استفاق من غفوته صباحًا، يفتح أجفانه على إثر الضوء الذي اخترق الغرفة من الجزء المفتوح من النافذة بعد أن نثرت الشمس خيوطها المضيئة على الكون، حاول أن يتقلب أو يتحرك لم يقدر، حتى ذراعه لا يقدر على تحريكها، رفع رأسه لينصعق بما يراه، وقد وجد نفسه مقيدًا بالحبال، فصرخ بعزم صوته:
"الحقوني.. يا ناس الحقوني، حد يلحقني ويفكني، انا ايه اللي بيحصل لي ده؟!"
صرخته القوية أجفلت النائم بجواره ليستيقظ من نومه مجفلا حتى وقع من تخته على الأرض، لينتفض سريعًا باستدراك مسبق ، وتناول المرآة الصغيرة التي كان يضعها بالقرب منه، ليضعها بوجه الآخر يذكره بلهاث:
"بص كويس وافتكر.. بص وشوف أنت مين، عشان تفهم ومتوجعش قلبي!"
رأى أدهم الوجه الغريب فاستعاد الجزء المفقود بذاكرته وقت استيقاظه، ليتمتم بالسباب حانقًا:
"تفو عليك يا ملعون، بتربطني في السرير وأنا نايم يا جبان؟"
سأله أمجد ليتأكد:
"قول اسمي الأول عشان أطمن أن رجعتلك الذاكرة." غمغم أدهم بسبة وقحة قبل ان يجيبه
"أنت أمجد حفيدي الـ...." ختم بسبة وقحة أخرى جعلت الآخر يطمئن ليفك وثاقه قائلًا بالضحك: "حبيبي يا جدو، طالما بدأت يومك بـ (طولة اللسان) دي، يبقى أنا كدة اطمنت.
" أوقعه أدهم بدفعة قوية ليعتدل بجذعه، ويفك المتبقي من القيود عنه، وقد خلصه أمجد من العقدة الكبرى، ليتمتم حانقًا منه ومن فعله الدنيء:
"أنا تربطني بالحبال يا غبي؟ أنا أدهم باشا، أصحى من النوم ألاقي نفسي زي العاجز مش عارف أتحرك؟ إزاي تجرؤ تعمل كدة؟ إزاي تجرؤ يا ولد!"
تراجع أمجد للخلف ليردد بدفاعية: "وأنت كنت مستني مني إيه؟ مستني إيه بعد الفضايح اللي عملتها امبارح؟ كان لازم أربطك عشان أضمن سلامتنا إحنا الاتنين."
رفع ادهم قبضته في الهواء ينوي على ضربه ولكنه تراجع في اللحظة الأخيرة، ليتمتم بغيظ:
"لولا إني مابحبش أمد إيدي على أحفادي، كان بقى ليك معايا تصرف تاني خالص دلوقتي.
" قالها وزفر يجلس على طرف التخت متهدج الأنفاس، فاقترب أمجد منه بابتسامة متلاعبة يردف: "ما تزعلش مني يا جدو، والله أنا عايز مصلحتك."
جأر به أدهم كازًا على أسنانه:
"مصلحتي يا حيوان؟ تستغل إني نايم وتربطني زي البهايم؟ أنا أدهم باشا أتعامل المعاملة الواطية دي؟ أنا؟"
"يا راجل فكها بقى وخد الموضوع بهزار، أنت ما مبتحبش الهزار؟"
قالها أمجد وهو يتمايل بجسده أمام أدهم بميوعة استفزته ليهدر به
"إيه الرخص ده يا ولد؟ اتعدل في وقفتك وخليك راجل وأنت بتتكلم معايا، اثبت يا ولد!"
قال الأخيرة بنظرة حازمة أرعبت أمجد ليجلس على الفور بأدب أمامه على طرف التخت الثاني قائلًا: "أمرك يا جدي عشان تعرف اني بحبك وبسمع الكلام"
رمقه أدهم بامتعاض يقذف من فمه الكلمات بقرف : "أنت النهاردة مش عاجبني يا ولد، شايف في عينيك نظرات غريبة مش مريحاني."
غمز أمجد يقول بشقاوة: "ليه بس يا جدي مش مستريح؟ ده أنا ببصلك بكل إعجاب وتقدير، ده أنت بقيت مثلي الأعلى يا راجل!"
عقد ادهم حاجبيه يسأله بدهشة:
"مثلك الأعلى في إيه؟ أنا عارف إني راجل أستحق أكون قدوة للأجيال كلها اللي جاية، بس عايز أفهم منك القصد.
رد امجد بمرح:
"يا عم ده أنت كنت سيرة الجامعة كلها امبارح، بعد حضورك يوم واحد بس! بعد اللي عملته مع الدكتور اللي طردك من المحاضرة ووقفتك قصاده، بقيت فارس أحلام البنات.. يا أخي تباً لك، خدت الشعبية دي كلها من غير اي مجهود!"
مط أدهم شفتيه يقول بزهو:
"عادي جدا، انا عارف اصلا إني جذاب، ودي موهبة مش عند كل الناس."
"يا حبيبي يا جامد انت!"
هتف بها أمجد مصفقًا كفيه بمرح جعل أدهم يرفع حاجبًا وينتفش صدره دون صوت، والآخر يناظره بإعجاب حقيقي حتى أنتفضا الاثنان على طرق على باب الغرفة.
"ادخل."
هتف بها أمجد لتدلف شقيقته الصغيرة بتول متمتمة بتحية الصباح:
"صباح الخير."
ردد من خلفها أدهم التحية، وقد أشرق وجهه برؤية وجهها الصبوح وهذه البراءة التي تتمتع بها هذه الصغيرة:
"صباح الخير يا عسل."
تمايلت بكتفيها كالعادة كلما أحد ما أطربها بكلمات الدلال، حتى هتف بها أمجد بخشونة:
"عايزة إيه يا بت؟
خبئت ابتسامة بتول، الأمر الذي أزعج أدهم ليوبخه آمرا:
"عامِلها كويس يا غبي ودلعها، دي جميلة وتستاهل الدلع، كتكوتة رقيقة، مش زيك."
رفع شفته أمجد يناظرها بامتعاض غير متقبل الفكرة من أساسها، ليردد ساخرًا بتهكم:
ـ عايزة إيه يا برنسيسة؟ عايزة إيه يا ست الحسن والجمال؟"
لوت ثغرها بتول حانقة من سخريته، لتجيب مختصرة أمامه:
"مش أنا اللي عاوزاك يا حبيبي، ده بابا هو اللي بعتني ليكم عشان ينبه على سعيد مخصوص إنه يروح يقابله.
" سألها أدهم:
"وهو والدك باعت في طلبي أنا ليه؟
" لوحت فاردة كفيها في الهواء:
- "مش عارفة، بابا هو اللي بعتني وأكد عليا إنه عاوزك أنت بالذات، اخرجله وشوف بنفسك.
" أردفت كلماتها ثم خرجت من الغرفة على الفور، ليتساءل أدهم:
- "يعني إيه عاوزني أنا بالذات؟"
ضاقت عينا أدهم بتفكير يردد بحيرة:
- "أنا مش مستريح، ومش عارف إيه السر وراء كل ده؟"
في خارج الغرفة وقفت أريج تراقب رد فعل والدها الغاضب، وهي تقرقض بأظافرها تحت أسنانها بتوتر، حتى خرج إليها أمجد وأدهم من الغرفة، ليلقيا التحية التي رددها أبوها ووالدتها على عجالة قبل أن يهتف عزام مخاطبا ادهم قائلاً:
- "مبتتصلش بأهلك ليه يا ولد؟"
- "نعم؟"
- "أنت يا زفت، أنا بكلمك أنت!"
أشار أدهم بسبابته نحو صدره فهتف به عزام: - "هو أنت شايفني بكلم نفسي ولا بكلم الحيطة اللي وراك؟ أنا بكلمك عن أهلك اللي قلقانين عليك، وأنت ولا هامك ولا حتى فكرت تطمنهم بمكالمة واحدة يا غبي!"
سمع الاهانة أدهم فامتقع وجهه بغضب شديد يمنع نفسه بصعوبة أن ينقض عليه، ليلتفت بأعين نارية نحو أمجد الذي كان متوقفاً بجواره مبهوتاً من فعل والده، فهمس اليه كازاً على أسنانه:
- "أبوك بيشتمني قدامك، وأنا مش فاهم أي حاجة من الهبل اللي بيقوله ده!"
واصل عزام هجومه
- "بتقول إيه عندك يا ولد؟"
برقت عينا أدهم بتحذير، فتدخل أمجد مخاطباً والده وهو يقترب منه, ليتولى الرد عن الآخر بصوت خفيض:
- "يا بابا أنت عارف إن سعيد تعبان من بعد الحادثة، فأكيد نسي موضوع أهله ده..
" قاطعه عزام بحدة:
- "مفيش حاجة تخلي الواحد ينسى أهله يا ولد، ده كلام فارغ أو هو بيستهبل, إزاي يعني فاكر جامعته ودراسته وناسي أهله زي ما قولتلي يا سي أمجد؟" اعتدل أمجد بتوتر، فقد تفاجأ بفعل بيقظة والده في ذلك الشأن، لتنتقل أنظاره على الفور نحو شقيقته التي ناظرته باستسلام، وحركت كتفيها بعدم معرفة، لينتبه على قول والده:
- "إيه يا أستاذ أمجد؟ كنت فاكر إني مش هعرف اللي حصل امبارح في الجامعة؟ ولا اللي عمله ابن خالك وتسبب في طرد أختك معاه؟ أنا ميشرفنيش المهزلة دي أبداً!"
"مش فارق معايا مرضك ده لو كان هيسبب مشاكل، ولا يهمني أمرك لو هتضر سمعة بنتي.. اتعدل يا ولد بلاش تمثيل علينا!"
قابل ثورته أدهم بدفاعية كاد أن ينطق فيها بالحقيقة:
"أنا مش بتمارض والوضع دا ما يعجبنيش من الأساس ، انا اصلا مش س........
" قاطعه أمجد بسرعة بديهة ليمنع حدوث الكارثة: "وحياة ربنا يا بابا هو تعبان بجد، واللي حصل امبارح في الجامعة كان بسبب تعبه.. أنت مش فاهم الحكاية، خليني أحكيلك.
"قاطعه عزام بنزق: "أنا مش فاضي للمرقعة بتاعتك انت كمان، ورايا شغلي دلوقتي، ابعدوا عن طريقي عشان مش طايق أشوف وشكم، وسعوا!"
هدر بالأخيرة ليفسح له المجال أمجد، حتى خرج من باب المنزل، فنهضت أحلام الصامتة من أول الجلسة لترمقهما بلوم، وخيبة أمل، ثم تركتهما للذهاب إلى غرفتها هي أيضًا.
لم يتبقى سوى أريج، والتي سرعان ما جذبها أمجد يسألها كازًّا على أسنانه: "إيه اللي حصل يا غبية عشان يخلي أبوكي يتقلب علينا القلبه دي؟" ردت أريج بهمس هي الأخرى: "دكتور المادة اللي طردنا امبارح، طلع يعرف بابا.. واتصل يشتكي من سعيد ابن خالي عشان قلة أدبه في المحاضرة، وقاله إن اللي حصل ده هيضر بسمعتي أنا كمان." ضيق عينيه أدهم يستوعب، أما أمجد فقد ضرب بكفه على رأسه متمتمًا: ...
"يا عيني على الحد.. ده كملت معانا على الآخر!"
الفصل التاسع
مستلقيًا على فراشه، يضع قدمًا فوق الأخرى، وعيناه تتطلع نحو السقف، مندمجًا في حديثه الممتع عبر الأثير في الهاتف:
"بجد؟ يعني شعري عجبك فعلاً؟.. أنا عارف طبعاً إنه حلو، بس كنت حابب أعرف رأيك إنتي كمان......... يادي النيلة عليكي يا لينا! بلاش تلعبي بيا."
"أكيد طبعاً القصائد دي فيها رسايل كتير، أنا مابكتبش أي كلام وخلاص.. بلاش مبالغة بقى يا لينا."
قطع جملته بشهقة مرتعبة فور أن رأى من يقف على رأسه بعد أن ولج إلى داخل الغرفة، تعلو ثغره ابتسامة غريبة جعلت نيازي يعتدل بجذعه وينهي المكالمة سريعًا ليهتف به:
"إنت دخلت هنا إزاي؟ وواقف فوق راسي كدة من إمتى؟"
ازداد اتساع ابتسامة أدهم وهو يجيبه ببساطة:
"دخلت إزاي؟ عادي، من الباب اللي كان مفتوح.. أما من إمتى؟ فبصراحة كدة ومن غير كدب، أنا هنا من فترة."
وتابع أدهم بمرح:
"أصل كلامك كان مسلي جدا، وحركاتك كانت باين عليها أوي إنك طاير من الفرحة مع اللي كنت بتكلمها."
اعترض نيازي رغم الخوف الذي بدا على ملامح وجهه:
"وطالما إنت هنا من بدري، مابتخبطش ليه وتستأذن قبل ما تدخل؟"
واستطرد نيازي بحدة:
"هي أخلاقك الريفية يا أستاذ سعيد مفيهاش ذوق ولا أدب استئذان؟ ولا حتى احترام لخصوصية الناس بدل ما تتصنت عليهم وتسمع أسرارهم؟"
شعر أدهم بالحرج حتى هرش بطرف أنامله على شعر رأسه من الخلف، فهذه الأفعال بعيدة كل البعد عن أخلاقه، ولكن يبدو أن عشرته مع "زوج التوأم الأوغاد" قد أثرت عليه، تحمحم يقول باعتذار:
"أنا أسف لو كنت ضايقتك، معاك حق فعلاً في اللي قلته.."
ثم أردف أدهم وهو يبرق بعينيه:
"بس إنت السبب!"
ردد نيازي بدهشة:
"أنا السبب؟!"
"أيوه."
"وسبب في إيه بقى إن شاء الله يا سيد سعيد؟"
جلس أدهم على طرف التخت ليردف:
"عشان كنت بتتكلم في البتاع ده." (أشار نحو الهاتف ليُكمل): "وشكلك كدة كنت في مكالمة غرامية."
رددها نيازي باستنكار:
"مكالمة غرامية؟!"
رد أدهم بتأكيد:
"أيوة غرامية، والدليل نظرتك للسقف وحالة السرحان اللي خلتك ماتحسش بيا وأنا داخل.. وإنت السبب كمان عشان سبت باب الأوضة مفتوح."
هتف نيازي بضيق:
"إزاي بتقول إني عندي حق، وفي نفس الوقت بتبرر لنفسك التخاريف دي عشان تقتحم خصوصيتي؟"
خصوصيتي؟
رد أدهم بلهجة مقنعة:
"يا صاحبي أنا بنصحك بشكل عام، ده عشان تحافظ على خصوصيتك وتبعد عنك عيون الناس الرزلة."
ردد نيازي باستنكار:
"صاحب مين يا واد أنت؟ أنت ناسي إني أكبر منك؟"
قالها نيازي فابتلع أدهم المتبقي من كلماته، فكيف سيشرح لهذا الأبله أنه أكبر منه بعدة عقود، بل هو جده بالترتيب الرابع، فقال بتردد:
"يا نيازي اعتبرني زي صاحبك، أنا حابب أقرب منك وأبعد عن أمجد المتخلف ده، وأريج اللي مابتبطلش رغي وكلام تافه."
ارتفعت شفته العليا يقول برفض:
"نعم؟ عايزني أصاحبك أنت؟ وليه أصلاً؟ أنت مش من سني، ولا أنت حتى من مستوايا الثقافي."
كافح مع تفسه أدهم حتى لا يضحك، فهذا المدعي يظن نفسه شاعرًا حقًا ولكنه مضطر لمسايرته، لذلك كان رده بمسكنة:
"أنا فاهم قصدك يا نيازي، بس أنا حاسس بوحدة صعبة بعد الحادثة اللي حصلت لي، والحالات الغريبة اللي بتجيلي من وقت للتاني.. عشان كدة بتمنى تقبلني معاك، أستفيد من خبرتك في الدنيا وأتعلم منك.. أنت مش عارف أنا مشتاق قد إيه أشوفك وأنت بتقول شعر في الأمسيات، زي ما سمعت من إخواتك."
تبسم نيازي بزهو:
"هم إخواتي حكوا لك عن شعري اللي هيدخل التاريخ، وهيبقى مرجع لكل المثقفين اللي جايين؟"
أومأ أدهم يخفي امتعاضه، ولكنه أجفل على تبدل وجه نيازي ليهتف به:
"بس أنت تريقت على شعري قبل كدة! وقلت إني ببوظ اللغة العربية!"
استدرك سريعًا أدهم يجيبه:
"ما هو ده كان وقتها بسبب الحالات اللي أمجد حكى لك عنها.."
"أممم.."
زام بفمه المغلق قبل أن يعقب بأعين تبرق بحدة:
"يعني حالاتك دي هي اللي خلتك تصحيني بلسعات الحزام على رجلي؟ كأني حيوان وبتروضه؟"
ارتبك أدهم ليجيب بتوتر:
"أنا بجد بعتذر لك على اللي حصل ده، وتصرفي الوحش، وأتمنى تسامحني."
رمقه نيازي صامتًا بأعين متشككة:
"مش عارف ليه حاسس إني بكلم حد تاني غير ابن خالي.. الكلام والمصطلحات اللي بتقولها دي غريبة عليك قوي يا راجل!"
ازداد ارتباك أدهم وهو يجاهد أن يظهر على صفحة وجهه الثبات، مغ تحديق المباشر من نيازي اليه، فقال الأخير:
"خلاص مش مهم يا سعيد.. هعديها المرة دي."
معاك، وأتقبل اعتذارك، أما بشأن انك ترافقتي ف أنا هكون كريم معاك ، وهتبرع واخذك معايا الندوة التي عاملها الصالون الثقافي لواحد من النوادي المشهورة في العاصمة.
ضحك أدهم يدعي السعادة وقال بامتنان مزيف:
"أنا بجد شاكر فضلك يا نيازي، ومش عارف أعبرلك عن امتناني إزاي.. أنت فعلاً إنسان رائع، أو بصراحة كدة.. أنت شاعر أخلاقه عالية."
"عالية!"
رددها نيازي عاقد الحاجبين بدهشة، ثم ما لبث أن يتابع:
"ماشى.. مادام خدت اللي أنت عاوزه، يبقى تسمح لي بقى أقعد مع نفسي شوية عشان أرتاح."
أذعن أدهم لينهض عن التخت يبتسم بسماجة استفزت نيازي بقوله:
"تمام.. هسيبك براحتك عشان تقعد مع نفسك وتكمل المكالمة الغرامية..."
"غرامية؟ غرامية مين يا ابني؟"
صاح بها نيازي مقاطعاً الآخر، والذي رفع كفيه في الهواء بمهادنة، ثم غمز بعينيه قبل أن يخرج من الغرفة.
غمغم نيازي بالسباب والسخط على هذا المنزل الذي لا يجد به الراحة ولا الخصوصية.
— ❄ —
خارج الغرفة استفز أدهم هذا الاهتزاز المتواصل بجيب سترته، من هذه القطعة الغبية التي اسمها هاتف والتي تخص المدعو سعيد كما أخبره الملعون أمجد قبل ذلك، تناولها ليرى الرقم الغريب المدون على الشاشة الشفافة، فتأفف ضائقاً.
فهو لا يملك الرد وبنفس الوقت لا يستطيع رميه أو إغلاقه، حتى لا يثير الشك أو القلق لدى عائلة المذكور، ألا يكفي كتم صوته، حتى يرتعش كل عدة لحظات ليثير بجسده القشعريرة.
"جرى إيه يا سعيد؟ مش عاوز ترد على اللي بيكلمك ليه؟"
هتفت بها أحلام الجالسة بوسط الصالة تشاهد التلفاز بشاشته المعلقة على الحائط، اضطرب أدهم وهو يرفع أنظاره نحو المرأة فقال بحرج:
"لا.. أصل الرقم غريب ومش عارفه عشان كدة مش هرد."
تبسمت له بملامحها الطيبة تقول:
"وهي المكالمات المجهولة دي بتجيلك دايماً؟ ولا أنت اللي مش فاكر الرقم أصلاً؟"
ردد بالأخيرة فهي الأقرب لفهمه:
"لا.. أنا مش فاكرها خالص."
صمتت تطالعه بنظرات غير مفهومة، جعلته يشعر بعدم الارتياح، وكأنها تخترق روحه من الداخل فتمتم متهرباً:
"عن إذنك يا عمتي.. هطلع أوضتي عند أمجد."
أومأت برأسها ولكنه وما هم أن يستدير عنها إلا وقد وجدها تهتف بهذا الاسم الذي اعتاد عليه منذ أيام.
سعيد!
التفت إليها بملامح متسائلة، فقالت تخاطبه بإبداء النصح:
كلم أبوك وأمك يا ابني.. أنا عارفة إن نفسيتك تعبانة واللخبطة اللي إنت فيها دي مخلياك مش موزون، بس يا حبيبي أهلك عايزين يطمنوا عليك.
أومأ برأسهِ يدعي تقبل النصيحة، والتف عائدًا للغرفة التي يتشاركها مع أمجد، ليلج داخلها بملامح واجمة متأثرًا بحزن المرأة، فلفت انتباه الآخر والذي كان يستذكر دروس محاضراته، فبادره بالسؤال فور أن جلس أمامه:
في إيه؟ إيه اللي مضايقك ومخلي شكلك عامل كدة؟
أجابه أدهم بصوت مخنوق:
حاسس إني مخنوق عشان أهل سعيد ابن خالك.. مش عارف أطمنهم عليا إزاي وأنا غريب عنهم، ومظنش أصلًا إنهم هيصدقوني.
رد أمجد وهو ينهض عن مكتبه ليجلس على طرف السرير المقابل له:
وإيه اللي فكرك بسعيد وأهله دلوقتي؟
أجاب أدهم متنهدًا بضيق:
والدتك هي اللي فكرتني، وحتة الحديدة دي اللي مابتفصلش رن من أرقام معرفهاش.
قال أمجد بخبث:
لو كان ضميرك مأنبك أوي كدة، طب ما تخلص المهمة بتاعتك وتعرف مين فينا الأصلح، وبلاش الكلام الفاضي ده.. اديني الجوهرة وارجع إنت مكانك ويرجع سعيد لعالمه.
ناظره أدهم مضيقًا عينيه بضيق، لينتبه مغمغمًا بالسباب بعد أن شعر بهذه الاهتزازات المستفزة:
اوووف.. الموبايل ده أنا مش عارف إيه الفايدة اللي بتاخدوها منه عشان تستحملوا كل القرف ده بسببه!
دلفت أريج على السباب لتتسائل:
ماله الموبايل يا جدي؟
رد أدهم على الفور بنزق:
رقم غريب مش راضي يبطل رن على موبايل المدعو سعيد ابن خالك ده، وأنا مش عارف أرد عليه.
للدرجة دي؟ تفوفت بها لتكمل، وهي تجلس بجوار شقيقها الذي كان يكظم غيظه:
هاتهولي كدة لما أشوفه، لو طلع حد مش مهم هحطه في "البلوك" وأخلصك منه.
بلوك إيه؟ رددها أدهم بغير فهم قبل أن يجفل على صيحة أريج التي رأت رقم المتصل:
الملعونة الواطية! هي إيه علاقتها بيك عشان تقعد ترن عليك كدة؟
تفاجأ أدهم برد فعلها، فسألها أمجد بفضول:
مين الملعونة دي يا بت؟
مبرال.
نعم.
مين ميرال دي؟
هتف بالسؤال الأخير أدهم، ليجيبه أمجد بمرح:
ميرال صاحبة أريج يا جدي، البنت اللي كانت بتتكلم بإعجاب امبارح عن بطولتك وتحديك للدكتور في المحاضرة اللي حضرتها وطردك منها.. ميرال الحلوة.
احترم نفسك يا أمجد!
صاحت بها أريج موبخة لشقيقها والذي لم يعجبه ليهتف بها:
وإنتي مالك باللي بقوله؟ ليه بتمنعي الواحد يعبر عن رأيه؟ هي عاجباني وهي فعلاً زي القمر وحلوة.
صرخت بوجهه:
بطل استفزاز وما تقولش عليها حلوة تاني يا أمجد.
سمع الأخير ليردد مغيظًا لها بعدم اكتراث:
لأ هي حلوة.. وحلوة.. وحلوة كمان.
إنت حيوان.. حيوان.. حيوان!
رددت بها هي الأخرى، بوضع طفولي استفز أدهم ليصيح بالاثنين:
بس إنت وهو.. كفاية!
أذعن الاثنين على صيحته، ليُضيف بأنفاس متلاحقة وقد اخرجاه بفعلهما عن شعوره:
يا ساتر عليكم مزعجين! إيه الحظ الفقر ده اللي وقعني فيكم؟ ينعل أبو كده!
※-※-※
في المساء
تجهز أدهم على الإتفاق مع نيازي، لحضور الندوة التي أخبره عن امرها، وقف أمام المرآة ليصفف شعر رأسه، فـ طالعه أمجد بارتياب سائلًا:
أنا مش فاهم إيه السر في تمسكك إنك تروح مع نيازي وتحضر ندوة شعر إنت مابتفهمش فيها أصلًا؟
ناظره أدهم من طرف عينيه مجيبًا:
ومين قال إني مابحبش الشعر؟ ده أنا ذويق في كل أنواع الفنون والآداب.. إنت متعرفش تاريخي ولا الشهادات اللي خدتها من أكبر جامعات أوروبا؟
ظهر على ملامح أمجد الخبيث عدم التصديق، ليظل صامتًا يحدق بنظرات كاشفة، تجاهلها أدهم، ليلهي نفسه بتمشيط الشعر حتى نزل بالمشط لا إراديًا، إلى المنطقة الفارغة فوق شفتيه، ليتمتم بإزدراء:
يادي النيلة.. كالعادة كل ما أسرح شعري، بنزل بالمشط على مكان الشنب وأفتكر إنه ممسوح زي البنات.
قال الأخيرة بملامح ممتعضة جعلت ابتسامة مرحة تعلو وجه أمجد الذي ردد مندهشًا:
وإنت ليه قرفان من نفسك أوي كده؟
ألقى أدهم المشط بقرف ليقول بفخر:
"عشان دي رمز الرجولة، لو شنبك مش مظبوط ويوقف عليه الصقر، يبقى إيه قيمتك وسط الرجالة؟"
أجابه أمجد بمغزى قاصداً:
"الرجولة في وقتنا ده مابقتش بالمظاهر بس يا جدي، قيمة الراجل دلوقتي بفلوسه، معاك قرش تسوى قرش، ماب تملكش حاجة تبقى إنت ولا حاجة.. إحنا في زمن الفلوس مش زمن الشنبات."
صمت مطرقاً برأسه قليلاً أدهم ثم قال بنصح:
"الراجل راجل يا أمجد، في أي زمان وأي مكان، بفلوسه أو من غيرها، بشنب أو حتى من غير شنب"
تبسم أمجد بصفار أنبأ أدهم بعدم اقتناعه، فتأفف بنزق ينهي الجدال:
"أنا قايم أشوف نيازي خلص لبسه ولا لسه."
فور أن خرج من الغرفة، على الفور تناول أمجد الهاتف يتلاعب به حتى أخرج الرقم المتكرر باتصالاته، ليبعث إليه على تطبيق الرسائل:
"أهلاً ميرال، أنا سعيد."
على الفور ردت الفتاة برسالة مرحبة بلهفة:
"أهلاً يا سعيد، مابتردش على مكالماتي الكتير ليه؟"
تبسم مع كتابة الرسالة الأخرى بذكائه الحاضر دائماً:
"المكالمات الصوتية غالباً بتبقى قصيرة معايا، وأنا دايماً بفضل أرد على الرسايل عشان بحب الدردشة الطويلة مع الحبايب والأصحاب الغاليين."
بعثت على الفور بلهفة:
"وإنت بقى حاططني في قائمة الأصحاب الغاليين ولا الحبايب؟" (وجه ضاحك)
ضحك بمرح لا يصدق استجابتها السريعة، ليرسل لها:
"قوليلي إنتي شايفة نفسك فين وأنا هعمل زيك." (وجه يغمز)
وصلته رسالتها سريعاً:
"يا ربي! مش مصدقة إن اللي بيكلمني ده سعيد.. كنت مخبي الشخصية التحفة دي فين؟"
"هاها.. في التابوت!"
غمغم بها أمجد بمرح قبل أن يرسل للفتاة:
"في الحقيقة هي ماكنتش شخصيتي من البداية، بس من عشرتي لولاد عمتي اتعلمت، وخصوصاً أمجد.. ده شخص رائع وشقي ولذيذ جداً."
بابتسامة متسعة أرسلها، ليأتيه ردها سريعاً بعدة أوجه مضحكة كثيرة استفزت أمجد، لترسل له في الأخير:
"الولد التافه ده!"
شهق متمتماً:
"تافه في عينك يا ملعونة يا صفرا، ده أنا..."
صدقت أريح لما قالت انك مش حلوة، ولا فيكي ريحة الحلاوة.
- "فين الحديدة؟"
تفوه بها ادهم مفاجأ له مع دفعة من باب الغرفة أجفلت أمجد الذي أغلق سريعًا ليسأله باندهاش:
- "حديدة إيه؟"
تلفت أدهم يمينًا ويسارًا يردد بتشتت:
- "الحديدة.. الـ.. الحديدة اللي بتتكلم فيها دي، فين الحديدة يا ولد؟"
زفر أمجد يناوله ما بيده قائلًا:
- "يا حبيبي اسمه الموبايل، كام مرة هقولك بس؟"
تناول أدهم الهاتف ووضعه بجيب بنطاله وهو يقول بعند:
- "لأ، هو حديدة، بس منورة ومزعجة.. التليفون ده هو اللي كان زمان في قصري، الشيء التقيل اللي ثابت في مكانه، وحواليه السلك الطويل.. كان له هيبة ووقار زي أصحابه، مش البتاع ده اللي بيتنقل من مكان لمكان!"
قوس أمجد شفتيه يعقب على قوله:
- "كل الصفات دي جمعتها وعملت مقارنة بين التليفون زمان ودلوقتي؟ ده أنت طلعت فيلسوف يا جدي!"
رد أدهم يقارعه:
- "بطل تريقة يا ولد، بدل ما تسمع مني كلمة ما تعجبكش."
رد أمجد سريعًا:
- "خلاص هسكت، بس قولي بسرعة.. إيه السبب الحقيقي اللي مخليك مرافق نيازي؟"
بابتسامة جانبية ماكرة تنهد أدهم والتف نحو باب الخروج من الغرفة دون أن يجيبه، فتمتم أمجد في أثره:
- "اعمل اللي أنت عاوزه يا أدهم يا فيومي، بس أنا واثق إني هوصل للي بسعى وراه من سنين، ومش هخلي حد يتهنى بتعبي.. استمتع أنت بنظرية الأصلح براحتك، ولو كنت أنت داهية، فإحنا كمان أوغاد زي ما قلت، وماحناش أغبية