رواية خطايا واجتثات الفصل الواحد والخمسون 51 بقلم نور علي البصري
مرات اگولن گضت چَم يوم و تعَدي
و مرات اريدن درب للمگبرة يودي💔
ـــــــــــــــــــــــ♡ ـــــــــــــــــــــــ
مـــــــــــــ♡ـــــــــــــاجدة
كوة كدرت أطلع.. ووكعت على وجهي
حضنتني بنتي طـيف.. وهي تبجي وتصرخ:
ــ بابا.. شبيها ماما.. الحك ليش واكف ومتبسمر بمكانك.
لزمني من جتفي ورفع راسي لفوك.. ما أغمى علية لسة واعية وصوت إنـتصار بعدني أسمعه من التلفون وهي تصيح:
ــ مـاجدة.. حاجيني شبيج؟ لو أدري ما حجيت لمن تجيني وأفهمج.. خية هلا ردي علية ولكم حاجوني أختي شبيها؟
شالت طـيف.. النقال من الكاع وسدته وهي تدردم على خالتها:
ــ ناس.. ما تستحي ما لحكن يخابرن والمرة طك خشمها دم.. والله عشرين يوم شحلاتها ما يوم تمرضت كطيعة لفتجن.
ظليت بس أباوع بعيوني وأخوزرها.. ما أگدر أحجي و كوة أتنفس بس واعية وأسمع رجعت غمضت عيوني بس أشهك وأريد الهوا.
صوته وهو يحاجي بنته:
ــ طـيف.. طلعي قوالب ثلج من الثلاجة عبيهم بكيس وجيبيه يلة بنيتي النادرة بساع.
شوي حسيت برودة الثلج على گصتي وهو يمسح وجناتي بس جان يركز على گصتي وأعلى خشمي من توقف النزف شالني بين إيديه وطـيف مثبته الثلج على گصتي وخر إيدها وشمر الكيس.
ــ كافي توقف الدم.. لبسي حجابج وعباية عمتج ولحكيني.
أخذوني للمستشفى ونفس المسلسل من أتخربط ما أطولها عليكم بين علاجات ومغذيات نزل الضغط أصلاً النزف الصار بخشمي جان رحمة من ربي وإلا جان انجلطت بقيت كم ساعة وطلعوني مبيتوني هاي لو مستشفياتنا ببلدي ذاك جان نوموني وأبقى يومين متابعة خاف تتطور الحالة.
برجعتنا جنت متمددة بالكراسي الخلفية لسيارته التاهو.. وبنتي بصف أبوها.. حسيت ارتاحيت الكانولا بيدي وهم منطيني إبر.
ــ بالليل تاخذين أمج لبيت أم مصعب تنطيها الإبرة بالكانولا.
على شنو خوب آني أضرب روحي والله يا الله الخبيث حتى ما گالي الحمد لله على سلامتج رجعت أفكر باللي نقلته إلي إنتصار.. ورجعت إلي القهرة بس تأثير المغذيات وإبرة مهدئة وغيرها بعدهم بدمي.. شوي صبرني وخلاني هادئة بطريقة نعاس.
همست:
ــ ممكن توديني لبيت إنـتصار.
رد علية بكلمتين وبكل نحاسة:
ــ لا مو ممكن.
ــ هناك يم أختي.. ترى محتاجة أروح.
ــ تلطفاً.. بحالتج ما سألتج شنو بيج طـيف.. تگول خالتها خابرت وحتى وأنتِ بالطوارئ تخابر وتسده طـيف.. لمن جاوبتها و أختج.. مرزلة بنتي بلة هاي بيها عليها.
دارت طـيف.. باوعتلي وبعدين گرصت أبوها وگالت:
ــ بابا.. مو كولشي ينحجي والله لو تاخذ النقال مو جانت بلا هالعشرين يوم بلا نقال وردة شحلاتها صح مو أم بيت كفو وآني أشتغل بمكانها بس ميخالف أعلمها الك تدلل مجودي آني وعدتك تجيب ماما يمي وآني القائد وبكفالتي.
رد عليها يبسمر:
ــ عاد والنعم منج واحمدي الله ربيتي يمي جان كتلج العفن والجيفة.
جريت نفس شلون أثنين مال راس براس.. عشتوو.
رجعت تنتقد صديقاتي وخالتها:
ــ ما لحگت تتواصل وياهن.. الله يدري خالتي شسوت لأمي.. والله بس أخذت النقال لگيتها متصلة سديته واستمرت تتصل وأسده لمن بالمستشفى رزلتني.. تگولي عود ليش متردون انطيني أمج يا الفاهية بابا.. آني فاهية؟
ــ لا بابا.. أنتِ بنت أبوها.. ما عاش اليسميج فاهية.
ــ النوب تگول أمج شبيها عاد انهديت بيها گولتلها ظلي أنتِ وصديقات ماما تلحن وتجيبن طلايب وموتن أختج إي والله موتنها وارتاحن بعد والله إذا خابرتي وسديته.
رد عليها برخاوة وبرود بنبرة عادية وبلا أي تشدد ولا كأنو مهتم بنته مسعورة تنبح عالعالم وشلون تشجيع هذا.
ــ لااا.. ليش هذا الكلام عيب بنتي ولج ما ربيتج هيج ميخالف خالتج ولو تنهضم بس عيب.
هنا آني.. ما تحملت وتدخلت شنهي هاي مدلليها ومخربيها صحت ببنتي:
ــ شنو أنتِ منو گلج تحجين بدالي بس الما عنده شخصية يخلي العالم تحجي بمكانه ترى عيب خالتج.. فقيرة لو هو حظها هذا مجير وياكم.
زعلت واصريت:
ــ هسة تودوني لبيت إنـتصار.
طبعاً لسببين أريد أروح هو حس بية ألوب سألني:
ــ إي.. والخاتون أختج شتريد منج.
بحيث شهگتي شهگة موت بساع كذبت وگلت:
ــ علمود إبنها خطية مسوي حادث وضجت عليه.
باوعلي بمرايته و عيونه الفاتحة تلالي بنظرة شك.. دنكت راسي وگال:
ــ لعد واجب نروح نتحمد بالسلامة.
التفتت على بنتي وگلتلها:
ــ ماما طـيف.. انطيني نقالي أتصل بخالتج انبهها إحنا جايين بالطريق خاف طالعين لو ظل بالها علية ويجوز تجي للمستشفى ونتعاگب بالطريق.
طيف : النقال عند بابا سلمته إله من گتلها لا تخابرين ردت تخابر فنطيته لبابا مالي خلك ترزلني خالتي هي تلح متبطل كل شوي تتصل وبابا يجاوبها.
وجهت الكلام لماجد:
ــ آآآ.. نقالي انطيني ياه.
قلد علية :
ــ آآآ ما أنطيه شسوين بيه؟ ما وراه إلا وجع الراس ها أها.. حندخل منطقتهم بس شو توترتي طـيف أنطي أمج بطل مي حلگها يبس.
ورجع وجه الكلام إلي وگال:
ــ أم طـيف.. لازم موضوع دسم.
توترت.. بس كون لا تجفص إنـتصار.. يمه گلتله:
ــ فدوة مريضة ومالي خلك وديني يم خيتي تداريني وهم ضايجة أريد أشوف مـريم.. و سـؤدد.. قبل لا تسافر.
رجع باوع بالمراية غمضت عيوني ما أريد أباوعله حسيت بمغص ورجفة خوف و داخلي كولش مهمومة شلون أحل هالسالفة الجديدة يارب شسوي ما أريد مـاجد.. بالخصوص يعرف يظل عمر كامل يعيرني.
صوته : بـردانة؟
شغل التدفئة و بساع حجيت وصوتي يرجف وبين بوجهي اكو شي:
ــ لا.. الجـو حار.
ــ لعد ليش ترجفين وخايفة اكو شي؟ جيجي.
غمضت عيوني وظلت سنوني تطك سن بسن من الخوف والخجل من الوضع الجديد اللي انحطيت بيه همست بقهر وألم:
ــ ماكو شي.
دك نقالي أعرفه من النغمة.. نزيت بمكاني وگلت:
ــ نـقالي..
همس وهو يسوق بإيد وبإيده الثانية طلع النقال من جيبه شگول عليج طيف إلا تنطيه النقال لاحظت ما يوم گلي شنو بنقالج أو تعاي فتحيه أفتشه واستغربت شكوكي مثله ما گلب بنقالي دون إذني.
باوع للمتصل وفتح خط:
ــ أم يـسار.. الغالية يا هلا ويا مرحبا بنسيبتي.
فتح السبيكر حتى أسمع صوت إنتصار جان متوتر:
ــ أأا.. سيدي الرائد هذا أنت لعد وين طـيف.. مـاجدة.. شبيها بالي يمها.
ــ طـيف.. يمي قصدج ليش النقال عندي ماكو شي بس إجراء أمني.
ردت عليه :
إجراء أمني يا ستار يا رب خوية بلا أمر عليك انطيني خيتي والله حتى ما لحگت أتهنى بجيتها وأنت ضميتها عنا لو ما سـؤدد.. تقدم بشكوى.
ــ من الأخير يالنسيبة.. محتاجة شي؟ خاف عندج مشكلة آني حاضر بعد إحنا رجعنا أهل.
ردت متوترة :
ــ لا شعدي الله لا يعوزني إلك ما أنسى يوم جرجرت يـسار.. للجرائم ودگيته فلقة لو شنسى طرداتك إلي ولك بنت أختي أتوسل بس حتى أشوفها وأشم ريحة مـاجدة.. بيها.
تحجي وتبجي وآني مغمضة عيوني و دموعي تصب على بچيها بس محجيت أحس من رجعت للوطن نفسياً تعبت ورجعتلي كل أمراضي الجسدية والنفسية اللي طلعت بيها من البلد اكتئاب وقلق ووسواس وخنگة غير مرضي المزمن.
الله عليكم.. المثلي وبهيج عمر مو إجه الوگت ترتاح عوفونا من أخطائي بس آني بشر حيل تعذب ونال عقابه بأسوأ تعذيب جسدي ونفسي.
أسمع عتاب أختي لماجد.. ومستهضمة من الذلة الانذلتها أختي.. علمود بس تتواصل وي بنتي وآني.. بديرة غرب عايشة حياتي سودة علية خيتي عساني متت ولا أعرف شگد ذلوج.
ــ خوية الله بالخير.. البنية رفضتج شبيدي المهم عوفج من هذا الكلام إحنا جايينكم وجايب جيجي.. يمج كم يوم نفسيتها تعبانة خاصة بعد مكالمتج إلها.
بوووم بسمار بس ارتاحيت إنـتصار.. ما جفصت الحمد لله وصلنا ونزلت بساع آني أسرع خطواتي للباب.
بسمرني بكلامه:
ــ طـيف.. بابا مو توج جنتي مواتة؟ هسة جنج صل الله ينطيني حيلج.
ضحكت طـيف.. وتوسلت بأبوها:
ــ أبقى يم ماما.. عفية.
ــ نووو ممنوع عدهم شاب.
ــ بس..
ــ لا بس ولا تأكلين خس ماكو وأنتِ هيي..
التفتت علية وگال:
ــ ثلاثة أيام وأجي عليج.
شوي وسمعت صوت سـؤدد:
ــ مـاجي..
حضنتها وآني أبجي من أشوفها أحسها مو بس صديقة هي الروح شوي وباوعت سـؤدد لماجد وكالتله بـحرگة:
ــ شگد كذاب إجيتك أتوسل بيك ما تنطي خبر ولك عيشتني أسوأ عشرين يوم لا أعرفها ميتة ولا عايشة ليش ولك عمي بخت الفاهين صاروا.. رتب.
ــ شنوو دحجي عدل لا أوكلج بسطالي شگد أدبسز.. أم خشم يابس خافي مني لا أكرفچ أنتِ ورجلچ بتهمة تجاوز على رجل أمن.
باوعتله سؤدد وگالتله:
ــ يمييي خوفتني هاي الهوبزة خوف بيها الفطيرة جيجي مو آني ولك الأكبر منك ما أهابه عاد أنت؟ هههههه هواي منطي لروحك قيمة بس العتب على جيجي تموت عليك وإلا طووز بيك و بخلفتك الزفرة شو بنية شطول لسانها خابرت خالتها وشلون تراددها ولج طـيف.. أم لسان ما يسوى سنين أمج الميتة قهر وضيم عليج بس العرك دساس أهلج ينطوج خبز مو تربية شوفي ولج لسانج أگصه إذا سمعت بيچ تطولين لسانج على أمج لو خالتج أوكي آااخ وگع حلگي كم دوب أربي وأعلم وادم؟
گرصت سـؤدد.. حتى تسكت أعرفها لو نهدت ببشر ما تسكت وماجد.. انتجى على سيارته و بإستفزاز وكلام دون عصبية وضحكة مستهزئه گال:
ــ الجريدة الحجيتيها توها لبنتي بلة ما استحيتي على شيباتج المفرعتهن علينا حالج من عقل طفلة بس بعد طفگة من شبابج مو هسة عجيز.
وسعت عيونها:
ــ بس آني مو عجيز آني وياك نفس العمر يا شويب البين.. الله ياخذك گبر لفك ما عندك لباقة تتكلم وية أنثى أنت واحد مليق.
ضحك بـبرود وگللها:
ــ لو گدامي أنثى جان حسبت حساب لكلامي بس للأسف گدامي زلمة مسترجلة عندي فضول أشوف الحرمة التزوجتيه.
عصبت سـؤدد وظلت تنزع شحاطتها وترجع تلبسها وتباوع عليها هاي حركتها مالت ما قبل الانحناء ورمي الشحاطة بوجهه أحسها بالكوة سيطرت على روحها وگالت:
ــ تحترم نفسك لا أطلعلك زلم حوك تدوفك هنا دوف بس أأشر بإصبعي هذا تشوفه يجون فزاعتي زلم الريف واليوم خميسية عمتي كولهم بالبيت مجودرين فتنجب و تاكل تبن لو بيك خير ما عفت مرتك حامل تواجه ذيابة وحدها لو بيك خير صرتلها سند لا تاكلها وحوش ولك تروح لأظفر حسن.. سبع فدوات ولك الزين تطمه الگاع وأنت عايش يا عار.
طـيف.. تبجي وتجر بأبوها وسـؤدد انهدت بيه وهو سكت ما جاوب بس مصدوم بردودها لأن ما تسكت كل شوي قصفته ومزقته أجر بيها وأدفعها لبيت إنـتصار.. وأبوس بيها فدوة سكتي وماكو فاصلة كملت بصياح:
ــ شوف ولك.. إجيت لبيتك ما قدرتني وإحنا زملاء دراسة جنه ولا احترمتني إن دل على شي دل على أنت واحد غير محترم وحقير أتوسل بيك بس أريد أعرف ماجدة.. شسويتلها تطك الباب بوجهي.. عشرين يوم خليتني متخبلة بالإنتظار ما أعرف مصير هاي المسكينة اللي أمها داعية عليها ووگعت بيد نذل مثلك تزوجته فلا أنسالك العشرين يوم شلون ضميتها ضم عبالك مالك.. الأكبر منك رداد شكوى مني طلعتها يا وضيع الوضعاء يا كلب بوياااي كون طابوگة أنيمها براسك وهم ما يبرد گلبي هاي العشرين يوم فلا أنساهن والله.
وهو بكل برود وضحكة يغثها بيها فد خبيث سكت ودرس ردود فعلها عرفها عصبية.. وبساع تنغث فلعب على هذا الوتر شخصية ماجد المحنكة اللي هي شخصية رجل أمني آني ما أعرفها ولا حبيتها شفت ماجد.. المرح الفقير اللي تزوجته مات من يوم فرقنا لـؤي.
رد عليها :
ــ شنهاي الله يساعد العايش وياج فد وحدة أم خشم أم شعثة أم شويبة ولج الجلحة الملحة ها هسة عرفتي ألم الإنتظار لعشرين يوم؟ عشرين يوم ما تحملتيهم.. بس فلا أنسى دگتج وياي لسنوات.. الثانية تمر نار تلهبني لهب مگابل الصو...
سكت وبدل كلامه وگال:
ــ ألم الثأر اللي ما أخذته و ألم الخذلان هربتيها سنين وجايتني تحاسبيني على عشرين يوم.
تقدم ودك الجرس طلعت فرح وتوترت من شافته:
ــ عمو الرائد.. والله ممسوين شي.
أبتسم وگال:
ــ شلونج فرحة.. وين ماما هاي خالتو فوتيها جوة.. و ديرو بالكم عليها ترى مريضة يلا آني رايح وهاا من تطببون هاي المسعورة انتبهوا ترى تعض لا تنسعرون.
أشر على سـؤدد.. ودار وجهه وجر بنته للسيارة سـؤدد.. و گالولها هيج ظلت تگمز وتصيح وراه:
ــ انچب كون تروح مترجع كون تندعم يا عار ولك أنت المسعور يا هبش.
تجاهلها وهي مستمرة تدعي وتغلط وبعد ما رد عليها وهذا الخبلها كولش ظلت تضرب برجلها بالگاع وتصيح بس هو بكل هدوء صاح لطـيف.. متجاهل سـؤدد:
ــ طـيف.. يلا.
بس طيف بقت تباوع لفرح وتأشرلها هلاو وذيج هم تبتسم وتأشر گالت طـيف:
ــ بابا أريد أبقى عفية يم بنتهم.. ما عندي أخوات.
ــ اركبي يلة للسيارة بلا نقاش متوازي ابقيج حالياً عدهم كلب أملح مسعور لا تنعضين بابا ناس عقلهم من عقلج ماكو حوبة عمر عدهم.
باوعت صوبنا وضحكت تأشرلنا باي وتخزر سـؤدد.. لأن سـؤدد.. شدت وي البنت وتذب حجي إجت بنتي حضنتني وگالت:
ــ ماما.. طيبي بساع تعودت على وجودج حتى ترجعيلنا.
ورجعت ضحكت لفرح.. بينما إنـتصار ما طلعت أعتقد تعمدت تتجاهل مـاجد :
ــ ماما راح أدزلج ملابس گد ثلاثة أيام
ــ عندي أغراض هنا بنتي أبوي بعده حافظ قياسي القديم من جنت XL وكل الجابهن إلي عراض على قياسي مال قبل وهسة آني ألبس S..
بوستها وشميتها ولو داخلي جرح من ميولها لعمتها وآني هنا الخسرانة هم خسرت صحتي وعمري نصه گضيته بالغربة وسنين اجتثاثي ورجعت خاب أملي ببنت تنظرلي شي ثانوي والأولوية لأبوها وعمتها راحت هي وأبوها. ودخلت آني وسـؤدد.. وراي تدردم على مـاجد:
ــ امداج تبلغين السفارة إنج تزوجتي وبقائج وياه برضاج ولج جان لبسته قضية خطف إحدى رعايا الدولة
الـ... ية ولج آني كلب مسعور آني شويبة أم شعيثة.
ــ لا.. هو گال أم شعثة أم شويبة.
غـمتني :
ــ النوب تصحح الله يأخذه.
ــ أسم الله شبيج ولج شديتي وياه ترى خليج بمكانه ما تسوين أزيد.
بسمرتني وهي بعدها معصبة:
ــ هو آني.. بمكانه وما سويت شي و تعرفين شقصد؟ أكو الله بين عيونه ما نحمل شخص ذنب أبوه بس هو حاقد حرامات مخليتيني ألبسه قضية خطف ينفصل من وظيفته المغرور بيها وينسجن.
ــ صعب سـؤدد.. هذا أبو بنتي ضحيت بمنصبي وشغلي وراحتي ببلد البديل مقابل ذول الإثنين عائلتي طـيف.. و مـاجد.. ولج أمنيتي بس يباوعلي بس يسامحني.. خاف اذنبت أخته تطلع وياي وانحرفت.
ــ شعليج مو حجيتيلي هو يلح إلا تطلعيها وياج؟ وكم مرة بالسوك صدفة تشوفون أبوج تالي هي اللي لحت تروح وياج من تروحين لأبوج هي عجبها الفلوس واللبس والأكل الزين بس ما حسبت لـؤي يبيع بيها من سولفتيلي ترى عرفت هاي الغمة عجبها أبوج هو جان ملعب ونويعم يجرجر النسوان بفخه بساع.
ــ الله أعلم بالمخفي.. عوفج من هاي السوالف تعبت نفسياً هسة نبقى بالحديقة ترى تعبانة إجيت لأختي أريد أرتاح.
بجيت وآني تعبانة ورجعتلي الدوخة من جديد لزمتني سـؤدد.. و إنـتصار طلعت حضنتني:
ــ راح همزين مالي خلگه.. تعاي خية شصاير بيج الله لا يوفقه
ما تقبلت تدعي عليه :
ــ لا خطية أسم الله.. ولج بيش طالبته أنتِ الثانية ادعيلي الله يهديه وينور عقله للحق ويبطل يظلمني.
جرت سؤدد شعري بـخفة وگالت:
ــ اصحي هذا مو مـاجد الحبيب الطيب ولج ساعة أتوسل ببابه ولا گالي آخر شي گوتله بس طمني عايشة لو قتلتها رگع باب بيته بوجهي من عساه كون يموت موتة ما ميتها واحد قبله الحقير.
حيل انقهرت والله يحجن عليه ويدعن ظليت بگلبي أگول تف من فالجن ربي لا تستجيب إلهن ربي آني خسرت كولشي حتى صحتي بس اهديه إلي ونور عقله للحق ربي والله آني خطية إذا تشوفني أستحق اليصير بية بعد كيفك أنت خالقني وأنت الي تختبر صبري وأنت تقرر مصيري وشلون أعيش.
ظليت أستغفر بصوت ناصي التفتت علية سـؤدد.. وگالت:
ــ من تستغفرين بوجهي أعرفج ما راضية على كلامي هسة لزمتنا أستغفار لأن دعينا على مويجد البالة.
إنـتصار : إي والله لا عاب حلگج هسة صار ينغر علينا ويهوبز.. الله لا يوفقك مويجد بالة.
رديتهن مقهورة:
ــ المن هذا الحجي.. مو عيب رجال كادود وجان يشتغل بالبالات بشرف لا باك لا نهب لا كتل مشكلته ارتبط ببيئة ما تناسبه ببيت حزبيين هنا المشكلة كولها مجان لازم يحبني ويلح ويتعلق ويعلقني بيه ولجن ترى حقه الخسره مو شوي وبيد أبوي و بنظره آني جاسوسة وخاينة ما ألومه آني بس أعاتب گلبه شلون قبل يشك بية وأعاتب عقله شلون يحملني ذنب لؤي.
إنـتصار: كافي خية.. تعبانة أنتِ.
سـؤدد: شوفي الفطيرة عشتوو تبررله لا والله شو كون الله لا يوفقه.
دخلني للغرفة ومددت على الجرباية وسؤدد.. بيدها علاگة العلاجات اللي انطتها ياها طـيف ظليت أبجي واحترك گلبي باوعت لإنتصار ولسؤدد وآني أريد أفتهم السالفة زين:
ــ شفتي حظ أختج؟
بجت إنـتصار.. وهي تأشر علامة اش يم حلگها:
ــ لا تحجين.. مريضة.
ــ لازم أحجي سـؤدد.. دريتي بحظ مـاجدة.. شنو معقولة آني لهذه الدرجة ممحظوظة ولكم شحجي للعالم شگول
سؤدد: حجتلي إنـتصار والأفضل تتركي هالبلد وترفعين قضية حضانة تاخذين بنتج وتفلتين هناك عادي منو يسأل لو يهتم.
غمضت عيوني وآني أبجي:
ــ ما أگدر آخذ حضانة هذا مو بسهولة ما أگدر أنتزع طـيف.. بعدين لا تنسين عندي ماضي مشرف بنت واحد قاتل وعادم ومعذب ناس يگدر يحاربني بيه بالمحاكم.. هاي الحكومات ما تحكم لصالح بنت مسؤول بالمخابرات في النظام السابق آني بس أعاتب القدر اللي خله لـؤي أبوي ولج إنـتصار.. ما مصدگة ولا مستوعبة كل هذا معقولة لـؤي مو أبن جدو أبو شاكر ولج ذبيتي القنبلة بوجهي دون أي إنذار ليش ولج لو مخليتني على عماي.
إنـتصار: آني انصدمت وألوب من يومين عرفت بقرار المحكمة إزالة أسم الجد من جناسي أولاد لـؤي.. بعد إثبات عدم صلة الأبوة بينه وبين الجد.
ردت سؤدد:
ــ وأبن الحلال أكيد عنده أهل.. شلون جدح ينسبه إله والله يا لـؤي الكلب انقبرت وخليت خلفتك تتلاطم رأس برأس وهم تعاني ورا موتك.
بچيت:
ــ شنو ذنبي.. من عايش جابلي العار ودمرني ومن ميت ما رحمني ولكم ما مكتوب أرتاح منه وصمة عار بگصتي طول عمري طلع أبن عار طلع ممعروف نسبه زين هسة شفهم آني شنو بنت أبن حرام.. لو بنت أبن حلال.. وربوه دخت والنبي.. شسوي هسة.
سؤدد: ترى أنتِ حاملة الجنسية أجنبية ومحد يجبرج تتخلين عن لقبج إلا إذا يرفعون عليج قضية ببلدج أما أوراقج المحلية لهذا البلد فهي على الجناسي القديمة مالت قبل الـ2003 بدلوهن من المثلث إلى أبو فسفورة مدورة وذن سقطن لأن أنتِ مسويتي تبديل بسفارة الوطن الموجودة بالبلد الأجنبي هذا الموجود.
ظليت ساكتة.. شحجي بعد وشگول شلون أباوع بعيون العالم وآني بنت أبن حرام عزا ولكم حسوووا بية من يعرف مـاجد.. و فضائل.. شراح يصير خاف عبالكم عايزني فضايح لا هنا كملت.
رجعت سألتها:
ــ خية.. گلتي أبن عمتي يزن هو اللي رافع الدعوة بالوكالة عن أمه.. آني ممرضة ودارسة وراثة وهاي الأمور ببلدي البديل وهواي تصير هناك يجون يسوون تحليل نسب تعرفين هناك انحلال وعلاقات غير شرعية هواي إذا يزن مسوي تحليل وهو مو من شجرة الجد متطلع بينه وبينا نتائج صحيحة إلا إذا عمتي بنفسها سوتها أو إذا عم أو أبن عم.. هنا ممكن.
إنـتصار:
ــ باليوم الي اختفيتي بيه عمتج جانت راجعة قبلج بأسبوع و مسوية تحاليل بس يـسار.. ما گال لأن يزن.. ما حاجي شي عن أمه.. وراها التهينا ندور عليج وأبني گال ليزن ترى بنت خالك رجعت متشوفيه أستعجل بالقضية حتى يزن گايل لو باقية مفقودة ما إلها ورث بس لا هم رجعت و تريد ورث لؤي الكلب مو خالي ترى وقريب تطلع النتائج وشوفوا ورث جدي لأمي محد يشاركها منهم الورث لأمي بس وإحنا الأحفاد.
ــ يا الله شوف الطمع عمي ما رايدين ورث بس نريد أسم و نعيش بشرف وراحة بال أريد ألتقي بإخواني وعمتي أفهم القضية منهم و نشوف حل ما معقولة نبقى مجهولين الجد والعشيرة يعني شلون ترهم بلا لقب وجد وعشيرة.
سـؤدد:
ــ ارتاحي مـاجدة.. وصيري زينة والله كريم.
ــ لا ما أرتاح گدامي ثلاث أيام أرتب شغلة النسب لأن الخبل يجي ورى ثالث يوم وأرجع وياه.
ــ هو أنتِ گلتيها خبل أكو واحد يعيش وي مخابيل.
ــ كون مـريم.. تسمعج خوش ترد عليج ما أجاوبج أحسن آني بيا حال ولج.
أخذت إبرة من العلاگة وسرنجة عبيت الإبرة.. علاج وخرت النيدل وفتحت كانولتي ضغطت السرنجة بالكانولة لازم أتحسن بس أنام ساعة ولازم التقي بعمتي وإخواني وأفهم وشغلة ثانية مـاجد.. خاف يعرف بولد لؤي شلون مصيبة لا يقتلهم بحجة آخذ ثاري من أبوهم بيهم بس معقولة ما يعرف؟ وإذا يعرف معقولة سكت؟ زين هو سكت وياي هم..
بديت أنعس غطتني إنـتصار و سـؤدد تقربت مني وشاورتني:
ــ اللعين مويجد.. خوما تعدى الحدود وياج بنيتي جيجي ترى ما أقبل شنهاي ولج خوما ضعفتي وخليتيه يتقربلج أموتج والله.
وآني نعسانة اثاوب :
_ مالي خلك عوفيني أنام.
ــ عزا جبتي العيد و عرستي أنعل أبوج الحزبي لابو كلمن عرفني بيج نعلا عليج وعلى مـاجد.. معرفتي تضبطين روحج شوي بلا هرفلة.
ضحكت بقهر :
ــ عادي نعليه منا لباجر فلا ازعل انعله وياج من نعلا عليك لؤي على أبو اللي عرفني بيك طاح حظج هديل ما لكيتي غير العار لـؤي تسويه أبوي من أمداني وامده حظ حظي بس مـاجد خط أحمر تقبلين أدعي واغلط وانعل بوتر.. مدري والتر.. مدري شني.
تحشرج صوتي ببجي آخر كلامي حضنتني و تمددت يمي :
ــ بس شفتج من كاميرات بيت حسين أجيت أركض شمرت الولد على أمي وجاد امنته يم حسين والله كريم وحسين شلون يحب رجلي.
_ شعجب اجيتي للوطن معقولة
علمودي.
_ مو مساع گوتلج اليوم خميسية مرت خالي رجيوة تذكرينها توفت أم حسين وأمي حزمت تجي وآني جلبت علمودج والإ رجوة متهمني محبتني ولا حبيتها.
_ الله يرحمها جانت تحبني والله خوش مرة وطيوبة تمشط شعري ورادت تخليله حنة كالت يبرد شعرج بس أنتِ عاركتيها تكليلها يخرب لون شعر البنت ويصير طوخ وضاجت من كصيتيه الي ولد لأن تعرفين لـؤي خرب شعري ولازم ازينه يساوى الله يرحمج خالة رجوة حيل انقهرت أحسن ناس سترتوني ضميتوني و أشهر عدهم يعالجون و يهتمون بية أمي الخلفتني ما عاملتني واهتمت بية مثل خالة رجوة.
بجيت عليها صدوك مرة سنعة وأم هلا بس هي ظلت تلوب وتقهر على حسن حسب سوالف عمة فوزية من يتصلون بيها وقبل تخابر العمة فوزية تحجي تفضفص ها خية فوزية الي بحل حسن خلفتهم كبرت وحسن مات بلا خلفة ها خية حسن ما ضاك العرس خية ومات بحسرة الزفة اااوووف الله يرحمك حسن شهيد وساعة السودة الطببت لؤي بيت العالم يا حسن أنت اطهر ذنوبي وخطاياي الي متنغفر.
خزرتني سـؤدد.. لان ظليت أستغفر و اترحم للمرة وامدح بيها.
ــ يلة اگوم عوفج من رجوة كوليلي خوما حبلتي.
_ بعشرين يوم؟
_ والله رجلج هذا هبش تصير ليش لا.
_ سـؤدد.. مو وقت هذا الحجي آني مهضومة تعبانة والنبي حالتي ما تسر عدو ولا صاحب أريد أنام عفية تطمني هو ممگلبني ترى ولامهتم لوجودي لو عليه يطردني يموتني يدفني بس واكفة بنتي بعينه ومبين مستعد لأجل البنت يتحمل عدوته حتى لو على حساب ثاره.
ــ عشتوو مگلبج شنو يعني خلي يطير المغرور كون أشوف بيه يوم يفش هذا الغرور و اتشمت بيه عشتوو ممگلبها دخلي يلكى بجمالج و أدبج وأخلاقج وشرفج عشتوو يتعزز أبن اللذين وهاي مقهورة.
غمضت اتظاهر بالنوم حتى تعوفني و صدوك خلت و طلعت مدري شكد نمت بس من فزيت على صوت فرح:
_ صباح الخيرات خالة نمتي ليلة بيوم كامل.
رمشت حتى استوعب:
ــ معقولة نمت هلكد عزا لازم التقي بعمتي.
دخل يسار:
ــ خالة ليش ترحيلهم خاف يجرحوج حاجيت يزن گوتله خطية خالتي حتى إخوانها بس خسروا القضية أخذوا أمهم ونسوانهم ورجعوا لمحافظتهم والله بس گوتلهم ترى أختكم تريد تشوفكم ردوني وگالو البيت الأجرناه بعد مطردنا يزن وعمتنا من بيت الجد أجرنا هذا البيت والله فترة وأبو البيت يريد نفرغه إحنا نرجع لمحافظتنا أحسن بعد معدنا شي هنا همزين أبوي مخليلنا جنط فلوس وبيع أملاكه قبل السقوط حولهن فلوس مخلاهن ببنوك ضمهن يم أمي ووصاها تغادر المحافظة احترازاً وهم غيرنا العنوان لمكان محد يعرف بيه.
حاجيتهم گولتلهم أختكم رجعت تريد تشوفكم ردهم جان منعرفها ولا تهمنا رغم اكو إشاعة بالمنطقة الاحتمال الأكبر هي القتلت أبونا لأن الكل شهد لگوه هو وعائلته معدومين وبس هي هربت نشك بيها هي ورى هاي الجريمة تحمد ربها إحنا ما نحب أبوي لأنه جان قاسي وسادي سوت فضل خلصتنا من عار لؤي بس مات وعافنا بلا أسم ولا عشيرة خلي ترجع لبلدها وتنسانا وتنسى وجودنا أفضل للكل.. خاف تريد تجي ويانا تعيش ونشتغل ونصرف عليها وأنت سولفت بيها أمراض الدنيا والله خوية منكدر عوائلنا گوة معيشيها.
گلتله گوة معيشين عوائلكم لعد وجنط فلوس الضمهن لـؤي عندكم لو تخافون تشوفوها وتطالبكم بورث أبوها أكيد الفلوس تحولت مشاريع وأصلاً أنتم ما محتاجين ورث أبو شاكر الله يرحمه بس هو طمع بالبشر وسولة فيا خالتي ارضي بنصيبچ وحظج من الإخوان مو سند ولا كفو إلج يعني لا تفكرين بيهم لأن ممتقبليج.
أبتسمت بقهر وگلت:
ــ هو آني تعلمت على خذلان الخوة من خالك حـارث الربيت وياه ببيت واحد وأم وحدة ومو حنين علية بقت على إخواني من أب معرفت وجودهم إلا هسة عالم تدور طمع والله لا رايدة فلوس ورث ولا أملاك.. أريد بس أرجع جيجي بزمن التسعينات من جنت بالإعدادية والمتوسطة وأصحح أكبر خطاياي يوم انطيت وجه لـ لؤي أوف ولكم أثنين رايدتهن أصحح الخطايا من الجذر جان ممريت بكل هذا وحتى ما خسرت بنتي ورجلي ولا الشغلة الثانية صحتي شيرجعها إلي ولك يا خالاتي يعمري أنت عادي كولش عادي الخذلان وكسران الخواطر عند إخواني متعلمة من حارث والله آني بس أولاد رنا حبوني بس عبن بزر جنة ما عاشوا ولا كبروا بعد حظ خالتك لحگها عليهم وقتلهم النذل.. أوف.
سكتت ورجعت أحاجيه:
ــ يسار.. لازم أشوف عمتي أريد أعرف منو أهل لؤي.. أكيد تعرف معقولة لؤي أبن حرام ما أگدر أصدك جدو أبو شاكر ينسب لروحه أبن غير شرعي والله القضية دوختني حموت ولكم عار هذا وصمة عار بگصتي طول عمري للموت شلون أباوع بوجه العالم هاي شلون أرگعها ما تنرگع من هيج جان يصيح لجدتي أم ريمة رغم لـؤي أكبر من ريم.. طلع مو ابنهم.
ضربت كصتي حيل وآني منهارة :
ــ امداها من گصة فگر امداه من حظ جايف..
اصريت إله اروح.
_ يلا أخذني.. مو بس زالوا أسم الجد واللقب من النفوس وخلوني مطشرة لازم أعرف منو أهل لـؤي البنية مو مثل الولد البنية مكسورة برجلها وعيالها شحجي وشگول ربي إلك بيها إرادة ربي معجزة منك تنهي هاي المعاناة.
كمت سبحت و بدلت طلعت لگيت إنـتصار.. ملتهية ترزل فرح :
_ والله بعد التراسلتن هاي أم لسان آني تراددني والله لوما الفشلة من أمها وجيجي فقيرة ومن أهل الله.. والله ما تستاهل هيج رجال معذرب وبنية الله يستر منها.
ضجت هاي تحجي على طـيف:
ــ إنـتصار.. شبيها طـيف.. وتمنعين بنتج منها ليش خية افاا عليج.
انحرجت وصار وجهها أحمر وگالت:
ــ لا والله خية بس.. بس علمود المشاكل ورجلچ هبش وبنتج لسانها أكشر ما بينا حيل طلايب وية أبوها..
ضجت وكالعادة الجأ للصمت هي الدنيا دگت طبولها على راسي بقت على هاي الشغلة تافهة نسبة للحال اللي أمر بيه.
هزيت راسي همست:
ــ إي..
وبعد ما ناقشتها باوعت ليـسار:
_ تـعال وياي.
ــ خالة مو يزن متوقع تردين تجين فكال لا تجي ولا تجيبها.
_ أنت هم تخاف ههههه من الطلايب.
بسمرت إنـتصار.. وطلعت هبت نسمة هوة باردة يمكن بديت أتعود على جوهم بس اشتاقيت للثلوج هناك أدفن روحي وسط الثلج أتمشى بالشارع ورغم اختلاف البيوت عن قبل وبنائها الصار حديث بس أكو ذكريات مؤلمة وي كل خطوة.
حسيت الكانولا وجعت إيدي من رفعتها أمرر أصابيعي بشعري تعلمت على الشعر الولادي وهسة طال شعري لتحت الرقبة كاريه أحس بشفايفي متقشرة من آخر وگعة وحلگي يابس طبعاً بيت سـؤدد.. قريب على بيت إنـتصار.. فلمحتني خالتي أم سـؤدد..
صاح علية :
ــ ها يمة شلونج ردت أمرلج اليوم العصر.
ــ خالة على الله.. شنسوي بعد سـؤدد حجتلج؟
جنت مستحية ومدنگة من شعوري بأبوي.. عار ووصمة تلطخت بأسمي فوك ما متلطخ بأفعاله هسة بنسب مفقود وما معروف.
ــ إي والله.. يمة حجتلي شلون شابعج ضيم هالمصخم الما يتسمى ويدك عليج ليل نهار الهمجي حتى متخربطة من تعنيفه الله لا يوفقه عوفيه يمة يولي أنعل أبو البنت التخليني أعيش عيشة مرمرة.
استغربت.. يمكن سـؤود.. ما حاجيتلها بسالفة نسب أبوي بس مو جنها مبالغة وذابة فلك أسود على مـاجد.. و كوله كذب.
باوعت لقطاع بيت جدي بحنين لجدو وبيبي وبنفس الوقت بوجع وألم التعذيب والاجتثاث العشته هناك:
ــ خالة لازم أروح أشوف عمتي.. الله وياج.
ما انطيتها مجال تفتح سالفة وياي ومشيت بساع.. مثل طير مجروح يرد لمكان جراحاته وگفت يم باب ضخم نفس الباب و البناء بس بي إضافات
العواميد الترفع سقيفة الگراج الضخم تحولت لمرمر وكذلك البيت صار بين مرمر وأصباغ باللون الأبيض الناصع ذكرني بألوان البيوت الإسبانية بسفرة مرة رحنالها أنا وصديقاتي الممرضات
وگفت أحاجي البيت بگلبي..
_ ااااااخ يااا دار... شهگت أبجي..
دگيت الجرس.. وانتظرت شگد يا الله طلعلي شاب جميل يذكرني بصورة جنت دوم أشوفها ببيت جدي صورة عمي شاكر..
ــ السلام عليكم.. ممكن أقابل أم يزن.
باوعلي بتشكك :
ــ منو حضرتج؟
ــ بنت أخوها.. مـاجدة.
تحول وجهه للغضب وبعنف دفعني:
ــ إحنا منخلص من نسل الحرامي القاتل أبوكم يلة برااا لا أتصل بالنجدة روحي منا ماكو إلج هنا أي عمة يلة شلون ناس طماعة تريد تبوك ورثنا.
_ بس خلي أفهمك.. عيب تتعامل وياي بهمجية آني أكبر منك بهواي دروح گول لعمتي هانت عليج جدي وبيبي ليش مو وصوج بية مو بيبي گالتلج آني عايشة لو ميتة ماجدة أمانة الله ورسوله البنية انظلمت.
ظل يغلط ويسبني ويشتم بية و يلة روحي شطلعج إلنا مو جنتي مفقودة ومن هذا الحجي شهگت أبكي وأتوسل بس وصلت بيه يتهجم يدفعني وضربني:
_ ولا فلس تاخذين وأمي ما تشوفيها أنتِ مفقودة ميتة رجعي يلة للموت.
بس سيارة شخطت بريك وصوت باب ينسد بعنف وانجر يزن بوكسيات وشمره بالگاع:
ــ تمد إيدك على شي يخصني أكسرها إلك.
يحجي ويلوي إيد يزن لورى وبركبة رجله مثبته وبإيده الثانية جار شعره لفوگ حتى شور ويطك إيده وظهره الصار مشدود.
صرخت:
ــ ماجد.. عوفه خطية والله شاب ما يفهم.
گد العنف اللي شايفته بحياتي ما أتمناها حتى لعدوي باوعلي بحيرة وتركه وگال بحدة:
ــ حسابج بعدين.. يلا للسيارة صوجي ديحتج يم أختج.
تعوذت من الشيطان من لسانه الصاير زفت لا أدب ولا أسلوب عشتو گعدت بالسيارة وهو ساق وگال:
ــ إجيت أشوفج و....
ما كمل ذب حسرة.
_ أقصد أجيت اشوفج...
ظل محتار شيبرر نزلت راسي محتاره بيه مرة احسة بعده مـاجد.. الحبيب ومرة أحسه العدو.
ــ لا شنو أنتِ و أشوفج بيش الكيلو أنتِ بس هاي بنتج تلح شوف ماما ظال فكري يمها عفية روح شوفها لذا اقصد أجيت أشوفج لأن بنتج طلبت اطمنها بس صل مبيج شي هاي أنتِ تخورين بالبيوت شعندج جاية لهنا؟ وهذا الكلب إذا ما ربيته أطلع معتب.
_ تعرفه ليزن..
التفت إلي مستهزأ:
ــ البيت اللي شهد دمارات حياتي وحياة أهلي واختفاء أختي شلون ما اتبعه إي أعرف بيه وبقضيته وي ولد لـؤي اللي خسروها وأعرف شردوا لغير مكان من ايسوا من ورث جدهم وهم أعرف كل بنود القضية هة.. هههه
ضحك ونكت ديلمح يعرف بكولشي يعرف بلؤي دون نسب تدحرجت دمعة مني على خدي دنكت بخجل وعار بس تجرأت سألته :
_ شعجب ما قتلتهم و أخذت ثارك؟
_ خلي اقتل أختهم بالأول عود همه شوفي ثاري وي لـؤي.. مو وي ولده.
(ولا تزر وازرة وزر أخرى)
_ وآني مو حملني خطاياكم.
ــ أنتِ موضوعج مختلف إخوانج ما جانوا سبب باللي صار أنتِ سبب وما يحتاج أعيد وأصقل بإنجازاتج.
دنگت وگلت:
ــ الله على الظالم وإذا آني ظالمة أريد الله هسة يفرفح روحي كون وترتاح مني.
ضغط بريك وتوقف وباوعلي بخزرة راد يحجي بس سكت ورجع يسوق..
ــ گلت تعرف بالقضية اللي خسروها إخواني شعجب مبقي وحدة أبوها مو معروف النسب.
رد بأسلوبه الغثيث والخبيث:
ــ بعد هي ورطة متورط بيج بقت على هاي؟ غلسي.. غلسي.
ــ تعرف بالقضية يعني من الأول تعرف شعجب ما عيرتني و تتشفى بمعاناتي و تشهرني يم أختك و يم بنتي.
_ لأني...
تحسر و نفخ و ظل يحاول يعبر بشي ميبرز ضعف هيج حسيت بيه و رجع كمل:
_ لأني.. ما أعرف لأني شنو..
رجع عصب.:
ــ خلاص بعد مترحين لأحد يلة جيبي علاجج وجوالاتج اليم اختج ترجعين للبيت.
_ بس تعبانه والله.
_ يا تعبانة وتخمين بالبيوت يلة نزلي جيبي أغراضج بساع.
وكف يم بيت إنـتصار. نزلت مقهورة منه ورجع گوتله :
ــ عكب باجر تعال أريد أبقى يم أختي تعبانة.
_ مو جنه نكرب عليج وتعبانة ديلة يلة انتظرج هنا دقيقتين الثالثى افوت اجرج سحل.
نزلت بتوتر ردت اعانده بس هذا صاير ميتفاهم شلي بالطلايب وانـتصار.. تهابه النوب خاف متستقبلني بعد إذا سويت مشكلة هذا يهد عالعالم وآني كل أخوتي تخلوا عني ما بقالي بس إنـتصار.. وما أريد اخسرها
دخلت وهي تباوعلي
_ لحكج إجه ولعب فلك من ما لكاج عاد فرح.. خافت منه گلتله رحتي لعمتج.
_ ما يقبل أبقى لازم أروح.
لملمت العلاج و أغراضي و بوستها وآني أبجي هم راح أرجع لبيته الجان بالنسبة الي مملكتي أول ما تزوجته وهسة صار خنكتي و صرت أختنك هناك تبعتني توصي بيه
ــ ديري بالج على نفسج ولا تنغثين لو تنقهري طز بكولشي..
علت صوتها بالباب تسمع مـاجد.. الي باوعلها بغضب عاد خليت جنطتي بالصندوك ورجعت كعدت بصفه وصلنا للبيت لكيت فضائل.. معصبة راسها وتصيح:
_ ولج طيف راسي كافي هوسة اليوم شجاج الا تعزلين البيت ولج كافي راح يطيح البيت من الغسل وتنظيف.
من شافتني دخلت صاحت:
_ اأيه نظيفة على عمتج مو جايفة على ذيج المرة
خزرها مـاجد:
ــ طلع لسانج خوية شعجب مو ذيج الأيام تتهربين بهداي.. خوية بهداي ساكت بمزاجي أنتظر أكبص وأهجم.
توترت هي وسألته:
ــ ما فهمت؟ شنو يعني تكبص تهجم؟
ــ يعني ولا شي يلة مـاجدة.. صعدي فوك مو تگولين تعبانة طـيف.. بابا أمج رجعت وديري بالج عليها آني طالع بمهمة مستعجلة.
طلع ومرجع عاد لليل اندك جرس الباب البرة باوعت سيارة ماجد واگفه وظلال مرة وياه ردت أركز وأشوف منو هاي بس فتح الباب وهو يگولها:
ــ تفضلي منا فوك سهلة نتفاهم.. أنتظر هذا اللقاء!
صوتهم اقترب وهي تصعد الدرج انفتح الباب وگفت ودمعت عيوني:
_ عمتي ريـمة..
هي تتوسل بمـاجد:
ــ فدوة سيدي الرائد.. يزن أبني عقله مو رزن والله ما أدري بيه مسوي كل هذا بماجدة وآني هم ولا أدري ماجدة ردت للبلد محد نبهني وكالي فدوة تنازل عن التهمة تعدي على ضابط وحرمه قضيتنا جانت ضد ذكول أولاد التركمانية لأن ماجدة.. مفقودة فقبلت نرفع القضية فدوة طلع يزن.. ما يتحمل سجون وتوقيف.
_ أطلعه بس بشرط..
_ شنوو...