مياده فتحت موبايلها زي ما أبوها قالها ووصلها رساله من الشبكه بأن آسر كلمها 120مره وده ارضاها اوي وحست انها عاقبته وقلقته وزي ماوصلها رساله وصل ليه هو كمان رساله ان موبايلها متاح الآن لكن آسر اطمن انها كويسه وحب يعرفها انه زعلان منها وقدر يتحكم في نفسه انه مش يتصل عليها ومر اليوم وهو عامل زعلان وهي مستنيه تليفونه لحد مااسماء كلمت مياده
اسماء:سلام عليكم ياميمو
مياده:وعليكم السلام ايه ياحبيبتب عامله إيه
اسماء :الحمد لله انتي مش ناويه ننزل نسحب استمارة التنسيق
مياده:والله كنت ناويه انهارده بس تعبت شويه
اسماء :لا سلامتك بس ضروري ان شاء الله نروح بكره
مياده:خلاص الصبح ان شاء الله حكون جاهزه
اسماء :ماشي حنستناكي وعلي رنات بقي سلام
مياده:سلام
قفلت مياده وافتكرت انها لازم تقول لاسر علشان متبقاش مشكله جديده فقررت تكلمه وماتكبرش الموضوع
اسر:الو
مياده:ازيك يااسر
اسر:والله اخيرا مياده هانم اتكرمت وافتكرت ان في راجل في حياتها اسمه آسر
مياده:انا مش نسياه اصلا علشان افتكره
آسر :وايه اللي يثبت يامياده
مياده:ماعنديش اثبات لكن انا اللي اتصلت
اسر:وانا اتصلت بيكي كتير واكيد عرفتي
مياده:أيوه عرفت واستنيتك تتصل وانت مش اتصلت
اسر:ممكن اعرف كنتي قافله تليفونك ليه
مياده :كنت خايفه
اسر:خايفه من ايه
مياده:خايفه منك
اسر:خايفه مني انا يامياده خايفه من اكتر انسان بيحبك وبيخاف عليكي وكل ده ليه علشان غيرت عليكي علشان غيرت علي رجولت وكرامتي
مياده:لا خوفت لما قولتلي انك ممكن تعاقبني
اسر:اولا. انا كنت بهزر معاكي ثانيا. انتي متخيله اني اقدر أذيكي
مياده:انا لسه مش عرفاك كويس وانت خوفتني من
ك
اسر:لا ياحبيبتي ماتخافيش اللي بيحب عمره مايزعل حبيبه والمفروض انتي اللي تخافي علي زعلي
مياده:ماأنا علشان بخاف علي زعلك علشان كده كلمتك
آسر :يعني مش علشان وحشتك زي ماوحشتيني
مياده:لو كنت وحشتك بجد كنت كلمتني
اسر:خلاص ياميمو ننسي اللي حصل بس بشرط انك مش تقفلي تليفونك تاني ابدا
مياده:حاضر بس قبل ماانسي انا بكره ان شاء الله حنزل اروح مت صحابي المدرسه علشان التنسيق
اسر:حتروحي الساعه كام
مياده:حنمشي الساعه 8 ان شاء الله
اسر:حبعتلك علاء الصبح
مياده:لا مش لازم احنا حنتصرف لان بصراحه البنات بيتضايقوا
آسر :ليه هو علاء بيعمل حاجه تضايقهم
مياده:لا حرام ده في منتهي الأدب بس مش بيحبوا يتعبوك
آسر بحسم:علاء الصبح حييجي وحيكون معاكي لحد ماتروحي البيت تاني
مياده:حاضر يااسر حستناه
اسر:ممكن بعدكده ماسمعش غير الكلمه الحلوه دي منك
مياده:حاضر
اسر:بحبك
مياده:بجد
اسر:عنك شك في كده
مياده:لأ بس خايفه منك
اسر:حقولهالك تاني ماحدش بيخاف من حبيبه
مياده:ماشي انا حنام بقي علشان اعرف اصحي بدري
اسر:ماشي ياحبيبي تصبحي علي خير
مياده:وانت من اهله
وقفلوا الفون ومياده نامت واسر كمان
رن موبايل مياده وكان آسر
اسر:يلا ياحبيبي اصحي الساعه 7,30 علشان علاء حيكون عندك الساعه 8
مياده:حاضر صباح الخير
اسر:صباح النورياحبيبي يلا قومي علشان انا عندي شغل سلام
مياده استغربت طريقة اسر لكن هو فعلا كان في كتبه وعنده اجتماع بس خاف تروح عليها نومه
قامت مياده اخدت شاور ولبست وادت صلاتها
ونزلت هي وصحباتها ركبوا العربيه وراحوا علي مكتب التنسيق واستلموا الاستمارات
ورجعوا علي البيت لكن كانوا زهقانيين من وجود علاء معاهم لانهم لو كانوا لوحدهم كانوا حيتمشوا شويه في جو الصبح ويفطروا مع بعض وطلبوا من مياده انه بعد كده يكونوا لوحدهم وافقت مياده لكن ماكنتش عارفه تقول لاسر ازاي قررت تسيبها للظروف
اما عند اسر فكان خلص اجتماعه اللي عمله بدري مخصوص علشان يلحق يسافر هو ومياده وكلم باباها
اسر:سلام عليكم ازي حضرتك ياعمي
ابو مياده:وعليكم السلام ازيك انت ياابني
اسر:تمام الحمد لله
ابو مياده:ايه ياحبيبي خير حصل حاجه
آسر :لا ابدا كله تمام انا بس عارز أستأذن حضرتك حسافر انا ومياده القاهره انهارده ونرجع علطول
الاب:ليه ياابني في حاجه هناك حتعملوها
اسر:بصراحه رايح اجيبلها فستان الفرح بس لوسمحت مش تقولها عاملهالها مفاجأه
الاب:حقول ايه ربنا يسعدكم ياحبيبي بس يعني هو اسكندريه مافيهاش فساتين
اسر:فيها لكن مياده لازم تلبس من عند اشهر مصمم
الاب:خلاص ماشي ياحبيبي اتوكلوا علي الله وخلي بالك من الطريق
اسر:حاضر ياعمي ربنا يسترها مع السلامة
وخلص كلام مع حماه وكلم مياده علشان تجهز
آسر :ايه ياحبيبي رجعتي البيت
مياده:ايوه من شويه
اسر:طيب لو سمحتي اجهزي علشان حنروح نشتري شوية حاجات للفرح
مياده:ضروري انهارده
اسر:ايوه ياحبيبتي ضروري علشان مش فيه وقت
مياده:طيب حشرب نسكافيه بس افوق وألبس
آسر بزعيق :انا مش فاهم قصة النسكافيه دي يلا البسي انا في الطريق ليكي
دخلت مياده ونقت من اللبس اللي اسر كان جايبه بنطلون ابيض ضيق جبردين وبادي لونه لبني وحذاء رياضي خفيف لونه أبيض ونظارة شمس لون الفرييم بتاعها ابيض لبست وكان شكلها زي القمر كأنها مولوده في سرايات امها اول ماشافتها
الام:ايه الحلاوه دي يا ميمو
مياده:بجد ياماما شكلي حلو
الام:شكلك بنت عز من يومك
مياده:ماشي ياست ماما
وقطع كلامهم صوت تليفونها وكان اسر بيرن عليها علشان تنزل
نزلت مياده جري بعد ماسلمت علي امها لقت علاء بيفتحلها الباب علشان تركب
علاء :اتفضلي
مياده:ايه ده ياعلاء انت طالع بمنظرين كل شويه عربيه شكل
ابتسم علاء وقفل الباب بعد ماركبت جنب اسر اللي كان رفع حاجبه ومنظره لايبشر بالخير
مياده:ازيك ياحبيبي ايه حنروح فين المره دي
اسر ماردش لكن وهي بتسلم عليه مسك ايدها وقفل ايده عليها جامد اوي خلاها تتوجع
مياده :اي ايدي في إيه
اسر:ههاااااااش اسكتي دلوقتي وكان ساب ايديها
اسر:علاء لوسمحت اقف هنا وانزل هاتلنا مايه وعصاير علشان الطريق
علاء ركن العربيه ونزل واسر انفجر في مياده
اسر:انتي ايه اللي عملتيه ده ازاي تهزري مع علاء كده وقدامي اومال لما بتكوني انتي واصحابك ايه اللي بيحصل
مياده:انا ماعملتش حاجه انا علشان شوفته مرتين يعني وكل مره بعربيه مختلفه
اسر:اخر مره تتكلمي مع حد كده تاني مفهوم
مياده:حاضر
فضلوا طول الطريق ساكتين لحد ممياده لقت ان الطريق طويل وفاضي وشبه الصحرا
مياده:احنا رايحين فين
اسر:مسافرين القاهره
مياده:بس انا مش قولت لبابا
اسر:انا قايله
مياده:بس لازم انا اكلمه واقوله
اسر:قولت اني قولتله وبعدي حضرتك مراتي
مياده سكتت لكن من جواها عاوزه تفتح الباب وتنزل كانت نفسها تعيط لكن فضلت قاعده ساكته شويه كتير لحد ما العربيه وقفت واسر كلمها
اسر:مياده احنا وصلنا الريست هاوس في هنا كافيهات ومطاعم وتواليت لو محتاجه اي حاجه يلا ننزل
مياده:مكن ادخل التواليت لو سمحت
اسر:ايوه طبعا وايه لو سمحت دي
نزل اسر ومياده ووصلها اسر للتواليت دخلت وقفلت علي نفسها وفضلت تعيط وقت اد ايه هي ماكنتش حاسه لحد مااسر رن عليها علي الموبايل حست انها اتأخرت حاولت تداري منظر عيونها لكن فشلت اول ماخرجت وشافها اسر عرف انها كانت بتعيط وفهم سبب تأخيرها
اسر:مياده انتي بتعيطي ليه
مياده:لا مش بعيط ده التراب دخل في عيني
اسر:لا بتعيطي ومش تكدبي عليا تاني
مياده وكانها بالونه وانفجرت :ايوه كنت بعيط علشان كل مانتقابل تطلعني غلطانه انا بتعامل بطبيعتي انا بنت عاديه عمري ما كنت هانم ولا حكون هانم انا حفضل مياده
آسر :خلاص ياحبيبتي انا آسف ماكنش قصدي ازعلك انا بس بغير عليكي اوي يامياده علشان خاطري اهدي بقي ماتبوظيش المفاجأة االي انا عملهالك
مياده:خلاص مافيش حاجه انا اللي اسفه اني انفعلت كده بس حاسه اني لو ماكنتش قولت الكلام ده كان ممكن يجراللي حاجه
اسر:لا ياحبيبي ولا يهمك وبعد الشر عليكي
اسر زعل من نفسه جدا وحس انه بيضغط علي اعصابها في كل مره لكن كمأن كان فرحان ان مياده مش بتحب المظاهر زي امه
الفصل الثالث عشر13
رجع اسر ومياده للعربيه وكملوا طريقهم للقاهره كانت مياده ساكته وبتفكر طول الطريق فأسلوب اسر وشدته عليها وحنيته اللي بتظهر بمجرد انها تزعل منه حست انه بيحبها وأن طبيعته هي الشده لكن بيحاول يداري ده علشانها مياده كانت جواها مشاعر متلخبطه وده اللي دايما بيحصلها في كل مره اسر بيقسي عليها فيها كان اسر مشغول طول الطريق بشغل بيخلصه علي الاب توب بتاعه لحد ماوصلوا عند مول كبير في القاهره نزل اسر ومياده بتتفرج علي المول من العربيه فتحلها الباب
اسر:يلا ياحبيبي انزلي
مياده:احنا هنا ليه
اسر:حتفضلي تسألي انزلي علشان هي دي المفاجأه
نزلت مياده واسر مسك ايديها ووصلوا عند الاتيليه
مياده بدهشه:ماما اللي فتنت عليا برده
اسر :فتنت عليكي في ايه
مياده:في اسم مصمم الازياء
اسر:والله مافاهم منك حاجه ماله مصمم الازياء
مياده:احنا جينا هنا علشان فستان الفرح صح
اسر:أيوه ياستي
مياده:يبقي انا صح ماما اللي قالتلك اني عاوزه هاني البحيري اللي يعملي فستان فرحي
آسر :بجد انتي كنتي عاوزاه
مياده:ماتحاولش تخبي خلاص مش مهم
آسر :والله ياحبيلي حتي مامتك مش تعرف ان احنا جايين هنا ولا قالتلي حاجه
مياده:خلاص ماشي مصدقاك
آسر :طيب مش يلا بينا ندخل
ودخلوا الاتنين للاتيليه اللي طبعا كل الناس اللي بتشتغل فيه رحبوا بيهم جدا وزاد الترحيب بعد ماعرفوا انه اسر الطاروطي
اسر:لوسمحتي عاوزين احدث موديلات فساتين الزفاف
موظفه الاتيليه:حاضر يافندم اتفضلوا ارتاحوا
وجابت كتالوجات الفساتين ومياده عجبها فستان لكن اسر اول ماشافه رفض لانه مكشوف من الصدر(توب )
اسر:انسي ياحبيبي العريان ده
مياده:بس ده عاجبني اوي
اسر بحسم:مياده شوفي حاجه غيره
درت مياده والموظفه فهمت اسر عاوز ايه ساعدتهم وجابتلها فستان جاهز كان متجهز للديفيليه لكن تقدر تديهولها لو عجبها وبجد الفستان كان رائع وعجب اسر ومياده اوي وخصصا لما مياده قاسته وكانت شبه الملايكه .
اسر عرض انه يشتريه بأي مبلغ مقابل انه ياخده حالا والموظفه وافقت وبسعر الفستان اللي طبعا ما كانش قليل مازودتش حاجه اخدوا الفستان واشتروا من نفس المول بقية لوازمه و الشوز
اسر:ايه ياحبيبي مش جعانه
مياده:لا عادي احنا لسه حنعمل حاجه هنا ولا حنرجع
اسر:لا انا تعبت تعالي نتفسح شويه بقي
مياده:علشان مش نتأخر لسه الطريق
اسر:ما تقلقيش تعالي بس افرجك علي النيل ولا انتي شوفتيه
مياده:لا مش قولتلك اني عمري ماخرجت من اسكندريه
اخدها اسر وركبوا العربيه وراحوا علي مركب في النيل اتغدوا فيها مياده عجبها اوي المكان لكن ماكنتش فرحانه ولا عندها نفس الانبهار بكل حاجه جديده بتشوفها فيها حاجه مكسوره من جوه قلبها
خلصوا الغدا وخرجوا بداوا طريقهم للرجوع للبيت
مياده طول الطريق كانت بترد علي اد السؤال واسر حس ان فيها حاجه مش طبيعيه
اسر:مياده في ايه مالك انتي متغيره انهارده جدا
مياده:لا انا كويسه
اسر:لا ياحبيبتي انا حاسس انك لسه زعلانه مني أنا عارف انك مصدومه في تصرفاتي معاكي لكن اعمل ايه انا بعشقك وبخاف عليكي من الهوا اللي بيعدي جنبك
مياده دموعها نزلت غصب عنها ورمت نفسها في حضن آسر يمكن تكون بتدور علي الحنان اللي ضيعه منها بانفعاله عليها كل شويه
اسرضمها ليه وهو خايف لتبعد عنه ضمها وكأنه مش عاوزها تخرج من حضنه ابدا
اسر:اهدي باحبيبي انا اسف حقك عليا سامحيني يامياده
مياده عدلت نفسها وكان وشها احمر جدا هي عملت كده من غير قصد
كانو ا قربوا خلاص يوصلوا واول ماو صلوا نزل اسر من العربيه واخد مياده وعلاء اخد الحاجات طلعها فوق دخلوا البيت واول أم مياده ماشافت الفستان وقفت تزغرد ودموعها تنزل من عينيها مش قادره توقفهم
اسر:ايه ياما ما بتعيطي ليه طيب
الام:لا ياحبيبي دي دموع الفرح
مياده حضنت امها وامها فضلت تحضن وتبوس فيها كانها حتمشي دلوقتي تروح بيتها
الاب:حمد الله علي سلامتكم انا كنت خايف عليكم من الطريق
اسر:الله يسلمك ياعمي ربنا مايحمنا منكم
الام:ويخليكم لينا ياحبيبي ويسعدكم
آسر استأذن علشان يروح لانه كان تعبان جدا بعد اليوم الطويل ده وماكنش مستعد للكلام مع أبو مياده اللي حس انه عاوز يتكلم معاه علي مشاكله مع بنته
وقدر فعلا يهرب ويمشي
دخلت مياده مع امها وقاست الفستان وامها انبهرت بيه وفرحت ان حلم بنتها انها تلبس من تصميم هاني البحيري اتحقق واتمنت لها السعاده والهنا
انتهي اليوم والجميع كان تعبان وناموا استعدادا ليوم جديد
في الصباح مياده صحيت من نومها بدأت تجهز الحاجات في الشنط علشان تعرف هي وأمها ايه اللي ناقص وكان بيساعدهم صاحباتها البنات اللي ماثأخروش ابدا عن مساعده صاحبة عمرهم كانوا مشغلين اغاني الافراح وهما بيجهزوا الحاجه ودكان في جو جميل بينهم رقص وضحك وكأنهم بيودعوا ايامهم الحلوه مع بعض ده كان احساسهم كلهم ان واحده منهم ممكن تمشي من جنبهم ومش حيقدروا يشوفوها غير بميعاد وكانت ام مياده قاعده بتكتب كل حاجه ناقصه بنتها علشان عندها معاد هي وتوحه ينزلوا يشتروا النواقص
اتصلت توحه بأم مياده واتفقوا علي النزول بعد ساعه وعرفتها ان اسر بعتلهم عربيه بسواق تكون معاهم في كل مكان علشان يخلصوا بسرعه
ام مياده راحت تبلغ جوزها انها خارجه
الام:انا حنزل ياحاج مع الحاجه توحه نشتري اللي ناقص
الاب:خدي ياام مياده الفلوس من الدولاب هاتي اللي انت عوزاه وماتنسيش تشوفي لنفسك طقم مناسب للفرح
الام:ربنا يخليك ياحبيبي طول عمرك مش ناسيني
الاب محزر:ام مياده اوعي تسيبيها تدفع حاجه في شوار البنت انا عارف اسر وعمايله كفايه لحد كده
الام:حاضر ياحاج
وعدت الايام والكل بيجهز لحد قبل الفرح بيومين
صحي اسر من نومه ا خد الشاور المعتاد ولبس وصلي ونزل عند توحه علشان يفطر معاها
توحه:صباح الفل ياعريس
اسر:صباح الفل ياتوحه
توحه:خلاص كلها يومين وتفطر انت وعروستك
اسر:وانتي معانا ولا انتي ناويه تسيبيني خلاص
توحه:هو انا اقدر لكن عروستك بقي هي اللي تفطرك وتأكلك بايدها وانا مش حبقي عزول
اسر:توحه مش عاوز اسمع الكلم ده تاني انا مااقدرش اقعد علي السفره وانتي مش عليها
توحه:خلاص ياحبيبي انا بهزر معاك مالك قلبتها جد كده ليه
اسر:لا عادي بس انا عارفك وعارف حساسيتك اللي ملهاش لزوم دي انتي عارفه ان مياده بتحبك ومعتبراكي امها التانيه
توحه :وربنا يعلم انا بحبها اد ايه صحيح كنت حتنسيني انا رايحه عندهم بكره ان شاء الله بالليل
اسر:ليه هو لسه ناقص حاجه
توحه:لا يحبيبي دي خلصت وحتبعت حاجاتها بكره ان شاء الله الصبح لكن علشان البنات عاملين ليها ليلة حنه
اسر:تصوري مش قاليتلي علي الموضوع ده
توحه:ماهي تلاقيها مفكراك عارف لان كل العرايس بتعمل كده
اسر:وده بيعملوا فيه ايه ياتوحه ده
توحه:ولا حاجه بيتجمع البنات والستات وبيهيصوا ويرقصوا ويرسموا الحنه للعروسه وللبنات
اسر:امممممممممم طيب الحق اروح شغلي لاني لو قعدت معاكي اكتر من كده مش حنخلص
توحه:مع السلامه ياحبيبي
خرج اسر وقرر يعمل مفاجاه لمياده وكلم الشركه المنفذه لتجهيزات الفرح وطلب منهم يعملوا ليلة حنه في بيت العروسه واكتشف منهم ان دي كمان ليها تجهيزات كتير واشكال كتير وان في ليله علي الطراز النوبي وليله علي الطراز البدوي واشكال كتير ولقي ان الطراز النوبي حيكون اسهل واقرب حاجه للي توحه حكتهوله فاتفق معاهم وعطاهم العنوان وقفل علشان يكلم مياده
اسر:صباح الخير ياميمو
مياده:صباح الفل
اسر:هههه ده واضح ان حبيبي صاحي فايق أوي
مياده:اوي اوي كمان
اسر:ليه بقي مش تعرفيني
مياده: اصل صحباتي جايين علشان يقعدوا معايا ويحضروا البيت لحفلة بكره
اسر:أاااه ماقولتليش يعني علي حفلة بكره دي
مياده:عادي ماهو اكيد انت عارف ان كل عروسه بتعمل ليلة حنه
اسر:بصي ياميمو بصراحه انا ماكنتش اعرف لكن لما عرفت كلمت الناس اللي مصممين الفرح وحيجولك كمان شويه اقعدي معاهم انتي وصحباتك وشوفوا عاوزين تعملوا ايه وانا موافق ماعدا انك ترسمي حنه
مياده:ليه مش حرسم علي ايدي انا حرسم علي ضهري بس يعني مش حيبان
اسر:ننننننننعم ترسمي فين يعني ايه علي ضهرك لا طبعا والله الغي اي حاجه يامياده
مياده:يا آسر دي ست اللي بترسم ولا هما بيجيبوا راجل
اسر:انا عارف انها ست وانا منبه عليهم ان مافيش راجل يكون موجود حتي الفرقه بتاعتهم حيجيبوها بنات
مياده:اومال انت مش موافق ليه
اسر:مياده مافبش حد يلمس جسمك غير امك مفهوم
مياده بقلة حيله:حاضر ياحبيبي مفهوم
اسر:بموت فيكي وانتي قمر وبتسمعي الكلام بس ليا طلب كمان
مياده:اؤمر ياحبيبي
اسر:ماحدش من صحابك يصور بالتليفون
مياده:حاضر
اسر:والنبي عسل وقمر ومافيش منك يلا روحي خلصي وسيبيني اشوف شغلي سلام
مياده:سلام
وجالها الناس بتوع الحفله وجابولها اللبس النوبي علشان المقاسات وجهزوا كل حاجه وعدي اليوم علي خير وجه يوم الحنه
اسر طلب من توحه تحضرله شنطة سفر وعرفها انه عامل مفاجاه لمياده انهم حيقعدوا في نفس الفندق اللي فيه الفرح لحد الصبح وبعد كده حيطلعوا علي المطار علشان حجزلها شهر العسل في باريس لكن اكد علي توحه ماتقولش حاجه لمياده وأمها وراح يشوف شغله اللي حيفضل يخلص فيه لحد وقت متأخر جدا
اما عند مياده كانت لبست هي وصحباتها وجت الفرقه النوبيه وكانت كلها من البنات واتجمع جيرانها وتوحه ووصلت من القاهره الست ستونه اللي بترسم الحنه ورسمت لكل البنات ماعدا مياده اللي ماكنش حد عارف سبب رفضها غير صاحبتها أسماء اللي عجبها قرار اسر وهي كمان مارسمتش حنه
فرح الجميع وكانوا مبسوطين منبهرين بالحفله ورجعت توحه للقصر ودخلت مياده غرفتها ترتاح استعدادا لبكره
اما اسر كان لازم بسهر يخلص شغله اللي حيغيب عنه اسبوع كامل