رواية كيف تصطادين عريسا الفصل السابع7والاخير بقلم مريم سمير
قفلت معاه وبصتلنا : خلاص هما مش تحت
ليلي : الحمد لله
سماح : طالعين
مريم : أفندم؟؟؟
سماح : هما الأربعة طالعين علي السلم
بصينا احنا الاربعة لبعض
انجي : طب والعمل يمريم؟
مريم : حبايب قلبي اقعدوا معاهم واعرفوا عاوزين ايه
ليلي : يعني هتقعدي مع احمد ؟
مريم : أنا مروحة بيتنا يلا في رعاية الله
سلمي : مريم انتي بتهزري؟
مريم : لاء والله فعلاً ماشية
انجي : بس انا مش عاوزة أقابله
ليلي : ولا أنا كمان
سلمي : أنا مستحيل أخرج أتكلم مع البني آدم دا
الباب خبط ف وقفنا وراه
سمير : افتحي يا ليلي أنا محتاج أتكلم معاكي
معاذ : انجي لو سمحتي احنا لازم نتفاهم
أحمد : والله يمريم منا ماشي النهارده غير لما تقفي وتسمعيني
يوسف : يا سلمي أنا جايب كرسي ولو مفتحتيش هفرش هنا أنا والرجالة
سماح : أنا شايفة أن الفيلم الهندي دا لازم يخلص
كلنا بصينا ل ليلي : متخافوش مستحيل ماما تفتح وتبيعني
سماح فتحت ف برقنا
سمير : حماتي حبيبتي عاملة ايه
سماح : عامل ايه يحبيبي؟ واكل ولا أجيبلك أكل دا انت جاي من سفر يسمير
ليلي : ماما!!
سماح : اه صح ، مزعل ليلي ليه يسمير هي دي الأمانة؟
سمير : والله سوء تفاهم وهصلحه حالا
معاذ بص ل انجي : انجي أنا عاوز اتكلم معاكي
انجي : ايه خلصت الشغل وجيت ؟
معاذ : أنا بحاول أكلمك كل شوية وانتي مبترديش!
انجي : اصل انا كمان مشغولة زي ما انت دايما مشغول
يوسف: سلمي انتي لازم تفهمي الي حصل
سلمي : هو انت ايه الي جابك هنا يا يوسف؟ احنا مفيش بينا حاجة اصلا نتكلم فيها
مريم : طيب ، أنا لازم امشي عشان اتأخرت.. مع السلامة يبنات ابقوا طمنوني عليكم
بصولي واتجمعوا حواليا وبدأوا يهمسوا
انجي : انتي مقولتلناش المفروض نعمل ايه؟
مريم: هو انتوا مش شايفين الي واقف وسطهم وعاوزني وبهرب منه حالا؟؟
ليلي : طب ما تسمعيه يا مريم
بصيتلها بطرف عيني ف قالت : أو الي تشوفيه يعني انتي ادري
مريم : طب أنا ماشية علي تليفونات بقي
سلمي : انتي هتسبينا معاهم؟؟
مريم : والله أنا محتاجة الي يوصلني ، ابعدوا بقي
أحمد : مريم مش هتعملي زي كل مرة ، انتي لازم تسمعيني
مريم : سلام يخالتو ، هبقي اجي تاني
نزلت علي السلم ف نزل ورايا ، وصلت تحت ف لقيته وقف قدامي
_ مش هتمشي ، انتي لازم تعرفي الحقيقة
= أنا ميهمنيش اعرف حاجة ، دي حياتك وانت حر فيها انا مالي؟
_ انتي مالك؟ ، أنا بحبك يمريم! ازاي انتي مالك؟
= والله؟؟ باين اوي انك بتحبني ، خليني أخمن ، هتقولي انها كانت للتسلية لكن انت عاوز تتجوزني أنا واني غيرهم مش كده؟ بس انت نسيت اني عارفة كل الاسطوانات الي ممكن تفكر تقولهالي ، أنا كنت فاكرة اني خلاص مش هخاف تاني
_ وانا كنت بعمل كل الي عليا عشان محسسكيش انك ممكن تخافي مني!
= وطلعت كداب ، وواقف قدامي دلوقتي وبتكدب تاني
_ انتي الي مبتسمعيش
= لاء أنا سمعت كويس الهانم الي نازلة عشانك مصر
طلع الفون واتصل بيها _ أيوة يا ملك ، ازيك ؟
° الحمد لله، انت بجد الي مكلمني! أنا مش مصدقة
_ اسمعيني يا ملك ارجوكٍ ، أنا حياتي متدمرة من وقت مكلمتك ليا وبخسر الإنسانة الوحيدة الي حبيتها ، لو ليا عندك معزة فعلاً قولي الحقيقة ، أنا وانتي بنحب بعض؟ أنا وانتي كان بينا أي علاقة واحنا برا مصر ؟
سكتت ف بصيتله = شوفت! انت كمان مش متفق معاها تقولي حاجة محصلتش
° هو.. مبيحبنيش ، لما روحت امريكا مكنش ليا أي حد هنا ف افتكرت أن حياتي كلها هتبقي مقتصرة علي الشغل واني مينفعش اعرف ناس حواليا عشان مش شبهي والكل بتعامل أنه اعلي وأحسن وانتي بتتبعي الأوامر وبس ، لكن ما قابلت احمد في الشغل لما جه جديد ، لقيته طيب اوي وبيساعد الكل وغير فكرة معظم الي في المكتب عن العنصرية الي كانوا بيتعاملوا بيها ف غصب عني اتشدتله
عيطت وكملت ° لما لقيتني أنا بس الي بحاول اعترفتله اني معجبة بيه لكن ساعتها قالي مبيفكرش أبدا في الجواز بس انا كنت عارفة إن فيه واحدة تانية عاوزها ، يمكن مفهمتش إن مينفعش اطارد شخص هو مش عاوزني؟ ، أنا آسفة اني كنت سبب سوء تفاهم منكم أنا مكنش قصدي
_ أنا آسف يملك مكنتش عاوز ابقي سبب في زعلك
° مفيش حاجة أنا هبقي كويسة ، ربنا يسعدكم يا احمد ، وخليك فاكر تعزمني
ضحك _ عمري ما أنسي
قفل معاها وبصلي وربع أيده _سمعتي الي حصل؟؟
=..
_ لو كنت عاوز الجواز بس ، كان قدامي اربع بنات ممكن اختار منهم المناسبة زي ما كنتي بتقولي ، بس انا مكنتش عاوز اتجوز غيرك
= أنا..
_ انتي لازم تقعدي مع نفسك وتفكري انتي عاوزة ايه وتقوليلي عشان أنا عملت كل حاجة تثبتلك اني عاوزك بس انتي ولا مرة اديتي فرصة
سابني ومشي! ، فضلت واقفة مكاني بحاول استوعب الي حصل ، معاه حق لازم اعرف أنا عاوزة ايه عشان احنا الاتنين نرتاح .
فوق في بيت العيلة ، ليلي وسمير كانوا في أول البلكونة ، سلمي ويوسف في اخر البلكونة ، انجي ومعاذ قاعدين في الصالون
عند ليلي وسمير
سمير _ هنفضل ساكتين ؟
ليلي = ما أنا لو اتكلمت هعاتبك ولو عاتبتك هتقفل الموضوع يسمير ف خلينا ساكتين احسن
_ أنا بعمل كده عشان مخسركيش
= بس انت كده بتخسرني! ، لو كنت سيبتنا مرة واحدة نتخانق علي حاجة حصلت مكناش وصلنا ل هنا!
سكت وبص في الأرض وبعد كده بصلي
_ وانا صغير كانت أي مشكلة تحصل بين امي وابويا تخلص ب خناقة كبيرة ممكن متتحلش لأيام أو أسابيع وممكن شهور ، عرفت ان أي خناق بيكون النهاية، ف كنت خايف يحصل كده معانا ف قولت اسلم حل لأي خناق بينا اني أنهيه حتي من قبل ما يبدأ
=..
_ انتي عمرك سألتي نفسك ايه السبب الي خلاني احبك؟ ، عشان بشوف فيكي امي بالظبط ، نفس طيبتها وطبعها وحنيتها الي بتكفينا كلنا ، بس انا مكنتش عاوز تبقي زيها لما تحصل مشكلة بينها وبين ابويا ، مش عاوز اخسرك أنا ما صدقت نبقي سوا
مسحت عياطي وبصيتله = بس انا مش هعمل معاك كده! ، لو فهمتني كنت فهمت اننا لما نختلف أو نتخانق دا بيخلينا نفهم بعض اكتر ونعرف ايه الي يضايق التاني عشان كل واحد فينا ميعملوش ، العتاب مش معناه خناق يسمير أنا لو مش عوزاك مكنتش عاتبتك ، لو بطلت اعاتبك اعرف ساعتها هي دي النهاية
_ متزعليش مني يا ليلي ، انا هدي أي اختلاف بينا وقته بس متبعديش عني ،اليومين الي فاتوا وانا بحاول أكلمك دايما وانتي مبترديش حسيت انك بدل ما تبدأي تحبيني بتبعدي ومش عاوزة تكملي معايا
= لو مكنتش عملت كده مكنتش هتبقي قدامي دلوقتي وبتصالحني
_ أنا بحبك اوي يا ليلي والله ، حقك عليا
سماح : يعني متأكد انك شبعان يبني؟
سمير : هو دا وقته يخالتي؟ أرميلكم نفسي من البلكونة يجدعان ؟
_ معاذ وانجي _
معاذ : أنا..
انجي : دي رابع مرة تقول أنا وتسكت
_ مش عارف أرتب كلام
= ما دي المشكلة ، لازم عندك تكون مرتب كلام عشان تتكلم ، لازم تبقي موجود في أي ديل عشان شغلك ، لازم تيجي علي وقتنا عشان ميتينج في الشركة ، لحد ما بقيت حاسة اني مخطوبة لواحد مبيحسش ب حاجة غير أنه يثبت للكل أنه بيعرف يعمل كل حاجة بس انا كنت عاوزة تثبتلي أنك ممكن تفضلني علي شغلك يا معاذ ، مش ابقي رقم اتنين
_ ابويا الله يرحمه مات قبل ما يشوفني بنجح في أي حاجة ، مشي قبل ما يعرف اني خلاص بقيت مهندس ويبقي فخور بيا ، حطيت الشغل رقم واحد في حياتي ونسيت ان فيه حاجة اهم منه بكتير لو ضاعت مني هفضل ندمان ومش هعرف أعوضها ب حاجة تانية حد لو بقيت انجح راجل في الدنيا، الحاجة دي هي أنتي يا انجي ، انتي في وقت بسيط خلتيني أغير من نفسي عشان لقيت قدامي بنت مفيش منها ، طيبة وجدعة ورقيقة وبتسمعني وعاوزة تحسسني دايما اني مش لوحدي ، أنا كنت فاكر اني لما اشتغل اكتر هعرف أجيبلك كل الي نفسك فيه
= أنا مكنتش عاوزة حاجة
_ عارف بس انا عاوز اجيبلك كل حاجة ، أنا عارف اني غلطان ، ومن هنا ورايح مفيش اهم منك انتي، الشغل ممكن يروح ويجي زيه لكن انتي لو روحتي أنا مش هعرف أجيب زيك تاني ، حقك عليا
مد أيده في جيبه وطلع منديل _ انتي متعرفيش إن العياط بيطلع هالات سودا؟
سحبت منه المنديل ومسحت وشي بسرعة = متهزرش
ضحك _ بقي أنا كنت سايب الحلاوة دي كلها عشان أرقام ومباني ؟
= قول لنفسك
_ وحشتيني و..
مرفت : أنت تشرب حاجة بقي يحبيبي بقالك مدة ومعملناش الواجب
معاذ : جري أيه يحماتي؟ دا انتوا متفقين علينا بقي!!
_ سلمي ويوسف _
يوسف : مبترديش عليا لما بتصل بيكي ليه؟
سلمي : عادي
_ عادي ولا زعلتي لما شوفتي حلا وسمعتي كلامها؟
= وانا ازعل من ايه؟؟ ، ربنا يخليكم لبعض
_ متأكدة انك مش زعلانة ؟
=..
_ هتفضلي جبروت والله أنا عارف ، علي العموم
بص علي باب البلكونة _ ادخلي يا آخرة صبري
حلا : سيبني يا يوسف شوية ، طنط دخلتني اساعدها في الحلويات
يوسف : ادخلي يساقطة صلحي الي عملتيه بدل ما أطلعلك
دخلت ف بصيتلها ب استغراب
حلا ° هاي
يوسف _ هو دا وقت هاي ؟
° اه صح ، ازيك يا سلمي اخبارك ايه؟
ضرب كف ب كف _ يا حلا الله يصلح حالك أختصري
° اعزمها علي فرحنا يعني ؟
برقت ف بصلي ورجع بصلها _ صلي علي النبي؟
° عليه الصلاه والسلام
_ والله دي ما بتاعت هزار دي ممكن تعدمنا العافية واحنا واقفين ب دمك السم دا ف اخلصي وقولي الحقيقة
° يوسف زي اخويا الحمد لله ، اتجوز ايه بس اعوذ بالله
_ حبيبتي يا حلا
° دا كان الله في عونك
_ أيوة كده أكديلها
° دا يوم ما باباه كان عاوز يخطبنا لبعض هرب ، بالأمانة مين فينا المفروض يهرب؟
_ خلاص يا حلا اطلعي برا هفهمها أنا
° قعد اسبوع عند خاله ومقاطعنا عشان باباه وبابايا فكروا أننا ممكن نبقي لبعض
_ بصي متدخلناش في تفاصيل دلوقتي ، روحي شوفي كنتي بتعملي ايه
طلعت ف رجع بصلي
_ سمعتي؟ أنا وحلا اخوات بس ومينفعش نبقي أي حاجة تاني ، بغض النظر عن هزارها التقيل.. هي شافتنا قاعدين ف قالت تخلي فيه شوية ساسبينس ، الجاحدة القادرة
ضحكت = لذيذة اوي بنت عمك
_ الي يشوفك دلوقتي ميشوفكيش وانتي زعلانة من شوية
= أنا؟؟ وأزعل ليه؟
_ عاوزة تفهميني انك مكنتيش زعلانة خالص لما عرفتي اني ممكن أخطب؟
=..
_ سلمي أنا من اول مرة شوفتك فيها وانا..
حلا : يوسف عاوز الكيكة بالشوكولاتة ولا فانيليا ؟
_ يعني ارقع بالصوت حتي هنا يجدعان ؟ ، ولما اقولهم اني معرفكيش ونصابة واتلموا إدوكي علقة موت ؟
° هو انا جيت في لحظة الاعتراف؟
_ وثانية كمان وهتبقي لحظة استشهادك ، برا
طلعت بسرعة ف رجع بصلي
_ كنت بقول يعني.. اني لما شوفتك في السوق اول مرة معرفتش أنساكي وساعتها دعيت اني اشوفك تاني
= ليه؟
_ سلمي أنا معجب بيكي ، ترضي يبنت الحلال ب محاسب عنده شقة تلت اوض؟
= يادي التلت أوض ، بص يعني.. هفكر
ماما : اتفضل يبني كل بالهنا والشفا
_ حبيبتي يا طنط تسلمي
ماما : مجبتش الحجة معاك ليه؟
_ نعم؟
ماما : اصل حلا قالتلي جوا انك..
بص علي حلا وضيق عينه
حلا : هي الي جرجرتني وانا بضرب المكونات في الخلاط
يوسف : دا انا هضرب فيكي لحد ما يبانلك صاحب
سلمي : ماما دا كانجاي يصلح سوء تفاهم و..
ماما : مش جاي يتقدملك؟
سلمي : لاء مهو..
يوسف : أيوة ، جاي اتقدم
سلمي : يوسف!!!!
يوسف : سكتي انتي مبتجيش الا ب كده ، يا ريت لو تحدديلنا ميعاد مع الحاج يطنط عشان اجيب اهلي إن شاء الله
شهد : كده اتصالحتم كلكم الحمد لله ؟
سمير : اه الحمد لله جت سليمة
شهد : ربنا ما يجيب مشاكل تاني
دخلت نمت عشان كان عندي شغل في الشركة الصبح ، صحيت الصبح وروحت الشركة ، خبطت علي مكتب عبدالله ودخلت قعدت مع باقي الموظفين
عبدالله _ الصفقة جاهزة ؟
° أيوة يا فندم ، العميل مستني التوقيع
_ تمام ، ابعتوله النسخة النهائية
راجعت الملف للمرة الأخيرة ف بصيتله
= استني ، رقم الحساب البنكي في العقد مش بتاعنا
_ لاء هو صح ، أنا الي مراجع الورق كله بنفسي
= حضرتك بص كويس.. اخر أربع ارقام نفسهم بس مترتبين غلط!
_ شهد ، بلاش كل شوية تعملي انك الوحيدة الي بتكتشفي الأخطاء هنا!
= بس دا شغلي! أنا عوزاك بس تبص ثانية تانية علي العقد و..
_ قولتلك صح ومحدش هيراجع ورايا
= خلاص انت حر اعمل الي يريحك
_ ابعتوا العقد زي ما هو واطلبوا منهم يبعتوا دفعة علي الحساب
° تمام يا فندم
بعد نص ساعة كنا كلنا تحت وبنتابع الشغل
° الشركة رفضت تحول الدفعة المقدمة يفندم
_ ليه؟
° رقم الحساب غلط ف طالبين من حضرتك تأكد الرقم عشان يحولوا الفلوس عليه
مسك العقد تاني بسرعة وبص علي الرقم
_ مين الي كتب رقم الحساب؟
رد عماد ب توتر : أنا يا فندم ، بس حضرتك.. راجعته ووقعت
_ انت ازاي تغلط غلطة زي دي؟
عماد : حضرتك الي..
_ ابعتوا الرقم صح للشركة ، وانت من بكرة متجيش الشركة
شهد = أفندم؟؟؟ حضرتك بتعمل ايه؟
_ الي غلط لازم يتعاقب
= بس مش هو الي غلطان!
_ شهد.. متدخليش
زعقت = أنا قولتلك قبل ما العقد يتبعت إن فيه غلط ومع ذلك أصريت يتبعت ومنعت أي حد يراجع وراك ، دلوقتي بدل ما تعترف انك غلطان بترمي الغلط علي موظف مرتبه مكفي بيته بالعافية؟ أنا بجد مش مصدقاك
_..
= الذكي الي فاكر نفسه دايما اذكي من الكل بيبقي اغبي واحد
_ نعم؟؟؟
= انت اناني ومغرور ومحدش هيطيق حتي يعيش معاك
وهتفضل تخسر كل الي حواليك لحد ما تلاقي نفسك بقيت لوحدك
_..
= أنا كنت فاكرة انك ممكن تتغير ، بس واحد مولود في بوقه معلقة دهب وشايف الكل أقل منه هتوقع منه ايه؟ ، أنا حاولت اساعدك كتير بس انت غرورك في كل مرة بيعميك تصدق انك ممكن تبقي غلط ، أنا خلاص معتش عاوزة اشتغل هنا ، اعتبرني قدمتلك ورق استقالتي وقبلتها
خرجت من الشركة ف وقفني عم صالح
° استني يبنتي ، متخليش لحظة غضب تهدم كل الي بتعمليه
= مفيش فايدة فيه ، زي ما ظلم عماد النهارده ممكن يظلمني بكرة لمجرد أنه يبان مثالي ومبيغلطش ، أنا لازم امشي ، اشوف وشك علي خير
مشيت ورجعت بيتنا ، كنت فاكرة أنه ممكن يبقي شخص تاني! كنت فاكرة أنه من جواه شخص كويس بس طلع زي ما الكل قالي وانا الي مكنتش بصدق .
_في الشركة_
عبدالله قاعد في مكتبه ساكت، قطع الصمت خبط علي الباب ادخل
عماد ° حضرتك طلبتني؟
عبدالله _ أيوة ، تعالي يا عماد
° أنا عارف اني غلطت بس والله مكنش قصدي ، أنا سهرت علي الصفقة دي يومين ومنمتش ف يمكن عشان كده حصلت لغبطة في الأرقام
_ بس انت مش غلطان، أنا الي غلطان اني رفضت اني اراجع الاوراق تاني
°..
_ انت هتكمل شغلك هنا عشان أنا الي غلطت مش انت
° العفو يفندم
_ لاء أنا محتاجك تسامحيني عشان أنا كنت هظلمك وانا عارف ان ملكش ذنب ، دي مكافأة بسيطة علي شغلك يعماد
° أنا متشكر ، متشكر جدا يفندم ، بعد اذنك
خرج من المكتب ودخل وراه مختار
مختار : هي شهد استقالت؟؟
_ أيوة مشيت ، بسببي
° او يمكن بسببي ، أنا الي علمتك إن المدير مينفعش يغلط وان الاعتراف بالغلط ضعف ، كنت فاكر اني بربيك انك تبقي راجل مفيش قده بس أتاريني ربيت فيك الغرور وأن محدش يقدر يناقشك في أي حاجة ، الغلط عندي انا من الأول
_ حتي انت مجتش تقولي غير دلوقتي، شهد من اول يوم وهي بتقولهالي ، مخافتش ولا خبت زي كل الي في الشركة ، لما لقتني هظلم حد قالت كلام كأنه قلم فوقني من الي انا فيه ، مكنش ينفع في كل مرة تيجي تساعدني فيها ارفض حتي أبص أو اسمع
° أنا هكلم باباها انها ترجع الشغل تاني
خرج مختار وكلم أبو شهد وحكاله الي حصل
مختار : احنا محتاجينها في الشركة ، بنتك عندها ضمير وشغلها مظبوط ف ياريت تقنعها ترجع
° حاضر يمختار ، هحاول معاها وابقي أرد عليك
قفل معاه ونادي علي شهد
° هو انتي فعلاً سيبتي الشغل؟
= أيوة يا بابا
° مختار بيكلمني وزعلان جدا انك مش هتروحي الشركة تاني
= هلاقي شغل في مكان تاني اكيد إن شاء الله
° بس هما عاوزينك ترجعي تاني
= مش هينفع ارجع المكان دا تاني ، معلش يبابا سيبني علي راحتي
° وانا الي يهمني تبقي مرتاحة يحبيبتي ، قالي كلام عنك حسيت اني مخلف بنت مفيش منها وقلبها من دهب ، انك مسكتيش عن ظلم بني ادم قدامك ومتخافيش تخسري شغلك دا مخليني فخور إن عندي بنت زيك
حضنته = ربنا يخليك ليا يحبيبي
مر يوم ، اتنين ، تلاتة ، دخلت موظفة جديدة للمكتب عبدالله _ أيوة؟؟
° أنا الي جاية جديد هنا يفندم
_ أنا هروح اعمل حاجة وراجع ، ممكن تقعدي مع السكرتيرة هي هتفهمك الشغل
راح ل باباه علي المكتب _ هي شهد مش هترجع؟
° للاسف رفضت انها ترجع
_ بس انا عاوز شهد مش واحدة تيجي مكانها
° عاوز شهد الموظفة؟
_ لاء.. عاوز شهد
° يبقي تروحلها البيت وتقولها الكلام دا بنفسك
_ هتوافق ترجع؟
° لو اعتذرت اظن انها ممكن تفكر في الموضوع
_ أنا رايح حالا
الباب خبطت ف ليلي فتحت
ليلي : أيوة؟؟
عبدالله : لو سمحتي كنت محتاج آنسة شهد
ليلي : اه ، ثواني هقولها
ليلي دخلت الاوضة بسرعة ف البنات بصولها ب استغراب
انجي : فيه ايه يا ليلي؟
ليلي : غمزت شاب طول بعرض برا ها
سلمي : مين دا ؟
ليلي : بتهيقلي لمحته قبل كده في خطوبتي ، بس معاه بوكيه ورد يجنن
انجي : ما يمكن متلغبط في العنوان ورايح يخطب؟
ليلي : لاء مهو طالب شهد
سلمي ؛ طالب شهد للجواز؟؟؟؟؟
ليلي : يعني منقاطعش بقي
ضحكت وانا ببصلهم : خلصتوا ؟ مين دا بقي الي عاوزني؟
ليلي : مستني علي الباب ، اخرجي شوفي عاوز ايه
خرجت من الاوضة وبصيت علي الباب واتخشبت مكاني
_ عبدالله!!!
ليلي : اتفضل ادخل ، تحب تشرب ايه؟
عبدالله : لو شاي يبقي تسلم ايدك
ليلي دخلت المطبخ ف وقفت قدامه
_ فيه حاجة ؟؟
= أنا جاي عشان اتكلم معاكي وعاوزك تسمعيني
_ وانت من أمتي سمعت حد؟
= أنا آسف يا شهد
_..
= أنا غلطان وبكابر وكنت شايف اني مبغلطش فعلاً، بس من وقت ما جيتي وانا براجع نفسي ، اخر مرة قولتيلي فيها كلام حسيت إن مفيش حد ممكن يقوله غيرك عشان محدش جه الشركة زيك ، لما مشيتي حسيت ان الدنيا كلها مشيت ، أنا مش عاوزك.. تمشي يشهد ، عاوزك ترجعي الشغل وتقوليلي اني غلطان لما اغلط عشان محدش هيعمل كده لو مكنتيش موجودة
عيطت ، كنت مبسوطة اني بسمع منه الكلام دا ، مين يصدق إن دا عبدالله الي محدش يعرف يقول قدامه ولو حتي كلمة واحدة ؟ واقف قدامي بيعتذر وشايف نفسه لأول مرة غلطان .
= شهد أنا آسف، حقك عليا
سكتت وانا بصاله ، قدملي الورد ف اتوترت
ليلي : خديه، خديه الراجل بقاله خمس دقايق مادد أيده
بصيت علي بنات خالتي والي كانوا واقفين قدام باب الاوضة ، خدت منه الورد _ حلو اوي ، شكراً ، بس لو رجعت الشغل توعدني انك هتفضل كده ومتتغيرش تاني؟
= اوعدك ، هترجعي؟
_ هرجع
بابا جه وسلم عليه ° منور يبني ، اتفضل ، ايه كنت جاي لشهد عشان ترجع الشغل؟
= والحمد لله وافقت ، أنا همشي عشان سايب شغل كتير في الشركة ، اشوفك بكرة
مشي وانا لسه باصة نحيته، بنات خالتي اتجمعوا حواليا وانجي حركت أيدها قدامي
انجي : ايه ؟؟؟ خلاص مشي!
شهد : ها؟
ليلي : شكل الصنارة غمزت
شهد: لاء دا.. مديري
سلمي : يعني مينفعش نستلطفهم ولا نحبهم؟
شهد : حب ايه بس ، أنا بس مبسوطة أنه اتغير
ليلي : الحمد لله انهم من نوع الرجالة الي بيتغير
____
كنت قاعدة في الاوضة في بيتنا لوحدي ، كنت كل ما أقرر إني خلاص أكلمه وارن عليه ارجع في آخر لحظة واسبب الفون ، لو خسرته مش هلاقي راجل احس معاه الي حسيته مع أحمد بس لو فضلت هيفضل نفس الراجل الي.. حبيته؟ ، هحتاج ايه اكتر من الي احمد عمله عشان أحبه؟ ، ابطل اخاف وهو موجود واحس اني كويسة عشان هو جمبي!
آية بعتتلي مسدج علي ماسنجر ، نفس البنت الي اديتها نصيحتي لما اتقابلنا في كافية برا
° مريم ، ازيك ؟ أنا خطوبتي بعد بكرة إن شاء الله، علي كريم الي كنت قولتلك عنه ، أنا مش عارفة اقولك ايه ، شكراً انك ساعديني وسمعتيني وهكون مبسوطة اوي لو جيتي
رديت عليها وانا مش مصدقة من الفرحة
_ الف مبروك يحبيبتي ربنا يفرحك يارب ، ابعتيلي اللوكيشن هاجي إن شاء الله
خلصت معاها ورنيت علي احمد
_ ازيك يا احمد عامل أيه؟
= الحمد لله، انتي كويسة ؟
_ اه الحمد لله، كنت محتاجة منك توصلني خطوبة واحدة اعرفها ، دا لو فاضي يعني
= هاجي أوصلك حاضر ، اعدي عليكي الساعة كام ؟
_ هو بعد بكرة ، ممكن علي الساعة تمانية؟
= خلاص تمام
_ متشكرة يا احمد ، كنت محتاجة اتكلم معاك وكويس إن جت مناسبة عشان نتقابل
= فيه حاجة ؟
_ مش هينفع علي الفون ، خليها لما نتقابل احسن
تاني يوم فضلت أظبط كلام أقوله ، بكرة هقوله كل حاجة من غير خوف ومش هتردد تاني ، مش عارفة هقول ايه بالظبط بس كل الي عرفاه اني عرفت اني عوزاه .
بليل كنت بجهز، لبست فستان وحطيت ميكب ، بصيت علي نفسي في المرايا كل حاجة كانت متظبطة حطيت التاتش الأخير ولبست الهيلز ونزلت لقيته مستنيني ، فتحلي باب العربية وركبت ، ركب وساق وروحنا الخطوبة سوا ، سلمت علي آية واتمنيتلها حياة سعيدة مع الي قلبها أختاره مش مع أي عريس وخلاص
_ نروح؟
= عاوزة تروحي دلوقتى؟
_ اه يدوبك
طلعنا برا القاعة ، ركبنا العربية وكان هيسوق
_ استني يا احمد.. عاوزة اقولك حاجة
بصلي = خير فيه حاجة ؟
خدت نفس طويل = ايه تنهيدة كتب الكتاب دي؟
_ هتندمني والله اني فكرت اقول حاجة
ضحك = خلاص بهزر ، فيه ايه ؟
_ بص يا احمد أنا.. ، ممكن متبصليش؟
= ما انتي الي قولتي بص يا احمد! ماشي كملي
_..
= فيه مشكلة طيب؟ مضايقة من حاجة ؟
_ انا مبحسش اني مضايقة طول منتا معايا
= اللهم صلي علي النبي، مريم؟؟؟
_ لما بطلت خوف وفكرت عرفت انك الراجل الوحيد الي حبيته وعاوزة اكمل معاه بدل ما اهرب منه ، أنا بحبك يا احمد ، شكراً انك مزهقتش مني في كل مرة كنت بسكت فيها
دور العربية _ علي فين؟؟؟؟
= هروح علي بيت العيلة كلهم هناك ، نقرأ فاتحة
_ نعم؟
= انتي جاهزة وزي القمر مش هنحتاج نضيع وقت
ساق وروحنا البيت ، دخل وانا جمبه
= راجع أنا والمدام
_ أحمد!!!!
= عمي ، أنا طالب ايد مريم
_ اكيد مش هيوافقوا علي طول هيدوني فرصة أفكر
ماما زغرطت وهي بتعيط ° أخيراً؟ أخيرا هشوفك عروسة
_ يماما!!
وزي خطوبة ليلي وانجي كانت خطوبتي أنا وسلمي في نفس اليوم ، العيلة رجعت تفرح تاني ، كل واحدة فينا لقت الراجل الي شبهها مش مجرد راجل مناسب ليها أو عريس ميترفضش ، كل واحدة فينا كانت عارفة أنها مع راجل كانت هتفضل غبية طول عمرها ولو كانت قالتله لاء .
شهد : عاوز توقع العصير في الخطوبة دي كمان ؟؟
ضحك : اساعدك؟
_ لاء أنا تمام
= علي فكرة.. شكلك حلو اوي ، عقبالك
_ متشكرة يا عبدالله، عقبالك انت كمان
= لاء من النحية دي نطمن، لو هيبقي عقبالك ف هيبقي عقبالي
_ مش فاهمة ؟
= هبقي اقولك بعدين
مين كان يصدق أننا بعد ما كنا خيارات عرايس في العيلة ل نفس الراجل دلوقتي كل واحدة يتجهز ل ديت عشان تقابل الراجل الي اختارته؟
مريم : ثواني ، مش ملاحظين أنها غريبة اوي أننا كلنا معزومين في ديت في نفس اليوم ونفس الساعة ؟
انجي : هو انتوا نازلين فين ؟
ردينا احنا الأربعة في نفس الوقت : مطعم gold
ليلي : ايهههه؟
مريم : والله كنت حاسة
سلمي : أنا قولتلكم من الاول منخليهومش يتصاحبوا
كل واحدة فينا بدأت تجهز واتفقنا نروح سوا ، لقينا شهد بتلبس ف بصينالها ب استغراب
انجي : راحة فين يشهد؟
شهد : نفس المطعم
انجي : ليه؟
شهد : عبدالله قال إن فيه صفقة مهمة جدا ومحتاج نتناقش فيها
ليلي : هي مطاعم البلد قفلت ولا ايه أنا مش مستريحالهم
مريم : لاء نبص علي جانب حلو احنا خارجين ديت انجزوا
خلصنا كلنا لبس ونزلنا ، طلبنا اتنين تاكسي واتقسمنا عليهم ، وصلنا احنا الخمسة متأخر شوية ، دخلنا المطعم ف لقينا الخمسة قاعدين لابسين نفس البدلة ، قدامهم نفس بوكية الورد!!
كل واحد فيهم وقف قدام خطيبته ،
قالوا في نفس الوقت : كنت مستنيكي من بدري
بصينا لبعض ب استغراب ف كملوا في نفس الوقت : شكلك حلو اوي
أحمد : لاء لاء رجالة رجالة ، احنا اه متفقين علي نفس الجملة بس مينفعش تتقال في نفس الوقت
ضحكت وبصيتله ، مريم : انتوا حافظين؟
أحمد : كل واحد علي طربيزته
كل كابلز قعد علي طربيزة
_ ليلي وسمير _
_ المطعم حلو اوي
= عجبك؟
_ انتوا اتلميتوا علي بعض ازاي ؟
= والله رجالة جدعة اوي وأحمد لعيب هو الي اقترح علينا المطعم ف قولت اقولك ننزل ديت فيه ، تحبي تاكلي ايه؟
مسكت المنيو وطلبت ، نزل الاكل قدامي ولقيت فوقه خاتم! _ سمير؟؟؟ ايه دا ؟
= ايه رأيك في الكرييتف؟
ضحكت _ شكله يجنن ، شكراً
= ليلي ، تتجوزيني ؟
_..
انتي الست الي عاوز اكمل معاها ومترددش في دا ثانية ، وانتي الوحيدة الي خلتيني أطمن إن مهما اتخانقنا عمرك ما هتسبيني وتمشي ف تتجوزيني؟
هزيت راسي بالموافقة ومعاها لبسني الخاتم ، مفتكرش عمري أنسي اليوم دا ابدا .
_ معاذ وانجي _
_ فيه ايه يا معاذ؟
= مفيش ، بس لازم اعمل حاجة دلوقتي
_ حاجة ايه؟
طلع اللاب توب من الشنطة = متهزرش ، هتفتح إكسيل هنا؟؟؟؟
_ دا اهم عرض هعمله ولازم انتي الي توافقي عليه
= مش فاهمة ؟
فتح اللاب وحطه قدامي، كان مكتوب كلمة ( تتجوزيني )
= انت..
_ انتي اهم حاجة عندي ومحبتش ست غيرك وعاوزك تكملي معايا ، موافقة ؟
طلع من جيبه خاتم وحطه قدامي
_ أنا متغيرتش غير عشانك يا انجي
لبست الخاتم وهزيت راسي = أنا موافقة
_ يوسف وسلمي _
سمير : كيلو الطماطم يوصل للسعر دا؟ دا انا هتجنن
ضحكت _ اهتماماتك بقت سوقية جدا
= قصدك اني بحب السوق؟
_ لاء قصدي انك بقيت بيئة
حط كيس اسود قدامي ، بصيت عليه لقيته تفاح
_ انت جاي تهزر يا يوسف؟ داخل ب ورد وبدلة ودخلت ازاي بالكيس دا؟
= افتحيه بس
مسكت الكيس وفتحته لقيت فيه علبة ، فتحتها لقيت خاتم ف بصيتله _ لاء بس حركة جامدة دا الحمد لله قدر ولطف
= تتجوزيني ؟
_ ها؟؟؟
= ترضي يبنت الحلال ب الشقة أم تلت اوض؟
_ اصوت ألم عليا الديت الي حواليا يجدعان ؟
ضحك ولبسني الخاتم = اول قصة حب تبدأ ب فلفلة بخمسين
كملنا كلامنا وطلبنا أكل ، مكنتش بضحك من قلبي غير معاه ، كنت عارفة إن كان من نصيبي أطيب راجل في الدنيا .
_ عبدالله وشهد _
_ فين الصفقة الي قولتلي عليها ؟
= الورق معايا بس قبل ما نفتح الملف محتاج اقولك حاجة
_ حاجة ايه ؟
= شهد.. أنا بحبك
_ ايه؟؟
= لو مكنتيش معايا كنت هفضل الراجل المغرور الي دايما لوحده ، لما جيتي محستش اني محتاج غير وجودك انتي و.. انتي بتعيطي ليه؟
_ كلام مؤثر جدا
ضحك = طب افتحي الملف
فتحت الملف لقيت فيه خاتم ف رجعت بصيتله
= أنا عاوز اجي اتقدملك ، موافقة؟
_ سيبني افكر
= مش هينفع والله ، كل الي حولينا واخدين الخواتم والدنيا حلوة جت عليا وتفكري؟
ضحكت ولبست _ الخاتم حلو اوي
= و..؟
_ شكراً؟
= لاء التانية واخلصي
_ ماشي يا عبدالله وانا كمان بحبك
= كنت هخصملك تلت ايام والله لو مقولتيها
_ أحمد ومريم _
_ الأكل عجبك؟
= أه جدا ، المطعم حلو اوي
_ بس مش احلي من عربية الفول الي بنفطر عليها
ضحكت = هو الغلب ورانا ورانا!
حط قدامي الرواية بتاعتي ف بصيتله ب استغراب
= ايه دا؟
_ افتحيها
فتحت اخر صفحة ، الفصل العاشر وبدأت اقرأ الي كتباه ( يبدأ الوقوع في الحب عندما لا توجد مثالية.. فقط انتٍ مطمئنة )
= عرفت اعمل كده؟
_ ياه ، من زمان
= يبقي تتجوزيني
_ لاء مش للدرجاتي
= أنا مش بهزر ، تتجوزيني؟
_ حط قدامي خاتم ف سكتت
= هتتجوزيني؟
_ مهو..
لقيت التمانية حواليا
ليلي : انتي لسه هتفكري؟ أنا لابسة الخاتم بقالي نص ساعة!
انجي : وافقي يمريم منتي مصدعانا بيه طول اليوم
بصتلهم وضحكت ، مسكت الخاتم ولبسته
_ أنا موافقة
أحمد = ممكن تدوروا وشكم ثانية معلش؟
لفوا ف استغربت وبصيتله
= وانا بحبك ، خلاص تمام يجماعة أنا تمام
خدنا طربيزة كبيرة لينا كلنا
مريم : من بعد خطوبة آية وانا جوزت ست عرايس تفتكروا فعلا بقيت خاطبة؟؟
ضحكوا وبصولي
انجي : مش ستة بقوا عشرة ، احنا الأربعة من غيرك مكناش هنعرف نفكر في حاجة
مريم : يعني بنعرف نصطاد كويس؟
سلمي : هو كتابك كان اسمه ايه؟
مريم : طيب تصطادين عريساً
انجي : معانا خمسة
( لا يوم مناسب في الحب.. فقط تريدي ببساطة.. من يشبهك ❤️. )
تمت