعت الصوت جات راجعه جري ،، فتحت عيوني لقيت نفسي واقعه على طرف الطريق وغير انا والشجر مافي حاجه....قمت مخلوعه بقيت افتش في زهرة ، اتزكرت اني كنت موجوعه شديد بس هسي الوجع كله راح بقيت امشي وانادي ل زهرة بعد شوية شفتها جاريه علي من إتجاه الغابه وبتصرخ بتقول لي كنوز اجري اجري في وحوش في الغابه دي الوحش هجم على جماعتنا.
وصلتني وهي يلا وامين بتحاول تلقط انفاسها ،، قلت ليها مالك يابت في شنو ؟ قالت لي هجم وحش على المزرعه....ورح نجري لازم نطلع من هنا قلت ليها وباقي الطلاب طلعوا؟ قالت لي لا سمعت صوتهم بصرخوا في المزرعه ،، قلت ليها ورح نرجع لازم نساعدهم قالت لي مجنونه انتي خلينا نطلع من هنا نحن ح نقدر نساعدهم كيف زاتو خلينا ننجو بحياتنا...عاينت ليها بصدمه قلت ليها جاده انتي ح نخلي زملائنا هنا ونمشي ؟ انا راجعه انتي امشي انقذي نفسك ومشيت خليتها.
بعد مشيت منها مسافه جات جاريه وراي قالت لي بعد كل شيء عملوا فيكي عاوزة تساعديهم،، عاينت ليها بإستغراب قلت ليها لو قابلنا الإساءة بالإساءة متين ح تنتهي الإساءة ؟ سكتت مني وقالت لي طيب.....وصلنا المزرعه سمعنا صوت صراخهم العالي بس في نفس اللحظه كناا سامعين صوت تاني ؛؛ قلت ليها دقيقه ركزي هسي دا صوت وحش يابت؟ قالت لي ااي.
قلت ليها بضحكه يابت دا صوت كلب بس شكلوا سعران....قالت لي كيف عرفتي انا سمعتهم بقولوا وحش وحش ،، قلت ليها انتوا ما ناس الطبقه الراقيه عرفكم شنو بالحيوانات وبقيت اضحك....قلت ليها دقيقه قبل ندخل ورح محل بزرعوا الشجر المثمر اكيد هناك ح نلقى لينا حاجه حاده عصا او فااس او اي شيء م لازم نمشيء يدنا فاضيه يمكن يهجم علينا نحن كمان.
مشينا لقيت عود زي العصا بس اقوى شلتو وهي شالت الفاس ومشينا دخلنا ،، لقينا الكلب واقف في نص البيت وبعوي كليهم وهم الله اعلم مدسين وين؟! جينا بورا براحه هجمنا على الكلب نزلنا فيهو ضرب لمن وقع ، بقينا ننادي عليهم بعد شوية ظهرو الكانوا وراء الكراسي والكانوا في الحمام والكانوا قافلين على نفسهم المطبخ .
اول ماسمعوا صوتنا طلعوا ،، جات الاء وصاحباتها قالت لي انتي عايشه ....عاينت ليها بإستغراب قلت ليها قصدك شنو ؟ صاحبتها ضربتها في كتفها ، قالت لي بتردد قصدي الوحش الوحش م قابلكم ، عاينت لزهرة وبقينا نضحك قلت ليها وحش شنو يابت البجي هنا دا كلب بس شكلوا سعران ،، قلت ليهم يلا عن اذنكم انا راجعه الحله ابوي بكون منتظرني ، قمت ماشه كل الطلبه قالوا نحن ماشين مع كنوز م ح نقعد هنا اكتر هسي لو هي ما جات كان الكلب دا عمل فينا شنو حتى صاحبات الاء قالوا ماشين ،، طلعنا من المزرعه ووصلنا الشارع الرئيسي واتجهنا على الحله ، فجأة الكلب قام على حيلو تاني وجرى بإتجاهنا.