الفصل الثالث والعشرون23
بقلم نسمه عبدالله
حكيت المختصر المفيد ل معتمر و كان مصدوم كيف وين و متين ، و حتى طلع متفاجئ في ابوي اكتر مننا و في النهاية ابوي طلع مكذب علينا كلنا ، وصلت البيت اديت امي التلفون و بعد شاكلتو سمح حتن سالتو عن حالو و احوالو ، شرحت ليها انو البت م بت معتمر ، قالت لي ح نعمل شنو في الموضوع دا، قلت ليها معتمر رسل لي عنوان بيتهم و بعدين ان شاءالله ح امشي ليهم ، قالت لي لو طلع كلامه صح حسبي الله ونعم الوكيل فيهم في زول يسوي كدا ، قلت ليها انا العايزة اعرفو لشنو اختارت معتمر بالذات ، سمعت صوت الباب ، عاينت لأمي و قلت ليها ألجأ منوو، قالت لي مية في المية ابوك تلقي اليومين الفاتو بخطط يطلعنا كيف هو و الحربوية رزاز ، قلت ليها امي نحن لازم نطلع من البيت دا لاني حرفيا كدا م مرتاحة ، قالت لي افتحي الباب اول و بعدين بوريك فكرت في شنو ، لبست توبي و مشيت فتحت الباب و فعلا ابوي ، قلت ليه اهلا ابوي ، عاين لي ب ضيق و اتلفت وراه و قال اتفضلو اتفضلو ، فجاءة القى تلاتة رجال و اتنين حريم داخلين البيت ، ياربي ديل منو ، اتقدمت سرعة كلمت امي عشان تلبس توبها لبستو و قعدنا نعاين ليهم و ابوي بوريهم البيت شكله عايز يبيعو ليهم ، عاينت لأمي لقيتها قعدت و أشرت لي اقعد جنبها ، قعدت اتفرج معاها لحد م اخر شي قعدو معانا في الجلسه و بتفقو مع ابوي على السعر ، فجاءة امي قالت لي انتي ي إسراء، قلت ليها نعم ، قالت لي الزول لو عايز يبيع بيت مش مفروض يكون ورق البيت معاهو ، قلت ليها زي كدا ، قالت لي طيب ابوكي دا الورق م معاه قاعد يتفق مع الناس ديل على ياتو اساس ، عاينت للناس و الناس عاينو لينا و عاينو لأبوي، ابوي ابتسم و قال المحامي ح يكون شاهد هو صاحب البيت انو البيت دا بيتي و اكيد ح يكون عندو نسخة من الورق ، امي قالت لي انتي ي إسراء ابوكي البيت دا مشتري ب قروشو ، هزيت راسي بلا بتوتر ، قالت لي شفتي اكيد الزول الاتنازل عن البيت اتنازل غصب نحن نقدر نغريهو و نقول ليهو ينكر مقابل نص البيت دا و الزمن دا الغش كتر الا تتعاملي ب حاجات أصلية م نسخ ، قلت ليها طيب مش هو باسم ابوي ح نبيعه كيف ، قالت لي نستنا ابوكي يموت ولاااا و غمزت لي ب عينها و وقتها الورثة تتقسم ندي الراجل داك حقو و نشيل حقنا ، عاينت لأمي مخلوعة و ابوي انفعل و قال انتو بتخططو تقتلوني ، امي عاينت للزباين و قالت معليش ي جماعة البيت دا فيهو نزاعات اسرية و غير يجيب ليكم مشاكل م بجيب شي و اتمنى تلقو احسن منو ، اتهامسو مع بعضهم و طلعوا ، ابوي ضبط اعصابه و قال ليها انتي قايلة عشان الورق معاك البيت م ح ينباع قايلانا هنود ، قالت ليه والله جرب تبيعو بدون الأوراق الأصلية، قال ليها دي حاجات بتكون مسجلة في مكتب الأراضي هناك ، امي قالت ليه خلاص امشي اثبت انو بيتك و بيعو الماسكك منو ، قال ليها و دا اللي ح اعملو ، رجع قعد، قالت ليه بتعمل فشنو انت ، قال ليها بيتي و قاعد فيه عندك مانع ، قالت لي م عندي ي قولك البيت بيتك ، كلنا قاعدين و حرب نظرات بين امي و ابوي ، امي قالت لي انت ي إسراء، قلت ليها نعم ي امي ، قالت لي عندك رقم عبدالاله قلت ليها اي لشنو ، قالت لي كدي دقي عليه عندي معاه كلمتين ، ابوي قال ليها عندك شنو مع اخوي ، عاينت ليه بهدوء و قالت عايزة افتن بيناتكم اذا دي تعتبر فتنة يعني ، قال ليها قصدك شنو ، قالت ليه ح اكلم اخوك ب خيانتك دي و كيف استنيت يطلق رزاز عشان تعرسها، شكلو ابوي م اتوقع امي تعمل كدا ، قال ليها سوي الدايرة تسوي ، قالت لي إسراء التلفون ، شالتو مني و طلعت خلتني مع ابوي و انا التوتر دا م بقدر اقعد فيه شلت البت و طلعت الجنينة قعدت و كالعادة الجو مغمم و لطيف ، والله بقيت عايشة في صراع نفسي ، مهما الواحد اتظاهر انو مدرك و عارف الحاصل حولينه دا ح يجي يوم و ينتهي بس مشاكل الابهات بتعلم في الروح ، عاينت للبت كانت نايمة بهدوء ، ماشاءالله م عندها غلبة ، اتذكرت امها المحتالة، بياتو قلب رمتها و بياتو قلب كذبت كذبة زي دي و قال انا م بكذب بشرفي اصبري لي بس ، امي جات قعدت جنبي و قالت نحن لازم نخلي البيت دا ، قلت ليها كلمتي عمي ، قالت لي بري مالي مال الفتنة مهما طال الوقت ح يعرف ح يعرف ، قلت ليها امي ، قالت لي نعم ، قلت ليها م نمشي ل ناس رزاز بعدين نخلعهم و نعرف أولادها علينا ، قالت لي تصدقي فكرة ، قلت ليها طيب نضوقهم حبة من العذاب النفسي دا ح افطر و اطلع امشي بيت امها ل مكة لانو كذبتها دي ليها حد ، قالت لي طيب عليك الله لو لقيتي طريقة دقيها السجمانة عملت لينا توتر و ضغط ، ضحكت و قلت ليها توتر لطيف زي مكة مقبول شديد ، قالت لي قومي نخش الجو م حلو ل مكة و اسي تلقي ابوك استغل الفرصة و فتش البيت كلو ، قلت ليها يلا ،فطرت و شلت البت و طلعت ، و انا ماشة اتجاه المواصلات فجاءة الاقي عزام في العربية وقف و عاين لي ب استغراب و قال إسراء!!!، قلت ليه هلا عزام ، قال لي انتي متين طلعتي من المستشفى ، قلت لي انا كويسة م فيني شي ، قال لي و دي منو ، عاينت ل مكة و قلت ليه قصة طويلة و عبيطة ، قال لي ممكن اوصلك ، قلت ليه لا عادي ح اركب مواصلات مشواري قريب ، قال لي لو سمحتي ، قلت مع نفسي يلا إسراء انتي حمل الجرجرة، ركبت و اتحركنا بعد اديتو العنوان و طلع م بعيد زاتو و حكيت جزء من القصة ليهو، قال لي الزولة دي عندها هدف م ساي كدا ، قلت ليه تتبلا على اخوي و تجيب لينا سمعة والله م اخليها ، قال لي انتي بتحبي المصايب ولا المصايب بتحبك ، قلت ليه لا دا لا داك بس ربنا بحبني لانو اذا احب عبدا ابتلاه ، ابتسم وعاين ل مكة و قال كنت قايلكم ماشين التطعيم ، عاينت ل مكة و قلت ذكرتني والله ، قال م حصل وديتيها، قلت ليه انا من وين بعرف بالحاجات دي ، قال لي فعلا ، سكتنا شوية ، قال لي وصلنا و هدا البيت ، قلت ليه واضح انو الطريق صعب ، نزلت و البيت كان كبير شكلهم ناس مرطبين ،و عندهم مناسبة ولا حاجة لانو في ناس و لمة ، شكرت عزام و استعنت بالله و دخلت اتنهدت و انا بقول حياة الناس المرطبين دي مكلفة خلاص ، عاملين ديكور تقيل ، أسأل منو ولا منو ، في نسوان كانو قاعدين في أول صالة قابلتني سألتهم وين اقدر الاقي دلال ، قالت لي وحده مشت الكوافير الليلة حنتها، وااااو و ح تعرس كمان ، قلت ليهم طيب امها اختها اي زول ، وقفت وحدة من النسوان و قالت انا امها ، قلت ليها ممكن دقيقة من وقتك ، جات معاي بكل هداوة، قلت مع نفسي طالما هم ناس راقين زي دا ليه يعملوا عملة شينة زي دي دخلنا وحدة من الاوض ، ختيت البت في السرير و قلت ليها شكلك م عرفتيني، قالت لي لا والله ، قلت ليها انا اخت الولد الجيتو اتهمتو انو البت دي بتو ، و أشرت على مكة ، ملامح وشها اتبدلت و قالت لي و جاية عندك شنو ، قلت ليها الكلام الجاية اقولو م ح اقولو الا لمن تجي بتك ، قالت لي اسمعيني نحن وضحنا ليكم اي شي ، قلت ليها معليش انتو وضحتو القالتو بتك خليني أوضح القالو اخوي اتصلي عليها و خليها تجي هسي ، قالت لي طيب خلي العرس يعدي على خير و نتفاهم بعدها ، قلت ليها انا م جاية اعمل مشاكل لو عايزة المشاكل كنت اتكلمت معاك قدام الناس م هنا ، قالت لي انا ل اسي بتكلم معاك بالذوق ، قلت ليها والله ذوق قدر العملنا مافي نادي بتك لوو سمحتي ، طلعت و عدت ساعة حتن جات ست الحسن دلال و شكلها عكس م اتوقعت ، كنت قايلة ح يجبروها على العرس بس شكلها راضية ، قعدنا في الغرفة و كانت بتعاين لي ب ضيق ، اول م اتقفل الباب قالت لي انا مش قلت ليكم م عندي علاقة بالبت دي تاني ، أشرت ليها ب اصبعي و قلت ليها اسكتي ي كذابة انا من جبيل ماسكة روحي م تخليني اتزهج فيك شوفي ي ام دلال البت دي م بت اخوي و بتك جاية تتبلا علينا ، قالت لي يعني انا جيتكم اكذب في شرفي ، قلت ليها هيي بلا شرف معاك انتي لو تعرفي الشرف م كان جبتي البت دي و م كان جيتي كذبتي كذبة زي دي في اخوي و كأننا م حنعرف الحقيقة، اترددت و قالت ماف حقيقة غير كلامي ، قلت ليها يلا عملنا تحليل و قال م بتو اثبتي العكس كدا ، اتخلعت و بدت تتمتم قالت وينو تحليلك ، قلت ليها انتي وينو تحليلك ي مفترية ، امها قالت لينا اسكتو انتو الاتنين دا كلام شنو ي دلال ، قلت ليها دللتي بتك زيادة من اللزوم يلا ي دلال احكي لأمك الحقيقة، قالت لي قلت ليك بتو ، قلت ليها اتصل على امي اسي تجيب التحليل و تجي لكن م ح تشوفو هنا نشوفو مع النسوان برا و الفضيحة تبقى اتنين ، سكتت و امها بتحدر ليها و شكلو الكذبة اتفضحت خلاص