رواية عروسة بيت عمران الفصل الاول1بقلم صباح عبد الله فتحي
في حوش بيت عمران قاعدت نسوان البيت قدام فرن الخبيز. عاديلة السلفة الكبيرة 50 سنة وهيام السلفة الصغيرة 45 سنة. وقاعدين بنات عاديلة إسراء عشرين سنة وهاجر 18 سنة. عاديلة قاعدة قدام الفرن وهيام بتناولها رغيف العيش.
عاديلة بحنق
هي حضرتك الدكتورة مش ناوية تشرفنا ولا إيه يا أم زياد. ولا نكون مش قد المقام لا سمح الله.
هيام
بقولك إيه يا عاديلة يا ختي ما تشيليش البت من دماغك. إنتِ يا ختي من ساعة ما البت ربنا فالحها وعرفتي إنها هتدخل طب والنار قايدة في قلبك من ناحيتها.
عاديلة ضحكت بسخرية
ههههاااي على خيبة إيه يا ختي النار قايدة في قلبي من ناحيتها. من جمالها ولا من حلاوتها. ولا يكون ما عنديش لا سمح الله. ما إسراء بنتي اللهم صل وسلم وبارك هندسة أهي وهاجر ثانوي عام. ولا عمران ابني ظابط جيش قد الدنيا. الله أكبر. الدور والباقي عليكي وعلى خلفتك يا حبيبتي. بلا وكسة. الواد حشاش والبت عرجة. بلا خيبة.
هيام سابت الخبيز وقامت وهي متعصبة بس حاولت ما تعليش صوتها ولا تزود الزيت على النار.
هيام
أنا داخلة أجيب العجين اللي ما تقطعش نقطعه أحسن ما إحنا قاعدين نقطع في بعض كده.
هيام سابتهم ومشيت. عاديلة فضلت قاعدة بتغلي من غيظها. بصت لبناتها بغيظ وهي بتقول بغضب.
عاديلة
اخلصي يا وكسة منك. ليه الفرن واقف زي خيبتكم السودة.
ــــــــــــــــــــــــــــــــــــــــــــ
عادي اليوم وجه وقت العشا وكان قاعد الحج عمران كبير العيلة وابنه الكبير حسن جوز عاديلة وابنه الصغير حسين جوز هيام. وقاعد زياد ابن حسين وإسراء وهاجر وعاديلة وهيام بيتعشوا مع بعض. بص عمران لهيام باستغراب.
عمران
أمال فين ميرنا يا هيام ما نزلتش تتعشى ليه.
وقبل ما ترد هيام ردت عاديلة بحنق.
عاديلة
ما إحناش مش قد المقام يا عمي علشان حضرتك الدكتورة تنزل تتعشى معانا. أصل زي ما بيقولوا كده لما الواحد يعلى على أصله يبقى قليل الأصل.
هيام بغيظ
الله ما أطولك يا روح. أنا مش هرد عليكي وهسيبك تغلي مع نفسك يا عاديلة لحد ما النار تاكل قلبك الأسود ده.
عاديلة بغضب
سامع يا عمي. أنا قلبي أسود. ولا علشان مش قادرة على بنتها ترمي بلاويها على خلق الله. البت يوم ما النتيجة ظهرت وهي حاطة مناخيرها في السما. لا بقت تقعد مع بنات عمها ولا بتدخل المطبخ ولا بتشيل معلقة حتي من مكانها.
حسين بزهق
ما تقول لمراتك حاجة يا عم حسن. ولا علشان ساكتين لها يعني. وبعدين يا عاديلة ميرنا رجلها تعباها شوية علشان كده مش قادرة تنزل زي الأول. وبدل السم اللي مش بيخلص ده خدي بناتك واطلعي بصي عليها. البت بقالها يومين تعبانة ولا إنتي ولا بناتك حد افتكرها. ولا إنتي مش شاطرة غير في تقطيع فروتها وخلاص.
حسن باستغراب
خير مالها ميرنا يا حسين. ما أنا كنت شايفها أول امبارح كانت كويسة وما فيهاش حاجة.
هيام بغيظ
يكفيك الشر يا خويا. العين فلقت الحجر والبت خدت عين. وقعت في الحمام ورجلها من غير حاجة ما بقتش سليمة والوقعة تعبتها شوية.
حسن
لا ألف سلامة عليها. والله ما كنا نعرف. قومي يا إسراء خدي أختك واطلعوا اطمنوا على ميرنا واتعشوا معاها فوق.
إسراء وهاجر بصوا ناحية عاديلة بخوف. عاديلة لوت شفايفها بغيظ وهي بتقول.
عاديلة
بتبصولي ليه كده. اسمعوا كلام أبوكم. ميرنا مهما عملت أختكم وحبيبتكم برضو.
هيام
وهي يا ختي ميرنا عملت إيه يزعلكم يعني.
عاديلة بحنق
خلي الغطا مستور يا ختي.
عمران بغضب
وبعدين بقى معاكي إنتي وهي. هو خلاص ما بقاش حد مالي عينك منها. مش عاملين لحد حساب خالص كدا.
عاديلة لوت شفايفها وسكتت وهيام سكتت هي كمان. عمران بص للبنات بغضب.
عمران
وإنتي وهي ما سمعتوش أبوكم قالكم إيه. ولا مستنيين الإذن من أبوكم التاني.
البنات خافوا وقاموا وهم بيقولوا.
_حاضر يا جدي طالعين أهو.
إسراء وهاجر خدوا بعض وطلعوا على أوضة ميرنا في الدور التاني. زياد بص ناحية هاجر وفضل ساكت. عاديلة خدت بالها من نظراته وفهمتها وابتسمت وهي بتقول.
عاديلة
بقولك يا عمي بما إن الكل موجود في موضوع كده كنت عاوزة أشوركم فيه.
عمران
خير يا عاديلة. موضوع إيه ده.
عاديلة
بصراحة كده مروان ابن جمال أخويا حابب هاجر بنتي وطلبها مني مرتين. وقلت هنشوف رأي عمي والجماعة في البيت ونرد عليكم. إنت إيه رأيك يا عمي.
زياد قام وهو متعصب.
زياد
مروان مين ده اللي حاببها. ده أنا أقتله وأقتلها. وبعدين إنتوا عارفين إن عيني من هاجر ومستنيها تخلص الثانوية وأتقدم لها رسمي.
حسين بغضب
اقعد مكانك يا زياد واحترم نفسك. إيه أقتله وأقتلها دي وهو احنا في سحن لشغل البلطجي ده.
عاديلة بسخرية
ما هو الحشيش طير حتة العقل اللي كانت فاضله. وبعدين يا قلب أمك هو الجواز بالساهل ولا إيه. لما تتعلم تبقى راجل وتبطل تاخد مصروفك من أبوك ابقى فكر تتجوز. بلا خيبة.
عمران
ما هو لما الكبير يبقي في عقل ويعرف يوزن كلامه الصغير كمان هيبقي في العقل يا عاديلة.
عاديلة لوت شفايفها بغيظ وسكتت.. هيام بصت لها بغيظ وحنق وفضلت سكتها هي كمان.
ــــــــــــــــــــــــــــــــــــــــــــــــــــــــ
تاني يوم الصبح.. ميرنا بنت قمحاوية بعيون عسلية ومحجبة. كانت واقفة قدام السوبر ماركت بتطبع ورق خاص بكليتها. وكان باين عليها التوتر من نظرات صاحب السوبر.
ميرنا
في إيه كل ده. بطبع عشر ورقات.
عز صاحب السوبر ماركت شاب ثلاثيني وسيم.
عز بإحراج
لا خلاص خلصت أهو. شوية وهيطلعوا.
ميرنا نفخت بضيق
طيب خلص نفسك شوية. الشمس كلت دماغي.
في نفس الوقت كان عمران ابن عم ميرنا راجع من السفر. كان معدي بالعربية بتاعته وبالصدفة لمح ميرنا واقفة مع عز. وقف العربية ونزل قرب منها وهو بيقول بضيق.
عمران
إيه اللي موقفك كده.
ميرنا اتفاجئت.
عمران. حمد لله على السلامة. رجعت إمتى.
عمران بحدة
أنا بسأل إيه اللي موقفك كده.
في اللحظة دي خرج عز وهو ماسك ملف الورق بتاع ميرنا.
عز بابتسامة
عمران. حمد لله على السلامة. عامل إيه.
عمران بص لميرنا وبعدين سلم على عز وهو بيقول.
عمران
الله يسلمك يا عز. الحمد لله.
بص لميرنا بزهق.
عمران
خلصتي.
ميرنا بتوتر
الملف يا عز لو سمحت.
عز ناولها الملف.
اتفضلي. آسف على التأخير بس المطبعة مش عارف مالها.
ميرنا بصت لعمران بخوف وخدت الملف علشان تمشي. عمران قال بزهق.
عمران
إنتي رايحة فين يا زفت. اترزي في العربية هوصلك.
ميرنا بصت لعز بكسوف وبعدين بصت لعمران وسبته ومشيت من غير ما ترد ولا حتى تركب العربية زي ما طلب منها. عمران اتعصب جامد ومشي وراها. مسكها بغضب من دراعها وركبها العربية غصب. وخدها ومشي.
ـــــــــــــــــــــــــــــــــــــــــ
في عربية عمران. ميرنا بصت له بغضب وهي بتحاول تكتم دموعها.
ميرنا
إنت متخلف يا عمران. وأسلوبك الزبالة ده ما ينفعش معايا. خصوصًا في الشارع. أنا ما بقتش عيلة صغيرة قدامك.
فجأة عمران ضربها بالقلم وهو بيقول بضيق.
عمران
صوتك لو يعلى عليا تاني هقطعلك لسانك. إنتي فاهمة.
ميرنا بصت له بغضب وهي بتحاول تسيطر على انفعالها.
ميرنا
وقف العربية يا عمران. عاوزة أنزل.
عمران بص لها ببرود وما ردش. ميرنا بصت من شباك العربية وفضلت تعيط من غير صوت. عمران نفخ بزهق وولع سيجارة وفضل ساكت.