رواية أستبرق الفصل الثالث3 بقلم خديجة أحمد
يعني امي عايزاني اتعلق بمجدي..! بس ليه ما عارفه.. طيب نفترض ام وخائفة اولادها يتفرقوا وتكون بينهم مسافه.. بس ليه تضغط ع واحد وتخلي التاني بمزاجه.!.. انا ما قادرة افهم امي والبتعملو.. اتنفست براحه وشلت الاكل العملتو وطلعت غرفتي طوالي.. واكلت وصليت.. والمساء نزلت الصاله.. وكان مازن ومجتبى وامي قاعدين قعدت معاهم شويه الا ويدخل مجدي سلم علينا وطلع غرفته وامي قالت لي اقوم اجهز العشاء.. دخلت المطبخ وجهزت العشاء سريع.. وبعد نزل مجدي قعدنا ناكل كلنا مع بعض.. وانا حاولت اعمل نفسي انو فعلاً ما في مسافه بيني وبين مجدي بس ما كنت قادرة اقرب من شخص هو بنفر وببتعد عني.. خلصنا العشاء وانا قمت نظفت المطبخ.. وطلعت. طوالي غرفتي.. قفلت الباب من جوا واتوضيت صليت وفتحت تلفوني اتصفح حبه ونمت بسرعه.... وصحيت الصباح نفس الروتين.. ومرت الايام.. من البيت للجامعة ومن الجامعه للبيت.. الا في يوم اتصلت ام امي اللي هي حبوبتي واصرت نجيهم نقعد معاهم يومين.. فقررت امي نمشي نهاية الاسبوع...وطول الاسبوع نحنا متحمسين ونجهز في حاجاتنا مع انهم يومين بس.. بس في زول ما. كان مهتم ودي. حاجه طبيعيه فيه الا وهو مجدي.. حتى انه قال لي امي ما عايز يمشي بس امي. اصرت وقالت حبوبتك.ح تزعل منك... ويوم الخميس العصر طلعنا كلنا وركبنا المواصلات مع انو عندنا عربيه قاعدة بس مجدي. ما بهبشها بيده بس مازن بحكم انه لسه صغير بس طوالي بلقاه جنبها يركب فيها ويقول دي عربيته.. المهم ركبنا واتوجهنا..طول الطريق ساكتين..الا مجدي.كان يتكلم مع بتاع العربية.. ناس جبوبتي ساكنين الجزيرة ومن طلعنا من الخرطوم لحدي ما وصلنا ساعتين ونص تقريباً.. وصلنا المساء ونزلنا.. بيت حبوبتي بيت بسيط ومتواضع لاكنه مليان حب وحنان.. طبعاً جدي. متوفى من زمان بس حبوبتي وخالي ومرت خالي الوحيدين القاعدين في البيت.. دخلنا سلمنا عليهم بالاحضان والدموع لاننا لينا شهور ما جيناهم.. وكملت الفرحه لمن وصلت خالتي هناء وبناتها.. وبعد وقت قعدنا اتعشينا كلنا مع بعض..وطلعنا انا والبنات الحوش الوراء ومعانا بنت خالي اللي في عمرها قدر مازن..وهي بتشوف نفسها قدرنا ووين ما نمشي بتمشي معانا..وطول الليل ونسه وهظار وضحك.. والصباح لمن صحيت.. سمعت اصوات في الحوش صليت وطلعت اشوف الا ولقيت خالي وامي وخالتي وحبوبه ومجدي قاعدين في الحوش سلمت على خالي محمد لانو امس ما لاقيته وقعدت معاهم.. اما البنات ما. طلعوا لانو مجدي. قاعد... ولمن دخلت جوا ومتوجهة للمطبخ سمعت اصوات في المطبخ.. وكانت لين تتكلم مع ياسمين وتقول.. دي ما بتخجل يعني تقعد قدامه كدا... اقنعيني بس انها ما عارفه دا ما اخوها.. قامت ردت ياسمين وقالت ليها.. والله البت ما عارفة.. ياخ لمن امي حكت لي وقالت لمن خالتي وصال( ام استبرق) جابته تربيه هي كان عمرها 5 سنوات بس.. اكيد ما ح تعرف.. وانتي عارفه انو الكلام دا سر ممنوع نتكلم فيه قدامها... وانا طوالي دخلت لاني م كنت عارفة هم بتكلموا عن منو اصلا.. لمن شافوني حسيتهم انهجموا وبقن يعاينن لي بطريقة غريبة سالتهم باستغراب مالكن.. وقبل يردن دخلت بت خالي منى.. وقالت لينا قالوا ليكم اعملوا الشااي والقهوة سريع.. وانا ما اهتميت وبديت اعمل في القهوة وهم بدوا يعملوا في الشاي وخلصنا.. وبعد وقت دخلت امي وسهام مرت خالي يعملو الفطور... ومر اليوم الجميل عادي جداً..وطبعا طلعنا لفينا شوية في الحله.. وبليل كنا قاعدين كلنا نتونس وفجاءه الباب دق وبكون يا خالي يا مجدي... ولمن رد السلام من بعيد عرفنا انو دا مجدي.. لين ومنى وياسمين قاموا دخلو جو لانو عندهم هنا ما صاح البنات يقعدو مع الرجال الاجانب منهم.. قبل يدخل لاحظت لي نظرات لين لي كانت ح تاكلني ما عارفه مالها وكمية الحقد الفي عيونها سببها شنو.. وطبعآ هنا مجدي. ما بقدر يتصرف بمزاجه زي ما بعمل هناك.. بجي بقعد حتى لو انا قاعده.. يمكن ما مهتم لاكين ما بشوف انه مضايق.. لاكين حبوبه.. كانت نظراتها لي غريبه وخاصه لمن يكون معانا مجدي.. بلقاها تعاين لي. مجدي وتعاين لي كانها بتعمل مقارنه بينا..او بتراقب فينا وبتكست ومرات بتسرح.. وانا من زمان ملاحظة للحاجة دي وخاصه بعد كبرت.. بس مشكلتي اني ما عارفه السبب شنو وعشان كدا ما كنت بهتم كتير.. مع اني بضايق بس ما بيدي حاجة.. والليلة قررنا ما نسهر لانو منتظرنا سفر بكره وح نرجع لبيتنا.. بليل واثناء ما انا نائمه جاتني صحية.. وفتحت تلفوني لقيت الساعه ياداب9 ونحنا نمنا بعد العشاء طوالي.. قمت لاني حسيت بكتمه والبنات نايمات عادي.. وانا طالعه انتبهت لي غرفه حبوبه فاتحه وجاي منها ضوء وصوت.. ساقني فضولي. اعرف ليه لسه صاحيه وهي معروفة بنومها البدري..ولمن قربت سمعت صوت امي تبكي..
حسيت بنفسي اتجمدت مكاني.. وقلبي يدق بقوة.. وبعدها صوت حبوبه.. وهنا اتطمنت لاني افتكرت حبوبه حصلت ليها حاجة وكدا.. حبيت اعرف ليه امي بتبكي الا وحبوبه تقول.. هي ما صغيرة بعد دا وانتي ربنا ح يحاسبك بي ذنبها.. وانا متاكدة لو قعديها براحه وفهمتيهاح تفهم.. البت دي ما صغيرة عشان تعملي كدا.. ما فهمت حبوبه قاصدة شنو.. قامت امي ردت وهي تبكي وكانت تقول.. ما بقدر ما بقدر.. زي ما مجدي قطعه من روحي.. لازم هي كمان تعايش على الحاجة دي.. ما فهمت علاقة مجدي شنو بالموضوع وهي قاصدة بيها منو.. ردت حبوبه وقالت.. وصال اسمعي كلامي دا.. انا عارفاك بتحبي مجدي قدر شنو ويمكن اكتر من اولادك.. بس دا ما بعني انك تخطي استبرق في النص هي ما ليها علاقة عشان تحمليها حاجه زي.. مجدي دا يعتبر اجنبي عنها وانا وريتك الكلام دا كم مره يعني هي مفتكراه اخوها بس هو ما اخوها..وعادي ممكن يتزوجها بعدين..وانتي ح تشيلي ذنبهم الاتنين وما معنى انو ساكت بعني انو الوضع عاجبه وانا متاكده حاله من حالنا..زي ما نحنا الوضع ما عاجبنا..وساكتين عشانك هو كمان زينا ساكت عشانك..امي قامت تصرخ وتقول..انتي ما ح تفهميني..وانا مستحيل اكلمها وح تموت وهي مفتكرة مجدي اخوها..
يتبع