رواية الفراق هو نصيبنا الفصل الثامن والعشرون28 بقلم حبيبة الديب
_دي جودي اكيد..، استني هفتح أنا.!
قالتها كريمة اول ما رنيت الجرز و هى فتحتلي الباب
_سلامو عليكووو
_جبتي الشيبسي؟!
ناولتها الشنطة و انا داخله و بقلع الكوتشي بحطه في الجزامه :
_خدي ياختي اهو..!
دخلنا على المطبخ على طول، الشباب كانوا قاعدين بيلعبوا بلاستيشن و البنات كلهم متجمعين في المطبخ، لكن عمو علي و عم ابو هنا كانوا بيلعبوا شطرانج، سلمت عليهم كلهم و سلمت على عائش اللى قاعده مع مامت هنا بتقولها على طريقة جديدة للكيك...
اول ماشوفت هنا حضنتها :
_عروستنا القمر، عاملة ايه يا هنون..!
_جودي عامله ايه..
_هبقى كويسه لو شربتنوني قهوة، صاحيه بدري و هموت على قهوة من الصبح..!
ردت كريمة :
_صعبتي عليا يا دودو نتغدا و هعملك احلى فنجان قهوة..!
رميتلها بوسه في الهوا :
_حبيبت قلي أنتِ..
روحت لزوزا اللى كانت بتغرف الرز :
_زوزا مرات اخوايا...
_تعالى يا اختي ياللى جاية في الاخر أنتِ، تعالى طلعي الاطباق دي برا..
كنا كلنا بنطلع الاكل على السفرة سلطات و رز بسمتي و كفته و شيبسي و يحيى كان طالب فراخ مشويه من برا و حطيناها معاهم..
قعدنا كلنا ناكل في جو جميل و الصراحه عائش كانت محسساني انها أمي مش حمات أخويا، كانت عماله تهتم باكلي انا و كريم، و تحط قدامنا الاكل و تقولي كلي كويس، و احنا بنشيل الاكل بعد ماخلصنا لقيتها مسكت دراعي و قعدتني جنبها :
_خليكي قاعده أنتِ شغاله من الصبح و مش قاعده على حيلك..!
بوست خدها :
_ حبيبتي يا عائش ماتحرمش منك أنتِ..!
اتكلمت هنا تأيد لكلامها :
_ايوة يا دودو خليكي أنتِ ريحي شويا و احنا جايين نقعد معاكوا ..!
قعدت جنبها فعلاً بعدها لقيت كريمة عملت لي القهوة و دخلت جوا و انا مفيش خمس دقايق حسيت بصداع من عائش مع مامت هنا خلصوا الكيك و دخلوا في طريقة عمل البسبوسة، انا اتسحبت كده بقهوتي و دخلت المطبخ قعدت معاهم كانوا قاعدين على الترابيزة، زهرة بتعمل شاي للبعض و كريمة بتعمل قهوة للبعض الاخر، و اللى مالوش في الاتنين زي عائش و سوسو مامت هنا، هنا كانت بتصبلهم عصير..
قعدت و ريحت ضهري و انا بشرب القهوة و كريمة اتكلمت بغمزة :
_بس قوليلي يا دودو كده، مفيش عندكم مزز كده ولا كده في الشركة..؟!
نغزتها هنا في دراعها :
_مزز اه هناديلك أنور يا كريمة اتلمي..
_بهزر ياختي الاه..!
ردت زهرة :
_لا يا كريمة أكيد جودي بتغض بصرها صح يا دودو!؟
_احم اه صح طبعاً طبعاً، انا ابص على راجل غريب ولا ابحلق فيه مثلا لسمح الله؟!
_مش عارفه ليه شاكه فيكِ؟
قالتها كريمة و هى بتقفل نص عين و بصالي بترقب..
_روحي ياختي اديهم القهوة قبل ماتبرد..
_ماشي رايحه بس رجعالك تاني...
راحت تدي القهوة لأنور و يحيى و كريم..
بعدها الشاي بالنعناع زهرة وصلته لعمو علي و ابو هنا..
حتى هنا طلعت العصير و انا فضلت لوحدي... بصيت للحوض اللى فيه مواعين و حسيت اني معنديش دم سيكا
فقومت اعملهم و حطيت القهوة جنبي بشرب منها كل شويا...
_سبيهم انا كنت هعملهم دلوقتي..!
قالتها هنا اللى لسه داخله :
_لا يا هنون خليكي أنتِ اقعدي ريحي شويا..
زهرة و كريمة جم من برا و كل واحده ماسكه القهوة بتاعتها، و هنا طلعت شيكولاته و كحك و بسكويت و حاجات العروسه الجديدة دي..!
و قعدنا نتناقش في مواضيع كتير مالهاش علاقة ببعض لحد ما كريمة اتكلمت تاني
_بجد يا جودي احكيلي بقا عن جو المهندسين عندك..!
_بصي من الاخر كده جو المهندسين ده كله تناكه، ناس مغرورة و مفكره نفسها عبقرينو..
ردت هنا :
_لا بس مش كل المهندسين كده على فكرة.... عندك يحيى حتى لما كان مديري في الشغل ماكنش مغرور ولا بيتنك على حد، بالعكس بيبقا متواضع و طيب و لطيف اوي..!
زهرة ضحكت و هى بتخبط كتفها بكتف هنا :
_بتقولك لطيف يحيى لطيف ااه..!
_اه يا حبيبتي يحيى طول عمره حنين و لطيف عندك شك..!
_لا معنديش شك بس ده كان معاكِ أنتِ بس، لكن مع الموظفين التانيه كان بيزعق و يتعصب على اتفه الاسباب، انا اتدربت معاه فترة و شوفت اسلوبه..!
جودي اتكلمت تاني :
_بصي ده حتى المهندسين البنات هناك ياااباي تنحين تناحه، المهندس هناك يتكلم بغرور و يرسم الدور
لكن المهندسه هناك مش بتكلم بنادمين اصلاً بتكلم مهندسين بس..!
ردت هنا :
_ايوة بس عندك انا مثلاً مهندسه اهو بس مش نرجسية ولا بكلم مهندسين بس، يعني كل المهندسين نرجسيين الا من رحمه ربه، فيه كده و فيه كده..!
ردت زهرة و هى ماسكه قطعة شيكولاته بتاكلها :
_عندك انا مثلاً مهندسه.........
قطعت كلامها بسرعه و انا بضحك و قصدي استفزها :
_مين دي اللى مهندسه؟
معاكِ دليل؟
_دليل ايه مش فاهمة.؟
_معاكِ شهادة اتمام دراستك للهندسة يا زهرة هانم؟!
اتكلمت كريمة :
_ايوة جودي معاها حق، فين الدليل انك مهندسه..؟!
_ااه، هيبدأ التحفيل عليا أنا بقا..!
_ايوة بالظبط كده..
_طب على فكرة انا مهندسة الا سنة عادي يعني..!
_مفيش حاجة اسمها كده ياختي أنتِ كده واحده واخدة الاعدادية مش أكتر صح يا كريمة..!
_ايوة فعلاً..!
_طب على فكرة انا فكرت كده اني ارجع للكلية تاني، هي سنة بقا هقضيها و هاخد الشهادة وخلاص.. بس مش هشتغل مهندسة هبقا مصممه و هشتغل السنادي في شركة تصميم كمان..!
من فرحتي رشيت عليها مايه و انا بشطف ايدي و خلاص خلصت المواعين :
_اخيييرا رجعتي لعقلك يا زهرة..!
_يا معفه يا جودي اي المايه دي..!
طلعنا برا كلنا و اذعنا الخبر طبعاً قبل ما زهرة تغير رأيها حتى، و امها فرحت اوي حتى عمو علي فرح
كريم بصلها :
_أخيراً واحده عقلت عقبال التانية..!
زهرة شهقت :
_كريم تقصد أني كنت هبلة يعني؟!
_لا استني، كريم أنتَ قصدك اني انا الهبلة و مازلت هبلة صح؟
ضحكت كريمة و ردت علينا :
_لا يا حبيباتي هو يقصد انكم مجانين مش هُبل و واحدة عقلت والتانية لسه..!
كريم بص لأنور و همسلوا :
_هى مراتك بتحط البنزين جنب النار ليه؟!
_سيبوا الكوتشينا دي بقا و تعالوا نتفرج على حاجه حلوه..!
قالها يحيى و ردت عليه هنا:
_نتفرج على ايه
قولت انا باقتراح :
_جيبلنا مسرح مصر..!
_ماشي فكرة حلوة...
اتجمعنا كلنا حوالين الشاشة، كل واحد و مراته قعدوا جنب بعض و انا الوحيدة السنجوله هنا تتخيلوا!؟
اتحشرت جنب كريم كده بينه و بين زهرة و حطيت طبق الفشار على رجلي و كريم همسلي :
_ماتبطلي رخامه و روحي اقعدي في اي جنب يابت..!
_ايه يا كريم المعاملة دي؟!
_طب قومي اعمليلي قهوة..
_لا يا بابا ده بعينك هو هنا و هناك..!
_جودي..!
_طب بص هوجب معاك المرادي وأنتَ هتوجب معايا لما احتاجك اشطا؟
_اشطا يلا قومي بقا..!
=أنتو بتتهامسوا بتقولوا ايه؟!
_لا مفيش دي جودي قايمه رايحه تشرب صح..
_اه انا قايمه اهو..
قومت و روحت قعدت على كرسي منفرد زي الكلبه بس خدت طبق الفشار في ايدي و طبق شيبس برضوا..!
يحيى نقى حلقة من حلقات مسرح مصر و طفى النور، و الجو كان جميل كله هزار و ضحك..، و في نص القاعده عمو علي مشي هو و مراته و برضوا مامت هنا مشيت مع جوزها و فضلنا احنا و بس...، سهرنا شويا للساعه واحده كده و انا كنت هموت و انام...
ودعنا هنا و يحيى قبل مانمشي عشان هيجوا بعد اسبوعين..، و مشينا انا و كريم و زهرة،
و أنور و كريمة كمان و ليان مشيو معانا
وصلنا زهرة البيت و فضلت شويا تتكلم مع كريم و مشينا بعد مادخلت جوا..!
استغفروا
***
تاني يوم الصبح...
كنت اتكلمت مع كريم في موضوع الشغل امبارح و هو قالي هيشوف التفاصيل و هيسأل عن الشركه دي و هيقولي...
و انهارده قومت وانا مقررة اروح الجامعه بعد غيابي ده كله، بس بجد نفسيتي الفترة اللى فاتت ماكنتش أحسن حاجة..!
نزلت تحت و انا مجهزة نفسي و عرفت ان بابا نزل راح الشركة و انا فطرت مع ماما بعدها روحت الكلية، قابلت صحابي حنين و زينب و ملك اللى طول الفترة دي ماسكين المشروع لوحدهم، و انا قررت هساعد اكتر الفترة الجاية في المشروع ده...
خلصنا السيكشن اللى كان علينا و روحنا الموقع بتاع مشروع المستشفى ندرسه..!
يومي كان طويل شويا و خلصت مشاويري اخر النهار فكرت اروح لكريم الشركة ازوره لأول مره و اشوف جودي برضوا....
رنيت على بابا الاول استأذنته و كمان قالي على العنوان،
اشتريت غدا و روحتله على هناك...
روحت هناك و سألت موظفة الاستقبال على مكان مكتبه و هى عرفتني
طلعت فوق و روحت للسكرتيرة :
_السلام عليكم... هو البشمهندس كريم موجود!؟
_ايوة حضرتك، واخده ميعاد..!
_لا، انا بس حبيت اعملهاله مفجأه، انا زهرة مراته..!
البنت وقفت و ابتسمت :
_ايوه صح انا جيت كتب الكتاب، معلش مخدش بالي انك مراته...
حضرتك كنتي زي العسل..
ابتسمت :
_حبيبتي تسلمي أنتِ العسل.. ممكن ادخل له ولا معاه حد..؟!
_لا اتفضلي ادخلي معندهوش حد..!
خبطت خبطتين و سمعت صوته :
_ادخل...
دخلت انا بإبتسامة :
_مفاجئة..!
بصلي و ابتسم اول ما شفني و قام وقف :
_زهرة..!
_مساء الفل عامل ايه انهارده في شغلك؟!
قرب مني و ضمني :
_كنت مرهق اوي بس بقيت كويس اول ماشوفتك..!
_كلت.؟
_لا لسه..!
_طب تعالى نتغدا سوا.. جبت برجر و تشكن ناجتس و تشكن ماك
_طب اقعدي هنا دقيقة هبعت الايميل ده و جايلك..
_طب انا عامله حساب جودي... ممكن تخليها تطلع تاكل معانا..!
_جودي لسه مخلصه الجامعه و لسه جاية اصلا و انا كلمتها و عرفت انها اتغدت مع صحابها قبل ماتيجي..!
_تمام، طب ممكن اعدي عليها وانا نازله اشوفها؟!
_ماشي عادي..!
بعت الايميل بعدها قعدنا نتغدى مع بعض، حكيتله عن يومي في الكلية و وصلنا لفين في مشروع التخرج و سمعت اقتراحاته... قعدنا شوية نتكلم و عرفت انه مسافر بكرا بليل عشان يجيب خامات معينة للمشروع بتاعه ده... هيسافر يومين و جاي تاني...
خلصنا اكل و طبعاً مانستش السكرتيرة اللى برا و اديتها البرجر اللى كان جاي لجودي اصلاً، و كريم طلب واحدة قهوة و واحد عصير فرواولة ليا...
سبحان الله وبحمده
***
كنت قاعده تحت و انا لسه جاية من الجامعه اصلاً، كنت مشغوله و طالع عيني من الصبح و رسمنا كمان..،
انهارده كان علينا محاضرة عملي و محاضرة نظري كمان عشان كده جيت متأخر...
و اول طلب كان لمكتب كريم قهوة مظبوطه و واحد عصير فرواولة...
فتحت التلاجه الصغيرة اللى هنا دي و لقيت عصير برتقال و تفاح بس، خدت البرتقال و خلاص و عملت القهوة و طلعت....
خبطت على المكتب و دخلت، قدمت الصينية باحترام طبعاً عشان معاه ضيف..
_ايه ده اكيد مش فراولة صح.؟
ايه ده صوت زهرة، لفيت و لقيتها زهرة فعلاً..!
_زوزا... عامله ايه يابت و عملتي ايه في الجامعة انهارده؟
_روحت حضرت سيكشن و روحت الموقع بتاع المستشفى اشوفه..!
_ماجبتيش عصير فرواولة ليه يا جودي..
قالها كريم و انا بصيتله:
_معلش والله مفيش تحت هبقا ابعت فتحي يجيبه..
_خلاص ولا يهمك، تعالي اقعدي معانا شويا انا هشرب العصير و همشي عشان ورايا مذاكرة..
_مش هينفع انا لسه جاية اصلاً و مدام علياء مستحلفالي..،
عايز حاجة يا كريم...!
_لا خلي بالك من نفسك، بس هديكي ملاحظه كده، بصي لما تقدمي قهوة لحد حطي معاها كوباية ماية عشان محدش يتكلم معاكِ هنا..!
_حاضر، يلا سلام..!
طلعت و قفلت الباب ورايا.. نزلت على تحت و انا بدعك رقابتي هانت باقي ساعتين و اروح كده كده...
دخلت المطبخ ماكنش فيه حد بس لقيت المهندس مهند واقف بيعمل قهوة..
_احم.. السلام عليكم..
لف و ابتسم و هو بيقلب القهوة :
_و عليكم السلام.. ازيك يا...
سكت و كأنه مستنيني اقول اسمي
_جودي..
_ماشي... ازيك يا جودي...
_الحمدلله.. انا ممكن اعملها انا.. لو عايز يعني.
_لا عادي انا هعملها، كنت حابب اجي اعملها انا لنفسي يعني زهقت من قاعدة المكتب..!
قبل ما ارد سمعت صوت تليفون الارضي و رديت على مدام علياء :
_الو؟
_جودي اعملي تلاته قهوة سادة و واحده قهوة مظبوطه..، و ابعتيهم لمكتب عزت بيه...
قالت كده و قفلت على طول كالعاده يعني
اتكلمت مع نفسي بتأفف :
_ياربي ايه كمية القهوة دي؟
كفايه كافيين ياناس هتقعوا من طولكوا بجد..!
_تحبي اساعدك؟
ياربي ده انا نسيت انه هنا...
لفيت و بصيتله :
_ لا شكراً مش حابه اضايقك..!
_لا مش مضايق ولا حاجة، تعالي هساعدك..!
لقيته شمر قميصه بحماس :
_تعالى قوليلي اتطلب منك ايه.!
_واحد قهوة مظبوطه و تلاته قهوة سادة، شكل عزت بيه عنده ضيوف..
صب قهوته وهو بيرد :
_طب كده واحد سادة و انا هعمل الاتنين التانين سوا عشان مايبردوش، و أنتِ اعملي واحد مظبوط..
_طيب بس... يعني أنتَ اكيد عليك شغل و كده يعني..!
_لا الشغل مش هيطير يعني، ماتقلقيش..!
هزيت راسي بالايجاب و بدأت اعمل معاه القهوة ..
_تعرفي انا بحب اعمل القهوة بنفسي اصلاً، بتفكرني بايام الجامعه و ثانوي، كنت بشرب قهوة كتير.!
_اه يعني كده مش بتشرب قهوة كتير؟
ده بحد الطلبات بتجيلي كتير اوي، بتشربوا قهوة اكتر ما بتشتغلوا..!
اتكلم و غمازته ظهرت تاني عشان ابتسم شويا،
كان عمال يتكلم بحماس شويا عن ايام الجامعه و ذكراياته و كده،
ماله ده بيفتح قلبه لأي حد كده.!
خلصنا و انا جبت الصنيه و حطيت عليها الفناجين و خدت بنصيحة كريم و حطيت كوبايات مايا بعدد الفناجين...
جيت اشيل الصنيه و كانت تقيله لدرجة انها كانت هتقع من ايدي و هو لحقني بسرعه
_خلي بالك
_تقيله اوي..!
_طب هتيها كده..!
كان قريب مني اوي، و انا اتوترت فـ سيبتهاله و بعدت شويا :
_اطلعها انا!
_لا لا عشان مايحصلش مشاكل، بص هقسمها على صنيتين و رودينا جايه دلوقتي هتشيلها معايا..
_تمام..
خد قهوته و بصلي بغمازة قصدي بإبتسامة :
_اتشرفت بمعرفتك يا جودي..!
هزيت راسي بالايجاب وانا ساكته..
مشي و انا قسمت القهوة على صنيتنين و كانت رودي جت و شيلناها سوا..!
لا حول ولاقوة الابالله العلي العظيم
***
بعد ما قعدت مع كريم شويا روحت البيت، اول ماوصلت كانت الساعه سته، غيرت هدومي و قعدت استعد للمذاكرة
لقيت موبايلي رن و كان رقم غريب..، وانا مش برد على الارقام الغريبة فسيبته، رن مره و التانيه... سكت و رجع رن مره كمان
قررت ارد ولو حد بيستظرف هدي الرقم لبابا يتصرف هو..
_السلام عليكم..!
_زهرة..
كان صوت سلمى و كان باين على صوتها العياط..
_سلمى..!
_زهرة ارجوكي ساعديني، انا عملت كارثة و فارس لو عرف هيقتلني..!
قالت كده و فضلت تعيط كتير و شهقاتها بتزيد و انا قلقت عليها زيادة :
_طب اهدي يا سلمى اهدي.. عملتي ايه..؟
_انا.. انا....
فضلت تعيط و ماكملتش كلامها
قلبي وجعني عليها و قومت وقفت :
_سلمى اهدي طيب؛ أنتِ فين وانا جيالك!
_هتساعديني؟
_ايوة بس أنتِ فين دلوقتي..
_أنا في البيت...
_طب انا هجيلك دلوقتي... ماتقلقيش وهنلاقي حل ان شاءالله..!
قفلت معاها و كنت محتاره اوي، بس الاكيد انها في كارثة و مينفعش اسيبها و بعدين مابقاش ليها حد يبقا جنبها..
و فارس اخوها شكلها خايفه منه..!
ياترا عملتي ايه يا سلمى..؟
قومت لبست اي حاجة بسرعه و فكرت اني اخد معايا جودي بدل ما اروح لوحدي..!
طلعت موبايلي و رنيت عليها و هى ردت من اول رنه :
_الو يا جودي.. أنتِ فاضية؟
_لسه مخلصه شغل اهو و كنت هروح، في حاجة ولا ايه؟
_لا بس كنت عايزاكي تيجي معايا مشوار كده
_مشوار ايه..؟
_لما اقابلك هحكيلك، فاضيه بس..!
_ماشي تعالى نتقابل و نروح..
_طب انا نازله اهو، هجيلك على الشركه بس نمشي على طول..
_ماشي باي.!
قفلت معاها و نزلت تحت كانت ماما قاعده بتتفرج على الشاشه و ماسكه خيط الكوراشيه في ايدها، و بابا لسه ماجاش
_ماما، انا رايحه مشورا مع جودي و جايه ماشي؟
_رايحين فين؟
_هنروح..... بصي مشوار كده لما اجي هفهمك سلام..
_طب ماتتأخريش و خلي بالك من نفسك.!
_حاضر..
خدت عربيتي و روحت اقابل جودي...!