رواية للقلب وجهة واحدة الفصل الثالث3بقلم يارا ابراهيم
ــ فاحشة ولا وحشة !!!!
خِفة دم المصريين بتنقذهم دايمًا و ربنا ، أنا قولت الكلمتين دول من هِنا وهو وشه إتحول من هِنا ، دخلت بسرعة لا بسرعة إيه أنا كُنت بجري ، قابلتني عنود و والدتها إللي رحبت بيا على الآخر ، السُعودية أهل كرم للأمانة .
ــ بقولك يا عنودة يا قمر إنتِ .
ردت عليّ بِـ المصري و هي ميتة ضحك :
ــ عنودة !!!
ــ شتيمة دي طيبة ! ، و ربنا ما كُنت أعرف ، و بعدين لو شتيمة بتضحكِ عادي !
ــ لا ماهي سبّة .
ــ سبّة ! ، لأ مش تحيريني معاكِ ، يا سعودي يا مصري ، لا شغل الميكس ده لأ .
ــ أوك .
ــ قوليلي بقىٰ كُنتم بترضعوا الطور إللي بره ده إيه و هو صغير !
البت إتصدمت يا حبة عيني ، بس سألتني و هي بتبلع ريقها بِـ توتر :
ــ طور مين !
ــ إللي كان واقف معاكِ .
هِنا خبطت على رأسها :
ــ قصدك أويس أخويا !
ــ آه تقريبًا ، شكله يُوحي بإنه ظابط ماعرفش ليه ، ألا قوليلي هو بيشتغل ؟
ردت بِـ كل السماجة إللي في الدُنيا :
ــ ظابط .
ــ هههههه حلوة بس مش وقته نُكت ، قوليلي بِـ صحيح بيشتغل إيه .
ــ و ربنا ظابط .
هو أنا لو قولت للمرة إللي مش عارفة عددها لحد دلوقتي مني للّٰه أكون غلطانة! ، طب مني للّٰه .
ــ طب وهو إيه نظامه مع المصريين ، لا قصدي مع المصريات ، لإنه بجد شكله مش بيطيقهم أبدًا .
ردت عليا بسرعة وهي محروجة:
ــ لا لا مش بيطيقكم ليه بس ! ، هو بس ليه ذكرىٰ مش كويسة مع واحدة مِنهم و من وقتها أخد فِكرة وحشة عنكم .
ــ آه عُقدة يعني!
ــ لا مش عُقدة ولا حاجة ، بقولك إيه تاكلي ؟
قالت كِدة وهي بتتهرب من السؤال كُنت حاسة ، لأ مُتأكدة إن فيه حاجة و لكن ماجبتش أكون فضولية لإن الفضول وحِش ، و عن أبي هريرة رضي اللّٰه عنه أن رسول الله صلَّ اللّٰه عليه وسلم قال: «مِنْ حُسْنِ إِسْلَامِ الْمَرْءِ تَرْكُهُ مَا لَا يَعْنِيهِ» .
ــ عندكم كُشري ؟
ــ كُشري !
ــ أيوة ! ، إوعي تقوليلي إنكم مش بتاكلوا كُشري .
ــ طب يا ستِ إحنا فعلًا مش بناكل كُشري .
ــ عايشين إزاي !
ــ عادي يعني ، بُصي هجبلك كبسة أنا غلطانة إني سألتك .
ــ حبيبي تسلم.
قالتها بِـ نبرة مرِحه ، ضحكت عنود وهي بتخبط كف بِـ كف .
بعد شوية رجعت عنود و كلوا سوا ، و بعد ما خلصوا قالت وتين :
ــ بقولك يا عنود الجو هوا دلوقتي ، و السما صافية و القمر في حالة إكتماله ، و أنا نُقطة ضعفي الأجواء دي ، تيجي نتمشى ؟
ــ يلا .
"ــــــــــــــــــــــــــ"
ــ للدرجة دي يا وتين بتحبي السما !
قالت عنود وهي ملاحظة شرود وتين ، فقالت بعد ما تنهدت بهدوء:
ــ السما دي حلوة في كُل حالاتها ، وقت الشروق و الغروب و هي مِغيمة أو وهي صافية زي دلوقتي .
ــ برده مش جاوبتيني !
ــ قوليلي هل إنتِ بتحبي السما في كل حالاتها دي ؟
هزت عنود رأسها بِـ لأ ، فقالت وتين بنفس النبرة الدافية:
ــ أنا بقىٰ بحبها في كُل حالاتها ، و دي نفس الطريقة إللي بتمنىٰ في يوم أتحب بيها .
ــ بس إنتِ وايد تتحبي !
قالتها عنود بتلقائية مما خلاها إتكلمت سعودي ، بصتلها وتين بإبتسامة هادية و قالت :
ــ ده إللي إكتشفته مِتأخر ، بس مِتأخر قوي .
ــ فيه حِكمة مشهورة بتقول ، أن تأتي مُتأخرًا خيرًا من أن لا تأتي !
إبتسمت وتين وهي مازلت ساكتة ، لحد ما لمحت إسطبل خيول فَـ لفت بُسرعة وهي بتقول بِـ حماس طفولي :
ــ عنود! ، هو الإسطبل ده بتاعكم ؟
ــ أيوة فيه إيه!
ــ طب ، طب مُمكن أركب ؟
ــ أيوة أكيد بس خليها لما تطلع الشمس.
ــ لا لا دلوقتي باللّٰه يلا .
وافقت عنود بعد ما شافت فرحة وتين ، وصلوا الإسطبل و وقفت وتين وهي بتبُص للخيول بِـ فرحة و عيون بتلمع فقالت عنود :
ــ إختاري أي واحد يعجبك .
إتقدمت وتين و فضلت تتمشى وهي بتبص على الخيول لحد ما وقفت قدام واحد جذب إنتباها ، "كان خيل سعودي أصيل ، واقف وقفة فيها هيبة وكبرياء ، جسمه قوي ومشدود ، ورقبته مرفوعة ، وعينيه واسعين يبان فيهم الحِدة الذكاء ، و عرفه الأسود بيزيده فخامة ، لِمعت عينيها بفرح وهي بتقول :
ــ ده ، هختار ده .
لفت عنود إللي كانت بتتكلم في الموبايل و بعد ما شافت وتين إختارت إيه قالت بسرعة و رفض :
ــ لأ ، ده بالذات لأ ، إختاري أي واحد غيره .
ــ بس أنا عايزة ده ، ده حلو قوي يا عنود يلا باللّٰه .
قالت كِدة وتين بِـ رجاء فَـ وافقت عنود علشان مش تزعلها لكن قالت بِـ قلق :
ــ بس مش كتير و براحة يا وتين علشان ده مش مُسالم و متعود على صاحبه بس ، إركبي لحد ما أجيب البنات علشان هنسهر سوا و أعرفك عليهم .
هزت وتين رأسها بالمُوافقة ، ركبت بالفعل الخيل وهي بتتحرك بفرح بدأت في الأول براحة لكن بعد كدة زاد حماسها و بدأت تشد من لِجام الخيل و هي بتجري بيه ، في الأول كان الخيل ماشي تمام ، لكن بعد شوية لمحت وتين حد من بعيد بيجري عليها وهو بيزعق ، وهي مش فاهمة منه حاجة و في أثناء تشتت ذهنها ، بدأ الخيل يرميها بِـ عُنف من على ضهره ، لحد ما وقعت وتين وهي بتصرخ ، لقت وتين حد بيقرب علشان يساعدها ، و لكن للأسف مش شافت ملامحه بسبب سواد الليل و الغبار إللي على عينيها لكنها صرخت بصوت عالي:
ــ ماتلمسنيش ، ماتلمسنيش !