تاني يوم الصبح. . قاعدة جني على سفرة الأكل سرحانة، ونور طالعة من المطبخ شايلة أطباق الأكل وتحطهم على السفرة.
نور بحنق
قومي يا جني صحي أختك علشان تلحق تفطر قبل ما تنزل.
جني فضلت ساكتة كأنها ما سمعتش حاجة. بصّت نور لها باستغراب وهي بتقول.
نور
إنتِ يا حجة أنا بكلمك.
جني انتبهت، بس مش على صوت نور، انتبهت على صوت خبط الباب.. قلبها دق جامد وحست إن مازن هو اللي على الباب جاي يودعهم زي ما قالها.
نور باستغراب
غريبة مين اللي هييجي لنا بدري كده..
اتحركت نور علشان تفتح الباب، وجني وقفت وهي حاطة إيديها على قلبها، اتلغبطت واتوترت لما شافت مازن هو اللي على الباب فعلًا وماسك شنطة هدومه.
نور باستغراب
خير يا مازن يا بني في حاجة؟ أصلًا مش من عوايدك تيجي لنا بدري كده.
بص مازن ناحية جني بحزن، جني اتلغبطت أكتر وفضلت واقفة مش قادرة تفهم نفسها وحالها اللي اتقلب في لحظة.
مازن بمرح مصطنع
معلش بقى يا ست الكل أزعجتك على الصبح، بس هو ما كانش ينفع أمشي من غير ما أسلّم عليكي.
نور تاخد بالها من شنطة الهدوم اللي مازن ماسكها، تبص له باستغراب وهي بتقول.
نور
خير يا مازن، ماشي رايح فين؟ هو إنت هتسافر تاني ولا إيه؟
مازن تنهد بحزن
لا والله يا ست الكل، أنا هنقل من هنا وممكن أسافر برّه مصر واستقر هناك.
نور باستغراب
تسافر برّه مصر ليه يا بني؟ هي مصر زعلتك في حاجة؟
مازن بص ناحية جني بحزن وهو بيقول.
مازن
نفسي مصر تسمعني مرة واحدة بس وتفهمني صح، وأنا والله مستعد أقلب العالم علشانها.
جني اتكسفت منه واتلغبطت وفضلت واقفة زي ما هي… وفجأة سمعوا صوت خبط جاي من غرفة وسام. الكل بص بدهشة واستغراب ناحية الغرفة، ونور جريت وهي بتقول بقلق، وجري وراها جني ومازن.
نور
بسم الله الرحمن الرحيم، خير اللهم اجعله خير.
الكل وقف قدام باب غرفة وسام، ونور بتخبط على الباب وهي بتنادي عليها.
نور بقلق
وسام… وساااام… وسام ردي عليّ ولا افتحي الباب.
بس وسام ما بتردش ولا في أي صوت.. جني قربت من الباب وهي بتقول بقلق.
جني
وسام حبيبتي إنتِ سامعاني؟ وسام ردي عليّ لو سمحتي.
برضه مافيش رد.. مازن قرب من الباب وهو بيقول.
مازن
ابعدوا كده لو سمحتم، هكسر الباب ده.
نور وجني بعدوا عن الباب، ومازن دفع الباب برجله لحد ما كسره. وقف الكل مصدوم لما شافوا وسام شنقة نفسها في المروحة. مازن جري عليها ورفعها من رجليها.
نور بصويت
يااااااا لهووووي بنتيييي!
جني بصدمة
وسااااااام!
مازن بزعيق
مش وقت الصدمات يا جماعة، ساعدوني أنزلها، لسه حيّة ما تقلقوش.
جني ونور جريوا علشان يساعدوا مازن.
مازن
ارفعوها من رجليها وأنا هطلع على الكرسي أفك الحبل.
وبالفعل نور وجني رفعوها، ومازن وقف على الكرسي وفك الحبل من على رقبة وسام، وشالوها مع بعض وحطوها على السرير.
مازن
حد يناولني إزازة برفان بسرعة، هحاول أفوّقها، لو ما فاقتش هنضطر ناخدها على المستشفى.
جني جريت وجابت إزازة برفان من على التسريحة وناولتها لمازن. مازن بص لها وهو بياخد الإزازة منها، اتوترت وجريت تقعد جنب وسام وهي منهارة في العياط. مازن رش البرفان على أنف وسام. وسام فاقت وفضلت تكح جامد، بصت لهم بكسوف وفضلت تعيط.
نور بعياط
ليه كده يا بنتي؟ حرام عليكي، هو ناقصه حرقة قلب؟ ليه مصرة تتعبيني وتتعبّي قلبي معاكي يا وسام؟
وسام بدموع
ليه أنقذتوني؟ كنتوا سيبوني أموت وهترتاحوا مني ومن مشاكلي.
جني بدموع
وإنتِ كده كنتِ هترتاحي يعني؟
وسام بعياط
على الأقل كنت أنا هرتاح من وجع القلب ده. أنا حبيته أوي، ليه عمل فيّ كده؟ وفي الآخر رايح يخطب واتصل بيا يعزمني على خطوبته كمان وكأن مافيش حاجة حصلت.
مازن بهدوء
يعني هو واطي وندل ورايح يخطب ويأسس حياته، وإنتِ عاوزة تنهي حياتك بسبب عيل زي ده؟ والله إنتِ أغبى بنت شوفتها.
نور بحزن
معاك حق والله يا بني، ربنا يهديكي يا بنتي.
وسام بصت بدموع ناحية مازن.
وسام
لو كنت جرّبت طعم الحب قبل كده ما كنتش هتقولي كده.
وفي اللحظة دي بصّت جني ناحية مازن، اللي بص لها هو كمان وقال بوجع.
مازن
ومين قالك إني ما حبيتش؟ أنا بقى ليّا خمس سنين بحب في السر، ولسه عايش على أمل حبيبتي تحس بيا، بس… للأسف تعبت من الانتظار، علشان كده قررت أفقد الأمل، ولحد اللحظة دي لسه عشمان في خير.
جني اتلغبطت جامد وفضلت تفرك في إيديها، ونور قالت.
نور
ومين الهبلة دي اللي خسرت راجل عسل زيك يا مازن يا بني؟
مازن
هي والله هبلة ومش عارفة قيمة النعمة، بس هقول إيه؟ كل شيء قسمة ونصيب، وأنا راضي بنصيبي. يلا أنا همشي بقى، أشوف وشكم على خير. وإنتِ يا وسام اعقلي وعيشي، زي ما بيقولوا: اللي خسرنا خسر دلعنا.
مازن سابهم وطلع من الغرفة. جني وقفت متلخبطة وفضلت تفكر شوية، وبعدين جريت ورا مازن وهي بتقول.
جني
هروح أجيب ميه لوسام.
___________
في الصالة
مازن شال شنطة هدومه من على الأرض وتحرك علشان يطلع من الشقة، وقف فجأة لما سمع صوت جني بتنادي عليه.
جني
استني يا مازن…
وقف مازن وبصلها باستغراب.
مازن
خير؟ محتاجة حاجة؟
جني وقفت قدامه وهي بتفرك في إيديها بخجل.
جني
كنت… كنت… كنت عاوزة أقولك إنّي…
قاطعه مازن عن الكلام وهو بيقول:
مازن
تقبلي تتجوزيني يا جني؟ بوعدك هتغير والله، وهكون زيّك مش علشانك، علشان ربنا… أنا جربت كل حاجة في الدنيا ومش همّني حد، وما لقيتش الراحة غير امبارح لما اتوضيت وصليت ركعة واحدة، ساعتها بس فهمت إن الدنيا كلها في كفة، والركعة اللي ركعتها في كفة.
جني ابتسمت وهي بتقول:
جني
طيب، والخمرة والسجاير والبنات اللي بتكلمهم دول؟
مازن
ما أنا بقولك هتغير علشان ربنا، أكيد هطهر نفسي وحياتي من كل اللي بعمله. بس إنتِ موافقة تاخدي بإيدي معاكي للجنة؟
جني بسعادة
أكيد طبعًا، في حد أهبل يرفض النعمة؟
مازن بسعادة
أفهم من كده إنك موافقة عليّ، موافقة تتجوزيني؟
جني بكسوف
لو أمي وافقة، أنا موافقة…
مازن يجري ناحية غرفة وسام وهو بيقول بفرحة وبصوت عالي:
مازن
يا خالة نوووور يا ست الحبايب احضري أبوس إيدك!
نور تطلع من الغرفة وهي بتقول باستغراب:
نور
فيه إيه مالك يا مازن؟ نسيت حاجة ولا إيه؟
مازن بمرح
إيوه، نسيت قلبي بين إيديك، أحب على ايدكي أديكوهلي.
نور تضربه بالقلم وهي بتقول بغضب:
نور
إنت اتجننت ولا إيه يا مازن؟ بتخرف بتقول إيه ده؟ أنا من دور أمك، عيب كده.
مازن بص ناحية جني اللي بتحاول تمسك نفسها علشان ما تضحكش.
مازن
تقريبًا كده أمك فهمت غلط.
جني بضحك
ما هو إنت اللي غلطان، بصراحة اتكلم بلدي علشان تفهم.
نور لغيظ
في إيه منك لها؟ هو أنا عيلة في وسطكم؟ حد يفهمني إيه الهبل اللي الأستاذ بيقوله ده؟
مازن يبص لها وهو بيقول:
مازن
بصراحة كنت بطلب إيدي بنتك بطريقة كلاسيك، بس إنتي قلبتي الكلاسيك لطقم كسات.
نور باستغراب
مش فاهمة برضه، هتطلب إيد بنتي مين وهتعمل بيها إيه؟
مازن بسخرية
هألعب بيها استخماية… هو في إيه يا حجة، في رأيك لما اتطلب إيديها للجواز هكون هعمل إيه بيها؟
نور باستغراب
وانت عايز تتجوز بنتي مين برضه؟
مازن يشاور ناحية جني وهو بيقول:
مازن
القمر اللي واقف قدامك ده….
نور تزغرد بفرحة وبصوت عالي، وجني ومازن يبصوا لبعض بسعادة.
🌹🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام 💚
هنا في كرنفال الروايات ستجد كل ما هوا جديد
حصري ورومانسى وشيق فقط ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا ليصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام 💚
هنا في كرنفال الروايات ستجد كل ما هوا جديد
حصري ورومانسى وشيق فقط ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا ليصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله