رواية عودة عاشق الجزء الثالث3 الفصل الثالث3بقلم منة الله الجزار
مراد رفع إيد عمر في آخر لحظة وهند صوتت.
عمر بص لمراد بغضب.. ومراد اتكلم.. أوعدك إنها هتاخد عقابها كله ما تخافش.
عمر بجنون.. سيبني أخد حق أمي وأختي دي دمرت بيتنا وما كفهاش كل ده جاية كمان تكمل سيبني أخلص عليها يا مراد.
مازن بغضب اتقدم من هند ووقف قدامها.. أبويا اتشل بسببك يا حرباية وكنتي عاملة صاحبة أمي وكنتي دايماً تعملي مشاكل بينها وبين جدي عشان تطلعي أنتِ المسكينة واتاريكِ كنتي بتتلوني على كل لون شكل مرة مع مرات عمي جليلة ومرة مع مرات عمي شادية ومرة مع أمي كنتي بتخربي بيوتنا من غير ما نحس احنا كنا خابرين زين إن ليكِ يد في اللي بيحصل يا وش البلاوي والكل كان بيسكت عشان عمي جاسر لكن انهارده أنتِ اتعديتي حدودك كلها يا هند والله في سماه ما حد هيقدر يلحقك مننا انهارده ولا حتى عمي.
هند برعب جريت ووقفت ورا جاسر.. الحقني يا جاسر العيال كبرت وبقوا ما بيحترمونيش عاوزين يأذوا مراتك قدام عينك هو ده الاحترام يا ولاد العزايزي اللي الناس بتشهد بيه ليكم صحيح ياما تحت السواهي دواهي وغير أكيد ما تعرفش فلان قال اعرفه عشرته قال لا يبقى ما تعرفهوش لو حصلي حاجة هطلع أفضحكم في البلد وأقول مدوا إيدهم على مرات عمهم وعمهم واقف وما احترموهاش.
حسناء بقرف.. يا بجحتك بجد يعني عاملة ده كله وكمان عاوزة تطلعيهم هما اللي وحشين وأنتِ ملاك بجد الموت حلال فيكِ.
شوق بقرف.. أنتِ إزاي ست ها ليه الكره ده كله ليهم وأنتِ واكلة شاربة عايشة في وسطيهم محدش بيقربلك عشان عارف إنك تبعهم تقومي تعملي كدا فيهم.
كايا.. عشان جدي حرمها من ولدها اللي هي أصلاً ما مخلفتهوش.
الكلام وقع على الكل بصدمة.
جاسر.. تقصد إيه؟
مراد.. هند ما بتخلفش أصلاً يا بوي وورد تبقى بنت العزايزي مش بنت الساعي زي ما هند قالت ورد تبقى أختك يا عمر اللي هند خطفتها زمان وادتها للساعي اللي كانت بتحبه وقالتلو اخلص منها ولو حد سألك قول إنها بنتك والساعي رماها على شط الترعة وجري لما لقى ناس جايين والست ثنية وجوزها هما اللي شافوها لما كانت بتعيط وأخدوها وربوها عشان كدا هند كانت عاوزة تخلص منها عشان ورد لو رجعت لبيت العزايزي من تاني هتبقى أكبر تهديد ليها.
هند بجنون.. عرفت ده كله منين؟
مراد بشر.. مفكرني مغفل أنا سيبتك تلعبي لحد ما تجيبي آخرك معايا ومفكرني ما أعرفش مين السبب في الحريق اللي كانت فيه مايا بعد ما اتفقتي مع الخدامة تروح تقولها إني عاوزها في البيت اللي ورا لوحدها وما تقولش لحد إنها جاية ليا ومايا راحت هناك وهناك أنتِ حبستيها وولعتي في البيت كنتي عاوزة تخلصي منها عشان تدمريني.
حسناء شهقت بصدمة..
كايا بغضب.. غير إنك كنتي خاطفاني أنا وورد بعد ما اتفقتي مع مغاوري إنه يخطفها ويخلصك منها وبعتيلي رسالة بالمكان من رقم مجهول كفاعل خير وأنا روحت ولحقت ورد واتاريه كان كمين ليا عشان تخلصي مني أنا كمان والوصية اللي باسمي تنكسر وهي تاخدها وهي فعلاً أخدتها بالتزوير توقيعي مع المحامي وانهارده كانت خلاص هتخلص مني لولا ربنا بعت لينا مراد ورجالته ولحقونا على آخر لحظة وانكتب لينا عمر جديد.
جليلة بغضب.. بقى أنتِ يطلع منك كل ده وأنا كيف الهبلة كنت مصدقاكِ وماشية وراكِ كيف العبيطة وأنتِ كنتي عاوزة تدمري ولادي.
عمر بغضب.. وغير كدا يا مرات عمي كانت بتديكِ علاج غلط أصلاً عشان تخلص منك.
جاسر كان واقف ومش مصدق إن ده كله يطلع من هند وكان بيبصلها بذهول.
جليلة بصدمة.. غلط كيف؟
شوق بغضب.. كانت بتبدل الأدوية بتاعتك بأدوية تانية أنا ومايا شوفناها مرة كانت في الأوضة بتاعتك وأحنا كنا جايين نطمن عليكِ يوم الحفلة لقيناها بتفرغ عليه الدوا بتاعتك وكانت عمالة تتلفت حواليها لحد يشوفها وجابت علبة دوا تانية من جيبها وفرغت فيها البرشام في العلبة بتاعتك وأخدت البرشام وحطته في جيبها وقفلت العلبة تاني وخرجت احنا دخلنا بعدها وأخدنا البرشام ده يتحلل وكان لازم يبقى عمر معانا لأن احنا كنا شاكين فيها وإذا طنط بتاخد العلاج كل يوم إزاي مفيش تحسن ولما شوفنا كدا عرفنا عمر بكل حاجة ومايا اتكلمت مع الدكاترة أصدقاء أبوها وقالت ليهم الحالة إزاي وكتبوا ليها على أدوية كنا بنحطها ليكِ في العصير أو لبن من غير ما تعرفي ولا حد يعرف هو ده اللي خلى حالتك في تحسن وإنك قدرتي ترجعي تشوفي من تاني حتى لو كان بسيط.
حسناء.. مايا طول عمرها جدعة مع الكل حتى اللي بيكرهوها أنتِ ما كنتيش قابلة إنها تكون مرات ابنك أو من عيلتك حتى وهي كانت كل همها إنك ترجعي تشوفي من تاني على ما أظن إن الدنيا كدا نورت وعرفنا مين الظالم ومين اللي كان مظلوم يا طنط وأهي هي سابت ليكم مصر ومشيت ياريت تكوني بقا ارتحتي يا طنط أنتِ والاستاذ مازن كلكم اتفقتوا على إنها ما تنفعش لمراد لإنها سبب هلاكه الكل كان بيحاربها وأهي سابت ليكم المعركة خلاص ومشيت خالص ياريت تكونوا ارتحتوا.
جليلة حست بندم.. وإن البنت اللي كانت بتحاربها ما كانتش مجبورة إنها تعمل كل ده عشانها وقد إيه هي كانت قاسية عليها.
حسناء بصت لهند بغضب.. وفي سر كمان لازم الكل يعرفه.. عشان محدش يعيش في الدور ويحط كل حاجة على مايا.
مراد بشك.. سر إيه؟
حسناء كملت.. مش مايا اللي بلغت عنك يا مراد عشان تتحبس مايا كانت ضحية حد بلغ باسمها هي ومايا اللي شالت الليلة وما رضيتش تقول حاجة عشان أنت كنت طلقتها واتجوزت أنجي.
مراد بجنون.. مين اللي عمل كدا؟
حسناء.. أقول ولا تقولي أنتِ يا ست هند.
مراد بصلها بصدمة.. هند.
حسناء بسخرية.. أيون هند هند هي اللي بلغت عنك يا مراد باسم مايا عشان تطلقها وتخرب حياتك أنت وهي بعد ما كانت عارفة بحكاية المحصول اللي اتحرق واللي اتحرق ده كانت هند اللي وراه أخدت المحصول وباعته وحرقت الأرض عشان الكل يفكر إنه اتحرق قالت أخلص منها إزاي أخلص منها بكدا.
مراد راح لعند هند وكان جاسر في النص بينهم بصله وهند كانت ماسكة في جاسر أوي ومرعوبة وعمالة تعيط شكل مراد ما كانش يبشر بالخير أبداً.
جاسر بعد إيديها عنه وده صدمها أكتر ومراد ابتسم بغل ليها.
جاسر بغضب.. أنتِ اتجاوزتي كل حدودك يا هند وأنا ما عادتش هحميكِ تاني شيلي نتيجة عمايلك السودة.
كايا.. وهي كمان اللي كانت زاقة الراجل اللي ضرب عليك نار يا بوي عشان يخلص منك وتاخد هي كل حاجة ومفكرة إن مراد مش هيرجع تاني وأنا خلاص موت وأنت بين الحياة والموت هي اللي كانت هتكسب كله.
سكر بغضب.. أنتِ الشيطان يتعلم منك بجد إيه كمية القرف دي أنتِ مستحملة نفسك إزاي؟
هند بجنون.. آه أنا عملت ده كله أشمعنا كلكم تخلفوا وأنا لا اتحرمت إني أكون أم كل واحدة معاها عيالها وأنا واحدة عقيمة زي ما انقهر قلبي كنت عاوزة أقهركم عشان تحسوا بوجعي هو كان سهل عليا كل واحد يجي يترمي في حضن أمه وأنا محدش بيحبني ولا إني أسمع كلمة ماما.
ورد بدموع.. ده قضاء ربنا وقدره ده كان اختبار من ربنا ليكِ وأنتِ فشلتي فيه ربنا بيختبرنا في أعز ما لينا.
هند بجنون.. ما أنتِ مش هتحسي بيا يا بنت العزايزي أنا طول عمري عايشة في فقر ولما كبرت جيت اشتغلت خدامة هنا ولما اتجوزت الساعي قولت هحس إني أم معاه ما خلفتش اطلقت منه ولفيت على أبوكِ وأبوكِ بيخلف برضو ما خلفتش منه ولما روحت أعمل تحاليل قالولي إنك ما بتخلفيش.. وقتها اتصدمت وجبت عيل من الملجأ وقولت إنه ابني وابن مكرم ووقتها حامد عرف وقتله قدام عيني..... هههههه.
كانت بتتكلم وبتضحك بهستيرية.
هند كملت.. وخطفتك من أمك واديتك ليه عشان يخلص عليكِ عشان أمك أشمعنا يكون ليها عيال وأنا لا.
ورد صعبت عليها.. بجد ربنا يشفيكِ.
هند راحت جابت سكينة من على السفرة وقالت.. هموت ليكم نفسي عشان ترتاحوا.
بس محدش اتحرك ولا قال ليها حاجة.. رجعت خطوة لورا بصدمة وقربت من جاسر وهو كان واقف بجمود.
هند.. جاسر هموت نفسي.. كانت بتعيط.
جاسر ما رمش حتى... هند بجنون.. مش هتدافع عني ولا هتقولي لا ما تقتليش نفسك وراحت شدت ورد من رقبتها وحطت على رقبتها السكينة بشر والكل بصلها بحذر.
كايا بجنون.. سيبيها يا هند.
هند بهستيرية.. هتموت انهارده مش هموت لوحدي.
عمر بغضب.. ابعدي إيدك عن أختي ولا هخلص عليكِ يا هند.
مراد.. طيب اهدي وهنعمل ليكِ اللي أنتِ عاوزاه بس سيبيها.
هند بسخرية.. مراد العزايزي بنفسه بيقولي كدا لا هموتها وأحرق قلبكم عليها.
مراد غمز لمازن ومازن فهم ورجع لورا وهما واقفين قدام هند وبيلهوها ومازن راح من الشباك ونط وخرج بره البيت وجري على الشباك اللي كان ورا هند ودخل منه
ومسك إيد هند وكايا شد ورد من بين إيديها وأخدها في حضنه.
هند كانت ماسكة السكينة وبتحاول تفك إيديها من مازن ومازن كان ماسك أوي وبيحاول ياخدها منها والكل كان خايف عليه منها.
جاسر بجمود.. هند أنتِ طالق بالتلاتة.
هند سمعت كدا وبصتله ومازن استغل الفرصة وأخدها منها وزق هند في الأرض.. وقعت.
مراد نزل لمستواها..بغضب.. أنا هعرفك إزاي تعملي ده كله محدش هيحميكِ مني.
وشدها من شعرها بقوة وجرجرها وحسناء طلعت فونها وصورتها فيديو عشان توريه لمايا وتحس إن حقها رجع من تاني الكل كان شمتان فيها.
مراد بجنون وغضب شديد.. راح سابها في نص الطريق وراح جاب حصانه وربط الحبل بتاعه في شعرها وهند كانت مرعوبة.
مراد.. هخليكِ عبرة لمن يعتبر ويتجرأ إنه يقرب من عيلتي تاني.
وطلع على الحصان وبدأ يجري بيه وهند مجرورة وراه وبتصوت والبلد كلها كانت بتتفرج عليها والكل كان فرحان فيها هي كانت أذى للكل مش بس عيلة العزايزي.
ومراد ما اكتفاش بكدا ده ركبها حمار خلف خلاف وخلى العيال يرموها بالطوب بقت تتعور وتصوت وتقوله ارحمني.
مراد بسخرية.. ما عنديش رحمة يا هند أنتِ اللي ابتداتي والبادي أظلم.
هند خلاص كانت بتطلع في الروح.. بعد ما جات ليها طوبة كبيرة في رقبتها وكسرت ليها رقبتها وحصل ليها نزيف داخلي من كتر الضرب والجر بتاع الحصان وتنطيطها في الأرض.
مراد زفها في البلد كدا ولسه ما كانتش شافت وش مراد الحقيقي هل يا ترى هيعمل فيها إيه؟ يتبع.