قيدٌ من ألم
للكاتبه تقى محمد
الجزء الثالث
💎💎💎💎💎💎💎
جريت لقيت وجن راسها بكب في الدم ما عرفت إتصرف كيف ختيت طرف توبي في راسها عشان اوقف الدم بس نهائي ابى يقيف مزدلفه جرت وقفت ركشه ركبنا ومشينا المستشفى الممرضين رفعوا وجن في نقاله وساقوها مني انا بقيت ارجف وما عارفه إتصرف كنت خايفه عليها شديد خصوصا هي فقدت دم كتير مسكت تلفوني وإتصلت على رائد بس ما ردا حاولت فيهو كذا مره ما ردا علي الممرضه قالت لي المريضه فقدت دم كتير ولازم نلقى ليها متبرع في اسرع وقت مزدلفه قالت لي إتصلي على رائد قلت ليها إتصلت لكن شكلوا مشغول والتلفون ما جمبو لانو ما قاعد يرد قلت للممرضه انا امها ممكن إتبرع ليها مزدلفه قالت لي يابت إنتي جنيتي عايني حالتك تتبرعي ليها كيف اديني رقم راجلك انا بحاول فيهو شالت مني الرقم وإتصلت من اول جرس ردا قالت ليهو يا رائد تعال المستشفى وجن دي إنضربة في راسا ومحتاجين دم لانو نزفت ...لالا ضربه بسيطه كانوا بلعبوا مع الشفع في الشارع وحصلت مشكله وياهو زي ما حكيت ليك...تمام برسل ليك العنوان ..يلا
مزدلفه رسلت ليهو العنوان في اقل من ساعه جا وأول ما جاء قعد يكورك فيني وجاط شديد انو كيف اخلي بتي تطلع تلعب في الشارع والشارع ما مضمون والحاصل دا كلو بي سببي خليتو يكورك قدرتو وقلت ليهو بالمناسبه يا استاذ بتك بين الموت والحياة وبعدين إنت ليه ما بترد على تلفونك انا إتصلت عليك كتير قال لي كمان قاعده تردي علي والله إطورنا اصبري لي بس..
ومشى خلاني بقيت مستغربه معقوله دا رائد،، رائد الأنا بعرفو ما حصل رفع صوتو فوقي وما حصل كورك فيني حتى لو ظروفنا كعبه وانا عارفه انو هو مضغوط بس كمان انا ما حصل طلبت منو حاجه فوق قدرتو ياخ تغريد بتطلب منو حاجات اكبر من إستطاعتو زاتو وما بقول ليها حاجه بل بالعكس بحترمها شديد طيب ليه انا؟!
طابقوا فصيلة الدم حقت رائد لقوها مطابقه سحبوا منو دم وعمل باقي الاجراءات وبقينا منتظرين خالتو عاليه اثناء نحن منتظرين كدا إتصلت على رائد ورائد كلمها بالحاصل قفلت منو وفي اقل من نص ساعه جاتنا قالت لي وجن مالا رائد هجمني قال لي مرقده قلت ليها والله يا خالتو ضربه بسيطه بس هي نزفت عشان كدا حالتا شويه ما مستقره قالت لي ربنا يطلعها بالسلامه يارب قلت ليها إن شاء الله بعد مسافه الممرضه جات قالت لينا الحمد لله قدرنا نعوض الفقد ووقفنا النزيف حالتا مستقره بس لازم تواصل في ادويه معينه لي فتره عشان عندها سيوله في الدم الدكتور كتب لينا الادويه وخرجونا طوالي رائد مشى جاب الادويه ومشينا البيت خالتو عاليه مشت معانا برضو اول ما دخلنا رائد كان شايل وجن دخلها غرفتا وساق حسن برضو عشان ينوم جاء لقانا انا وخالتو قاعدين في الصاله قال لي تقى تعالي عايزك في موضوع مشيت لحقتو قال لي اكوي لي احلى بنطلون وقميص عايزهم بكره قلت ليهو ماشي تعقد ولا شنو ولا يمكن عرس بالمره قال لي ياخ يا تقى معقوله اعرس وانا عندي مرتين مطلعات اخلاقي قلت ليهو طيب عايزهم ليه احلى بنطلون وقميص ديل قال لي بي بساطه عندي بكره مقابلة شغل فهمتي قلت ليهو بجد يعني ح تتوظف قال لي اي إن شاء الله
والله فرحت فرح لانو رائد كان مهموم شديد من قصة الشغل دي قلت ليهو الحمد لله يا رائد ربنا يرزقك ويوفقك ويسهل طريقك يارب قال لي الله الدعوات الحلوه اشتقت ليها ياخ ،، يلا اجري اكويهم لي وبوعدك من اول مرتب عندي ليك مفاجأه من نوع خاص😉 قلت ليهو طيب منتظره
مشيت كويت ليهو ملابسو ودخلت المطبخ عملت العشاء إتعشينا خالتو عاليه قالت ح تمشي انا ورائد اصرينا عليها تبيت معانا بعد إصرار مننا وافقت قعدنا نتونس لحدي الساعه وحده حتن نمنا...
الصباح رائد طلع مشى مقابلة الشغل كنتا منتظره متين يجي عشان اسمع خبر توظيفو بس لمن جاء ملامح وشو خالفة كل توقعاتي....