مسكتني حمه ووجع راس رائد جا لقاني اهضرب قال لي تقى مالك قلت ليهو حاسه نفسي ما كويسه لمس راسي لقاني محمومه قال لي قومي نمشي الدكتور إتصل على تغريد قال ليها تعالي البيت امسكي الاولاد ديل لانو تقى عيانه ماشين المستشفى إتحججت ليهو بي حجج كدا المهم سقناهم وديناهم لي خالتو عاليه ومشينا المستشفى عملنا الفحوصات وبقينا منتظرين النتيجه جاتنا الممرضه قالت لي انتي تقى قلت ليها اي قالت لي نتيجتك طلعت شلتها ومشيت للدكتور مسكها مني عاين ليها مسافه قال لي عندك ملاريا لازم تحافطي على نفسك وما تجهديها وكمان صحة البيبي اهم حاجه عاينت ليهو قلت ليهو قصدك شنو يا دكتور قال لي إنتي حامل في الشهر التاني واي جهد ممكن يعرض حياة الجنين لي خطر طلعنا من الدكتور رائد قال لي ح اكون اب لي بنوته او ولد صغير تاني يا سلام قلت ليهو بس يارائد حسن لسه صغير يا دوب تمه سنه قال لي مالو يعني ربنا رزقنا نقول لأ مشينا البيت بقيت مرتاحه رائد بقى يعمل لي اي حاجه وحتى جاب لي خدامه شغاله لي لحدي ما جاء اليوم المشئوم يوم رائد جا من الشغل وباين عليهو مهموم قلت ليهو في شنو يا رائد ؟ مالك ؟ قال لي مشاكل في الشغل بس مافي حاجه كان دا ردوا كل مره اشوفو كدا لحدي ما فاض بي قلت ليهو إلا تحكي لي الحاصل عليك شنو قال لي والله يا تقى الشركه ح تقفل قاعدين يصفوا في الحسابات ولي كم يوم افتش لي في شغل ما لاقي ما عارف ح يحصل شنو لي قدام قلت ليهو يا رائد ربنا كريم وأكيد ح تتحلى قال لي إن شاء الله
صباح اليوم التاني مشى الشغل لقى الشركه جايطه وخلاص دايرين يقفلوها المدير اداهم مرتباتهم وتمتموا الحسابات وقفلوها!!
حالنا من بعد الشركه دي بقى ماشي في تراجع بقينا مرات الاكل ما بناكل او بناكل وجبه في اليوم رائد بقى مضغوط شديد يفتش في شغل وبي هناك تغريد كل يوم عامله مشكله جديده في عدم القروش بس الحمد لله لحدي ما يوم ربنا فتحها عليهو لقى ليهو شغل في بقاله الحمد لله بقت ما كلانا ومشربانا قدر القروش البتجي من البقاله رائد ما مقصر مننا نهائي ، يوم جاتني مرة جيرانا قالت لي فقدتك في القهوه شايفاك بقيتي ما قاعده تجي قلت اشوفك مالك قلت ليها والله كنت عيانه شويه وهسي احسن قالت لي اي والله ظاهر التعب في وشك مالك إن شاء الله خير قلت ليها ملاريا بس ما حاجه كتيره قالت لي معقوله دي ملاريا إنتي يا تقى حامل؟ قلت ليها إنتي بتقري الافكار ولا شنو قالت لي لأ لكن ظاهر عليك قلت ليها اي قالت لي معقوله يا تقى إنتي ولدك يا داب تمه سنه قلت ليها اي اسحريني قل هو الله احد قالت لي يابت دا لي صحتك قلت ليها ربنا كتب لي كدا مالك إنتي يا إحسان قالت لي ونعم بالله بس حافظي على صحتك اعملي تنظيم قلت ليها سمح طلعت مني جا رائد داخل قلت ليهو اها حصل شنو يا رائد قال لي قدمت في شركه وما شالوني اعملي لي غدا انا طالع ماشي لي تغريد دي قالت دايراني في موضوع ما ينفع في التلفون قلت ليهو يا رائد امبارح إنت كنت معاها لو في موضوع ليه ما إتكلمت معاك فيهو أمبارح
قال لي مالك يا تقى بقيتي تحقيق تحقيق مالك في شنو بعدين هي مرتي زي ما إنتي مرتي لا وكمان هي مرتي من قبلك فاهمه قلت ليهو فاهمه يا رائد بس الاسبوع دا علي قال لي ح امشي واجي راجع يااخ ما تقفلوها اكتر من ماهي مقفله وطلع زعلان حتى الغدا ما اكلو عملت لي وجن وحسن الاكل اكلتهم وسرحت لي وجن شعرها ومسحتهم طلعوا يلعبوا مع اولاد الجيران إتصلت لي رائد ابى يرد حاولت فيهو كم مره ابى يرد لبست توبي ومشيت ناس لي مزدلفه جارتي قعدت إتونس معاها حبه عملت لي قهوه قالت لي لي زمن ما شايفاك قلت يمكن رحلتي😅 قلت ليها ارحل وين ياهو قاعده قالت لي ومالك ضعفتي كدا يا يمه قلت ليها كنت عيانه والله قالت لي اي والله ظاهر عليك المرض قلت ليها ما جبتي بضاعه جديده طبعا هي عندها تياب وكريمات وحاجات كدا خرافيه بجيها إتفرج بس ما حصل إشتريت منها قالت لي اي جبت لي تياب جديده قلت ليها كدي جيبيهم النشوفهم قالت لي إنتي يا تقى ما قاعده تشتري مني قلت ليها هسي في داعي للاحراج ما إنتي عارفه ظروفي بعدين يمكن الله يفتحها واجي إشتري منك قالت لي يورينا الله يوم تجي تشتري دا مشت جابتهم لي وجات طبعا حاجات رهيبه كان نفسي إشتري منها عاينت ليهم وطبعا برفع اعاين واعلق لحدي ما سمعنا صوت الاولاد براا علا قلبي قبضني قلت لي مزدلفه دا صوت اولادي قالت لي يكونوا بلعبوا طلعته لقيت ولد كبير قاعد يدق في حسن والحجار حجر ماشي وحجر جاي جريت مسكت ولدي وقعدت اشاكل في الولد بلا يجي حجر من هناك زحيت من طريقوا بلا جاء في وجن وفي راسا صرخت وجن!!