رواية اختفاء عروسه في شهر العسل الفصل الثالث3والاخيربقلم ياسر عوده
دي كل المعلومات اللى كانت موجوده في المحضر، وواضح من اقوال ام سماح انها ست بسيطه جدا وبعيده كل البعد عن بنتها، بس السؤال دلوقتي ايه اللى حصل لـ سماح في الفتره اللى بين نزولها للقاهره لغايه لما اشتغلت في بيت المهندس احمد، لان الفتره دي مجهوله وانا كنت محتاج اوصلها، يمكن وقتها اوصل لطرف خيط يوصلني بالجريمه التانيه والاولى.
انا طلبت احضار المهندس احمد، واتكلمت معاه عن الطريقه اللى عرفوا بيها سماح، ووقتها قالي انهم بيتعملوا مع مكتب للشغالات وان المكتب ده هو اللى رشحلهم سماح، وطبعا تتبعنا حكايه مكتب الشغلات، ولما وصلنا للمكتب اتكلمنا معاه عن سماح، ومن حسن الحظ لقينا المكتب بيسجل كل بيانات الشغلات اللى بيشغالهم، ومن حسن الحظ ان صاحب المكتب فاكر سماح كويس وقال في اقواله:
-انا فاكر سماح لانها كانت عامله زي العمله البايظه، كل لما ابعتها تشتغل عند حد ماتكملش اسبوع الا وترجع تاني، راحت تشتغل عند 3 شقق قبل ما تروح بيت المهندس احمد ورجعتلي، بس لما راحت عند المهندس احمد طولت بصراحه، وقتها قولت اكيد نحسها اتفك وكل حاجه بقت تمام، بس سمعت بعدها عن موضوع السرقه اللى حصلت في بيت المهندس احمد ومابقتش عارف ايه اللى حصل، الناس ضاع منها الامانه.
-كويس انك فاكر سماح كويس، ممكن تقولي بقى سماح نفسها وصلتلك ازاي؟
-عن طريق واحد اسمه ايهاب.
-ومين ايهاب ده؟
سكت صاحب المكتب وقتها ثواني وبعدها قال:
-ماعرفش عنه حاجه غير ان اسمه ايهاب.
وقتها فهمت انه بيخبي حاجه، اما متورط اما خايف، وفي الحالتين انا استخدمت معاه اسلوب التهديد والترهيب، واللى عملته معاه اني رجعت ضهري ورا على الكرسي اللى انا قاعد عليه وقولتله:
-اسمع انت هنا علشان الشغاله اللى قدمتها لبيت المهندس ماتت وبطريقه بشعه، ومن الاخر كده لو مطلعتش منك بمعلومه صحيحه تعرفني مين اللى عمل كده، انا مش بس هسجنك لا الموضوع هيبقى اكبر من اللى بتتخيله، اولا انا هدمرلك شغلك، هجبلك اذن من النيابه بتشميع المكتب بتاعك بالشمع الاحمر، وحتى لو جبت محامي بعد شهر وشلت الشمع مثلا وشغلت المكتب مش هشيلك من دماغي، هفضل ارازيك يعني مثلا هتلقيني بزورك في المكتب مرتين او ثلاثه في الاسبوع ومعايا قوه كبيره من الشرطه، ونفضل نفتش المكتب بقى وندور على ممنوعات او على تصارح المكتب نفسه، ولو افترضنا انك مثلا نقلت المكتب بردوا هفضل وراك لغايه لما اقعدك في بتكم، ايه رأيك في الكلام ده؟
-وليه يا باشا كل ده، دا حتى قطع الرزق حرام؟
-ومش حرام تخبي معلومه ممكن توصلنا لقاتل قتل بنت غلبانه زي سماح او يوصلنا لناس خطفوا ضيفه في بلادنا، ولا انت عاوز تبين ان احنا مش عارفين نوصل للحقيقه؟
-والله يا باشا انا ماليش دعوه وماعملتش حاجه، بس انا خايف.
-ايوه كده تعلالي دوغري وقولي انك خايف، بس انت هتخاف من مين وانت في ضهرك قسم شرطه بحاله، وبعدين اللى هتقول عليهم هيدخلوا عندنا ومش هيخرجوا تاني، وكمان اسمك مش هيجي في أي اوراق رسميه قدام اللى هتعترف عليه، انا شايف انك تكسب رضانا بدل ما تكسب عدوتنا ولا ايه؟
سكت ثواني يفكر وبعدين قال:
-تمام يا فندم، انا هقول الشخص اللى جبلي سماح واحد اسمه سيد سكينه، والحقيق هدا واحد بلطجي كان لسه خارج من السجن من حوالي سنه وقتها، وجالي وقالي ان في بنت تبعه عاوزه تشتغل وان ظروفها وحشه وانها تبعه، وبصريح العباره كده هو قالي لو ماشغلتهاش يبقى الاحسن اقفل المكتب واروح اشوفلي شغلان هتانيه اكل منها عيش، وطبعا انا خدتها وشغلتها لاني كنت خايف منه ومن المشاكل اللى ممكن يعملهالي، مع اني ماكنتش عاوز اشغل وحده زي سماح تبع بلطجي زي سيد سكينه، انا كل اللى بيشتغلوا معايا اهل ثقه وامانه ولازم اتحرى عنهم، بس سماح ماقدرتش اعمل معاها كده خالص، وكنت مضطر اشغلها وانا ساكت.
-وانا مش عاوز منك اكتر من كده، انت بس عرفني سيد سكينه دا ممكن نلاقيه فين وانت تقدر تمشي وتروح للمكان اللى يعجب.
-شكرا يا فندم.
وفعلا انا سبته يمشي، وبسرعه طلبت من قوه من الشرطه تطلع تجبلي اللى اسمه سيد سكينه دا من تحت الارض، انا قولتلهم لو مر ساعتين ومجاش قدامي كلهم هيتعقبوا، وحصلت حاجه غريبه، لما راحوله لقوه لسه ماشي من المكان اللى كان فيه، واضح كده ان في ناس في المنطقه اللى عايش فيها بلغوه ان الشرطه رايحه لبيته، وخرج سيد من المنطقه وحاول يهرب بس ماكنش يعرف ان فريق الشرطه اللى كان رايح كان عامل حسابه، وكان سايب مجموعه بره المنطقه في كمين مخصوص معمول لـ سيد، اصل الموضوع مافهوش هزار، واحنا عارفين نظام الندورجيه اللى بيقفوا في المناطق وبيبلغوا المجرمين لو الشرطه نزلت المنطقه، وجبولي سيد وبصراحه انا كنت فاخور بالرجاله بتعتي اللى قدرت تجيبه وفي الوقت اللى محدده ليهم، وجه سيد وقعد قدامي، ووشه ماكنش خالي من التشوهات نتيجه الخناقات طبعا، المهم اول لما مسكته وسألته عن سماح انكر معرفته بيها، بس طبعا الكلام دا ماينفعش معايا، واللى زي سيد مش هينفع نتعامل معاه بالذوق، دا واحد متهم بانه اغتصب وحده بشكل وحشي، بس قبل ما نستخدم معاه الاسلوب اللى ينفع معاه، انا كنت محتاج اتأكد انه من ضمن المتهمين بقتلها، وعلشان كده عرضته على الطب الشرعي، وتم مقارنه الحمض النووي بتاعه بالحمض النووي اللى كان موجود في جثه سماح، ومن حسن حظي وسوء حظه انه طلع ايجابي وتطابق، وقتها انا ماستحرمتش اني اتعامل معاه بالمعامله اللى هو يستحقها، والرجاله خدوه وعملوا معاه الواجب لغايه لما قالهم انه خلاص عاوز يعترف بكل حاجه، ووقتها جبوه وقعد قدامي وقدمتله عصير ليمون كمان وسألته:
-احكيلي بقى يا سيد انت تعرف سماح منين، وليه قتلتها وقتلتها ازاي، انا سامعك احكي؟
وابتدي سيد يحكي وقال:
-كنت خارج من السجن من وقت مش كتير حوالي سنه تقريبا، والدنيا معايا كانت بايظه، والظروف خلتني اقابل سماح، كانت لسه جايه من البلد، بنت غلبانه ومالهاش أي تجارب قبل كده، يدوب انا قولتلها كلمتين حلوين وقتها لقتها وقعت فيا، عشمتها بالجواز وخدتها للاوضه بتعتي اللى على السطوح، وعاشت معايا بورقه كتبتها وفهمتها انها بالورقه دي تبقى مراتي، وفضلنا على الحال ده فتره، بس الدنيا كانت مزنقه، والمبلغ اللى كانت جايه بيه من بلدها خلص، وقولتلها اني هجبلها شغلانه هتاكل منها الشهد، وهي وافقتني على طول وودتها وقتها لمكتب واحد انا اعرفه عز المعرفه صحبي ومعرفه سجون قديم، اسمه وليد، وقولتله ان سماح دي تخصني وعاوزه يشوفلها شغلانه عند ناس اغنيا بيدفعوا كويس اوي، وهو طبعا رحب بالفكره بس لقيته بيقولي:
-هي سماح دي ثقه يا سكينه؟
-بقولك يا عم دي تخصني، من الاخر تبقى مراتي.
-تمام اوي، طيب انا عندي فكره هتخرجنا من الفقر اللى احنا عايشين فيه.
-قول وانا سامعك.
-سماح هبعتها لـ اكتر من بيت، والبيت اللى هتروحه تسرقلنا منه اللى تقدر عليه، سلسله او غويشه المهم ان مافيش حد يمسكها متلبسه، ومعظم الناس اللى بتعامل معاهم طيبين، لو مش متأكدين ان هي اللى سرقت الحاجه هيطردوها، ووقتها ترجعلي وابعتها لناس تانيه، ونفضل على كده ونقسم احنا الثلاثه انا وانت وسماح.
الفكره اللى قالها وليد عجبتني اوي، ومن وقتها وسماح كانت الفرخه اللى بتبيض لينا بيضه دهب، والموضوع كان تمام لغايه لما في يوم اشتغلت سماح في بيت مهندس اسمه احمد، وقالت ان مراته عينه دهب كتير في الدولاب بتاعها، ومش بس كده دوول كمان بيعينوا فلوس في الدولاب، وقتها انا ووليد عجبتنا الفكره وطلبنا منها تسرقهم كلهم، بس هي رفضت وكانت خايفه بس احنا طمنها وقولتلها اني هخبيها في مكان مافيش حد هيوصله، وفعلا نفذت اللى طلبناه، وجابت الدهب اللى احنا عاوزينه وخبيت سماح في مكان محدش يعرفه، كنت مستني يعدي وقت وكل حاجه تتنسي، وبعدها ترجع سماح لشغلنتها القديمه.
ــــــــــــــــــــــــــــــــــــــــــ
في اللحظه دي سيد سكت عن الكلام، وقتها انا قولتله:
-كمل يا سيد قتلتها ليه، وكمان عذبتها بالشكل ده؟
-علشان طلعت خاينه يا باشا، تخيل اكتشف من قريب انها بتخوني مع الزفت اللى اسمه وليد.
-واكتشفت دا ازاي؟
-شوفته يا باشا وهو عندها، لقتهم في وضع مش ولا بود، ولما واجهتهم لقيت سماح بترد عليا بكل بجاحه وبتقولي ان انا مش شايفها اكتر من تسليه لمزاجي، واتعصبت عليها وضربتها، وكنت هقتل وليد بس هو قالي ان هي ماتستهلش اننا نموت بعض علشانها، وقالي ان هي السبب وهي اللى غاوته وهددته لو مابقتش معاها هتوقع بيني وبينه.
انا وزنت الكلام لقيت ان وليد انا محتاجه، بس سماح اقدر استبدلها، اصطاد أي بنت هربانه من اهلها واحولها زي سماح، بس وليد صعب استبدله علشان كده عملت نفسي مصدقه، وبصراحه قررنا احنا التنين اننا نخلص من سماح مع بعض، وعلشان كده خدنا عربيه واحد نعرفه اسمه راضي، وبعد ما اعتدينا عليها سوى وشوهناها وضربناها علشان مافيش حد يتعرف عليها وكمان شوهنا بصمتها علشان الموضوع يبقى مستحيل على الشرطه.
انا اتوقفت عند كام معلومه قالها، اول حاجه ان صاحب مكتب الشغلات اللى اسمه وليد مشترك مع سيد سكينه في الجريمه بتعتهم، ومش بس كده هما كمان على علاقه بالسواق راضي ودا السواق اللى كان بيفسح عامر وساره، ومش بس كده اكيد سيد و وليد هما الشخصين اللى هجموا على العربيه اللى فيها عامر وساره، وطبعا سيد ماقلش الكلام ده علشان مايعترفش على جريمه جديده عملها وهي جريمه اختطاف ساره.
وقبل ما اكمل تحقيق معاه انا كنت محتاج اجيب وليد قبل ما يهرب لانه اكيد هيحاول يهرب بعد ما كلمني واعترف على سيد سكينه، وكمان اجيب راضي اللى قدر يخدعني بالتمثليه اللى عملها قدامي.
وبعد كده قعدت تاني مع سيد علشان يكمل اعترافه، بس المرادي يقولنا ايه حكايه ساره وليه خطفوها وكمان هي فين، ولما وجهتله السؤال انكر في البدايه، بس وقتها هددته وقولتله:
-انت هتتكلم يعني هتتكلم، ولو ماتكلمتش دلوقتي هبعتك للرجاله يوضبوك ووقتها هتطلب انهم يسبوك علشان تتكلم، فاختصر على نفسك الالم واختصر عليا الوقت واحكي الحقيقه.
-حاضر يا باشا، الحقيقه اني اعرف راضي من فتره، هو من نفس المنطقه اللى انا منها، وفي يوم لقيته بيكلمني وقالي انه عاوزني في شغلانه حلوه اوي، ولما سألته عن التفاصيل، وقتها قالي:
-في وحده مطلوب مننا نخطفها ونخلص عليها، بس احنا هنخطفها بس ومش هنخلص عليها، اصل طول ما هي عايشه هتبقى زي الفرخه اللى هتبيض لينا بيضه دهب، اللى طلب نخطفها هيدفع 3000 دولار، ودي البدايه بس لاننا بعد كده هنطلب منه زيهم واكتر منهم.
-مين الشخص اللى طلب منه يخطفها؟
-جوزها يا باشا، الراجل اللى كان معاها واسمه عامر.
طبعا اتصدمت لما عرفت الاعتراف ده وسألته؟
-وتعرف عاوز يعمل كده ليه؟
-لا ومايفرقش معانا المهم اننا نخطفها.
-فين الدكتور ساره دلوقتي.
-في الحفظ والصون يا باشا، هقولك على مكانها.
ولما عرفت مكانها طلعت بفريق من الشرطه بنفسي، وروحت المكان ولقتها موجوده وبخير، وقتها انا فرحت بصراحه انها لسه عايشه، وخدتها على القسم وهناك لقيت وليد وراضي مستنيني، ماكنش فارق معايا وجودهم، انا خلاص عرفت اللى حصل، انا كنت عاوز عامر قبل ما يسافر ويهرب بره البلد، لو هرب وقتها هيتحاكم في بلده، انما لو مسكته هنا فهيتحاكم هنا، ودا اللى انا عاوزه.
وفعلا اللى كنت خايف منه كان هيحصل، عامر حاول يهرب بس احنا لحقناه في المطار، وطبعا انا طلبت الحسيني علشان يطمأن على بنته اللى حولتها على المستشفى لما دخلت في حاله اغماء، وقعدت مع عامر وسألته:
-ليه عملت كل ده؟
الحقيقه هو ماحولش ينكر واعترف، تقريبا كان عارف اللى هعمله معاه لو ماعترفش على طول ولقيته قال:
-لما جينا مصر علشان نقضي شهر العسل ماكنش في نيتي حاجه اعملها، بس ساره سمعت مكالمه ماكنتش لازم تسمعها، انا كنت بتفق على ثفقه تهريب، وهي سمعتني والغريبه انها ماوجهتنيش ولا قالت أي حاجه، وقتها فهمت انها ناويه على الغدر، اصل اللى زي ساره دي من بتوع المباديء والشرف والكلام ده، والفقه اللى كنت داخلها كانت باكتر من نص ثروتي، وماكنتش اقدر اخاطر بيها، وكنت لازم اتخلص من ساره واشوف حد يخطفها ويقتلها، وكنا قابلنا راضي وحسيت انه بيحب الفلوس اوي وممكن يعمل أي حاجه علشانها، هو كان مبهور لما شاف 150 دولار، اومال لو شاف 3000 دولار ممكن يعمل ايه.
اتكلمت معاه ووافق على طول، وقالي انه هيستعين باتنين يعرفهم واللى هما وليد وسيد، وفعلا مثلوا انهم خطفونا وسمحتلهم يخدوا كل حاجه ماعدا تليفوني كنت محتاجه وانا اللى قفلته وشلته معايا لان عليه شغلي، ولما ظهرت الجثه اتأكدت انهم نفذوا المطلوب وكنت دافع 1000 دولار ودفعتلهم 2000 دولار لما الجثه ظهرت، بس للاسف ماطلعتش جثه ساره وخدعوني، وعلشان كده كنت بحاول اهرب من البلد.
تم الحكم على الاتنين سيد ووليد بالاعدام ، اما راضي وكمان عامر فكل واحد فيهم اتحكم عليه بالسجن 15 سنه، وبالنسبه للثفقه بتاعت عامر اتمسكت واتحكم عليه في بلده غيابي بالسجن 7 سنين.
كانت قضيه صعبه واسوء ما فيها لما استلمت ام سماح جثه بنتها، كانت صعبانه عليا اوي.
تمت