رواية سجين الحب الفصل التاسع عشر19بقلم زهراء الحريري
"رجلان اتعبهما الكبرياء"
تُحبني …
انها تُحبني بملئ قلبها
في كل اشراقة صباح … وفي كل موقف تشد على يدي وتقول لي "انتَ دُنياي"
لم اشك يوماً في نبضها… ولا في سكني بين ضلوعها
ولكن …
لكن نارًا من الغيرة كانت تحرق صدري كلما مرّ اسمك
لأني رجل ذو كبرياء …
و الرجل حين يُحب يريد ان يكون الاول والآخر
يُريد ان يكتب التاريخ، يُريد ان يكتب التاريخ من لحضة ولادته؛ ويمحو كل ما سبق.
ربما هو التوق الذكوري لـ امتلاك الماضي و الحاضر والمستقبل بلا شريك ولو بالذكرى.
كانت تُغضبني تضحيتك الصامتة، عزوفك
العظيم طوال عقدين من الزمن يلتف حول عنقي كحبل من حرير، يخنقني بـ لطف فلا استطيع الشكوى او اضهار العداء.
كنتَ تمنح حبنا شاعرية لا أُريدها، وتجعل من زواجنا السعيد قصة تُبنى على انقاض قلبك.
كنت اغار … ليس على قلبها فقط، انما على كبريائي ايضا
كيف لـ رجل اخر ان يضل شاهدًا على بداية الشغف؟
كيف اقبل ان تكون انت اسطورة الوفاء في حكايتنا؟
و اليوم …
و بعد ان تساقطت حسابات السنين كما يتساقط الورق الجاف في مهب الرياح
وبعد ان احرقت اسطورة الوفاء الزائف، واخرجت نفسك من وهم حارس العشق الاعمى،
بعد ان هطلت على ارضكِ الجافة سحابة طيبة، و اقنعتك ان الارض لا تتوقف عن الدوران لأن وردةً ما قُطفت في اول الربيع، و اصبحت رجلا مثلنا تقتسم الخبز مع امرأة اخرى.
حين نطقت بالسلام، ومددت يدك بالصلح …
كنت دون ان تدري تحرق ذلك الشبح الذي أرقني لأكثر من عشرون عاما.
كنت تطوي راية حرب خسرنا فيها كلينا اجمل ايام العمر.
••------------- ❀❀❀ ----------------••
أريـد بهذا القسم واللي وراء تعليقاتكم على ڪل الفقرات احب تعليقاتڪم اريد اقراهن وراء الختام 💚🍯
••-------------- ❀❀❀ ---------------••
«درة»
زمزم يوميه تجي تساعدني تكمل وياي وتروح لبيت اهلها حايرة بيني وبين امها
بسبب زعل سراج ولؤي ما حسيت بطعم رمضان مثل ڪل سنه عبن لؤي طافيـة روحه ومابيدي شي بس ادحك عليه مابقى من لؤي بس المظهر لا ضحكته ولا سوالفه
بيوم العيد راح يسلم على الحجيات تأملت خير يشوفه ويتصالحون
رجع متأذي اضعاف، سألته ها ماشفته جاوبني بعصبية وصياح
لؤي:- انه رايح اسلم على عماتي مو حتى اشوفه
درة:- شبيك لؤي ليش هيج تصيح بوجهي اني شڪو اذا انت وياه متخاربين ترجع عليَّ
باس راسي وهو يتعذر مني هضمني بصياحه فوك ما شايلة همهم
لؤي:- اعذريني بويه ينكص لساني اذا قاصد اصيح بوجهج
نزل اديه وراسه كال
لؤي:- اليوم سوة وياي دڪة ناقصة ما انساها اله
درة:- يعني شفته؟
شسووه!
ما جاوبني ظل ساڪت ياڪل بروحه ثاني يوم خليت يمان ياخذني لبيت سراج سلمت على الحجيات وعايدتهن حجيت ويا بسمه على وضع لؤي كالت وسراج هم نفسه وكل ما احاول احجي وياه يسڪتني
رحت لحديثة اعايد اهلي نقهرت اڪثر بسبب وضع مجد اللي لسه مايڪدر يحجي وما يقبل يروح للدكتور حتى غرفته مايطلع منها الا وقت الحاجة وزوجته خلصتها تدعي على آصف كبالي
جنت مقررة ابقى يمهم اسبوع تالي ثاني يوم خابرته يجي ياخذني كال
لؤي:- بعدني يم أهلي ما شبعت منهم ماڪدر ارجع واريد اخذ أمي للنجف اتصلي آصف يجي ياخذج
خليت اوس يرجعني مو مال اتصل على آصف واجيبه وعلاقته هين مع ابوي متوترة اڪثر من قبل
اخذنا سونار اني واثيلة اثنينا سوة عبن اثيلة بالبداية ماكدروا يعرفون الجنس لان على المقعد فأجلت مراجعته وياي
اثنينا الجنين ولـد رجعت للبيت اريد افرحه بهذا الخبر اريده يرجع على سوالف الانكريز والانتاج اشكد جان يضوجني بيهن هسه صرت اتمنى يرجع عليهن ولا يبقى هيج جثة بلا روخ
استقبل الخبر بشكل عادي حتى ضحڪة ماڪو رغم جان يدعي الله يرزقنا بأخو لعلوش، قررنا نسمي حسن وابن آصف قرروا يسموا محمد
عفت زمزم تلعب بالجهال صاروا يموتون عليها ومن ترجع لبيت اهلها يرحون وياها مرات تا مايفعلون يرجعون بالليل ينامون يمها جثير ساعدتني بيهم وخففت عليَّ ونوبات بسوالفها اطلع لؤي من وضعه
دخلت عليه متمدد على السرير ساند راسه بالتاج مكتف اديه يدحك على البنكة
لؤي:- وفينه وفينه شڪثر ويناس ماتوفي وفينا
هاي من العيد لليوم كلما يبقى وحده يجر بيها لدرجة مرات الكى دموعه نازله على وجهه
تنهدت وطلعت لان الحجي مايفيد وياه تعبت واني احاول بأقناعه يروح يراضيه ولا يبقى هيج، كعدت على القنفة منتظرة ترتيل ومهند عيوني على زمزم مكعدة بنان على ظهرها وتفر بيها الصالة وعلوش كامش السيف العصب ويركض وراهن طلعت الصوندة من جوا القنفة كصيتها لترتيل ومهند طلعوا روحي وما يتعلمون …
••------------- ❀❀❀ -------------••
زمزم- واني ماريد ويا سمرر
ڪوثر::- وشنو نبقى بدون فساتين
باوعت على اثو حطت ايدها على راسها
اثيلة:- اطلبن توصيل وفضني
ڪوثر:- اني ماريد الا اختار بعيوني
زمزم:- والتوصيل بشنو تختارين بخشمج غير تشوفين بعيونج
بس انتي ادورين اعذار حتى اطلعين ويا عسل
كوثر:- يلا خوووش نختار توصيل
حجت وهي تباوع عليَّ منتظرة ردي
زمزم:- صدك اني هم ماحب الا اشوف بعيني واختار بعد ما البس واشوفه عليَّ
باوعنا على ماما رفعت اديها وهي تصيح
اثيلة:- يبووووووه
زمزم:- انتي اخذينا مو هاي عسل امها بكل مناسبة تاخذها تفرها
اثيلة:- ما تشوفن رجليه شلون مورمات وين اكدر افتر بيجن
خلي أبوجن ياخذجن اني لوما الحمل يوميه اخذجن
باوعنا عليه كاعد يلعب كيم هو ومصطفى
ڪوثر:- آصف
زمزم:- المززززيون
آصف:- والله ما اخذجن شسويتن بيه من اخذتجن ذيج النوبة منجدتني زمزم ما يعجبها وكل شوية تغير وكوثر من تسمع بالسعر تجفل وتصيح شنو مخيط بخيوط ذهب
كعدنا بصفه منا ومنا فريت وجهه عليَّ
ـ حباب ابو الصوف المزيون
كوثر فرت وجهه عليها
ـ لك يئلبي دخيلك و دخيل يلي سواگ لگ انا مابعشئ غير هواك
آصف:- هالمسلسلات السورية طلعت لسانج علينا
ڪوثر:- تأبش ألبي أبش وتنكش شعري نكش ومابعرف كيف اندحشت بألبي دحش
آصف:- لا دحش ولا بحش ولا خرط ولا تحاولن ابد والله حالف ما اطلع وياجن، روحن ويا خالتجن
زمزم:- ما اريد وياها تشتريلنا الا على ذوقها وعسل تخليها تختار بكيفها واحنا مثل ساندريلا مظلومات بس نشيل بالاكياس ونمشي وراهن
ضحك وهو يغطي عيونه ضربته على صدره واني اخزر بيه
آصف:- اضحك على عقلها تريد بنتها تطلع احلى منجن
ڪوثر:- لا والله ما تجبرنا بس تنصح اذا محلو الفستان زمزم لا تجذبين عليها أصلاً خالتي حبابه ويانه وتعاملنا مثل عسل لا تصدك بيها
زمزم:- لعد وفساتين العيد مو هي اختارتهن النا والكل كال مو حلوات مبهذلات علينا
اثيلة:- يول شنو مو حلوات غير احلى الفساتين انتي واختج بس سمر گملتها بكعة وياج
زمزم:- لا ماريد وياها والله تظل تكرص بينا اذا نوكف وتعض بصبعها وتصيح التوبه اطلعجن بنات الحقود
ڪوثر:- اي غير انتي تشلعين گلبها وهي مريضة بسرعة تتعب
باوع على ماما كالها انتي ما تصيحين على اختج معنفة بناتي
اثيلة:- اختي خليها تسلم من بنتك النوب اصيح عليها
ومازال الحجي صار هيج عجل اخذهن انت
رجع يلعب ويحجي ويانا
آصف:- يورن گلبي ما اخذهن خاصة زمزم تشتري وبعدين تشوف غيره يعجبها وتخلصها هيج نشتري ونرجع
حطيت راسي على كتفه ابجي بصوت جذب
آصف:- بعد جريها بونه تا اصدكج
ڪوثر:- اني ماعليه بيج والله اطلع ويا خالتي وانتي ابقي قنعي بيه
زمزم:- الانتحارية
ضحك بابا باوع عليَّ وهو يكول
آصف:- شلون طفرة طفرت جنها مارادونا
كوثر:- منو هذا؟
ضميت ضحكتي كتلها بخباثة واحد شكله حلو ابحثي عنه
اخذت تلفون اثو تبحث عنه واني وبابا نباوع عليها وضامين ضحكتنا من شافته ضلت تكمز
كوثر:- هذا القزم المربع يشبهني
زمزم:- احلى منج هذا اسطورة انتي شنو انجازج غير الطفرة من فوك السطح وهم مادبرتيها بقيتي عايشة
زعلت وبابا لحكها يركض، جابها شايلها على كتفه تسوي نفسها دتبجي وهي ادور بجيوبه طلعت الفلوس تحسب بيهن
كوثر:- لا تنزلني بعدني زعلانه يئبرني هال وش الحلو
اخذت منهن ورجعت الباقي لجيبه
ڪوثر:- يلا نزلني رضيت وشبيه هذا القزم المربع حلو
زمزم:- امداج ام فلس
اشرت عليها واني احجي ويا اثو
زمزم:- هاي تبيعنا بخمسين الف
ڪوثر:- عيب شنوو بخمسين ابيعج بخمسة تالالف
باوعت على اثـو كتلها والحل
اثيلة:- ما عندجن غير سمر
اجيت اڪولها نروح لماما نفس بس خفت هي وبابا يفهموني غلط نزلت راسي على ڪتفي ليش عايد الڪل واني لا شنو يضوج مني يوم احبه يوم اكره يوم اضوج منه احس بداخلي شي ما مفهوم وياه غضب
عفتهم وطلعت على سلاحفي اباوع على اللي جابها شلون ڪبرت
العصر رحنا على سمر ومن حسن حظي لكينا ماما نفس موجودة حتى يرحن سوة من الفرحة حضنتها وابوس بوجهها
ضحكت وهي تبوس راسي
نفس:- بجعتي الحلوة
شلونج ماما
كتلها الحمد لله رفعت وجهي لـ اذانها
زمزم:- الحمد لله تروحين ويانا وما نبقى على سمر
ضحكت تباوع بوجهي استحيت من نظراتها تتفحص بوجهي مسدت على راسي وهي تتنهد ابتسمت وهي تكرص خدي بلطف
الجهال كلهم من اسواق عمي يونس وكرم بس احنا الڪبار ماعندهم موديلات على اعمارنا
صعدنا بسيارة آدم حتى سلام ماسلمت عليه مو زعل بس احس خجلانه منه وبنفس الوقت عصبية على شنو ما اعرف، بقيت دايرة وجهي علي الجام اني وراء ماما نفس وسمر وراء آدم وعسل وكوكي بالوسط المكان ضيك نسفطت بالباب
آدم:- غاليتي ما كلتي انتظرڪم لو اروح؟
نفس:- لا امي روح من نكمل نتصل عليك
آدم:- تمام براحتڪم
عسل شلونج بالدارسة
عسل:- ڪل المواد مسيطرة عليها بس الفيزياء والانكليزي والاحياء والعربي
آدم:- هذني ڪلهم وانتي مسيطره عجل اذا ما مسيطرة شلون
باوعت عليه من ضحك اخزر بيه مايشوفني أصلاً رجعت عيني انتبهت على ماما نفس تباوع عليه بالمراية الجانبية، بقى يسولف ويا سمر وبنتها ساندريلا وينصح بيها شلون تقرأ وتراجع همست وحدي راح تصير دكتورة
نزلنا وراح اني وقمر ويا ماما نفس وسمر اخذت عسل وكوثر وياها يعجبني شي ومن نتقدم يعجبني غيره واظل محتارة ڪلهن ڪملن وتجمعنا سوة بقيت بس اني ادور ومن الحيرة صارت ڪل الفساتين ماتعجبني ومنا ما اعـرف شبية ضجت بدون سبب حتى الحنة قررت براسي ما احضرها
زمزم:- اني ماريد اشتري عندي
نفس:- ليش حبيبتي
اذا على الوقت ماعندنا شي اختاري على راحتج
حتى لو آدم يرجع خالتج والبنات واحنا نبقى
زمزم:- لا ماما ماريد مايعجبني شي وهم عندي فساتين البس منهن
ڪوثر:- ليش زومه!
اختارلج اني
هزيت راسي لا باوعت على عسل ورجعت عيوني اباوع بعيد عنهن
نفس:- اختارلج اني
زمزم:- لا ماما والله ما اريد عندي هواي
سمر:- بعد وقت حبيبتي تعالي ندور واذا ماعجبج اني ونفس نختارلج على ذوقنا
بقن مصرات وياي واني من يقنعون بيه يزيد رفضي ما اعرف ليش عيوني ڪل شويه تصير على عسل لازمه ايد امها وتحجي وياها تريد تشتري بعد اكسسوارات
ڪوثر لازمه ايدي وتحجي وياي تقنعي بيه اشتري نفس فستانها
ماما نفس اتصلت على آدم يجي ياخذنا بعد ما تعبت مني اجى اخذنا ظليت كاسرة رگبتي على الجام
نفس:- شراح تلبسين
زمزم:- عندي والبس منهن
ڪوثر:- صـار يومين تلحين ليش ما اشتريتي
والعندج ما عاجباتج ليش ضجتي زومه
ما جاوبتها بقيت اباوع على الشارع
ڪوثر:- اخذي هذا فستاني واني البس من فساتينج
باوعت عليها بستها بخدها
زمزم:- لا لو اريد جان اشتريت
صارت عيني عليه يباوع عليَّ من المراية الجانبية درت وجهي عنه زعلانه وحدي
آدم:- اذا بعدجن ما مكملات ارجعڪم ماعندي شي انتظر ليما تڪملن
نفس:- ها زمزم نرجع
زمزم:- لا ماما والله ما اريد عندي هواي والبس منهن
آدم:- بنفسج شي ومالڪيتي
ما جاوبته ولا هو رجع سأل بعد نزلونا كبال الباب سلمت على ماما نفس ودخلت بسرعة كرهته وكرهت عسل وياه
اثـو من حجتلها ڪوثر كعدتني بصفها تسال ليش ما اشتريتي كتلها ماعجبني شي كالت اخلي ابوج ياخذج الصبح
زمزم:- لا ما اريد
أثيلة:- هسه اختارلج من البيجات ووصيهم ما يتاخرون
هزيت راسي لا حاولت وياي هواي واني قافلة ماريد
العصر ماما نفس مرت عليه جايبه فستان الي كتلها ما اله داعي والله واصلاً اني ما اروح للحنة
اثيلة:- لييييش ماما مو صار أسبوع تحجين بيها وفرحانة
نفس:- ليش حبيبتي شنو المضوجج
زمزم:- ماڪو شي مضوجني بس ما حابـة أروح
بقن يحجن وياي اثنينهم اخر شي بجيت كتلهن ما اريد اروح ليش تلحن وياي عوووفني ماريد اروح
اثيلة:- احجي شبيج من طلعتي جنتي فرحانة شنو اللي تغير
زمزم:- ماڪو شي تعبانة وما اريد اروح
اثيلة:- زمزم هذا مو سبب احجي شبيج
باوعت على ماما نفس ساڪته تباوع عليَّ رجعت عيوني على اثو
زمزم:- مابيه شي والله بس ضايجة وحدي
اثيلة:- اي شنو اللي مضوجج لازم اڪو سبب
صحت واني ابجي ما ادري شبيج وياي
اجيت انهزم منهن كمشت ايدي رجعتني
اثيلة:- احجي ماما شبيج
ما جاوبتها ماما نفس حجت وياي واعرفها ما تعوفني الا اوافق كتلها تمام اروح هيج يلا ڪدرت انهزم منها
بالليل ڪوثر تجهز بنفسها واني ڪاعدة اباوع بالتلفون بملل حتى ما منتبه شنو يطلع كبالي
اثيلة:- ها زومه شو بعدج ما حضرتي نفسج!
زمزم:- ما اروح
اثيلة:- يلا حبيبتي كومي وجهزي نفسج مو عيب ما تحضرين حنه بنت خالج
زمزم:- على شنو عيب تعبانة ومريضة ماريد اروح
اثيلة:- ليش بعده وقتها
باوعت عليها وين راح تفڪيرها ظلت تباوع عليَّ كالت لڪوثر اتصلي على عسل تمر عليج روحن سوة واني بعدين الحكج
من راحت ڪوثر كعدت اثو كبالي ڪالت احجي شنو بيج
زمزم:- يعني الا بيه شي
تعبانة واحس بالنحول ما اريد اروح
اثيلة:- تمام ابقى وياج هم ما اروح
كتلها براحتج طفيت تلفوني وتمددت غطيت نفسي بس راسي مطلعته
اثيلة:- احجيلي شنو صار من رحتي والله ما اعصب عليج
ما جاوبتها غمضت عيوني اسوي نفسي نايمة ليما غفيت صدك من صحيت لڪيت بابا نايم يمي
باوعت على الساعة بـ 12 طلعت للصالة محد موجود لڪيت عشاء بالمطبخ على الڪاونتر تعشيت ورجعت حس عليَّ
آصف:- ها جمارتي ڪعدتي
تمددت راسي على ايده كتله اي جعت وكعدت
آصف:- من خابرتني امج جبتلج عشاء وياي تعالي تعشي
كتله تعشيت بيه فهمت منه ماما مبلغته سڪري صاعد واخذت علاجي ونمت وطالبه منه يجي يبقى يمي
ضميت وجهي بضلاع صدره واحس الم بصدري شلون الڪسر ومن راحت ضوجتي الم الندم موتني لان ماحضرت الحفلة واني صار أيـام منتظرتها بجيت وبابا محتار بيه ما سكتت الا راسي احسه نسحك من الالم …
••------------- ♡♡♡♡ -------------••
بســــــــــــــمة
احلى شي سوته ترتيل خلت حنتها قبل مهند حتى نحضر الحنتين
ڪعدت يم درة وعيوني على البنات عسل وڪوثر لابسات نفس الفساتين الله يحفظهن جنهن حوريات يركصن كتف بكتف حركاتهن هادئة وحلوة ماكو رعبله بالركص وهاي كوثر تخبل طالعة جنها لعابة
عيوني صارت على نفس كاعدة بصف اثيلة تحجي وياها ومندمجات وحدهن
حجت بذاني تماضر:- لو عندي ولد ثالث الا اخذله ڪوثر
ابتسمت من ذكرت امي رادت تخطبها لابن عدنان وخالي كالها الا مسودنة انتي
كالتله ليش وشبيه وشناقصة حتى دراسة راح يكمل و وضيفته موجودة
كالها غير ابوها يودي ورا الشمس اطلبي روحه ولا تخطبين من بناته
بسمه:- لا تخطبين من بنات المسلول ولج شراني هذا عيونه هيج تلمع بشر وحقد يخوف
تماضر:- لا والنعم منه خوش ولد صديق سراج واله وڪفة وياي ما انساها والله لليوم ادعيله بكل فجر وراء الصلاة
كالت عوفينا منه باوعي على جنتي شحلاتها طالعة باوعت على ترتيل اللهم صلِّ على محمد وآل محمد ولا لوله بيها تخطف العين
دورت على مزنه ماڪو هالبت اشكد اداهر وياها بس والله احبها لان تحجي طك بطك وماتنكدر بالرد
تسفطن كلهن عدا درة واثيلة لان حوامل تشابكن بالايادي نفس اشرت لتماضر تعالي راحت وكفت بينها وبين بنان الكل حركاتهن مضبوطه الا نفس وتماضر خلصنها ضحك ومايعرفن يارجل يرفعن
اخر شي سمر طردتهن اجن كعدن يمي يضحكن
نفس:- كتلج ارفعي رجلج اليمين
تماضر:- غير سمر خردلتنا نسيت وين اليمين ووين اليسرى
ضحكن وهن كاعدات يرفعن برجليهن عود يتعلمن من الضحك بطلن
تماضر:- صارلج سنين وياهن ماتعلمتي كم خطوة
نفس:- اني احب بس اباوع هاي اول مرة اشارك لخاطر عيون ترتيل
تماضر:- يا يمه اختنكت الله يجعلها ضحكة خير سمر عوزها شويه وتخنكنا
باوعت عليه كالت شلونج بسمه كتلها الحمد لله رجعت عيونها على البنات تباوع عليهن تنهدت وهي تهمس اوف منج زمزم
ترتيل اشرت لامها راحتلها بسرعة وهي تأشر لسمر تنصي الديجي
ـ ماما مهند وصل
باوعت علينا ڪالت العريس اجى يحني عروسته كلهن لبسن صاياتهن والحجابات وكعدن
تماضر وبنات عمه وعماته بالهلاهل تلكوه
كعد يمها يباوع عليها ويضحك ولا مهتم بوجودنا شوية وهو وياها كاموا وكفوا بالوسط شابك ايده بيدها وبجفوفهم الثانية شايلين قطعة قماش صغيرة من نفس لون بدلتها ويدبكون
تماضر:- ارنوبة لؤي خوش مشتغله شغل
ضحكت لان درة صارلها شهر تعلم بيهم شلعوا گلبها يلا تعلموا واخر ايام لازمه الصونده والي يتحرك غلط تمسده بيها طلعوها من طورها
من كملوا الدبكة رياحين طفت الاضوية وبقت بس الثريات مال الصالة حاضنها يركصون وكل شويه يشيلها يفرها ومفهي عليها وهي تتلفت تضم بوجهها عنه مبينه خايفة يسوي سوايت حفلة المهر من دنك باسها
تماضر حضنت كتف نفس وطبكن اديهن ضحكت نفس وهي تكلها
ـ نزول عليج كبرنا واستخفينا شنو
ـ حتى ماتظل بنفسنا
ـ من ارجع للبيت اشغل هالاغنية ونركص اني وذيب وانتي وابو مهند هم
ـ اي اذا ماركص ذيبج منو يركص خلينا ساكتين
كعدوا كبالهم كاسة جبيرة مكتوب عليها الليلة حنتي وبيها حنـة اخذ منها حنى ايدها ماحط فلوس حط ليرة ذهب وربطها بالوردة
يباوع عليها يحجي وياها ويضحك سووا جلسة تصوير احنا كاعدين نباوع النوبة ماكو ولا صوت حالنا يضحك والله
باوعت على تلفوني بحضني فتحته على الواتساب أبتسمت داز صور الي ما منتبها واني اجهز بروحي واكفة كبال المراية البس بالتراجي وهو كاعد على القنفة ومصورني شوف تعابير وجهي تفشل فشلني الله وهو ماعرف يصور الا واني مبوزه
دزيتله شيريد الحجي؟
سراج:- يريد مريته يمتى يجي ياخذها
بسمه:- بعدهي الحنة ماخلصت
سراج:- راح اجي اخذج
طك گلبي عليج
دزيتله تمام تعال دز صدك اجي لو تشاقين؟
ـ لا اشاقـه وياك ما اجي الا اكمل الحنة
سراج:- اسويلج حنه خاصة
بسمة:- اممم جا حضرت حنتنا مو خليت وغلست
سراج:- احبج
ظليت اباوع على الشاشه اقرأ بالكلمة صدك يقصدها لو هيج يفرحني بيها
رجع دز واحب اللي يحبونج
ابتسمت سديت التلفون ورجعته لحضني يجي يوم وتكولها صدك حجي سراج، اباوع على العرسان رفع ايده بعد الشعر عنها من شافها تضايقت منه ياكل بجتفها
بعد ماخلصت الحنه رحنا على خالي نحجي وياه وهم نفس ڪل مرة ما ناخذ لا حق ولا باطل سراج من كال وين كتله بيت خالي دزلنا علي اجى رجعنا لكينا بالباب منتظرنا شاورني لا تغيرين ملابسج
دخل امه لغرفتها وعمته وراهم صعدت لغرفتي نزعت الصاية وكعدت منتظرته ينومهن ويجي باوعت على الايباد مشمور على الجرباية بمكانه فتحته طلع كبالي فلم عراقي قديم اسمه نعيمة
دخل سد الباب اجى عليَّ وهو يصفك بديه ويغني بضحكة
سراج:- بوية فريتج على الكون فريتج على الڪون
بوية نعيمة ويا نعيمة
لزم اديه وكفني كباله فتح اديه وهو يبتعد يباوع على طولي
سراج:- طاغيــــة
فرني حضني من ورا شم شعري كال حلو عطره
بعد الشعر يجمع بيه على كتفي ويبوس الجرح بكتفي الثاني
بسمه:- لوما حامل جا شوفتك ركصي
سراج:- ما احب الركص اضوج منه
نزل ايده على بطني ساند حنكه بكتفي
سراج:- شلونها بنتي خوما متعبتج؟
بعدت اديه عني كعدت على القنفة اجى كعد بصفي
سراج:- شبيج ابوية انتي
بسمة:- يمتى تتصالح انت وخالي
عدل كعدتـه يباوع كباله كتله
ـ خالي ڪلش متغير بزعلتك عليه موتت روحه وعلي
ـ واني روحي جاي تتقطع عليه
ـ جا ما تتصالحون منو لازمكم كافي زعل صارلڪم كم شهر محد يحجي ويا الثاني
فاتح جف ايده واصابع ايده الثانيه تمسح بجفه
سراج:- بهاي الدنيا ماعندي اخ غيره والله احسه أبن روحي معزته محد يعرفها غير الله والڪاظم كاعد بنص النفس
باوع عليَّ وكمل
ـ خالج
سكت ماكمل مسح وجهه بجفوف اديه ويرجع بشعره
سراج:- خليني بضيمي اون والهضم كاتلني عندي بس اخو والاخو عايفني
مسح عيونه وطلع.. ثاني يوم حضرنا حنة مهند بعرسهم والله شبعنا حفلات …
••----------- ♡♡♡♡ -------------••
رحت تا أرجع امي وكفتلها كبال بيت عمي باسل طلعت عمتي اثيلة وڪوثر وياها سلمن عليَّ وراحن
افڪر بيها عجل وينها
شنو باقية هينا لو رجعت قبلهن؟
طلعت امي فتحتلها الباب صعدت سديته وفتحت الباب الخلفي لقمر
صعدت وبعدني فڪري مشغول بيها اريد أسال امي ومتررد منتظرها هي تحجي عجبها الفستان لو لا
قربنا نوصل وامي ما حجت ماڪدرت بعد سألتها
آدم:- عجبها الفستان؟
دحكت عليَّ كالت عجبها او لا ما أعرف، وهماتين ما اجت للحنـة
آدم:- السبب!!
دحكت عليَّ بطرف عينها رجعت ادحك كبالها
نفس:- داخلة بمرحلة عمرية يصير بيها الانتقال من الطفولة للمراهقة واضح ومربك مشاعرها تصير اقـوى بس قدرتها على فهم هاي المشاعر والتعبير عنها بعدهي مو مكتملة
شافت اهتمامك بعسل بعين مختلفة مو لان اهتمامك غلط لا بس مشاعر زمزم اتجاهك خلتها تنتبه لكل حركة منك
آدم:- بس أني ما سويت شي غلط ؟
نفس:- أعـرف امي
لا نستعجل على مشاعرها ولا انطيها اسم هسه ما تحتاج تعرف شنو تحس تجاهك بقدر ما تحتاج تعرف شلون تتعامل ويا أي شعور يجيها
هزيت راسي اي وشعور الذنب ياڪل بروحي عفت ڪل الاوقات مالكيت وقت مناسب اسأل عسل على دروسها الا بوجود زمزم
••---------------♡♡♡♡---------------••
«الريــــس علي»
رتبنا الڪراسي على شڪل دائرة ڪبيرة اطرافها متصلة بالمنصة، على العشاء عمي لؤي ما اجى بلش الحفل الاجواء مليانة بالاصوات والضحك والمصورين موزعين بين الحضور والشعراء والمطربين، يوثقون كل لحظة، مهند اشرلي بيده رحتله كال
ـ عمي لؤي تأخر ما اتصلت عليه شوفه شصار عـنــده
بعدت عن الاصوات اتصلت عليه ڪال وصلتكم شويه على الاتصال دخل وابنـه يمشي وراء خطوة بخطوة يقلده، ڪلها كامتله افتر عليهم بالسلام وابنه يسوي نفس الشي يمد ايده الصغيرة لكل واحد يشوفه ابوه يسلم عليه
اشرت للمصور القريب بحرڪة سريعة واني احجي:- صورهم وخلي تركيزك على الطفل
وصل بالسلام لخالي محد بيهم باوع على الثاني بس طخوا ايد بأيد بحركة سريعة ما يسمى سلام خالي دنك على علوش مد ايده يسلم انطاه ايده وهو يدنك عليه باسه براسه بقى واڪف يمَ ماڪمل وراء أبوه
كعد وابنه بقى يم خالي كعده بحضنه متعودين عليهم بالمناسبات يكعدون واحد بصف الثاني هاي اول مناسبة نشوفهم ڪل واحد بطرف حتى اللي يعرفونهم انتبهوا عليهم …
خلصت الحفلة وبلشت العالم تخف بس المقربين بعدهم لؤي اشرلي
رحتله بسرعة كال جيب ابن عمك اريد اروح
علي:- شنو تروح حفلتنا الصدك هسه بدأت
لؤي:- لا يبعد عمك راسي كام عليه عفت الخفارة واجيت
اشرت لابوي ومهند من اجوا كتلهم تعالوا اسمعوا يريد يروح
ابوي ڪال وين يروح ماڪو روحه ابو مشتاق يريد يسمع هوساتك
لؤي:- شڪالولك عليه مهوال ترى الحافظهن طايرات من راسي
مهند:- والله عمي ازعل عليك ينطيك گلبك ما تشارڪني فرحتي
علي:-ترى ماصدڪنا هالحفلة تخلص حتى تبدي سهرتنا
ابوي ومهند ڪاعدين منا ومنا يقنعون بيه واني واكف ورا ظهره ساند اديـه على اكتافه باوعت على خالي يمسح على صدر علوش بجف ايده ومندمج بالسوالف ويا عمي أبو مشتاق عمي رفع ڪاسة المي يشرب منها وخالي باوع بتجاه لؤي ينزل عيونه ويرجع يباوع عليه
عفتهم يقنعون بيه ولميت الڪراسي الفارغة اني وولد عمامي رتبنا دائرة صغيرة بڪراسي على عدد الموجودين لؤي صارت كعدته كبال خالي مو وجهه بوجه لا بمسافة 3 ڪراسي
طلبوا دارميات منه كالهم وعلي ناسيهن ما يجن على بـالي عمي ابو مشتاق ڪاله اي شي حافظه
مهند:- حتى لو نعاوي ڪل شي منك حلو ترى الولد متعطلين علمود يسمعونك غير ڪل مقاطعك عدهم
أبتسم كال:- كون هيج جا يدللون على عمهم
تنهد ساند عكسه على ايد الكرسي يفرك بخيط السبحة صافن بتفڪير عيونا عليه منتظرينه، باوع على عمي أبو مشتاق وبلش يجر الدارميات بونين والبحة متروسه حزن يطابق حزن ملامح وجهه
لؤي:- للخوه معاني والنا بيها شروط
جسينه نبضها وطلع ما مضبوط
ما ينسمع ماينسمع صوته اليصفك بفرد ايد يـابو مشتاق والزلمة الشجاع يشوف شوف بعيد ومن ذيج الغضابة شلون گلبي يهيد
الي صاح الله
والي صاح عفية
والي صاح عيدها بروح الاعزاز
مسح وجهه ارتجى بكعدته عادها الهم وڪمل الوراها
ـ بيدك بيدك لا تبز عينك وتخلي دمعها يسيل، واصبر وي صديجك لو عليك يعيل يمهند أبن أوى يصير ذيب للما وراه
سڪت وهو يطلع الجڪاير من جيبه جاوب خالي بصوت شجي
سراج:- انه داره داره وعندي بس اخو الوكت داره، نكر زاد الاخوه ونكر داره داره طردني وماقبلني اطب داره
بعد ما ازامط بأخوان والخوان جذابة وماريد الاخو بالضيج من اجبل يسد بابه، يا ناس اليعوف اخوانه طلابته طلابه
باوع عليه اثنينهم واحد خازر الثاني لؤي اشر بصابعه على خالي
لؤي:- للخوة معاني اليوم انه احجيها صفر ناتجها طالع ورسبت بيها
اخسرت يسراج اولها ويه تاليها
خالي ابتسم والغضب مبين بعيونه حرك راسه اي ورجع عينه على لؤي صار جدل بينهم ناسين احنا ڪاعدين وياهم
سراج:- ڪون الحجي كصه كبال كصه وبس الجف الصافح الغمان كصه، صفـه النذل ويه النذل من فرد كصه فلا عدهم صـداقة وهـوية
لؤي حرك راسه بـ اي وربت على صدره بمعنى ممنون نفس حركت خالي، حط جكارته بحلكه،نزل عينه على السبحه يفر بيها بحركة سريعة على اصابعه
لؤي:- يابه اووووف اوووف
يابه وفينا وفينا شڪثر وي ناس ماتوفي وفينا
سڪت ما ڪملها ڪالهم نسيتها باوع بعينه على خالي بدون ما يلتفت براسه
لؤي:- انه من المشي ماكفن ولا عگل
مسودن صاحـت الوادم ولا عگل
من اظل بطرك جفيتي والعكال
اوصلك يبو ذات الوفيـه
اذا ما اجيك بيَّ خابت ضنوني وفدوة الكم جدامي وترخص عيوني
سراج:- وحـك اليسروها ومشت موليـه، الصاحب لو نخانه بضيج ابد ماڪول شعليه
صاحوا الله
سراج:- مثل عد العرب مكيول تتعب للصديج الزين تتعب والتعب مردود تاليه
لؤي سند عكوس ايده على رجليه مدنك يباوع على جفوف ايده يفرك بالسبحة بينهن يجر الحجي بونين وخالي يباوع عليه والحزن واضح بنظراته
لؤي:- الدنيا عبر ياما علمتني وجذاب اللي يكلك علمتني أخوي الطاح شلته انـه على متني طحت ما بالجذب عاين عليَّ...
رفع بس راسه وهو يباوع عليه بنفس النظرات بينهم
لؤي:- شطلع بيه ونسيت ايامي الحلوة وعشرة وياك ماريدنها بالڪوة، اذڪر ڪبل انه وياك روح بروح نتلوه
سراج:- يخوي افتح دفترك وسجـل بيه
الزعل من يصير يثبت معزة انسان صح درت وجهي لجن مابطلت منك
لؤي:- ديـر الهوا وماريد وجهك تديره
مو اخــو عندي احساب بيرغ عشيرة
وكف على طـوله رفع ايده قريب لوجه بحركة السلام كال
لؤي:- ارخصولي انـه اروح والله هاي جيتي من الدوام وعفت مگاني فارغ لازم ارجع هم يلا الحك ارد الولد للاهل
وكفوا سلموا عليه تقدم على خالي سراج الي منزل عينه يباوع على الخطوات التقترب منه
دنـك حط اديه جوا ابنه شاله حاضنه لصدره كال تصبحون على خير وراح خالي ظل على ڪعدته حتى راسه ما رفعه رفع عينه يباوع على الڪرسي الجان ڪاعد عليَّ فارغ مسح وجهه وهو يزفر النفس بتعب
«بســــــــــــــمة الحڪومة»
ڪعدت الفجر سراج بعده ما رجع اتصل عليه تلفونه مغلق اتصلت على علي ڪال من ساعتين رجعنا سوة
نزلت جوة سيارته ما طالع بيها موجودة شفت الديوانية ماڪو فارغة الصحيات مفتوح بابهم
ـ يمه حبيبة جا وين راح الزلمة
بهزت على الحجيات غافيات رجعت صعدت اتصل عليه هم بعده مغلق
حطيت گلبي بيدي خايفة صاير عليه شي فڪرت اتصل على خالي وسمعت صوت باب الشارع نسد
وكفت كبال الشباج ظل بالطارمة مدخل بيده كرسي سحبه للحديقة وكعد عليه وهو يدخن وحاط الايباد على رجله
رجعت البردة ونزلت عليه من سمع صوت فتحت الباب التفت عليَّ
سراج:- ها حكومتي ڪعدتي اريد اعرف من تنامين تتعاركين ويا الطناطل بالاحلام يوم ادفريني يوم تلطميني على حلكي احتاج بعد البس درع وانام يمج
بسمة:- وين جنت موتت گلبي من الخوف
اجى عليَّ حاضن وجهي بين اديه
سراج:- اسم الله ابوية هنا جنت كاعد بالباب عليمن الخوف
بسمة:- صدك تحجي سراج وكت كعدت باب هسه
حطيت راسي على كتفه كتله والله خفت اغتالوك لو خطفوك شعرفني راسي صاير يألف افلام ليش تلفونك مغلق
سحبني كعدني على الكرسي مكرفص كبالي
سراج:- تلفوني طافي شحن وجاي يشحن بالصالة ماشفتي
هزيت راسي لا
سراج:- ابوية دخلت وكعدتج سألتج على علاج امي
بسمه:- والله ما اذڪر ابد
سراج:- طبعاً ما تذكرين غير لطمتيني على حلكي بكفى ايدج من اكول عليج باسم تزعلين
باوعت على شفته صدك الجوانيه قريب من زاوية الشفايف مورمه شوية
بسمة:- يمه حبيبه فلك الطرني ولا ادري
لزمت وجهه قربت بسته أبتسم كال طابت
طبك جفوفي حاضنهن بين اديه دنك باسهن ونزل راسه عليهن
سراج:- گلبي بسمه گلبي احس خنجر وجاي يمشي ويرجع عليه
رفعت راسه كتله اسم الله عليك شبيك حبيبي
ما جاوبني رجع راسه على رگب رجلي وهو يتربع بالكاع
سراج:- كلامه مثل الملح وينثر بيه على جروح روحي والله عزيز عندي لا اكدر انسى وكفته ويا اصف واعذره عليها ولا اكدر اظل مقاطعة شسوي كعدتنا واحد كبال الثاني مثل الغربة كاتلتني
بسمة:- لهسة مانعرف شدار بينكم وهيج زعلك قوي منه، احجي خلي افتهم
رفع راسه لازم رقبته من وراء ماذيته كال الحجي مايفيد تعالي نصعد أنام
صعدنا للغرفة حط راسي على ايده يمسد بجف ايده الثانيه على راسي لحد ماغفيت وهو باقي على كعدته الصبح راسه طاك من الالم ماكدر يداوم رحنا لبيت تماضر وهو كال انام ساعة واروح عليهم …
ترتيــــــــل
عمتي نفس راحت وياي للصالون اتفقت وي مهند ماريد زفة طويلة هذا الوقت نسوي بيه جلسة تصوير صور ومقاطع
من كملت علي اجى حتى يرجعني للبيت صعدنا وهو يحجي بالتلفون ويا عمو لؤي يقنع بيه
نفس:- شبيه ابو علي؟
علي:- عزمنا على الغدا ماقبل يجي ڪال تعبان والصبح رجعت للبيت العصر اجيكم وهسه اتصل عليه ڪلب كال باجر اجي اسلم على ابوك ومهند
نفس:- احتمال مريض
علي:- لا صاير خلاف بينه وبين خالي سراج من قبل رمضان ما يتحاجون
نفس:- الله يهديهم
اول تالي سراج ولؤي يصير بينهم زعل شهور
علي:- اكول عمه خلينا منهم يتراضون بعدين البارحة بالحنة شعره بين الخلاف والصلح ولو باقين دقيقتين جان تصالحوا
اني سالفتي يمتى؟
نفس:- ما بقى بس شهر على امتحاناتها انتظر تخلص واحجي وياهم
علي:- عمه وراء محرم اسافر لو تحجين وياهم نعقد بالعيد
نفس:- امي هسه صعبة كلهم متوترين من الامتحانات اذا افاتحهم راح يرفضون بدون ما يسألونها
علي:- بس جسي النبض
نفس:- من رمضان حجيت ويا امها ورفضت
اسمع صوته ينفخ اعرف بيه رايد عسل مهند سولفلي والله اعرف عمتي ما تقبل تزوجها هي من زمان تحجي عسل تدخل بعمر ال25 سنة يلا عود تفكر بزواجها واني عندي احساس ما متأڪدة منه عسل تميل لآدم
وصلنا للبيت دخلتني عمه ماما تلڪتني طايرة بيه وهي تصلي على محمد تريد تضمني من العيون كعدوني بغرفتي البيت هوسة الكل مجتمع هنا
اسمع صوت هوسة رفعت بدلتي وطلعت لكيت بابا كاعد بين بيبي وجدو مدنك وجهه ويبجي والكل محاوطينه وماما ڪاعدة على الدرج وهم تبجي واخواني التوم واكفين باب الصالة مكتفين اديهم ودموعهم توكع بسكته وعمة نفس تحجي وياهم دورت بعيوني لا عماتي موجودات ولا عمو ارسلان
ظليت رافعه بدلتي واكفة اباوع عليهم الڪل انتبه عليَّ اخواني ادموعهم كامت تصب اقوي وطلعوا بسرعة
نفس:- صلوا على محمد خلونا نفرح بيها ودعوها بالضحك والدعاء مو بالحزن والبجي
تقدمت على بابا رفع راسه وجهه محتقن والعيون ممرودة كعدت بالكاع كباله راد يحجي ماكدر نزل من القنفة كعد كبالي وهو حاضني يبجي لدرجة اڪتافه تهتز
ما اسمعهم شنو يحجون ويانه ظليت حاضنته وابجي وياه سحبوني من حضنه عيوني صارت على الدرج عمو ارسلان عماتي يسحبن بيه وعمه رياحين وراهم كامشته من اكتافه يريد يصعد
اول مانزل رحتله حضنته حاضني بكل قوته عماتي شوية وفرقوا بيناتنا
كعدوني بيناتهم نبجي ومن عمه سمر تحجي تخلينا نبجي ونضحك سوة
سمر:- هساع ارتاحوا العريس بس يشوف وجهها يرجعها عليكم ينهزم عباله جني
عمو حضن راسي لصدره
ارسلان:- وردة بيتنا ڪبرت وراح تنزرع بغير بيت
حجوا وياي هواي يوصون بيه بمهند وعائلته عمة سمر رجعتني للغرفة رتبت عيوني
اجت عسل مدت راسها علينا كالت وصلت الزفة باوعت على عمة سمر كتله احس روحي خايفة والله واريد ابطل ماريد
ضحكت عليَّ وهو تكول عادي طبيعي هسه بس يكضب ايدج تنسين الخوف وحتى اسمج تنسينا علينا ترتيل البارحة كضبتكم بالاستقبال شتسون تفسرون صورة الفاتحة
غطيت وجهي خجلانه منها غير تسكت سولفت كل الشافته دخلت ماما وهي تمسح بدموعها حضنتها تبجي وتحجي وياي
ـ لا تبجين ويخرب مكياجج خليني اشوف فرحتج
بستها بخدها بس وكعت دموعي عمه سمر طلعتنا من اللحظة حتى ماما خلتها تضحك
فرحت ڪُلش بوجود الكل خوالي ارغد ويونس وڪرم وعمو آصف وآدم وحمادة كلهم موجودين عمو اصف مخوصر وواكف على نظراته عنده حرب وتهديد وهو بدون شي مهند يسمي الجوڪر المرعب
جدادي بيدهم سلموني لمهند وهم يوصون بيه وخالو ارغد يكلهم هذا ابنا يقدر الجوهرة اللي صارت بذمته مايحتاج توصية راح يصونها ويحفظها بعيونه
طلعنا على صوت الهلاهل والصلاوات لازم ايدي بكل قوته وايده الثانيه محاوطه ظهري ويمشي بيه بحذر لان ما اشوف
حسيت رجلي عثرت منا ماشوف ومنا خوف وارتباك وفرحه
سراج:- ابوية انت انتبه عليها لا توكع
تبارك الرحمن
اللهم صلِّ على محمد وآل محمد
زفتنا بسيارة الحجي لان مضلله مهند وعمتي سمر وياه ساعدوني اصعد دنك على بدلتي رفعها باس راسي وسد الباب
رفعت راسي قليل الزلم الجاية بالزفة ديسلمون على أهلي، صعد سد الباب وهو يحاجيني
مهند:- هلا بوردة الكرنفل عروستي واخيراً
ارفعي هذا عن وجهج محد يشوفج رفعته وهو رجعه مغطي جبيني بيه يباوع على وجهي مبتسم ويصلي على محمد
صعد الحجي وهو يكول يا الله بسم الله الرحمن الرحيم اللهم اجعلها بداية خير وبركة عليهم واجمع بينهم بالمودة والرحمة وألف بين قلوبهم واجعل بيتهم عامر بالمحبة والسكينة والرضا
ابوية انتم الف مبارك الله يهنيكم ويسعدكم ويجعلها فاتحة خير عليكم
مبارك الج بنيتي باذن الله مهند السند والعزوة الج
رديت عليه بهمس خجلانه منه مهند رد عليه وهو يتقرب يبوس كتفه من بين الڪراسي نزل الجام طلع راسه يحجي وياهم يبعدون سياراتهم حتى نطلع رجع سد الجام ويباوع على السيارات
سراج:- احد يصعد ويانا لو نطلع؟
مهند:- لا يمكن ام آدم ويانا
سراج:- ها!!
سڪت وبعدين حجى وياه
سراج:- ام آدم من طرفك لو من طرفها؟
مهند:- لا من طرفها
سراج:- لعد شمصعدها ويانا
مهند:- ما اعرف امي كالت عمتك نفس وياك وتساعدها من تنزلون
ضحك الحجي كال حقك من الفرحة معذور خالي
ابتسمت اني من كال ام آدم استغربت لان ما متقفة وياها تصعد وياي
سراج:- من رخصتكم انزل اجيب باسم حكومة من سيارة علي
نزل اباوع عليه وكف كبال سيارة علي يحجي وياها ومبين عليها ما قابلة تجي جبرها جابها واجى فتحلها الباب صعدت وهي تحجي
بسمة:- حجي كشوم راح تخلص الزفة علينا مكشم اريد ابقى بسيارة علاوي
سراج:- اشش بس ولا صوت
سد الباب التفتت علينا تحجي عليه
بسمة:- راح يخلص الزفة ادعيـة ويختم مفاتيح الجنان مالكيتوا غيره يزفكم
حجتها وهو يصعد كالها خير باسم ضلعي شنو ما عاجبج؟
بسمة:- لا يما هو انا ائدر افتح بوئي
العربية عربيتك يحك اعمل اللي انت عاوزو
هي تحجي مصري مكسر وهو يضحك عليها من فتحولنا الطريق طلعنا كالها
سراج:- تدلل حكومتي السيارة وسايق السيارة تحت طوع خدمتها
مد ايده شغل اغاني ايد يسوق بيها وايد عبرها على اكتافها حضنها مقربها عليه وعايفها براحتها تصفك وتهلهل كل شويه تميل عليه وهي تصفك ومهند مستغل الفرصة شوية ويكعدني بحضنه ماخذ راحته لان الحجي باله ويا بسومه اللي عافت الاغاني وصارت هي تحجي بكولات الاعراس
سراج:- الحمد لله كولات اعراس ولا نعاوي على خالج
وصلنا للاستوديو ساعدوني انزل دخلنا جوة سوينا احلى جلسة تصوير اني متفقة وياهم من ايام وكل اللي ابالي سويته
من ناخذ استراحة بالغرفة ونراجع اللقطات بسمة تستغل الفرصة ودخل الحجي يصورون وشنو تطلب يسويلها سووا جلسة الهم ڪُلش تونست وياهم من جنت اسمع بيه اول زواجهم عبالي متعصب وڪل شي عنده ممنوع طلع مختلف بس باعتدال
«عــــــــــلي»
بس شفتها صعدت بالاستاركس كل شويه اصفن سيارتي بجهة الشباك الكاعدة يمَ
عفنا العرسان بالاستوديو وظلينا نفتر زفة بلا عرسان
من اتصلوا علينا كملوا رجعنا عليهم زفيناهم للبيت لكيت عمي لؤي موجود واكف برة ويا الزلم منتظرينا استقبلونا بالهوسات وهو وياهم
سلم علينا كلنا اللي بالزفة عدا خالي سراج ظلوا واحد بعيد عن الثاني
صبينا العشاء اجى عليَّ خالي كال الروس طبختوها؟
كتله اي طبخنا كم راس بس ماقبل ابوي نقدمهن ويا المفطح
سراج:- اخذ فشگت راس وحطها كبال لؤي
كتله صار يدللون خالي وعمي الزعلانين
ضربني على ظهري وهو يكول يلا بسرعة
اخذت نص راس ودخلت لكيته ياكل بس تمن حطيته كباله وفتحت باب على روحي كساع واحد يريد
بســـــــــــمة
زفوا العريس بالهوسات بدأت العالم تكف حتى حبايب العروس راحن بقت بس نفس منتظرة ابنها
اجى علي كالها عمتي الغالية ادم منتظرج
سلمت علينا بعدهي ماطلعت تسولف ويا تماضر باب الصالة ودزلي سراج رسالة
ـ بسايم يلا ابوية اطلعي منتظرج بالڪراج
شهگت يمه حبيبة مو خوش توقيت
طلعت واني بعدني اباوع بالتلفون اخذت صايتي ورحت لشباك الكيلدور ابو مهند واكف يسولف وياها واضح عليه اشڪد يحترمها ومبين الها مڪانة عنده وادم بصفها ايده على ظهرها وايده الثانية لازم جف اخته بيها عيني صارت على باب الديوانية طلع سراج عيونه صارت عليها بهاي اللحظة نعصر گلبي عصر بس هو بسرعة نزل عيونه باوع على باب الصالة يثاوب ويحك بشعره ما طلعت بقيت مراقبته ما التفت عليهم عيونه علي الباب
علي:- خالي شوف التعليقات عليك
وكف بصفه علاوي يشوفه التعليقات سراج وجهه عبس وعلاوي يضحك
سراج:- عديمات الاخلاق ولك هذني صدك يقصدني يجوز على ابوك
علي:- لا والله خالي عليك شوف صورتك هاي وحدك دك غزل باوع هاي جارتها بـ آه طويلة ونار ههههه
سراج:- امسح خالي
علي:- ڪل تعليق امسحه اله ثمن
سراج:- ثمن شنو ولك
دمسح لا بسمه تشوف تعلكني اني وياك بساحة التحرير
ضحكوا اثنينهم سحب التلفون من علاوي اللي يحجي ويا
ـ خاااااالي لا تمسح المنشور بس التعليقات
لا خالي
سراج:- استحقيتها حتى تسمع الڪلام
يلا ادخلي شوفلي الحكومة وينها راح اوكع من النعاس
طلعت قبل لا يدخل علاوي أبتسم وهو يمد ايده الي انطيته ايدي عصرها
سراج:- هلا بضلعي
مشينا وهم بعدهم واكفين رفع ايده سلم عليهم وسلم عليها كالهم تصبحون على خير وطلعنا لازم ايدي ما عافها لحد مادخلنا غرفتنا نزعني الصاية والشال
سراج:- خلي نشوف الڪيك
ضحكت واني ابتعد عنه سحبني مقيدني بين اديه
سراج:- وين ابقي بمكانج
فتح سحاب الفستان نزله عن اكتافي سالته
بسمه:- واني اطلع سمعتك تحجي بتعليقات يا تعليقات تقصد؟
رفع راسه من كتفي باس خشمي كال اني ما اعرف اجذب وهم ما اريد اضوجج
بسمة:- ما اضوج على شي مالك ايد بيه
أبتسم حضن وجهي باسني دخت لزمت بقميصه عافني وهو يشهك النفس نساني التعليقات واسمي همين بحركاته عافني اخذ النفس بتعب طلع توضى ورجع عليَّ …
مهند وترتيل كم يوم وسافروا لشمال ايران «10 ايام» ورجعوا عزمناهم وهم اهاليتها كلهم يوميه بيت عازمهم
بعيد الاضحى هم رجعنا على سراج وخالي حاولنا وياهم بالف طريقة حتى يتراضون اثنينهم قافلين حتى خاطر للحجيات ماخلوا وصدك هالمرة زعلن اثنينهن من خالي وسراج
قبل لا ندخل محرم بيومين العصر اتصل آدم وراء اتصال مهند وبلغنا خالي عارض بيته سراج غسل وطلع بسرعة ردت اروح وياه ما انتظرني والحجيات من عرفن خطية كلبنها مناحة احتاريت شلون أهديهن …
••------------ ♡♡♡♡ --------------••
نفــــــــــــــــــس
مباشرة بعد عيد الفطر رجعنا لبيتنا آدم استقر فوك وغرفته مرتبها أرغد لقمر
آدم صعد فوك يريد يجهز نفسه ويطلع للمجمع، ارغد باوع عليَّ اخذ تلفونه يغني وهو يتقرب لمكاني
ـ گلبي رُڪن بغداد
سوك الهرج بيه
ميلو الحلو ليغاد
لا ننجبـر بيه
حط ايده ورا اكتافي سحبني لـ احضانه غمضت عيوني احس نسمات باردة هبت على گلبي وهو يبوس وجهي بهدوء
أرغد:- دحك شنو مصورلج
شوفني مقاطع فيديو مصورها للمحل وقطع الانتيڪات عندي هوس بهاي القطع وڪل فترة نروح اني وياه لخان المدلل
أرغد بلش بمشروع يفتح محل انتيڪات اباوع على البناء واصل للسقف قلب المقطع شوفني القطع اللي موصي عليها
نفس:- هذني تبيعهن ما ينطيني گلبي اريدهن
ضحك شـدني لحضنه اقوى
أرغد:- أغاتي تأمرين
ربتت على صدره ورفعت ايدي لوجه امسح على لحيته التلفون طفت شاشته يباوع بوجهي
تنهد براحـة باوع على قمر مسطرة العابها والدببه وهي ڪاعدة ڪبالهن تعلم بيهن ظهرها علينا، رجع عيونه عليَّ حضن وجهي بجف باسني بوسه سريعة أبتسمنا
نفس:- الذيب يتصيد الفرصة
ارغد:- دڪتورتي اني ڪل فرصة وياج اصيـدها مو حرام عليَّ افوتها
نزلت ايدي العب بزرار دشداشته افتحهن وارجع اسدهن، كمش ايدي ڪال
أرغد:-: شنو آغاتي متونسـة بعذابي
نفس:- عـذابنا اثنينا
دك تلفونه باوعت عليه يونس فتح الاتصال وعيونه بعدهي تتأمل بوجهي
صدمنا يونس من ڪال
يونس:- أبو آدم هذا لؤي عارض بيته للبيع حجينا وياه وماڪدرنا نقنعه
تعال احجي وياه بنات عمامك مسوياتها عزاء علينا
«درة»
حاطه بنتي بحضني وڪاعدة ابجي وهو كبالي يحجي وياي
لؤي:- بوية شنو التردينة والله ڪل اسبوع اجيبج هنا
درة:- لؤي عليش ما تفهمني اني ماڪدر انتقل بعيد عن اهلي
لؤي:- المرة تتبع زوجها
لو ماتكدرين جا المن عرستي ما بقيتي عد اهلج
نسيتي شلون شڪرتيني من كتلج راح اخطبج بسرعة تبريتي ماغزرت وياج
رفعت عيني عليه ضام الضحكة وهو يدحك عليَّ اجى كعد قريب مني يمسح بعيوني نزل بنون كالها روحي العبي ويا اخوج
لؤي:- ليش هالدموع تنزل من عيونج الحلوات انتي مو تحبيني المفروض بس اني ماتكدرين على فراگي اهلج بيش الكيلو
درة:- شنو اهلي بيش الكيلو تحجي صدك لؤي!
افهمني والله ما اڪدر سايمة الله عليك ارجع عن اللي براسك
تنهد وهو يصد عني كتله بعصبية
درة:- ما اروح وياك ابقى هينا عند اخوي وانت الله وياك
دحك عليَّ خازرني
درة:- لا دحك هيج بسبب سراج اخوي مايدخل هين بالعيدين من الباب يجي يعايدني كله تا يرضى استاذ سراج عليك
لؤي:- سدي حلكج درة سدددي حلڪج واحترمي
درة:- ما سبيته بس كل هاي الاشهر بسببه ما شفنا الراحة
لؤي:- وين تردين توصلين بالحجي درة ديري بالج تقللين منه كبالي لان ما اضمن لج رد فعلي خووووش
صديت عنه كتله هو اصلا ما داري عنك بس انت كاتل نفسك عليه
عصر وجهي بيده كمشت ايده كتله هو بقى بس ضرب ماضربتني علموده
تريد تبيع بيتنا والله شنو سراج زعلان منك تريد تضيع استقرارنا وهو أصلاً ما يدري الله وين حاطك
دفعني بنتر ولسـه خازرني مسحت دموعي واني اعض شفتي بهضم
درة:- ترى انت ماكاعد ببيت ابوه سوا انتقلت او بقيت ماراح يهتم
لؤي:- ڪافي عااااد ليش تجبريني اصير ردي وامد ايدي عليج
صحت بيه يلا مدها واضرررب شنو منتظر
عافني ونهض وهو يستغفر دحك عليَّ كال اكسر ايدي ولا امدها عليج
حضنت وجهي ابجي واحجي وياه
درة:- الله عليك لؤي لا تسويها فكر بيه اني وين اڪدر اعيش وحدي بمكان مابيه احد من اهلي
كرفص كبالي حاضن اكتافي بجفوف اديه
لؤي:- جا انه وين عنج حتى تعيشين وحدج والله ماراح يتغير عليج شي البيت اللي لكاه حيدر بنائه اكبر من هذا وحديث والمنطقة من ارقى المناطق
درة:- ماريده لؤي فكر بيه صعبة عليَّ يتغير مكاني
زمزم:- عموووو
عمووو وين
كوثر:- وين يروح المطلوب النا
اطلع منسوي شي الك الامان
صدينا على الباب شوية ودخلن زمزم ووراها كوثر زمزم ادحك عليَّ بعصبية والدموع تارسة عيونها
زمزم:- شنو هااي عمو تريد تعوفنا وتنتقل
لؤي:- شلون اعوفجن انت بنياتي كبرتن على ايدي
كوثر:- لعد شنو هاي اللي داكها على السياج
لؤي:- ڪل اسبوع اجيب عمتجن واجي اشوفجن وبالعطل اخذجن يمها
تقربت عليه زمزم الدموع صارت تصب
زمزم:- الله عليك عمو لا تبيع بيتك وتنتقل
كوثر وكفت بسدها وتحجي وياه بتوسل تا يتراجع يدحك بينهن وعيونه نترست دموع
لؤي:- ولجن مو تعرفن گلبي رجيج كبال دموعجن ليش تبجني
حجت زمزم وهي تشهك
زمزم:- لعد ابقى لا تنتقل مو احنا بناتك شلون تعوفنا وتروح
لؤي:- كتلجن كل أسبوع اجيجن
ڪوثر:- مانريد ڪل أسبوع وبعدين تصير ڪل شهر عمو الله عليك لا تسويها
اذا تروح نزعل عليك والله وبعد ما نتراضى
لؤي:- زعل شنو بسررررعة اكطعنه بسيف العباس
طبك اصابعه السبابة راس براس وهن كل وحده بصبعها السبابه تضرب هاي الحركة علمهن عليها من جانن صغار ويزعلن عليه ودايما يسووها من يزعل هو عليهن لو يزعلن هن
زمزم مسحت دموعها تحجي بتهديد وياه
ـ اذا صدك انتقلت انت ماتحبنا لو تحبنا ماتعوفنا وتروح لغير مكان عمو انت بعد مو عمو الحباب
لؤي:- افااا مزنه اختلفتي عليَّ
زمزم:- لعد لا تنتقل شلون تريد تاخذ عمتي
لؤي:- اها الدك والنوح كله على عمتجن وانه صدكت تبجن عليَّ
زمزم:- والله عليكم كلكم خاصة علوش
لؤي:- بعلوش حقج هذا خطيبج
نعوفه يمج
زمزم:- عموو فدوة حباب الله عليك لا تروح وتعوفنا
ندك الباب طلع يشوفه منو زمزم ڪالت خوالي وعمي يونس اني بلغتهم من شفته علك هذه الافته وهم اتصلت على بابا كال هسه اجي
فتحتلهن ايدي اجن حضنتهن اثنينهن اني شلون اڪدر على فراڪهن خاصة زمزم بهاي الفترة صارتلي اخت مو بنت اخوي وبينا
اشڪد حاولوا وياه الولد ماڪدروا يقنعونه اخـر شي هو قنعهم بحجه امـه تريده يمها الڪذاب
اجى كعد بينهن يحاولن وياه اشكد حاول يقنعهن ماڪدر
ندك الباب بقوة سحب اديه منهن وراح يشوف منو …
«آدم»
وصلنا لمنطقتهم دخلت سيارة آصف قبلنا رغم الوالد كسر الزعل اللي بيناتهم تا يصلح النفوس بس بعدني ما ڪدرت اشـوفه مثل قبل ولا اڪدر ارجع اعتبره ذاك العم القريب لروحي شي بداخلي الـه انكسر من ذاك الموقف وتغيرت نظرتي اله صح الجروح تلتئم بس اثرها يبقى بالروح ويظل يذكرك بهذا الشخص اللي جان يوم من الأيام غالي عليك صار أقرب للغريب
نزل من سيارته دك الباب بقوة ورجع وكف مقابيل القطعة اديه ورا ظهره ويقرا بيها، ابوي يدحك عليه سر المعزة هاي محيرتني رغم أذيـته بعده متمسك بيـه
واني اطفي السيارة اتصلت على عمي سراج بلغته ابوي نزل قبلي وعمي لؤي فتح الباب تقدم عليه دفعه من كتفه وهو يصيح
آصف:- شنو هاي لؤي
تريد تبيع بيتك شنو
طلع هالفڪرة من راسك يول تريد تعوفني
لؤي:- ترى ما مخلفك وناسيك انه تعبت من غربة روحي اريد ارجع لـ اهلي وناسي ڪافي بعد لو عدي بخت ما اتجازه هيج
آصف:- واني مو اهلك وناسك
خوش بيع واني هم ابيع وانتقل وياك ما نتفارگ خوش نزعل صح بس نتفارك لا
أبتسم عمي لؤي وهو يحرك ايده بفرة ويحجي
لؤي:- ربي شني هالبلوة الطايحة على راسي عمي وخروا عني بس فڪوني شركم بيش طالبيني ترى تعبت منكم وعليكم
تقدمنا سلمنا عليه ابوي يريد يحجي وياه وخطفت سيارة عمي سراج شخطها شخط وكفها بين بيت عمي باسل وعمي يونس
نزل وهو يدفع الباب بقوة ادحك عليه لابس تراك وبرجليه حذاء جلد أسود طابڪها من وراء شي مو يم شي
تقدم على القطعة كضبها من وسطها وجرها بقوة جرحت اصابعه سواها قطعتين معلڪات بالحايط دار وجهه على لؤي نظرات عيونهم مليانه زعل وعتب وتجريح
لؤي تنهد تقرب عليه عدل القطعه وهو يحجي وياي
لؤي:- آدم ادخل جيب البسامير والجاكوج تلكاهن محطوطات على الكرسي بالطارمه
سراج:- اي عمي ادخل جيبهن اليَّ خلني ادڪهن براسه بلكي المطي المتمدد بيه يصحى
كمش كتف عمي لؤي وهو يدوره عليه صاروا وجهه بوجه من حجى ابوي صديت عليه مبتسم عيونهم عليهم ڪال لي
أرغـد:- وكع الزعل اعتبرهم تراضوا من هاي وكفتهم بعد ما ينتقل يظل بداره
سراج:- وين تريد توصـل؟ هالتهور والتسرع ما تحسب شنو راح يصير وراه؟ تبيـع مصدر رزقـك ما فڪرت بـ عائلتك ولك الراتب وينه؟ أشو لنص الشهر وطاير
لؤي:- اسـوي اللي اريده محد حارك خبزتـه يمي اشو وخر عني
سراج:- لا تتوقع مني اسكت واني اشوفك تضيع مصدر رزقك بيدك اذا انت ما تحسبها وتفڪر اني احسبها بمكانك
لؤي:- حجي احتفظ بحساباتك لنفسك عوفـك مني عسى ما يطكني الهبري ما عليك
سراج:- لو بيدي ما اهتم بس هالجلب اللي بصدري ما يلزم من يشوفك تأذي نفسك
لؤي:- هيج خوش يلا روح منا وابقى على ڪلمتك مادام فليناها بعد ما يحقلك هاي الوڪفة وياي
دار وجهه على الجهة الثانية ساڪت يشد بقبضة ايده عمي لؤي راد يتحرك بتجاهنا سحبه من ايده مرجعه كباله وبيده الثانيه يأشر على نفسه ويحجي
سراج:- لو الغلط مني اعـذر موقفك واكول الـه حقه يوكف بطرفـه، بس على باطل توكف ويا نسيبك خليتني احس اني صـدك وحيد عكب ما جنت اڪول هذا اخو يسوه عشيرة ولك انت حتى مديت ايدك عليَّ لوما عرضت بعيني وكفاتك جـان كسرت ايدك
لؤي:- فات الوڪت على الحجي بينا امشي منا سراج انت كطعتها ابقى على ڪلمتك بعد المعاتب مايسوة ولا يطيح الصار بيناتنا
سراج:- واني ليش هيج سويت ياذڪي ؟
لؤي:- على سبب تافـه انت مسحت سنين عمرنا الڪضيناها على المرة قبل الحلوة
وهسه جايني تعاتب مالك حق بعد خوتنا كضت امشي منا وظل بزعلتك وكطيعتك
حجى بصوت مخنوك من القهر وهو يلزم اكتاف لؤي
سراج:- هم ڪال سبب تافة يالله ساعدني عليه
ولك لؤي ليش كطعتها اني غير نسيبك يكلي لا توصل لبيت اختي وانت ساڪت تسمع وما تحجي وياه هاي الماترجيتها منك
ابوي صد بسرعة على آصف خازرة قبض ايده وضربه بظهره وهو يحجي بهمس وياه
ارغد:- يول أرعن تحجي حجي وما تحسب شنو معناه وشلون ينفهم ويتفسر
سحبه وكفوا على صفحة بعيد عني بالي ويا عمي سراج مو يمهم
سراج:- شنوووو تريدني افكر هااا واني اشوفك واڪف بيناتنا وتصيح سراج امشي منا ولك اذا ما تدري بنفسك اذڪرك هاااي ايدك شلون تدفع بيه حتى اروح
شنووو تريدني افسر هالموقف غير اني ناقص واطلع انعثل بالحجي على ڪولتك
ضربه بعتب مو بقصد يأذيـه نضرب ظهره بالسياج عكش ملامحها بألم
سراج:- وهسه تريد تعوفني وحيد وتروح خوش لؤي روح الله وياك روح بس خلي اكلها الك اذا صدك سويتها احسب نفسك بيدك موتتني
راد يروح ولؤي سحبه وهو يكفخه على راسه من وراء بكل قوته
لؤي:- تعال الحجي مو بس الك
انه شنووو كتلك مو كتلك يحجي وينجب وحده وبيتي بيتك هو الما يعتب بيتي مو انت لو هذا ما سمعته بس سمعت كلمه وحده مني
صـاح وهو يدفعه ويرجع عليه يسحبه من صدر دشداشته
سراج:- لا ماحجيت انت وڪفت وياه لؤي وڪفت وياااه واثبتتلي ڪلامك مو صحيح
لؤي:- ماوووكفت وياه وكفت بينكم ولو ما اعرف شنو بيه والله اكسر سنونه بحلڪه وانت دست هوواي بالحجي وياه
وحتى بيتي ما يطبه ناهيه ومحذرة اذا رجله ادوس عتبة بابي اڪسرها وهذا هو كبالك وسأله كل هاي الاشهر مادخل ولا مرة
صد على آصف ڪاله احجي هيج صار لو لا؟
آصف هز راسه لا وهو يكول يوميه ادخل ما اجذب اني
لؤي:- لا ياجلب موووو وكت خباثتك آصف موووو وكتك
سراج:- سڪوتك خلى خوتنا وعشرتنا تطلع دغش بعيني
دفع ايد عمي لؤي اللي يباوع ورا صاح
لؤي:- مو بس بعينك حتى بعيني طلعت هيج وذبحت النفس اليَّ
رجع عليه يصيح بعصبية يريده يفهم
سراج:- ولك لؤي نطررردت من باب بيتك افهم يااخي فسرلي من يسمعها الغريب شيفڪر بيه وبيـك
ما جاوبـه دخل جوه ثواني وطـلع اخذ طرفين القطعة عيوني على سراج اديه على جيوبه متخوصر ظهره على عمي لؤي اللي يدك بالقطعة من الوسط بعصبية
صد براسه يدحك عليه، عيونه صارت على أبوي الخازر آصف ويحجي وياه بدون مايسمعنا
سراج:- أبـو آدم احجيلك ڪلمة صير محضر خير بينا واحڪم الحق ويامن
حسيت ابوي تفاجئ دحك عليه كال
أرغد:- الحق وياك
صفـك اديه وهو يصيح رحم الله والديـك خلي هالغبي يسمع ويفهم
لؤي:- اذانات الزمال اللي معلڪهن براسك لو ماسادهن جان سمعت ردي عليه
بيتي بيتك وحجي آصف اثنينا نعرفه ما يقصد العيبة بيه احنا عقدناها سوة سراج بس انت مغتر بنفسك وارجع واڪلك تشوف الدنيا ادور بس بيك
عمي سراج يباوع على ظهره يدك بالقطعة ويحجي من كملها نزل ايده وبقى واڪف بمكانه
حجى بصوت مخنوك يسأله
سراج:- هيــــج اني!
لؤي:- اي هذا انت
التفت عليه وڪمل
لؤي:- اللي نڪسر بينا بعد ما ينصلح
تدري لو انت بمكاني وجاي لبيتي بالعيد انسى الـزعل واعايدك واڪعد يمك مو اصعد اتختل لغرفتي
سراج:- سويت هيــج حتى تبقى براحتك ڪاعد وياهن ماردت اخرب كعدتڪم
لؤي:- لا شفت نفسك عليَّ وڪبريائك ما سمحلك نتراضى لا تلوفها انه اعرف دواخلك وانت تعرف دواخلي لا نستغبي اثنينا ونجذبها لو حجيك صحيج جا من شفت سيارتي خليت ودورت رسالتك اعتبرها وصلت
سراج:- لؤي رسالة شنو! ولك والله ما اجى على بالي هيـج ولا عندي شوفت نفس وياك والله شاهد عليَّ ما بقيت بالغرفة غير الڪم دقيقة ماكدرت الزم روحي ردت انزل اعايدك وانهي الخلاف بس انت طلعت والله والله بين دخلتي للبيت وطلعتك ما عبرت الخمس دقائق وتسجيل كاميرة الڪراج موجود اذا تريد اشوفه الك
لؤي رفع جف ايده يمسح بجبينه وهو يمرر اصابعه مسح دموع عينه قبل لا تنزل
سراج:- بهذا ضنك ثبتت انت ما تعرفني وبعدك مستمر تشوفني اني الغلطان ولازم اسمع واسڪت حتى حضرتك ما يشوفني شايف نفسي وهم ما نجرح عزيزك اللي تبرر وراء حتى من تجاوزك وطردني بحضورك
سكت قابض ايده عاض اصبعه زفر النفس بتعب نزل ايده دحك على لؤي وبسرعه نزل عينه
سراج:- وصدك على ڪولتك فات وقت المعاتب اني واضح وياك من البداية بس انت اللي تغيـرت لؤي هواي تغيرت بس بعدك كاعد هنا بالنفس ما تهون عليه
آصف:- ڪافي طولتوها وعرضتوها وحجي لؤي صدك ڪل هاي الاشهر ما دخلت بيته وكال ما تدخل الا وسراج يدخل كبلك غير هيج انسى تعبر عتبة بابي
وڪلامي ويـاك كلته وقت الغضب وتعرف ما اقصد بيه اللي براسك ولا أصلاً مر على بالي هيج وهم ما حجيته ڪبال غريب حتى يفسره اني اطعن بيك وما نأمن بدخلتك لبيوتنا تدري شنو انت بعيونا واشڪد عزيز
ماردوا عليه بعدهم واحد يدحك على الثاني والمعاتب مستمر بنظراتهم، هز راسه عمي سراج بحركه مستمرة يحس بالخذلان
لؤي:- انت فطرت گلبي فطر ما يبره ڪل هاي الاشهر مقاطعني على يامـال شنو السويته واذنبت بيه وياك مبديك على روحي واعزك اكثر من ابني وادك الڪل دواه الك هيج جزاتي وياك تحملني غلط غيري اذا انت ما سمعت شنو رديت عليه مو ذنبي
ولك وابو الحسنين معتبر بيتي بيتك ولا انت اللي تنطرد منه المفروض تعرف هالشي وحتى ما تنتظر مني رد عليه
تقدم عليه ضربه بظهر جفه على صدره ويحجي بحرگة
لؤي:- كطعتك وياي مالك لا زود ولا فخر بيها ولا انه الي بخت بيها
أبتسم ورجفة صوته واضحه
سراج:- ردت منك موقف أخ على ڪُلٍ بعد ما احجي ومثل ما تريد سوي اللي يناسبك ويرضيك تنتقل تبقى شي يخصك وخوتنا هالمرة صدك احسبها انكطعت لموتك وموتي
ما رد عليه بسرعة دخل لبيته عايف الباب ورا مفتوح
آصف:- حييييل زودتها ما تشوفه متأذي منك وعليك
ما جاوبه يدحك على قطعة الدار للبيع الـطاير منها حرف الالف (الدر)
آصف:- عووف المڪابر وتعال ادخل ترى عافلك الباب مفتوح منتظرك تدخل وراه لا تنسى هذا لؤي خسارته مو سهلة
سراج:- حلفت رجلي ما تعبر عتبة بيتـه بعد ڪلامك ووڪفته وياك اني طلعت الغريب بيناتڪم، وللاسف هو اللي نسى سراج وخوته
مشى بتجاه سيارته آصف يصيح وراه مارد عليه ابوي لحڪه بخطوات سريعة كضبه من كتفه موكفه دار عليه فص عينه الابيض كله ڪالب احمر رافع عيونه لفوك خايف دمعته توكع
أرغد:- وين رايح لا تخسر صاحبك لؤي بيه مجال ومنتظرك يريدك تثبت انت ما مابايـع خوته وبعدك مغليها
سراج:- ما خسرته خسرت نفسي
بعد هذا ڪلامه وياي وضنه بيه صـدك خربت خوتنا
ارغد:- يول انت سيد العارفين ومن حجي آدم اعرف بيك حڪيم بكلامك وتصرفاتك وتوزن الامور ليش من وصلت لصاحبك كل هذا نسيته
تعال نڪعد ببيت يونس انتظر نفسك تهجد ويبرد هالغضب تا ترجع تتفاهم وياه اذا اليوم ما حليتوها بينڪم لو تعيشون عمرين فوك هاي اعمارك ما راح تنحل بعد
آصف لحكهم وكف كباله يحجي وياه
ـ حجي ابو آدم صحيح ترى محد غيرك يڪدر يخلي يتراجع عن الـ براسـه وبعد بڪيفك بقت يمك بالنسبة اللي افرح اظل بس اني خويه واصلاً عندي عادي انتقل وياه وين مايروح
حجوا اثنينهم بنفس اللحظة وهما يدحكون عليه
سراج:- غير ينجب الحاقد
أرغد:- غير يسكت الخبيث
خربها وڪعد على تلها
ابوي سحب اصف لازمه من ايده وعايفه وراء ظهره عيوني على آصف احسه فرحان شلون يتعامل وياه ڪانهُ ابنه المشاغب، حط جف ايده على كتف سراج
أرغد:- كل واحد بيڪم يريد الثاني يفهمه قبل لا هو يفهم الثاني
وهينا المشكلة
وحلها بسيط منو بيڪم المستعد يحافظ على أخوه؟
سراج:- أبوية انت، اني فاهمه وهو يفهمني ترى قطعنا عمر سوة لا خمس سنين ولا عشرة ومن يصير خلاف بساعته ننهي بس اني ردت منه موقف أخ
وهذا أبن عمك من حجى هيج ترى وحنا واڪفين بالشارع لا يڪول الحجي بيناتنا صار لا اذا هما عيونهم عمية اني شفت الناس اللي تمر
أرغـد:- وانت أبن الاصول وڪلنا نشهد على أخلاقك ولوما هيج جان طالبت وڪعدت هذا الارعن للحق
سراج:- ماريد حق من احـد بس ردت وكفت اخوي وموقفه و رد اعتباري صدمني والله ووڪع هالسما على راسي من دفعني وحامي آصف وراء ظهره
المهم ماظل حجي ينحجي ولا احتاج بعد منه موقف ولا اريد يثبتلي ڪلامه ولا اريد اعاتبــه
ربت على ايد ابوي ابتسم وهو يحجي بتعب
سراج:- مشڪور على وكفت الحق ما انساه الك
ارغد:- سبقتني بيها من زمان
هز راسه ربت على صدره بحرڪته من يكول ممنون، فتح باب سيارته حاول وياه ماسمع رفع ايده بحركة السلام طلع راسه من الجام يدحك وراء وهو يرجع السيارة وصلها للشارع وطلع
الفصل العشرون من هنا