رواية الفراق هو نصيبنا الفصل التاسع9 بقلم حبيبة الديب
_يعنى افهم من كده يا يحيى انك كنت عايز تتجوز زهره بنتي و انت بتحب واحده تانيه؟!
_يا عمي..انا.......
سِكت و معرفتش اقوله ايه، مش عارف ابررله
كنت واقف قدامه في مكتبه زي الطفل اللى عامل عمله و عمي قاعد على كرسي مكتبه قصادي و لقيته عرف موضوع هنا
أظن زهره قالت له..!
_انتَ ليه يا يحيى ماقولتيش من الاول؟!
و مين البنت اللى بتحبها دي؟
معانا هنا في الشركه ، صح؟!
_اه يا عمي
_مين هى..؟!
_هنا..!
ابتسم إبتسامة صغيره و اتكلم :
_البشمهندسه هنا؟!
يازين ما اخترت يا يحيى، بس ليه انا اخر من يعلم؟!
اتكلمت بحرج :
_محدش كان يعرف يا عمي انا عرفت زهره بس عشان تكلم هنا و تعرف لي رأيها و انا كنت هكلم حضرتك اول امبارح بس ملحقتش اقولك..!
بص لي بندم و قام وقف قصادي و حط ايده على كتفي :
_حقك عليا يا يحيى،
ماكنش قصدي والله، انا فهمت غلط
بس بعد كدا ياريت تعبرلي عن مشاعرك على طول
لما اطلب منك طلب انا مش قصدي احرجك عشان توافق
بس ياريت تعبر عن رأيك بشكل صريح
ما انتَ لو قولت لي انا زهره بالنسبالي أخت ماكنتش هزعل منك مثلا
و لو قولت لي معلش يا عمي بس في واحدة تانيه في حياتي برضوا ماكنتش هزعل بالعكس كنت هفرح لك اوي..!
_عارف والله يا عمي بس انا مكنتش حابب ازعلك والله.!
_عارف يا يحيى عارف...،
وانا مبسوط عشانك جداً على فكرة،
المهم خدت ميعاد مع ابوها ؟؟!
ابتسمتي وسعت تلقائي و اتكلمت بفرحه :
_زهره كلمتها و لسه هترد عليها
أخد لك ميعاد يا عمي ؟!
_ايوه طبعاً ، مستني ايه
كلمها انهارده و خدلنا ميعاد منها..!
_حاضر يا عمي.!
_يلا روح على مكتبك و خلص شغلك..!
كنت لسه همشى بس رجعت و حضنته فجأه و اتكلمت بهمس :
_ربنا يخليك ليا يا عمي.!
عمي طبطب عليا و ابتسم و انا رجعت مكتبي و انا مبسوط و انا داخل طلبت من السكرتيره تطلب لي هنا..!
كنت قاعد في مكتبي مستنيها
و سمعت صوت دقات على الباب
_ادخل.!
دخلت و هى متوتره :
_حضرتك طلبتني..!
ابتسمت و شاورتلها على الكرسي
_اتفضلي يا هنا اقعدي..!
قعدت و هى بتبص لي بتوتر واضح :
_خير يا بشمهندس في حاجة..؟!
كلمتها بلهفه واضحه الصراحه ماعرفتش اداريها :
_فكرتي..!
فركت ايدها و بصت لي :
_افكر في ايه..؟!
_في اللى زهره كلمتك فيه، انا كلمت عمي خلاص و عايزين نقابل والدك ..!
_بس... بس انا قولت ل زهره اني مش جاهزه للجواز دلوقتي..!
ابتسمتي اختفت و بصيت لها:
_يعني رفضاني..!
اتكلمت بسرعه :
_لا مش رفضاك انتَ شخصياً
بس الجواز مسؤولية و خايفه ماكونش قدها
يعني خايفه من الجواز نفسه
فاهمني..؟!
_فاهمك يا هنا بس ايه رأيك نعمل خطوبه دلوقتي عشان نتعرف على بعض اكتر بعدها نحدد ميعاد للفرح..!
سكتت و كانت بتفكر و انا كملت :
_يعني نتخطب شهر ولا اتنين بعدها نحدد الفرح
عيونها وسعت و اتكلمت :
_شهر ولا اتنين..!؟
لا طبعاً دي فتره قليله اوي
ممكن نتخطب سنه او ست شهور مثلاً..!
_طب ممكن نحدد فترة الخطوبه دي لما نجيلكوا البيت احسن..؟!
هزت راسها و سكتت و انا ابتسمت و اتكلمت بحماس :
_نيجي امتى.؟!
_هكلم بابا الاول و بعدها هقول ل زهره..!
_ماشي بس ياريت ماتتأخريش علينا في الرد..!
قامت وقفت و اتكلمت :
_ان شاء الله..، عن إذنك..!
_اتفضلي.!
طلعت برا و انا كنت طاير من الفرحه و بحمد ربنا ان الموضوع خلص على خير..!
•♡•♡•♡•
كنت قاعده في الاوضه لوحدي، ماما راحت الفيلا تجيب لي لبس نضيف عشان هخرج انهارده من المستشفى..!
كنت قاعده زهقانه و بدأت احس بوجع في ايدي و صداع رهيب ،
بصيت حواليا و لقيت الكيس اللى كان فيه بسكويت و كيك ،
اللى كريم جابه خدته و فتحت كيس بسكويت
و بدأت اكل منه، الباب خبط و لقيت ممرضه دخلت بإبتسامة و في ايدها صنيه
_ميعاد فطارك جيه، يلا عشان تاخدي المسكن..!
_اتأخرتي اوي على فكره، انا جعانه اوي و كمان راسي بتوجعني اوي و ايدي.!
اتكلمت و هى بتحط الصنيه قصادي :
_يبقا مفعول المسكن بدأ يروح ؛ يلا كُلي عشان تاخدي علاجك و الوجع يروح..!
_ايه ده انا مش بحب اكل المستشفيات ده
و بعدين انا بايته ليه هنا من امبارح مش خارجه من عمليه يعني.!
_ايوه ما المفروض تبيتي ليله هنا عشان لو جالك سخونيه
انتي بتاخدي علاج شديد اوي
عشان الخياطه اللى في راسك و ايدك المتجبسه ده غير ان عندك ارتجاج بسيط في المخ ف كان لازم تفضلي تحت المراقبه عن قليله يوم واحد.!
بصيت لها بدهشه و انا اصلا ماكنتش عارفه حوار الارتجاج و خياطه في راسي ده
كنت بتوجع اوي بس مش فاهمه من ايه و دلوقتي فهمت.!
_ده انا على كده اتكسحت خلاص..!
ابتسمت و هى بتركب محلول جديد :
_لا إن شاءالله هترجعي زي الاول و احسن كمان
انتِ بس خدي علاجك بانتظام و في اكل معيين مايتكلش عشان هتقلب بسخونيه
خلصت كلامها و عينها جت على الكيس اللى كريم جابه و مسكته
_ و أولهم الحاجات دي، ممنوع عنك الفراولة و الشيكولاته لحد ماتتحسني.!
_بس انا مش هاكل الاكل ده.!
_ لا لازم تاكل عشان تاخدي العلاج بتاعك.!
مشيت و سابتني اكل براحتي و انا فعلاً ماكنتش حابه اكل
لقيتها دخلت تاني
_في زياره ليكي برا .!
_مين؟
_بنوته و معاها واحد و بتقول انك مرات اخوها المستقبليه.!
عيوني وسعت و اتكلمت بدهشه :
_مرات اخوها المستقبليه؟!
دي مين العبيطه دي..!
لقيت راس داخله من الباب و بتتكلم بمرح :
_انا العبيطه.!
دي كانت عبيطه فعلاً ، ولا اعرفها ولا عمري شوفتها.!
_مين انتِ طيب..؟!
دخلت و كان في ايدها بوكيه ورد و بصت للممرضه و اتكلمت :
_سبيني معاها احنا هنتفاهم سوا.!
الممرضه ابتسمت و اتكلمت و هى خارجه :
_تمام
بس خليها تاكل عشان رافضه و انا مش هديها العلاج غير لما تاكل..!
_بس كده عيوني.!
الممرضة مشيت و البنت قربت و ابتسمت و هى ماده ايدها بالورد :
_الف سلامه عليكِ يا زوزا.!
ابتسمت بدهشه :
_هو انتِ مين انا اول مره اشوفك على فكره
ايه كمية العشم في الكلام دي.!
ابتسمت و اتكلمت و هى بتحط الورد جنبها :
_ما اتكلم بعشم عادي ما احنا هنبقا أهل قريب كده كده..!
_أهل ايه بس؟
انتِ مين يا شاطره.!؟
_انا جودي اخت كريم اكيد اكيد كريم حكالك عني مش كده؟!
اصله بيحكي لي عنك كتير.!
_جودي أخت كريم.!
_اه و كريم برا صح ينفع ادخله؟
عايز يشوفك قبل مايروح الشركه و كمان حابب يطمن عليكي
و فرح لما عرف ان محدش هنا
ينفع يدخل.؟!
اتوترت و اتكلمت بسرعه :
_لا استني.!
ناوليني الطرحه دي من على الكنبه.
نولتني الطرحه و ساعدتني البسها و انا كنت لابسه بيجامه بقم
ماما جبتهالي امبارح، ظبطت نفسي و قولتلها تدخله .
دخلوا هما الاتنين و كان في ايده كذا شنطه
اول مادخل ناولهم ل أخته و قرب مني و اتكلم بسرعه و قلق
_زهره انتي كويسه؟!
انا امبارح كنت هموت و اكلمك بس اهلك كانوا جنبك طول الوقت و جبت معايا جودي عشان لو حد من اهلك هنا تعمل نفسها صحبتك و تدخل تطمني عليكي
انتي عامله ايه..؟!
_ كويسه الحمدلله
_انتي وقعتي ازاي مش تاخدي بالك!
افتكرت اللى حصل معايا امبارح
اتنهدت و بصيت له :
_معلش بقا ماكنش قصدي حصل خير حصل خير..!
جودي بصت لكريم و اتكلمت :
_على فكره الممرضه قالت انها رافضه الاكل.!
_رافضه الاكل ليه كُلي يا زهره و لو مش حابه الاكل ده اطلب لك اكل غيره.!
لويت شفايفي و اتكلمت بزعل :
_اكل برا ممنوع.!
جودي اتكلمت ببساطه :
_خلاص كُلي من الاكل ده عشان تخفي بسرعه و تقدري ترقصي معايا يوم خطوبتك مع كريم.!
بصيت لها بدهشه و كحيت جامد
و كريم نغزها و برق لها :
_يابنتي اتهدي بقا مش اي كلام نقوله و خلاص.!
بص لي و كمل كلامه بإبتسامة :
_و بعدين زهرتي مش هترقص في الخطوبه غير معايا انا و بس..!
هنا بقا انا ما اندهشتش انا اتصدمت ايه يابني جرأتك ببجاحتك انتَ و اختك دي؟
اتكلمت بسخريه :
_لا انا يعجبني عشمكوا بجد ايه الثقه دي واخدنها منين؟!
كريم ابتسم و اتكلم :
_طب يلا كُلي عشان خاطري.!
_مش بقولك عشمان!
اتكلمت جودي بثقه زي ثقة أخوها كده :
_ سيبهالي يا كريم و انا هخليها تاكل الطبق ب اللى فيه.!
بصت لي و اتكلمت :
_يلا بقا يا زهره ارفعي راسي و كُلي.!
بصيت لكريم و اتكلمت :
_ ماتعرف اختك العشمانه دي اني اعرفها من دقيقتين بس.!
كريم ضحك و سكت و جودي اتكلمت :
_طيب يلا بقا كُلي و ماتكسفنيش بقا يلا.!
_بقولك ايه انا مصدعه بجد و ايدي بتوجعني جداً
و الممرضه مش راضيه تديني المسكن ف مش نقصاكي ..!
_ما انتِ لو كلتي هتاخدي العلاج بتاعك و المسكن هيخفف الوجع ده.!
بصيت ل أكل المستشفى قدامي بعدم رضا و اتكلمت بعند :
_على فكره انا مش هاكل الاكل ده
مابحبش اكل العيانين ده..!
ابتسمت و اتكلمت بنغش :
_ما انتِ عيانه..!
_بجد مش عايزه اكل الاكل ده انا .
_خلاص مش هتاخدي العلاج و خليكي كده مصدعه و تعبانه كده كتير ..!
بصيت ل كريم ينقذني من زن أخته دي:
_يا كريم.!
هز كتفه و رفع ايده باستسلام و كأنه بيقولي "مليش دعوة "
و فعلاً بدأت اكل من كتر ما الصداع و زن جودي ماكانوا هيموتوني
و بعد ماخلصت الاكل الممرضه جت ادتني العلاج و حقنت كام حقنه كده في المحلول .!
اااه ياني على الممرمطه دي حسبي الله ونعم الوكيل فيكي يا سلمى .!
كريم و جودي قعدوا شويا بعدها كريم بص لساعته و اتكلم :
_طب انا هستأذن انا بقا عشان كده اتأخرت اوي على الشركه..
بص لي و كمل و هو بيغمز :
_و كمان عشان عندي موعد مهم جداً جداً بعد الشغل فـ عايز اخلص شغلي بسرعه.!
انا فهمت قصده و جودي كمان فهمت قصده بس مع ذلك اتكلمت بؤلم :
_ميعاد مهم مع مين يا كريم
هاا؟!
كريم ابتسم و بص لي :
_ مع واحد كده اسمه علي الدسوقي
بنته سرقت قلبي ف هسرقها منه..!
ابو تقل دم أهلك انتَ و أختك الغلسه دي
بصيت له و اتكلمت ببرود :
_تروح و تيجي بالسلامه يا كريم بس خلي بالك لـيسرقك هو كمان ما بنته حراميه بقا..!
ابتسم و مشي بهدوء ، هو دمه تقيل سيكا
بس انا وقعت الصراحه و خطف قلبي باهتمامه و لهفته عليا دي
مش هنكر يعني اني بدأت انجذب ليه شويا
و اخته كمان فرفوشه و عسل اوي حبيتها
حسيتها شبهي اوي و عامله زيي
_بقولك ايه ماتجيبي الشنط اللى اخوكي جايبها دي وريني جايب ايه كده.!
_ماشي يا مرات أخويا بس بالنص ماشي.؟!
اتكسفت و بصيت لها :
_بطلي تقولي مرات اخويا دي
انا مش مرات حد.!
_فيما سيكون يعني!!
_برضوا بطلي تقوليها محدش يعرف بكرا فيه ايه..!
جابت الشنط و حطيتها على طرف السرير و اتكلمت و هى بتغمز :
_بكرا فيه خطوبه كبيره و هنرقص سوا.!
_تموتي و ترقصي انتِ..!
ضحكت و اتكلمت :
_جداً
فتحت اول شنطه و لقت فيها عصاير و ادتهالي :
_خدي دول يلزموكي انتِ مليش في العصاير انا.!
فتحت الشنطه التانيه اللى كانت مكتوبه عليها اسم الكافيه اللى بجيب منه اتشيز كيك على طول
و الشنطه كان فيها كذا علبة اتشيز كيك فراوله بس واحده فانيليا و مكتوب عندها ورقه "جربي دي هتعجبك"
بصيت ل جودي و اتكلمت :
_هو اخوكي بيحب الفانيليا .؟
_اه اي حاجه فانيليا دايس فيها.!
فتحت شنطه تانيه و كان فيها ڤيتامينات و برضوا فيها ورقه و مكتوب فيها
"خدي من دول عشان يعوضوا الدم اللى نزل منك"
جودي ابتسمت و اتكلمت :
_يا عيني يا عيني
اه لما الحلو يحب و تبهدله الايام...،
لفلك من الصيدليه للكافيه للسوبر ماركت بيحبك الولا بيحبك.!
اتكسفت اوي و شديت منها الشنط
_يابت افصلي كفايا..!
_زهقتي مني يا مرات اخويا؟!
ده انتِ المفروض تكسبي صفي عشان انا هبقا عمة العيال.!
بصيت لها بدهشه :
_عيال مين؟
انتي خلتيني اتختبطت و اتجوزت و خلفت عيال كمان..؟!
كنت بصالها بدهشه و هى ضحكت و اتكلمت :
_على فكره انا بهزر يابنتي..!
شكلك كده هتاخدي عني فكره وحشه..
مدت ايدها و اتكلمت بإبتسامة :
_نتعرف من اول و جديد بقا
انا جودي الحسيني طالبه بائسه في تالته ثانوي و نفسها تبقى مصممة أزياء.!
فتحت عيني بدهشه :
_بتهزري
بتحبي تصميم الازياء زيي؟!
_انتِ بتحبي التصميم و الرسم؟
اتكلمت بحماس :
_جداً
اتكلمت باهتمام :
_طب مادخلتيش فنون جميله قسم تصميم ليه؟!
_دخلت هندسه زي بابا و يحيى عشان بعد ما اتخرج هنزل الشركه معاهم
بس بابا قالي الرسم عندي هيبقا هوايه و لو حابه ادرسه بعد الجامعه هعمل كده و افتح أتيله عادي..!
ابتسمت و اتكلمت بحزن :
_بس انا بقا جدي رافض ده
جدي صعب اوي اصلا و كان عايزني ادخل علمي رياضه عشان ابقى مهندسه زي كريم كده
بس انا كنت عايزه ادخل ادبي و كريم قالي ادخلي المجال اللى يريحك و سيبك من جدي و فعلاً وقف قصاده و من ساعتها جدي بيجبره على اي حاجه
عشان برضوا كريم وقف قصاد جدي في جوازة ريم و وليد.!
بصيت لها و اتكلمت بقلق :
_قصدك ان العلاقه بين كريم و جدك مش احسن حاجه؟!
هزت رسها بالايجاب :
_اه للاسف
جدي كل همه الشركة و فلوس الشركة و ازي نكبرها أكتر و نكبر اسم الحسيني اكتر..،
مش همه احنا بنحب ايه و مش بنحب ايه حتى
و من ساعة ما ماما و بابا اتوفوا و هو بيجبرنا على اي حاجه هو عايزها إذا كانت صح او غلط
المهم انه عايز كده ف احنا لازم نطيع أوامره و بس.!
كان باين عليها الزعل و هى بتتكلم و زعلت عليها بس مسكت ايدها و اتكلمت بمواساه :
_ بس اكيد كريم واقف في ضهرك انتِ و اختك صح.؟!
ابتسمت و اتكلمت بحب :
_ ايوه طبعاً..،
كريم طيب اوي و على طول بيدافع عني انا وريم
ريم اصغر منه بسنتين بس بيعاملها و كأنها بنته مش اخته و جدي كان رافض جوازتها عشان جوزها سفير في تركيا و مش مهندس ف مش هيفيد ثروة الحسيني بحاجه
يعنى جدي كل همه اننا احنا التلاته نبقا مهندسين و نكبر الشركة
و نتجوز مهندسين تبع شركاء جدي في الشركة عشان يكبر ثروته أكتر و أكتر..!
_يا حول الله في ناس تفكيرها كده..؟!
اتنهدت :
_للاسف في جدي و كتير غيره كمان..!
بصت للساعه في ايدها و قامت وقفت :
_ عندي درس و لازم امشي دلوقتي
حضنتني اوي و كأنها تعرفني من سنين مش من ساعه بس :
_الف سلامه عليكِ و ان شاء الله تقوميلنا بالسلامه يارب .!
كانت لطيفه و جميله اوي و لقتني ابتسمتلها و اتكلمت بحب :
_الله يسلمك ياقلبي
و على فكره انا حبيتك جداً و مبسوطه اني اتعرفت عليكِ .!
و بعد ما مشيت فضلت قاعده لوحدي شويا و قلقت شويا من شخصية جد كريم دي و حسيته يشبه عدلي اوي...
شويا و ماما جت و كمان يحيى جيه و خدوني من المستشفى و لما سألت يحيى عن بابا عرفني انه معاه ميعاد مع كريم دلوقتي هيخلص و يرجع الفيلا
سامعين دقات قلبي ولا لأ..؟!
•••••••••••
اللهم صِل وسلم وبَارك على سَيدِنا مُحَمَّد.
•••••••••••
_اتفضل يا بشمهندس اتفضل
تشرب ايه.؟!
كريم قعد قصاده و اتكلم :
_ممكن قهوه ساده.!
علي طلب اتنين قهوه و بص لكريم بجديه :
_لما جتلي امبارح يا بشمهندس كريم مكنتش اعرفك كويس بس دلوقتي و بعد ما سألت عنك عرفت ان تخصصك هندسه ميكانيكا صح..؟!
_صح حضرتك انا اصلا مش جاي في شغل ولا اسثمارات خالص
انا جاي في حاجة تانيه بس ياريت قبل ما اتكلم حضرتك تسمعني للاخر
و كمان عايز نلغي الالقاب يعنى قولي يا كريم و اقولك يا عمي مثلا.!
كريم نها كلامه بإبتسامة لتلطيف الجو
و علي كان شاكك و فاهم من كلام كريم بس اول ما قال "اقولك يا عمي" هنا هو فهم كريم جاي في ايه
بس سكت و سابه يكمل كلامه.!
السكرتيرة خبطت على الباب و دخلت قدمت القهوه و خرجت تاني
و كريم بدأ كلامه :
_بص يا عمي أظن حضرتك فهمت انا عايز ايه
انا طالب ايد بنت حضرتك و عايز رأي حضرتك عشان اجيب اهلي و اجي البيت اطلبها رسمي.!
علي بصله و اتكلم بجديه :
_و انتَ كنت جاي امبارح عشان كده برضوا صح؟!
كريم هز راسه و اتكلم :
_ايوه صح.!
علي رد بنفس ثباته :
_طب انتَ شوفت زهره فين يا كريم او تعرفها منين؟!
كريم كان متوقع السؤال ده اصلا ف كان مجهز نفسه يرد بكل صراحه :
_الصراحه يا عمي انا شوفت زهره مره
ساعتها خبطت عربيتها بالغلط و دي كانت اول مره اشوفها فيها
عجبتني اخلقها و اسلوبها ف سالت عليها و عرفت تفاصيل عنها
و عرفت هي مين و بنت مين و كده و اتمنيت لو اشوفها تاني
و شوفتها كذا مره...!
اتكلم علي بتركيز :
_شوفتها امتى و فين؟!
كريم اتنهد و اتكلم :
_جدي و عدلي الدسوقي بينهم شراكة و عقود و جدي كان عايز انا و سلمى بنت عدلي نتجوز جواز مصلحه و شراكه و كده
و انا الصراحه ماحبش اني اتجوز بالطريقة دي و في نفس الوقت زهره كانت واخده عقلي و تفكري
ف كنت ناوي اروح المقابله دي و اقنع سلمى اني مش حابب اتجوز بالطريقة دي و نفشكل الجوازه
و ساعتها روحت و لقيت زهره اللى مكانها...
كريم سكت لحظه يفكر بعدها كمل :
_زهره جت مكان سلمى تتفق معايا اننا نبوظ الجوازه عشان سلمى كانت مغصوبه على الجوازه دي
ساعتها شوفت زهره كام مره بس و اعجبت بيها جداً بس هى قافله كل ابوابها في وشي
و رافضه اني اكلمها خالص من بعد ما حوار سلمى خلص ف قررت اني ادخل البيت من بابه احسن
و انا يشرفني اني اناسب حضرتك يا عمي .!
علي بص له لحظه و شرب من فنجانه و هو لسه محافظ على ثباته ، ساب الفنجان و اتكلم بجديه :
_طب جدك موافق على الجوازه دي يا كريم..؟!
كريم سكت لحظه و افتكر نقاشه مع جده قبل ما يجي و بص ل علي و اتكلم :
_لا جدي مش موافق
بس انا رأيه مش مهم بالنسبالي
انا بحب زهره و عايز اتجوزها..!
✿••✿••✿••
اللهمَّ أرزقنا الأخلاص فى كل قول وفعل وعمل.
✿••✿••✿••
كنت قاعده في أوضتي لوحدي
لسه متغديا و واخده العلاج و ماما سابتني على اساس اني هنام بس انا معرفتش انام خالص
كنت بفكر في اللى حصل لي مع سلمى ، كنت مصدومه منها
ازاي صاحبة عمري اللى كنت فكرها بتحبني بجد تعمل معايا كدا؟
كنت مصدومه منها لسه و زعلانه منها و عليها
انا اتاكدت فعلاً انها شخص مريض
ياما بابا و يحيى حذروني منها بس انا كنت عاميه بجد
ازاي ماحستش انها كده؟
هما عندهم حق لما قالولي خلي بالك منها ممكن تأذيكي في يوم!!
قومت من مكاني و طلعت البلكونه، قعدت على الكرسي اشم هوا و غمضت عيني ممكن افكاري تهدى شويا
قافله تليفوني من الصبح عشان ماتتكلمش معايا و عملت نفسي هنام عشان لو جت تمشي تاني.!
_زهره
و انا قاعده و سرحانه لوحدي كده سمعت صوتها و عرفت انها جت
انا عارفه اصلا انها هتيجي و تبرر عملتها دي
بصيت لقيتها قدامي فعلاً و باب اوضتي مفتوح
واقفه قصادي بكل بجاحه و مبتسمه بعد اللى عملته فيا
_عايزه ايه يا سلمى؟!
جايه ليه بعد اللى عملتيه فيا؟
انا اصلا مش عارفه انتِ جبتي البجاحه دي منين بس
جايه هنا بعد ما حاولتي تموتيني؟!
ابتسامتها اختفت و اتكلمت بخضه و كأني صدمتها :
_أموتك؟
انا أموتك يا زهره؟!
انتِ بتقولي ايه انا مقدرش اعمل كده
انا مقدرش اعيش من غيرك اصلا.!
كانت بتتكلم و هى بتقرب مني و انا كنت ببعد عنها :
_اوعى يا سلمى و ماتقربيش انا استحاله اكلمك تاني ولا عايزه اعرفك تاني اصلاً
امشي من وشي و ماتجيش هنا تاني ..!
بصت لي باستغراب و اتكلمت بدهشة :
_زهره انتِ واعيه انتِ بتقولي ايه؟
انا مش هعرف ابعد عنك
انتِ صحبتي الوحيده يا زهره
انا محدش بيعبرني ولا يسأل عني غيرك
محدش بيحبني في الدنيا غيرك..،
انتِ الوحيده اللى بتحسسيني اني استاهل اعيش،
انا بعتبرك اكتر من اخت يا زهره.!
ده حتى اخويا الوحيد مش بيسأل عني خالص راميني ل بابا و نساني
انتِ بس اللى بتفتكريني و بتحبيني يا زهره.!
_بس انتِ ماقدرتيش الحب ده يا سلمى و بتبادليني بكره و حقد و غيره
انتِ مش بتحبيني يا سلمى انتِ بتحبي اهتمامي بيكِ و بس.!
شدت شعرها لورا جامد و هى بتعمل كده لما بتفقد اعصابها و اتكلمت :
_انا مش بحبك يا زهره؟!
ده انا خلصتك من حوار يحيى و كمان سيبتلك كريم مع اني مش بحبك تكوني مع حد تاني و تنسيني بيه..!
كلامها صدمني اكتر و رديت عليها بعنف :
_اولا يحيى حواره خلصان من الاول
انا اول ماقولت ل بابا مش موافقه خلاص الموضوع خلص
و ثانياً بقا و الاهم ان كريم مش بتاعك و لا حاجه تخصك عشان تتكلمي بصيغة الملكيه
و تقولي أديتهولك
هو اختارني انا يا سلمى و انا موافقه
ولو في الاول رأيك كان يهمني ف دلوقتي لأ
مايهمنيش رأيك خالص إذا كنتي بقا موافقه ولا لأ فـ انا مايهمنيش..!
قربت مني و اتكلمت بترجي :
_ طب يا زهره خلاص سامحيني حقك عليا دي اخر مره هعمل كده صدقيني بس ماتسبنيش لوحدي.!
_سلمى صدقيني مش هينفع ارجع اكلمك و تبقى صحبتي زي الاول و اتجاهل اللى عملتيه انتِ كده.!
انتِ زقتيني من على السلم عشان بس فكرتي ان انا و يحيى هنتخطب
و مسمعتينيش حتى
لا و كمان كسرتي ايدي بقصد يا سلمى
انا شوفت الغل و الكره في عيونك يا سلمى
انتِ لا يمكن تكوني بتحبيني خالص ده وهم
انتِ واهمه نفسك و بس..!
و قبل ما سلمى ترد لقيت ماما واقفه قدامنا
كانت سامعه كل حاجة
و بصت لسلمى و هى مش طيقاها حرفياً و مره واحده ضربتها بالقلم و اتكلمت معاها بعنف :
_اطلع برا بيتي و مش عايزه اشوفك مع زهره تاني أبداً.!
برااا..!
سلمى بصت لها بصدمه و دموعها نزلت و بصت لي نظرة خذلان مش عارفه ليه بتحب تعيش دور الضحيه
خدت شنتطها و كانت هتمشى بس انا وقفتها
_سلمى.!
وقفت و لفت لي و انا اتكلمت :
_ياريت تنسي يحيى عشان هو بيحب واحده تانيه
ياريت تفكري كويس و تروحي تتعالجي
ياريت..!
اتكلمت معاها بترجي
كان نفسي اساعدها بس مش هينفع هى فعلاً بقت خطر عليا و مش طبيعية .!
بس اتفجأت بيها لما ليقتها بصت لي بكل تحدي و هى بتقرب مني و اتكلمت بثقة و اصرار :
_و ياريت انتِ كمان يا زهره تنسي كريم عشان انا بقا مش ناويه اسيبه خالص
مهما حصل..!