رواية في عشقها هلاكي بقلم زهرة الربيع
رواية في عشقها هلاكي الفصل الثلاثون30 بقلم زهرة الربيع
قبل ما مختار يلحق يدفع الحارس كان عزيز مسك سلاحه وضرب رصاصه صوتها سمع في المكان كله
كان قاصد يخلص على روعه بسرعه لما لقى الدنيا باظت ....بس مختار فاجأه ووقف قدامها وفي اقل من ثانيه كان شادد الحارس فخري قدامه والرصاصه جات فيه
عزيز اتصدم ولسه هيضرب تاني مختار زق الحارس عليه وقعه على الارض وهجم عليه بقى يحاول ياخد منه السلاح وكان الاشتباك عنيف بينهم
رجالة عزيز مسكو اسلحتهم بسرعه وواحد منهم قال بزعيق....مكانك يا مختار اقفو مكانكم كلكم
وهنا سمعو صوت حمزه بيقول بزعيق لا انتو اللي تقفوا مكانكم وولا حركه
واتصدموا كلهم بقوة الشرطه ومعاهم فايز بيقول بسرعه..اهم اهم يا ماهر اقبض عليهم كلهم
رجالة عزيز رموا الاسلحه على الارض بذهول
ومختار ابتسم بسعاده وجري حضن اخوه وقال ....جدع يلا برافوا عليكم ...والله انا ما مصدق ان بقت لكم فايده
حمزه ضحك وحضنه بقوه وفايز جري على روعه حضنها بس اتفاجا بيها متجمده مكانها وعيونها مليانه دموع ومش بترد واول ما ضمها جسمها نزل على الارض زي ما تكون حتتة قماش
قال بصدمه..روعه مالك مالك يا حببتي... عملتوا فيها ايه يا كلاب
هنا مختار خد باله لمنظرها وجري عليها وقال..... روعه ...روعه مالك ..مالك يا بت فيكي ايه
روعه بصتله ورفعت ايدها لمست وشه وانفجرت في البكا وقالت....كنت ...كنت فكراه ضرب عليك...كنت فكراك.....حرام عليك ليه بتعمل فيا كده ليه
وبقت تبكي بقوه
مختار اتفاجأ مخدش باله من اللي حصل
لما وقف قدامها وشد الحارس قدامه هيه من وقتها اتصدمت وكانت فكراه هو اللي اتصاب
ورغم منظرها اللي وجعه لكن حس بسعاده كبيره جواه لانها اترعبت عليه كده.....شدها بقوه لحضنه وبقى يضمها وعيونه مليانه دموع وهيه بقت تبكي بين اديه
فايز فرك دماغه بغضب وقال بصوت عالي .....هستناكم في العربيه متتاخروش
روعه دفعت مختار ببطا ومسحت دموعها وقالت بتعب ...كمل انت يا عمي انا ....انا هروح عند فايز
عمها هز راسه بتفهم وقال ...ماشي يا حببتي
وقرب من مختار وفاجاه لما حضنه وقال.....شكرا يا بطل شكرا
وكمان هخليهم يعملوك شكر خاص ... اللي عملته مش هيعدي كده
مختار ابتسم وقال.....انا مش عايز شكر ...عايز حاجه تانيه ...اظن انت تعرفها
عدلي ابتسم وقال...عارف...بس مش وقته ...نلم الدنيا هنا ونشوف لو لك نصيب هتاخده
وراح مع القوه بقم يطلعو رجالة عزيز وابنه واحد واحد
عدلي بص لعزيز بغضب وقال..مش هخليك تشوف النور تاني...صحيح معرفتش احبسك بتهمة السم اللي بتاجر فيه ....لكن تهمة خطف لواء ورائد من الشرطه مش تهمه هينه ...ولسه متعرفش اللي مستنيك
عزيز كانت دموعه بتنزل وقال بغل..مش هاممني ...كل اللي كنت عايش عشانه هو حق ابني اللي سرقتو شبابه...وطالما معرفتش اجيبه مستاهلش اعيش اصلا
عدلي ابتسم بسخريه وقال...ابنك انت اللي سرقت شبابه بالقرف اللي شغلته فيه ....هاتوه يارجاله
وهما بيطلعوه عزيز دفع الراجل اللي ماسكه ومسك السلاح وحطه في بوقه وقتل نفسه بطريقه بشعه في ثواني
بقلم....زهرة الربيع
مختار اتسعت عنيه بذهول وعدلي وقف متجمد محدش كان يتوقع اللي عمله ابدا
بعد فتره من العناء والاحداث اللي توقف القلب اللي حصلت في المزرعه طلع مختار وحمزه
وفضل عدلي مع ماهر ورجالة الشرطه علشان يكمله اجرئات ملابسات ومعاينة القضيه ويتحفظو على جثة عزيز
مختار راح عند روعه لقا اخوها بيشربها ميه ولسه لونها مخطوف
اتكا على العربيه وقال بغمز...واد يا فايز مكنتش اعرف انك غالي كده عند رائد
روعه هزت راسها بياس ومردتش عليه وفايز قال باستغراب...رائد مين....هو انت اتخبطت على دماغك جوه .....اركب يلا خلينا نمشي من ام الشمس دي
مختار ضحك بخفه وقال .....نركب ....منركبش ليه
وركبو كلهم ومختار كان سايق بس عيونه متشالتش من على روعه وكل شويه يبص عليها في المرايه بس هيه كانت بتتحاشى تبصله ومكسوفه منه بعد اللي حصل
فحاولت تغير الموضوع وقالت..هو انتو اللي طلبتو البوليس
حمزه قال ..... ايوه ...لما مختار جابنا على العنوان اللي انتو فيه فايز كلم الظابط ماهر
مختار قال .....بس والله برافو عليكم ياض.... ما يجبها الا رجالها
روعه قالت بغضب..... بس كان نفسي اكلبشه لحق نفسه مني
وبصت لمختار بطرف عينها وقالت....اصل انا عندي هوايه اشوف الغلطان متكلبش ومشرفني في الزنزانه
مختار وقف العربيه فورا لما قالت كده واتسعت عنيه بقوه
وافتكر الجمله دي نفسها لما كان في السجن ومرت عليه واحده من افراد الشرطه وقالت نفس الجمله دي
اتسعت عنيه وهو بيبصلها هيه نفس البنت
قال بصدمه ....اخيرا افتكرتك انتي الظابط اللي عاكستك ...مريتي علينا لما كنت مسجون.... ازاي كنت ناسي
روعه ضحكت وقالت...اخيرا افتكرت
فايز قال بغضب...عاكستها ازاي..... انتو ليه بتقرطسوني عيني عينك وناقص تشترولي طقم قرون.... ايه يلا محدش هامك يلا
مختار ضحك وساق تاني وقال .....فيه ايه يا فيزو يعني ده بيبقى مرازيه مش معاكسه قوي ...كل الحكايه اني لما كنت مسجون هيه مرت علينا وانا لقيتها صغنونه في لبس الظابط كده ولسانها اطول من برج ايفل وكانت مستقصداني ..فرزلت عليها بكلمتين يعني
روعه قالت ..انا كنت رايحالك مخصوص... لما عمي قالي ان اللي بيدور عليا موجد في السجن ..ومن يومها وعرفت ان المهمه هتبقى اصعب مهمه هتعدي عليا في حياتي
مختار ضحك وقال....دي كانت احلى واطعم واروع مهمه عدت عليا في حياتي
فايز بصلهم بغضب وحمزه حمحم وقال بضحك...ياابني يا ابني لتحصله حاجه عايزين نريح مش قادرين نروح مستشفيات...اقولك على حاجه متنطقش ولا كلمه لحد ما نوصل
مختار ضحك وبص للبسها كانت لابسه جينز و تيشرت احمر وحب يغيظ فايز وقال...خلاص ولا حرف ...اقولكم هغنيلكم من البوم دياب الجديد
وقال بطريقه وقحه مش طريقة غنا
الاحمر شكله عليكي خطير وجميل خالص...يا فراوله انا نفسي اشربها عصير عطشان خااااالص
فايز قال بغيظ...عطشان يا حبيبي من عنيا
وفتح القزازه وكبها فوق دماغه غرقه وهوو بيقول
اشرب بالهنا
مختار شهق بصدمه وهو مش مصدق اللي عمله وروعه وحمزه ضحكو من قلبهم
عند نجوى كانت نايمه على الارض في نفس المكان ودموعها بتنزل بصمت
بتفكر في حمزه وكام مره غلطت علشان توصله ومفيش فايده
بس انتفضت من مكانها لما سمعت الباب بيخبط جامد هيتقلع من مكانه
جريت فتحت واتصدمت لما شافت نسيم قدامها شعرها منكوش ووشها كله بينزف ودماغها ...ومتبهدله جدا فوق الوصف ومش قادره تاخد نفسها
نسيم اول ما الباب اتفتح وقعت على ركبها وقالت بالعافيه وكانها بتطلع في الروح....الحقيه ....الحقيه ارجوكي
نجوى نزلت على الارض جمبها وهيه بترتعش ودموعها بتنزل بصدمه شديده وقالت... عمل فيكي ايه الحيوان ده ..ازاي..ازاي بهدلك كده ..انا اسفه..... اسفه ارجوكي سامحيني
نسيم مسكت في درعاتها وقالت بتعب....مش وقته....هيقتله ..هيقتله ..انا مش عارفه البيت
نجوى قالت باستغراب ودموع ...مين هيقتل مين . .استني هجبلك ميه
بس نسيم مسكت فيها بقوه وقالت...لا...لا الحقيه ...راح يقتله ...جمال هيقتل حمزه
نجوى اتسعت عنيها بذهول وقالت....انتي بتقولي ايه ....طب اهدي اهدي وفهميني
نسيم قالت بتعب.... راح يقتله.... ارجوكي ساعديه.... انا مش عارفه فين بيت حمزه ...بابا كان يقول في المهندسين مش عارفه غير كده
نجوى قالت برعب .....قومي معايا انا اعرف بيته ....بس الاول هكلمه على الرقم اللي كلمني بيه علشان اخدك
نسيم هزت راسها بسرعه ووقفت بالعافيه وقالت .يلا كلميه بسرعه
نجوى مسكت التليفون وبقت تتصل على رقم فايز اللي حمزه كلمها منه
عند مختار وقف قدام بيتهم وقال ......يلا يا جماعه وصلنا
فايز قال باستتغراب .....احنا فين...ليه مرجعناش البيت
مختار قال..... ده بيتنا هنقعد نريح وتتغدو وبعد كده براحتكم يلا انزلو
ولسه هينزلو تليفون فايز رن برقم نجوى قال لحمزه ...ده تقريبا رقم البنت اللي كلمتها من تليفوني
حمزه مسك التليفون بسرعه وقال بفرحه...دي ممكن تكون نسيم
ورد وقال..... الو
نجوى قالت بسرعه وخوف...حمزه مترجعش على البيت..... جمال مستنيك هناك وحالف يقتلك
حمزه احتدت عنيه بغضب ميتوصفش وقال....نسيم معاكي
نجوى قالت بسرعه....ايوه هيه معايا.... بس بقولك جوزها عندك في البيت ..متروحش
حمزه ابتسم بطريقه تقلق وقال من غير تفكير في اي حاجه....يشرف وينور ....انا اصلا مستنيه
وقفل في وشها ونزل
مختار نزل وراه بقلق وقال لفايز ..... خلاص خد روعه وروحوا انتو يا فايز
وجري ورى اخوه وهو بينادي عليه وبيقول.... حمزه..حمزه استنى انا بكلمك يا حمزه
بس حمزه موقفش ودخل البيت ومختار وراه
روعه وفايز كمان مرضيوش يسيبوهم لوحدهم ونزلو وراهم
بقلم...زهرة الربيع
عند نسيم حطت ايدها على دماغها وبقت تبكي بقوه لما سمعت اللي قاله حمزه
ونجوى كانت مرعوبه وبقت تتصل تاني بس محدش بيرد
قالت لنسيم....... احنا لازم نبلغ البوليس
نسيم قالت ببكا...لا ...هيتهموا حمزه بخطفي وهنحطه في مصيبه.....احنا لازم نروحله.... ارجوكي اديني العنوان
نجوى قالت بارتباك...طب يلا هنروح بعربيتي
عند حمزه اول ما دخل البيت لقى غانم حاضن بنته ومرعوب من جمال اللي رافع عليه السلاح
غانك اول ما شافه قال بدموع...حمزه
حمزه بصله بنظرة غضب واسف و اتجاهله تماما وبص لجمال وقال بغضب.....اهلا يا معلم جمال.... اتفضل منورني
جمال بصله بغضب شديد وقال ....واخيرا....اخيررا شوفتك يا دكتور....... انصحك تودع حبايبك بقى لانك هتبقى مجرد صوره على الحيط
حمزه ضحك وقال بسخريه..ومين بقى الي هيعلقني على الحيط..انت
جمال رفع السلاح في وشه وقال بغضب اعمى....... اه انا يا ابن الديب..ولا فاكر انك هتخطف مراتي من قلب بيتي وهعديهالك .....انت خلاص اصلا بقيت في تعداد الموتى من وقتها
حمزه اتنهد وقال...تمام....خلينا نحسبها بالعقل يا جمال.... انت ولا بتحب نسيم ولا عايزها..انت عايز تفرض سيطره ملهاش اي لزمه..وبتضيع عمرك مع واحده عمرها ما هتحبك ولا هتتقبلك ...فبدل ما نفضل نلف وندور ورا بعض خلينا في اللي يجيب نتيجه ونطلع بمكسب احنا الاتنين....انا هدفعلك فلوس ابوها....وهدفعلك ذياده عليه اي مبلغ تطلبه كمان في مقابل انك تطلقها وتنسى انها كانت مراتك في يوم
جمال ضحك جامد وقال.....ده بجد..انت عايز تشتري مراتي بفلوسك ...ده انا مشوفتش في بجاحتك ..لا خد انت اللي هيحصل سيناريو اجمد من اللي انت قولته..انا هقتلك دلوقت....وهطلع منها زي الشعره من العجين بطريقتي ....ونسيم عمرك ما هتشم ضفرها حتى ....وهتموت بحسرتك .....وهيه لو مسمعتش الكلام تبقى تقابلك في الاخره
مختار اتدخل وقال بغضب ...نزل السلاح ده يلا...... متفتكرش انه فرداني.... ده انت لو مسيت شعره منه مش هتطلع من البيت ده حي
جمال ابتسم بسخريه وقال....انا داخل هنا وعامل حسابي يا قاتل يا مقتول متتعبش نفسك
مختار قال بغضب...... تبقى انت المقتول ياروح امك
جمال لسه هيرد اتصدم بصوت نسيم قالت بصراخ..جمال..اوعى اوعى ابوس ايدك..لا...لا علشان خاطري
الكل التفتو لنسيم واتصدمو بمنظرها وروعه شهقت بخضه وجريت عليها
اما حمزه اول ما وقعت عيونه عليها وعلى اثار الضرب والبهدله اتسعت عنيه بقوه ولمعت بالدموع والتفت لجمال بسرعه وغل ميتوصفش ووووو